मकवमानपुर/ राष्ट्रिय सभा अन्नरगतकाे प्रत्यायोजित व्यवस्थापन तथा सरकारी आश्वासन समितिका सभापति राम नारायण विडारीले शोषित पीडित र निमुखाको आवाज बन्दै सत्यतथ्य र निष्पक्ष समाचारको संवाहकका रुपमा सञ्चार जगतले आफ्नो पहिचान बनाउन आग्रह गरेका छन् ।
खोजमुलक समाचार प्रकाशन कम हुने हुँदा खोजमुलक विषयमा केन्द्रित हुनपर्ने उनको भनाई थियो । विडारीले समाजको लागि आवश्यकता महसुस हुने खालका विषयवस्तु उठान गर्ने तर्फ पत्रकार तथा सञ्चारकर्मीको ध्यान जानुपर्ने बताए । आमसञ्चारलाई गाउँको कुना काप्चासम्म लैजाने अभियान स्वरुप हजुरको खबर डटकम अनलाइनले मकवानपुरको बागमती गाउँपालिकामा स्थापना गरेको शाखा कार्यालय उद्घाटन गर्दै उनले यस्तो बताएका हुन् ।
पत्रकारिता पेसा संवेदनशील र जोखिम मिश्रित पेशा भएको भन्दै समाजप्रतिको उत्तरदायित्व भएर कलम चलाउनको लागि विडारीले सुझाव दिए । उनले कसैको चरित्र हत्या, बदनाम र प्रमाणित नहुने समचारहरुले धेरै स्थान पाईरहेको भन्दै यसलाई भन्दा पनि अपराधिक, भष्ट्राचारविरुद्धको समाचार संकलन गर्नको लागि आग्रह गरे ।
कार्यक्रममा हजुर मिडिया एन्ड इभेन्ट म्यानेजमेन्ट प्रालिका अध्यक्ष तथा हजुरको खबरका प्रमुख रुपक कालिराजले राज्यको चौथो अंग आम–संचारका सिद्धान्तहरु प्रति प्रतिबद्धताका साथ स्वतन्त्र, निष्पक्ष, तटस्थ भइ नेपालको संबिधानद्वारा प्रत्याभूत स्वतन्त्रता र हक अधिकारको जगेर्ना गर्दै राज्य र समाजप्रति कर्तव्यनिष्ठ एवं उत्तरदायी भएर जनतालाई सुसुचित गर्ने उदेश्यले अनलाईन खोलेको बताए । धेरै अनलाईन शहर केन्द्रित भईरहँदा गाउँका विषयहरु ओझेलमा परेको हुँदा गाउँ केन्द्रित गर्न खोजेको कालिराजको भनाई रहेको थियो । उनले सामाजिक न्याय तथा दायित्व र सद्भावना कायम राख्दै समाजमा घटेका घटनाहरुलाई सत्यतथ्य रुपमा उजागर गर्नेमा सम्पुर्ण पाठकहरुमा विस्वस्त हुन आग्रह गरे ।
कार्यक्रममा बागमती प्रदेशका प्रदेश सभा सदस्य प्रेम बहादुर पुलामी छिन्तुले पत्रकार समाजको ऐना भएकोले वास्तविकतालाई बाहिर ल्याउन आग्रह गरे । पुलामीले पत्रकारहरु शहर केन्द्रित मात्रै भएको भन्दै अब गाउँ केन्द्रित हुन आग्रह गरे । गाउँपालिका अध्यक्ष सर्केश घलानले गाउँपालिकालाई मिडिया भनेको सुचनाको संवाहक भएको भन्दै यस गाउँपालिकामा स्थापना गर्नु आफैमा राम्रो सन्देश गएको बताए ।
कार्यक्रममा गाउँपालिकाकी उपाध्यक्ष धनमाया स्याङतान,नेपाल पत्रकार महासंघ काठमाडौँ शाखाका अध्यक्ष सान्तराम विडारी, प्रेस संगठन बागमती प्रदेशका सहसंयोजक सुनिल खड्का, वामनेष्ट फाउण्डेशनका प्रमुख साइलु दियाली, ४ नम्बर वडाका अध्यक्ष रहर थिङ, गाउँपालिकाका प्रमुख प्रशासकीय अधिकृत रामप्रसाद सापकोटा, राष्ट्रिय समाचार समिति उत्तरी क्षेत्रका सम्वाददाता कुमार नेगी, शिक्षा पत्रकार समुह बागमती प्रदेशका अध्यक्ष धु्रब अधिकारी,खेलकुद विकास समितिका अध्यक्ष अरुण बल लगायतको आथित्यता रहेको थियो ।
मकवानपुर । नेपाल कम्युनिष्ट पार्टी (नेकपा) अध्यक्ष केपी शर्मा ओलीले पार्टी प्रवक्ताको जिम्मेवारी प्रदीप ज्ञवालीलाई दिएका छन् ।
मगलबार बालुवाटारमा बसेको ओली निकट केन्द्रीय सदस्यहरुको बैठकमा ओलीले नारायणकाजी श्रेष्ठ प्रकाशलाई हटाएर ज्ञवालीलाई पार्टी प्रवक्ताको जिम्मेवारी दिएको ओलीका प्रेस सल्लाहकार सूर्य थापाले जानकारी दिए ।
यसै गरी नेपाल कम्युनिष्ट पार्टी (नेकपा)का अध्यक्ष केपी शर्मा ओलीले केन्द्रीय सदस्यहरु थप गरेर बालुवाटारमा नै शपथ ग्रहण गराएका छन् । उनले साेमबार थप गरेको भनिएका सदस्यहरुलाई मगलबारको बैठकमा बोलाएका थिए । उनले नेकपाकाे ४ सय ४७ जना मौजुदा सदस्यमा ५ सय ५६ जना थप गर्ने निर्णय गरेका थिए ।
यस्तै नेपाल कम्युनिष्ट पार्टी (नेकपा) को केन्द्रीय कमिटी बैठकबाट मकवानपुरका ४ जनालाई केन्द्रीय सदस्यमा मनोनित भएका छन् । प्रधानमन्त्री समेत रहनुभएका नेकपा अध्यक्ष केपी शर्मा ओलीको अध्यक्षतामा बसेको केन्द्रीय कमिटीको बैठकले राष्ट्रिय सभा सदस्य रामचन्द्र राई, संविधान सभा सदस्य अनन्तप्रसाद पौडेल, बागमती प्रदेश सभा सदस्य जुनेली श्रेष्ठ र जिल्ला समन्वय समिति मकवानपुरका प्रमुख रघुनाथ खुलाललाई केन्द्रीय सदस्यमा मनोनित गरेका छन्।
आज मगलबार उपस्थित भएका केन्द्रीय सदस्यहरुलाई शपथ ग्रहण गराइएको प्रधानमन्त्रीको प्रेस सल्लाहकारसमेत रहेका नेता सूर्य थापाले जानकारी दिए । सत्तारुढ नेपाल कम्युनिष्ट पार्टी (नेकपा) का अध्यक्ष केपी शर्मा ओली पक्षले पार्टी महाधिवेशन आगामी वर्ष मंसिर २ मा गर्ने निर्णय गरेको छ ।
यसै गरी सत्तारुढ नेपाल कम्युनिष्ट पार्टी (नेकपा) को केपी शर्मा ओली समूहले बुधबार सातै प्रदेशमा भेला गर्ने भएको छ । बुधबार दिउँसो एक बजे सातै प्रदेशमा एकसाथ भेला गर्ने बालुवाटार बैठकले निर्णय गरेको केन्द्रीय सदस्य कृष्ण राईले जानकारी दिए ।
आगामी वर्ष मंसिर २ मा महाधिवेशनकै मिति तोकेर गतिविधि अगाडि बढाएको यो समूहले बिहीबार केन्द्रीय महाधिवेशन आयोजक कमिटीको बैठक बोलाएको छ ।
मकवानपुर । आइतबार बिहान बसेको मन्त्रिपरिषद् बैठकले संसद् विघटनको प्रस्ताव पारित गरी स्वीकृतको लागि राष्ट्रपतिसमक्ष पठाउने निर्णय गरी संसद् विघटन गर्ने सरकारको प्रस्ताव राष्ट्रपति विद्यादेवी भण्डारीले स्वीकृत गरेकी छन्। मन्त्रिपरिषद्काे बैठकपछि प्रधानमन्त्री केपी शर्मा ओली राष्ट्रपतिलाई भेट्न स्वयं राष्ट्रपति कार्यालय पुगेका थिए।
आइतबारै राष्ट्रपति कार्यालयले एक विज्ञप्ति जारी गर्दै सरकारको सिफारिसमा नेपालको संविधानको धारा ७६ को उपधारा (१) र (७) तथा धारा ८५ एवं संसदीय प्रणालीको आधारभूत मर्म एवं मूल्य मान्यता तथा हाम्रो आफ्नै र संसदीय प्रणाली भएका मुलुकहरुको अभ्यास बमोजिम हुनेगरी संसद् विघटनको प्रस्ताव स्वीकृत गरिएको कार्यालयले जनाएको छ।
राष्ट्रपतिले २०७८ वैशाख १७ र २७ मा प्रतिनिधिसभा चुनावको मिति समेत तोकेकी छन्।
मकवानपुर । मकवानपुरमा बिभिन्न पार्टी परित्याग गरी १३ जना कांग्रेसमा प्रवेश गरेका छन् । कांग्रेस प्रवेश गर्नेहरुमा बैद्य माओवादी समूहका मकवानपुर जिल्ला तदर्थ समिति संयोजक एवं दलित संघका केन्द्रीय सदस्य तथा नेकपा र राप्रपाका १३ जना रहेका छन् ।
नेपाली कांग्रेस बागमती प्रदेश संसदीय दलका नेता एवं मकवानपुर पार्टी सभापति ईन्द्रबहादुर बानियाँको निवासमा भएको पार्टी प्रवेश कार्यक्रममा बैद्य माओवादीका जिल्ला तदर्थ समितिका संयोजक कैलाश गाउँपालिका ९ का हरि विश्वकर्मा नेपाली कांग्रेसमा प्रवेश गरेका हुन् ।
त्यसैगरी भीमफेदी गाउँपालिका १ का नेकपाका सक्रिय कार्यकर्ता ज्ञानु लामा, अमिर लामा, विजय लामा, दावा लामालगायत नेकपा र राप्रपाका १० जना नेपाली कांग्रेसमा प्रवेश गरेका छन् ।
यस्तै नेता बानियाँ निवासमै भएको पार्टी प्रवेश कार्यक्रममा हेटौंडा उपमहानगरपालिका ८ का हरिबहादुर बस्नेत र विक्रम योञ्जन नेपाली कांग्रेसमा प्रवेश गरेका छन् ।
नवप्रवेशीलाई नेता बानियाँ, कार्यबहाक सभापति विष्णुप्रसाद लामिछाने, जिल्ला सदस्य मिलन परियार लामालगायतले टिका तथा खादा लगाएर पार्टीमा स्वागत गरेका थिए ।
मकवानपुर । सरकार विरूद्ध प्रमुख प्रतिपक्षी दल नेपाली काग्रेसले घोषणा गरेको विरोध कार्यक्रम अन्तर्गत साेमबार देशब्यापी प्रदर्शन गरी विराेध सभा गरेकाे छ । कांग्रेसले सबै जिल्ला र ठूला सहरहरुमा प्रदर्शन र आमसभा गरेको हो । कांग्रेसले आयोजना गरेको जुलुस र सभामा नेता कार्यकर्ताको बाक्लो सहभागिता थियो ।
नेपाली कांग्रेसका शिर्षतहका नेताहरूले देशका फरक फरक शहरमा गरिएकाे विराेध सभालाइ सम्बाेधन गरेकाे छन् । बागमती प्रदेशको राजधानी हेटौंडाको कार्यक्रममा सहभागी भएका पार्टी सभापति शेरबहादुर देउवाले ओली सरकारको गैरजिम्मेवारीपनले गर्दा राजावादीहरू सक्रिय भएका बताएका छन् । सरकारविरुद्ध कांग्रेसले घोषणा गरेको विरोध सभामा सम्बाेधन गर्दै सभापति देउवाले अहिलेके सरकारकै कारण राजा आऊ देश बचाऊ भन्ने नारा लाग्ने स्थिती आइपरेको बताए ।
सरकारको अत्याचार र गैरजिम्मेवार क्रियाकलाप जारी राखेपछि सडकमा आउन बाध्य भएको कांग्रेसले बताएकाे छ । ‘वास्तवमा यो कोरोनाको महामारीको समयमा सडकमा भेला गराएर जनतालाई संक्रमित बनाउने हाम्रो इच्छा होइन । यो बाध्यात्मक अवस्था हो,’ देउवाले भने, ‘हामीले विज्ञप्ति जारी गरेर विरोध गर्दा केही गरेन भन्ने सडकमा निस्कँदा कांग्रेसले यस्तो गर्यो भन्ने काम हुँदैछ ।’

‘मैले उसबेला नै भनेको थिएँ कम्युनिष्टले जितेमा हास्न पनि पाइँदैन दिल खोलेर रून पनि पाइँदैन,’ देउवाले भने, ‘आज हेर्नुस् त कम्युनिष्ट सरकारले एकदलीय शासन गरिरहेको छ, जनता भोक र रोगले मरिरहँदा ओली भाषणमा सरकारको प्रगति देखेर अरू आत्तिएँ भन्दै बसेका छन् ।’ कोरोनाको महामारीमा पनि भ्रष्टाचार गर्ने विश्वकै उदाहरण ओली सरकार भएको भन्दै ओली सरकार आएपछि भ्रष्टाचार, बलात्कार, हत्या र कुशासन चलिरहेको उनले बताए ।
राजा आऊ देश बचाऊ भन्नेलाई देउवाले राजा आऊ देश बचाउन भन्नेलाई आफैँ बाच्ने काम गर्न नसक्ने राजाले देशको रक्षा नगर्ने बताएका छन् । ‘सडकमा केही जनता निस्किएर राजा आऊ देश बचाउन भन्दैछन्, यो भ्रममा नरहन आग्रह गर्छु’ देउवाले भने, ‘मैले ठूलो राजनीतिक जोखिम मोलेर ज्ञानेन्द्रलाई सहयोग गरेको थिएँ, उनले मलाई के गरे, जेल हालिदिए । मलाई थुनामै राखे ।’ उनले राजाका पक्षमा नारा लगाउने वातावरण पनि प्रधानमन्त्री ओलीले नै बनाइदिएको बताए । उनले सडकमा राजाबारे प्रदर्शन हुनुमा प्रधानमन्त्री केपी शर्मा ओली नेतृत्वको सरकार नै जिम्मेवार रहेको आरोप लगाएका छन् । उनले वर्तमान संविधान र व्यवस्था नै उत्तम भएको बताएका छन् ।
‘राजतन्त्र त राजा ज्ञानेन्द्रकै कारण गएको हो र अब पछि फर्कने ठाउँ पनि छैन,’ देउवाले भने– ’सरकारप्रति निरासा बढाउने काम ओलीले गरिरहेको छ । त्यही कारण राजावादीहरु गणतन्त्रले राम्रो गर्दैन भन्दै जनता झुक्याउन सकिन्छ कि भनेर निस्किएका छन् ।’ शुन्य सहनशीलता भन्ने प्रधानमन्त्रीको सरकारले हत्या हिंसा बलात्कारका आरोपीहरु पक्राउ कारबाही नगर्नुले ओली सरकारका कुरा गफमै सिमित भएको देउवाको भनाइ छ ।
सभापति देउवाले ओलीले अदालतलाई समेत प्रभावमा पारेर कम्युनिष्टकरण गर्न खोजेका कारण अदालतको निष्पक्षता कायम गर्न पनि आफूहरु आन्दोलनमा उत्रिएको बताए ।
‘कांग्रेस सुतेको बाघ हो, जिस्काउने प्रयत्न नगर्नु’– प्रवक्ता शर्मा
सरकारविरुद्ध कांग्रेसले आयोजना गरेको देशभरको विरोधसभामा हेटौँडामा भएको कार्यक्रममा नेपाली कांग्रेसका प्रवक्ता विश्वप्रकाश शर्माले कांग्रेस सुतेको बाघ भएकाले नजिस्काउन सरकारलाई चेतावनी दिएका छन्।

सेमबार भएको विरोधसभामा प्रवक्ता शर्माले भने,‘सुतेको बाघलाई जिस्काउने प्रयत्न नगर। कांग्रेस पनि त्यस्तै हो। कांग्रेसलाई जिस्काउने प्रयत्न नगर्नुस्।’
शर्माले कांग्रेसलाई कम नआँक्न कम्युनिस्टलाई चुनौती दिएका छन् । शिक्षक अपहरण गर्ने नभई विमान अपहरण गर्ने पार्टी भएको भन्दै प्रवक्ता शर्माले कांग्रेसलाई कम नआँक्न कम्युनिस्टलाई चुनौती दिएका हुन् । ‘कांग्रेस बन्दुक उठाउनेमा पनि जेठो हो,’ प्रवक्ता शर्माले भने, ‘माओवादीले रोल्पा र मकवानपुरमा प्रहरी आक्रमण गरेको जस्तो हैन, कांग्रेस सीधै महाराजधिराज महेन्द्र चढेको मोटरमा बम प्रहार गरेको पार्टी हो ।’
उनले कोरोना महामारी नियन्त्रणको नाममा सरकारले कात्रोमा समेत भ्रष्टाचार गरेको आरोप लगाए । शर्माले जनता कोरोनाको मारमा हुँदा सरकार भने सत्ताको जित हारको लडाइमा रहेको बताए। ‘जनता कोरोनाको मारमा छ। सरकार सत्ताको जित हारमा छ। त्यसैले हामी सरकारलाई सच्याउनका निम्ति सडकमा उत्रिएका हौं,’ उनले भने।
प्रवक्ता शर्माले के जनता मर्दै गर्दा बालुवाटारमा यस्तै सत्ताको लडाइ होस् भनेर मत दिएको हो भनेर युवाहरुलाई प्रश्न पनि गरेका छन्। ‘म सोध्न चाहन्छु- एमालेलाई मत दिने, माओवादीलाई मत दिने युवा साथीहरु हो। तपाईंको दाहिने हात छातीमा राखेर एक पटक अन्तरआत्मालाई सोध्नुस्– के जनता मर्दै गर्दा बालुवाटारमा यस्तै लडाइ होस् भनेर मत घाममा लाम लागेर दिनु भएको होरु,’ उनको प्रश्न थियो।
शर्माले कम्युनिष्ट सरकार आएपछि देशले गति लिन्छ भन्ने जनताको भ्रम टुट्नु पर्ने बताए। ‘कमरेड केपी ओली र प्रचण्डका कारण कम्युनिष्ट सरकार बनेको होइन,’ उनले भने,‘तपाईंहरुका कारण बनेको हो कम्युनिष्ट सरकार। त्यसैले तपाईंको सपना टुट्नु पर्छ। कम्युनिष्ट पार्टीको सरकार आएपछि देशले गति लिन्छ भन्ने जनतको भ्रम टुट्नुपर्छ। सरकार आज महामारीमा के गर्दैछ भन्ने बुझाउन हामी सडकमा उत्रिएका हौं।