मकवानपुर । मकवानपुरमा आसन्न निर्वाचनमा उम्मेदवारी दर्ता गराएका उम्मेदवारहरु ग्रामिण बस्तीहरुमा घरदैलो कार्यक्रममा व्यस्त हुन थालेका छन् । उम्मेदवारहरुसँग मतदाताहरुले आ आफ्नो स्थानमा रहेको व्यक्तिगतदेखि सामाजिक विकासका समेत माग गर्ने गरेका छन् ।
मकवानपुरको बागमती गाउँपालिकामा भएको मतदाता भेटघाटमा गुणस्तरीय शिक्षा र स्वास्थ्यको माग उम्मेदवारसँग राखेका छन् । बागमती गाउँपालिका ३ माझगाउँका मतदाताले त्यसै क्षेत्र अन्तर्गत प्रतिनिधि सभा १ प्रदेश सभा क का उम्मेदवार प्रेम बहादुर पुलामीसँग गुणस्तरीय शिक्षा र स्वास्थ्यको माग गरेका हुन् । नेकपा माओवादी केन्द्र बागमती प्रदेश उपाध्यक्ष तथा सत्ता गठबन्धनका प्रदेश सभा उम्मेदवार पुलामीसँग शिक्षा स्वास्थ्य लगायत भौतिक पूर्वाधारको निर्माण समेतको माग गरेका हुन् ।
बागमती गाउँपालिका १ का डोर बहादुर थापाले नेता पुलामीसँग गाउँपालिकामा प्रदेश सरकार र स्थानीय सरकारले विकास गरेको भए पनि त्यो पर्याप्त नभएको बताए । थापाले भने– भौतिक विकासका धेरै काम भएका छन् तर शिक्षा स्वास्थ्य जस्था जनताको आधारभूत आवश्यकताको विकासमा समेत पहल गरिदिनु होला ।’ नेता पुलामीको गृह पालिका भएकोले उहाँले आफ्नो क्षेत्रमा उलेख्य विकास गर्नु पर्ने थापाले सुझाव दिए ।
अर्का मतदाता भेष बहादुर घिसिङले पहिलाको बागमती र अहिलेको बागमतीमा आकाश जमिनको फरक भएको बताउँदै नेता पुलामीको पहलमा विकास निर्माणले गति लिएको बताए । बागमती २ की बिक्की पहरीले बर्तमान राईगाऊँ, माझगाऊँमा विकासले गति लिएको भएपनि खहरे नियन्त्रण, पुल लगाएतका कार्य पुरा हुन अझ बाँकी रहेको भन्दै नेता पुलामीबाट नै यस क्षेत्रका मतदाताहरुले अपेक्षा राखेको बताइन् ।
उम्मेदवार पुलामीले आफु निर्वाचित हुँदा होस वा उम्मेदवार नै नरहेको अबस्थामा होस यस क्षेत्रका जनतालाई साथ नछोडेको बताए । ब्यबस्था बदल्न भएको निर्वाचनको कार्यभार पुरा गर्न सफल भएको भन्दै अब अबस्था बदल्न पनि सफल हुने बिस्वास ब्यक्त गर्दै जनअपेक्षा बमोजिम आफुले काम गर्ने प्रतिबद्धता समेत उनले ब्यक्त गरे ।
मकवानपुर । मकवानपुरकाे प्रदेश सभा सदस्य पदका उम्मेदबारले आजबाट आफ्नाे क्षेत्रमा घरदैलाे अभियान सुरु गरेकी छिन् । मकवानपुरकाे क्षेत्र नम्बर २ काे कका बाम लोकतान्त्रिक गठबन्धनका साझा उम्मेदवार नेकपा माओवादी केन्द्रकी मोक्तानले गरेकाे घर दैलाे अभियानमा हेटौंडा ११ सिमलटार स्थानीयले जग्गाकाे लालपूर्जा उपलब्ध गराइदिन आग्रह गरेका थिए ।
उनले विहीबार बिहान हेटाैडा ११ सिमलटारमा अभियान सुरु गर्दै सिमलटारबासीको समस्या, गुनासो र अपेक्षाहरु सुनेका थिए ।आफ्नो टोलमा मत माग्दै आइपुगेका मोक्तानसँग स्थानीयहरुले बसोबास गर्दै आएको जमिनको लालपूर्जा छिट्टै उपलब्ध गराउन पहल गरिदन आग्रह गरेका हुन् । मोक्तानसँगको भेटमा एकसय छ वर्षीय धनमाया पाख्रिनले भनिन्, ‘यो बस्तीमा बाटो, बिजुली ल्याइदिनुभयो । अब एउटा पूर्जा दिनुहोला जमिनको ।’ अघिल्लो पटक पनि मोक्तनलाई आफुहरुले जिताएर पठाएको बताउँदै उनले फेरि मत दिन पाउने भएपछि खुशी लागेको बताइन् ।
घरदैलो अभियान पछि काेणसभामा बोल्दै मोक्तानले यस क्षेत्रको समस्याबारे परिचित रहेको र लालपूर्जा उपलब्ध गराउन आफुले सकेको पहल गर्ने बताईन् । ‘तपाईहरुले तटबन्धन र सडक स्ल्याप माग्नुभयो, त्यो पुरा भएको छ, अब जग्गधनी लालपूर्जाको लागि पनि म तपाईहरुसँगै रहेर पहल गर्नेछु’, मोक्तानले भनिन्, ‘गठबन्धनलाई विजयी गराइदिनुहोला । हाम्रो सरकार बनेपछि तपाईहरुका धेरै अपेक्षा हामी पुरा गर्नेछौं ।’
सिमलटारमा मकवानपुरको बिभिन्न क्षेत्रबाट आएर बसोबास गरेका करिब दुई हजार परिवार रहेको छ ।
मकवानपुर । निर्वाचन आयोगले समानुपातिक निर्वाचन प्रणाली तर्फ बन्दसूचीमा कायम भएको उम्मेदवारको संख्याको आधारमा निर्वाचन खर्चको सिमा कायम गरेकाे छ । प्रतिनिधि सभा तथा प्रदेश सभा सदस्य निर्वाचन, २०७९ मा समानुपातिक निर्वाचन प्रणालीतर्फ उम्मेदवारको बन्दसूची पेस गर्ने राजनीतिक दललाई बन्दसूचीमा कायम भएको उम्मेदवारको संख्याको आधारमा निर्वाचन खर्चको अधिकतम हद आयाेगले कायम गरेको हाे ।
राजनीतिक दलको तर्फबाट हुने निर्वाचन सम्बन्धी स्वेच्छिक आर्थिक सहयोग लिँदा तथा खर्च गर्दा राजनीतिक दल सम्बन्धी ऐन, २०७३ को दफा ३८ र निर्वाचन आचारसंहिता, २०७९ को दफा १६ बमोजिम गर्न, राजनीतिक दलले निर्वाचन सम्बन्धी खर्च गर्दा दलको तर्फबाट खर्च गर्ने जिम्मेवार पदाधिकारी तोकी निजको नाम नामेसी सहितको विवरण १० दिनभित्र आयोगमा पठाउनु पर्ने निर्णय पनि आयोगले गरेको छ ।
निर्वाचन प्रचारप्रसार खर्चको विवरण तोकिएको समयभित्र नबुझाउने राजनीतिक दललाई आयोगले निर्वाचन आयोग ऐन, २०७३ को दफा २६ को उपदफा (१) बमोजिम त्यस्तो दलले गरेको निर्वाचन खर्च वा आयोगद्वारा निर्धारित खर्चको हदमध्ये जुन बढी हुन्छ सोही बराबरको रकम जरिवाना गर्ने व्यवस्था छ ।
प्रतिनिधि सभा सदस्य तथा प्रदेश सभा सदस्य निर्वाचन, २०७९ मा समानुपातिक निर्वाचन प्रणालीतर्फ उम्मेदवारको बन्दसूची पेश गर्ने प्रत्येक राजनीतिक दलले मिति २०७९-०६-३१ को नेपाल राजपत्रमा प्रकाशित निर्वाचन खर्चको हद सम्बन्धी सूचना बमोजिम मतदाता नामावली खरिद, सवारी साधन, प्रचार प्रसार सामग्री, ढुवानी, गोष्ठी अन्तरक्रिया, अन्य प्रचार प्रसार, छापा एवम् विद्युतीय माध्यम (समाजिक सञ्जाल समेत), कार्यालय सञ्चालन र प्रतिनिधि परिचालन लगायतका शीर्षकमा खर्च गरेको विवरण निर्वाचन परिणाम घोषणा भएको मितिले ३५ दिनभित्र आयोगमा पेश गर्नु पर्ने व्यवस्था गरिएको छ ।

४ मंसिरमा हुने प्रतिनिधिसभा र प्रदेशसभा निर्वाचनमा प्रत्यक्ष निर्वाचन प्रणालीतर्फ दुई र समानुपातिकतर्फ अर्को दुई गरी चारवटा मतपत्र र चारवटै मतपेटिकाको प्रयोग हुने भएको छ ।
निर्वाचन आयोगका सहप्रवक्ता सूर्यप्रसाद अर्यालका अनुसार प्रतिनिधिसभा र प्रदेशसभाको प्रत्यक्ष निर्वाचन प्रणालीतर्फ प्रयोग हुने दुईवटा फरकफरक मतपत्रका लागि दुईवटा फरकफरक मतपेटिकाको प्रयोग हुनेछ भने दुवै सभाको समानुपातिक निर्वाचन प्रणालीका लागि प्रयोग हुने मतपत्रका लागि अलगअलग मतपेटिकामा मत खसाल्ने व्यवस्था हुनेछ ।
पहिलो हुने निर्वाचित हुने प्रणालीअन्तर्गत प्रत्येक निर्वाचन क्षेत्रमा कायम रहेका उम्मेदवार वा दलको निर्वाचन चिह्न मात्र मतपत्रमा हुनेछन् भने समानुपातिक निर्वाचन प्रणालीतर्फ प्रतिनिधिसभाका लागि जम्मा ४७ वटा निर्वाचन चिह्न मतपत्रमा राखिएको छ ।
निर्वाचन आयोगले समानुपातिक निर्वाचन प्रणालीअन्तर्गत प्रतिनिधिसभामा सहभागी हुन निवेदन दिएका ६८ वटा दलमध्ये सबै प्रक्रिया पूरा गर्दा ४७ वटा मात्र कायम भएपछि निर्वाचन चिह्न त्यसैअनुसार तय गरेको आयोगका सहप्रवक्ता अर्यालले जानकारी दिए ।
– प्रत्यक्षमा दल वा उम्मेदवारको मात्रै चिह्न
– समानुपातिकमा प्रतिनिधिसभातर्फ ४७ चिह्न, प्रदेशमा संख्या फरकफरक
समानुपातिक निर्वाचन प्रणालीमा सहभागी हुन निवेदन दिएकामध्ये नेपाल कम्युनिस्ट पार्टी (माओवादी केन्द्र) र नेपाल समाजवादी पार्टीले एउटै चुनाव चिह्न लिएका छन् । त्यस्तै, नेपाल आमा पार्टी, नौलो जनवादी पार्टी, सचेत नेपाली पार्टी र नेपाल सुशासन पार्टीले पनि संयुक्त रूपमा एउटै चुनाव चिह्न लिएका छन् ।
यसैगरी, सामाजिक एकता पार्टी, नेकपा समाजवादी र नेपाल दलित पार्टीले पनि साझा चुनाव चिह्न लिएका छन् । प्रतिनिधिसभामा समानुपातिकतर्फ ११० सिट रहने व्यवस्था छ । प्रदेशसभाको समानुपातिक निर्वाचन प्रणालीतर्फ प्रदेश अनुसार मतपत्रमा चुनाव चिह्नको संख्या फरकफरक हुने आयोगले जनाएको छ ।
आयोगका अनुसार कर्णाली र सुदूरपश्चिम प्रदेशमा दलहरूले समानुपातिकतर्फको अन्तिम बन्दसूची बुझाएपछि मात्र मतपत्र छपाइ भएकाले ती दुई प्रदेशमा बन्दसूची बुझाउने दलको मात्र निर्वाचन चिह्न रहनेछ ।
तर प्रदेश १, मधेस प्रदेश, बाग्मती, गण्डकी र लुम्बिनी प्रदेशको समानुपातिकतर्फको मतपत्र बन्दसूची पेस गर्नुअघि नै छपाइ भइसकेको कारण निर्वाचनमा सहभागिताका लागि निवेदन दिएका दलको निर्वाचन चिह्नसमेत रहनेछ ।
आयोगका अनुसार प्रदेश १ मा ५५ वटा निर्वाचन चिह्न भएको मतपत्र हुनेछ । त्यस्तै, मधेस प्रदेशमा ५९, बाग्मतीमा ५८, गण्डकीमा ५२ र लुम्बिनीमा ५४ वटा निर्वाचन चिह्न भएको मतपत्र प्रयोग हुनेछ । कर्णाली प्रदेशमा २८ र सुदूरपश्चिम प्रदेशमा ३४ वटा निर्वाचन चिह्न भएको मतपत्र प्रयोग हुनेछ ।
प्रदेश १ मा बन्दसूची बुझाउने दल भने ३६ छन् । त्यस्तै, मधेस प्रदेशमा ३६, बाग्मती प्रदेशमा ४०, गण्डकी प्रदेशमा ३१ र लुम्बिनी प्रदेशमा ३२ वटा दलले मात्र बन्दसूची पेस गरेका छन् । कर्णाली प्रदेशमा निर्वाचनमा सहभागिताका लागि निवेदन दिने दलको संख्या ४९ थियो । त्यस्तै, सुदूरपश्चिममा ५० वटा दलले सहभागिताका लागि निवेदन दिएका थिए ।
प्रदेशसभामा प्रदेश १ बाट ३७ जना, मधेस प्रदेशमा ४३, बाग्मतीमा ४४, गण्डकीमा २४, लुम्बिनीमा ३५, कर्णालीमा १६ र सुदूरपश्चिममा २१ जना समानुपातिक निर्वाचन प्रणालीमार्फत सदस्य निर्वाचित हुनेछन् । राजधानी दैनिकबाट
मकवानपुर । मकवानपुरको निर्वाचन क्षेत्र २ प्रदेश सभा ख मा स्वतन्त्र उम्मेदवारी दिएका खुसीलाल प्रजाले गठबन्धनका उम्मेदवार इन्द्रबहादुर बानियाँ सहयोग गर्ने भएका छन् ।
उम्मेदवार छनौट प्रक्रियामा असहमति जनाउँदै स्वतन्त्र उम्मेदवारी दिएका नेकपा माओवादी केन्द्रको राजनीतिमा सक्रिय रहेका प्रजाले लोकतान्त्रिक बाम गठबन्धनका उम्मेदवार बानियाँलाई सहयोग गर्ने भएका हुन । चेपाङ संघ बागमती प्रदेशको अध्यक्षसमेत रहेका प्रजाले मंगलबार प्रेस विज्ञप्ती जारी गर्दै आगामी निर्वाचनमा आफ्नो पूर्ण साथ समर्थन गठबन्धनका उम्मेदवार बानियाँलाई रहेको बताए ।
नेकपा एकीकृत समाजवादीका केन्द्रीय नेता विरोध खतिवडा, माओवादी केन्द्रकी नेतृ कुमारी मोक्तान, नेता सर्केश घलानलगायतको उपस्थितिमा काँग्रेस बागमती प्रदेश कार्यालयमा प्रजाले प्रेस विज्ञप्ती सार्वजनिक गर्दै आफ्नो उम्मेदवारीले नेकपा माओवादी केन्द्रको नेतृत्वमा प्राप्त गणतन्त्रजस्ता महत्वपूर्ण राजनीतिक उपलब्धीहरुमा गम्भीर क्षति पुग्ने, संविधान बिरोधिहरुलाई राजनीतिक लाभ हुने र समग्र लोकतान्त्रिक विधि र पद्धती माथि घात हुने देखिएकोले गठबन्धनका उम्मेदवारलाई सघाउने निष्कर्षमा पुगेको बताए ।
निर्वाचन आयोगमार्फत् आफ्नो उम्मेदवारी फिर्ता लिन प्राविधिक कारणले नमिल्ने भएपनि राजनीतिक रुपमा अब आफु उम्मेदवार नरहेको उनले बताए । ‘मेरो तर्फबाट इन्द्रबहादुर बानियाँज्यूलाई पूर्ण साथ समर्थन रहने हुनाले आम शुभचिन्तक र समर्थकहरुलाई पनि मेरो अभियानमा सहभागी भई गठबन्धनका साझा उम्मेदवार बानियाँको चुनाव चिन्ह रुखमा मतदान गरी अत्यधिक मतका साथ विजयी गराइदिन हुन अनुरोध गर्दछु ।’ प्रजाले विज्ञप्ती मार्फत भनेका छन ।
गठबन्धनका उम्मेदवार बानियाँले आफूलाई सहयोग गर्न उम्मेदवारी फिर्ता लिने प्रजालाई धन्यवाद दिएका थिए । बानियाँले मुलुकको समग्र विकास र संविधान तथा व्यवस्थाको रक्षाका लागि गठबन्धनले जित्नुपर्ने आवश्यकता रहेको समेत बताए ।