मकवानपुर । बागमती प्रदेश प्रमुख दीपक प्रसाद देवकोटाले विज्ञान प्रविधि नवप्रवर्तन तथा विकास कोष सञ्चालन सम्बन्धमा व्यवस्था गर्न बनेको विधेयक प्रमाणीकरण गरेका छन् ।
१६ साउनमा बागमती प्रदेश सभाबाट पारित भई प्रदेश प्रमुख समक्ष पेश भएको उक्त विधेयक प्रदेश प्रमुख देवकोटाले बिहीबार प्रमाणीकरण गरेका हुन् । १८ साउनमा पदबहाली गरेपछि उनले पहिलो पटक विधेयक प्रमाणीकरण गरेका हुन् ।
प्रमाणीकरण भएको उक्त विधेयक प्रदेश राजपत्रमा “विज्ञान, प्रविधि, नवप्रवर्तन तथा विकास कोष ऐन, २०८१” को नाम प्रयोग प्रकाशित भइ प्रचलनमा आउने छ ।
विज्ञान प्रविधिका विविध क्षेत्रमा खोज, अध्ययन, अनुसन्धान, आविष्कार र नवप्रवर्तनमा गरिने लगानीबाट विकसित, प्रविधियुक्त, गुणस्तरीय र परिणाममुखी नतिजाको माध्यमबाट आर्थिक विकास र नागरिकको जीवन पद्धतिलाई सरल तथा सहज बनाउदै प्रदेशको समृद्धिमा योगदान पुर्याउने उद्देश्यले उक्त विधेयक प्रदेश सभाबाट पारित भएको हो ।
मकवानपुर । बागमती प्रदेशका मुख्यमन्त्री बहादुर सिंह लामाले विभागीय मन्त्री र मन्त्रालयका सचिवहरूलाई जिम्मेवार ढंगबाट काम गर्न तथा गुनासो रहित सेवा प्रवाहमा केन्द्रित हुन निर्देशन दिएका छन्। बुधबार विभागीय मन्त्री र प्रमुख सचिवसँग कार्य सम्पादन करार सम्झौता गर्दै उनले यस्तो बताएका हुन् ।
नागरिकहरूलाई सुशासनको प्रत्याभूति दिलाउने गरी काम गर्न समेत उनले निर्देशन दिए । उनले सुशासनका विषयमा गम्भीर हुनुपर्ने समेत बताए । ‘नागरिकको आवश्यकता र चाहना अनुसार सहज सेवा तथा विकासका काम अघि बढाउन पर्छ’ उनले भने ।
‘प्रदेश सरकार माथि विविध चुनौती छन्, त्यसकाे सामना गर्न सक्रिय रूपमा काम गर्नुपर्छ’ उनले भने ‘पछिल्लो समय विभिन्न कोणबाट प्रदेश संरचनाको टीकाटिप्पणी भइरहेकाले त्यसलाई व्यवस्थापन गर्न गम्भीर हुन जरुरी छ ।’
मकवानपुर । बागमती प्रदेशका मुख्यमन्त्री बहादुर सिंह लामाले विभागीय मन्त्रीहरुसँग सम्पादन करार सम्झौता गरेका छन् । बुधबार मुख्यमन्त्री लामाले ११ जना विभागीय मन्त्रीसँग कार्य सम्पादन करार गरेका हुन् ।
मुख्यमन्त्री लामाले कृषि तथा पशुपन्छी विकास मन्त्री प्रकाश श्रेष्ठ, आर्थिक मामिला तथा योजना मन्त्री कुन्दनराज काफ्ले, आन्तरिक मामिला तथा कानूनमन्त्री सुरजचन्द्र लामिछाने, सामाजिक विकासमन्त्री हरिप्रभा खड्गी, भौतिक पूर्वाधार विकासमन्त्री अमन मास्के, उद्योग, वाणिज्य, भूमि तथा प्रशासन मन्त्री शुकमाया तामाङ, संस्कृति, पर्यटन तथा सहकारी मन्त्री विमल ठकुरी, स्वास्थ्य मन्त्री किरण थापा, खानेपानी, ऊर्जा तथा सिँचाइ मन्त्री श्याम बहादुर खड्का, श्रम, रोजगार तथा यातायात मन्त्री प्रेमभक्त महर्जन, र वन तथा वातावरण मन्त्री कृष्णप्रसाद सिलवालबिच कार्यसम्पादन सम्झौता गरेका हुन् ।
हेटौडामा आयोजित कार्यक्रममा मुख्यमन्त्री लामाले चालु आर्थिक वर्ष २०८१/०८२ का लागि मन्त्रीहरूसँग सम्पादन गर्ने कार्यहरू र जिम्मेवारी सम्बन्धी करार सम्झौता गरेका हुन् । कार्यसम्पादन करार सम्झौतामा मन्त्रीहरूले चालु आवमा गर्नुपर्ने कामहरू,कार्ययोजना,समयसीमा,प्रक्रिया तथा कानूनी विषयहरू लगायत उल्लेख गरिएको छ ।
प्रदेशमा मुख्यमन्त्रीसहित १४ मन्त्रीमध्ये रहेका छन् । कार्यसम्पादन सम्झौता हुँदा एक जना मन्त्री अनुपस्थित रहे भने अर्का मन्त्रीले विभागीय जिम्मेवारी नपाएकाले करार सम्झौता हुन नसकेकाे प्रदेशका प्रमुख सचिव गोविन्द बहादुर कार्कीले बताए । युवा तथा खेलकुद मन्त्री मीनकृष्ण महर्जन र विना विभागीय मन्त्री मदुकुमार श्रेष्ठसँग सम्झौता हुन बाँकी रहेको छ ।
प्रमुख सचिव कार्कीका अनुसार मुख्यमन्त्री र मन्त्रीबिचको कार्यसम्पादन सम्झौताले प्रदेश सरकारका कार्यक्रम र योजनाको प्रगतिको अनुगमन गर्न सहज हुनेछ । कार्यसम्पादन सम्झौतापछि प्रदेश सरकारका कामलाई व्यवस्थित गर्न सहयोग पुग्ने बताइएकाे छ ।
मुख्यमन्त्री लामाले प्रमुख सचिव कार्कीसँग समेत कार्य सम्पादन सम्झौता गरेका छन् । चालु आर्थिक वर्षको कार्यक्रम र बजेट कार्यान्वयनमा मन्त्रीहरूले विभागीय मन्त्रालयका सचिवसँग तथा सचिवले मातहतका महाशाखा प्रमुखसँग करार सम्झौता गर्नुपर्ने हुन्छ ।
मकवानपुर । बागमती प्रदेशकी उद्योग, वाणिज्य भूमि तथा प्रशासन मन्त्रालयले प्रविधिमैत्री सेवा विस्तार गर्ने भएकाे छ । मन्त्री सुकमाया तामाङले मन्त्रालयकाे पहिलो वार्षिकोत्सवको अवसरमा सबै सेवाहरु प्रविधिमैत्री बनाउँने कार्यको सुरुवात गरेकी छिन् ।
बुधबार मन्त्रालयको सेवासम्बन्धी जानकारीमूलक डिजिटल डिस्प्ले उद्घाटन गर्दै मन्त्री तामाङले गत वर्षदेखि हालसम्मको वार्षिक बुलेटिन अनावरण समेत गरिन् । उनले मन्त्रालयको कार्य जिम्मेवारीअनुरुप सम्पादन गर्नुपर्ने कार्यहरुलाई आर्थिक अनुशासन कायम गर्दै सर्वसाधारणले पाउनुपर्ने सेवासुबिधा छिटो, छरितो एवम् प्रभावकारी र कुशलतापूर्वक सञ्चालन गर्न उत्साहजनक सहभागिता र सहयोगका लागि उनले कर्मचारीको प्रशंसा गरिन् ।
‘व्यापार र उद्योगको क्षेत्रमा, व्यापार सम्बन्धी नीति, कार्यक्रम, कानून, मापदण्ड, योजना तर्जुमा र कार्यान्वयनका लागि प्रचलित ऐन नियमको परिधिमा रही मन्त्रालय र अन्तरगत कार्यालयहरुमा कार्यरत जनशक्तिबाट कार्य भएकाे छ’ उनले भनिन् ‘विकास र वातावरणीय सन्तुलन कायम राखी प्रविधिमैत्री प्रदेश निर्माण गर्न उत्पादन र उत्पादकत्व बढाउन साना, मझौला, घरेलु, र लघु उद्योग स्थापना गर्न उद्यमीलाई उत्साहित गर्दै उद्यमशीलताबाट स्वरोजगार तथा रोजगारी सिर्जना गरिने छ ।’
उद्यमीहरुको क्षमता अभिवृद्धि गर्न उद्यम तालिम, उद्योग प्रवर्द्धनार्थ औद्योगिक बस्तुको निर्यात र औद्योगिक प्रदर्शनीहरु, उद्यमीलाई प्रविधि हस्तान्तरण गर्ने जस्ता कार्यक्रम सफलतापूर्वक अघि बढिरहेका छन्’ उनले भनिन् । खनिज र भौगोलिक अध्ययन, खानी र खनिज पदार्थको अन्वेषण र व्यवस्थापनमा प्रादेशिक नीति, कानुन र मापदण्ड तर्जुमा र कार्यान्वयनमा सुरु गरेका कार्यहरुले सकारात्मक दिशा लिएको उनले दाबी समेत गरिन् ।
भौगोलिक अध्ययन, नक्सा व्यवस्थापन र भौगोलिक सूचना प्रणालीको समन्वयले मन्त्रालयका कामहरुलाई अझ प्रभावकारी बनाउने आशा गरेकी उनले उपभोक्ता संरक्षणका क्षेत्रमा पनि मूल्य र कालोबजारी नियन्त्रण, उपभोक्ता हकअधिकार संरक्षण, स्वदेशी उत्पादनमैत्री कार्यालय र उपभोक्ता अदालत गठन जस्ता पहलहरुलाई प्राथमिकता दिइएको बताइन् । ‘यी प्रयासहरुले उपभोक्ताको सन्तुष्टि र सुरक्षा सुनिश्चित गर्न हामी सफल हुनेछौं भन्ने विश्वास छ,’ उनले भनिन् ।
भूमि व्यवस्थापन क्षेत्रमा, भूमि प्रशासन, नापजाँच, भूमिसुधार, नदीउकास जमिन संरक्षण गरी व्यावसायिक प्रयोजनार्थ भूमिको निर्माण गर्नेर भूउपयोग नीति तथा मापदण्ड तर्जुमा र कार्यान्वयनलाई तीव्ररुपमा कार्यहरू अघि बढाएको जानकारी दिएकी उनले भूमि अभिलेख व्यवस्थापन, जग्गादर्ता, र स्वामित्व हस्तान्तरण प्रक्रियामा सुधार ल्याउने प्रयासलाई कर्मचारीको सक्रियता र सहयोगले सफल बनाएको बताइन् । ‘भूमिहीन वर्गको बसोबास र पुनर्स्थापनाका कार्यक्रममा पनि हामीले ठोस कदम उठाउन सफल भएका छौं’ उनले भनिन् ।
पुस्तिकाले विगतका वर्षहरुका कार्यहरुको अभिलेखिकरण गर्नुका साथै मन्त्रालयका सबल पक्षलाई बढाउँदै कमीकमजोरी सुधार गरी आगामी दिनहरुमा अझ परिणाममुखी बनाइने उद्योग गरौं, उद्यमी बनौ र समृद्ध नेपाल बनाऔं’ भन्ने मूल नारालाई मूर्तरुप दिलाउन सकिने आशा उनले लिएकी छन् ।
मकवानपुर । बागमती प्रदेशको मुख्य न्यायाधिवक्तामा शुकदेव काफ्ले नियुक्त भएका छन् ।
दोलखा तामाकोशी गाउँपालिका वडा नम्बर ३ निवासी काफ्लेलाई आइतबार प्रदेश प्रमुख दीपक प्रसाद देवकोटाले प्रदेशको मुख्य न्यायाधिवक्ता पदमा नियुक्त गरेका हुन् ।
नेपालको संविधानको धारा १६० उपधारा (२) बमोजिम प्रदेश मुख्यमन्त्री बहादुर सिंह लामाकाे सिफारिसमा काफ्लेलाई मुख्य न्यायाधिवक्ता पदमा नियुक्त गरिएको प्रदेश प्रमुख कार्यालयका सूचना अधिकारी प्रकाश चापागाईंले बताए ।
२५ वर्षदेखी निरन्तर कानून व्यवसायीको रुपमा कार्य गर्दै आएका काफ्लेले यसअघि पूर्व कानून तथा न्यायमन्त्री भीम बहादुर तामाङ र पूर्व महिला तथा समाज कल्याण मन्त्री लिला कोइरालाको सल्लाहकार भएर समेत काम गरिसकेका छन् ।
नेपाल बार एसोसिएसनको सदस्य रहनु भएको काफ्ले नेपाल बार एशोसिएसन र काठमाडौं जिल्ला बारका विभिन्न समितिमा संलग्न भई काम गरिसकेका छन् ।