मकवानपुर । बागमती प्रदेशकाे मुख्यमन्त्रीमा नेपाली काँग्रेस संसदीय दलकाे नेता इन्द्र बहादुर बाँनियाले दावी पेश गरेका छन् ।
काँग्रेस बागमती सभापति समेत रहेकाे बाँनियाले सोमबार सत्ता गठबन्धन दल नेकपा एमाले र कांग्रेसको समर्थनमा मुख्यमन्त्रीमा दाबी पेस गरेका हुन् । मुख्यमन्त्री बहादुर सिंह लामाले पदबाट राजिनामा दिए पछि बागमती प्रदेश प्रमुख दीपक प्रसाद देवकाेटाले मंगलबार दिउँसो २ बजेसम्म मुख्यमन्त्रीमा दावी पेश गर्न आह्वान गरेका थिए ।
आइतबार मुख्यमन्त्री बहादुर सिं लामाले पदबाट राजिनामा दिएकाेमा उक्त राजिनामा पत्र सोमबार प्रदेश प्रमुख समक्ष पेश भएको थियो । यो सँगै प्रदेश प्रमुखबाट नेपालको संविधानको धारा १६८ को उपधारा (२) बमोजिम मुख्यमन्त्रीको लागि दावी पेश गर्न आव्हान गरेका थिए ।
बानियाँले नेपाली काँग्रेस संसदीय दलका ३७ जना र नेकपा (एमाले) संसदीय दलका २७ जना सदस्यसहित ६४ जना बहुमत सदस्यकाे समर्थन सहित नेपालको संविधानको धारा १६८ को उपधारा २ बमोजिम मुख्यमन्त्री पदमा नियुक्तिका लागि प्रदेश प्रमुख समक्ष दावी पेश गरेका हुन् । बागमती प्रदेश सभामा ११० जना सदस्य छन् ।
मकवानपुर । बागमती प्रदेशका मुख्यमन्त्री बहादुर सिंह लामाले स्वकीय सचिव मार्फत प्रदेश प्रमुखसमक्ष राजीनामा पेस गरेका छन् ।
सोमबार बहादुरको तर्फबाट स्वकीय सचिव छत्र बहादुर लामाले प्रदेश प्रमुख दीपक प्रसाद देवकोटाका प्रमुख स्वकीय सचिव बलराम गैरेमार्फत प्रदेश प्रमुखसमक्ष राजीनामा पत्र पेस गरेका हुन् ।
लामाले आइतबार पत्रकार सम्मेलन नै गरेर पदबाट राजीनामा दिएको घोषणा गरेका थिए । लामाले नेपालको संविधानको धारा १६९ को उपधारा १ (क) अनुसार मुख्यमन्त्री पदबाट राजीनामा दिएका हुन् ।
यसैगरी प्रदेश प्रमुख देवकोटा अस्पतालबाट स्वास्थ्य लाभ गरी सोमबार नै कार्यालयमा उपस्थित भएका थिए । आइतबार अस्पतालबाट डिस्चार्ज भएका उनी सोमबार सिमरा हुँदै हेटौँडास्थित कार्यालय आएका हुन् ।
स्वास्थ्यमा समस्या देखिएपछि प्रदेश प्रमुख देवकोटा गत साउन १५ गते काठमाडौँको धापासीस्थति ग्रान्डी अन्तर्राष्ट्रिय अस्पतालमा भर्ना भएका थिए ।
लामाले राजीनामा पत्र बुझाएसँगै अब नयाँ मुख्यमन्त्री नियुक्ति प्रक्रिया सुरु हुनेछ । बागमतीकाे छेटौं मुख्यमन्त्रीमा काँग्रेस बागमती प्रदेश सभापति तथा संसदीय दलका नेता इन्द्र बहादुर बाँनियाले सत्तारुट दल नेकपा एमालेकाे समर्थनमा दावी पेश गर्नेछन् ।
मकवानपुर । प्राचीन संस्कृति र ऐतिहासिक सम्पदाकाे पनौती स्थित त्रिवेणीघाट क्षेत्रको संरक्षणका लागि पहल गरिएकाे छ।
काठमाडौं विश्वविद्यालयका आर्किटेक्चर संकायका स्नातक तह चौथो वर्षका विद्यार्थीहरूले त्रिवेणीघाट क्षेत्रको सांस्कृतिक सम्पदाको विस्तृत नक्साङ्कन तथा संरक्षणका सम्भावित प्रस्तावहरू तयार पारी पनौती नगरपालिकाकालाई हस्तान्तरण गरेका छन् ।
आर्किटेक्चर संकायका स्नातक तह चौथो वर्षका २६ जना विद्यार्थीको टोलीले त्रिवेणीघाट क्षेत्र संरक्षण प्रस्ताव पनौती नगरपालिका प्रमुख र उपप्रमुखलाई औपचारिक रूपमा हस्तान्तरण गरेका हुन् । करीब ५ महिनाको सम्पदा अध्ययन, नापजाँच लगायतका काम पछि तयार पारिएको प्रतिवेदनको चित्रसहित पनौतीको लायकु स्थानमा प्रदर्शनी गरिएको थियो ।
विद्यार्थीहरूको टोलीले तयार पारेको प्रतिवेदनमा त्रिवेणीघाट क्षेत्रका मूख्य सम्पदाहरू – जस्तै ऐतिहासिक मन्दिरहरू, पुराना धारा–पाटी, प्राचीन वस्ती संरचना, घाट तथा धार्मिक आयोजनाका स्थानहरूको नक्साङ्कन गरिएको छ। यसैगरी उक्त क्षेत्र संरक्षणका लागि उपयुक्त निर्माण प्रविधि, हरित संरचना, संवेदनशील पुनःस्थापना उपाय, सामुदायिक सहभागिता तथा दीर्घकालीन व्यवस्थापन रणनीतिहरूसमेत समेटिएको आर्किटेक्चर संकायका स्नातक तह चौथो वर्षका विद्यार्थी अंकित श्रेष्ठले बताए ।
प्रस्ताव ग्रहण गर्दै पनौतीका नगरप्रमुख रामशरण भण्डारीले विद्यार्थीहरूबाट प्राप्त प्रस्तावलाई गम्भीरतापूर्वक लिइने र आगामी नगर योजना तथा बजेटमा समावेश गर्ने प्रतिबद्धता व्यक्त गरे । उनले त्रिवेणीघाटको ऐतिहासिक, धार्मिक तथा सांस्कृतिक महत्त्व स्मरण गर्दै यस किसिमको प्राविधिक अध्ययनले संरक्षण अभियानलाई दिशा दिने विश्वास व्यक्त गरेका छन् ।
‘त्रिवेणीघाट संरक्षण सम्बन्धी प्रदर्शनी’ कार्यक्रममा बागमती प्रदेश सभा सदस्य एवं पुर्वमन्त्री एकालाल श्रेष्ठले आर्किटेक्ट अध्ययनरत विद्यार्थीहरूको अथक मेहनत कार्यले पनौतीको समृद्ध इतिहासलाई संरक्षण गर्न मद्दत पुर्याउने बताए । यस प्रतिवेदनले पनौतीको यस क्षेत्रलाई विश्व सम्पदा सुचिमा समावेश गराउन सहयोग पुग्ने विश्वास व्यक्त गरे ।
मकवानपुर । बागमती प्रदेशका प्रमुख दीपक प्रसाद देवकोटा अस्पताल भर्ना हुनु भएकाे छ । प्रदेश प्रमुख देवकाेटा ग्राण्डी अन्तर्राष्ट्रिय अस्पताल,धापासी काठमाडाैंमा बिहीबार भर्ना हुनु भएकाे हाे ।
चिकित्सहरुको परामर्श बमोजिम प्रदेश प्रमुख देवकोटा अस्पताल भर्ना हुनु भएकाे प्रदेश प्रमुखको कार्यालयका प्रवक्ता देवेन्द्र सापकोटाले जानकारी दिए । प्रदेश प्रमखुकाे स्वास्थ्यमा बुधबार राती एक्कासी समस्या आएपछि उहाँ बिहीबार बिहानै काठमाडौं उपचारकाे लागि जानु भएकाे प्रदेश प्रमुख कार्यालयले जनाएकाे छ ।
बागमती प्रदेशका मुख्यमन्त्री बहादुर सिंह लामाले प्रदेश प्रमुख बिरामी भएर काठमाडौं जानु भएकाे विषयमा “अस्पतालमा भेटिएनन्” भनेपछि प्रदेश प्रमुखकाे सचिवालयले ग्राण्डी अस्पतालमा उपचाररत तस्बिर सार्वजनिक गरेको हाे भने विज्ञप्ति समेत निकालेकाे छ । प्रदेश प्रमुखकाे सचिवालयले प्रदेश प्रमुख अचानक बिरामी पर्नु भएकाेले अस्पताल भर्ना गरिएको विज्ञप्ति मार्फत जानकारी दिएको छ।

मकवानपुर । नेकपा (एमाले) बागमती प्रदेश संसदीय दलको बैठकले नेपाली कांग्रेसकाे संस्थागत निर्णयलाईनै मान्यता दिइने स्पष्ट पारेकाे छ । संसदीय दलका नेता जगन्नाथ थपलियाका अनुसार काँग्रेस पार्टीसँग सहकार्य भएकाले संस्थागत निर्णयलाई आफूहरुले मान्यता दिने बताए ।
एमाले र नेपाली कांग्रेसबीच बागमती प्रदेशमा बनेको सहकार्यको सम्बन्धमा बैठकले स्पष्ट गर्दै भनेको छ, ‘यो सहकार्य कुनै व्यक्तिको निजी सम्बन्धको कारण होइन, दलगत सहमतिमा आधारित छ।’ बैठकले नेपाली कांग्रेस संसदीय दलभित्र देखिएको नेतृत्व विवादलाई उक्त दलको आन्तरिक प्रक्रिया भन्दै त्यसमा प्रत्यक्ष वा अप्रत्यक्ष रूपमा संलग्न नहुने स्पष्ट नीति लिएको छ।
बैठक पछि जारी विज्ञप्तिमा भनिएको छ, ‘कांग्रेसभित्र उत्पन्न विवाद प्रजातान्त्रिक प्रक्रियामार्फत छिटो समाधान होस् भन्ने हाम्रो सुझाव हो ।’ एमाले संसदीय दलले आफ्नो सदस्यहरूले उक्त विषयमा कुनै अभिव्यक्ति वा क्रियाकलाप नगर्ने निर्णयसमेत गरेको उल्लेख छ। साथै बैठकले हालै सम्पन्न एमाले केन्द्रीय कमिमटीको नवौं बैठकमा भएका निर्णयहरूलाई पूर्ण समर्थन गर्दै ती निर्णयहरूको अक्षरशः कार्यान्वयन गर्ने प्रतिबद्धता जनाएको छ।
संगठनात्मक अनुशासन, विचारको स्पष्टता र रणनीतिक एकतामा जोड दिँदै अगाडि बढ्ने निर्णय पनि बैठकले गरेको हो। हालका दिनमा सार्वजनिक सञ्जाल र केही माध्यमबाट कांग्रेस दलभित्रको समीकरण परिवर्तन गर्न एमाले मन्त्रीहरूको भूमिका रहेको भन्दै गरिएको प्रचारप्रति पनि बैठकले आपत्ति जनाएको छ। ‘एमाले मन्त्रीहरू समीकरण परिवर्तनमा संलग्न छन् भन्ने आरोपहरू पूर्णतः आधारहीन, निराधार र असत्य छन्।’ विज्ञप्तिमा भनिएको छ ‘बैठकले त्यसप्रति गम्भीर ध्यानाकर्षण गराएको छ।’
बैठकको अन्त्यमा कृषिको मुख्य सिजनमा बजारमा देखिएको रसायनिक मलको अभावलाई गम्भीर रूपमा लिँदै संघीय सरकारसँग तुरुन्तै मल आपूर्ति सुनिश्चित गर्न आग्रह गरिएको छ। ‘मलको अभावका कारण किसान मर्कामा परेका छन्, यसले उत्पादनमा ठूलो असर पार्न सक्छ,’ बैठकको निष्कर्षमा उल्लेख छ। नेकपा एमाले बागमती प्रदेश संसदीय दलले आफू जिम्मेवार विपक्ष र सहकार्य दलको हैसियतमा लोकतान्त्रिक मूल्य, स्थायित्व, सुशासन र जनताको हितमा अग्रसर भएर अघि बढ्ने पुनः प्रतिबद्धता समेत व्यक्त गरेको छ।
