प्रहरीको गुनासो पेटिका स्थानीय तहमा
Tags: No Comments
मकवानपुर /प्रहरी कर्मचारीहरुसँग सम्बन्धित गुनासो सुनुवाई गरी सेवा प्रभावकारी बनाउने तयारी गरिएको छ ।नागरिकबाट गुनासो तथा सुझाव संकलन गरी प्रहरी सेवालाई थप प्रभावकारी बनाउन यो कार्य सुरु गर्न लागिएको हो । गुनासो तथा सुझाव संकलन पेटिका बागमती प्रदेश प्रहरी कार्यालय हेटौंडाले प्रदेशको सबै जिल्लाको सबै स्थानीय तहहरुमा गुनासो पेटिका राख्न लागेको हो ।
प्रदेशका हरेक स्थानीय तहमा प्रहरी कर्मचारीबाट सम्पादन भएका कामसँग सम्बन्धित स्थानीय जनताको गुनासो सुन्ने व्यवस्था गर्न लागिएको प्रदेश प्रहरी कार्यालयका प्रवक्ता सुदीप गिरीले जानकारी दिए ।
बागमती प्रदेशको राजधानीमा रहेको प्रदेशको एक मात्र उपमहानगरपािलका हेटौंडा उपमहानगरपालिका कार्यालयमा बागमती प्रदेश प्रहरी कार्यालयका प्रमुख बसन्तकुमार लामाले सुझाव संकलन पेटिका राख्ने र अरु जिल्लाका स्थानीय तहमा सम्बन्धित जिल्लाका प्रहरी कार्यालय मार्फत राख्ने तयारी गरिएको प्रवक्ता गिरीले बताए । बागमती प्रदेश प्रहरी कार्यालय हेटौंडाले नागरिकहरुबाट प्रहरी कर्मचारीसँग सम्बन्धित गुनासो तथा सुझाव संकलन गरी प्रहरी सेवालाई थप प्रभावकारी बनाउन प्रदेश भरीका स्थानीय तहमा गुनासो तथा सुझाव संकलन पेटिका
राख्ने निर्णय अनुरुप सम्पुर्ण तयारी गरिएको हो । प्रहरी कार्यालयका साथै प्रहरी कर्मचारीहरुबाट सम्पादन भएका कामकारबाहीको सम्बन्धमा आम नागरिकबाट प्राप्तक हुने सल्लाह, सुझावका साथै गुनासोलाई उचित सम्बोधन गरी प्राप्त सल्लाह सुझाव अनुरुप प्रहरी सेवालाई परिमार्जन गर्ने उद्देश्यले गुनासो तथा सुझाव पेटिका सञ्चालन सम्बन्धी कार्ययोजना समेत निर्माण
गरीएको प्रदेश प्रहरी कार्यालयले जनाएको छ ।
कार्ययोजनामा उल्लेखित व्यवस्था अनुसार ३ चरणमा सबै स्थानीय तहको केन्द्र रहेको कार्यालय र वडा स्तरसम्म गुनासो तथा सुझाव संकलन पेटिका राखिने प्रवक्ता गिरीले बताए । प्रथम चरणमा महानगरपालिका, उपमहानगरपालिका र सदरमुकाममा रहेको गाउँपालिकामा, दोस्रो चरणमा सबै गाउँपालिका र तेस्रो चरणमा सबै वडा कार्यालयहरुमा गुनासो तथा सुझाव संकलन पेटिका राखिने उनले जानकारी दिए । प्रथम चरण अन्तर्गत विहीबार असोज १ गते बागमती प्रदेशका १ महानगरपालीका, १ उपमहानगरपालीका, २५ नगरपालीका र १ गाँउपालिका गरी २८ वटा स्थानीय तहमा गुनासो तथा सुझाव संकलन पेटिका राखिने बताइएको छ । समुदाय प्रहरी साझेदारी कार्यक्रमका प्रमुख सहयोगी स्थानीय निकायसँगको सहकार्यमा सञ्चालन गरिने यस योजना अन्तर्गत स्थानीय निकायहरुमा सुझाव तथा गुनासो पेटिका स्थापना गरी नागरिकहरुबाट प्रहरीसँग सम्बन्धित सूचना संकलन गर्ने कार्य गरिनेछ ।
नेपाल प्रहरीले नागरिकहरुबाट पृष्ठपोषण प्राप्तिीा लागि नागरिक सुनुवाई कार्यक्रम, सुचना अधिकृतको व्यवस्था, सम्पर्क टेलिफोन नम्बर, प्रविधिहरुको प्रयोग लगायत विभिन्न क्रियाकलापहरु सञ्चालन गर्दै आईरहेको भएतापनि सुचना संकलनका कार्यलाई थप प्रभावकारी बनाउन बागमती प्रदेश प्रहरी कार्यालयले नागरीकहरुको सहज र नियमित पहुच हुने स्थानीय निकायहरुमा प्रहरी सम्बन्धित सूचनाहरु प्राप्त गर्ने संयन्त्रको विकास गर्नु उपयुक्त हुने महसुस गरी यो कार्ययोजना तयार गरिएको बताइएको छ ।
मकवानपुर/ बागमती प्रदेश सरकारलाई प्रदेश शिक्षा नीति २०७७ का सम्बन्धमा शिक्षाका लागि राष्ट्रिय अभियान नेपाल (एनसीई नेपाल) ले सुझाव बुझाएको छ । शिक्षा नीतिको मस्यौदा बनाई नागरिकस्तरबाट सुझाव मागिरहेको अवस्थामा एनसीईले ४ पेजको सुझाव बुझाएको हो ।
एनसीई बागमती प्रदेश समन्वय समितिद्वारा भाद्र १८ गते अनलाइन माध्यममार्फत् गरिएको नागरिक छलफलबाट संकलित सबै सुझावलाई प्रदेशको सामाजिक विकास मन्त्रालयका सचिव दिपक काफ्लेलाई हस्तान्तरण गरिएको थियो ।
एनसीई बागमतीका संयोजक प्रकाश खतिवडा र मकवानपुर संयोजक बुद्ध लामाको नेतृत्वमा पुगेको टोलीले नीति र कार्यनीतिमा थप्नुपर्ने वा स्पष्ट हुनुपर्ने प्रावधानहरुलाई बुझाएको थियो ।
मन्त्रालयका सचिव काफ्लेले सुझाव पत्रका लागि धन्यवाद व्यक्त गर्दै विभिन्न जिल्लामा शिक्षाका क्षेत्रमा काम गरेको जानकारी गराउँदै शिक्षा नीतिलाई समयसापेक्ष, जनमैत्री बनाउन भूमिका खेल्ने बताएका थिए । प्रदेशको शिक्षा नीतिमा विद्यार्थीलाई प्रयोगात्मक र अतिरिक्त क्रियाकलापमा संलग्न गराउने पाठ्यक्रम हुनुपर्ने, तामाङ भाषाको बाहुल्य रहेकाले पढाइको माध्यम भाषा तामाङ पनि हुनुपर्ने, प्रदेश छिमेकी चीनसँग जोडिएकाले चिनियाँ भाषा सिकाएर सीमापार व्यापार गर्न सक्ने लक्ष्य लिनुपर्ने सुझाव पत्रमा उल्लेख छ ।
त्यस्तै, नीतिमा विद्यालय र विश्वविद्यालयसम्बन्धी व्यवस्था एकै ठाउँमा राखिएकाले छुट्टाछुट्टै शीर्षकमा राखी प्रदेशले गर्ने काम प्रष्ट राख्नुपर्ने, विद्यालय स्थानीय तहको अधिकारक्षेत्रमा परेकाले प्रदेशले समन्वय र सहयोग गर्ने शब्दहरु हुनुपर्ने, पाठ्यक्रम जसले प्रयोग गर्ने हो, उसैले निर्माण गर्न सक्ने बनाउनुपर्ने, प्राविधिक तथा व्यवसायिक शिक्षामा छात्राको सहभागिता बढाउन छात्रवृत्तिको व्यवस्था गर्नुपर्ने लगायतका सुझाव दिईएको छ ।
मकवानपुर । संस्थागत विद्यालय शिक्षक युनियन (इस्टु) राष्ट्रिय समिति, प्रकाशन विभागकाे आयाेजनामा “संस्थागत विद्यालय : श्रम र सराेकार” विषयक दुई दिवसीय राष्ट्रव्यापी भर्चुअल कवि गाेष्ठी सम्पन्न भएकाे छ ।
गत भदाै १३ र २० गते दुई दिन आयाेजित कवि गाेष्ठीमा सात वटै प्रदेशबाट संस्थागत विद्यालयमा कार्यरत ५० जना शिक्षक-कर्मचारीले आआफ्ना पेसागत समस्या तथा इस्टुका माध्यमबाट आफूहरूले गरिरहेकाे सङ्घर्षबारे हाइकु, मुक्तक, गजल, गीत, कविता आदि विविध विधाका रचना वाचन गरेका थिए । भदाै १३ प्रदेश न. १,२ र वाग्मती प्रदेश विशेष साथै भदाै २० गते गण्डकी, प्रदेश न. ५, कर्णाली तथा सुदूरपश्चिम प्रदेश विशेष कार्यक्रम गरिएकाे थियाे ।
कार्यक्रममा हरेक प्रदेशबाट अतिथि कविहरूलाई समेत निम्त्याएर प्रत्येक कविका दुई दुई वटा कवितासमेत प्रस्तुत गरिएकाे थियाे । अतिथि कविहरूमा प्रदेश न. १ बाट वीरेन्द्र थाेक्लिहाङ, २ बाट रेणु गुप्ता, वाग्मती प्रदेशबाट पुरुषाेत्तम आचार्य, गण्डकी प्रदेशबाट प्राञ्जल, प्रदेश नम्बर ५ बाट छविलाल काेपिला, कर्णाली प्रदेशबाट सीता यरी र सुदूरपश्चिम प्रदेशबाट साेझाे गाउँलेलाई आमन्त्रण गरिएकाे थियाे ।

संस्थागत विद्यालयकाे शैक्षिक गुणस्तर एवम् पेसागत सुरक्षामा पक्षमा वकालत गर्दै आइरहेकाे संगठन “इस्टु” मा आबद्ध भई पेसागत अधिकारबारे आवाज बुलन्द गर्न उत्प्रेरित गर्ने तथा निकट भविष्यमा प्रकाशन गर्न लागिएकाे स्मारिकामा रचना प्रकाशन गर्ने उद्देश्यले यस किसिमकाे रचनात्मक कार्यक्रमकाे आयाेजना गरिएकाे कार्यक्रम संयाेजक इस्टु राष्ट्रिय समिति सचिव एवम् प्रकाशन विभाग प्रमुख दीपक गाैतमले जानकारी दिए ।
प्रकाशन विभाग प्रमुख गाैतमकाे अध्यक्षता एवम् इस्टु राष्ट्रिय समिति अध्यक्ष हाेमकुमार थापाकाे प्रमुख आतिथ्यमा सम्पन्न उक्त कार्यक्रममा इस्टु का प्रमुख संरक्षक मुकुन्द गाैतम, प्रमुख सल्लाहकार इन्द्रराज भट्टराई, उपाध्यक्ष एवम् सङ्गठन विभाग प्रमुख देवीदत्त पाैडेल, उपाध्यक्ष एवम् तालिम विभाग प्रमुख अमल राई, महिला विभाग इन्चार्ज अञ्जु गाैतम, महासचिव भाेलानाथ चालिसे, सचिव एवम् महिला विभाग संयाेजक सरिता निराैला लगायतले समीक्षात्मक मन्तव्य व्यक्त गरेका थिए।
कार्यक्रमकाे सहजीकरण राष्ट्रिय समिति सदस्य एवम् प्रकाशन विभाग सहसंयाेजक ध्रुव पाैडेलले गरेका थिए। भर्चुअल माध्यम (जुम) बाट भएकाे उक्त कार्यक्रममा इस्टु राष्ट्रिय समिति, प्रदेश समिति तथा सम्पूर्ण जिल्ला समितिका पदाधिकारी, सदस्य एवम् देशभरबाट शिक्षक-कर्मचारीकाे उपस्थिति रहेकाे थियाे ।
काठमाडौं । नेपालमा पछिल्लो २४ घण्टामा थप १ हजार ५ सय ६६ जना कोरोना संक्रमण मुक्त भएकाे स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमले नियमित पत्रकार सम्मेलनमार्फत जानकारी दिएका छन् । यो सहित कुल संक्रमण मुक्त हुनेको संख्या २७ हजार १ सय २७ पुगेको छ।
यसै गरी नेपालमा पछिल्लो २४ घण्टामा थप १ हजार ४१ जनामा कोरोना भाइरस (कोभिड–१९) संक्रमण पुष्टि भएको छ । पछिल्लो २४ घण्टामा देशको विभिन्न प्रयोगशालामा गरिएको परीक्षणमा थप १ हजार ४१ जनामा कोरोना संक्रमण पुष्टि भएको स्वास्थ्य तथा जनसंख्या मन्त्रालयले जनाएको छ । यो सँगै नेपालमा कोरोना संक्रमण हुनेको संख्या ४५ हजार २७७ पुगेको छ ।
नेपालमा पछिल्लो २४ घण्टामा थप ९ जनाको मृत्यु भएको छ । योसँगै नेपालमा कोरोना संक्रमणबाट मृत्यु हुनेको संख्या २८० जना पुगेको स्वास्थ्य तथा जनसंख्या मन्त्रालयले जनाएको छ । मन्त्रालयका प्रवक्रा गौतमका अनुसार, पछिल्लो २४ घण्टामा ३ जना महिला र ६ जना पुरुष गरी ९ जनाको मृत्यु भएको हो ।
मृत्यु हुनेहरुमा मोरङकी ४३ वर्षीया, मकवानपुरकी ५२ वर्षीया र नवलपरासीका ३७ वर्षीया गरी ३ महिला र पर्साका ७५ वर्षीय, महोत्तरीका ७८ वर्षीय, काठमाडौंका ४१, ५९ र ६५ वर्षीय गरी ३ जना र रुपदेन्हीका ४० वर्षीय गरी ६ जना पुरुषको मृत्यु भएको हो ।
बागमती प्रदेशमा शनिवार थप ५१८ जना कोरोना संक्रमित थपिएका प्रवक्ता गौतमले नियमित पत्रकार सम्मेलनमार्फत सो कुराको जानकारी गराएका हुन् । मन्त्रालयका अनुसार, प्रदेशमा शनिवार थपिएका कोरोना संक्रमितमध्ये सबैभन्दा धेरै काठमाडौं जिल्लाका रहेका छन् । काठमाडौंमा ३२६ जना कोरोना संक्रमित थपिएका हुन् ।
त्यस्तै, काभ्रेपलाञ्चोक ६, चितवनका ४५, दोलखाका ६, धादिङका १०, नुवाकोटका १, भक्तपुरका ४५, मकवानपुरका ३५, रामेछापका ५, ललितपुरका ३७ र सिन्धुलीका २ जना कोरोना संक्रमित थपिएको मन्त्रालयले जनाएको छ ।
प्रदेशमा हालसम्म कूल कोरोना संक्रमितमध्ये २ हजार ३५१ जना संक्रमण मुक्त भई डिस्चार्ज भएका छन् । पछिल्लो २४ घण्टामा प्रदेशमा कोरोना संक्रमणबाट थप ४ जनाको मृत्यु भएको छ । संक्रमणबाट मृत्यु हुनेहरुमा काठमाडौंका ४१, ५९ र ६५ वर्षीय ३ पुरुष र मकवानपुरकी ५२ वर्षीय एक महिला रहेका छन् ।
प्रदेशमा हाल ५ हजार ८७५ जना आइसोलेशनमा र २ हजार २४५ जना होम आइसोलेशनमा बस्दै आएको प्रवक्ता डा. गौतमले बताए । प्रदेशमा हाल १०८ जना आइसियुमा र २० जना भेन्टिलेटरमा बस्दै आएका मन्त्रालयले जनाएको छ ।
यसै बीच सर्वोच्च अदालतले कोरोना भाइरस ९कोभिड–१९०बाट मृत्यु भएका र सङ्क्रमित व्यक्तिको वैयक्तिक विवरण सार्वजनिक नगर्न सरकारका नाममा परमादेश जारी गरेको छ । व्यक्तिको सहमतिबेगर त्यस्ता विवरण छाप्ने तथा सार्वजनिक गर्ने व्यवस्था तत्काल रोक्न पनि अदालतले फैसलामा भनेको छ ।
विवरण सार्वजनिक गर्नु प्रचलित संविधान, गोपनीयताको हकसम्बन्धी ऐन, मुलुकी फौजदारी संहिता तथा अदालतबाट प्रतिपादित नजिरविपरीत हुने फैसलामा उल्लेख छ ।
मुख्यमन्त्री र बानियाँले परेवा भीरमा कसरी ढाक्लान् लाज ?
Tags: No Comments
राष्ट्रिय बहसको बिषय बनेको राक्सिराङ गाउँपालिका ४ स्थित परेवाभीर खण्डमा सडक बनाउने बिषयमा त्यस क्षेत्रका प्रतिनिधि सभा सांसद विरोध खतिवडाले प्रतिबद्धता पूरा गरेका छन् ।
उनले परेवाभीर खण्डमा सडक निर्माण गर्ने प्रतिबद्धता जाहेर गरिरहँदा नेपाल कम्युनिष्ट पार्टीभित्रको जीवनमा नै हलचल आउने गरी सांसद खतिवडासहितका अभियन्ताहरुलाई ‘गुटबन्दी’ गरेको आरोप मात्रै लागेन, काँग्रेसपरस्त समेत भनियो ।
कारण थियो–राक्सिराङ गाउँपालिकाले परेवाभीर खण्डमा सडक निर्माणको बहसलाई उच्च विन्दुमा पुर्याएर बजेट समेत बिनियोजन गरिसकेको थियो । राक्सिराङ गाउँपालिकामा काँग्रेस नेतृत्वको सरकार छ । सांसद खतिवडाको परेवाभीर सडक खण्डका लागि संघीय सरकारबाट कुनै पनि शीर्षकमा बजेट बिनियोजन गरिछाड्ने प्रतिबद्धता जनाएपछि भने प्रमुख बिपक्षी दलका नेता तथा त्यस क्षेत्रका प्रदेश सांसद इन्द्रबहादुर बानियाँले पनि व्यक्तिगत खर्चमै बाटो बनाउने घोषणा गरे ।
राष्ट्रिय बहसकै बिषय बनेर मिडियाहरु परेवाभीर पुग्ने र युट्युबरहरुले समेत यही बिषयलाई उठान गर्न थालेपछि दबाबमा परेको बागमती प्रदेश सरकार पनि ‘बजेट नहाल्ने भनिएको होइन, अनलाइनले गलत समाचार दियो’ भन्ने लाइनमा उभिन बाध्य भयो । यही बीचमा राक्सिराङ गाउँपालिकाले २ करोड रुपियाँ यसै बर्ष खर्चिने गरी परेवाभीर सडक खण्ड निर्माणका लागि प्रक्रिया पनि सुरु गरिसकेको छ । जनताले परेवाभीरको सुधारिएको बलियो बाटो हेर्न तम्तयार भएर बसेका छन् ।
यो खण्ड निर्माण गर्नका लागि सबैभन्दा बढी आवाज संसदमा उठाउने यसै क्षेत्रका अर्का सांसद हुन् ओमबहादुर ग्लान । उनले यो खण्डबाट कोही मान्छे मरेमा बुद्धचोकमा ल्याएर दाह संस्कार गरिने धम्की पनि संसदबाट सरकारलाई दिएका थिए । तर, बजेट नछुटिएपछि बिरक्तिएर अब सरकारकै बिकल्प खोज्नुपर्ने हो कि भन्नेसम्मको आक्रोश पोख्न भ्याए उनले ।
यतिखेर गाउँपालिका र संघीय सरकारको तर्फबाट समेत गरी २ करोड रुपियाँ कार्यान्वयन भई परेवाभीर खण्डमा सडक बन्ने कुराले सबैभन्दा बढी खुसी सांसद ग्लानलाई लागेको छ । उनले सामाजिक सञ्जालबाटै धन्यवाद तथा आभार ब्यक्त गरेका मात्रै छैनन्, थाहासन्देशसँग प्रतिक्रिया दिँदै भनेका छन्–‘यो सुखद् खबरले मनमा निकै शान्ति मिलेको छ ।’
त्यसो त अर्थ मन्त्रालयले लेखेको पत्र देखाउँदै राक्सिराङ गाउँपालिका अध्यक्ष राजकुमार मल्लले संघीय सांसद खतिवडालाई धन्यवाद दिँदै खुसीको खबर सामाजिक सञ्जालमा लेखेका छन् । संघीय सरकारको लगानी थपिएको कुराले यतिखेर पश्चिम मकवानपुरको कैलाश, राक्सिराङ तथा धादिङका समेत गाउँहरु लाभान्वित भइरहँदा यतिखेर जनताले यो अभियानमा छुटेका नेताहरुबारे चिन्ता ब्यक्त गर्न थालेका छन् ।
जस्तो कि यसै क्षेत्रका सांसद बानियाँले अब के गर्लान् ? ‘उहाँले व्यक्तिगत खर्चमा बाटो बनाउँछु भनेर सुपरहीट हुन बोलेको कुरा हो’, एक स्थानीयले भने–‘सस्तो बोली उहाँकै लागि गलपासो हुने निश्चित थियो ।’ ब्यापारिक पृष्ठभूमिका बानियाँले चतुरतापूर्वक आफैले बाटो बनाउँछु भनिरहँदा अर्का सांसद ग्लान चाहिँ मौन देखिएका थिए । कतिपय मानिसहरु ग्लानले बुद्धचोकमा सद्गद् गर्नेसम्मको धम्की दिँदा बानियाँले पनि साथ दिएको भए प्रदेश सरकारले परेवाभीरमा बजेट हाल्न सक्थ्यो ।
आफ्नै क्षेत्रका जनताले दुःख पाएको कुरा सदनमा अरुले नै उठाउँदा समेत बानियाँले समर्थन जनाएनन् । कारण थियो,–यस भेगका जनताका पीडा मर्कासँग उनी अभ्यस्त थिएनन् ।
अब यतिखेर बानियाँ र बागमती प्रदेश सरकारका मुख्यमन्त्री डोरमणि पौडेलको अग्निपरिक्षा परेवाभीरमा हुँदैछ ।
स्थानीय तहका प्रमुख मल्ल र संघीय सांसद खतिवडाले बोलेको कुरा पूरा गरिसके । आम जनताले यतिखेर दुई तिहाई बढी सांसद भएको बागमती प्रदेश सरकारले परेवाभीरमा थप लगानी गरेर लाज जोगाउँछ कि जोगाउदैन भन्ने बिषय हेरिरहेको छ भने सस्तो लोकप्रियताका लागि बोल्ने बानियाँले ब्यक्तिगत लगानीमा परेवाभीरमा के योगदान गर्न सक्लान् ? यो सर्बत्र चासोको बिषय छ ।
(थाहासन्देश दैनिकबाट)