मकवानपुर । संचारमाध्यमलाई उद्योगका रुपमा समेट्न माग गरिएकाे छ । नेपाल पत्रकार महासंघ बागमती प्रदेश समितिले बुधबार आन्तरिक मामिला तथा कानुन मन्त्रालय र उद्योग, पर्यटन वन तथा वातावरण मन्त्रालय प्रस्ताव पत्र बुझाउँदै प्रदेशभित्र संचालित संचारमाध्यमलाई उद्योगमा समेटेर अन्य उद्योग सरह ऋण, सहुलियत लागयतका सहयोग प्रदान गर्न माग गरेको हो ।
महासंघ बागमती अध्यक्ष शिव देवकोटाले आन्तरिक मामिला तथा कानुन मन्त्री केशवराज पाण्डे र उद्योग, पर्यटन वन तथा वातावरण मन्त्री सरेश नेपाल समक्ष प्रस्ताव पत्र बुझाउँदै अन्य उद्योगलाई जस्तै सञ्चार उद्योगलाई पनि समान व्यवहार गरी राज्यबाट पाउने ऋण लागयतका सहुलियत प्रदान गर्न माग गरिएको हो । त्यसभित्र पनि साना र स्वरोजगारमूलक लगानीका सञ्चारमाध्यमले प्राथमिकता पाउनुपर्ने महासंघले माग गरेको छ ।
अध्यक्ष देवकोटाले हाल प्रदेशभित्र सयौं साना लगानीका मिडियामा करोडौं लगानी भएपनि दीर्घकाल संचालन गर्न सक्ने अवस्था नभएको र समानुपातिक विज्ञापन उपलब्ध नहुँदा बारम्बार धरासायीमा पर्दै आएको मन्त्रीद्वय समक्ष जानकारी गराए । साना लगानीका संचारमाध्यमलाई उद्योगका रुपमा समेट्ने मात्र नभइ आवश्यक सामाग्री खरिदका लागि सहुलियतपूर्ण ऋण प्रवाहका योजना अघि सार्नुपर्ने महासंघले माग गरेको छ ।
महासंघले आन्तरिक मामिला तथा कानुन मन्त्रालय र उद्योग, पर्यटन वन तथा वातावरण मन्त्रालयमा प्रदेश सरकारले ल्याउने आगामी आर्थिक वर्ष २०७८÷०७९ को नीति तथा कार्यक्रम र बजेटमा संचारग्राम निर्माण, पत्रकारका लागि विभिन्न चरणमा लेखनबृत्ति, तालिम, पत्रकारको क्षमताका विकासका लागि विविध योजना समेट्न ध्यानाकर्षणसहित प्रस्ताव पत्र पेश गरेको महासचिव कृष्ण सारु मगरले बताए ।
प्रस्ताव पत्र बुझ्दै आन्तरिक मामिला तथा कानुन मन्त्री केशवराज पाण्डेले संचारमाध्यम र पत्रकारका लागि आवश्यक योजनालाई आगामी नीति तथा कार्यक्रम र बजेटमा समेट्ने गरी छलफल अघि बढाउने बताए । उनले प्रदेश सरकारले महासंघसँग सहकार्य गरेर पत्रकारका लागि तालिम, लेखनवृत्ति र क्षमता विकासका लागि नयाँ योजनालाई प्राथमितामा राखेर अघि बढ्न आफु तयार रहेको प्रतिबद्धता व्यक्त गरे ।
उद्योग, पर्यटन वन तथा वातावरण मन्त्री सरेश नेपालले पत्रकारको हकहितका लागि प्रदेश सरकारले अघि बढाउन सक्ने योजनलाई प्राथमिकतामा राख्न आफु तयार रहेको धारणा राखे । उनले संचारमाध्मयलाई उद्योगका रुपमा विकास गर्नसके संचारकर्मीको दीर्घकालीन विकासमा टेवा पुग्ने हुनाले त्यसतर्फ सकारात्मक रहेको प्रतिबद्धता व्यक्त गर्दै यसबारे नीतिगत निर्णय गर्न आफु तयार रहेको बताए ।
यसैगरी महासंघले सामाजिक विकास मन्त्री सरस्वती बस्नेत समक्ष कोरोनाको महामारीलाई मध्यनजर गर्दै अग्रपंक्तिमा खटिने पत्रकारका लागि स्वास्थ्य क्षेत्रबाट हुनसक्ने सबै सहयोग तत्काल अघि बढाउन माग गरेको छ । महासंघका अध्यक्ष देवकोटाले मन्त्री बस्नेतसमक्ष प्रस्ताव पत्र पेश गर्दै मन्त्रालयले तत्काल पहिलो डोज कोरोनाको खोप लगाउन छुटेका पत्रकारका लागि तत्काल सुरक्षित तवरबाट खोपको व्यवस्थापन गर्न माग गरेका छन ।
महासंघले स्नातक र स्नात्तकोत्तर अध्ययन गर्न चाहने पत्रकारका लागि अगामी आर्थिक वर्षबाट छात्रबृत्ति व्यवस्था गर्नसमेत माग गरेको छ । मन्त्री बस्नेतले महासंघले पेश गरेको प्रस्तावलाई आगामी नीति तथा कार्यक्रममा समेट्न आफ्नो तर्फबाट मन्त्रिपरिषद्मा छलफल अघि बढाउने प्रतिबद्धता व्यक्त गरिन । मन्त्रालयहरुमा पुगेको महासंघको डेलिगेशनमा उपाध्यक्ष रुपेश दुलाल, महासचिव कृष्णसारु मगर, सदस्यहरु सुदीप शिवाकोटी र रामहरि गजुरेलको उपस्थिति रहेको थियो ।
मकवानपुर । दोलखा जिल्लामा पहिलो पटक कोरोना भाइरसको परीक्षण गर्न पीसीआर परीक्षणका लागि प्रयोगशाला (Molecular Lab) शुरु भएको छ । दोलखाको भिमेश्वर नगरपालिकास्थित चरिकोट अस्पतालमा आज बुधबार प्रयोगशालाको उद्घाटन गरिएको हो ।
प्रयोगशाला चौबिसै घण्टा चलाउने हो भने ५०० सयसम्म स्वाब परीक्षण गर्ने क्षमता रहेको जनाइएको छ । आज दक्ष जनशक्ति समेत लगेर प्रयोगशालाको उद्घाटन गरेको बागमती प्रदेशको जनस्वास्थ्य प्रयोगशाला धुलिखेलका प्रमुख डा.नारायण बहादुर कार्कीले बताए । सो प्रयोगशालामा दोलखा नजिकका दोलखा, रामेछाप, सिन्धुपाल्चोक र सिन्धुलीबाट स्वाब संकलन गरेर ल्याउन सकिने कार्कीले बताए । चरिकोटमा प्रयोगशाला शुरु गरिएसँगै बागमती प्रदेशमा प्रयोगशालाको संख्या ६ पुगेको छ ।

यसअघि धुलिखेल, नुवाकोट, भक्तपुर, हेटौंडा, सिन्धुलीमा प्रयोगशाला संचालनमा रहेको छ । प्रयोगशाला निर्देशक डा. कार्कीका अनुसार यो मेसिन संसारमै अहिलेसम्म बनेको राम्रो मानिने मेसिन मध्येको हाे । यहाँ राखिएको मेसिनमा पीसीआर मात्रै नभई अरु विभिन्न रोगको पनि परीक्षण गर्न सकिने कार्कीको बताए । प्रयोगशालामा माइक्रोबाइलोजिस्ट सहितको जनशक्ति अहिले भए पनि पुग्ने जनशक्ति नभएकाले प्रदेश सरकारसँग माग गरिएको डा. कार्कीले बताए ।

‘थप जनशक्ति प्रदेश सरकारले पठाउँछ’ –मन्त्री बस्नेत
बागमती प्रदेश, सामाजिक विकास मन्त्री सरस्वती बस्नेतले कोरोना संक्रमण बढ्दै गएकाले दोलखासहित आसपासका जिल्लाको पीसीआर परीक्षणका लागि सहज हुने भएकाले प्रयोगशाला संचालनमा ल्याएको बताए ।
मन्त्रालयले केन्द्रीय जनस्वास्थ्य प्रयोगशालासँग समन्वय गरेर तत्कालै प्रयोगशाला संचालनमा ल्याएको र अहिले न्यूनतम जनशक्ति भए पनि थप जनशक्ति प्रदेश सरकारले पठाएर प्रयोगशालालाई पूर्ण क्षमतामा संचालन गर्ने मन्त्री बस्नेतले बताइन् ।
मकवानपुर । नेपाल पत्रकार महासंघ बागमती प्रदेश समितिले कोरोना संक्रमण (कोभिड १९) काे जोखिम न्युनिकरणको र्यापिड रेस्पोन्स टिम बनाएको छ । प्रदेश अध्यक्ष शिव देवकोटाको अध्यक्षतामा शनिबार भर्चुअल बैठकले र्यापिड रेस्पोन्स टिम गठन गर्ने निर्णय गरेको हो ।
अध्यक्ष देवकोटाको संयोजकत्वमा गठित ११ सदस्यीय टिममा उपाध्यक्ष रुपेश दुलाल, महासचिव कृष्ण सारु मगर, सचिव युवराज पुरी, सचिव राजन गाउँले (विक), कोषाध्यक्ष रमेश ढुङ्गेल, कार्य समिति सदस्यहरु प्रविण दत्त, ज्ञानु श्रेष्ठ, काजि श्रेष्ठ, पेमा लामा, श्याम प्रसाद खतिवडा रहेका छन् ।
बैठकले सबै जिल्ला शाखाहरुलाई र्यापिड रेस्पोन्स टिम गठन गरी आवश्यक रणनीति निर्माण गरी काम गर्न आग्रह छ । टिमले संचारकर्मीहरूका लागि कोरोना जोखिम न्युनिकरणका लागि गाइडलाइन समेत तयार गर्नेछ भने काेराेनाकाे कारण जोखिममा रहेका पत्रकारहरुलाई परेको समस्या सम्बोधन समेत गरिने छ।
बैठकले कोभिड १९ बिरुद्धको खोप लगाउन बाँकी रहेका सञ्चारकर्मीहरुलाई खोप लगाउन र स्वास्थ्य सतर्कता अपनाएर मात्र कार्यक्षत्रमा अटिन आग्रह गर्दै प्रदेश र जिल्लास्थित सम्बन्धित निकायहरुलाई आबश्यक खोपको प्रवन्ध गरी समन्वयको लागि अनुरोध गरेको छ । कोभिड १९ जोखिमका कारण सकेसम्म घरमै बसेर काम गर्ने वातारण निर्माणको लागि सम्बन्धित सञ्चारमाध्यमहरुलाई आग्रह गर्दै महासंघले आफ्नो सञ्चारगृहमा रहेका सञ्चारकर्मीहरुलाई स्वास्थ्य सतर्कताका सामग्रीहरु उपलब्ध गराउन पनि आग्रह गरिएको छ ।
काेराेना भाइरसकाे जोखिमको बहानामा सञ्चारकर्मीहरुलाई बेतलबी बिदामा नराख्न र निष्काशन नगर्न सञ्चारमाध्महरुलाई आग्रह गर्दै महासंघले कोभिड बहानामा बेतलवी बिदामा राख्ने र निष्काशन गर्ने काम भए महासंघ कडा संघर्षमा उत्रन बाध्य हुने चेतावनी दिएको छ ।
कोभिड महामारीबाट प्रभावित बनेको संचारक्षेत्रलाई परेको आर्थिक क्षति न्यूनीकरणका लागि संघीय, प्रदेश र स्थानीय सरकारहरुलाई आर्थिक प्याकेज उपलब्ध गराउन ध्यानाकर्षण गराउने निर्णय गरेको छ ।
बैठकमा संक्रमणकाे जाेखिम कम गर्न र संक्रमितहरुकाे उपचारलाई व्यवस्थित बनाउन सरकारी प्रयास प्रभावकारी हुन सकेकाेले उपचारमा उचित व्यवस्था मिलाउन तीनै तहका सरकार जुट्नुपर्नेमा जोड दिइएको छ । साथै निषेधाज्ञाकाे प्रत्यक्ष मारमा पर्ने श्रमिक वर्गकाे राेजीराेटीका लागि आवश्यक प्याकेज ल्याउन पनि माग गरिएको छ ।
मकवानपुर । राष्ट्रिय सभा सदस्यको उपनिर्वाचनका लागि निर्वाचन आयोगले मतदान केन्द्र तोकेको छ । आगामी जेठ ६ गते हुने बागमती प्रदेशको रिक्त राष्ट्रिय सभा सदस्यकाे लागि हुने निर्वाचनमा मकवानपुरकाे हेटाैडा उपमहानगरपालिका ४ स्थित भुटनदेवी माविलाई मतदान स्थल ताेकिएकाे आयोगले जनाएकाे छ ।
मतदान स्थल २ वटा केन्द्र रहने भएकाे छ । प्रदेशसभा सदस्य १ सय १० जनाका लागि केन्द्र (क) र गाउँपालिकाका अध्यक्ष, उपाध्यक्ष तथा नगरपालिकाका प्रमुख, उपप्रमुख २ सय ३८ जनाका लागि केन्द्र (ख) गरी छुटुृाछुटृै मतदानकेन्द्र तोकिएकाे आयोगले जानकारी दिएकाे हाे ।
राष्ट्रिय सभा सदस्य निर्वाचन नियमावली, २०७६ को नियम २३ को उपनियम (३) बमोजिम भुटनदेवी माविलाई मतदान स्थल तोकिएकाे आयोगले जनाएकाे छ ।
नेकपा माओवादी केन्द्रबाट बागमती प्रदेशकाे राष्ट्रिय सभा सदस्यमा निर्वाचित रामबहादुर थापा बादल नेकपा एमालेमा प्रवेश गरे पछी केन्द्रले आफ्नो दलमा नरहेको भन्दै संसद सचिवालयलाई पत्र पठाएकाेले उनको पद रिक्त भएको थियो।
यसैगरी शुक्रबार निर्वाचन अधिकृत, प्रदेश निर्वाचन अधिकारी र कम्प्यूटर अपरेटरका लागि निर्वाचन सञ्चालन तथा व्यवस्थापन सम्बन्धी अभिमुखीकरण कार्यक्रम सम्पन्न भइ सकेकाे छ । यस अघी नै उपनिर्वाचन सम्बन्धी निर्वाचन कार्यक्रम अायाेगले प्रकाशित गरि कार्य प्रारम्भ गरेकाे हाे ।
गण्डकी प्रदेशसभाको बैठक स्थगित भएको छ । राष्ट्रिय जनमोर्चाका १ संसद् सम्पर्कविहीन भएपछि बैठक स्थगित भएकाे हाे ।
प्रदेशसभाको विशेष अधिवेशनको तेस्रो बैठकमा मुख्यमन्त्री पृथ्वी सुब्बा गुरुङविरुद्ध अविश्वास प्रस्तावमाथि छलफल भइरहेको समयमा राष्ट्रिय जनमोर्चाका खिमविक्रम शाही सम्पर्क विहिन भएको भन्दै प्रदेशसभा सचिवालयमा खोजी गर्न मागसहित पार्टीका तर्फबाट सांसद पियारी थापाले प्रदेशसभा सचिवालयमा निवेदन दिएकी हुन् । उनले सांसद शाही सम्पर्कविहीन भएकोले खोजी गर्न तथा प्रदेशसभा बैठक स्थगनका लागि माग गरेकी थिइन् ।
यसअघि बुधबार बसेको प्रदेशसभा बैठक सभामुख नेत्रनाथ अधिकारीले साढे चार बजेसम्मका लागि स्थगित गरेका थिए । जनमोर्चाका सांसद शाही प्रदेशसभामा अनुपस्थित रहेको पार्टीको सम्पर्कमा समेत नरहेपछि अविश्वास प्रस्तावका पक्षधर दलहरुले बैठक स्थगन गर्न माग गरेका थिए ।