मकवानपुर । बागमती प्रदेशको मन्त्रीपरिषद्ले विभिन्न १२ वटा निर्णय गरेकाे छ । मंगलबारकाे मन्त्रिपरिषद्काे बैठकले गाउँपालिकाले सिमाना हेरफेरकाे सिफारिस गर्नेदेखि लामाे समयदेखि संचालन हुन नसकेकाे प्रदेश सभाकाे बैठक बाेलाउनेलगायतका १२ वटा निर्णय गरेकाे हाे ।
बैठकले सिन्धुपाल्चोकको बलेफी गाउँपालिकाको वडा सङ्ख्या तथा सिमाना हेरफेरका लागि संघीय सरकारमा पठाउने निर्णय गरेकाे छ । यसैगरी गत असार २० गतेपछि संचालन हुन सकेकाे प्रदेश सभाकाे बैठक बाेलाउने निर्णय गरेकाे छ । प्रदेश सभाको बैठक आगामी भदौ १७ गते दिनको १ बजेका लागि बोलाउने निर्णय गरेको प्रदेश सरकारका प्रवक्ता गंगानारायण श्रेष्ठले जानकारी दिए ।
यसैगरी बिना विभागीय मन्त्री रामकृष्ण चित्रकारलाई उद्योग, बाणिज्य, भूमि तथा प्रशासन मन्त्रालयको जिम्मेवारी दिने निर्णय गरेकाे बैठकले प्रदेश सरकारी कामकाजको भाषा सम्बन्धमा व्यवस्था गर्न बनेको विधेयक प्रदेश सभामा पेश गर्ने निर्णय समेत गरिएको श्रेष्ठले बताए ।
यस्तै प्रदेश कृषि विकास सम्बन्धमा व्यवस्था गर्न बनेको विधेयक, विज्ञान, प्रविधि, नवप्रवर्तन तथा विकास कोष सञ्चालन विधेयक, प्रदेश सञ्चार माध्यम व्यवस्थापन ऐन–२०७५ लाई संशोधन गर्न बनेको विधेयक, प्रदेश स्वास्थ्य सेवा ऐन–२०७५ लाई संशोधन गर्न बनेको विधेयक प्रदेश सभामा पेश गर्ने बैठकले निर्णय गरेको उनले जानकारी दिए ।
बागमती प्रदेश सरकार (कार्य विभाजन) नियमावली, २०८० स्वीकृत गरेको छ भने प्रदेश विपद् व्यवस्थापन परिचालन कोष कार्यविधि, ज्यान जोखिममा परेका गर्भवती तथा सुत्केरी महिलाहरुका लागि निःशुल्क हवाई उद्दार सेवा सम्बन्धी कार्यविधि–२०८० र प्रदेश आन्तरिक पर्यटन काज सम्बन्धी मापदण्ड, २०८० लाई स्वीकृत गर्ने निर्णय गरेको छ ।
मकवानपुर । बागमती प्रदेशको श्रम तथा रोजगार नीति २०८० सार्वजनिक गरिएको छ ।
सोमबार प्रदेशको श्रम, रोजगार तथा यातायात मन्त्रालयद्वारा आयोजित कार्यक्रममा प्रदेश श्रम तथा रोजगार नीति २०८० सार्वजनिक गरिएको हो ।
बागमती प्रदेशका मुख्यमन्त्री शालिकराम जम्मकट्टेलले श्रम तथा रोजगार नीति सार्वजनिक गर्दै प्रदेश सरकारले रोजगारी सृजना गर्ने नीति अगाडि सारेको बताए । मुख्यमन्त्री जम्मकट्टेलले मुख्य रुपमा रोजगारी सृजना गर्नुनै सरकारको काम रहेकाले प्रदेश श्रम तथा रोजगार नीति २०८० लाई आवश्यक ऐन कानून बनाएर लैजाने प्रतिवद्धता व्यक्त गरे ।
‘प्रदेश सरकारले समुदायमा आधारित कृषिको मोडल बनाएर रोजगारीसँग आबद्ध गर्नेछौ’ उनले भने ‘प्रदेश सरकारले १४ करोड रुपैयाँ बजेट विनियोजन गरेर त्यसबाट २० हजार किसानलाई रोजगारमा जोड्ने छौ ।’
अब सीप सिकेर मात्र विदेश जानुपर्ने गरी सबै युवाहरुलाई सीप सिकाउनेतर्फ आफू लागिपरेको उनले बताए । श्रम र रोजगार मात्र नभई प्रदेश सरकारले यातायात क्षेत्रलाई पनि व्यवस्थित बनाउने उनको भनाई छ ।
प्रदेशका श्रम, रोजगार तथा यातायात मन्त्री लक्ष्मण लम्सालले संबिधान भित्र रहेर मन्त्रालयले श्रम तथा रोजगार नीति ल्याएको बताए । श्रमिकहरुको विकास गरेपछी मात्र राष्ट्रको विकास हुने बताउदै यो नीतिले बैदेशिक रोजगारी न्यूनीकरणमा सहयोग पुग्ने मन्त्री लम्सालले बताए । अब मन्त्रालयले नीयम, कानून र मापदण्ड बनाएर अगाडी बढ्ने उनले बताए ।
मकवानपुर । प्रदेश खेलकुद विकास परिषद् बागमतीले प्रदेशस्तरीय खेलकुद प्रतियोगिता गर्ने भएकाे छ । बागमती प्रदेश सामाजिक विकास मन्त्री तथा परिषद्का अध्यक्ष कुमारी मोक्तानको अध्यक्षतामा बसेको बोर्ड बैठकले अन्तर प्रदेश राष्ट्रिय खेलकुद प्रतियोगिता गर्ने निर्णय गरेकाे हाे ।
आगामी फागुन २४ देखि ३० गतेसम्म अन्तर प्रदेश स्तरीय राष्ट्रिय खेलकुद प्रतियोगिता हुने भएको निर्णय भएकाे परिषद्का सदस्य सचिव सूर्यलाल भण्डारीले जानकारी दिए । ‘प्रतियोगिता आयोजना स्थल भने पछि स्थान छनौट गरि जानकारी दिइने छ‘ भण्डारीले भने ‘प्रतियोगितामा ७ वटै प्रदेशको सहभागिता गराइने छ ।’
अन्तर प्रदेश राष्ट्रिय खेलकुदमा कम्तीमा १३ खेल समावेश गरिने भएको छ । दोस्रो बागमती प्रदेश खेलकुदमा समावेश १३ खेललाई नै समावेश गरिने भण्डारीले बताए । दोस्रो बागमती प्रदेश खेलकुदमा एथलेटिक्स, पौडी, ब्याडमिन्टन, कराते, तेक्वान्दो, भलिबल, उसु, जुडो, आईटीएफ तेक्वान्दो, रग्बी, फुटबल, क्रिकेट र बक्सिङको प्रतिस्पर्धा भएको थियो ।
बैठकले बागमती प्रदेशस्तरीय राष्ट्रपति रनिङ सिल्ड माघ मसान्तसम्म गर्ने निर्णय पनि गरेको छ । त्यस्तै स्थानीय तह र जिल्ला स्तरीय राष्ट्रपति रनिङ सिल्ड क्रमशः मङ्सिर र पुसमा सम्पन्न गर्ने गरी तयारी अगाडि बढाइने भएको छ ।
मकवानपुर । संघीयता कार्यान्वयन गर्दै देशलाई ७५३ स्थानीय तह र सात प्रदेश तहमा विभाजन गरियो । २७ पुस २०७६ मा प्रदेश नं. ३ लाई ‘बागमती प्रदेश’ नामाकरण गरियो । तर बागमती प्रदेशको संसदले अहिलेसम्म प्रदेश सभा सञ्चालन नियमावली नै संशोधन गरेको छैन ।
प्रदेशको नामाकरण भएपछि प्रदेश सरकारले आफ्ना मातहतका निकायहरुलाई भने तत्काल प्रदेश न ३ लेखिएको हटाएर ‘बागमती प्रदेश’ लेख्न निर्देशन दिंदै परिपत्र जारी ग¥यो । तर आफ्नै नियमावली संशोधन गर्न आजसम्म ध्यान दिएको छैन । अहिले पनि प्रदेश न. ३ प्रदेश सभा सञ्चालन नियमावली २०७४ (पहिलो संशोधन सहित) अनुसार नै प्रदेश सभा सञ्चालन हुँदै आएको छ ।
‘आफ्नै नियमावली संशोधन गर्न नसक्ने प्रदेश सकारले ७२ वटा ऐन बनायो भने किन फुर्ति गर्नु’ एक संसदले भने ‘गरेको कामको आधार देखाउने बाटो पनि यस्ता त्रुटीहरुले रोक्छन, बोल्नै लाजमर्दा कुरा छ’ उनले भने ।
“यो त सरकारकै बेइज्जत हुने सवाल हो, अरुको पुच्छर निमोठ्दै हिड्ने, आफैं, काम नगर्ने परिपाटी देखिहाल्यो नि, अघिल्लो कार्यकालमै नियमावली संशोधन हुनु पर्ने थ्यो” नेकपा एमालेबाट निर्वाचित सांसद कृष्णप्रसाद सिलवालले भने “हामी त भर्खरै आएका यसबारे थाहै थिएन, यो सत्य हो भने तत्काल संशोधन गर्नुपर्छ ।”
संसदीय व्यवस्थाको सामान्य अभ्यास अनुसार हरेक सभाले आफ्नो सभा सञ्चालन नियमावली आफैं बनाउनु पर्छ । यो अर्थमा पनि प्रदेश सरकारको दास्रो कार्यकालको लागि आएका सासलदहरुले आफ्नो हाउस सञ्चालनको लागि नियममावली बनाउनु पर्ने थियो । यस तर्फ चासो नै दिएको पाइदैन ।
मकवानपुर । मकवानपुर जिल्लामा ६ हजार पशुमा लम्पी स्कीन विरुद्धकाे खाेप लगाइएकाे छ । बागमती प्रदेशमा गत साउन २५ गतेबाट लम्पी स्किन रोगविरुद्धको खोप लगाउन सुरु गरिएकाेमा भदाै १ गतेसम्ममा मकवानपुर जिल्लामा ६ हजार ८ सय २२ पशुमा खेाप लगाइएकाे प्रदेशको कृषि तथा पशुपन्छी विकास मन्त्रालयले जनाएकाे छ ।
बागमती प्रदेशका १३ जिल्लामा संचालन गरिएकाे खाेप अभियानकाे उक्त अवधीमा प्रदेशमा ४८ हजार ३ सय ६४ पशुमा लम्की स्कीन विरुद्धकाे खाेप लगाइएकाे मन्त्रालयले जनाएकाे छ । मन्त्रालयले मातहतका भेटेरिनरी अस्पताल तथा पशु विज्ञ केन्द्र मार्फत प्रदेशका ९१ स्थानीय तहमा संचालन गरेको खोप अभियान अन्तर्गत ४८ हजार ३ सय ६४ गाई भैँसी, गोरु, साँढे, पाडापाडी र बाँच्छाबाच्छीमा रोगविरुद्धको खोप लगाएको हो ।
मन्त्रालयले साउन २५ देखि भदौ १ गतेसम्म ९ दिन संचालन गरेको लम्पी स्किन रोगविरुद्धको खोप अभियानमा सबैभन्दा बढी खोप चितवन र सबैभन्दा कम दोलखा जिल्लाका पशुमा खोप लगाइएको छ । चितवनमा १० हजार २ सय १९ तथा दोलखामा ५ सय ४९ पशुमा लम्पी स्कीन रोगविरुद्धको खोप लगाइएको कृषि तथा पशुपन्छी विकास मन्त्रालयका सूचना अधिकारी अनुप अधिकारीले बताए ।
यसैगरी काठमाडौं जिल्लामा २ हजार ४ सय ३९, भक्तपुर जिल्लामा ९ सय २१, ललितपुर जिल्लामा १ हजार ५ सय ८०, धादिङ जिल्लामा ४ हजार ३ सय १ सिन्धुली जिल्लामा २ हजार ५ सय ७८, रामेछाप जिल्लामा २ हजार ३ सय ३५, सिन्धुपाल्चोकमा ३ हजार २ सय ७४, काभ्रेपलाञ्चाेक जिल्लामा ८ हजार ४ सय ११, नुवाकोट जिल्लामा ३ हजार ५ सय ९७ र रसुवा जिल्लामा १ हजार ३ सय ३८ पशुमा लम्पी स्किनको खोप लगाइएको मन्त्रालयकाे तथ्याङ्कमा उल्लेख छ ।
मन्त्रालयले सप्ताहव्यापी कार्यक्रम अन्तर्गत साउन ३२ गतेसम्म खोप अभियान सञ्चालन गर्ने भने पनि प्राकृतिक विपद्का कारण एकदिन थप गरेर भदौ १ गतेसम्म संचालन गरिएको थियो । उक्त अभियानमा प्रदेशका ५० हजार पशुमा लम्पी स्किन रोगविरुद्धको खोप लगाउने लक्ष्य रहेकोमा ४८ हजार ३ सय ६४ पशुमा मात्र खाेप लगाउन सकिएकाे अधिकारीले जानकारी दिए ।
खोप अभियान संचालनका लागि मन्त्रालय मातहतको १३ जिल्लाका भेटेरिनरी अस्पताल तथा पशु सेवा विज्ञ केन्द्रहरुबाट १ सय ४६ जना भ्याक्सिनेटर नियुक्त गरेका थिए । प्रदेशमा हालसम्म लम्पी स्किन रोगबाट ६ हजार २ सय ९१ पशुको मृत्यु भएकाे र १ लाख १० हजार ४४० पशु संक्रमित भएकाे मन्त्रालयकाे तथ्याङ्क रहेकाे छ ।
सप्ताहव्यापी अभियान सकिए पनि लम्पी स्किनविरुद्धको खोप कार्यक्रम भने निरन्तर चल्ने मन्त्रालयले जनाएकाे छ ।
