मकवानपुर । बागमती प्रदेशकाे राजधानी हेटौंडामा संबिधान दिवस मनाइएको छ । संबिधान दिवस मुल समारोह समिति, बागमती प्रदेशको आयोजनामा संविधान दिवस असाेज ३ गते मनाइएको हो ।
मुख्यमन्त्री तथा मन्त्रिपरिषद्काे कार्यालयमा भएकाे संविधान दिवसकाे मुल समारोहमा बागमती प्रदेश प्रमुख यादवचन्द्र शर्माले जनताद्वारा निर्वाचित प्रतिनिधीहरूले संविधान निर्माण भएकाे यसमा समावेश गरिएकाे विशेषताको वर्णन गरिरहनु नपर्ने बताए । शर्माले संविधानका मर्म र भावनाहरुको पालना गर्न प्रतिबद्धता व्यक्त गर्नु नै हामी सबै नेपालीकाेको मूल दायित्व भएकाे बताए । संविधानप्रतिको ओठेभक्ति र संघीयताप्रतिको विष वमन विरोधाभाषपूर्ण विषय हुन् भन्दै उनले अन्तरवेदनाको असह्य पीडामा उत्सर्जित उच्छवास जनताको आँखाबाट बलिन्द्र धारा आँसु बनेर बहन्छ । ति आँसु पुछिदिने, अन्तरनादलाई मत्थर पार्न राहत दिने र आश्वस्त पार्ने शासकीय प्रणाली सुशासन हो ।’
‘यस्तै सुशासनकाे संविधानले परिकल्पना गरेको छ’ उनले भने ‘सबैले संविधानको पालना, रक्षा र कार्यान्वयनमा अटल एवम् अविचल रहने दिनको रूपमा अङ्गीकार गर्न सके लोकतान्त्रिक आन्दोलनप्रति सम्मान र वीर शहीदहरुप्रति श्रद्घाञ्जली हुनेछ ।’ संविधानले समाजवादको सुखद् परिकल्पना गरेको उनले बताए ।
‘संविधानले न्याय, समानता र जनजीविकाको हक स्थापित भएको छ’ उनले भने ‘लोकतान्त्रिक गणतन्त्रात्मक प्रणाली निर्देशित शासन व्यवस्थामार्फत दिगो शान्ति, सुशासन र विकासको मार्गचित्र काेर्न सक्नु पर्छ ।’ शर्माले भने ‘यही संविधानले जातीय, भाषिक, धार्मिक, सांस्कृतिक एवम् भौगोलिक विविधतायुक्त नेपाली समाजलाई बृहद् राष्ट्रिय एकताको सुत्रमा हजारौं फूलहरुको एउटै मालाको रुपमा गुथेर राखेको छ ।’ संघीयता, गणतन्त्र तथा धर्मनिरपेक्षता यो संविधानले उपलब्ध गराएका नेपाली जनताका नीधि हुन् र भावी पुस्ताका धरोहर भएकाे उनले बताए ।
यसैगरी मुल समारोहकाे अध्यक्ष रहेका बागमती प्रदेशका मुख्यमन्त्री शालिकराम जम्मकट्टेलले संविधानमा व्यवस्था भए अनुसारकाे प्रदेशले पाउनुपर्ने सबै अधिकारी प्राप्त हुनु पर्ने बताएका छन् । ‘संविधानलाई कार्यान्वयन गरेर मात्र समृद्धी र समाजवाद आउने छ’ उनले भने ‘नेपालको संघियतामा आफ्नै बिशेषता रहेको छ ।’
संविधान दिवस २०८० को अवसरमा बागमती प्रदेश सरकारद्वारा प्रभातफेरी गरिएको छ । प्रदेशका मुख्यमन्त्री शालिकराम जम्कट्टेलसहितको उपस्थितमा हेटौँडाको बुद्ध चोकबाट प्रभातफेरी गरिएकाे हाे । बुद्ध चोकबाट सुरु भएको प्रभातफेरी पिपल बोट, चौकिटोल ओरालो, मानसचोक हुँदै मुख्यमन्त्री तथा मन्त्रीपरिषद् कार्यालय पुगेर औपचारिक समाराेह गरिएकाे थियाे । प्रभातफेरीमा प्रदेशका मन्त्री तथा सचिव, कर्मचारी विभिन्न सङ्घ संस्था लगायतको उपस्थिति रहेको थियो ।
प्रभातफेरीमा सुरक्षा निकायले व्याण्डबाज प्रस्तुत गरेका थिए भने सामाजिक सङ्घ संस्थाले पञ्चेबाजा संस्कृतिका झाकीहरु प्रस्तुत गरेका थिए ।
बागमती प्रदेश सरकारले भदाै २ गतेदेखि ३ दिन संविधान दिवस मनाउने निर्णय गरेकाे थियाे । साेही अनुसार संविधान दिवस २०८० लाई भब्य रुपमा मनाउन सोमबार देखिनै विभिन्न कार्यक्रमहरु गरेकाे छ । जिल्ला वन कार्यलय मकवानपुरद्वारा असाेज २ गते हेटौडा ६ मा वृक्षारोपण गरेर गाँउ शहर हराभरा बनाउने अभियान सुरु गरेकाे थियाे ।
यस्तै संविधान दिवसका अवसरमा सोमबार बिहानै हेटौडामा खुल्ला ५ किमी दौड प्रतियोगीता सम्पन्न भएको छ । खेलको उदघाटन गर्दै मुख्यमन्त्री जम्कट्टेलले स्वास्थ्यका लागि खेलकुद महत्वपुर्ण रहेको बताए ।
हेटौंडामा मंगलबार ३८ जनाले रक्तदान गरेका छन् । संविधान दिवसको अवसरमा प्रदेशको स्वास्थ्य मन्त्रालयले रक्तदान कार्यक्रम गरेकामा ३८ जनाले रक्तदान गरेकाे रक्तसंचार केन्द्र हेटौंडाका प्राविधिक किशोर सापकोटाले जानकारी दिए। बुधबार हेटौंडा–९ र १ नम्बर वडामा रक्तदान कार्यक्रम हुने भएकाे उनले बताए ।
संविधान दिवस २०८० मा प्रदेश प्रमुखको मन्तव्य
- हामी सबैको मानसपटलमा ताजै छ–नेपाली जनताको लामो संघर्षको पृष्ठभूमिमा अदम्य साहस, अविस्मरणीय बलिदान र अकल्पनीय त्यागको राप र तापमा संविधानसभा निर्वाचनको आधारभूमि तयार भएको हो । त्यही संविधानसभाबाट जनताद्वारा निर्वाचित प्रतिनिधीहरूले विद्यमान संविधान निर्माण गरेका हुन् । यसरी निर्मित संविधान जारी भएको आजको ऐतिहासिक दिन, अर्था्त असोज ३ गतेलाई हामी हर्षोल्लासपूर्ण वातावरणमा संविधान दिवस मनाई रहेका छौं ।
- सर्वप्रथम नेपालीहरूको त्याग र बलिदानको अमरगाथा बोकेको यो गौरवपूर्ण दिनको सुखद् अवसरमा समस्त देशबासी दाजु–भाई, दिदिबहिनीहरुमा हार्दिक बधाई तथा शुभकामना व्यक्त गर्न चाहन्छु । र साथै, अविस्मरणीय योद्घाहरुका स्वर्णिम सपनाको भावभूमिमा उठेका आन्दोलनहरुमा आफ्नो अमूल्य जीवन उत्सर्ग गर्नुहुने सम्पूर्ण वीर शहीदहरूप्रति अन्तरहृदयको गहिराइबाट उच्च सम्मान प्रकट गर्दै भावपूर्ण श्रद्धाञ्जली अर्पण गर्दछु ।
- हाम्रा सामु संविधान नै भएपछि यसमा सन्निहित विशेषताको वर्णन गरिरहनु सान्दर्भिक नहोला । यसर्थ, संविधानका मर्म र भावनाहरुको पालना गर्न प्रतिबद्धता व्यक्त गर्नु नै हामी सबैको मूल दायित्व हो । संविधानप्रतिको ओठेभक्ति र संघीयताप्रतिको विष वमन विरोधाभाषपूर्ण विषय हुन् । अन्तरवेदनाको असह्य पीडामा उत्सर्जित उच्छवास जनताको आँखाबाट बलिन्द्र धारा आँसु बनेर बहन्छ । ति आँसु पुछिदिने, अन्तरनादलाई मत्थर पार्न राहत दिने र आश्वस्त पार्ने शासकीय प्रणाली सुशासन हो । यस्तो सुशासनमा करप्सनको कोरले विभत्स अनुहारलाई करेन्सीको कस्मेटिक सर्जरीद्वारा दिइएको आकर्षणप्रति विकर्षणको तीब्र वेग हुनुपर्छ । हाम्रो संविधानले परिकल्पना गरेको यस्तै सुशासन हो । आजको दिन हामी सबैले संविधानको पालना, रक्षा र कार्यान्वयनमा अटल एवम् अविचल रहने दिनको रूपमा अङ्गीकार गर्नसके लोकतान्त्रिक आन्दोलनप्रति सम्मान र वीर शहीदहरुप्रति श्रद्घाञ्जली हुनेछ । हाम्रो संविधानले समाजवादको सुखद् परिकल्पना गरेको छ र यसबाट समृद्ध नेपाल निर्माण गर्दै सुखी नेपालीको हसिलो मुहार हेर्ने अपेक्षा गरेको छ ।
- यो संविधानले न्याय, समानता र जनजीविकाको हक स्थापित भएको छ र लोकतान्त्रिक गणतन्त्रात्मक प्रणाली निर्देशित शासन व्यवस्थामार्फत दिगो शान्ति, सुशासन र विकासको मार्गचित्र कोरेको छ । यही संविधानले केन्द्रीकृत एकात्मक राज्य व्यवस्थाले सिर्जना गरेका सबै प्रकारका विभेद र उत्पीडनको अन्त्य गरिदिएको छ । जातीय, भाषिक, धार्मिक, सांस्कृतिक एवम् भौगोलिक विविधतायुक्तनेपाली समाजलाई बृहद् राष्ट्रिय एकताको सुत्रमा हजारौं फूलहरुको एउटै मालाको रुपमा गुथेर राखेको छ । यस सन्दर्भमा संघीयता, गणतन्त्र तथा धर्मनिरपेक्षता यो संविधानले उपलब्ध गराएका नेपाली जनताका नीधि हुन् र भावी पुस्ताका धरोहर पनि
- यो संविधानको लचकताको प्राङ्गणमा उभिएर यसैमाथि प्रहार हुने जमर्को हुन लागेको आभाष हुन थालेको छ । हाम्रो समाजका बोधविक्रम अधिकारीको दन्त्य कथाका पाठकहरु स्मसानको नलिहाडलाई तान्त्रिक विधिद्धारा प्राण प्रतिष्ठा गर्ने कसरतमा लागेका छन् भन्ने झिनो स्वरमा चर्चा सुनिन थालेका छन् । तर हाम्रो समाज र हामी नेपाली विधिले व्यवस्थित गरेको सिद्धान्त र विचारको जगमा उभिएर सहभागितामूलक विकासका लागि उपलब्ध श्रोत साधनहरुको समुचित उपयोग गर्दैै वान्छित उदेश्य प्राप्तिका लागि अनवरण प्रयत्नरत छौ । न्याय र समानताको आधारमा प्राप्त उपलब्धिको संरक्षण–प्रर्वद्घन गर्दै थप उपलब्धिका लागि कृयाशील रहने र ती उपलव्धीहरुको न्यायोचित वितरण गर्दै समतामुलक समाजको आधारमा शोषणरहित समाजको निर्माण गर्ने, राष्ट्रिय अर्थतन्त्रलाई स्वतन्त्र, आत्मनिर्भर एवम् समुन्नत पार्दै समाजवादतर्फ लक्षित गर्ने उद्देश्य यो संविधानले निर्देशक शिद्धान्तको रुपमा अङ्गीकार गरेको छ ।
- त्यसैगरी सहिष्णुतामा आधारित सामाजिक, सांस्कृतिक मूल्यहरुको विकास गर्ने तथा सांस्कृतिक विविधताको सम्मान गर्दै सामाजिक सद्भाव, ऐक्यबद्धता र सामञ्जस्य कायम गरी राष्ट्रिय एकता सुदृढ गर्ने राज्यको सामाजिक र सांस्कृतिक उद्देश्य रहने विषयलाई समेत संविधानमा समेटिएको छ ।
- सविधानको उद्देश्य अनुरुप यस प्रदेशभित्र रहेका स्रोत र साधनहरुको अधिकतम् उपयोग गरी जनताको जीवनस्तरमा परिवर्तनको अनुभुती हुने काम गर्न प्रदेश सरकार सक्षम हुनेछ भन्ने मैले विश्वास लिएको छु ।
- यस मन्तव्यको अन्त्यमा, संविधानले परिकल्पना गरेको विकास र समृद्धिको शिखरमा पुग्ने अभियानमा निरन्तर अघि बढ्न यो दिवसले हामी सबैलाई प्रेरित गरोस् भन्ने कामना गर्दै पुनः एकपटक संविधान दिवस २०८० को उपलक्ष्यमा सबैमा हार्दिक शुभकामना व्यक्त गर्दछु ।
- धन्यवाद ।
मिति २०८० आश्विन ३ गते बुधवार
मकवानपुर । बागमती प्रदेश प्रमुख यादवचन्द्र शर्माले संविधानले परिकल्पना गरेको विकास र समृद्धिको शिखरमा पुग्ने अभियानमा निरन्तर अघि बढ्न संविधान दिवसले सबैलाई प्रेरित गरोस् भन्ने कामना गरेका छन् । ‘संविधान दिवस २०८०’ का सन्दर्भमा शुभकामना सन्देश जारी गर्दै प्रदेश प्रमुख शर्माले हामीले प्राप्त गरेको संविधानले केन्द्रीकृत र एकात्मक राज्य व्यवस्थाद्वारा सिर्जित सबै प्रकारका विभेद र उत्पीडनको अन्त्य गर्दै जातीय, भाषिक, धार्मिक, सांस्कृतिक तथा भौगोलिक विविधतायुक्त नेपाली समाजलाई बृहत् राष्ट्रिय एकताको सुत्रमा बाँध्ने काम गरेको बताएका छन् ।
प्रमुख शर्माले नेपाली जनताको लामो सङ्घर्ष, त्याग र बलिदानपछि जननिर्वाचित प्रतिनिधीहरुले संविधान निर्माण गरी जारी गरेको ऐतिहासिक दिन आश्विन ३ गते रहेकाले यो दिनलाई भरपुर उत्साह र उमङ्गका साथ ‘संविधान दिवस’ का रुपमा मनाईरहेका उल्लेख गरेका छन् । प्रमुख शर्माले संविधान दिवस सम्पूर्ण नेपालीहरुले राष्ट्रिय पर्वका रुपमा मनाउने गरिएको बताउँदै शुभकामनामा विभिन्न आन्दोलनहरुमा आफ्नो अमूल्य जीवन उत्सर्ग गर्नुहुने वीर सहिदहरुप्रति गहिरो सम्मान प्रकट गर्दै भावपूर्ण श्रद्धाञ्जली समेत अर्पण गरेका छन् ।
जनताको प्रतिस्पर्धात्मक बहुदलीय लोकतान्त्रिक शासन प्रणाली, नागरिक स्वतन्त्रता, मौलिक अधिकार, मानव अधिकार, बालिग मताधिकार,आवधिक निर्वाचन, पूर्ण प्रेस स्वतन्त्रता तथा स्वतन्त्र निष्पक्ष र सक्षम न्यायपालिका र कानुनी राज्यको अवधारणा लगायत लोकतान्त्रिक मूल्य र मान्यतामा आधारित समाजवादप्रति प्रतिबद्ध रही समृद्ध राष्ट्र निर्माण गर्ने संकल्पसहित संविधान जारी भएको प्रमुख शर्माको भनाई छ ।
जनजीविकाको लागि अपरिहार्य शिक्षा, स्वास्थ्य र रोजगारीको हकसहित ३१ वटा मौलिक हकको व्यवस्था गरी नागरिकहरुलाई यो संविधानले अधिकार सम्पन्न बनाएको छ साथै, लोकतान्त्रिक गणतन्त्रात्मक शासन व्यवस्थाको माध्यमद्धारा दिगो शान्ति, सुशासन, विकास र समृद्धिको आकांक्षा पूरा गर्ने मार्गरेखा समेत यही संविधानमार्फत कोरिएको पनि प्रमुख शर्माको शुभकामना सन्देशमा उल्लेख छ ।

मकवानपुर । बागमती प्रदेशका उत्कृष्ट सामुदायिक तथा संस्थागत विद्यालयहरुलाई पुरस्कृत गरिएको छ । शिक्षा दिवस २०८० अवसरमा विद्यालयलाई पुरस्कृत गरिएकाे हाे । प्रदेशको सामाजिक विकास मन्त्रालयले मंगलबार राष्ट्रिय शिक्षा दिवस मनाउँदै उत्कृष्ट विद्यालय पुरस्कृत गरेकाे हाे ।
प्रदेशका सामुदायिक बिद्यालयहरु मध्येमा उत्कृष्ट प्रथम स्थान भक्तपुरको मेधा माध्यमिक विद्यालय भएको छ । त्यसैगरी नुवाकोट जिल्लाको पृथ्वी माध्यमिक विद्यालय द्धितीय भएको छ भने काठमाडाैकाे श्रम राष्ट्रिय माध्यमिक विद्यालय तृतिय भएको छ । यसैगरी काठमाडाैकै पृथ्वी नारायण माध्यमिक विद्यालय चौथाे हुँदा काठमाडाैकै बलम्बु माध्यमिक विद्यालय पाचाै स्थानमा रही पुरस्कृत भएको छ ।
यसैगरी संस्थागत विद्यालयतर्फ काठमाडाैको बुढानिलकण्ठ नगरपालिकाकाे रिलायन्स इन्टरनेसनल एकेडेमी प्रथम भएको छ । त्यसैगरी द्वितीय स्थानमा रही काठमाडाैको बालुवाटारको हिज किङ्स इन्टरनेसनल स्कुलले पुरस्कार प्राप्त गर्दा तृतीयमा काठमाडाै टोखा नगरपालिकाको फ्लोरोसेन्ट माध्यमिक विद्यालय रहेको छ ।
मन्त्रालयले २०७९ सालको माध्यमिक शिक्षा परीक्षा कक्षा १० मा कम्तीमा ३५ जना परीक्षार्थी सहभागी गराएको विद्यालयहरुलाई उत्कृष्टताका आधारमा छनौट गरेर पुरस्कृत गरेको जनाएकाे छ । उत्कृष्ट विद्यालयलाई बागमती प्रदेशका मुख्यमन्त्री शालिकराम जम्मकट्टेल र सामाजिक बिकास मन्त्री कुमारी मुक्तानले नगद र प्रमाणपत्रसहित पुरस्कृत गरेका छन् ।
मकवानपुर । बागमती प्रदेशका प्रदेश प्रमुख यादवचन्द्र शर्माले नेपाली हिन्दु महिलाको महत्वपूर्ण पर्व तीजले चेली र माइतीबीचको सम्बन्ध प्रगाढ बनाउने विश्वास व्यक्त गरेका छन ।
हरितालिका (तीज) २०८० का सन्दर्भमा सोमबार जारी शुभकामना सन्देशमा प्रमुख शर्माले हिन्दु महिलाहरुले खुशी र उमङ्गका साथ मनाउँने तीज पर्वले चेली र माइतीबीच सम्बन्ध प्रगाढ बनाउने उल्लेख गरेका छन । ‘भाद्र शुक्ल द्वितीयादेखि पञ्चमीसम्म मनाइने सांस्कृतिक एवम् धार्मिक महत्वको यस पर्वले चेली र माइतीबीचको सम्बन्ध प्रगाढ बनाउने विश्वास गरिन्छ’ प्रमुख शर्माले आफ्नो सन्देशमा भनेका छन, ‘विविध भाषा, धर्म संस्कृति र चाडपर्वले धनी हाम्रो देश नेपालमा तीजलाई हिन्दु महिलाले आफ्नो महत्वपूर्ण पर्व मान्दछन् । ’
देश तथा विदेशमा रहनुभएका सम्पूर्ण नेपाली दिदीबहिनीहरूमा सुख, शान्ति, सुस्वास्थ्य, दिर्घायू र समृद्धिका लागि शुभकामना व्यक्त गर्दै शर्माले तीजको सांस्कृतिक पक्षको मौलिक संरक्षण गर्नुपर्ने बताए । ‘आफ्नै मौलिक विशेषता बोकेको तीजको सन्देश र महत्वलाई जीवन्त राखेर हाम्रो सांस्कृतिक पक्षको मौलिक संरक्षण गर्नु हाम्रो दायित्व पनि हो ।’ शर्माले भने । हाम्रा पर्वहरुले बोकेका सुरम्य तथा मोहक मौलिक परम्पराहरु विकृतिको पर्दाले नढाकिउन् भन्ने कुरामा सचेत रहन अत्यन्त जरुरी रहेको उनले आग्रह गरे ।
यो पर्व मनाइरहँदा यसले हाम्रो समाजमा विद्यमान सामाजिक तन्तुहरुको संरक्षण, सम्बर्द्धन गर्दै सहिष्णुतायुक्त समाज निर्माणमा पनि योगदान पुर्याउँन आवश्यक रहेको शर्माले सन्देशमा उल्लेख गरेका छन् ।

मकवानपुर । बागमती प्रदेश सभाको शनिबारकाे बैठक विशेष समयमात्रै बसेकाे छ । सभामुख भुवनकुमार पाठकले सभाकाे सुरुवात मै शुन्य समय नभएकाेले विशेष समय सुरु गरेकाे जानकारी गराएका थिए ।
विशेष समयमा सत्ता पक्ष र प्रतिपक्षका गरी २२ सांसदले आफ्नाे धारणा राखेका थिए । विशेष समयकाे सुरुवातमै नेकपा एमालेका जगन्नाथ थपलियाले समिति बनाएरै मन्त्रालयको टुङ्गो लगाइएकोमा सरकार मन्त्रालय थप्ने तिर लागेको आराेप लगाए । सरकारले गाडी किन्दै रहने र मन्त्री थपरिहने काम गरिरहेकाे तर अन्य पक्ष कमजोर अवस्थामा रहेकोमा विकास निर्माण अलपत्र रहेकाे बताए । ‘ठेकेदारहरुले भुक्तानी पाएका छैनन सरकारको ध्यानाकर्षण गराउँछु’ थपलियाले भने ।
उपचारको क्रममा लापरवाही भएको भन्दै हेटौडामा भएको डाक्टर कुटपिट घटना सरकारलाई थाहा छ की छैन प्रश्न गर्दै थपलियाले भने अस्पलातबाट हुने लापरवाही रोकिनु पर्ने बताए । ‘कानूनी कारवाहीको लागि मार्ग प्रसस्त रहेकाे अवस्थामा सरकार बेखबर जस्तै छ र डाक्टर मौन छन्’ थपलियाले भने ‘स्वास्थ्यकर्मीले काम गर्ने वातावरणकाे लागि प्रदेश सभा घेरेका छन् ।’ कुटपिट गर्नेलाई कानुनको दायरामा कारवाहीमा ल्याउनु पर्ने उनले भने ।
थपलियाले कमसेकम प्रदेशस्तरमा संचालित अस्पतालमा स्वास्थ्य सुविधाकाे वातावरण वनाउन सरकारको ध्यानाकर्षण गराए । ‘प्रदेश सभा अन्तर्गतका समितिहरुको सभापति ९ महिनाको अवधीमा समेत चयन नहुँदा सदनका काम कारवाही संचालनमा समस्या परेको छ’ थपलियाले भने ‘मिनि संसदको रुपमा रहने समितिहरुको सभापति चयन गर्न सभामुखको ध्यानाकर्षण गर्दछु ।’
यसैगरी प्रदेश सभा सदस्य बसन्त मानन्धरले बागमती प्रदेश सरकारले चालु आर्थिक वर्षमा तय गरेको कार्ययोजना कार्यान्वयनका क्रममा विचौलियाका कारण चुनौती रहेको बताए । ‘उपभोक्ताले गर्नुपर्ने कामलाई केही सांसद तथा स्थानीय जनप्रतिनिधिहरुले ठेकेदार मार्फत योजना कार्यान्वयन गर्ने गरेका छन्’ मानन्धरले भने ‘यसले लागत अधिक भई काम कम गुणस्तरको हुन जान्छ।’ उपभोक्ता मार्फत हुने कार्य उपभाेक्तालाई नै गर्न दिनु पर्ने उनले बताए । बागमती प्रदेश सरकारले प्रदेशमा भएका सम्पदा चिन्न नसकेको उनले आराेप समेत लगाएका छन् । सम्पदासँग जोडिएका कामहरुका लागि छुट्टै मुल्य निर्धारण गरिनु पर्छ, यसले हाम्रो सम्पदा संरक्षणमा टेवा पुग्छ उनले भने।
अर्का सांसद कुमार श्रेष्ठले जनता चाडवाड मनाउन ऋण लिने अवस्थामा रहेको अवस्थामा प्रदेशका पदाधिकारीहरुको लागि काठमाडौमा करौडाको संरचना बनाएकोमा आपत्ती जनाए । धादिङबाट काटमाडौ जोड्ने मार्ग निर्माणमा ढिलाइ भएकोमा सरकारको ध्यानाकर्षण समेत उनले गराए । यसैगरी मधुसुदन पौडेलले धार्मिक जातीय अतिवादीहरुले विवादित गतिविधि गरिरहेकाले लोकतन्त्र र गणतन्त्रमा असर पर्ने भन्दै ध्यानाकर्षण गराए । सरकारले फजुल खर्च कम गर्दै सुशासन कायम गर्न सरकार असफल भएकोले यस तर्फ सचेत गरादछु । उनले कालोबजारी रोक्न सरकार सचेत हुनु जरुरी रहेकाे सदनमा जानकारी गराए ।
‘नेपाली उत्पादनले बजार नपाउने तर आयातीत कृषि उपजले उचित बजार पाउने वातावरणले उत्पादन खेर मात्र गइरहेकाे छैन नेपाली किसान समेत मर्कामा परेका छन्’ उनले भने । काठमाडौको ट्राफिक व्यवस्थापन र वातावरण प्रदुषण रोक्ने तर्फ प्रदेश सरकारले ध्यान दिनु पर्ने समेत उनले बताए । मकवानपुरबाट निर्वाचित सदस्य एकालाल श्रेष्ठले हेटौडा अस्पताललाई मदन भण्डारी स्वास्थ्य विज्ञान प्रतिष्ठान मार्फत संचालन हुदै आएकोमा प्रदेश सरकारबाट समेत लगानी भई स्वास्थ्य क्षेत्रमा सुधार हुदै आएको बताए । सञ्चो अस्पतालमा भएको डाक्टर कुटपिट घटनामा समिति बनाई कार्य गर्नुपर्दछ उनले भने ।
त्यस्तै दिनेशचन्द्र देवकोटाले शुन्य समय र विशेष समयमा सांसदले उठाएका कुराको कुनै प्रतिउत्तर सरकारको तर्फबाट नआउने तथा सुनुवाई समेत नहुने भएकाेले यसकाे औचित्यमा समेत प्रश्न उठाए । प्रदेश सभा सदस्यहरु ठाकुर प्रसाद ढकाल, प्रभात तामाङ, मायादेवी शर्मा, शिवराज अधिकारी, रामेश्वर श्रेष्ठ, सुष्मा भुजेल न्यौपाने, निरज बज्राचार्य, टिका थानी, श्रीराम लामिछाने, केशव प्रसाद पोखरेललगायतका २२ जना सदस्यले आफ्नाे धारणा राख्दै सरकारकाे धान्याकर्षण गराए ।
बैठकमा सत्तापक्ष र प्रतिपक्षका अधिकांश सदस्यले हेटौँडामा केही दिनअघि चिकित्सक कुटपिटको घटनालाई प्रहरी प्रशासनले निष्पक्ष ढङ्गबाट अनुसन्धान गरी आक्रमण गर्ने समूहलाई कारबाहीको दायरामा ल्याउन माग गरे । दलगत स्वार्थभन्दा माथि उठेर अपराध गर्नेलाई संरक्षण गर्न नहुने र प्रहरी प्रशासनले दबाबमा परेर मुद्दालाई फितलो बनाउन नहुनेमा प्रदेश सरकारको ध्यानाकर्षण गराएका थिए ।
यसैगरी प्रदेशको निकुञ्ज क्षेत्रभित्र पर्ने जिल्लामा जङ्गली जनावरको आक्रमण गरी मृत्यु भएका परिवारलाई क्षतिपूर्ति दिनुपर्ने र घाइते भएका परिवारलाई राहत उपलब्ध गराउन समेत सदस्यहरुले सभामा सरकार समक्ष माग गरेका थिए ।
बैठकमा काठमाडौँ उपत्यकालगायत विभिन्न जिल्लामा सडकको स्तरोन्नति, खानेपानी र कृषकलाई सिँचाइको व्यवस्था गर्न उनीहरुले प्रदेश सरकारसित आग्रह गरे ।
४ विधेयक सम्बन्धित समितिमा पठाउन स्वीकृत
बागमती प्रदेशसभाको आजको बैठकले ४ वटा विधेयक सम्बन्धित विषयगत समितिमा छलफलका लागि पठाउन स्वीकृत प्रदान गरेको छ । बैठकमा बागमती प्रदेशका सामाजिक विकास मन्त्री कुमारी मोक्तानले विज्ञान, प्रविधि, नवप्रवर्तन तथा विकास कोष सञ्चालन सम्बन्धमा व्यवस्था गर्न बनेको विधेयकलाई दफावार छलफलका लागि स्वास्थ्य तथा कृषि समितिमा पठाइयोस् भनी प्रस्ताव पेस गरेका थिए ।
यसैगरी, उनले आन्तरिक मामिला तथा कानुनमन्त्री गङ्गानारायण श्रेष्ठकातर्फबाट प्रदेश सञ्चारमाध्यम व्यवस्थापन ऐन, २०७५ लाई संशोधन गर्न बनेको विधेयकलाई दफावार छलफलका लागि प्रदेश मामिला समितिमा पठाइयोस् भनी प्रस्ताव टेबुल गरेका थिए । सो बैठकमा प्रदेश स्वास्थ्यमन्त्री उत्तम जोशीले प्रदेश स्वास्थ्य सेवा ऐन, २०७५ लाई संशोधन गर्न बनेको विधेयक, २०८० लाई दफावार छलफलका क्रममा शिक्षा, स्वास्थ्य तथा कृषि समितिमा पठाइयोस् भनी प्रस्ताव प्रस्तुत गरेका थिए ।
यस्तै, उक्त बैठकमा कृषि तथा पशुपन्छी विकास मन्त्री डा राजेन्द्रमान श्रेष्ठले प्रदेश कृषि विकास सम्बन्धमा व्यवस्थापन गर्न बनेको विधेयकलाई दफावार छलफलका लागि शिक्षा, स्वास्थ्य तथा कृषि समितिमा पठाइयोस् भनी प्रस्ताव टेबुल गरेका थिए । सवै प्रस्तावहरु बहुमत सदस्यबाट स्वीकृत भइ सम्बन्धित समितिमा पठाइने भएकाे छ ।
नेम्वाङको निधनमा शोक प्रस्ताव पारित
प्रदेशसभाको शनिबारकाे बैठकले संविधानसभा अध्यक्ष एवं पूर्व सभामुख तथा प्रतिनिधिसभा सांसद सुवासचन्द्र नेम्वाङको निधनमा शोक प्रस्ताव पारित गरेको छ । प्रदेशसभाका सभामुख भुवनकुमार पाठकले उक्त शोक प्रस्ताव पारित गरियोस् भनी बैठकमा प्रस्ताव प्रस्तुत गरेका थिए ।
शोक प्रस्ताव सर्वसम्मतिले पारित गर्दै स्व नेम्वाङको आत्माको चिरशान्तिको कामनाका लागि एक मिनेट मौनधारण समेत गरिएको थियो । साथै बैठकले शोकसन्तप्त परिवारजनप्रति गहिरो समवेदना प्रकट गरेको छ । नेम्वाङको गत भदौ २६ गते हृदयघातका कारण निधन भएको थियो ।
प्रदेशसभाका सभामुख भुवनकुमार पाठकले प्रदेशसभाको अर्को बैठक १५ दिन पछि आगामी असोज १४ गते बिहान ११ बजे बस्ने गरी स्थगित गरेका थिए ।