मकवानपुर । मकवानपुर प्रहरीले स्पेयर टायरभित्र लुकाएर काठमाडौं लगिदैं गरेकाे लागूऔषध ओनरेक्ससहित सुमाे चालकलाई नियन्त्रणमा लिएकाे छ ।
मंगलबार बाराबाट काठमाडौं जाँदै गरेको मधेश प्रदेश ०३–००१ ज ४५१ नम्बरको यात्रुबाहक सुमोलाई प्रहरीले सुरक्षाजाँच गर्ने क्रममा १ सय मिलिलिटरको २ सय २५ बोतल लागूऔषध ओनरेक्स बरामद गरेको हाे । हेटौंडा उपमहानगरपालिका–१५, रातोमाटेस्थित चेकपोष्टकाे टोलीले उक्त लागूऔषध बरामद गरी सुमो चालक पर्सा बहुदरमाई नगरपालिका–९ का २४ वर्षीय मुम्ताज मियालाई नियन्त्रणमा लिएको छ ।
सुमोको हुटमा राखिएको स्पेयर टायरमा लागूऔषध बरामद भएको जिल्ला प्रहरी कार्यालय मकवानपुरका प्रवक्ता प्रहरी नायव उपरीक्षक श्यामु अर्यालले जानकारी दिए । जिल्ला अदालत मकवानपुरले मुम्ताजलाई ५ दिन हिरासतमै राखेर अनुसन्धान गर्न अनुमति दिएपछि मकवानपुर प्रहरीले बरामद गरेको लागूऔषध र सुमोसहित चालकलाई हिरासतमा राखेर अनुसन्धान गरिरहेको जनाएको छ ।
मकवानपुर । नेपाल रेडक्रस सोसाइटी हेटौंडा उपशाखा, हेटौंडा- ४ द्वारा रक्तदान कार्यक्रमको आयोजना गरिएको छ । कार्यक्रममा १६ जनाले रक्तदान गरेका थिए ।
नेपाल रेडक्रस सोसाइटी हेटौंडा उपशाखाका सभापति किशन घिसिङ्गको अध्यक्षता एवं हेटौंडा उपमहानगरपालिका ४ नं वडा अध्यक्ष नवीन सिग्देलको प्रमुख आतिथ्यतामा भएकाे रक्तदान कार्यक्रम नेपाल रेडक्रस सोसाइटी मकवानपुर जिल्ला शाखाका उपमन्त्री शिबहरि दाहालको बिशेष आतिथ्यता रहेकाे थियाे ।
उपशाखाको नियमित कार्यक्रमको रुपमा रक्तदान कार्यक्रमको आयोजना गरिएको उपशाखाका सभापती किशन घिसिङ्ले जानकारी दिए। विपद्को समयमा रेडक्रसको आवश्यकता र महत्त्व अझ धेरै रहेकोले केही समय भित्र युवा, विद्यार्थी तथा शिक्षकहरुको सहभागीतामा विपद् ब्यवस्थापन तथा प्राथमिक उपचारको तालिमको आयोजना गर्ने योजना रहेको उपशाखा सचिव हिक्मत श्रेष्ठले जानकारी दिए ।
रक्तदान कार्यक्रममा रेडक्रस मकवानपुर कार्यालय प्रमुख लक्ष्मण भट्टराईं , श्रमिक माविका विब्यस अध्यक्ष बिवेक कार्की, रेडक्रस मकवानपुरका पुर्व उपसभापति उमेश बास्कोटा तथा विभिन्न संघसंस्थाको प्रतिनिधि, युवा रेडक्रस सर्कलका पदाधिकारी एवं सदस्यहरुको उपस्थिति रहेको थियो ।
मकवानपुर । नेपाल निजामती कर्मचारी संगठन, मकवानपुर कार्यसमितिले संगठन स्थापना दिवसकाे अवसरमा संस्कृत वेद विद्याश्रमलाई सहयोग गरेकाे छ ।
३५ औं संगठन स्थापना दिवसकाे अवसरमा आइतबार हेटौंडा – १० गोरक्षश्वरस्थित वेद विद्याश्रमलाई शैक्षिक, खाद्यान्नलगायतका सामाग्री सहयोग गरेकाे हाे । संगठन मकवानपुर अध्यक्ष यादविन्द्र पौडेलकाे नेतृत्वकाे समितिकाे टोलीले कापी, कलम,चामल, दाल, तेल, नुन र सिलिङ फाइन गरी ३३ हजार रुपैंया बराबरकाे सामग्री विद्याश्रमलाई हस्तान्तरण गरेकाे हाे ।
सहायोग कार्यक्रममा नेपाल निजामती कर्मचारी संगठन, जिल्ला कार्य समिति तथा राष्ट्रसेवक बहुउद्देश्यीय सहकारी संस्था मकवानपुरबाट उक्त विद्याश्रमलाई प्रत्येक वर्ष २४ हजार रुपैंया सहयोग गर्ने निर्णय भएकाे अध्यक्ष पौडेलले जानकारी दिए ।
पौडेलकाे अध्यक्षता र संगठन केन्द्रीय उपाध्यक्ष विष्णुप्रसाद अर्यालकाे प्रमुख आतिथ्यतामा भएकाे सहयोग हस्तान्तरण कार्यक्रममा जिल्ला कार्यसमितिका पदाधिकारी लगायतकाकाे सहभागिता रहेकाे थियाे ।
मकवानपुर । मकवानपुरकाे हेटौंडामा ७ जिल्लाका ४१ जनालाई भलिबलकाे आधारभूत रेफ्री तालिम दिइएकाे छ । २ बैशाखबाट सुरु आधारभुत रेफ्री तालिमकाे शनिबार समापन गरिएको हो ।
मकवानपुर जिल्ला भलिबल संघले आयोजना गरेको ५ दिने तालिममा जिल्लास्तरीय खेलमा सहभागी भएका ४१ जनाको सहभागिता रहेको मकवानपुर जिल्ला भलिबल संघ अध्यक्ष बसन्त सिटौलाले बताए । उनका अनुसार तालिममा ७ जिल्लाका ४१ जना पुरुष र ७ जना महिलाकाे सहभागिता रहेकाे थियाे । तालिममा बागमती प्रदेशका दोलखा, रामेछप, सिन्धुपाल्चोक, काभ्रेपलाञ्चोक, मकवानपुर तथा बारा, रुकुम पश्चिम र बैतडी जिल्लाका सहभागिता रहेका थिए ।
प्रत्येकले ५ हजार रुपैयाँ शुल्क बुझाएर तालिममा सहभागी भएकाे संघले जनाएकाे छ । हेटौंडा–४, हुप्रचौरमा भएको तालिमकाे राष्ट्रिय रेफ्री विजय वादे सहितले सहजीकरण गरेका थिए । जिल्लास्तरीय भलिबल खेलमा अन्य जिल्लाका रेफ्री ल्याउनु पर्ने समस्यालाई अन्त्य गर्न र भलिबलको नयाँ नियम खेलाडी र प्रशिक्षकहरुलाई जानकारी गराउन तालिम आयोजना गरिएको अध्यक्ष सिटौलाले बताए ।
मकवानपुर जिल्ला भलिबल संघ अध्यक्ष बसन्त कुमार सिटौलाको सभाध्यक्षता तथा बागमती खेलकुद परिषदका सदस्य सचिव दिपक लामाको प्रमुख आतिथ्यतामा तालिम समापन कार्यक्रम भएकाे हाे ।
भरतपुर, चितवन । चितवनकाे भरतपुर महानगरपालिका स्थित विस्तारित पुलचोक–गोन्द्राङ सडक खण्डको प्रधानमन्त्री केपी शर्मा ओली, उपप्रधान तथा शहरी विकास मन्त्री प्रकाशमान श्रेष्ठ, बागमती प्रदेश प्रमुख दीपक प्रसाद देवकोटा लगायतलेउद्घाटन गरेका छन् ।
सडकको उद्घाटन लगायत चितवन–नवलपुरका विभिन्न कार्यक्रममा सहभागी हुन प्रम ओली नेपालीको सेनाको हेलिकप्टरमा चितवन आएका थिए ।
नेकपा एमालेका अध्यक्ष समेत रहेका प्रम ओलीले यसअघि सुरुमा इच्छाकामना गाउँपालिकाको नयाँ प्रशासकीत भवनको उद्घाटन गरेका थिए । त्यसपछि भरतपुर आएर पुलचोक–गोन्द्राङ सडकको उद्घाटन गरे ।१७ माघ २०७७ मा सडक विस्तारको शिलान्यास तत्कालीन प्रधानमन्त्री ओलीले नै गरेका थिए ।
सडक डिभिजन कार्यालय चितवनका अनुसार २०८१ साल पुस मसान्तमा उक्त सडक खण्ड निर्माण सम्पन्न भएकाे हाे । २६ असोज २०७७ मा ठेक्का सम्झौता भएको नारायणगढको पुल्चोकदेखि पूर्वतर्फ गोन्द्राङसम्मको यो सडक एसियन मापदण्डमा निर्माण पूरा भएको सडक डिभिजन कार्यालय चितवनका प्रमुख तथा वरिष्ठ इन्जिनियर नारायणप्रसाद लामिछानेले जानकारी दिए ।
दुई वर्ष चार महिनामा निर्माण सम्पन्न गर्नेगरी सगुन कन्स्ट्रक्सन प्रालिले ठेक्का पाएको थियो । तर, सडक विस्तारका क्रममा सडकमा बनाइएका भौतिक पूर्वाधारका कारण विभिन्न झन्झट झेल्नुपरेको थियो । दुई पटक म्याद थप गरेपछि सडक विस्तारको काम सम्पन्न भएको इन्जिनियर लामिछानेले बताए ।

फुटपाथ सहित ५० मिटर चौडाइको सडक निर्माण भएको छ । जसमा दुई सहायक लेन सहित ६ लेनको सडक बनेको हो । सडकखण्डमा ढल, सर्भिस लेन, स्मार्ट लाइट जडान र बिजुलीको तार भूमिगत गरिएको छ । चौबिसकोठी देखि भरतपुर ओरालोसम्मको सडकको पानी लायन्सचोकको खोलामा र चौबिसकोठीदेखि बसपार्कसम्मको पानी केरुङ्गा घोलमा लैजाने गरी ढल निर्माण गरिएको छ ।
सडकको बिचमा दुबो लगाउने र आकर्षक फूलका बिरुवा रोप्ने काम भएको छ । सडकमा ट्राफिक चिह्न राख्ने, जेब्रा क्रसलगायत लाइनिङका कामले सडक आकर्षक देखिएको छ । स्थानीय रुटमा चल्ने सवारीलाई सर्भिस लेनबाट चलाउनुपर्नेमा मुख्य सडक क्षेत्रमा नै अटो, म्याजिक तथा स्थानीय रुटका सवारी गुडिरहेका छन् ।
“विकास निर्माण भएको छ भनेर देखाउन हैन, यो हाम्रो कर्तव्य हो” सडक उद्घाटन पछि ओलिले भने, “काम रफ्तारमा छ,सबैको सहकार्यले अझै रफ्तार हुन्छ ।” सदक निर्माण अघि यससंग जोडिएका अन्य विकास पनि अनिवार्य गर्न उनले निर्देशन दिए ।
सङ्घीय सरकारको बजेटमा निर्माण भएको सडकलाई महानगरपालिकाले आफ्नो गौरवको योजना भएको बताएको छ । विशेषगरी नेकपा (माओवादी केन्द्र) ले यस सडकलाई रेनु दाहालको प्रयासमा बनेको बताएको छ । तर, अन्य राजनीतिक दलले यसको खण्डन गर्दै आएका छन् । सडकको शिलान्यास गर्दा अनुपस्थित रहेकी महानगरपालिका प्रमुख दाहाल उद्घाटनमा सहभागी भइन् । प्रधानमन्त्रीले सडकको उद्घाटन गर्नु महानगरका लागि गौरवको विषय भएको उनले बताइन् ।
नेकपा एमाले निकट युवा संगठनले सडक उदघाटन पूर्व र्याली समेत निकालेको थियो ।
यसैगरि प्रधानमन्त्री केपी शर्मा ओलीले चार लेनमा विस्तार भइरहेको पूर्वपश्चिम राजमार्गअन्तर्गत नारायणगढ–बुटवल सडक अन्तरगत गैँडाकोट खण्डको शुक्रबार निरीक्षण समेत गरेका छन् । प्रधानमन्त्री ओलीले अब निर्माण कार्यमा कुनै ढिलाइ गर्न नहुने बताए । प्रम ओलीले शुक्रबार नै नेकपा (एमाले) भरतपुर महानगर कमिटीको दोस्रो अधिवेशनको उद्घाटन सत्रलाई सम्बोधन गरेका छन् ।