मकवानपुर । नेकपा (एकीकृत समाजवादी) पार्टी मकवानपुरले मकवानपुरका १० वटै पालिकाको इन्चार्ज ताेकेकाे छ । नेकपा (एकीकृत समाजवादी) मकवानपुर जिल्ला कमिटीको पहिलो बैठकबाट मकवानपुरका १० वटै पालिकाको इन्चार्ज, सचिवालय सदस्य, प्रचार विभाग प्रमुख तथा आर्थिक विभाग प्रमुख चयन गरेको छ ।
नेकपा (एस) मकवानपुरका उपाध्यक्ष मीनाकुमारी लामालाई हेटौंडा उपमहानगरपालिकाको इन्चार्जको जिम्मेवारी दिइएकाे छ भने थाहा नगरपालिकामा ईश्वर रुम्बालाई इन्चार्जको रुपमा चयन गरिएको नेकपा (एस) मकवानपुर अध्यक्ष श्रीधर पाेखरेलले जानकारी दिए ।
गाउँपालिकाअन्तर्गत् मनहरी इन्चार्जमा भूमिनन्द अर्याल, भीमफेदी इन्चार्जमा शिवहरि बर्तौला, बागमती इन्चार्जमा खड्गबहादुर पुलामी तथा बकैया इन्चार्जमा नारायण तिमल्सिना तोकिएका छन् । यसैगरी मकवानपुरगढी इन्चार्जमा राजन दाहाल, ईन्द्रसरोबर इन्चार्जमा जीवन लामा, कैलाशमा कालु ढकाल र राक्सिराङ गाउँपालिका इन्चार्जमा कृष्ण चेपाङलाई चयन गरिएको छ ।
बैठकले ४९ सदस्यीय सचिवालय समिति गठन भएको छ । सचिवालय सदस्यमा जिल्ला कमिटीका अध्यक्ष पोखरेल, उपाध्यक्ष लामा, सचिव विष्णु दाहाल, उपसचिव जीवन लामा, कार्यालय सचिव तिलक अधिकारी, पालिका इन्चार्जहरु, विभाग प्रमुखहरुसहित माधव तिमल्सिना, मनिला विष्ट, रघु आचार्यलगायत रहेका छन् ।
बैठकले जिल्लाभर साधारण सदस्यता वितरण गर्ने, सांगठनिक सदस्यता अध्यावधिक गर्ने, असोज १९ गतेसम्ममा मकवानपुर जिल्लाका सबै वडाहरुमा वडा कमिटी विस्तार गरिसक्ने निर्णय गरेको अध्यक्ष पोखरेलले बताए । जिल्लाका १ सय २ वडामध्ये ५ वडामा कमिटी विस्तार भइसकेको छ । बाँकी वडामा पनि तोकिएको मितिभित्रै वडा कमिटी निर्माण गरिने पार्टीले जनाएकाे छ ।
सानु खनाल ‘समदर्शी’
१.
आजै दिए हुन्छ दानमा, किन कन्जुस्याईँ गर्छौ ?
तिमी आफ्नै जमानमा, किन कन्जुस्याईँ गर्छौ ?
न कुनै चीजको खति, न त हुन्छ धनको क्षति
जाबो एउटा मुस्कानमा, किन कन्जुस्याईँ गर्छौ ?
२.
न मान न प्रतिष्ठा, दुनियाको हप्काइ दप्काइ खानुपर्छ
यो कस्तो व्यवस्था हो, जहाँ डाक्टरले कुटाइ खानुपर्छ
मै हूँ भन्ने सामन्तका आसेपासे खेतालाहरुबाट बँचेर
आफ्नो योग्यताको जागिर पनि डराइ डराइ खानुपर्छ ।
३.
आमा ! यो तिम्रो सन्तानलाई आशिर्वचन पठाईदेऊ
म अझै बाँच्न चाहान्छु मलाई अक्सिजन पठाइदेऊ
यो मुटु यो फोक्सो अब छिट्टै बन्द हुने चरणमा छन्
तिनलाई दुई चारदिन धान्न पुग्ने धड्कन पठाइदेऊ ।
४.
जित मात्रैले पनि अभिमान बढ्छ, हार सिकाउनु पर्छ
सुख दुःख दुईटा पाटो, जीवनको सार सिकाउनु पर्छ
सन्तानको उन्नति प्रगतिमा, साँच्चै गौरव गर्नु छ भने
सबैभन्दा पहिले तिनीहरुलाई, संस्कार सिकाउनु पर्छ ।
५.
जब राती अबेरसम्म नि छोरो घरमा आउँदैन
जागै बस्दिन्छ बा आमाका आँखा निदाउँदैन
ए समय ! तैँले के सिकाउँदैछस् यो पिँढीलाई
लाग्छ अब हाम्रो बुढेसकालले साहरा पाउँदैन ।
हेटाैडा, मकवानपुर
मकवानपुर । महिलाले महिनावारीकाे समयमा प्रयोग गर्ने सेनेटरी प्याड सर्वसुुलभ मुल्यमा उपलब्ध गराउने राज्यको दायित्व हुनुपर्ने भन्दै बहस चलिरहेको बेला मकवानपुरको बकैया गाउँपालिकाले भने गाउँपालिका भरका विद्यालयहरुमा निशुल्क सेनेटरी प्याडको व्यवस्था गरेको छ ।
महिनावारीको समयमा प्रयोग गरिने स्यानिटरी प्याडको मूल्यमा सरकारले कर लगाएकाेमा महिला सम्बद्ध संस्थाहरुले विराेधमा प्रदर्शन गरेका छन् । पछिल्लो समय देशभर सेनेटरी प्याडमा लगाएकाे कर हटाउने र निशुल्क गर्नपर्ने माग सहित दैनिक महिला र पुरुष सहभागी भएर विराेध प्रदर्शन तथा सरकारलाई ज्ञापनपत्र बुझाउदै आएका छन् । तर वकैया गाउँपालिकाले भने निशुल्क सेनेटरी प्याडकाे व्यवस्थाका लागि सेफ्टी सेनेटरी प्याड भेन्डिङ मेसिन जडान गर्न थालेकाे छ ।
असाेज १० गते आइतबार हात्तीसुँडेस्थित गाउँपालिका कार्यालयमा मेसिन जडान गरी परीक्षण गरिएको हो । विद्यालयमा निःशुल्क सेनेटरी प्याड वितरणलाई सरल, सहज र व्यवहारिक गराउन मेसिन जडान गर्न लागिएको गाउँपालिकाले जनाएकाे छ । मेसिनमा दुई रुपैयाँको सिक्का राखेर प्याड लिन सकिनेछ । प्याड निःशुल्क वितरण गरिने हुँदा मेसिनमै सुरक्षित रहने उक्त सिक्कालाई प्रयोगकर्ताले पुनः प्रयोग गर्नेछन् । साथै, प्रयोग गरिसकेको प्याड नजिकै जडान गरिएको डिस्पोजल मेसिनबाट नष्ट गर्न सक्ने व्यवस्था समेत मिलाइएको छ ।
गाउँपालिकाले गत आर्थिक वर्षको योजना अन्तर्गत विद्यालयमा ‘महिनावारीले सफलता नछेकोस्’ भन्ने हेतुका साथ गाउँपालिका अन्तर्गतका सबै माध्यमिक विद्यालयहरुमा मेसिन राख्न लागिएको बकैया गाउँपालिकाकी उपाध्यक्ष सरला बोलखेले जानकारी दिइन् । ‘गाउँपालिकाले अघिल्लो आर्थिक वर्षमा १७ वटा सेनेटरी प्याड भेन्डिङ मेसिन खरिद गरेको थियो’ बाेलखेले भनिन् ‘कोरोना संक्रमणको कारण जडान नभएकाले मेसिन जडान गर्न लागिएको हो ।’
बालमैत्री गाउँपालिका घोषण भएसंगै छात्राहरु महिनावारी हुँदा प्याडकै अभावले विद्यालय छुटाउन नपरोस भन्ने हेतुले विद्यालयमा निशुल्क सेनेटरी प्याडको व्यवस्था गरिएको उपाध्यक्ष बोलखेले बताइन् । महिनावारी हुँदा छात्राहरुले विद्यालय छाेडनु पर्ने अवस्थाकाे अन्त्य गर्न निशुल्क सेनेटरी प्याड व्यवस्था गरेको बाेलखेले बताइन् ।
गाउँपालिकाका रहेका ११ वटा मावि र बाकि विद्यालयमा ५ वटा मेसिन तत्काल केहि दिनमै जडान गरिने गाउँपालिकाले जनाएको छ । गाउँपालिकाले गत आर्थिक वर्षको १९ लाख ७० हजार बजेटकाे ठेक्का सूचना अनुसार उक्त योजनामा ११ लाखमा ठेक्का परेसंगै गाउँपालिकाले सेफ्टी सेनेटरी प्याड भेन्डिङ मेसिन खरिद गरेको थियो ।
धनु शर्मा
रुन त म एक्लै सक्छु भेटमा हाँसौँला
बिर्सिएर सारा बैगुन माया गाँसौँला
फुर्सदमा सम्झिदिनु तिमीले पनि थोरै
तिम्रै खुसी सजाएर एक्लै बाँचौँला ।
रमाणपत्र उस्तै मेरा तिरेकै छु कर
मरिमेटी ज्ञानै बाड्छु बनाउन डाक्टर
बजेट भाषण भत्ता पाेसाक समेट्दैन मलाई
चक डस्टरमै जुनी बित्छ म को हुँ त सरकार ।
ढुकढुकी हौ हृदयको नयनको तारा
किन छैनौँ हामीसँगै तिमी देख्छु सारा
त्यता दुखे यता रुन्छु ख्याल गर्नु राम्रो
धैर्य गर्नु भेटेपछि मन खोलौँला प्यारा ।
सारेको कदम पछाडि, नाता ताेड भनेरै हाे
भुलेर विगत सारा, उतै मुटु जोड भनेरै हो
न घाम छेक्ने न पानी ओत्ने सुकेको डाली
वर पिपल चौतारी रोजी, छोड भनेरै हो ।
दुखिरहने यो मन बरु फेर्न पाए हुन्थ्यो
छातिभित्र लुकेको घाउ हेर्न पाए हुन्थ्यो
बगरकाे माछीसरि तड्पिरहनु भन्दा बरु,
उसका यादका बाटाहरु घेर्न पाए हुन्थ्यो।
पाेखरा
कर खारेजकाे मागः महिनावारीको समयमा प्रयोग गरिने स्यानिटरी प्याडको मूल्यमा सरकारले लगाएको करको विरोधमा हेटौंडामा भएकाे विरोध प्रदर्शन छ। अनेरास्ववियु मकवानपुर महिला विभागले जिल्ला प्रशासन कार्यालय अगाडी विरोध प्रदर्शन गरेको हो । प्रदर्शनकारीहरूले सरकारसँग १० प्रतिशत भन्सार शुल्क र १३ प्रतिशत भ्याट प्याड तथा अन्य उत्पादनमा लगाइएको कर खारेजीको माग गरेका हुन्।

