मकवानपुर । थाहा नगरमा पर्यटन साहित्य महोत्सव भएकाे छ । पर्या साहित्यमा जाेड गजल महफिल, वहस, पर्या कविता वाचन सहित साहित्य महाेत्सवकाे आयाेजना गरिएकाे हाे । पर्या साहित्यमा जोड दिँदै साहित्य संगम मकवानपुरले ३ सय ३१औं साहित्य सन्ध्या थाहा नगर पर्यटनकाे रुपमा आयाेजना गरेकाे हाे ।
विकासघर पालुङमा आयोजित २ दिने कार्यक्रममा पहिलो दिन गजल महफिल आयोजना गरियो भने दोश्रो दिन बहस तथा पर्या कविता वाचन गरिए । गजल महफिलमा धर्मराज स्याङ्तान, विद्या निर्दोष पहाडी, इन्दिरा अधिकारी, ईन्दिरा अधिकारी, भरतप्रमोद दाहाल र सुवास सजलले गजल वाचन गरेका थिए । यस सेसनलाई बाबु त्रिपाठीले सहजीकरण गरेका थिए ।
संगम अध्यक्ष अनिता न्यौपानेको सभाध्यक्षतामा प्रमुख अतिथी थाहा नगरपालिका प्रमुख विष्णु विष्ट, विशिष्ट अतिथिहरू थाहा नगरपालिका उपप्रमुख भरत गोपाली रहनु भएको दोश्रो दिनको उद्घाटन समारोहमा सर्जक सञ्जाल मकवानपुरका संयोजक निमेष निखिलले प्रस्तुत गरेकाे मकवानपुरमा पर्यटन साहित्यः सम्भावना र चुनौती विषयक कार्यपत्रमा कवि सुवास खनालले टिप्पणी गरेका थिए । जसमा देवराज खरेल र हरिकृष्ण कार्कीले आफ्ना विचारहरू राखेका थिए । उक्त सेसनको सहजीकरण संगम सचिव डिबी बर्तौलाले गरेका हुन् ।
साहित्यसँगै पर्यटनः आन्तरिक पर्यटनको प्रदीपन बहस देवराज खरेलको अभिभावकत्वमा थाहा नगरपालिका उपप्रमुख भरत गोपाली, साहित्यकार माया मानवी, भाषा संस्कृति अध्येता ओम रिजाल सहभागी सेसनको सहजीकरण संगम कोषाध्यक्ष मनोज पोखरेलले गरेका थिए । मानवीले जनप्रतिनिधिहरू जुनसुकै राजनीतिक दलबाट चुनिएता पनि साहित्य, पर्यटन विकास, सर्जक लगायत सबैप्रति राजनीतिक आँखाले नहेर्नका लागि अनुरोध गरिन् । यस्तै अध्येता रिजालले कर्णाली क्षेत्रको दुल्लुमा त्यहाँका कला कौशल, संस्कृति, इतिहास, भेषभुसा, भाषा आदिबारे पुस्तक लेखिएको र त्यसलाई स्थानीय निकायले प्रकाशन गरेको हुँदा थाहाले यस्ता सिकाइलाई पछ्याउँनका लागि सुझाव दिइन् ।

कविहरू भावना सापकोटा, पुण्यशिला श्रेष्ठ, रजनी श्रेष्ठ, ज्योत्स्ना श्रेष्ठ, स्वस्तिका दाहाल, प्रज्वल अधिकारी, सुरज पराजुली, बाबु त्रिपाठी, प्रकाश समीर, राम बर्तौला, रसिकराज, देवराज तिवारी, विशाल अधिकारी आशुतोष, संप्रस पौडेल, मसान उपासक, अञ्जय प्रधान, यश लामा, बैकुण्ठ लामिछानेले पर्या पर्यावरण कविता वाचन गरेका । डा. नवराज लम्सालको अभिभावकत्वमा भएकाे कविता वाचन कार्यक्रममा सहभागी सबैलाई प्रमाणपत्र दिइएको थियो ।
कार्यक्रममा मदन पुरस्कार लगायत ४ राष्ट्रिय साहित्यिक पुरस्कार विजेता डा. लम्सालले वाचन भएका पर्या साहित्य सिर्जनाले स्थानीयदेखि विश्वका मुद्दा उठाएका र सर्जकहरूलाई छन्द वा गद्यमा रचना गर्ने तथा आफ्नो रचनालाई कसैले नराम्रो भन्ला कि भन्ने अन्यौलताबाट मुक्त भएर लेखन कार्यमा जोड गर्न सल्लाह दिँदै आफ्नो कृति अग्निमा थाहा, मकवानपुरगढी लगायत मकवानपुरकै माटोको सुगन्ध रहेकोले मकवानपुरलाई जहिल्यै माया गर्ने बताए ।
पर्यटन, उद्योग तथा सहकारी मन्त्रालय, बागमती प्रदेश, थाहा नगरपालिका, पालुङ र पालुङ साहित्य परिषदसँगको सहकार्यमा पालुङमा आयोजित २ दिने महोत्सव बाइलाइन नेपाल, साहित्य पोस्ट, एन एस टेलिभिजन, थाहापाटी, दामन एफएमसँगको सहकार्यमा सम्पन्न गरिएको हो ।
मकवानपुर । मकवानपुरका भूमिहीन तथा अव्यबस्थित बसोबासीहरुले जनस्तरबाट सरकारकाे ध्यानाकरकर्षण गराउन थालेका छन् । निर्वाचनकाे समयमा भाेट माग्न आउँदा लालपूर्जा दिलाउने आश्वासन मात्र दिने गरेकाे बन्दै उनीहरुले नेताहरुलाई भाेट बैक मात्रै बनाइरहने कि लालपूर्जा दिने भन्दै प्रश्न गरेका छन् ।
मकवानपुरकाे पश्चिमक्षेत्रकाे मनहरी गाउँपालिकामा रहेको भूमिहीन तथा अब्यवस्थित बसोबासीहरुले जनस्तरबाट बृहद् प्रदर्शनी गरी सरकारको ध्यानाकर्षण गराएका छन् । उनीहरुले तीन किलोमिटर दूरी सडक जाम गरेरै ¥याली निकालेका छन् भने लालपुर्जा दिलाउने प्रक्रिया नै रोक्न खोज्ने पर्सा राष्ट्रिय निकुन्जलाई ऐन कानून ठूलो कि, जनताको माग ठूलो भन्दै चेतावनी दिएका छन् ।
मनहरीमा भूमिहीनहरुले सरोकारवालालाई बोलाएर मागका सम्बन्धमा प्रतिबद्धता माग गरे भने आफूहरुकाे माग पूरा नगर्ने भए मनहरी निर्वाचनमा ‘भोट बैँक’ का लागि मात्रै होइन भन्ने सन्देश दिएका छन् । संघीय सांसद महेशकुमार बर्ताैला, बागमती प्रदेशको सामाजिक विकास मन्त्री कुमारी मोक्तान, प्रदेश सांसद इन्द्रबहादुर बानियाँ, संविधानसभा सदस्य राजाराम स्याङ्तान, बागमती प्रदेशका पूर्व राज्यमन्त्री सन्तबहादुर चेपाङ, पूर्व सांसद ओमबहादुर ग्लान, कैलाश गाउँपालिका अध्यक्ष लोकबहादुर मुक्तान र मनहरी गाउँपालिका अध्यक्ष रन्जन कालाखेतीसहितलाई साक्षी राखेर ‘भोट बैँक’ को रुपमा मात्र मनहरीलाई नलिन चेतावनी दिएका हुन् ।
यसरी जनस्तरबाट प्रश्न उठिरहँदा नेपाली काँग्रेसका जिल्ला सभापति बुद्ध लामा, नेकपा एमाले मकवानपुरका अध्यक्ष तथा पूर्वमन्त्री एकालाल श्रेष्ठ, राष्ट्रिय भूमि आयोगका अध्यक्ष समेत रहनु भएका नेकपा एकीकृत समाजवादी जिल्ला अध्यक्ष बिष्णुप्रसाद दाहाल, माओवादी केन्द्रका बागमती प्रदेश सदस्य बीरबहादुर घलान ज्वाला लगायतका जिल्लास्तरका नेता पनि सहभागी थिए ।
भूमिहीनको तर्फबाट हरिचन्द्र शाही ठकुरीले संघीय सांसद, प्रदेशका मन्त्री र सांसद तथा स्थानीय सरकारलाई छुट्टा छुट्टै प्रश्न गरे ‘तपाईहरु कानमा तेल हालेर बस्नु भएको हो कि ? काम पनि गर्नुहुन्छ ?’ ‘हरेक ठाउँमा राजनीति गर्नका लागि गठबन्धन गर्न मिल्छ भने लालपुर्जा प्रदान गर्न किन गठबन्धन गर्नुहुन्न ?’ शाहीले भने । भूमिहीन सुकुम्बासी अब्यवस्थित बस्ती संघर्ष समितिका संयोजक क्षेत्रबहादुर मुक्तानले पर्सा राष्ट्रिय निकुन्जले अबरोध खडा गरेकाले अबरोध हटाएर तत्कालै लालपुर्जाको प्रक्रिया सुरु गर्नुपर्ने बताए । उनले दिखित दस्ताबेज प्रस्तुत गर्दै भने–‘राष्ट्रिय भूमि आयोग गठन भएर स्थानीय सरकारले लालपुर्जाका लागि गरेको प्रयत्नमा समेत निकुन्जको तर्फबाट पत्राचार गरी किन अबरोध गरियो ?’ यसको जबाफ भूमिहीनले खोजेकाेले सडक संघर्षको मैदानमा आफूहरु उत्रिएको उनले जानकारी दिए।
मकवानपुर क्षेत्र नं. २ का संघीय सांसद महेश कुमार बर्ताैलालले आफूले नवनियुक्त वन तथा वातावरण मन्त्रीलाई मध्यवर्तीका देशभरिका समस्या हल गर्नका लागि वार्ता गर्न समय मागेको र त्यसबेला संघर्ष समितिका प्रतिनिधिशरुलाई पनि लिएर भेट्न जाने प्रतिबद्धता जनाए । ‘म तपाईहरुले भनेजस्तो कानमा तेल हालेर बसेको छैन’, बर्तौलाले भने– ‘सम्मानित सदनमा यहाँको समस्या जस्ताको त्यस्तै उठाइरहेको छु र अब विवेक प्रयोग गरेर आपसी सहमति कायम गरी यो गाँठोलाई फुकाउनुपर्नेछ ।’
बागमती प्रदेश सरकारी सामाजिक विकास मन्त्री कुमारी मोक्तानले प्रदेश भरकै समस्या समाधानका लागि सरकार सक्रिय रहेको बताइन् । उनले मध्यवर्ती क्षेत्रमा पर्ने मकवानपुरका केही स्थानीय तहका वडाहरुका समस्या समाधानका लागि ऐन नै संशोधन गर्नुपर्ने अबस्था रहेको र त्यो समस्याको समाधानका लागि सहजीकरण गर्ने प्रतिबद्धता जनाइन् । त्यसैगरी बागमती प्रदेश सांसद इन्द्रबहादुर बानियाँले लालपुर्जा प्राप्त हुने ठोकुवा गर्दै जनस्तरबाट कुरा उठ्न अझै ढिला भएको टिप्पणी गरे । ‘मध्यवर्ती क्षेत्रभित्रका बासिन्दाको जग्गा नापी नहुने भन्ने कुरा बाहिर आएपछि तपाईहरु तात्तिनु भएको हो’, उनले भने–‘तपाईहरु यसरी तात्तिएपछि हामीलाई पनि काम गर्न सजिलो भएको छ, हामी पनि ऐन संशोधनका लागि घच्घच्याउने छौँ ।’ बानियाँले भूमिहीनको समस्या समाधानका लागि रकम संकलन गरेर दुरुपयोग नगर्न समेत आग्रह गरे ।
संविधानसभा सदस्य राजाराम स्याङ्तान, बागमती प्रदेशका भौतिक पूर्वाधार विकास राज्यमन्त्री सन्तबहादुर चेपाङ, जिल्ला समन्वय समिति मकवानपुरका प्रमुख ललित घलान, राष्ट्रिय भूमि आयोगका अध्यक्ष बिष्णुप्रसाद दाहाल, मनहरी गाउँपालिका अध्यक्ष रन्जन कालाखेती, नेपाली काँग्रेस मनहरीका सभापति प्रकाश बर्ताैला लगायतले आन्दोलनप्रति प्रतिबद्धता ब्यक्त गरेका थिए ।
मनहरी ७ मनकामना मन्दिर परिसरमा अन्तरक्रिया कार्यक्रम सुरु हुनुअघि रमन्टार र सिमपानीबाट छुट्टाछुट्टै ¥यालीको आयोजना भएको थियो । ¥यालीमा सहभागी सयौँका संख्याका भूमिहीनहरुले लालपुर्जाको माग गर्दै भ्रष्टाचार विरुद्ध समेत नाराबाजी गरेका थिए । स्वतस्फूर्त रुपमा नागरिकको तहबाट आन्दोलन थालिएको र यसले निरन्तरता पाउने संघर्ष समितिका संयोजक क्षेत्रबहादुर मुक्तानले बताए ।
मनहरीका भूमिहीन तथा अव्यबस्थित बसोबासीहरुले मुद्दामा महेश कुमार बर्तौलाले के भने हेर्नुहाेस
मकवानपुर । मकवानपुरकाे मनहरी गाउँपालिका ९ रजैयामा मिनीट्रकले हात चुडाल्दा मृत्यु भएकाे पुरुषकाे पहिचान खुलेकाे छ । मृत्यु हुनेमा भारतको विहार बेतिया–१२ का १८ वर्षीय पोशन शेख रहेको जिल्ला प्रहरी कार्यालय मकवानपुरका प्रहरी प्रवक्ता टेक बहादुर कार्कीले जानकारी दिए ।
शनिबार बिहान ११ बजेर २५ मिनेटको समयमा मनहरी ९ रजैया स्थित पूर्व पश्चिम राजमार्गमा हेटौँडाबाट चितवनतर्फ जाँदै गरेको ग १ क २२९७ नम्बरको मिनि ट्रकले विपरित दिशाबाट आउँदै गरेको बा ३ ख ८३९४ नम्बरको बसमा सवार शेखले झ्यालबाट हात बाहिर निकाल्दा ठक्कर दिएकाे थियाे ।
मिनी ट्रकले ठक्करबाट हात चुडिएर गम्भीर घाइते भएका शेखलाई उपचारको लागि हेटौंडा अस्पतालमा ल्याइएकोमा शनिबार दिउँसो १२ बजेको समयमा डाक्टरले मृत घोषणा गरेका थिए । प्रहरीका अनुसार बस चालकको सिटभन्दा पछाडी सिटमा बसेका शेखले झ्यालबाट हात बाहिर निकालिरहेको अवस्थामा ट्रकले ठक्कर दिँदा दाहिने हातको पाता भन्दा मुनिको भाग चुडिएकाे चुडालेको दिएको थियो । मिनी ट्रक र चालक प्रहरी नियन्त्रणमा रहेको र थप अनुसन्धान भइरहेको प्रहरीले जनाएको छ ।
मकवानपुर । नेपाल विद्युत् प्राधिकरणका कार्यकारी निर्देशक कुलमान घिसिङले हेटौंडामा निर्माणाधीन सब स्टेशनको अनुगमन गरेका छन् । कार्यकारी निर्देशक घिसिङले शनिबार हेटौंडा उपमहानगरपालिका वडा नम्वर ११, स्थित थानाभर्याङमा निर्माण भइरहेको ४०० केभी, २२० केभी र १३२ केभी सब स्टेशनको अनुगमन गरेका हुन् ।
अनुगमनका क्रममा उनले निर्माणाधीन सब स्टेशनको निर्माण प्रगतिका विषयमा जानकारी लिएका थिए । आगामी असारभित्र सब स्टेशनको निर्माण सम्पन्न गर्ने प्रतिबद्धता जनाएका ठेकेदार कम्पनीहरूले प्रतिबद्धता विपरीत निर्माण स्थलमा कुनै काम नगरेको भन्दै उनले काममा सुधार नगरे ठेक्का तोड्ने चेतावनी दिए । उनले सब स्टेसन निर्माण स्थलबाटै निर्माणको ठेक्का लिएका भारतीय कम्पनीहरू सिमेन्स लिमिटेड र टेलमोस इलेक्ट्रोनिक्सको संयुक्त उपक्रमका पदाधिकारीहरूलाई फोन गरी तोकिएको समयमा सम्पन्न नगरे जरिवाना तिराउने चेतावनी दिएका छन् ।
साथै उनले भारतको दिल्लीमा रहेका सिमेन्सका प्रतिनिधि र टेलमोसका प्रतिनिधिलाई छुट्टाछुट्टै फोन गरी आइतबार काठमाडौं आएर संयुक्त बैठक गर्न निर्देशन समेत दिएका थिए । चिनियाँ कम्पनी सेन्ट्रल चाइना पावर ग्रिड इन्टरनेशनल इकोनमिक एण्ड ट्रेडको काम सन्तोषजनक नभएपछि प्राधिकरणले ठेक्का तोडेर बाँकी रहेको काम गर्न टेण्डरमार्फत् सिमेन्स लिमिटेड र टेल्मोस इलेक्ट्रोनिक्सको संयुक्त उपक्रमसँग ५ पुस २०७५मा ठेक्का सम्झौता भएको थियो ।
यही प्याकेजमा सुनसरीको इनरुवामा पनि २२० केभीको सबस्टेस निर्माण पनि राखिएको छ । कोभिड–१९को महामारीलगायतका कारणले प्रभावित भएपछि सबस्टेसनको निर्माण आउँदाे असारभित्रमा सम्पन्न गर्ने लक्ष्य राखिएको छ ।
मकवानपुर । दोस्रो बागमती प्रदेश खेलकुद प्रतियोगिता शनिबार सम्पन्न भएको छ । बागमती प्रदेश खेलकुद विकास परिषदको आयोजना भएको प्रतियोगिताको हेटौंडा–५ स्थित पिप्ले क्याम्पा रंगशाला शनिबार विशेष समारोहकाबीच समापन गरिएको हो ।
प्रदेशका मुख्यमन्त्री शालिकराम जम्कट्टेलको उपस्थितमा प्रतियोगिताको समापन कार्यक्रम आयोजना गरिएको थियो । जेष्ठ ७ गते मुख्यमन्त्री जम्कटे्टलले पिप्ले क्याम्पा रंगशालामै प्रतियोगिताको उद्घाटन गरेका थिए ।
स्वास्थ्यका लागि खेलकुद, राष्ट्रका लागि खेलकुद भन्ने नारा साथ आयोजना भएको दोस्रो बागमती प्रदेश खेलकुद प्रतियोगितामा काठमाडौं ३१ स्वर्ण, २२ रजत र २५ कांस्य गरी कुल ७८ पदक सहित च्याम्पियन बनेको हो । प्रतियोगिताको पहिलो संस्करणमा दोस्रो स्थानमा रहेको काठमाडौं दोश्रो संस्करणमा पहिलो स्थान बनाउन सफल भयो ।
प्रतियोगिताको पहिलो सस्करणमा पहिलो भएको चितवन दोस्रो सस्करणमा २३ स्वर्ण, २४ रजत र २५ कांस्य गरी कुल ७२ पदक सहित दोस्रो स्थानमा रह्यो । यस्तै काभ्रेले २२ स्वर्ण, १३ रजत र १८ कांस्य सहित ५३ पदक जित्दै तेस्रो स्थान बनाउन सफल भयो ।
पदक तालिकाको चौथो स्थानमा ललितपुर रहेको छ । उसले १९ स्वर्ण २७ रजत र २७ कास्य पदकाे जितेकाे छ । सिन्धुपाल्चोक पाँचौ र मकवानपुर छैटौं स्थानमा छ । सिन्धुपाल्चाेकले १७ स्वर्ण ८ रजत र १६ कास्य पदक र मकवानपुरले १६ स्वर्ण ११ रजत र १७ कास्य पदक हात पारेकाे हाे । त्यस्तै भक्तपुर, नुवाकोट, रामेछाप, दोलखा, सिन्धुली क्रमशः सातौं, आठैं, नवौं, दशौं र एघारौं स्थानमा रहको छ ।
यसैगरी भक्तपुरले १४ स्वर्ण १४ रजत र ९ कास्य, नुवाकाेटले १० स्वर्ण १० रजत र २२ कास्य, रामेछापले १० स्वर्ण ९ रजत र १८ कास्य, दाेलखाले ३ स्वर्ण ११ रजत र ९ कास्य, सिन्धुलीले ३ स्वर्ण ७ रजत र १० कास्य पदक प्राप्त गरेका छन् । पदक तालिकाको अन्तिममा धादिङ र रसुवा रहेका छन् । धादिङले ६ रजत र १४ कास्य पदक प्राप्त गर्दा रसुवाले २ रजत र ५ कास्य पदका प्राप्त गरे ।
मकवानपुर, काठमाडौं, चितवन र ललितपुरमा संचालन गरिएकाे प्रतियाेगिता अन्तर्गतका १३ खेलमध्ये १२ खेलका कुल १ सय ६८ स्वर्ण पदक गणना भएको थियो । पौडी खुला प्रतियोगिता भएकाले पदक तालिकामा पौडीको पदक गणना गरिएन ।बागमती प्रदेशका १३ जिल्लाका करिब २५ सय खेलाडीले प्रतिस्पर्धा गरेका थिए । प्रतियोगिताका स्वर्ण, रजत र कांस्य विजेताले क्रमशः ५ हजार, ४ हजार र ३ हजार नगद पुरस्कार प्राप्त गरेका छन् ।
मुख्यमन्त्री जमकट्टेल, प्रदेशको आर्थिक मामिता तथा योजना मन्त्री बहादुर सिंह लामा, बागमती प्रदेशका सामाजिक विकास मन्त्री कुमारी मोक्तान, प्रदेश खेलकुद विकास परिषद्, बागमती प्रदेशका सदस्य–सचिव सूर्यलाल भण्डारी लगायतले समापनमा टिम च्याम्पियन बनेको काठमाडौं, दोस्रो चितवन र तेस्रो काभ्रेलाई ट्रफी प्रदान गरिएको थियो । पहिलो पटक प्रदेश खेलकुदको टिम च्याम्पियनका लागि ट्रफी प्रदान गरिएकाे हाे।
प्रदेश खेलकुद विकास परिषद्को आयोजनामा जेठ ७ गतेबाट सुरु भएकाे प्रतियोगितामा १३ खेल समावेश गरिएकाे थियाे । २ सय १९ स्वर्ण, २ सय १९ रजत र ३ सय ५६ कास्य गरी ७ सय ९४ पदका लागि प्रतिस्पर्धा हुने बताइएकाे भए पनि १ सय ६८ स्वर्ण, १ सय ६४ रजत र २ सय १४ कास्य गरी ५ सय ५० पदकका लागि प्रतिस्पर्धा भएकाे थियाे ।
प्रतियोगितामा फुटबल, भलिबल, एथलेटिक्स, तेक्वान्दो, कराते, बक्सिङ, रग्बी, ब्याडमिन्टन र आइटिएफ तेक्वान्दो हेटौँडाका विभिन्न खेल मैदानमा प्रतिस्पर्धा गराइएकाे थियाे भने प्रतियोगिताको पुरुष फुटबल र एथ्लेटिक्स् हेटौंडा–५ स्थित पिप्ले क्याम्पा रंगशालामा र महिला फुटबल हेटौडाकाे गौरीटार रंगशालामा खेलाइएका थिए । हेटौंडा–४ स्थित हुप्रचौरमा भलिबल, रग्वी, कराँते, तेक्वान्दो, आईटीटीफ र तेक्वान्दो खेलका प्रतिस्पर्धा भएकाे थियाे ।
त्यस्तै बक्सिङ्ग महिला र पुरुष खेल हेटौंडा–४ स्थित कर्भड हलमा तथा व्याटमिन्टन महिला र पुरुष हेटौंडा–११ थानाभ¥याङ्गस्थित कर्भड हलमा खेलाइएकाे थियाे । जुडो काठमाडौं, उसु त्रिपुरेश्वर, क्रिकेट चितवन, पौडी सादोबाटो ललितपुरमा प्रतिस्पर्धा गराइएकाे प्रदेश खेलकुद विकास परिषद्का सदस्य सचिव सूर्यलाल भण्डारीले जानकारी दिए ।
स्वास्थ्यका लागि खेलकुद राष्ट्रका लागि खेलकुद भन्ने नारा सहित बामगती प्रदेश खेलकुद बिकास परिषदले देशमै पहिलो पटक प्रदेश स्तरको खेलकुद प्रतियोगिता गत बर्ष आयोजना गरेको थियो । प्रतियोगिताको पहिलो संस्करणमा गत वर्ष ८ वटा विधामा खेल खेलाइएको मा दोस्रो संस्करणमा ५ खेल थप गर्दै १३ बिधामा प्रतियोगिता संचालन भएकाे हाे ।
प्रदेशका खेल प्रतिभाको खोजी, प्रदेश समुह तयार र खेलाडीलाई नियमित अभ्यास एवम् प्रशिक्षणको उद्देश्यका साथ दोस्रो वर्ष पनि प्रतियोगिता सुरु गरिएको प्रदेश खेलकुद परिषद्ले जनाएको छ । यस्तै दोस्रो बागमती प्रदेश खेलकुद प्रतियोगिताको मस्कटको रुपमा लोपन्मुख सालकलाई प्रयोग गरिएको थियाे । ‘किसानको साथी’ को रुपमा हेर्ने गरिएको सालक संरक्षणको पहल स्वरुप मस्कटको रुपमा प्रयोग गरिएको बागमती प्रदेश खेलकुद परिषद कार्यालयले जनाएको छ ।