मकवानपुर । मकवानपुरको कैलाश गाउँपालिकामा आँखा शिविर भएकाे छ । निःशुल्क भएकाे शिविरमा १ सय ११ जनाको आँखा जाच गरिएको छ । कैलाश गाउँपालिका–५, गोगने स्वास्थ्य चौकीमा भएको शिविरमा महिला ५१ र पुरुष ६० जनाको आँखा जाज गरिएको हाे ।
हेटौँडा सामुदायिक आँखा अस्पताल, तिलगंगा सामुदायिक आँखा केन्द्र र कैलाश गाउँपालिकाको आयोजनामा भएको आँखा शिविरमा ११ जनाको आँखामा मोतिविन्दुको समस्या देखिएको छ । निःशुल्क आँखा शिविरमा हेटौँडा सामुदायिक आँखा अस्पतालको प्राविधिक सहयोग रहेको थियाे । मोतिविन्दु देखिएका बिरामीहरुको बिहीबार तिलगंगा सामुदायिक आँखा केन्द्र पालुङमा निःशुल्क शल्यक्रिया गरिने बताइएकाे छ ।
शिविरमा कैलाश गाउँपालिका अध्यक्ष लोकबहादुर मोक्तानको प्रमुख आतिथ्य तथा कैलाश गाउँपालिका ५ का वडा अध्यक्ष छेकु लामाको अध्यक्षता भएकाे थियो ।
मकवानपुर । प्रहरीले गत भदौ २७ गते हेटौंडा–१ स्थित सञ्चो हस्पिटलमा चिकित्सकलाई आक्रमण गरेको अभियोग लागेका थप १ जनालाई पक्राउ गरेको छ ।
चिकित्सकमाथि आक्रमण गर्ने हेटौँडा–१२, सिक्रेनीका ३६ को सुवास स्याङ्तानलाई बुधबार दिउँसो हेटौँडा–१०, बसपार्कबाट पक्राउ गरेको प्रहरीले जनाएको छ ।पक्राउ परेका स्याङ्तानलाई विहीबार जिल्ला अदालतमा हाजिर गराइने मकवानपुरका प्रहरी प्रवक्ता प्रहरी नायव उपरीक्षक लक्ष्मी भण्डारीले बताए ।
सञ्चो हस्पिटलमा बिरामीको उपचार गरिरहेका चिकित्सक जनरल फिजिसियन विकास थापा र एनेस्थेसिया प्रशान्त विडारीमाथि सांघातिक आक्रमण भएको थियो । हेटौंडा–१२ का ४१ वर्षीय राजेश प्रधानको उपचारमा लापरबाही भएको भन्दै भदौ २७ गते डाक्टरमाथि आक्रामक भएको थियो । सन्चो अस्पतालमा उपचार गराउँदा डेंगु सङ्क्रमण भएका प्रधानलाई थप उपचारको लागि चितवन मेडिकल कलेज भरतपुर पठाइएकोमा उपचारको क्रममा मृत्यु भएको थियो ।
पक्राउ परेका ६ जना धरौटीमा रिहा
यसैगरी उपचार गरिरहेका चिकित्सकलाई सांघातिक आक्रमण गरेको अभियोगमा पक्राउ परेका ६ जनालाई जिल्ला अदालत मकवानपुरले धरौटीमा रिहा गर्ने आदेश दिएको छ । मंगलबार जिल्ला न्यायाधीश राजेन्द्र अधिकारीको इजलाशले धरौटी माग गर्ने आदेश गरेको हो ।
चिकित्सकमाथि आक्रमण गर्ने रमा प्रधानलाई २ लाख ५० हजार रुपैयाँ तथा रमिला प्रधान, रोहन प्रधान, अनुप प्रधान, सुनिल पाख्रिन र जीवन लामालाई जनही २ लाख रुपैयाँ धरौटी माग गर्ने अधिकारीले आदेश गरेका छन् । अदातलले धरौटीमा रिहा गर्न सकिने आदेशसँगै ६ जना नै मंगलबार नै धरौटी बुझाएर हिरासतमुक्त भएका छन् ।
यसैबीच प्रहरीले अदातलबाट पक्राउ पुर्जी जारी गरेका १३ जनामध्ये ६ जना अझै फरार रहेकाे बताएकाे छ ।
मकवानपुर । चैनपुर जेसीज (प्रस्तावित) को आयोजनामा मंगलबारबाट मनहरी गाउँपालिकामा जेसीज कप फुटबल प्रतियोगिता सुरु भएको छ ।
मंगलबारको उद्घाटन खेलमा सिमपानी एफसी र हाँडीखोला यूथ क्लवले विजयी सुरुवात गरेका छन् । सिमपानीले मनहरी ४ फुटबल टिमलाई २–० ले बिजयी गराउन सिमपानीका लागि दुवै गोल राहुल थापा मगरले गरे । उनी नै खेलको म्यान अफ द म्याच भए ।
दोस्रो खेलमा हाँडीखोलाले खरंगा एफसीलाई १–० ले हरायो । पहिलो हाफको अतिरिक्त समयमा विशाल प्रजाले गरेको गोल नै निर्णायक बन्यो । खेलको म्यान अफ द म्याच अभिषेक राई भए ।
जारी प्रतियोगितामा बुधबार बागमती प्रदेश प्रहरी गण हेटौंडा र रियल स्टार युवा क्लवको बीचमा खेल हुनेछ ।कात्तिक १ गतेसम्म सञ्चालन हुने प्रतियोगितामा मकवानपुरका १६ टिमको सहभागिता रहेको छ ।
प्रतियोगिताको विजेताले ५० हजार ५ सय ५५ रुपैयाँ र उपविजेताले २५ हजार ५ सय २५ रुपैयाँसहित ट्रफी र प्रमाणपत्र प्राप्त गर्नेछ । यस्तै विधागत उत्कृष्ट खेलाडीहरुलाई पनि नगदसहित ट्रफीको व्यवस्था रहेको आयोजकले जनाएको छ ।
चैनपुर जेसीजले मकवानपुरको पश्चिमी क्षेत्रका युवाहरुलाई समेट्दै युवाहरुको नेतृत्व र व्यक्तित्व विकाससँगै सामाजिक कार्यलाई निरन्तरता दिँदै आएको अध्यक्ष गणेश अधिकारीले बताए ।
प्रतियोगिताको उद्घाटन मनहरी गाउँपालिकाका कार्यबाहक अध्यक्ष शिवप्रसाद खनालले गरेका थिए । चैनपुर जेसीजका अध्यक्ष गणेश अधिकारीको अध्यक्षता एवम् कार्यक्रम संयोजक प्रमोद अधिकारीको संयोजकत्वमा भएको उद्घाटन समारोहमा मनहरी गाउँपालिका ५ नम्बर वडा अध्यक्ष दीपेन्द्र अधिकारी, नेकपा एमाले मनहरी गाउँ कमिटी अध्यक्ष नवीन सुवेदी, जेसीआई हेटौंडाका अध्यक्ष श्रवणकुमार बर्तौला, चैनपुर जेसीजका श्रीकृष्ण ढकाल लगायतले मन्तव्य व्यक्त गरेका थिए ।
कार्यक्रममा मनहरी ७ नम्बर वडा अध्यक्ष ठाकुरराम तितुङ, ३ नम्बरका कार्यबाहक अध्यक्ष हिराबहादुर प्रजा, ४ नम्बर वडा अध्यक्ष प्रकाश थापा, कांग्रेस जिल्ला सदस्य नुरज पौडेल, मनहरी सभापति प्रकाश बर्तौला, राष्ट्रिय स्वतन्त्र पार्टीका क्षेत्रीय सभापति सञ्जिव पाठक, कांग्रेस मनहरी ८ नम्बर वडा सभापति भीमसेन लामा, बसामाडी जेसीजका अध्यक्ष जनक भण्डारी, हेटौंडा लेडी जेसीजका अध्यक्ष डिलमाया घर्ती, मकवानपुरगढी प्रस्तावितका अध्यक्ष पुष्पराज पुडासैनी लगायतको उपस्थिति रहेको थियो ।
मकवानपुर । मकवानपुरगढी गाउँपालिका रनिङ्ग शिल्ड फुटसल प्रतियोगिता हुने भएको छ । आगामी असोज २९ गतेबाट सुरु हुने प्रतियोगिताको जानकारी गढी स्टार स्पोर्टस् क्लबले मंगलबार दिएको हो । क्लबले सूचना जारी गर्दै छैटौँ सस्करणको प्रतियोगिताको जानकारी दिएको हो ।
क्लब अध्यक्ष राजु दुलालले खेल र खेलाडीको क्षमता विकास तथा पहिचान गर्ने उद्देश्यसहित फुटसल प्रतियोगिता आयोजना गर्न लागिएको बताए ।
प्रतियोगिताको विजेता टिमले शिल्ड, मेडल तथा प्रमाणपत्रसहित ७५ हजार, उपविजेता टिमले ५० हजार र तेस्रो हुनेले २५ हजार रुपैयाँ नगद प्राप्त गर्ने प्रतियोगिताको संयोजक तथा सचिव विदुर हुँमागाईले जानकारी दिए ।
प्रतियोगिता मकवापनुरगढी गाउँपालिका वडा नं.३ स्थित भानु मिनी पिचमा सञ्चालन हुनेछ । प्रतियोगितामा मकवानपुरगढी गाउँपालिकाभित्रका १८ वटा टोलीको सहभागिता रहने अनुमान छ ।
प्रतियोगितामा मकवानपुरगढी गाउँपालिकाभित्रका खेलाडीहरुले मात्र सहभागिता जनाउन पाउने छन् भने खेल लिग कम अकआउट विधिबाट खेलाइनेछ । बिजयादशमी तथा शुभदिपावलीको अवसरमा आयोजना गर्न लागिएको प्रतियोगिता सञ्चालनका लागि करिब ४ लाख ५० हजार रुपैयाँ खर्च हुने आयोजकको अनुमान गरेको छ ।
मकवानपुर । संघीय निजामती विधेयकमा असन्तुष्टि जनाउँदै स्थानीय तहका कर्मचारीले आन्दोलन जारी राखेका छन् । आन्दोलनमा एक्यबद्धता जनाउदै हेटौंडा उपमहानगरपालिकाका कर्मचारीहरुले पनि कामकाज ठप्प पारेका छन ।
उपमहानगरपालिका केही कर्मचारी काठमाडौ केन्द्रित आन्दोलनमा सहभागी हुन गएको र काठमाडौ जान नपाएका कर्मचारीहरुले उपमहानगर तथा १९ वटै वडाका कामकाज ठप्प पारेर आन्दाेलनमा सहभागी भएका हुन् । संघीय सरकारले संसदमा पेस गर्ने गरी मन्त्रिपरिषदबाट स्वीकृत भएकाे संघीय निजामती सेवा ऐनको विरोधमा शुक्रबारदेखि हेटौँडा उपमहानगरपालिकाका कर्मचारीहरुले कार्यालय परिसरमा विरोध प्रदर्शन गर्दै आएका थिए ।
मगलबार दिनभर उपमहानगरपालिकाको मुल प्रबेशद्वारमा कर्मचारीहरुले ब्यानर सहित धर्नामा बसेर कामकाज ठप्प पारेका हुन । आन्दाेलनका विषयमा प्रमुख प्रशासकीय अधिकृत शिवराज चौलागाईलाई ज्ञापनपत्र बुझाएर उनीहरुले विराेधका कार्यक्रम गर्दै आएका छन् । पूर्व जानकारी विना उपमहानगपालिकाकाे सेवा प्रवाह ठप्प हुँदा मंगलबार कार्यालय तथा वडा कार्यालयमा आएका सेवाग्राहीकाे काम भने हुन सकेन ।
यसैबीच मंगलबार केन्द्रिय आन्दोलन संघर्ष समितिको नेतृत्वमा कर्मचारीहरूले जिल्ला अदालत बबरमहलमा भेला भइ आन्दोलन जारी राखेका छन । सङ्घीय निजामती सेवा ऐनको सट्टा एकीकृत निजामती सेवा ऐन जारी गर्नुपर्ने, प्रमुख प्रशासकीय अधिकृत स्थानीय तहकै कर्मचारी हुनुपर्ने, अन्तरस्थानीय तहका कर्मचारीको सरुवामा दोहोरो सहमति आवश्यक नपर्ने लगायतका २० वटा माग राखी स्थानीय तहका कर्मचारीले आन्दोलन गरिरहेका छन् ।
संघीय निजामती सेवा ऐन जारी गर्न माग राख्दै आन्दोलनमा उत्रिएका कर्मचारी र प्रहरीबीच सोमबार बानेश्वरमा झडप समेत भएको थियो । कर्मचारीहरूले आन्दोलनका क्रममा सोमबार दिउँसो नयाँ बानेश्वरमा निषेधित क्षेत्र तोड्न खोज्दा प्रहरीसँग झडप भएको हो। स्थानीय तह कर्मचारी सङ्घर्ष केन्द्रीय तदर्थ समितिको नेतृत्वमा संघीय निजामती सेवा ऐनमा स्थानीय तहमा कार्यरत कर्मचारीहरूका मागहरू समावेश गरी तत्काल ऐन जारी गर्ने मागसहित प्रदर्शन गरिरहेका हुन ।
समितिले ९ दिनदेखि दबाबमूलक कार्यक्रम गर्नुका साथै ७५३ वटै स्थानीय तहमा अत्यावश्यकभन्दा बाहेकका सबै कामकाज बन्द गर्दै काठमाडौँ केन्द्रित आन्दाेलन गरिरहेका छन् । काठमाडाैसम्म जान नसक्ने कर्मचारीहरूले स्थानीय तहमै विरोधको कार्यक्रम गर्दै आइरहेको छन्।
मंगलबार आन्दोलनरत स्थानीय तहका कर्मचारीहरूलाई सरकारले वार्ताका लागि आह्वान गरेको छ । संघीय मामिला तथा सामान्य प्रशासन मन्त्रालयले विज्ञप्ति निकालेर स्थानीय तहका कर्मचारीका मागका सम्बन्धमा छलफल गरी उपयुक्त निकास निकाल्न मन्त्रालय सकारात्मक रहेको भन्दै वार्ताका लागि आह्वान गरेको हो ।
हेर्नुहाेस विज्ञप्तिः
सामान्य प्रशासन मन्त्रालयको वार्ताको लागि बोलाएको विज्ञप्ति