मकवानपुर । शहीद दिवसकाे अबसरमा जिल्लास्तरीय पुरूष शिक्षक दौड र महिला शिक्षक स्लाे स्कुटी रेस प्रतियाेगिता हुने भएकाे छ । हेटाैँडा उपमहानगरपालिका ४ नम्बर वडा कार्यालयकाे आयाेजना तथा नेपाल राष्ट्रिय शिक्षक संगठनकाे व्यवस्थापनमा प्रतियाेगिता हुने भएकाे हाे ।
पुरूष शिक्षककाे ३ हजार मिटर दाैड हुनेछ । माघ १५ गते हुप्राचाैरबाट शुरू हुने प्रतियाेगिता सहिद दिवस सप्ताहव्यापी क्रार्यक्रम अन्तरगत हुन लागेकाे हाे । विद्यालयले नै खेलकुदकाे प्रवर्द्वन गर्ने उदेश्यले शिक्षक केन्द्रीत प्रतियाेगिता आयाेजना गरिएकाे ४ नम्बर वडा अध्यक्ष नवीन सिग्देलले बताए । शिक्षकहरू खेलकुदप्रति आकर्षित भए स्वतः विद्यार्थीहरूकाे खेलप्रति रूचि बढ्ने भएकाेले प्रतियाेगिता आयाेजना गरिएकाे वडा अध्यक्ष सिग्देलले बताए ।
प्रतियाेगितामा पुरूष शिक्षक तर्फ दाैडमा प्रथम हुनेले ७ हजार, द्वितीय हुनेले ५ हजार, तृतीय हुनेले ३ हजार, चाैथाे हुनेले २ हजार र सान्त्वना हुनेले १ हजार प्राप्त गर्ने छन् । यस्तै महिला शिक्षक तर्फ स्लाे स्कुटी प्रतियाेगितामा प्रथम हुनेले ७ हजार, द्वितीय हुनेले ५ हजार र तृतीय हुनेले ३ हजार पुरस्कार प्राप्त गर्ने नेपाल राष्ट्रिय शिक्षक संगठन मकवानपुर अध्यक्ष श्रीराम दाहालले जानकारी दिए । उनले इच्छुक शिक्षकहरूलाई प्रतियाेगितामा सहभागी हुनकाे लागि अनुराेध समेत गरे ।

मकवानपुर । साहित्य सङ्गम मकवानपुरको ३ सय ३९ औ साहित्य सन्ध्यामा मकवानपुरका दिवगंत साहित्याकार खेम बानियाँ स्मृति विशेष भएको छ । साहित्य सर्जकहरुकाे रचना वाचनका साथै साहित्य र जीवन बिषयक अन्तर सम्वाद समेत आयाेजना गरिएकाे छ ।
साहित्य सङ्गमका पूर्व कार्यसमिति सदस्य बानियाँको स्मृति कार्यक्रम गर्दै सुरु गरिएकाे सन्ध्यामा सर्जक सञ्जाल मकवानपुरका संयोजक निमेष निखिलले मकवानपुरमा सुत्र भित्र्याउने बाँनिया भएकाे बताए । नेपालमा ध्रुवचन्द्र गौतमले सूत्र कथाको सुरूवात गरे भने मकवानपुरमा सूत्रकथा भित्र्याउँदै पत्रकारिता,खेलकूद, लेखन, राजनीति बहुविधामा बानियाँ सक्रिय रहेको बताए । मकवानपुरका पहिलो गजल सर्जकका रूपमा समेत बानियाँ भएकाे बताउँदै उनकाे अल्पायु मै भएकाे स्वार्गाराेहणले मकवानपुरसहित समग्र साहित्यमा अपूरणीय क्षति भएको बताए ।
शनिबारकाे नियमित सन्ध्यामा बाल साहित्यकार अनुषुया खनाल, किशन पौडेल (लघुकथा), एस के निधन (सूत्रकथा ), स्वस्तिका बानियाँ, हरि पौड्याल, केशव समर्पण र जुम्लेली स्रष्ट्रा राजबहादुर बुढाले गजल सुनाएका थिए । यसैगरी स्वस्तिका दाहाल, राजकुमार चौधरी, रामहरि चौलागाईं, बैकुण्ट लामिछाने, सुवास सजल, राजकुमार लामिछाने, छवि अनित्य, मसान उपासकलगायतले कविता वाचन गरेका थिए ।
सन्ध्याकाे अर्काे सत्रमा साहित्य र जीवन बिषयक अन्तर सम्वादमा साहित्यसेवी मुक्तिगोविन्द वैद्य र उमा मैनालीको सहभागिता रहेको थियो । सङ्गमका उपाध्यक्ष सानु खनालले सहजीकरण गर्नु भएको बहसमा वैद्यले गजल मञ्च मकवानपुरद्वारा हरेक महिना हुने गजल वाचन कार्यक्रममा गजलश्री घोषणा हुने कार्यक्रम नै पहिलो पटक आफूले सुनेको साहित्यिक कार्यक्रम भएको बताए । उक्त कार्यक्रममा गजलश्री घाेषणा गर्ने तर सम्मान स्वरुप प्रमाणपत्र समेत नदिएकाे भन्ने सुनेपछि सहयोग गरेर कार्यक्रमको निरन्तरतामा सहयाेग गरेका उनले बताए । साहित्य सङ्गम, मातृभूमि साहित्यिक समाज, गजल मञ्च, मुक्तक मञ्च, नवसर्जक साहित्य चौतारीसम्म पनि सहयोगदेखि जेसीस कर्ममा रहँदा मलंगवामा विद्यालय सञ्चालनसम्मका कार्यमा जोडिन पाएकोमा जीवन सफल भएको बताए ।
अन्तर सम्वादमा मैनालीले ध्रुवचन्द्र गौतमको अलिखितदेखि नयनराज पाण्डेको लूसम्म समाजकै कुरा आएको बताउँदै पछिल्लो समय डा. नवराज केसीको शुन्यको मूल्यसम्म आइपुग्दा आफूले विभिन्न कालखण्डका अनेकन समाज पढ्न पाएको बताए । उनले पढेका सयौं पुस्तकमध्ये राजेश्वर देवकोटाको उत्सर्ग प्रेमजस्ता पुस्तकहरू बुझ्न नसकेकोले बुझ्ने पुस्तक मात्रै पढ्ने गरेका बताइन् । पहिले काठमाडाैबाट पुस्तक मगाएर पढ्नुपर्ने बाध्यता रहेकोमा अहिले हेटौंडामै प्रकाशन हुने वित्तिकै उपलब्ध हुने हुँदा साहित्यमा रुची राख्ने र पठन संस्कृतिमा रमाउने पाठकलाई सहज भएको बताइन् ।
साहित्य र जीवनबीचको सम्बन्धबारे आनन्दानुभूतिका लागि श्रवण, पठन र मनन गर्ने गरेको र आफू बोल्नेभन्दा पनि अरूका रचना सुन्न ललायित हुने गरेकाे दुवै वक्ताले बताए । नवपुस्तालाई अध्ययनको दायरा फराकिलो पार्दै नेपालीसहित विभिन्न भाषाका पुस्तक अध्ययन गर्दै आफूमा निखारपन ल्याउन समेत उनीहरुले आग्रह गरे ।
कार्यक्रममा सङ्गमद्वारा संचालित पुष्पलाल स्मृति पुस्तकालयलाई साहित्यकार रमेश माेहन अधिकारीले विभिन्न लेखकमा पुस्तक समेत हस्तान्तरण गरेका थिए । वैद्य र मैनालीसहित ऋषिराम पोखरेललगायतलाई मायाको चिनो प्रदान गरिएको थियाे । सङ्गम अध्यक्ष डीबी बर्तौलाको सभाध्यक्षता भएकाे कार्यक्रममा सन्ध्यामा शैक्षिक व्यक्तित्व ऋषिराम पोख्रेल, ह्याग्रिव आचार्य, देबराज आचार्य, शान्ती प्रीयवन्दना लगायतकाे उपस्थिति रहेकाे थियाे ।
मकवानपुर । शहीद सप्ताह अन्तरगत मकवानपुरको हेटौंडामा भएको वक्तृत्वकलामा सपना बर्तौला प्रथम भएकी छिन् ।
मदन भण्डारी फाउन्डेसन मकवानपुरको ब्यबस्थापनमा शहीद स्मारक बिकास समितिले सहिद दिवसको अवसरमा शनिबार आयोजना गरेको वक्तृत्वकलामा हेटौंडा १९ की बर्तौला प्रथम भएकी हुन । यस्तै कार्यक्रममा हेटौंडा ५ कि आकाङ्क्षा निरौला द्वितीय, हेटौंडा ४ की दर्सना सापकोटा तृतीय भइन । हेटौंडा ९ की अभिप्सा पौडेलले सान्त्वना भइन ।
प्रतियोगितामा प्रथम, द्वितीय, तृतीय र सान्त्वना भइ उनीहरुले क्रमशः १० हजार, ७ हजार, ५ हजार र १ हजार नगद पुरस्कार प्राप्त गर्ने छन् । बक्त्तृवकलाका लागि १६ जनाले सहभागिता जनाएका थिए । घनश्याम घिमिरे, भावना सपकोटा र अमृत बर्तौलाको निर्णयकमा रहेका थिए ।
कार्यक्रममा बागमती प्रदेशका प्रथम मुख्यमन्त्री तथा शहीद स्मारक बिकास समितिका अध्यक्ष डोरमणि पौडेलले शहीदका सपना साकार पार्न सबैको भूमिका अपरिहार्य रहने बताए । शहीद र जननेता भण्डारीले देखाएको बाटोमा हामी हिड्न जरुरी रहेको भन्दै उनले राजनीति निषेध भन्दा पनि गलत नेतृत्वलाई निषेध गर्नुपर्ने बताए ।
कार्यक्रमका सहभागीहरुलाई शनिबार नै प्रमाणपत्र वितरण गरिएको थियो भने बिजेताहरुलाई माघ १५ गते पुरस्कारसहित प्रमाणपत्र बितरण गरिने आयोजकले जानकारी दिएको छ ।
मकवानपुर । मकवानपुरको हेटौंडामा शुक्रबार शैक्षिक मेला तथा सांस्कृतिक कार्यक्रम भएको छ । हेटौंडा उपमहानगरपालिका ४ नम्बर वडा कार्यालयको आयोजना तथा शैक्षिक गुणस्तर सुधार समिति हेटौंडा ४ को संयोजनमा दोस्रो शैक्षिक मेलासहित सास्कृतिक कार्यक्रम भएको हो ।
४ नम्बर वडाका सामुदायिक तथा संस्थागत गरी ८ वटा विद्यालयको मेलामा सहभागिता रहेको थियो । कार्यक्रममा विद्यार्थी, शिक्षक, अभिभावक, विभिन्न संघसंस्थाका प्रतिनिधि तथा सरोकारवालालगायत करिब १० हजार जनाले मेलाको अवलोकन गरेको वडा अध्यक्ष नवीन सिग्देलले बताए ।
मेलामा विज्ञान, गणित र सामाजिक विषयको प्रदर्शनी, नृत्य प्रतियोगिता, गायन प्रतियोगिता गरिएको थियो । जसमध्ये गणित प्रदर्शनीमा भुटन भुटनदेवी मावि प्रथम, श्रमिक मावि द्वितीय र आधुनिक राष्ट्रिय मावि तृतीय भएको छ । सामाजिक शैक्षिक प्रदर्शनी तर्फ आधुनिक राष्ट्रिय मावि प्रथम, ब्रम्हदिम एकेडेमी द्वितीय र श्रमिक मावि तृतीय भएका छन् ।
यसैगरी विज्ञान शैक्षिक प्रदर्शनी तर्फ भुटनदेवी मावि प्रथम, आधुनिक राष्ट्रिय मावि द्वितीय र सत्यम जेभियर्स मावि तृतीय भएको छ । यस्तै गायन तर्फ श्रमिक माविका अमन माझी प्रथम हुँदा ब्रम्हदिक एकेडेमीका दियान्सु बानियाँ द्वितीय र आधुनिक माविकी रञ्जिता सुनार तृतीय भइन । यस्तै सामुहिक नृत्य प्रतियोगिता तर्फ ब्रम्हदिक एकेडेमी प्रथम, श्रमिक मावि द्वितीय र भुटनदेवी मावि तृतीय भएको हो ।
प्रदर्शनी अन्तरगत नृत्य र शैक्षिक समाग्री प्रदर्शनीमा छुट्टाछुट्टै प्रतिस्पर्धा गराइएको थियो । नृत्य र शैक्षिक सामग्री प्रदर्शनीमा प्रथम हुने प्रत्येक समूहलाई १० /१० हजार नगदसहित सम्मानित गरिएको थियो । यसैगरी प्रतिस्पर्धाका विधागत प्रथम हुने सहयाेग शिक्षकलाई समेत ३ हजार नगदले सम्मान गरिएको छ । यसैगरी द्वितीय हुने प्रत्येक समूहले ७/७ हजार तथा द्वितीय हुने सहयाेग शिक्षकलाई २ हजार नगदद्वारा सम्मानित गरिएको आयाेजकले जानकारी दिएकाे छ । यस्तै तृतीय हुने प्रत्येक समूहले ५/५ हजार तथा तृतीय हुने सहयाेग शिक्षकलाई १ हजार नगदद्वारा सम्मानित गरिएको थियो ।
गायन तर्फ प्रथम स्थान प्राप्त गर्नेले ५ हजार, प्रथम सहयाेग शिक्षकलाई ३ हजार द्वितीय हुनेले ४ हजार द्वितीय सहयाेग शिक्षकले २ हजार तथा तृतीय हुनेले ३ हजार र सहयोग शिक्षकले १ नगद सहित प्रमाणपत्र प्राप्त गरेका छन् ।
शैक्षिक गुणस्तर सुधार अभियानमा निरन्तरता दिएपछी धेरै सुधार भएकाे अध्यक्ष सिग्देलले दावी गरे । ‘संस्थागत र सामुदायिक विद्यालयहरुबीच समन्वयन र प्रतिस्पर्धा दुबै हुनुपर्छ’ उनले भने ‘सरोकारवालाहरुले बजेट विनियोजनको पहिलो प्राथमिकता शिक्षालाई दिनुपर्छ ।’ अब वडाले वडा स्तरीय खेलकुद कार्यक्रम, जिल्ला स्तरीय शिक्षक भलिबल कार्यक्रम, इसीडी शैक्षिक सामग्री निर्माण तालिम, शिक्षक, विद्यार्थी तथा अभिभावक सम्मानलगायतका कार्यक्रमहरुको आयोजना गर्ने सिग्देलले जानकारी दिए ।
वडाभित्रका संस्थागत र सामुदायिक विद्यालयहरुबीच अझ बढी भाइचाराको सम्बन्ध स्थापित गर्ने विद्यार्थीकाे प्रतिभाकाे आदान प्रदानकाे उद्देश्यले कार्यक्रम गरिएको श्रमिक माविका प्रध्यानाध्यापक तथा शैक्षिक गुणस्तर सुधार समिति हेटौंडा–४ का अध्यक्ष श्रीराम दाहालले बताए ।
गतबर्ष पनि सामुदायिक तथा संस्थागत विद्यालयबीच प्रतिस्पर्धा, शैक्षिक अध्ययन तथा गुणस्तर सुधार एवम् विद्यार्थीको सिर्जनशील प्रतिभाको उजागर गर्ने उद्देश्यले ४ नम्बर वडा कार्यालयले शैक्षिक मेला आयोजनामा गरेको थियो ।
मकवानपुर । नेपाली कांग्रेसका नेता प्रकाशमान सिंहले जनताकाे अधिकार दिलाउन राजनीतिमा लागेकाे बताएका छन् । नेपाली काग्रेस स्थापना दिवसकाे अवसरमा बागमती प्रदेश समितिद्वारा शुक्रबार हेटौंडामा आयोजित कार्यक्रममा सिंहले राजनीतिलाई सेवाको रुपमा लिनुपर्ने बताए ।
कांग्रेस पूर्व महामन्त्री सिंहले राजनीतिमार्फत समाज र राष्ट्रको सेवामा ध्यान दिन सबैमा आग्रह गरेका हुन् । ‘पदमै पुगौला भनेर हामी राजनीतिमा आएका होइनौं ’ सिंहले भने-राजनीतिलाई सेवाको क्षेत्रको रुपमा स्थापित गराउन ध्यान दिनुपर्छ ।’ कांग्रेस पार्टीलाई लोकप्रिय पार्टीको रुपमा आजसम्म स्थापित गर्न आफ्ना पिता गणेशमान र अन्य नेताहरुको भूमिकालाई स्मरण गर्दै सिंहले भने ‘पार्टी र पार्टीबाट प्रतिनिधित्व गरेर बनेका जनप्रतिनिधिहरुले इमान्दारिताका साथ आफ्नो जिम्मेवारी निर्वाह गर्नुपर्छ ।’
सबैले आफ्नो जिम्मेवारी पूरा गरेमा सुशासनलाई अनुभुत गराउन सकिने उनकाे भनाइ थियाे । जनताको इच्छा आकांक्षा पूरा गर्न निस्वार्थ भावले काम गर्नुपर्ने नेता सिंहले बताए । विगतदेखि नै विभिन्न राजनीतिक परिवर्तनमा कांग्रेसले नेतृत्व गरेको भन्दै नेता सिंहले २०७२ को संविधान जारी गर्नसम्म नेतृत्वदायी भूमिका निर्वाह गरेको स्मरण गरे । कांग्रेसकै नेतृत्वमा प्राप्त भएको संविधानको रक्षाको लागि अहिले अन्य दलहरुसँग गठबन्धन गरेर अघि बढिरहेको भन्दै उनले वर्तमान सत्ता गठबन्धनलाई अझै बलियो बनाएर संविधान र लोकतन्त्रको रक्षा गर्नुपर्ने बताए।
नेपाली राष्ट्रिय कांग्रेसको पहिलो अधिवेशन भएको दिनको स्मरणमा स्थापना दिवस मनाउँदै आएको कांग्रेसले जहानियाँ राणा शासनको अन्त्य गर्दै प्रजातन्त्र स्थापनाको नेतृत्व गरेको थियो भने ७ दशकपछि गणतन्त्र स्थापनाको नेतृत्व गर्दै अहिले पनि संसद्को सबैभन्दा ठूलो दलकारुपमा रहेको छ । नेपालमा १०४ वर्षे राणा शासन फ्याँक्ने नेतृत्व गरेको कांग्रेसले ३० वर्षे एकदलीय निरंकुश पञ्चायती शासन व्यवस्थाको अन्त्य र २३८ वर्ष पुरानो शाहवंशीय राजतन्त्रको समेत अन्त्य गर्नेमा नेतृत्वदायी भूमिका निभाएको थियो ।
नेपाली कांग्रेस, बागमती प्रदेश समितिले शुक्रबार हेटौंडामा पार्टीको ७८ औँ स्थापना दिवस मनाएको छ । नेपाली राष्ट्रिय कांग्रेसको पहिलो अधिवेशन भएको २००३ साल माघ १२ लाई आधार मानेर हरेक वर्ष स्थापना दिवस मनाउँदै आएको छ । नेपाली कांग्रेस बागमती प्रदेश सभापति ईन्द्रबहादुर बानियाँको अध्यक्षतामा भएको कार्यक्रममा केन्द्रीय सदस्य राजन केसी, कांग्रेस बागमती प्रदेश संसदीय दलका नेता बहादुरसिंह लामा, नेकपा माओवादी केन्द्रका नेता सरल सहयात्री, कांग्रेस बागमती प्रदेश उपसभापति चन्द्र महर्जन, कांग्रेस मकवानपुर सभापति बुद्ध लामा, बिहीबार मात्रै बागमती प्रदेशमा गठबन्धनबाट राष्ट्रियसभा सदस्य निर्वाचित भएकाहरु जितजंग बस्नेत, विष्णुदेवी पुडासैनी, श्रीकृष्ण अधिकारी, घनश्याम रिजाललगायतले मन्तव्य व्यक्त गरेका थिए ।