मकवानपुर । जिल्ला प्रहरी कार्यालय मकवानपुरले विभिन्न स्थानमा चोरीको घटना संलग्न ९ जनालाई नियन्त्रणमा लिएको छ । ९ जना मध्ये १ जना ३ वटा घटनामा संलग्न रहेको प्रारम्भिक अनुसन्धानमा पत्ता लागेको प्रहरीले जनाएको छ ।
प्रहरीले विहीबार पत्रकार सम्मेलन गरी सार्वजनिक गरेको चोरीको श्रृखला १६ दिनअघिबाट सुरु भएको थियो । जसमा पहिलो घटना थियो नेपाल सरकारको पूर्ण स्वामित्वमा रहेको हेटौंडा सिमेन्ट उद्योगको तार चोरीको घटना । १७ दिनअघि चोरी भएको तार सहित जिल्ला प्रहरी कार्यालय मकवानपुरले ३ जनालाई नियन्त्रणमा लिएको हो ।
गत असोज २२ गते रातको समयमा चोरी भएको हेटौंडा सिमेन्ट उद्योगको झण्डै १० लाख रुपैयाँको तामाको तार सहित प्रहरीले ३ जनालाई नियन्त्रणमा लिएको हो ।
मकवानपुर हेटौडा उप महानगरपालिका वडा नं. ९ लामसुरे स्थित हेटौडा सिमेन्ट उद्योगको पश्चिम तर्फको रोपवेदेखी क्रसरसम्म जाने ६ ईन्च र ४ ईन्चको बिजुलीको तामाको तारहरु काटि चोरी भएको थियो ।
प्रहरी अनुसन्धानको क्रममा चोरी भएका तारहरुको बाहिरी खोलहरु उद्योग नजिक प्लटिङ गरेको जग्गामा फेला परेको थियो । प्रहरीले अनुसन्धानको क्रममा २२ असोजमा हेटौंडा १२ बनस्पती निवारी २२ वर्षिय मनिराम थोकरले सोही स्थानको हार्डवयर पसलबाट ह्याक्सो ब्लेड खरिद गरी लगेको जानकारी पाएपछि थोकरलाई निगरानीमा राखेको थियो ।
अनुसन्धानको क्रममा ७ कात्तिकमा मनिराज थोकरलाई नियन्त्रणमा लिएको थियो । थोकरका अनुसार हेटौंडा १३ बस्ने २८ वर्षिय सन्तबहादुर तितुङलगायत अन्य करीब ७ जना व्यक्तीहरु मिली उक्त बिजुलीको तारहरु चोरी गरी उद्योग नजिकै प्लटिङ गरेको जग्गमा ल्याई तारहरु छिलेर हेटौंडा ४ स्थित फरेष्टी गेट नजिक कवाडी पसलमा बेचेका थिए ।
पसल सञ्चालक भारतीय नागरिक, भारत मोतिहारी जिल्ला चिरैया थाना वडा नं. ७ बस्ने दिल खुश कुमार साहलाई बिक्री गरेको पाइएको प्रहरीले जनाएको छ ।
प्रहरीका अनुसार चोरीमा संलनहरु मनिराम थोकर, सन्त बहादुर तितुङ र कवाडी संचालक दिल खुश कुमार साहलाई नियन्त्रणमा लिई चोरी तथा डांका मुद्धा कसुरमा म्याद थप गर्ने कार्य भईरहेको छ । अन्य फारारहरुको खोजि भइरहेको प्रहरीले जनाएको छ ।
यसैगरी मकवानपुर प्रहरीले १०५ किलो ६९ ग्राम लागू औषध गांजा सहित १ जना पक्राउ गरेको छ । इलाका प्रहरी कार्यालय नेवारपानी मकवानपुरबाट खटिएको प्रहरी टोलीले जिल्ला मकवानपुर हेउमनपा वडा नं. १९ नेवारपानी स्थित पुर्व पश्चिम सडकखण्डको रजैया जाने जंगल छेउमा रोकी राखेको गाडीबाट गाँजा नियन्त्रणमा लिएको जनाएको छ ।
बागमती प्रदेश ०१–०२५ च ७८७१ नं. को योद्धा पिकअप गाडी र सो गाडी भित्र रहेका हेटौंडा वडा नं. ३ बसामाडी बस्ने २४ वर्षिय पन्चलाल थिङलाई नियन्त्रणमा लिइएको छ । गाडीमा ३ वटा बोरा भित्र रातो प्लाष्टिकले बेरिएको १० वटा पोकामा १०५ किलो ६९ ग्राम लागू औषध गाँजा फेला परेकोले थिङलाई नियन्त्रणमा लिई थप अनुसन्धान कार्य भईरहेको प्रहरीले जनाएको छ ।
यसैगरी कात्तिक ३ गते हेटौडा उमनपा वडा नं.८ कर्णावती मार्ग स्थित शिव गौतमको निर्माणाधिन घरबाट बिजुलीको तारहरु चोरी गर्ने ३ जनालाई प्रहरीले पक्राउ गरेको छ ।
प्रहरीले हेटौंडा ८ कमाने बस्ने २६ वर्षिय सुमन राई , २५ वर्षिय समिर घिमिरे र २४ वर्षिय सुशान्त श्रेष्ठलाई नियन्त्रणमा लिएको हो । मकवानपुर प्रहरीले नगद चोरीको गर्ने अर्को २ जनालाई नियन्त्रणमा लिएको छ । मकवानपुर हेटौडा उमनपा वडा नं.८ क्याम्पा स्थित हेटौडा फन भिल्लाबाट ६० हजार मुल्य बराबरको १ थान साउण्ड सिस्टम, र नगद २० हजार चोरी भएको घटनामा संलग्न १ जनालाई नियन्त्रणमा लिएको प्रहरीले पत्रकारसम्मेलनमा जानकारी दिइएको हो । प्रहरी प्रवक्ता श्यामु अर्याल अनुसार हेटौंडा ८ बस्ने २४ वर्षिय सुशान्त श्रेष्ठकै संग्नता रहेको प्रहरीले जनाएको छ।
यसैगरी कात्तिक ३ गते हेटौंडा २ बाट चोरी भएको मोटरसाइकल पनि शुसान्त श्रेष्ठको साथबाट नियन्त्रणमा लिइएको छ । ना ३ प ४७३ नं. को मोटरसाइकल हेटौंडा ८ बस्ने २४ वर्षिय सुशान्तकै साथबाट प्रहरीले नियन्त्रणमा लिएको हो ।
यसैगरी इलाका प्रहरी कार्यालय मकवानपुरगढि मकवानपुरबाट खटिएको प्रहरी टोलीले जिल्ला मकवानपुर मकवानपुरगढि गाउँपालिका २ शिखरकटेरी स्थित कान्तीलोक पथ सडकखण्डमा सवारी साधन रोकी चेकजाँच गर्ने क्रममा चोरीको समान सहित १ जनालाई नियन्त्रणमा लिइएको हो ।
प्रदेश २–०१–००३ प ६१०५ नं.को मोटरसाइकल चालक कञ्चनपुर जिल्ला बेलडी गाउँपालिका ३ घर भई हाल फाष्ट ट्रयाकमा वेल्डिङको काम गर्ने मिस्त्री २४ वर्षिय राजेश्वर चौधरी र निजको मामा राहुल चौधरीलाई लेनडांडाबाट ३७.२३ किलो सेतो धातुको बिजुलीको तार चोरी गरी हेटौडा तर्फ लैजादै गरेको अवस्थामा प्रहरीले नियन्त्रणमा लिएको हो । चौधरीद्वयमाथि प्रहरीले थप अनुसन्धान गरिरहेको बताएको छ ।
यस्तो थियो सिमेन्ट उद्योग तार चोरी प्रकरण
मकवानपुर । २३ कात्तिकमा उद्योगको तार चोरी भएपछि जिल्ला प्रहरी कार्यालय मकवानपुर र प्रमुख जिल्ला अधिकारी तीर्थराज चिलुवालको निर्देशनमा उद्योग प्रशासनले छानबिन समिति बनाएर काम
ग-यो ।
हेटौंडा–९ स्थित लामसुरेमा रहेको सरकारी स्वामित्वको उद्योगबाट असोज २२ गते राति करिब एक सय मिटर तामाको तार चोरी भएको थियो । उक्त विषयमा प्रहरी र प्रशासनले एक हप्तापछि जानकारी प्राप्त भएको जनाएको थियो । तर, घटनाको विषयमा प्रहरीकै कुरा बाझिएको भन्ने तिव्र आलोचनाका बीच प्रहरीले ३ जनालाई नियन्त्रणमा लिएको हो । तार चोरी भएको भोलिपल्ट बिहान उद्योगभित्र रहेको मन्त्रीको क्वार्टरका सुरक्षा गार्डले घटनाको विषयमा इलाका प्रहरी कार्यालय पशुपति नगरलाई जानकारी गराएको बताएको थियो ।
तर कार्यालय प्रमुख तथा प्रहरी निरीक्षक विमलाकुमारी कठायतले आफूहरुलाई खबर नभएको बताएपछि प्रहरीमाथि नै शंका गरिएको थियो ।
उद्योगभित्रै रहेको बागमती प्रदेशका मन्त्री क्वार्टरको सुरक्षार्थ खटिएका प्रहरी सहायक निरीक्षक शिवमंगल चौधरीले इलाका प्रहरी कार्यालय पशुपति नगरलाई घटनाको विषयमा जानकारी गराएका थिए । मकवानपुरका प्रहरी प्रमुख उपरीक्षक विश्वराज खड्काले मसिनो गरी गरिएको अनुसन्धानले प्रहरीलाई सफलता मिलेको बताए ।
प्रजिअ चिलुवालले सात दिनभित्रमा तार चोरी घटनाको प्रतिवेदन पेस गर्न उद्योग प्रशासनलाई निर्देशन दिएका थिए । उनले जिल्ला प्रशासन कार्यालयमा उद्योगका महाप्रबन्धक बसन्त पाण्डेलाई बोलाएर घटनाको विषयमा प्रतिवेदन तयार पार्न र प्रहरीलाई सहयोग गर्न निर्देशन दिएका थिए ।
गत जेष्ठमा मात्रै हेटौँडा सिमेन्ट उद्योग व्यवस्थापन समितिको अध्यक्ष पद सम्हालेका नरेन्द्र भण्डारी उद्योगको तार चोरीको घटना रहस्यमय भएको बताए । सुरक्षा गार्डले तत्काल खबर नगर्नु रहस्यको प्रमुख कारण भएको भण्डारीले बताएका थिए ।
मकवानपुर । बागमती प्रदेश मुख्यमन्त्री बहादुर सिंह लामाले नीति तथा योजना आयोगका उपाध्यक्ष गंगादत्त नेपालसँग कार्य सम्पादन करार सम्झौता गरेका छन् । मुख्यमन्त्री लामाले बुधबार उपाध्यक्ष नेपालसँग कार्यसम्पादन करार सम्झौता गरेका हुन् ।
प्रदेश नीति तथा योजना आयोग (गठन तथा कार्य सञ्चालन) आदेश २०७५ बमोजिम मुख्यमन्त्री लामाले चालु आर्थिक वर्ष २०८१/०८२ को वार्षिक स्वीकृत कार्यक्रमहरुको कार्य सम्पादनलाई प्रभावकारी र नतिजामुखी बनाउन आयोगका उपाध्यक्ष नेपालसंग कार्यसम्पादन सम्झौता गरे ।
सम्झौता अनुसार आयोगले वार्षिक स्वकीकृत कार्यक्रम सहित प्रभावकारी र उपलब्धीमुलक नयाँ तथा फरकशैलीको कार्यक्रम पनि गर्न निर्देशन गरिएको छ । मुख्यमन्त्री लामाले २६ भदौ २०८१ काे मन्त्रिपरिषद बैठकबाट नेपाललाई आयोगको उपाध्यक्षमा नियुक्त गरेका थिए ।
यसैबीच उपाध्यक्ष गंगादत्त नेपालसँग कार्यसम्पादन करार कार्यक्रममा मुख्मयन्त्री लामाले बजेट विनियोजन र योजना छनौटलाई प्रभावकारी बनाउने बताए । उनले प्रदेशमा आयोजना बैंक स्थापना गरेर प्रभावकारी कार्यान्वयनकाे लागि बजेट विनियोजन गर्ने तयारी भइरहेको जानकारी दिए । आयोजना बैंक स्थापना तथा संचालनलाई प्रभावकारी बनाउन उनले निर्देशन समेत दिए ।
मुख्यमन्त्री लामाले वार्षिक स्वीकृत कार्यक्रमका अलावा प्रदेश सरकारलाई आवश्यक तथ्यांक संकलन तथा सुझावहरु उपलब्ध गराएर नीति आयोगले प्रदेशको विकासमा महत्वपूर्ण भुमिका निर्वाह गर्नुपर्ने बताए । नयाँ र फरक ढंगका उत्पादन र रोजगारीमा केन्द्रीत हुने गरी आयोगले योजना निर्माण तथा बजेट विनियोजनमा सघाउन उनले आग्रह गरे ।
उनका अनुसार प्रदेश सरकार सिस्टम बनाउन सक्रिय रहेकाेले सरकारले तयार पारेको सिस्टम अनुसार नीति आयोगले नियमित काम गर्ने र प्रभावकारी योजना निर्माणमा अग्रसर हुनेछ ।
मकवानपुर । मकवानपुर प्रहरीले ज्यान मार्ने उद्योगमा फरार रहेका २ जनालाई हेटौंडाबाट पक्राउ गरेको छ ।
९ भदौ २०८१ मा हेटौंडा ९ मा रहेको नेपाल पास्ता फुड प्रालि संचालक बाबु कृष्ण प्रसाई र चित्र प्रसाईलाई कुटपिट गरी फरार रहेका ज्यान मार्ने उद्योगका प्रतिवादी हेटौडा १० बस्ने ४८ वर्षीय सानु भन्ने सानु कुमार लामा र हेटौंडा ८ बस्ने तोईसाङ लामा बललाई मंगलबार पक्राउ गरेको हो ।
खोजतलास गर्ने क्रममा ६ असोज राती हेटौंडा ४ बाट लामालाई र हेटौडा ८ बाट बललाई पक्राउ गरिएको जिल्ला प्रहरी कार्यालय मकवानपुरले जनाएको छ । प्रहरीका अनुसार पक्राउ परेका उनीहरुलाई मकावनपुर जिल्ला अदालतबाट ज्यान मार्ने उद्योग कसुरमा ५ दिनको म्याद थप गरी अनुसन्धान भई रहेको छ ।
मकवानपुर । पोलियो दिवसमा रोटरी क्लब अफ हेटौंडा र रोटरी क्लब अफ मकवानपुरले विविध कार्यक्रम गर्ने भएका छन् ।
मंगलबार हेटौंडामा पत्रकार भेटघाट दुवै राेटरी क्लबले संयुक्त रुपमा अक्टोबर २४ अर्थात कार्तिक ८ गतेकाे पोलियो दिवस विविध कार्यक्रमहरु आयोजना गरी मनाउन लागेको जनाएको हो । रोटरी क्लब अफ मकवानपुरका अध्यक्ष अनिल कुमार अग्रवालले कार्यक्रमको पहिलो दिन ७ कार्तिकमा हेटौंडामा अवस्थित संघसंस्था, होटलहरुमा पोलियो सम्बन्धी सुचनामुलक ब्यानर राखिने जानकारी दिए ।
त्यसैगरी दिवसको मुख्य दिन ८ कार्तिकमा विहान साईकल र्यालीको आयोजना गरिने छ । पोलियो उन्मूलन अभियानमा साथै दिऔ भन्दै हेटौंडा २ स्थित मकवानपुर उद्योग वाणिज्य संघको चोकबाट सुरु गरिने साईकल र्यालीले नगर परिक्रमा गर्ने अग्रवालले बताए ।
उक्त दिन हेटौंडाको सीमाचोकमा रहेको डिजिटल बोर्डबाट ‘इन्ड पोलियो नाउ’ लेखिएको जानकारीमुलक सूचना सामग्री प्रसारण गरिने छ भने बेलुकी हेटौंडाको बुद्धचोकमा दिप प्रज्वलन गरी कार्यक्रमको समापन हुने बताइएकाे छ।
मकवानपुर । मकवानपुरकाे हेटौंडा उपमहानगरपालिकामा फुटबलकाे पेनाल्टी सुटआउट प्रतियोगिता हुने भएको छ । हेटौडा ४ मा रहेकाे कर्रा युवा क्लबको आयोजना प्रतियाेगिता हुने भएकाे हाे ।
९ कार्तिकमा तिहार र छठ पर्वको अवसरमा शुभकामना आदान प्रदानसहित प्रथम संस्करणको खुल्ला पेनाल्टी सुटआउट प्रतियोगिता हुने क्लबले जनाएकाे छ । खेलाडीहरुबीच भातृत्व कायम गराउन, खेलको महत्वबारे बुझाउन प्रतियोगिताको आयोजना गर्न लागिएकाे हाे ।
हेटौंडा–४ स्थित हुप्रचौर मैदानमा हुने प्रतियोगिताको उपाधि विजेता टिमले ३० केजीको खसीसहित शिल्ड, मेडल तथा प्रमाणपत्र प्राप्त गर्नेछ भने उपविजेता टिमले २० केजीको खसीसहित शिल्ड, मेडल तथा प्रमाणपत्र प्राप्त गर्ने क्लबका संरक्षक निरज सिंह ठकुरीले जानकारी दिए ।
प्रतियोगितकाे लागि हालसम्म ८ वटा टिम दर्ता भइसकेका छन् । हेटौंडा फुटबल एकेडेमी ए, हेटौंडा फुटबल एकेडेमी बी, कमाने फुटबल एकेडेमी, एमआरसी हेटौंडा, आयोजक क्लब ए, आयोजक बी, रेड हाईट पदमपोखरी, भूटनदेवी क्लब, भुटनदेवी युवा क्लब, इन्टरनेट एफसी, प्रतिभा युवा क्लब गढी, हाँडीखोला युथ क्लबले दर्ता गरेकाे प्रतियाेगिता संयोजक रसिष मगरले बताए ।
प्रतियोगितामा सहभागिताकाे लागि ८ कार्तिकसम्म टिम दर्ता गराइसक्नुपर्ने बताइएकाे छ । उक्त मितिसम्म अन्य टिम समेत दर्ता हुन सक्ने आयोजकले जनाएकाे छ । दर्ता शुल्क २ हजार ५ सय रुपैयाँ ताेकिएकाे छ ।