मकवानपुर । नेकपा एमालेकाे ११ औं महाधिवेशन वन्दसत्र पहिले बसेकाे केन्द्रिय कमिटीकाे बैठकमा ३ जना शीर्ष नेताले सक्रिय राजनीति नगर्ने घोषणा गरेका छन् ।
नेतृत्वको रस्साकस्सी चलिरहेका बेला उनीहरुले अब कुनै पदमा उम्मेदवार नबन्ने समेत घोषणा गरेका छन् । तर उनीहरुले पार्टीको सदस्यता भने कायम राख्ने बताएका छन् । एमालेकाे सक्रिय राजनीति नगर्ने घोषणा गर्नेहरूमा उपाध्यक्षद्धय युवाराज ज्ञवाली र अष्टलक्ष्मी शाक्य तथा अनुशासन आयोग अध्यक्ष केशव बडाल छन् ।
नेकपा एमालेको ११औं महाधिवेशनमा सात दशक पार गरेका नेताहरूबिच नेतृत्वका लागि प्रतिस्पर्धा हुन लागेका बेला तीन नेताले स्वेच्छिक अवकाश रोजेर उदाहरण दिन खाेजेकाे बताइएकाे छ । उनीहरुले पार्टीलाई आफ्नो अनुभवको आधारमा योगदान गर्ने घोषणा समेत गरेका छन् ।
३०१ केन्द्रीय सदस्य निर्वाचित हुने
नेकपा (एमाले)को ११औँ महाधिवेशनमार्फत ३०१ केन्द्रीय सदस्य निर्वाचित हुने भएका छन् । एमालेले निर्माण गरेको संरचना अनुसार ३०१ जनाबाटै १९ पदाधिकारी पनि निर्वाचित हुने छन् ।
१९ जना पदाधिकारीमा अध्यक्ष १ जना, उपाध्यक्ष ५ जना, महासचिव १ जना, उपमहासचिव ३ जना र सचिव ९ जना निर्वाचित हुने भएका छन् ।
त्यस्तै उपत्यका सहितकाे ८ प्रदेशबाट नौ जनाका दरले ७२ जना केन्द्रीय सदस्य निर्वाचित भई प्रतिनिधित्व गर्नेछन् । जसमा प्रत्येक प्रदेशबाट खुलातर्फ ५ जना, महिला तर्फ ३ जना र युवा तर्फ १ जना निर्वाचित हुनेछन् । त्यस्तै खुलातर्फ १ सय २५ जना निर्वाचित हुने छन् । त्यसमध्ये खुला ७१ (सबैले प्रतिस्पर्धा गर्न पाउने), महिला ५२ जना र युवा २ जना हुनेछन् ।
जनजाति क्लस्टरबाट २५ जना निर्वाचित हुनेछन् । त्यसमा खुला १५ जना, महिला ८ जना र युवा २ जना रहनेछन् । यसैगरी मधेसी क्लस्टरबाट २० जना निर्वाचित हुनेछन् । जसमा खुला ११ जना, महिला ६ जना र युवा २ जना रहने छन् । त्यस्तै प्रवास तर्फ २ जना, श्रमिक तर्फ ३ जना, अपाङ्गता भएका व्यक्ति तर्फ १ जना, दलित तर्फ १२ जना, थारुतर्फ ८ जना र पिछडिएको क्षेत्र तर्फबाट २ जना निर्वाचित हुनेछन् ।
संरचनाअनुसार केन्द्रीय कमिटी
१) पदाधिकारी (१९ )जना
• अध्यक्ष : १ • उपाध्यक्ष : ५ • महासचिव : १ • उपमहासचिव : ३ • सचिव – ९ जना
२) प्रदेश प्रतिनिधित्व उपत्यकासहित सबै ८ प्रदेशबाट: ९x८ (७२) जना
• खुल्ला : ५ • महिला : ३ • युवा : १
३) खुल्ला कोटा (१२५ ) जना
• खुल्ला : ७१ • महिला : ५२ • युवा : २
४) जनजाति / आदिवासी ( २५) जना
• खुल्ला : १५ • महिला : ८ • युवा : २
५) मधेसी (१९) जना
• खुल्ला : ११ • महिला : ६ • युवा : २
६) प्रवास (२) जना
• भारत : १ • अन्य देश : १
७) श्रमिक (३) जना
• खुल्ला : २ • महिला : १
८) अपाङ्गाता भएका ब्यक्ति (१) जना
• खुल्ला : १
९) दलित (१२) जना
• खुल्ला : ७ • महिला : ४ • युवा : १
१०) थारु (८) जना
• खुल्ला : ५ • महिला : ३
११) मुस्लिम (५) जना
• खुल्ला : ४ • महिला : १
१२) थारु (८) जना
• खुल्ला : ५ • महिला : ३
१३) पिछडिएको क्षेत्र (२) जना
• खुल्ला : १ • महिला : १
१४) सम्पर्क समन्बय कमिटि (२) जना
• खुल्ला : १ • महिला : १
१ पुस बिहान ११ बजेदेखि मतदान कार्यक्रम
एमालेको जारी ११ औं महाधिवेशनकाे निर्वाचन कार्यतालिका सार्वजनिक गरिएकाे छ । तालिका अनुसार आइतबार बेलुकी मतदाता नामावली प्रकाशित र साेमबार बिहानदेखि निर्वाचनका अन्य प्रक्रिया थालिने छ । मंगलबार बिहान साढे १० बजेदेखि दिउँसो १ बजेसम्म उम्मेदवारी दरखास्तको समय छुट्ट्याइएको छ ।
पार्टीकाे नयाँ नेतृत्व चयनका लागि पुस १ गते मंगलबार बिहान ११ बजेदेखि साँझ ५ बजेसम्म मतदान गरिने कार्यक्रम कार्यतालिकामा उल्लेख गरिएकाे छ । मतदान विद्युतीय मेसिनबाट हुने पार्टीको केन्द्रीय निर्वाचन आयोगले जनाएको छ ।

मकवानपुर । मकवानपुर प्रहरीले ४ सय ७० किलाे लागूऔषध गाँजासहित बोलेरो गाडीलाई नियन्त्रणमा लिएको छ । भिमफेदी गाउँपालिका अन्तर्गतकाे कालिटार तथा नामटार क्षेत्रमा बिहीबार बिहान खटिएको प्रहरी टोलीले उक्त परिमाणकाे गाँजासहित बोलेरो नियन्त्रणमा लिएको हाे ।
गाँजा बिक्री भईरहेको सूचनाका आधारमा खटिएकाे प्रहरीले नामटारबाट भैसेतर्फ आउँदै गरेको बा १७ च ४२ नम्बरको बोलेरो पिकअपलाई रोक्न खोज्दा चालक गाडी लिएर भागेको जिल्ला प्रहरी कार्यालय मकवानपुरले जनाए जनाएकाे छ । उक्त गाडीलाई पछ्याउँदै जाँदा भिमफेदी–३ पान्द्राङस्थित ढुङ्गा खानीतर्फको भित्री बाटोमा लक गरिएको अवस्थामा फेला परेको प्रहरीले जनाएको छ ।
उक्त गाडीलाई चेक गर्दा ढालाबाट १७ बोरा भित्र ५० पोका रातो प्लास्टिकले बेरिएको अवस्थामा ४ क्विन्टल ७० किलो गाँजा फेला परेको जिल्ला प्रहरी कार्यालय मकवानपुरका प्रहरी निरीक्षक तथा निमित्त सुचना अघिकारी राजु प्रसाद कुर्मी जानकारी दिए । प्रहरीका अनुसार बरामद गाँजासहित गाडीलाई नियन्त्रणमा लिईएकाे छ भने चालकको खोजि भई रहेको छ ।
मकवानपुर । बागमती प्रदेशका मुख्यमन्त्री इन्द्र बहादुर बानियाँले राजनीतिक दललाई लामो समय बाहिर राखेर मुलुकमा स्थिरता ल्याउन नसकिने बताएका छन् । मुलुक राजनीतिक दलको नेतृत्वमा अघि बढ्नुपर्ने भन्दै उनले निर्धारित समयमै चुनाव सम्पन्न गरेर गैरदलीय सरकार विदा हुनुपर्ने बताएका छन् ।
सिन्धुली उद्योग वाणिज्य संघको ३५ औं साधारणसभालाई सम्बोधन गर्दै मुख्यमन्त्री बानियाँले उक्त कुरा बताएका हुन् । “मुलुकको संघीय सरकार लामो समयसम्म जनप्रतिनिधिविहीन हुनु हुँदैन। समयमै निर्वाचन गराएर गैरदलीय सरकार बाहिरिनु पर्छ” उनले भने । जनप्रतिनिधिमूलक सरकार नहुँदाकाे अवस्था हेटौंडाका व्यवसायीले भरखरै भोग्नु परेको उनले बताए । “जनताका प्रतिनिधिहरूको सरकार नहुँदा हेटौंडाका व्यवसायीमाथि प्रहार भयो । यसअघि पनि पटक पटक सडक भत्काउने प्रयास भएको थियो । जनप्रतिनिधिमूलक सरकार लखेटेर नागरिकको नाममा गठन भएको सरकारले समाधानको बाटो नखोजी के गर्यो सबैले देखेकै छौं” उनले भने ।
प्रदेश सरकार गरिब किसान, विपन्न नागरिकलाई केन्द्रमा राखेर अघि बढिरहेको बताउँदै उनले शिक्षालाई प्राविधिक सीप दिएर मुलुकमै रोजगार सिर्जना गराउन प्रयासरत रहेको बताए । प्रदेश सरकार निजी क्षेत्रसँग मिलेर काम गर्न तयार रहेको बताउँदै उनले आगामी बजेट निर्माणको काम अघि बढ्नु अघि नै प्रस्तावहरू ल्याउन निजी क्षेत्रलाई आग्रह समेत गरे ।
कांग्रेस मुख्यसचेतक श्याम घिमिरेले धारा ७६ बाहेक अन्य कुनै पनि धाराले प्रधानमन्त्री बन्न नसक्ने बताए । वर्तमान सरकार संवैधानिक रहेको भन्दै उनले संविधानको उल्लेखसमेत नगरी गरिएको प्रतिनिधिसभा विघटन पनि असंवैधानिक रहेको बताए । मुलुकमा व्यवसायिक वातावरण निर्माण हुन नसकेको भन्दै उनले प्रदेश व्यवसायीमैत्री वातावरण निर्माण गर्न प्रदेश सरकारलाई आग्रह गरे ।
नेपाली कम्युनिष्ट पार्टीका नेता राजन दाहालले दल कमजोर बनाएर मुलुकलाई द्वन्द्वमा होम्ने षडयन्त्र चलिरहेको बताए । “नेपाललाई युक्रेनजस्तो अवस्थामा पुर्याउन जिलेन्स्कीको खोजी भइरहेको छ । समाजमा द्वन्द्व भित्र्याउन प्रयास भइरहेको छ” उनले भने “मुलुकमा शान्तिसुरक्षाको अवस्था कमजोर छ। हतियार र अपराधी बाहिर राखेर कस्तो निर्वाचन होला ?” उनले जेनजी आन्दोलनपछि व्यवसायिक वातावरण थप बिथोलिएको भन्दै बाह्य लगानी भित्र्याउन पनि नयाँ परिस्थिति निर्माण आउनुपर्ने बताए । “जेनजीसमेतको सहमतिमा संविधान संशोधन गर्दै प्रत्यक्ष निर्वाचित कार्यकारीको निर्वाचनमा जानुपर्छ”उनले भने ।
विघटित प्रतिनिधिसभाकी सांसद तथा कांग्रेस सचेतक सुशीला थिङले अहिलेकाे सरकार असंवैधानिक रहेको बताइन् । उनले संसद् भंग गर्नु पनि असंवैधानिक भएको भन्दै त्यसैकारण संसद् पुनःस्थापना हुनुपर्छ भनेर आफूहरू अदालत गएको बताइन् । “समाजमा भाइरल प्रवृत्ति छ, त्यसले समाजलाई ठीक ठाउँमा पुर्याउँदैन । समाज र मुलुक थप दुर्घटनामा जान सक्छ” उनले भनिन् “जसले जे काम गर्ने हो, त्यही नगर्दा अहिले समस्या आएको हो ।”
प्रदेशकाे विशेष प्राथमिकता स्वास्थ्यमा
मुख्यमन्त्री बानियाँले स्वास्थ्यमा नागरिकको सहज पहुँच प्रदेश सरकारको विशेष प्राथमिकता रहेको बताएका छन् । सिन्धुलीको तीनपाटन गाउँपालिकामा नवनिर्मित नगर अस्पताल भवन उद्घाटन गर्दै मुख्यमन्त्री बानियाँले शिक्षा, स्वास्थ्यजस्ता विषयलाई संविधानले नै नागरिकका मौलिक अधिकारको रूपमा ग्यारन्टी गरेको भन्दै उनले प्रदेश सरकार मौलिक अधिकारलाई व्यवहारिक रूपमा कार्यान्वयन गर्न तत्पर रहेको बताए ।
“रोगमुक्त समाज, निरोगी नागरिक बनाउन प्रदेश सरकारले काम गरिरहेको छ” मुख्यमन्त्रीले भने । गणतन्त्र गरिबको व्यवस्था भएकाेले युवा शक्तिलाई प्रविधिमैत्री बनाउँदै रोजगारी सिर्जना गरिने उनले बताए । मुलुकभित्रै केही भएन भन्दै असन्तोष बढिरहेकाेमा मुख्यमन्त्री बानियाँले त्यसलाई चिर्दै भइरहेका विकासका कामलाई नागरिकसमक्ष पुर्याउन लागिपर्नु पर्ने बताए । विकासका पूर्वाधारसँगै नागरिकलाई अर्थोपार्जन गर्ने सीप विकास र लगानीसमेत दिनुपर्ने काममा प्रदेश सरकार लागि परेको बताए । उनीहरूलाई सीप र पूँजीको व्यवस्थासमेत गरिदिनुपर्ने हुन्छ हामी त्यसतर्फ अग्रसर छन्,’ मुख्यमन्त्रीले भने ।
मुख्यमन्त्री इन्द्र बानियाँले कर्मचारी संयन्त्रले नागरिकलाई केन्द्रमा राखेर सेवा दिनुपर्ने बताए । सिन्धुलीको तीनपाटन गाउँपालिकामास्थित स्वास्थ्य, शिक्षा, प्रशासनलगायतका सेवाका कर्मचारीलाई निर्देशन दिँदै मुख्यमन्त्री बानियाँले भने “नागरिकले सेवा पाए मात्र प्रदेश सरकारप्रति विश्वास आर्जन हुनेछ ।” ‘नागरिकलाई कुनै पनि सेवा पाउन कठिनाइ नहोस्, इमान्दारीपूर्वक सेवा दिनुहोला,’ उनले भने, कर्मचारीका समस्या भए हामी समाधान गर्छौं, कर्मचारी साथीहरूले पनि डेलिभरीमा पूर्ण योगदान गर्नुस् । त्यसपछि मात्र हामीले प्रदेश सरकारको महत्व स्थापित गर्न सक्छौं ।’
तीनपाटन गाउँपालिकाका अध्यक्ष कर्ण थापा मगरले सीमित स्रोतसाधनबीच पनि विकासका पूर्वाधार निर्माणलाई पालिकाले पहिलो प्राथमिकता दिएको बताए । पूर्वाधार विकाससँगै नागरिकलाई सीप विकासमा पनि ध्यान दिइएको अध्यक्षको भनाइ छ । नागरिकको आर्थिक समृद्धिका लागि पालिका भित्र कृषि, पशुपालन जस्ता क्षेत्र पहिचान गरी कार्यक्रम लागू गराइएको बनाए ।
करिब १२ करोड रूपैयाँको लगानीमा नगर अस्पताल भवन निर्माण भएको हो । कार्यक्रममा विघटित प्रतिनिधिसभा सदस्य श्याम घिमिरे, संविधानसभा सदस्य मोहन बराल, नेपाली कांग्रेस सिन्धुलीका पूर्वसभापति उज्वल बराल लगायत सहभागी थिए ।
मकवानपुर । आगामी फागुन २१ गतेका लागि तोकिएकाे प्रतिनिधि सभा निर्वाचनका लागि प्रारम्भिक मतदाता नामावली सार्वजनिक भएकाे छ । निर्वाचन आयोगले गत मंसिर ५ गतेसम्म मतदाता नामावलीमा नाम दर्ता गराएका मतदाताको नामसमेत समेटेर १ करोड ९० लाख भन्दा बढी मतदाताको प्रारम्भिक नामावली सार्वजनिक गरेको हो ।
प्रारम्भिक नामावली सार्वजनिक गरेसँगै आयोगले मतदाता नामावली अद्यावधिक प्रक्रिया सुरु गरेको छ । आयोगको शनिबारको निर्णय अनुसार आगामी फागुन २० गतेसम्म १८ वर्ष पूरा हुने सबै नेपाली नागरिकलाई मतदाता नामावली अद्यावधिक गर्न पाइने व्यवस्था गरिएको हो । आयोगले मंसिर ५ गतेसम्म देशभरबाट संकलित मतदाता विवरणलाई आधार मानेर अद्यावधिक प्रक्रिया सञ्चालन गर्ने निर्णय गरेको आयोगका सहसचिव एवम प्रवक्ता नारायणप्रसाद भट्टराईले जानकारी दिए ।
जसमा मतदाता नामावली अद्यावधिक अर्थात दाबी विरोध कार्यक्रमअनुसार आयोगको वेबसाइटमा रहेको विवरण प्रकाशन भएपछि मतदाताले मंसिर २६ गतेसम्म मतदाता नामावली अध्यावधिक गर्न पाउनेछन् । जसमा नाम, थर, जन्ममिति, ठेगाना लगायत त्रुटि सच्याउन निवेदन दिन सक्ने, कसैले झुटा विवरण दिएर नाम दर्ता गराएको भए विरोधमा उजुरी दिन सक्ने, नाम दुई वा बढी स्थानमा दोहोरिएको भए एक स्थानमा मात्र राख्न माग गर्न सक्ने, मृत्यु भएका वा नागरिकता त्याग गरेका व्यक्तिको नाम हटाउन सूचना दिन सक्ने आयोगले जनाएको छ ।
दाबी–विरोधबाट प्राप्त निवेदनको अन्तिम छानबिनपछि अन्तिम मतदाता नामावली प्रकाशित गरिनेछ । यस्तै आयोगले केही मतदानस्थल पुनरावलोकन गरेको र मतदाताले अब आफूलाई पायक पर्ने मतदान स्थल छनोट गर्न सक्ने सुविधा उपलब्ध गराएको छ । त्यसका लागि अनलाइन प्रणालीबाट वा प्रदेश तथा जिल्ला निर्वाचन कार्यालयमार्फत निवेदन दिन सकिने छ । आयोगले समयमै नामावली अद्यावधिक गर्न सके फागुन २१ को निर्वाचन व्यवस्थित र विश्वसनीय हुने विश्वास व्यक्त गरेको छ ।
मकवानपुर । बागमती प्रदेश सभाका पूर्व सदस्य ओमबहादुर ग्लानले माओवादी केन्द्रको सदस्यता त्यागेका छन् । प्रदिप वालाचन उपनाम रहेकाे उनले सोमबार एक विज्ञप्ति जारी गर्दै पार्टीको सम्पूर्ण जिम्मेवारीबाट अलग भई स्वतन्त्र रहने घोषणा गरेका हुन् ।
मकवानपुर राक्सिराङका ग्लान २०७४ मा माओवादी केन्द्रको समानुपातिक सूचीबाट बागमती प्रदेशसभा सदस्य भएका थिए । माओवादीले संचालन गरेकाे सशस्त्र द्वन्द्वमा सहभागी ग्लानले नेपालको ऐतिहासिक जनक्रान्ति र जनयुद्धमा सहभागी भएर योगदान गर्न पाएकोमा आफूले गर्व महसुस गरेको बताए । जनयुद्धपश्चात् निरन्तर बाध्यात्मक जिम्मेवारी लिएर अघि बढे पनि पछिल्लो समय आफ्नै व्यावहारिक कारणले लामो समयदेखि सक्रिय भूमिका निर्वाह गर्न नसकेकोले कारणले पार्टीलाई असहज नहोस् भन्ने उद्देश्यले नैतिकताको आधारमा सोही दलको कुनै पनि जिम्मेवारीमा नरहने निर्णय गरेको उनले बताए ।
‘विगतको योगदान र इतिहास प्रति गर्व गर्दै मूल नेतृत्व, नेता तथा कार्यकर्ता र जनतामा आभार प्रकट सहित फरक ढङ्गको यात्रा र सम्बन्धमा जोडिने विश्वासका साथ पार्टीलाई मेरो कारण असहज नहोस् भन्ने हेतुले नैतिकताको आधारमा आजैको मितिबाट सोही दलको कुनै पनि जिम्मेवारीमा नरहने गरी स्वतन्त्र रहेको जानकारी गराउँदछु’ उनले विज्ञप्तिमा भनेका छन् ।