मकवानपुर । मकवानपुरको बागमतीमा जारी चौथो बागमती गोल्डकप फुटबल प्रतियोगितामा सोमबार भएको खेलमा अफ्रिकन रूट एसाेसिएसन क्यामरुनले विर्तामोड युनाइटेड झापालाई ४ – १ गाेल अन्तरले हराउँदै विजयी भएको छ
पहिलाे हाफकाे शुरुवाती समय देखिनै झापालाइ दबाबमा राखेको खेलमा क्यामरुनका तर्फबाट जर्सी नम्बर १३ का खेलाडी बेस्सेकले खेलको १९ औं र ३३ औं मिनेटमा दुई गोल गर्दै टिमलाई अगाडि बढाएका थिए ।
पहिलो हाफमा २–० को अग्रता लिएको क्यामरुनले दोस्रो हाफमा जर्सी नम्बर ७ का एल्जिमीले खेलको ५३ औं मिनेटमा र जर्सी नम्बर १५ का म्बाकोपीले ६५ औं मिनेटमा थप २ गोल गर्दै सानदार जीत दिलाए थिए । खेलको दोस्रो हाफको अन्तिम ८६ औं मिनेटमा झापाको तर्फबाट जर्सी नम्बर १ का सुनिल गुरुङले १ गोल गरेका थिए । सो गोल नै झापाको लागि अन्तिम गोल रह्यो ।
खेलको म्यान अफ दि म्याच क्यामरुनका जर्सी नम्बर १३ का बेस्सेक घोषित भएका छन् । उनले पुरस्कार स्वरुप नगद ५ हजार समेत प्राप्त गरे । प्रतियोगिता अन्तरगत भाेली १७ गते मंगलबार हिमालयन शेर्पा क्लब काठमाडौ र बागमती युवा क्लब सर्लाही बीच खेल हुने आयोजकले जनाएको छ ।

खेलकुद स्वास्थ्यका लागि खेलकुद राष्ट्रका लागि भन्ने नाराका साथ संचालित प्रतियोगिताको फाइनल खेल चैत्र २३ गते हुनेछ । प्रतियोगितामा प्रथम हुनेलाई ८ लाख, द्वितीय हुनेलाई ४ लाख, सर्वोत्कृष्ट खेलाडीलाई ५१ हजार, बिधागत उत्कृष्ट खेलाडीलाई प्रतिखेलडी १०/१० हजार, म्यान अफ दि म्याचलाई प्रती खेलाडी ५/५ हजार प्रदान गरिने छ ।
प्रतियाेगितामा बागमती खेलकुद विकास समिति, नव जनजागृती युवा क्लब सिमरा, थ्रि स्टार क्लब, मकवानपुर–११, एपीएफ क्लब, हिमालयन शेर्पा क्लब, जाउलाखेल युथ क्लब, बागमती युवा क्लब सर्लाही, विर्तामोड युनाईटेड र अफ्रिकन रुट् एसोसिएसन, क्याम्रुन सहभागीता जनाएका छन ।
यस अघी भएकाे पहिलो बागमती गोल्ड कप को उपाधी हरिहरपुर गाउँपालिका, सिन्धुली तथा दोस्रो र तेस्रो बागमती गोल्ड कपको उपाधी सरस्वती क्लब काठमाडौं ले पोल्टामा पारेका थिए ।
मकवानपुर । २०७६ सालको संविधान दिवस असाेज ३ गते घोषणा भएकाे विभूषणहरुमध्ये ९ वटा मानपदवी चैत २७ गते प्रदान गरिने भएको छ । शीतल निवासमा आयोजना हुने विशेष समारोहमा राष्ट्रपति विद्यादेवी भण्डारीले मानपदवीहरु प्रदान गर्ने कार्यक्रम रहेकाे छ ।
गृह मन्त्रालयले साेमबार सूचना जारी गरी महाउज्ज्वल राष्टदीप, सुप्रसिद्ध प्रवल जनसेवाश्री, उज्ज्वल किर्तीमय राष्टदीप, प्रसिद्ध प्रवल जनसेवाश्री, सुकिर्तीमय राष्टदीप, सुप्रवल जनसेवाश्री, किर्तीमय राष्टदीप, प्रवल जनसेवाश्री, जनसेवाश्री प्रदान गरिने कार्यक्रम चैत २७ गते रहेकाेले राष्टपति कार्यालयमा उपस्थित हुन जानकारी गराएकाे छ । अलंकार र पदकहरु भने सम्बन्धित विभागीय प्रमुखहरुले प्रदान गरिने भएकाे छ ।
गृहमन्त्रालयले औपचारिक पोशाक लगाएर सुशोभन समारोहमा सहभागी हुन सम्बन्धित महानुभावहरुलाई सूचित गरेको छ । गृहमन्त्रालयले कालो वा खरानी रंगको कोट, चोलो सारी/लवेदा, सेतो सुरुवाल, कालो भादगाउँले टोपी र छालाको कालो रंगको जुत्ता लगाउन भनेको छ ।
हिमाल, पहाड, तराई मधेसमा लगाइने आ-आफ्नो परम्परा र संस्कृतिअनुसारको जातजाति, भाषा, धर्म र संस्कृति झल्काउने नेपाली पोशाक पनि लगाउन सकिने गृहमन्त्रालयले जारी गरेको सूचनामा उल्लेख छ । यसैगरी नेपाली सेना, नेपाल प्रहरी र सशस्त्र प्रहरी बल तर्फकालाई ट्युनिक, एक्युलेट, ग्याठ बुट लगाउन आग्रह गरिएको छ ।
गृह मन्त्रालयको विभूषण शाखाले कोरोना संक्रमणको जोखिमका कारण वितरण हुन नसकेको मानपदवी, अलंकार तथा पदकहरु वितरण आगामी चैत २७ गते हुन लागेको बताएकाे छ । २०७७ वैशाख १ गते सुशोभन समारोह हुनुपर्नेमा २०७६ चैत ११ गतेबाट लकडाउन भएकोले चैत २७ गते गर्न लागिएको गृह मन्त्रालयले जनाएकाे छ ।

मकवानपुर । त्रिदेशीय कप फुटबल अन्तर्गत आज नेपाल र बंगलादेश फाइनलमा भिड्दैछन् । नेपालले कीर्गिस्तानको यू-२३ र बंगलादेश गरि दुवै टिमसँग गोलरहित बराबरी खेल्दै फाइनलमा स्थान बनाएको हो ।
त्यस्तै नेपालसँग बराबरी खेलेको बंगलादेशले कीर्गिस्तान यू-२३ लाई भने १-० गोलले पराजित गरेको थियो । त्रिपुरेश्वरस्थित दशरथ रङ्गशालामा साँझ साढे ५ बजे फाइनल खेल हुने छ ।
यसै बीच प्रधानमन्त्री केपी शर्मा ओली आज दशरथ रंगशाला जाने भएका छन् । नेपाल र बंगलादेशबीच हुने त्रिदेशीय कप फुटबलअन्तर्गत फाइनल खेल हेर्न प्रधानमन्त्री ओली दशरथ रंगशाला जान लागेका हुन् ।
- कविता शर्मा गोर्खाली
१. मर्यादा
भो अब आकाश चुम्न मन छैन
बिस्तारै नाघ्छु खुड्किलाहरू
उचाल्लिने छैन अरुको बोकाइमा
जहाँ स्वार्थका भर्याङ ओछ्याइन्छ
पुंगो अल्झाए झैं अल्झाइन्छ वाचाले
त्यहाँ प्रतिस्पर्धा फगत ऊचाइको
जहाँ अरुकै हातमा हुन्छ रिमोट्
उचाल्ने पछार्ने अथवा जहाँको त्यही
निश्चित छ हार उसैको
जस्ले बाँधेको छ ज्ञानका बिटाहरू
कठोर परिश्रमको जुइना
माऊ योग्य छ प्रशंसाको
तर पनि घँचेड़िन्छ मैदानबाट
पराजित खेलाड़ी झैं सधै सधै उ
अन्तरीक्षको चम्किलो तारा
मात्रै चम्किदिने गर्छ
देखेको छैन धर्साहरु कुनै हत्केलाको
जुनकीरीको झैँ तर यता त
कागलाई बकुल्लो बनाउने होड़ छ
हानाथापी र लुटपाट बिच बजारमा
सडक सडकमा एता उता
जताततै धेरै को मन जित्न सफल छ
आजकाग कलाकार हास्यको
जहाँ अनादि देखि चलि आएको छ
र चलिनै रहने छ प्रक्रिया दोहोरी
को लिने अथवा दिने जस्तो
आइतबारे बजारमा चारखुट्टे
आदिम मानिसको नृत्य
मूक रमिते छ्न चारै तर्फ गन्थन
एक अर्कामा कानेखुसी कस्तो अचम्म
बाँदरको हातमा नरिवल
तव त मन छैन चङ्गा बन्न
खुला आकाश पाए तापनि
नचाउने अर्कै न हो
अकास तर्फ छ मुन्टो
आज सोच्दैछु माटो खेलाउदै
खुड्किला बनाउन छ अलि दरो
जहाँबाट न पच्छारियोस न निमोठियोस
न खोसियोस
मर्यादा एक मुनासिबको ।
२. मन भित्रको मनको सग्लो ऐना हेर्दै
यमको अनिश्चित निम्तोको पखाईमा बाँचेको म
आँफैलाई चेताउनी दिने क्रममा
प्रस्तुत रहनुपर्दाको दोसाँझमा
उभिएर अन्तिम समय गन्दैछु ।
गलत हुन्छ कसैलाई दिँदा उपहार पीडाको
खुसी कसैको डुबाइँदिँदा भेलमा आँशुको
निधो नभएको जीवन डोहोर्याइरहेको हुँदा
अहंको अस्तित्व नै मास्सिन्छ
त्यसैले आफ्नो खुसीमा बाँचेको जिन्दगीले
स्वतन्त्र सत्तामा विलीन हुन चाहन्छ
पाउनु नपाउनुको टोप्लो
वेदनाको डोरीले कस्सेर बाँध्नुहुन्न
कुनै अफसोस नगरी।
अचेल मनभित्र झुण्डिएको
मनको ऐनाले साउती मार्छ
यस्तै भावना चिहाउँछ हृदयमा
अनि झस्किन्छु स्वत:झस्किए पनि
विचार्छु फेरी चाख्न खोज्छु
त्यो ऐनामा दलिएको सत्य अनुभूति।
ऐनासितको आत्मियतामा
शंका उब्जिएको छ
किनकिम अगडी उभिँदा त्यो ऐनाले
मलाई नदेखाएर मेरो अनुहारभित्र
सन्देहको सीमा बेरिएको
नकल प्रतिलिपि देखाउन खोज्छ
छाला कपास उस्ताउस्तै।
मेरा अप्ठ्यारा समयमा
मेरा समयले मलाई गिज्याउँछ।
पदध्वनीको गुन्जनमा शून्य अस्तित्व बोक्ने
एउटा अपरिपक्क म देख्छु आँफै
घरको आँगन निस्कँदा
अनगन्ती असीम यात्रामा निस्किएझैँ
अनुभूत हुने गर्छ अचेल।
तेसैले म पनि उभिन थालेको छु
अचेल मन भित्रको सग्लो ऐना अघि
उसले देखाएको बाटो पहिल्याउन थालेको छु
कर्तव्य र दायित्वको संज्ञा भित्र
रुमलिँदै हाँस्ने र हँसाउने संकल्पमा
तत्पर बनेको छु यमको स्वागतमा
समयको निम्तो पर्खिँदै।
बँगैगाउँ गुहावटी अासाम

रङ्गको पर्व होलि आयो रङ्ग छरेर आयो
हर्ष उल्लासका साथ उमङ्ग भरेर आयो
आउ साथी रमाउँ आपसमा वैरभाव त्यागेर
हाम्रो मित्रभावमा फेरि दङ्ग परेर आयो ।
काठमाडाैं

लौ आयो साथि रङ हरु को पर्ब होली
खेलौ रमाउ मिलेर खाइ भाङको गोली
रिस राग सब छाडि सदभाब बढाउ
न दुखाउ मन कसैको बोलेर तितो बोली।
काठमाडौ

रिस द्वेष छोडी मिठो बोलेर होलि मनाऔ
उमंग साथ हृदय खाेलेर हाेलि मनाऔं
हातमाथि हात राखेर रङ मिसाए जस्तै
मनमा प्रेम सद्भाव घाेलेर हाेलि मनाऔं।
काठमडाैं

मनको ढोका खोली खेल्ने मन छ
माया नै माया घोली खेल्ने मन छ
रङ्गहरूको चाड यो फागु पूर्णिमामा
प्रिय मान्छेसँग होली खेल्ने मन छ ।
काभ्रेपलाञ्चाेक, पाँचखाल

अचेल साथीसंगी भेला भै खेल्न मिल्दैन रङ्गको होली
दिन दशाले घुमाएर सवै जनाको बिग्रेको छ बोली
शत्रुताको भाव त्याग्ने सुनौलो अबसर फागुपुर्णिामा रे
तर निस्कनै मिल्दैन कोरोनाको बिग्बिगि छ आजभोली ।
काठमाडाै

बर्सोस अनगिनत खुशी सबैको झोलीमा
बितोस जीवन सबैको हाॅसो र ठिठोलिमा
लगाउॅ रंग मद-मस्त भई होलिको खुशीमा,
नछुटोस यो प्रेम रंग रहोस अर्को होलीमा।
आसाम भारत

रङ्गको पर्वले निम्तो गरेछ ,राम्रो नै भयो
माया प्रेम सदभाव छरेछ , राम्रो नै भयो
समाजमा रहेको रिषराग द्वेश बैमश्यता
होलिकै कारण केही टरेछ राम्रो नै भयो ।
ललितपुर

१.
सातौं रङ्गको पर्वमा शुभकामना
हेर्दै दङ्गको पर्वमा शुभकामना
असत्य माथि सत्यको विजय हुँदा
मान्दै उमङ्गको पर्वमा शुभकामना ।’
२.
मनको कालो हटाएर रङ्ग घोली खेलौं सबै
एक आपसमा रमाएर मिठो बोली खेलौं सबै
सद्भाव र संस्कृति लाई मनमा सजाएर,
समानताको माला गाँस्दै होली खेलौं सबै ।
काठमाडाैं

आज भन्दा भोली राम्रो
रंग खेल्नलाई होली राम्रो
आनीबानी गुणकारी होस
सभ्य सिष्ट बोली राम्रो ।
धरान

आजै हो जिन्दगी थाहै छैन भोलिको
चित्त शुद्ध राखौं त्यो सङ्लो खोलीको
सव्य, भव्य र सुरक्षित भएर खेलौं,
सबै नेपालीमा शुभकामना छ होलीको ।
माेरङ

रम्नु रमाउन पर्छ भनी आपसमा पर्व बनेर आउँदामा
मिली खेल्ने रङको पर्वमा न मन रमायो यो छाउँदामा
राम्रोको कामना गरौ दुख हट्छ र खेलौला सबैमा भन्दै
खुशी छ होली हो भन्दै शुभकनमना जनाउन पाउँदामा।
रूपन्देही

१.
रङ्गीन बनोस् जिन्दगी, खुसीमा मुस्कान भर्दै ओठहरू
टेकेर नलत्यियोस् , मायाले सजिएका रङ्गीन डोबहरु
रङ्गहरू जीवनका खुसी हुन्, पर्यायहुन् उमङ्गका
दुःखका आँसु झार्न नपरोस् पुरा हुन् मनका अठोटहरू।
२.
मानवीय हार्दिकताको स्नेही रङ्ग मिसाएर
दिनचर्याका गरुङ्गो भारी कहिँ अन्तै बिसाएर
बचाऔं संस्कृति, भित्र्याउनु हुन्न कुनै विकृति
सकेसम्म रङ्गमा उमङ्ग भरौं कसैसँग नरिसाएर।
बिराटनगर

रंङ्गहरुको पर्व यो हो है रमाइलो होली
रङ्गाउनु छ मन पनि , हैन केवल चोली
सबैमा हार्दिक शुभकामना, तर यो बर्ष
भिडभाड नगरी मनाउनुस दिल खोली।
तनहुँ

पानीझैँ सलल बगेर यताउति जान पाए
सबैका दु:ख फ्याँक्नलै कतै लान पाए
कति सुन्दर हुन्थ्यो मानव जीवन र सृष्टि
खुसीका रङ्ग धस्न र मिठा फल खान पाए !
काठमाडाैं पुरानो बानेश्वर

जीवन सधैँ रङ्गीन बनाई बाँच्न सक्नु पर्छ
दुख पिडा सबै हटाई हाँस्न सक्नु पर्छ
सकारात्मक सोच्ने गरौं खुशी आफैँ मिल्छ
नकारात्मक दाग सबै माँस्न सक्नु पर्छ ।
पाल्पा

प्रशासन भन्दैछ, हाेली नखेल्नु, काेराेना सर्न सक्छ
भाङ खानेहरु भन्ने गर्छन् हेराैन कस्ले के नै गर्न सक्छ
हुईकिदा बिना हेल्मेट, चार सवारी एउटै बाईकमा,
बाँचिहाले जिन्दगी, दाँत दुईचार अवस्य झर्न सक्छ।
दमक, झापा

ईन्द्रेणीको सातौं रंगको एकता उपहार तिमीलाई
भ्रष्टाचार निवारण उपायको उपचार तिमीलाई
सम्पूर्णका आशीर्वाद,शुभेच्छाले प्रगति पथ लम्कनु
बुद्ध हितोपदेश सदोगुणका उपकार तिमीलाई।
ललितपुर, हाल अमेरिका
हामीले हाेली विशेष मुक्तक सम्वन्धित स्रष्टाहरूकाे फेसबुक मार्फत साभार गरेका हाैं ।