मकवानपुर / मकवानपुर जिल्ला भिमफेदी गाउँपालिका वडा ७ मा भरुवा बन्दुक पड्कदा एक जना घाइते भएका छन् । वडा ७ कोगटे बस्ने २८ वर्षीय गगनबहादुर सिंजाली घाइते भएका हुन् ।
सोही स्थानको भालेडाँडा सामुदायिक वनमा बाख्रा चराउन गएकोमा उनी घाईते भएको जिल्ला प्रहरी कार्यालय मकवानपुरले जनाएको छ । सिंजालीलाई घाइते अवस्थाबाट उद्वार गरी आफन्तले हेटौडा अस्पताल ल्याएको प्रहरीले जनाएको छ । सिंजालीको दाहिने साईडमा कम्मरको भागमा लागेको चोट गोली लागेको जस्तो देखिएपछि प्रहरीले घटना स्थलमा अनुसन्धान गरेको थियो ।
जिल्ला प्रहरी कार्यालय मकवानपुरबाट खटिएको प्रहरीले प्रारम्भिक अनुसन्धान गर्दा घाईते गगन बहादुर सिंजालीले आफैले बोकेको अवैध भरुवा बन्दुक पड्कन गई घाईते भएको खुल्न आएको प्रहरी नायव उपरीक्ष जयश्वर रिमालले बताए ।
घटना स्थलबाट भरुवा बन्दुक थान १ समेत बरामद गरिएको तथा घाईतेको हाल प्रहरीको निगरानीमा उपचार भईरहेको घटना बारे थप अनुसन्धान भईरहेको रिमालले बताए ।
मकवानपुर । प्रधानमन्त्री केपी शर्मा ओलीले प्रतिनिधिसभामा साेमबार विश्वासको मत पाउन सकेनन् । प्रधानमन्त्रीले आफूलाई सरकार सञ्चालनमा कठिनाइ भएपछि नेपालको संविधानको धारा १०० को उपधारा (१) बमोजिम प्रतिनिधिसभामा विश्वासको मत लिन प्रस्ताव राखेका थिए ।
विश्वासको मतकाे पक्षमा ९३ सांसदले र विपक्षमा १ सय २४ जना सांसदले मतदान गरेका थिए भने तटस्थमा १५ मत परेको थियो । संविधानको धारा १०० को उपधारा (३) बमोजिम विश्वासको मत प्राप्त गर्न नसकेपछि प्रधानमन्त्री पदमुक्त हुने व्यवस्था छ । प्रधानमन्त्री ओलीले प्रतिनिधिसभामा विश्वासको मत प्राप्त गर्न नसकी पदमुक्त भएसँगै नयाँ सरकार गठनको बाटो खुलेको छ ।
नेपालको संविधानको धारा ७६ मा मन्त्रिपरिषद् गठनसम्बन्धी व्यवस्था छ । धारा ७६ को (१) मा प्रतिनिधिसभामा बहुमत प्राप्त संसदीय दलको नेतालाई राष्ट्रपतिले प्रधानमन्त्रीमा नियुक्त गर्ने र निजका अध्यक्षतामा मन्त्रिपरिषद्को गठन हुने व्यवस्था छ । मौजुदा प्रतिनिधिसभामा कुनै पनि दलको स्पष्ट बहुमत छैन । एउटै दलको बहुमत नहुँदा धारा ७६ (१) अनुसार प्रधानमन्त्री नियुक्त हुने अवस्था संसद्को गणितमा देखिँदैन । अाेली सरकार नेपालको संविधानको धारा ७६ (१) बमोजिम प्रतिनिधिसभामा बहुमत प्राप्त संसदीय दलको नेतालाई प्रधानमन्त्री नियुक्त गर्न सकिने व्यवस्थाअनुसार बनेको थियो । विश्वासको मत लिन नसकेपछि बहुमतको सरकार काम चलाऊ अवस्थामा पुगेको छ ।
प्रतिनिधिसभाको सबैभन्दा ठुलो दल नेकपा (एमाले) सँग १ सय २१ सांसद् छन् । दोस्रो ठुलो दल नेपाली काङ्ग्रेससँग ६३ (२ निलम्बित), नेकपा (माओवादी केन्द्र) सँग ५३ (४ निलम्बित), जनता समाजवादी पार्टी नेपालसँग ३४ (२ निलम्बित) तथा राष्ट्रिय जनमोर्चा, नेपाल मजदुर किसान पार्टी, राष्ट्रिय प्रजातन्त्र पार्टीका र स्वतन्त्र १/१ सांसद छन् ।
प्रतिनिधिसभाबाट विश्वासको मत पाउन नसकी प्रधानमन्त्री ओली पदबाट मुक्त भएकाले धारा ७२ (२) मा भएको व्यवस्थाअनुसार विश्वासको मतका विपक्षमा मतदान गर्ने प्रमुख ३ दल काँग्रेसका सभापति शेरबहादुर देउवा, माओवादी केन्द्रका अध्यक्ष पुष्पकमल दाहाल ‘प्रचण्ड’ र जसपाका अध्यक्ष उपेन्द्र यादवले साेमबार संयुक्त वक्तव्य जारी गरी नयाँ सरकार गठनको प्रक्रिया प्रारम्भ गर्न राष्ट्रपतिसँग आग्रह गरेका छन् । राष्ट्रपतिले संविधानको धारा ७६ (२) अनुसार नयाँ सरकार गठनका लागि सामबारै आह्वान समेत गरेकी छन् । धारा ७२ (२) मा प्रतिनिधिसभामा कुनै पनि दलको स्पष्ट बहुमत नरहेका अवस्थामा प्रतिनिधिसभा प्रतिनिधित्व गर्ने २ वा २ भन्दा बढी दलको समर्थनमा बहुमत प्राप्त गर्न सक्ने प्रतिनिधिसभाको सदस्यलाई राष्ट्रपतिले प्रधानमन्त्रीमा नियुक्त गर्ने प्रावधान छ । त्यसरी गठन हुने प्रधानमन्त्रीले प्रतिनिधिसभाको कुल सदस्य सङ्ख्याको बहुमत प्राप्त गर्नुपर्नेछ ।
नेपालको संविधान धारा ७७ मा प्रधानमन्त्री तथा मन्त्रीको पद रिक्त हुने अवस्थाअन्तर्गत (१) ख मा नेपालको संविधानको धारा १०० बमोजिम विश्वासको प्रस्ताव पारित हुन नसकेमा वा निजविरुद्ध अविश्वासको प्रस्ताव पारित भएमा भन्ने व्यवस्था छ । ‘संवैधानिक व्यवस्थाअनुसार धारा ७७ (३) बमोजिम कामचलाउ सरकार बनेको छ, अब संविधानको ७६ (२) बमोजिम ३० दिनभित्र संसदबाटै संयुक्त सरकार गठन हुनु पर्छ ।
उक्त व्यवस्थाअनुसार प्रतिनिधिसभामा अहिले कायम रहेका २ सय ७१ सदस्यमध्ये १ सय ३६ पुर्याउनुपर्ने हुन्छ । अहिले विश्वासको मत नदिने १ सय २४ छन् । बहुमतका लागि थप १२ मत आवश्यक पर्छ । धारा ७६ को (४) उपधारा (२) वा (३) बमोजिम नियुक्त प्रधानमन्त्रीले आफू नियुक्त भएको मितिले ३० दिनभित्र प्रतिनिधिसभाबाट विश्वासको मत प्राप्त गर्नुपर्नेछ संवैधानिक व्यवस्था रहेकाे छ ।
यदि सो अवस्थामा पनि सरकार बन्न सकेन भने तेस्रो चरणमा संविधानको धारा ७६ को (३) बमोजिम प्रतिनिधिसभाको निर्वाचनको अन्तिम परिणाम घोषणा भएको मितिले ३० दिनभित्र उपधारा (२) बमोजिम प्रधानमन्त्री नियुक्ति हुन सक्ने अवस्थामा नभएमा वा त्यसरी नियुक्त प्रधानमन्त्रीले उपधारा (४) बमोजिम विश्वासको मत प्राप्त गर्न नसकेमा राष्ट्रपतिले प्रतिनिधिसभामा सबैभन्दा बढी सदस्य भएको दलको संसदीय दलको नेतालाई प्रधानमन्त्री नियुक्त गर्ने संवैधानिक व्यवस्था छ ।
शरीरमा पसिना बगाएर पनि
माया र आशिर्वाद दिएर
नअघाउने मेरी आमा
भन न तिम्रो मनभित्र
कति गहिरो प्रेमको समुद्र छ ?
म सम्झिरहेको छु ती दिनहरु
तिमी दिनभर बारीमा
माटोको डल्ला फोडेर
थकित भई आउँदा पनि
हामीसँग अङ्कमाल गर्थ्यौ
साना- भाइबहिनीहरु
तिम्रो पछि पछि लाग्थे
तिमीले पटुकीमा नखाई राखेको
रोटी दिन्थ्यौ
मुसुक्क मुस्कुराउँदै
हामीले खाउञ्जेल हेरिरहन्थ्यौ
आमा भन न
तिम्रो मनभित्र
कति गहिरो प्रेमको समुद्र छ ?
आमा तपाईंको कतिवटा पेट छ ?
तपाईंको भोक कसरी मर्छ?
दिनभर काम गरेर पनि भोक लागेन ?
जवाफमा मेरी आमा भन्ने गर्थिन !
खाएर बचेको बाबु…
मनमनै सोच्थेँ,
कति मीठो झुठ !
आमा भन न
तिम्रो मनभित्र
कति गहिरो प्रेमको समुद्र छ ?
मुटुभरी मायाको पुलिन्दा बोकेर
स्नेहको हर्लिक्स खुवाउनु भयो
हौसलाको च्ववनप्रास खुवाउनु भयो
धर्तीमा अथकित हिड्न सिकाउनु भयो
आमा भन न
तिम्रो मनभित्र
कति गहिरो प्रेमको समुद्र छ ?
मेरी आमा !
तिमी स्नेहको आकाश बन्यौ
ममताको धर्ती बन्यौ
लड्थेँ म, दुख्थ्यो तपाईंलाई
आमा भन न
तिम्रो मनभित्र
कति गहिरो प्रेमको समुद्र छ ?
आमा ! म सम्झिरहेछु
सानोमा म बिरामी हुँदा
मेरो टाउको सुम्सुमाउँदै
हातगोडामा तेल लगाउँदै
रातभरि तिम्रा आँखा
रसिला हुन्थे
अनिदा हुन्थे
आमा भन न
तिम्रो मनभित्र
कति गहिरो प्रेमको समुद्र छ ?
कहिँ कतै जाँदा
म आउने बाटाभरि
बिच्छ्याइएकाे त्यो मुटुको कार्पेट
कसरी भुल्न सक्छु म ?
छोरो न भोकै छ कि भनेर
मीठो सन्त्रास बोकी
आँखाको दैलो खोली बसिरहने
मेरी आमा भन न
तिम्रो मनभित्र
कति गहिरो प्रेमको समुद्र छ ?
आमा!
यति गहिरो प्रेमको समुद्र
शितल निवासलाई पनि
सिकाइदेऊ न है !
मकवानपुर । प्रधानमन्त्री केपी शर्मा ओलीले प्रतिनिधिसभामा विस्वासको मत पाएनन् । प्रम ओलीले प्रतिनिधिसभा समक्ष राखेकाे विस्वासको मतकाे प्रस्तावकाे पक्षमा ९५ मत परेकाेले उनकाे प्रस्ताव अस्वीकृत भएको छ । विश्वासको मत बहुमतबाट अश्विकृत भएसंगै प्रधानमन्त्री ओली स्वतः पदमुक्त भएका छन् । सरकार काम चलाउ भएको छ ।
प्रधानमन्त्रीको आफूप्रति संसदकाे विश्वास छ भन्ने प्रस्ताव पारित हुन हाल प्रतिनिधिसभामा कायम रहेको २ सय ७१ सदस्यको बहुमत आवश्यक पर्ने थियाे ।
हाल प्रतिनिधिसभामा कायम रहेको २ सय ७१ सदस्यको बहुमत पुग्न १ सय ३६ मत गर्न आवश्यक पर्नेमा प्रम ओलीकाे प्रस्तावमा ९३ मत मात्रै प्राप्त भएकोमा उक्त संख्या संसदमा बहुमत नभएकोले सभामुख अग्निप्रसाद सापकोटाले उनको प्रस्ताव अस्वीकृत भएको घोषणा गरेका थिए ।प्रधानमन्त्रीको प्रस्तावको विपक्षमा १ सय २४ मत खसेको छ भने मत दिन्न भन्नेमा १५ मत परेको थियाे ।
संसदमा सोमबार एमालेको माधव नेपाल पक्षका सांसद अनुपस्थित रहेका थिए । त्यस्तै राप्रपा सांसद राजेन्द्र लिङ्देन पनि अनुपस्थित रहेका थिए । हाल विश्वासको मतको मताधिकार एमालेका १ सय २१, माओवादी केन्द्रका ४८, कांग्रेसका ६१, जनता समाजवादी पार्टीका ३२ तथा राष्ट्रिय जनमोर्चा, नेपाल मजदूर किसान पार्टी, राष्ट्रिय प्रजातन्त्र पार्टी र स्वतन्त्र सांसदलाई १/१ मताधिकार रहेको थियो ।
सभामुख सापकोटाले अर्को बैठक बैशाख ३० गते विहीबार दिउँसो साँढे १ बजेको लागि बोलाएका छन् ।
मकवानपुर । यस वर्षकाे एसईई र कक्षा १२ को परीक्षा स्थगित भएकाे छ । राष्ट्रिय परीक्षा बोर्डकाे सोमबार बिहान बैठकले एसइई र कक्षा १२ को परिक्षा अर्को सूचना नभएसम्म स्थगित गर्ने निर्णय गरेकाे हो ।
अहिले कोरोना संक्रमणका कारण परीक्षा हुने अवस्था नरहेको भन्दै बोर्डले परीक्षा स्थगित गरेकाे हाे । बोर्डले यस अघि नै जेठ १३ गतेबाट एसईई र जेठ २६ गतेबाट कक्षा १२ को परीक्षा संचालन गर्ने परीक्षा तालिका प्रकाशित गरेकाे थियो ।
जेठ १३ गतेबाट सञ्चालन हुने एसईईका लागि प्रश्नपत्र छपाइदेखि अन्य तयारी समेत पुरा भएको थियो । हाल ५ लाख १७ हजार विद्यार्थी एसईईको तयारी छन् भने कक्षा १२ मा करिब ४ लाख परीक्षार्थी रहेका छन् । गतवर्ष पनि कोरोना महामारीका कारण एसईईका परीक्षार्थीलाई विद्यालयले गरेको आन्तरिक मूल्याङ्कनका आधारमा नतिजा प्रकाशित गरिएको थियो ।
बोर्ड बैठकले एसईई र कक्षा १२ को परीक्षा सञ्चालनका लागि अध्ययन गर्न ५ सदस्यीय कार्यदल गठन गरेको छ । शिक्षा तथा मानव स्रोत विकास केन्द्रका महानिर्देशक वैकुण्ठ अर्यालको संयोजकत्वमा कार्यदल गठन गरिएको हो । महामारीको अवस्था कायमै रहे भौतिक उपस्थितिमा परीक्षा सञ्चालन गर्ने अवस्था नरहे के कसरी अघि बढ्ने मोडालिटी तय गर्न कार्यदल बनाइएको बोर्डले जनाएको छ ।
यस वर्ष कक्षा १२ को हकमा भने इन्टरनेट सुविधा भएका परीक्षा केन्द्रमा अनलाइनबाट प्रश्नपत्र पठाएर परीक्षा लिने तयारी बोर्डको छ । कोरोना महामारीका कारण गत वर्ष पनि अनलाइनबाटै प्रश्नपत्र पठाएर घरपायक परीक्षा केन्द्रमा परीक्षा सञ्चालन गरिएको थियो ।