मकवानपुर । बागमती प्रदेश युवा परिषदका उपाध्यक्ष सन्तोष चौलागाईलाई काम गर्न अबरोध नगर्न उच्च अदालत पाटन हेटौँडा इजलासले बागमती प्रदेश सरकारलाई आदेश दिएको छ । फागुन ५ गते बागमती प्रदेश सरकारको मन्त्री परिषदको निर्णयबाट चौलागाईलाई पदमुक्त गरिएको थियो ।
प्रदेश मन्त्रीपरिषदकाे निर्णय बिरुद्ध चौलागाईले उच्च अदालत हेटौँडा इजलासमा फागुन ११ गते उत्प्रेषण परमादेशको रिट निवेदन दर्ता गराएका थिए । निवेदकको रिट उपर उच्च अदालत पाटन हेटौँडा इजलाशका न्यायधिश नागेन्द्र लाल कर्णको इजलाशले विहीबार सुनुवाई गर्दै तत्काल चौलागाईलाई प्रदेश युवा परिषदको उपाध्यक्षकै हैसियतमा काम गर्न दिनु अवरोध नगर्नु भनी आदेश जारी गरेको हो ।
अदालतले फागुन १८ गतेदुबै पक्षलाई अन्तरिम आदेश लाई निरन्तरता दिने नदिने सम्बन्धमा छलफलका लागि उपस्थित हुन समेत भनेको छ । अन्तरिम आदेश छलफलका लागि उपस्थित हुने मितिसम्म अन्य ब्यक्तिलाई सो पदमा नियुक्तीको प्रकृया अघि नबढाउन समेत अदालतले सरकारलाई आदेश दिएको छ । रिट निबेदकका तर्फबाट अधिबक्ता मदन दाहाल, मुकुन्द अधिकारी, बालकृष्ण अधिकारी र ऋषि केबीले बहस गरेका थिए ।
यस्तै बागमती प्रदेश स्वास्थ्य मन्त्रालयले गत माघ १८ गतेको निर्णयले पदमुक्त गरेका प्रदेश भित्रका ११ जिल्लाका आयुर्बेद अस्पतालका अध्यक्ष र चरिकोट अस्पताल विकास समितीका अध्यक्षलाई हटाउने निर्णय समेत कार्यान्वयन नगर्न यथास्थितीमा राख्न आदेश दिएको छ । फागुन १० गते रिट निबेदन माथि सुनुवाई गर्दै उच्च अदालतले सरकारका नाममा अन्तरिम आदेश जारी गरेको अधिबक्ता मदन दाहालले बताए ।
मकवानपुर । मकवानपुर प्रहरीले ८ किलो लागुऔषध गाँजासहित १ जनालाई पक्राउ गरेको छ । पक्राउ पर्नेमा मकवानपुरको कैलाश गाउँपालिका–७ का २९ वर्षीय सुमिन्द्र कुमार दर्जी रहेको जिल्ला प्रहरी कार्यालय मकवानपुरले जनाएको छ ।
बधुबार बिहान साढे ११ बजेकाे समयमा मकवानपुरकाे राक्सिराङ गाउँपालिकास्थित प्रहरी चौकी चैनपुरबाट खटिएको प्रहरी टोलीले राक्सिराङ–५, चैनपुरमा सुरक्षाजाँच गर्ने क्रममा दर्जीले लुकाई छिपाई ल्याएको लागुऔषध गाँजा फेला परेकाे प्रहरीले जनाएकाे छ ।
दर्जीलाई लागुऔषध गाँजासहित पक्राउ गरी जिल्ला अदालत मकवानपुरबाट १० दिनको म्याद अनुमति लिई थप अनुसन्धान भइरहेको प्रहरीले जनाएको छ ।

आदिकविको जन्मक्षेत्र तनहुँमा स्थापित साहित्यिक संस्था “शुक्ला साहित्य सङ्गम”द्वारा प्रकाशित, शेषमणि आचार्य संरक्षक, वेणुप्रसाद खतिवडाद्वारा सम्पादित एवं कार्यकारी सम्पादक जनार्दन दाहाल लगायत आनन्दसुन्दर श्रेष्ठ, नारायणकुमार श्रेष्ठ, टुकादेवी आचार्य, आकाश अधिकारी, जीवन सागर, जुनु खड्का, युवराज पौडेल सम्पादक मण्डल रहनु भएको ” शुक्ला प्रवाह मुक्तक विशेषाङ्क- 2078″ पारिवारिक शिलशिलामा नेपालको धरान पुगेको समय सम्पादकले सम्झना स्वरूप पठाइदिनु भएको प्रति सधन्यवाद प्राप्त गरें ।
तर लत्काल सुन्दर कलेवर हेर्नबाहेक पढिहाल्ने समय पाइएन । हुनतः भाग्यवश सामाजिक सञ्जालमा आफ्ना मुक्तकहरू पनि समावेश भएको सुसमाचार पाइसकेकी थिएँ । हामीजस्ता नवोदित सर्जकहरूका रचनाहरू यस्तो उच्च स्तरीय सङ्ग्रहहरूमा प्रकाशित भइसकेपछि हेर्ने उत्सुकता त जागेर आउने नै भयो । अझ सङ्कलन नै हात परेपछि प्रातिस्वीकृति दिन हामी सर्जकहरूको धर्मिता नै हुनजान्छ भन्ने मेरो ठम्याइ हो । शुक्ला साहित्य सङ्गम, तनहुको स्थापना वि. स. २०६०-मा भएपछि विभिन्न साहित्यिक गतिविधिलाई निरन्तरता दिँदै आएको साहित्यिक संस्थाले यस अघि गजल विशेषाङ्क, लघुकथा विशेषाङ्क, कथा विशेषाङ्क र कविता विशेषाङ्क प्रकाशित गरिसकेकाे छ ।
यस पटक ” शुक्ला प्रवाह, मुक्तक विशेषाङ्क”-को सम्पादन एवं प्रकाशन गरेर संस्थाले नेपाली साहित्यिक क्षेत्रमा नवीन आयाम थपेकाे अनुभव गरेकी छु । पृष्ठ सङ्ख्या एकसय नब्बे भएको गहकिलो ‘मुक्तक विशेषाङ्क’मा जम्मा-जम्मी १ सय ५५ जना मुक्तककारहरूका ४/४ मुक्तक गरी जम्मा जम्मा छ सय २० मुक्तकहरू समावेश गरिएको छ । विशेषाङ्कमा नेपाल मुक्तक प्रतिष्ठानका अध्यक्ष श्री रामकाजी कोनेको शुभकामना, श्री रामजीप्रसाद आचार्य, मुक्तक मञ्चका अध्यक्षको शुभकामना लगायत सम्पादक मण्डलबाट लेखिएको सम्पादकीयले विशेषाङ्कको आद्योपान्त ऐनाजस्तै छर्लङ्ग पारिदिएको छ ।
शब्द सिर्जना कुञ्जका डा. मुरारी पराजुलीले लेख्नुभएको “नेपाली मुक्तकको परिचय”-ले मुक्तकहरूको पृष्ठभूमि, विधागत स्वरूप, मुक्तकको परिभाषा, मुक्तकको प्रकारगत वर्गीकरण, चरणवितरणगत प्रकार, स्रोतगत प्रकार, छन्दगत प्रकार, अन्त्यानुप्रासगत प्रकार, विषयगत प्रकार, विचारगत प्रकार, भावगत प्रकार, परम्परागत प्रकार, कथनगत प्रकार, मुक्तकका संरचक घटकहरू र निष्कर्षले मुक्तकहरूमा हुनपर्ने लेखन, वाचन , बन्धन, वर्गीकरण, मुक्तकको ऐतिहासिकता, प्रचलन र यसको विकासबारे विहङ्गम अवलोकन नेपाली मुक्तककारले मात्र होइन नेपाली साहित्यका सबै सर्जकहरूले अध्ययन र मनन गर्नुपर्ने नितान्त आवश्यक रहेको छ ।
मुक्तक, गजल, कविता, हाइकु, सुसेली, दोहा, तीन हरफे कविता तथा नेपाली साहित्यमा कलम चलाउनेहरूका निम्ति रामवाण सिद्धभएको अनुभव गरेकीछु । उक्त विशेषाङ्कमा वरिष्ठ मुक्तककार रामकाजी कोने, शरूभक्त, रामजीप्रसाद आचार्य, रमेश पौडेल लगायत सशक्त मुक्तककारहरूका चोटिला, पोटिला, स्तरीय, व्यङ्ग्यात्मक र पढिरहुँ लाग्ने मुक्तकहरूले मनै छोएको अनुभव गरेकीछु । नेपाली भाषा-साहित्यका विभिन्न विधामा आएको लेखनीलाई मुक्तकले पनि धेरै पाठक र सर्जकहरू स्थापित गरिसकेको समयमा आफू पनि सिक्किमकाे जनपक्ष प्रकाशनसित आबद्ध रहेर प्रकाशनकार्य गरेको तीनदशकको घण्टीले आवाज दिइसकेको अनुभव गरेकीछु । नेपाली साहित्यका पाठकहरू नेपालमा कति छन् ? भारतमा कति छन् र विभिन्न मुलुकहरूमा कति बसोबास गर्छन् ? नेपाली साहित्यमा लेखिएका उच्च स्तरीय साहित्यिकतिहरू ५ सय प्रति र हजारजति प्रतिहरू बिक्री-वितरण हुन कतिका दशक लाग्छन् ? नानी जन्माउने आमालाई नै थाहा हुन्छ, प्रशववेदना के हो ? र कस्तो हुन्छ ? साहित्यबाट साहित्यको सेवागर्छु भन्न कतिले हिम्मत गर्छन् ? म यसै भन्न सक्तिनँ ।
तर पनि आफ्नो साहित्यको धर्मलाई निरन्तरता दिएर संसारभरि छरिएर मुक्तक विधामा कलम चलाउने सर्जकहरूलाई वरिष्ठ को को हुन् ? को को कनिष्ठ हुन् ? को स्थापित हुन् ? कुन कुन नवोदित हुन् तील र रौं जति पनि नछुट्याइकन एकसूत्रमा बाँध्ने काम गरेको छ शुक्ला परिवारले, शुक्ला परिवार स्वयंमा सम्मानित छ । आगामी दिनहरूमा पनि नयाँ नयाँ आयाम र विधाका विशेषाङ्कहरूले निरन्तरता पाउन् ! शुभकामना व्यक्त गर्दछु।
गान्ताेक,सिक्किम
मकवानपुर । युक्रेनमा रहेका आफ्ना नागरिकलाई स्वदेश फर्किन नेपाल सरकारले आग्रह गरेको छ । परराष्ट्र मन्त्रालयले बुधबार विज्ञप्ति जारी गरी अति आवश्यक कामले बस्नुपरेको अवस्थामा बाहेक उपलब्ध व्यावसायिक हवाइ उडान उपयोग गरी स्वदेश फर्किन आग्रह गरेको हो ।
त्यहाँको वर्तमान अवस्था तथा विकसित हुँदै गरेका घटनाक्रमको मूल्याङ्कन गरि अत्यावश्यक बाहेक हाललाई युक्रेन भ्रमण स्थगित गर्न समेत नेपालीहरुलाई मन्त्रालयले अनुरोध गरेको छ । रुससँगको तनावका कारण युक्रेनमा पछिल्लो समय हिंसात्मक घटना हुन सक्ने भन्दै सचेत हुन समेत आग्रह गरेको छ।
युक्रेनका लागि समेत सहप्रमाणिकृत नेपाली राजदूतावास, बर्लिन युक्रेनमा रहेका ३८ भन्दा बढी नेपाली नागरिकहरूसँग सम्पर्कमा रहेको र उनीहरू सबै सकुशल रहेको परराष्ट्रले जनाएको छ । युक्रेनमा रहेका नेपाली नागरिकले आवश्यक परेमा नेपाली राजदूतावास, बर्लिन र मस्कोमा सम्पर्क गर्न सक्ने परराष्ट्रले बताएको छ ।
रुसले युक्रेनबाट अलग हुन संघर्षरत दुई राज्य लुहान्स्क र दोनेत्स्कलाई स्वतन्त्र मुलुकको मान्यता दिएपछि युक्रेनी सीमामा तनाब बढेको छ । युक्रेनबाट अलग भएको घोषणा गरेका यी दुई ओब्लास्ट क्षेत्रलाई स्वतन्त्र राज्यको मान्यता दिने रुसी कदमविरुद्ध पश्चिमा देशहरु छन् । यही तनाबका कारण दुई देशबीच युद्ध हुने आंकलनहरु भइरहेका छन् ।
यसै बीच युक्रेनी संसदले बुधबार यूक्रेनी राष्ट्रिय सुरक्षा तथा रक्षा परिषद्मा यूक्रेनबाट छुट्टिएको घोषणा गरेका डोनेट्स्क र लुहान्स्कलाई स्वतन्त्र गणतन्त्रको मान्यता दिएको भन्दै १० वर्षका लागि रूसी अधिकारीहरूलाई प्रतिबन्ध लगाउन प्रस्ताव पारित गरेको छ ।
यस प्रस्तावनालाई ४ सय ५० मध्ये ३ सय २२ जना विधायकले समर्थन गरेकाे अन्तराष्ट्रिय संचार संस्था सिन्ह्वाले जनाएकाे छ । प्रस्तावनाको लक्ष्य र उद्देश्यहरू युक्रेनी राष्ट्रिय सुरक्षा र रक्षा परिषद्को निर्णयको लागि आवश्यक कानूनी स्वरूप प्रदान गर्नु हो जुन व्यक्तिगत विशेष आर्थिक तथा अन्य प्रतिबन्धात्मक उपाय घोषणाका लागि मार्गप्रशस्त गर्नु रहेकाे बताइएकाे छ ।
मकवानपुर । विश्व स्वास्थ्य संगठन (डब्ल्रएचओ) सुर्तिजन्य पदार्थको लत छुटाउने एप सार्वजनिक गरेको छ । डब्ल्रएचओ दक्षिण–पूर्वीय एसियाले एप सार्वजनिक गरेकाे हाे ।
डब्लूएचओले सुर्तीजन्य पदार्थ सेवनकर्ताहरुलाई लक्षित गर्दै यसकाे लतबाट छुटउन सहजताकाे लागि ‘क्विट टोबाको’ नामक एप सार्वजनिक गरेको हो । सुर्ति नियन्त्रणका लागि डब्लुएचओले १ वर्षदेखि सञ्चालन गर्दै आएको ‘कमिट टु क्विट’ (त्यागका लागि प्रतिबद्ध) अभियान अन्तर्गत एप सार्वजनिक गरिएको हो ।
सुर्ती सेवनकर्तामा पुर्याउने असरको बारेमा जानकारी दिदैँ उनीहरुमा लतको व्यवस्थापन गरी सोको परित्यागमा मुख्य केन्द्रित हुन मद्दत गर्नु एपको मुख्य उद्देश्य रहेको बताइएको छ । डब्लुएचओका अनुसार, सो एप प्लेस्टोर एवम् एपस्टोर दुवैबाट डाउनलोड गर्न सकिन्छ ।
सुर्तीजन्य पदार्थ सेवनलाई बचाउन सकिने मृत्युको रुपमा लिइन्छ । यसको प्रयोगले प्रत्येक वर्ष ८० लाख मानिसको ज्यान लिने गरेको डब्लूएचओको तथ्यांकले देखाएको छ ।