मकवानपुर । देशै भर माध्यमिक शिक्षा परीक्षा (एसईई) आज बाट सुरु हुदैछ । मकवानपुरमा एसईई परीक्षा सबै पूरा भएको छ ।
परीक्षालाई सभ्य र सहज वातावरणमा सम्पन्न गराउन सम्पूर्ण तयारी पूरा भइसकेको शिक्षा विकास तथा समन्वय इकाई मकवानपुरका सूचना अधिकारी कृष्णप्रसाद पौडेलले जानकारी दिए। मकवानपुर जिल्लाबाट यस वर्ष १ सय ३६ विद्यालयका ७ हजार १ सय ३८ जना परीक्षार्थी एसईई परीक्षामा सहभागी हुने सूचना अधिकारी पौडेलले बताए ।
जिल्लाका विभिन्न पालिकाका विद्यालयमा अध्यनरत विद्यार्थीलाई सकेसम्म पायक पर्ने गरी परीक्षा केन्द्र तोकिएको उनले जानकारी दिए । मकवानपुरका १० वटा पालिकामध्ये ८ वटा पालिकामा परीक्षा केन्द्र तोकिएको छ । थाहा नगरपालिकाका विद्यार्थीले थाहानगरमै तोकिएको ३ वटा परीक्षा केन्द्रबाट परीक्षा दिनेछन् । यसैगरी बागमती गाउँपालिकाका विद्यार्थीले बागमतीमै तोकिएको परीक्षा केन्द्रबाट परीक्षा दिनेछन् भने बकैया गाउँपालिकाका विद्यार्थीले बकैयामै रहेको परीक्षा केन्द्रबाट परीक्षा दिनेछन् । राक्सिराङ र मनहरी गाउँपालिका विद्यार्थीले मनहरीको परीक्षा केन्द्रबाट परीक्षा दिने भएका छन ।
हेटौंडा उपमहानगरभित्रका विद्यालयमा अध्ययनरत विद्यार्थीले हेटौंडा उपमहानगरमा तोकिएका परीक्षा केन्द्रबाट परीक्षा दिनेछन् । मकवानपुरगढी, भीमफेदी तथा ईन्द्रसरोबर गाउँपालिकाका विद्यार्थीले पनि सम्बन्धित पालिकामै तोकिएको परीक्षा केन्द्रबाट परीक्षा दिनेछन् ।
बागमती गाउँपालिकामा तोकिएको परीक्षा केन्द्र जनता माविमा १ सय ८८ जना परीक्षार्थी परीक्षामा सामेल हुनेछन् । बकैयाको बुद्ध माविमा ३ सय ८० र महेन्द्र माविमा २ सय ३२ जना परीक्षार्थीले परीक्षा दिनेछन् । हेटौंडाको हटियामा रहेको जनप्रिय माविमा २ सय ९९, भीमफेदीमा रहेका महेन्द्र माविमा १ सय ८१, थाहानगरको पालुङमा रहेको जनकल्याण माविमा २ सय ८२, पालुङकै मच्छेनारायण माविमा १ सय ८८ जनाले परीक्षा दिँदैछन् । यसैगरी मार्खुमा रहेको सरस्वती बालबोधिनी माविमा १ सय ४३ जना, मनहरीको राष्ट्रिय रोटरी माविमा ४ सय ४८ जना, मनहरीकै महेन्द्र किरण माविमा ३ सय ९१ जनाले परीक्षा दिनेछन् । हेटौंडाको बसामाडीमा रहेको महेन्द्र किरण माविमा २ सय ९२ जना, बस्तीपुरमा रहेको निर्मल माविमा ३ सय ४५ जना, चौघडामा रहेको वंशगोपाल माविमा ३ सय ८ जनाले परीक्षा दिनेछन् ।
हेटौंडाको आधुनिक राष्ट्रिय माविमा ३ सय ९८ जना, हेटौंडाकै बालज्योति माविमा ३ सय ११ जना, ज्ञानदा माविमा १ सय ९८ जना, भूटनदेवी माविमा ३ सय ५६ जना, सिद्धार्थ माविमा ३ सय ६६ जना, जीएस निकेतनमा ३ सय ५१ जना, सोलड्यारिटी बोर्डिङ स्कूलमा ४ सय २५ जना, प्रगति माविमा ३ सय ५३ जनाले परीक्षा दिनेछन् । थाहा नगरको बज्रबाराही माविमा २ सय ५६ जना, हेटौंडाको अमर माविमा २ सय ६५ जना र मकवानपुरगढीको भानु माविमा १ सय ८२ जना विद्यार्थी परीक्षामा सहभागी हुने जनाएको छ ।
सूचना अधिकारी पौडेलका अनुसार परीक्षा केन्द्र तोकिएको विद्यालयका प्रधानाध्यापकहरुलाई नै केन्द्राध्यक्ष तोकिएकाले सम्बन्धित विषयको परीक्षा भएको दिनको केही समयअघि केन्द्राध्यक्षहरुले जिल्ला प्रहरी कार्यालय मकवानपुर र मातहतका प्रहरी कार्यालयबाट प्रश्नपत्र लगेर परीक्षा सञ्चालन गरिने । परीक्षामा अमर्यादित क्रियाकलाप हुन नदिन पर्याप्त सुरक्षा ब्यबस्था गरिएको बताईएको छ ।
पहिलो दिन आज अनिर्वाय अंग्रेजी विषयको परीक्षा हुँदैछ । परीक्षा २० वैशाखसम्म सञ्चालन हुनेछ । राष्ट्रिय परीक्षा बोर्डका अनुसार एसईईमा ५ लाख १४ हजार ९ सय ७७ परीक्षार्थी सहभागी हुँदैछन् । जसमध्ये छात्र २ लाख ५७ हजार ९ सय २७ र छात्रा २ लाख ५७ हजार ५३ छन् । बोर्डले एसईईका लागि देशभर २ हजार ७ परीक्षा केन्द्र तोकेको छ । विद्यार्थीहरुले ती परीक्षा केन्द्रमार्फत परीक्षा दिनेछन् ।
गत दुई वर्षदेखि कोभिड महामारीका कारण विद्यालयको आन्तरिक मूल्यांकनको आधारमा परीक्षा बोर्डले नतिजा सार्वजनिक गरेको एसईई परीक्षा यसवर्ष परीक्षा केन्द्र तोकेर भौतिक उपस्थितिमा सञ्चालन हुन लागेको हो ।
मकवानपुर । अभिनेत्री केकी अधिकारीले विवाह गरेकी छिन् । केकीले व्यबसायी रोहित तिवारीसँग विवाह गरेकी हुन् । रोहित तिवारी हाम्रो बजार डटकमका सीइओ तथा फुडमारियोका सह–संस्थापक तथा सीइओ हुन् । रोहित र केकीले बिहिबार काठमाडौंको एक होटलमा दुबै तर्फका परिवारका सदस्यबीच हिन्दु परम्पार अनुसार विवाह गरेका हुन् ।
केही समय अघि भेटघाट भएका केकी र रोहित पछिल्लो समय प्रेम सम्बन्धमा थिए । तथापि उनले विवाह गर्ने चर्चा केही दिन यताबाट चल्दै आएको थियो । विहीबार विवाह सम्पन्न भएपछि उनले विवाहका केही तस्बिरहरु सार्वजनिक गर्दै आफु र रोहितले नयाँ जीवनको थालनी गरेको बताएकी छिन् ।
विवाहको तीन वटा तस्बिर फेबसुकमा सार्वजनिक गर्दै केकीले लेखेकी छिन्,‘आजका दिनसम्म मलाई कलाकारको रूपमा दिनुभएको माया, सद्भाव र समर्थनप्रति हार्दिक आभारी छु । कलाकारका रूपमा मेरा हरेक उतार–चढावको साक्षी बन्नु भएको मेरा प्रिय दर्शकसककंग मेरो विवाहको शुभ समाचार बाँड्न पाउँदा हर्षित छु । जीवनको नयाँ अध्याय सुरू गर्दै गर्दा म र मेरो जीवन साथीले उपहार स्वरुप यहाँहरूको आशिर्वादको अपेक्षा गरेका छौँ । यहाँहरूको माया, साथ र सद्भाव हामीप्रति सदैव कायम रहने कुरामा विश्वस्त छौँ ।’
मकवानपुर । आसन्न स्थानीय तहको निर्वाचन -२०७९ को लागि मकवानपुरमा स्थापना गरिएको मुख्य निर्वाचन अधिकृत कार्यालय आज उद्घाटन गरिएको छ ।
मुख्य न्यायाधीश डिल्लीरत्न श्रेष्ठ र प्रमुख जिल्ला अधिकारी भरतमणी पाण्डेले कार्यालयको उद्घाटन गरेका हुन । कार्यालयको उद्घाटन गर्दै मुख्य न्यायाधीश श्रेष्ठले निर्वाचन भनेको समाजमा सुरक्षा र भयरहित बाताबरण सिर्जना गर्ने सकारात्मक अभ्यास भएको बताए ।
मकवानपुर जिल्लाको १० वटै स्थानीय तहमा आजैबाट कार्यालय खोलिएको प्रमुख जिल्ला अधिकारी भरतमणी पाण्डेले बताए ।
मकवानपुर जिल्लाको १९ वटा अति संवेदनशील मतदान स्थलमा जिल्लाका सबै सुरक्षा निकायका प्रमुखहरूले स्थलगत अनुगमन गरेको पाण्डेले बताए । हाम्रो नजरले केहि सुरक्षा चुनौती छन्, यद्यपि ति मतदान स्थलमा ढुक्क भएर मतदान गर्ने अवस्था भएकोले मतदातालाई सशंकित नहुन उनले आग्रह गरे ।
निर्वाचनलाई सफल पार्न राजनीतिक दलको भूमिका महत्त्वपूर्ण हुने भएकोले सकारात्मक समन्वय र भूमिका निर्वाह गर्न पाण्डेले अपिल गरे । यस अघि निर्वाचन सम्बन्धी आचारसंहिताको सवाल प्रजिअले हेर्ने भएकोमा आजको मितिबाट सम्बन्धित निर्वाचन अधिकृतले सम्बन्धित स्थलको आचारसंहिता अनुगमन गर्नेछन्
आज खोलिएका कार्यालयको सुरक्षाको लागि आजै बाट ५/५ जना शसस्त्र प्रहरी खटाएको प्रजिअ पाण्डेले बताए । चुनावी थप सुरक्षाको लागि मकवानपुर जिल्लामा १ हजार ४५१ म्यादी प्रहरी पनि खटाइने तयारी भएको पाण्डेले बताए ।
निर्वाचन अवधिको लागि ३ हजार कर्मचारी परिचालन गर्ने तयारी गरिएको छ । मतदानपछि मतपेटिकाहरू संकलनको लागि कार्ययोजना बनाएको पाण्डेले बताए ।
मकवानपुर जिल्लाको १० वटै मतगणना स्थलमा सिसि क्यामरा जडान गरेर केन्द्रीय तहबाट निगरानी राख्ने समेतको तयारी भएको छ । चुनाव एउटा उत्सव र अभियान जस्तै भएकोले उत्सवमा संयमित भएर सहभागी हुन मुख्य निर्वाचन अधिकृत डिल्लिरत्न श्रेष्ठले अनुरोध गरे । आचारसंहितामा बांधेर कसैको स्वतन्त्रता कुण्ठित गर्ने नभै लोकतान्त्रिक प्रक्रियालाई स्थापित गर्न लागेको श्रेष्ठले बताए।
कार्यालय उद्घाटन कार्यक्रम नेकपा एमालेका मदन दाहाल, माओवादीका प्रेमबहादुर पुलामी, नेकपा एकीकृत समाजवादीको मिना लामा, नेपाली कांग्रेसका बुद्ध लामालगायत पार्टी प्रतिनिधिहरूको पनि उपस्थिति रहेको थियो ।
मकवानपुर । आसन्न स्थानीय तहको निर्वाचन -२०७९ मा सत्ताधारी ५ दलीय गठबन्धनको बिरूद्वमा मकवानपुर कांग्रेस उठेको छ ।
पार्टीको सांगठनिक अवस्थालाई बेवास्ता गर्दै गठबन्धन गरेको भन्दै कांग्रेस मकवानपुरमा असन्तुष्टि सुरू भएको हो । पार्टी नेतृत्वले उक्त सहमति सच्याउन माग गर्दै दिनहुँ दबाबका कार्यक्रम भैरहेको छ । हिजो नेपाली कांग्रेस हेटौंडा उपमहानगरपालिका कमिटीले पत्रकार सम्मेलन मार्फत केन्द्रमा गठवन्धनले गरेको निर्णय हेटौंडामा नमान्ने चेतावनी दिएका थिए भने आज कांग्रेस मकवानपुरका सभापति बुद्ध लामा भन्दा बाहेकका नेताहरुले पत्रकार सम्मेलन गर्दै हेटौंडाको मेयरमा कांग्रेसलेनै पाउनुपर्ने माग गरेका छन् ।
कांग्रेस मकवानपुरका उपसभापतिहरू आनन्द कठायत, धर्म लामिछाने, सचिब भिमसेन महत, ईश्वर पाठक, सहसचिब ईन्दिरा न्यौपाने, पूर्व सभापतिहरु माइकल रामचन्द्र अर्याल, रघुरमण न्यौपाने, महासमिति सदस्य जयराम लामिछाने लगायतका जिल्ला स्तरका नेताहरुले पत्रकार सम्मेलन मार्फत हेटौंडाको मेयर कांग्रेसले नपाए छुट्टै उमेदवारी दिने सम्मको चेतावनी दिएका हुन्।
सरकारमा रहेका गठबन्धन दलहरुले हेटौंडाको मेयर समाजबादीलाई दिने निर्णय गरेपछी मकवनपुरका कांग्रेसका नेता तथा कार्यकर्ताहरु रुष्ट बनेका हुन् ।
गठबन्धनको निर्णय पुनराबलोकन नभए यथा स्थितिमा निर्वाचनमा जाँदा गठबन्धनको आवस्यक्ता, औचित्य र मर्म विपरित परिणाम आएमा त्यसप्रति आफुहरु जिम्मेवार र जवाफदेही नहुने उपसभापति कठायतले बताए । कांग्रेसले हेटौंडाको प्रमुख पद पाउँदा गठवन्धनमा रहेका सबै दलहरुलाई सहज रुपमा निर्वाचनमा जाने वातावरण सिर्जना हुने बताइएको छ । केन्द्रमा भएको निर्णय तत्काल सच्याएर मात्र चुनाबमा जान माग गरिएको छ ।