काठमाडौं । सामुदायिक विद्यालयमा कार्यरत शिक्षक तथा कर्मचारीहरूको विद्यालय पोसाक परिवर्तन भएको छ । शिक्षा मन्त्रालयअन्तर्गतको शिक्षा तथा मानव स्रोत विकास केन्द्रले सामुदायिक विद्यालयमा कार्यरत शिक्षक कर्मचारीहरूको विद्यालय पोसाक परिवर्तन गरेको हो ।
केन्द्रले सबै पालिकाहरूका लागि सूचना प्रकाशित गर्दै परिवर्तन गरिएअनुसारको पोसाक चालू शैक्षिक सत्रभित्र कार्यान्वयनको व्यवस्था मिलाउन निर्देशन दिएको छ । केन्द्रले ७ सय ५३ वटै स्थानीय तह र शिक्षा विकास तथा समन्वय एकाइलाई परिवर्तन गरिएको पोसाक कार्यान्वयन गर्न निर्देशन दिएको हो ।
केन्द्रले शिक्षक महासंघको अनुरोधमा विद्यालयमा कार्यरत शिक्षक कर्मचारीहरूको हाल प्रचलनमा रहेको विद्यालय पोसाक परिवर्तन गरिएको जनाएको छ ।
परिवर्तन गरिएको पोसाकमा महिला पुरुषका लागि गाढा खैरो रङको सुट (कोट पाइन्ट), हल्का निलो रङको सर्ट, मौसमअनुसारको गाढा खैरो ज्याकेट कलेजी स्वेटर र कालो जुत्ता राखिएको छ । साडी ब्लाउज कुर्था सुरुवालमा भने रङ परिवर्तन नगरेको केन्द्रले जनाएको छ । पोसाकको नमुना शिक्षक महासंघबाट प्राप्त गर्न सकिनेछ । राजधानीबाट
मकवानपुर । शुक्रबार बिहानैबाट मकवानपुर सहित अन्य जिल्लामा बर्षा भइरहेको छ । मेघ गर्जन सहित हल्का बर्षा भएको हो ।
प्रदेश १, बागमती प्रदेश र गण्डकी प्रदेश लगायत देशका पहाडी भू-भागहरूमा आंशिक देखि सामान्य बदलीको अवस्था रहेको छ । बागमती प्रदेश र गण्डकी प्रदेशका थोरै स्थानमा हल्का वर्षा भइरहेको मौसम पूर्वानुमान महाशाखाले जनाएको छ ।
हाल नेपालमा स्थानीय वायु, भारतको उत्तर प्रदेश आसपास रहेको न्यून चापीय रेखा र पश्चिमी वायुको प्रभाव रहेकोले सामान्य बदलि रहि बर्षा भएको हो । यो प्री मनसुनको अबस्था भएको महाशाखाले जानकारी दिएको छ ।
आज जेठ ६ गते शुक्रवार प्रदेश १, बागमती प्रदेश र गण्डकी प्रदेश लगायत अन्य प्रदेशका पहाडी भू-भागमा आंशिक देखि सामान्य बदली रही देशका बाँकी भू-भागमा आंशिक बदली रहनेछ।
प्रदेश १, बागमती प्रदेश, गण्डकी प्रदेशमा र अन्य प्रदेशका पहाडी भू-भागका धेरै स्थानमा मेघ गर्जन / चट्याङ्ग सहित हल्का देखि मध्यम वर्षाको सम्भावना रहेको छ ।
मेघ गर्जन / चट्याङ्ग सहित हल्का देखि मध्यम वर्षाको सम्भावना रहेकोले आवश्यक सतर्कता अपनाउन महाशाखाले आग्रह गरेको छ ।
मकवानपुर । आफ्नो उमेदवारलाई सहयोग नगरेको भन्दै नेकपा माओवादी केन्द्र बागमती प्रदेश कमिटीले आफ्नो १ जना गाउँ कमिटी अध्यक्षलाई कारवाही गरेको छ ।
चितवनको इच्छाकामना गाउँपालिका कमिटीका अध्यक्ष हरि थापा कारवाहीमा परेका छन्। उमेदवार छनौटमा आफूअनुकुल उमेदवार नभएपछि सूर्य चिन्हमा भोट माग्दै हिँडेको आरोप लागेका अध्यक्ष थापालाई नेकपा माओवादी केन्द्र बागमती प्रदेश कमिटीले कारवाही गरेको पत्र पठाएको हो।
स्थानीय तह निर्वाचनमा घोषितरुपमै पार्टीको आधिकारिक उमेदवारलाई असहयोग गरेको भन्दै बागमती प्रदेश कमिटीले पार्टीको सबै पदबाट कारवाहीस्वरुप अर्को निर्णय नहुँदा सम्मको लागि निलम्बन गरेको हो।
जेठ २ गतेको पत्रमा ‘पाँच दलीय गठबन्धनका उमेदवारलाई घोषितरुपमै असहयोग गरेर पार्टीलाई गम्भीर आघात पुर्याउने काममा संलग्न भई पार्टीले जारी गरेको वक्तव्यको समयसीमा भित्र समेत आधिकारिक पार्टी लाइनमा नउभिएका कारण पार्टी विधान र बागमती प्रदेश समितिको निर्वाचन निर्देशिका-२०७९ अनुसार पार्टीको सबै पदबाट निलम्बन गरिएको’ भनेर उल्लेख गरेको छ।
कारवाहीमा परेका नेता थापाले भने कागजी कारवाहीले केही नहुने प्रतिकृया दिएका छन्। पार्टीले भने थापालाई निलम्बन गरेसँगै गाउँकमिटीको लागि रामप्रसाद बोहोरालाई कार्यबहाक अध्यक्ष तोकेको छ।
नुवाकोट । नुवाकोटको तादी गाउँपालिकाको अध्यक्षमा नेपाली काँग्रेसका सन्तमान तामाङ विजयी भएका छन्।
अध्यक्षमा निर्वाचित तामाङले ३ हजार २ सय ४१ मत ल्याएका थिए भने उनको निकटतम प्रतिस्पर्धी nekapaa (माओवादी केन्द्र)का किरण रिजालले २ हजार ५ सय १८ मत प्राप्त गरेका छन् ।
उपाध्यक्षमा नेकपा (माओवादी केन्द्र)का सञ्जु प्याकुरेल विजयी भएकी छिन । प्याकुरेलले ३ हजार ३ सय ९७ मत प्राप्त गर्दा निकटतम प्रतिस्पर्धी काँग्रेसकी ईश्वरी उप्रेतीले २ हजार ७ सय ७८ मत ल्याएकी छन् ।
वडाध्यक्षहरूमा वडा नं १ मा नेपाली काँग्रेसका नकुरदोङ तामाङ, वडा नं २ मा माओवादी केन्द्रका बच्चुराम तामाङ, वडा नं ३ मा काँग्रेसका सोनाम थिङ तामाङ, वडा नं ४ मा माओवादी केन्द्रका अश्विनकुमार पाण्डे, वडा नंं ५ का एमालेका सरोज भण्डारी र वडा नं ६ मा माओवादी केन्द्रमा शेरमान तामाङ निर्वाचित भएको तादी गाउँपालिका निर्वाचन अधिकृतको कार्यालयले जनाएको छ ।
जिल्लाको अन्य ११ स्थानीय तहको मतगणना जारी रहेको छ । तादीबाट उपेन्द्र दाहलको सहयोगमा
मकवानपुर । स्थानीय तह सदस्य निर्वाचन २०७९ अन्तर्गत मकवानपुरमा महिला जनप्रतिनिधि पहिलो पटक वडाध्यक्षमा महिला निर्वाचित भएकी छिन् । मकवानपुरको बकैया गाउँपालिका वडा नंबर १० मा गठवन्धनबाट वडा अध्यक्ष उम्मेदवार बनेकी कांग्रेस नेतृ कमला वाईवा विजयी भएर जिल्लामा एउटा इतिहास रचेकी छिन् ।
वाईवाले ८ सय १६ मत ल्याइ निर्वाचित हुँदा नेकपा एमालेका उम्मेदवार कमलबहादुर घलानले ४ सय ६६ मत प्राप्त गरे । वडाध्यक्ष निर्वाचित वाईवा २०७४ सालको स्थानीय तह निर्वाचनमा नेपाली कांग्रेसको तर्फबाट गाउँपालिका उपाध्यक्षमा पराजित भएकी थिईन् ।
बिजयी भएपछि पार्टीभन्दा माथि उठेर आफ्नो गाउँ र टोलको बिकासमा लागिपर्ने उनले बताइन् ।
