मकवानपुर । बालबालिकालाई अन्य हिंसाभन्दा अनलाइनबाट हुने हिंसाको अवस्था भयावह भएको सिविन बाल हेल्प लाइनका व्यवस्थापक माधव लोहनीले बताएका छन् ।
विभिन्न सामाजिक सन्जालको प्रयोगबाट बाल शोषण तथा दुर्व्यवहार हुने गरेकोले अभिभावकले समेत बिशेष ध्यान दिनुपर्ने व्यवस्थापक लोहनीले बताए ।
अनलाइनबाट हुने बाल दुर्व्यवहार तथा शोषण जस्ता सवालबाट बालबालिकालाई जोगाउन स्थानीय तहले नागरिक समुदायलाई स्थानीय वडाहरूबाट पहल गर्नुपर्ने उनले बताए । अनलाइन बाल सरक्षणसम्बन्धी संचेतना बढाउन संचेतनामुलक सामाग्रीहरूबाट प्रचार गर्नु आवश्यक भएको व्यवस्थापक लोहनीले बताए ।
सम्बन्धित वडा मार्फत नगरपालिका भित्र रहेका सबै सामुदायिक एवं निजी आवासिय विद्यालयहरूले अनलाइन बालसंरक्षणको विषयमा आ-आफ्नो विद्यालयमा बालबालिकाहरूलाई अभिमुखीकरण गर्नका लागि निर्देश गर्ने, आफ्नो वेभसाइटमा अनलाइन बालसंरक्षणको विषयलाई प्राथमिकताका साथ राखेर अनलाइन संरक्षणको विषयलाई सबैको चासोको विषय बनाउन तर्फ लाग्नुपर्ने लोहनीले बताए ।
सिविन बाल हेल्प लाइन हेटौंडाले आयोजना गरेको ईन्टरनेट अनलाइनमा बाल संरक्षणबारे सरोकारवालासंग अन्तरक्रिया यस्तो बताइएको हो ।
“अनलाइन प्रयोगबारे जति जानकारी चाहिएको छ, त्यति जानकारी अभिभावकलाई छैन,तर बालबालिका शोषण गर्नेहरू पुर्ण रूपमा अपडेट छन्” लोहनीले भने ।
लामो समय सामाजिक सन्जालमा बस्दा सामाजिकिकरणबाट बालबालिका टाढा हुन थालेको,
बालबालिकाले प्रयोग गर्ने साइडबारे अभिभावक जानकार रहने, बालबालिकाको फेसबुकको साथी समूह चेक गर्ने, सङ्ख्या बढाउनको लागि जो पायो उसलाई साथी नबनाउने जस्ता सवालमा ध्यान दिनुपर्नेमा सहभागीहरूले बताएका थिए ।

अनलाइन शोषणबारे उजुरी काठमाडौमा मात्रै हुने भएकोले न्यायको लडाइमा समस्या हुने गरेको अधिकारकर्मीहरूले बताए ।
अनलाइन बाल संरक्षणबारे मनोसामाजिक परामर्शको पाटोमा मकवानपुरमा पनि काम भइरहेको सिविन जिल्ला कार्यालय प्रबन्धक झबिन्द्र ज्ञावलीले बताए । “परामर्श दिन गरेका छौ, उजुरी दर्तामा भने समस्या छ” ज्ञावलीले भने । बालविवाह भएका मध्ये ९९ प्रतिशत कारण अनलाइन रहेकोे उनले बताए ।
सिविनले सन् २००८ देखि अनलाइनमा बाल संरक्षणबारे काम गर्दै आएको छ । कार्यक्रममा सिविनका अध्यक्ष माधव प्रधानको समेत उपस्थिती रहेको थियो ।
साइबर अपराध गरेमा विधुतीय कारोबार ऐन २०६३ मा भएको व्यवस्था कसुरको मात्रा र प्रयोजन अनुसार ५ वर्षसम्म कैद वा ५० हजार रुपैयाँदेखी २ लाख रुपैया सम्म वा दुवै कारबाही हुने व्यवस्था छ ।
कार्यक्रममा सामाजिक विकास मन्त्रालय बागमती प्रदेश, प्रदेश मानव अधिकार आयोग, इन्सेक, माइती नेपाल, हिमराइट्स, राडो नेपाल, नगरपालिकालगायतका प्रमुख तथा प्रतिनिधिको सहभागीता रहेको थियो ।
मकवानपुर । बागमती प्रदेशमा सरकार गठनको लागि आह्वान भएको छ ।
बागमती प्रदेशको मुख्यमन्त्री नियुक्त गर्नका लागि पुस २५ गते सोमबार दिउँसो ४ बजे भित्र दावी पेश गर्न प्रदेश प्रमुख यादव चन्द्र शर्माबाट आव्हान भएको हो ।
शर्माले सरकार गठनको लागि आज यस्तो आह्वान गरेको प्रदेश प्रमुख कार्यालयका प्रवक्ता प्रकाश चापागाईंले जानकारी दिए ।
नेपालको संविधानको धारा १६८ को उपधारा (१) बमोजिम कुनै पनि दलको स्पष्ट बहुमत प्राप्त नभएको अवस्थामा संविधानको धारा १६८ को उपधारा (२) बमोजिम प्रदेश सभामा प्रतिनिधित्व गर्ने दुई वा दुईभन्दा बढी दलहरुको समर्थनमा बहुमत प्राप्त गर्न सक्ने प्रदेश सभाको सदस्यलाई मुख्यमन्त्री नियुक्त गर्नुपर्ने हुन्छ ।
यसै अनुसार आफ्नो दाबी पेश गर्न आह्वान गरिएको हो ।
प्रदेश प्रमुख यादबचन्द्र शर्मासमक्ष निर्वाचन आयोगबाट प्रदेश सभा सदस्य निर्वाचन, २०७९ को निर्वाचन परिणाम सहितको प्रतिवेदन, प्रदेश सभा सदस्य निर्वाचन ऐन, २०७४ को दफा ६२ बमोजिम निर्वाचन आयोगले मंसिर २९ को निर्णयानुसार मिति पुस २ गते पेश भएको थियो ।

मकवानपुर । मकवानपुरमा राहदानी सम्बन्धी सेवा स्थगित गरिएको छ । सिस्टममा समस्या आएको भन्दै जिल्ला प्रशासन कार्यालय मकवानपुरले सूचना जारी गरि अर्को सूचना नभएसम्मका लागि राहदानीको कार्य स्थगित गरिएको जनाएको छ ।
प्रशासन कार्यायलले जारी गरेको सूचनामा भनिएको छ, ‘विद्युतीय राहदानी प्रणाली सम्बन्धी मिति २०७९–०९–१९ गतेदेखि राहदानी विभागको अनलाईन सर्भरमा समस्या उत्पनन्न भएकोले अर्को सूचना नभएसम्मको लागि यस कार्यालयबाट प्रवाह हुने राहदानी सम्बन्धी सम्पूर्ण सेवा स्थगित गरिएको व्यहोरा सेवाग्राहीको जानकारीको लागि यो सूचना प्रकाशित गरिएको छ ।’

विभागले राहदानी वितरण कार्य बन्द गर्यो
राहदानी विभागले मंगलबारदेखि अनिश्चितकालका लागि राहदानी वितरण कार्य बन्द गरेको छ । सिस्टममा समस्या आएको भन्दै विभागले अनिश्चितकालका लागि राहदानी वितरण कार्य रोकेको हो ।
सिस्टममा समस्या आएको र समाधानका लागि निरन्तर प्रयास गर्दा पनि समाधान नभएको भन्दै विभागले राहदानी वितरण कार्य रोकेको हो ।
सिस्टममा समस्या आउँदा राहदानी आवेदनको स्टाटस हेर्ने र राहदानी वितरण अवरुद्ध भएकाले अर्काे सूचना जारी नहुँदासम्म राहदानी वितरण कार्य रोकेको विभागले जनाएको छ ।
पुष्पकमल दाहाल प्रचण्ड नेतृत्वको वर्तमान सरकारको पहिलो बैठकले राहदानी, सवारी चालक अनुमति पत्र, राष्ट्रिय परिचयपत्रमा देखिएका समस्या समाधान गरी चुस्तदुरुस्त सेवा दिने निर्णय गरेको थियो । उपप्रधान तथा गृहमन्त्री रवि लामिछाने राहदानी विभाग पुगेर सेवाग्राही र विभागको अवस्था’को सम्बन्धमा जानकारी लिएका थिए ।
तर, विभागले भने सिस्टममा समस्या आएको भन्दै राहदानी वितरण कार्य नै अनिश्चितकालका लागि बन्द गरेको हो । विभागमा सेवाग्राही सेवा लिन रातिदेखि नै लाइनमा बस्ने गरेका थिए। लाइन बस्दा समेत पालो नआउने, सेवा प्रवाह चुस्त नभएको गुनासाेका बीच सेवा प्रवाह नै बन्द गरिएकाे हाे ।

मकवानपुर । बागमती प्रदेश कृषि तथा पशुपंक्षी मन्त्री बसुन्धरा हुमगाईले आफ्नो कार्यकालमा भएको कामको समिक्षा गरेका छन् ।
२०७८ कात्तिक २८ गते मन्त्री नियुक्त हुनुभएका मन्त्री हुमगाईले आफ्नो कार्यकालको प्रगति विवरण पत्रकार सम्मेलन मार्फत सार्वजनिक गरेका हुन ।
बागमती प्रदेशको कृषि तथा पशुपन्क्षी विकास मन्त्री बसुन्धरा हुमागाईंले आफ्नो कार्यकालमा प्रदेशको कृषि, पशुपन्क्षी तथा मत्स्य क्षेत्रको रुपान्तरणमा महत्वपूर्ण काम भएको दावी गरे । आफ्नो कार्यकालको १३ महिनाको अवधिमा कतिपय पुराना कार्यक्रमलाई निरन्तरता दिँदै सम्पन्न गर्नुका साथै धेरै नयाँ कार्यक्रम सुरुवात गरिएको मन्त्री हुमागाईको दाबी छ ।
सोमबार मन्त्रालयमा पत्रकार सम्मेलन गर्दै आफ्नो कार्यकालमा भएका कामहरुको प्रतिवेदन सार्वजनिक गर्दै प्रदेशमा नयाँ सरकार गठनको प्रक्रिया सुरु हुनै लाग्दा मन्त्रालयबाट बिदा हुने क्रममा रहेका मन्त्री हुमागाईंले आफूले मन्त्री भएर आएपछि ५५ बुँदे मार्गचित्र प्रस्तुत गर्दै सोहीअनुसार कामहरु गरिएको बताए ।
कृषि क्षेत्रमा प्रवाह भइरहेको अनुदान कार्यलाई व्यवस्थित बनाउन वीउपुँजी कोष सम्बन्धी कार्यको सुरुवात गराएका हुमागाईले सो कामलाई आफ्नो कार्यकालको महत्वपूर्ण कामको रुपमा चित्रण गरेका छन् । चालु आवमा प्रदेश सरकारले साना तथा ठूला किसानलाई गरी करिब ५५ करोड वीउपुँजी उपलब्ध गराउन लागेको उनले बता ।
अध्यादेशमार्फत कृषि विकास ऐन बनाएर मन्त्रालयले किसान परिचयपत्र वितरण, कृषि बाली वस्तुको न्यूनतम समर्थन मूल्य तोक्ने जस्ता कार्यलाई प्रक्रियामा लगेको र अघिल्लो सरकारले सुरुवात गरेको दुग्ध पाउडर प्लान्ट स्थापनाको कामले हुमागाईको कार्यकालमा निरन्तरता पाउँदै करिब ९५ प्रतिशत सम्पन्न भएको मन्त्री हुमागाईले बताए ।
कृषकलाई दूधमा अनुदान कार्यक्रमलाई निरन्तरता दिँदै प्रतिलिटर दूधमा दिइँदै आइएको अनुदान रकम बढाएर पाँच रुपैयाँ पुर्याइएको छ । विपदबाट क्षति पुगेका कृषकलाई राहत वितरणको कार्य पनि सुरुवात गर्दै यसवर्षको कार्यक्रमलाई प्रक्रियामा लगिएको मन्त्रालयले जनाएको छ । प्रदेशका ३० स्थानमा एक वडा एक पशु स्वास्थ्य क्लिनिक स्थापनाको लागि बोलपत्र आह्वान गरिएको मन्त्री हुमागाईले बताए । माटो परीक्षण कार्यलाई तिव्रता दिनुका साथै वीउमा आत्मनिर्भरता उन्मुख कार्यक्रममा पनि मन्त्रालयले ध्यान दिएको जनाइएको छ ।
फलफूल तथा तरकारी भण्डार क्षमताको शीत भण्डारहरु पनि निर्माणको अन्तिम चरणमा रहनुका साथै प्रदेशका ८ जिल्लाका विभिन्न १० स्थानमा निर्माणाधीन शीत भण्डार निर्माणको करिब ८० प्रतिशत काम सकिएको जनाइएको छ । चितवनमा आधुनिक भेटेरीनरी अस्पताल निर्माणको प्रक्रिया सुरु गरिएको बताउँदै भेटेरीनरी एम्बुलेन्स खरिदको प्रक्रियामा रहेको मन्त्री हुमागाईले बताए ।
अघिल्ला सरकारले ल्याएको राम्रा कार्यक्रमहरुलाई निरन्तरता दिइएको भन्दै मन्त्री हुमागाईंले आगामी सरकारले पनि आफूहरुले ल्याएको कार्यक्रमलाई निरन्तरता दिनुपर्नेमा जोड दिए । कृषि ऐन अनुरुप काम गर्न सके किसानलाई टेवा पुग्नेमा उनको जोड रहेको छ । सुशासन मन्त्री र कर्मचारीबाटै हुनुनपर्ने बताउँदै मन्त्री हुमागाईले रैथाने बाली र वीउबारे कार्य विधिमा रहेकाले कार्यान्वयन गर्न सके यस्ता बालीहरुको वृद्धि विकास हुने बताएका थिए ।
कार्यक्रममा मन्त्रालयका सचिव डा. शरणकुमार पाण्डे, योजना तथा अनुगमन महाशाखा प्रमुख एंव प्रवक्ता झलकनाथ कँडेल, कृषि विकास निर्देशनालयका निर्देशक भरत प्रसाद विडारी, पशुपन्छी तथा मत्स्य विकास निर्देशनालयका नि. निर्देशक बज्रकिशोर ठाकुर लगायतको उपस्थिति रहेको थियो ।
मकवानपुर । मंसिर ५ को निर्वाचन पछि गठन भएको बागमती प्रदेश सभाको दोस्रो कार्यकालको पहिलो अधिवेशन सोमबारबाट सुरु भएको छ । सरकार की सदन पहिले भन्ने सम्बन्धमा स्पष्ट ब्यबस्था नहुदा प्रदेश सरकार गठनको आव्हान भने भएको छैन ।
मुख्यमन्त्रीमा दावी गर्दै आएका दलहरु केन्द्रीय सहमतिको पर्खाइमा रहेका कारण सरकार गठनमा ढिलाइ भएको हो । नेकपा एमाले, नेकपा माओवादी केन्द्र र राप्रपाले प्रदेश सरकारको दावी गरेका छन । ति दलका संसदीय दलका नेताहरू जगन्नाथ थपलिया, शालिकराम जम्मकट्टेल र उद्धब थापाले आ-आफ्नै दावी मुख्यमन्त्रीमा गरे पनि सत्तारुट दलहरुले बागमती प्रदेशमा कस्को नेतृत्वमा सरकार बनाउने टुंगो लगाउन सकेका छैनन् ।
३७ सदस्य भएको नेपाली काग्रेस प्रतिपक्षमा रहदा नेकपा एमालेले आफूले प्रदेशको नेतृत्व गर्न पाउनु पर्ने बताउदै आएको छ । एमाले संसदीय दलको नेता थपलिया आफू मुख्यमन्त्रीको दाबेदार रहेको बताउँछन । तर केन्द्रीय सहमति जे हुन्छ त्यही अनुसार अघि बढ्नु पर्ने बाध्यता रहेको समेत स्वीकार गर्छन ।
यस्तै माओबादी केन्द्रका संसदीय दलका नेता जम्मकट्टेल प्रदेशको पहिलो कार्यकालमा आफूहरूले एमालेलाई सहयोग गरेकोले यो पटक माओवादीको सरकार बन्नु पर्ने बताउछन् । प्रदेशको मन्त्रीको जिम्मेवारीमा रहिसकेको अनुभवले समेत आफू मुख्यमन्त्री बन्नु पर्ने उनको भनाइ छ ।
यता अन्य प्रदेशमा दावी नगरी बागमती प्रदेशमा राप्रपाले मुख्यमन्त्री दावी गरेको छ । संसदीय दलको नेता थापा सरकार गठनको लागि राप्रपा निर्णायक रहेकोले समेत आफ्नो पार्टीको नेतृत्वमा प्रदेश सरकार गठन हुनु पर्ने दावी गर्छन् । ३ दलका ३ नेताले मुख्यमन्त्रीको दावी गरिरहे पनि बदलिएको राजनैतिक परिवेशमा केन्द्रीय तहमा सहमति र भागबन्डा जसरी बन्छ बागमती सरकार पनि त्यहि अनुसार गठन हुने नेताहरू बताउँछन ।
बागमती प्रदेश सरकार पुस महिना भित्रै गठन भइसक्ने दावी नेताहरूको छ ।
१ सय १० सदस्यीय प्रदेश सभामा नेपाली कांग्रेसका ३७, नेकपा एमालेका २७, नेकपा माओवादीका २१, राष्ट्रिय प्रजातन्त्र पार्टीका १३, नेकपा एकीकृत समाजवादीका ७, नेपाल मजदुर किसान पार्टीका ३, हाम्रो नेपाली पार्टीका २ जना सांसद रहेका छन् ।
सभामुखको निर्वाचन तालिका सार्वजनिक
यसैबीच बागमती प्रदेश सभाको दोस्रो कार्यकालको पहिलो बैठकले सभामुखको निर्वाचन मिति तय गरेको छ । नेपालको संबिधानको धारा १८२ को उपधारा १ मा प्रदेश सभाको पहिलो बैठक प्रारम्भ्स भएको मितिले १५ दिन भित्र प्रदेश सभा सदस्यहरुले आफू मध्येबाट सभामुख गर्नु पर्ने प्राबधान छ ।
संबैधानिक प्राबधान अनुसार निर्वाचन मिति तय भए संगै प्रदेश सभाका सभामुखको निर्वाचनको कार्यतालिका सार्वजनिक भएको छ । सोमबार बसेको प्रदेश सभाको पहिलो बैठकले सभामुखको निर्वाचनको लागि पुस २९ को मिति तय गरेको हो ।
प्रदेश सभा सचिवालयले पुस २९ गते शुक्रबार बिहान ११ बजे निर्वाचन गर्ने कार्यतालिका सार्वजनिक गरेको हो । प्रदेश सभा सचिवालयका सचिव कृष्ण हरि खड्काका अनुसार सभामुखको निर्वाचनका लागि २८ पुसमा मनोनयन दर्ताको लागि बिहान १०ः३० देखि दिउँसो २ बजेसम्म, मनोनयन फिर्ताको समय सोहि दिन दिउँसो २ः३० देखि ३ः३० बजेसम्म रहने छ ।
यस्तै उम्मेदवारको अन्तिम नामावली प्रकाशन अपराह्न ४ बजे गरिने कार्यतालिका रहेको छ । सभामुखको निर्वाचन पुस २९ गते शुक्रबार ११ बजे बस्ने प्रदेश सभाको बैठकमा हुनेछ ।
