मकवानपुर । नेपाल पत्रकार महासंघको सदस्यता शुद्धिकरणका लागि १५ बुँदे मापदण्डमा प्रेस चौतारी नेपाल प्रतिबद्ध भएर लाग्ने संगठनले जनाएको छ ।
सदस्यता शुद्धिकरणको लागी संगठन प्रतिबद्ध रहदा रहदै विभिन्न साङ्गठानिक दलाल, पुँजीपतिहरू विभिन्न दल र संगठनको नाममा नेकपा एमाले र सो संगठन विरुद्ध लागेको पनि प्रेस चौतारी नेपालले निष्कर्ष निकालेको छ ।
प्रेस चौतारी नेपालको चौथो सचिवालय बैठकमा महासचिव हिरामान लामाले प्रस्तुत गरेको प्रतिवेदनमा पत्रकार महाससंघको सदस्यता शुद्धिकरणलगायतका विषयमा प्रेस चौतारी विरुद्ध सबै शक्ति एक भएर लागेका उल्लेख छ ।
राष्ट्रिय पुँजीको विकास गरी स्वाधीन र आत्मनिर्भर अर्थतन्त्रको निर्माण, जनताको जनवादी उत्पादन पद्धतिको विकास, राष्ट्रिय स्वाधीनता, सार्वभौमिकता र स्वतन्त्रताको रक्षा गर्दै सामाजिक न्यायसहितको समाजवादको आधार तयार गर्नु प्रेस चौतारी नेपालको मुख्य लक्ष भएको प्रतिवेदनमा उल्लेख छ ।
‘यही कार्यदिशा अनुरूप हाम्रो सङ्गठनात्मक कार्यदिशा निर्धारण गरेका छौँ’, हाम्रो कार्यदिशाले तत्कालीन कार्यनीति, कार्यक्रम तथा कार्य योजनालाई नेतृत्व गर्नुपर्दछ’, महासचिवको प्रतिवेदनमा लेखिएको छ ।
अहिले आम सञ्चार क्षेत्र र सञ्चारकर्मी राष्ट्रिय तथा अन्तर्राष्ट्रिय राजनीतिक, आर्थिक, सामाजिक, सांस्कृतिक, प्राविधिक, लगायत दृष्टिले नितान्त नयाँ मोडमा उभिएको प्रेस चौतारी नेपालको विश्लेषण छ । ‘सूचना प्रविधिमा अभूतपूर्व क्रान्ति भएको छ, यो क्रान्तिले अर्थतन्त्र, संस्कृति, आमसञ्चार, उत्पादन, वितरण प्रक्रिया र प्रकृतिमा नयाँ विशेषताहरू पैदा भइरहेका छन्, नेपाली सञ्चार जगतमा दलाल पुँजीपतिहरूले आफ्नो उद्देश्य पूरा गर्न मिडियाको पनि दुरुपयोग गरिरहेका छन्’, प्रतिवेदनमा स्पष्ट शब्दमा लेखिएको छ ।
दलाल पुँजीपतिले मिडिया दुरुपयोग गरेर राष्ट्रिय पुँजीपतिको गलत फ्रेमिङ गरेर गलत बिम्ब बनाइदिने प्रति चौतारीले चिन्ता व्यक्त गरेको छ । समाजवादको आधार तयार पार्ने यात्रामा यसले अवरोध गर्ने प्रेस चौतारी नेपालको ठहर छ । ‘प्रचारको क्षेत्रबाट त्यो अवरोध पन्छाउने हाम्रो महत्त्वपूर्ण कार्यभार हो’, प्रतिवेदनमा उल्लेख छ ।
प्रेस चौतारी नेपालको नवौँ राष्ट्रिय महाधिवेशनले फैसला गरेको ‘समृद्धिका लागि सञ्चार कर्म प्रेस चौतारी नेपालको मूल मर्म’ भन्ने नारामा केन्द्रीकृत भई संगठनको कार्यदिशा, कार्यनीति, कार्यक्रम र कार्य योजना निर्माण गर्नुपर्ने निष्कर्ष सो संगठनले निकालेको छ । यो कार्यभार पूरा गर्न असाधारण रूपमा क्रियाशील हुनुपर्ने निष्कर्ष प्रेस चौतारी नेपालले निकालेको छ ।
संघर्षको आयाम बदलिएको बताउँदै प्रेस चौतारी नेपालले सयौँको जुलुस भन्दा एउटा आलेख, समाचार वा विचार बलशाली हुने निष्कर्ष निकालेको छ । सडकमा गरिने सयौँको प्रदर्शनभन्दा वा भौतिक उपस्थितिमा भएका आमसभाभन्दा कुनै एउटा सञ्चार सामग्री सुव्यवस्थित ढङ्गले निर्माण गरेर प्रवाह गर्न सक्यो भने त्यो प्रभावकारी हुने चौतारीको निष्कर्ष छ ।
चौतारीका सदस्यमा वैचारिक स्पष्टताको लागि प्रशिक्षण कार्यक्रम सञ्चालन गर्न आवश्यक रहेको निष्कर्ष संगठनले निकालेको छ । चौतारीमा आबद्ध पत्रकारलाई व्यावसायिक रूपमा दक्ष बनाउन चौतारीले देशव्यापी तालिमहरूको आयोजना गर्ने महासचिवको प्रतिवदनमा उल्लेख छ ।
प्रेस चौतारीको सदस्य हुन व्यावसायिक दक्षता पहिलो मापदण्ड भएको चौतारीले प्रष्ट पारेको छ । ‘समाचार कक्षमा होस् वा रिपोर्टिङमा, प्रेस चौतारीका सबै सदस्य सधैँ अब्बल हुनुपर्छ’, प्रतिवेदनमा लेखिएको छ ।
प्रेस चौतारी नेपालका अध्यक्ष गणेश बस्नेतको अध्यक्षतामा भएको बैठकमा चौतारीका नयाँ इञ्चार्ज राजेन्द्र गौतमलाई स्वागत गरिएको थियो भने इञ्चार्जबाट बिदा भएका एमाले पार्टीका उपसचिव पृथ्वी सुब्बा गुरुङलाई बिदाइ गरिएको थियो ।

रासा नेपाली साहित्य जगतमा चिरपरिचित नाम हो । लघुकथा लेखनमा पनि सक्रिय रहनु भएका रासासँग हाम्रो लघुकथा केन्द्रका संरक्षक एवं व्यवस्थापक राजु क्षत्री अपुरोले लघुकथा कै सेरोफेरोमा रहेर लिएको अन्तर्वार्ता
नमस्कार सर, सर्वप्रथम यहाँको पुरा परिचय बताइदिनु होस् न।
नमस्ते, मेरो पूरा नाम : राजु सायमी
जन्म : वि.सं. २०२३/२/६/५ पशुपति, देवपत्तन
माता : हीराकुमारी मानन्धर
पिता : पशुपति भक्त मानन्धर
शिक्षा : बि. कम.
प्रकाशित कृतिहरू :
१. रात निदाएको रातमा (गजल सङ्ग्रह, वि.सं.०५८)
२. अकाल : अलाप (कविता सङ्ग्रह, वि.सं.०५९)
३. घाउमाथि घाउ (गजल सङ्ग्रह, वि.सं.०६३)
४. जीवन-अगिंमथ: (नेपालभाषा कविता सङ्ग्रह, वि.सं.०६३)
५. मेरो चिन्तनको सौदामिनी (लघुनिबन्ध सङ्ग्रह, अनुवाद)
६. चाहना एक रातको (कथा सङ्ग्रह, अनुवाद)
७. कविता व म्ह्याय् (नेपालभाषा शृङ्खलाबद्ध कविता, वि.सं.०७४)
८. साँचोको झुप्पा (नाटक, अनुवाद)
९. फल्चा (नेपालभाषा लघुकथा सङ्ग्रह, वि.सं.०७८)
१०. अघोषित आवाज (लघुकथा सङ्ग्रह, अनुवाद)
पुरस्कार/सम्मान :
१. न:लि लक्ष्मीदेवी साहित्य सिरपा, वि.सं.०७६
२. याताज: श्याम विश्व सिरपा,वि.सं.०७८
३. बैजयन्ती स्रष्टा सम्मान,वि.सं.०७९
हालको बसोबास : गौरीघाट, कामनपा.७, मेरो परिचय यहि नै हो।
यहाँको लेखन यात्रा कहिलेदेखि शुरु भएको हो ?
विक्रमाव्द पचासको दशकको शुरूवातदेखि नै म लघुकथा लेखनमा लागिपरेको हुँ । फुटकर रुपमा मेरा थुप्रै लघुकथाहरू विविन्न पत्रिकामा प्रकाशित भएका छन् । मेरो लेखन-कार्य बीचमा अलिक सुस्ताएको हो । हाल पुनः सक्रिय भएको छु । म नेपालभाषा (मेरो मातृभाषा) र नेपालीमा लेख्ने गर्छु । मातृभाषामा एउटा सङ्ग्रह प्रकाशित छ । यद्यपि म लेखनभन्दा अध्ययनमा दत्तचित्त छु ।
पुरानो पुस्ताले नयाँ पुस्तालाई लघुकथा लेखनमा आकर्षित गरिरहेको छ। नयाँ पुस्तामा आएको रुचि उनीहरूले गरेको प्रगती बारे यहाँले के कस्तो मुल्यांकन गरिरहनु भएको छ?
लघुकथा लेखनमा पुराना र नयाँ दुबै पुस्ता समर्पित छन् । पुरानो पुस्ताका लेखकहरूबाट प्रभावित नयाँ पुस्ताका लेखकहरू र नयाँ पुस्ताका लेखकहरूबाट प्रफुल्लित पुराना पुस्ताका लेखकहरूको लघुकथा लेखनमा समर्पण प्रशंसनीय छ । अन्य साहित्यिक बिधामा जस्तै लघुकथा बिधामा पनि रिसराग , प्रतिस्पर्धा , अथवा पुरस्कार तथा सम्मानमा राजनिती, आफन्तवाद , नातावाद भनौँ ,कतै यस्तो महसुस गर्नु भएको छ ?तपाईंले इंगित गर्नुभएका यावत् विकृति/ बिसङ्गतिहरू समग्र साहित्य क्षेत्रमा विद्यमान छन् । यी विडम्बनाहरू अगोचर छैनन् । म नकारात्मकताभन्दा पनि सकारात्मकतातिर ध्यानाकर्षण हुनुपर्छ भन्नेठान्दछु ।
हाम्रा गतिविधिहरूलाई यहाँले के कसरी नियालिरहनु भएको छ ?
तपाईंहरू र तपाईंहरूको पेजद्वारा संचालित प्रायः गतिविधिहरू मेरो नजरमा परेका छन् । लघुकथाको उन्नयनका लागि गरिएका ती गतिविधिहरू सराहनीय छन् । म कुनै नकारात्मक टिप्पणी गर्न रुचाउँदिनँ ।
यहाँले थुप्रै लघुकथा पढिसक्नु भएको छ।आफुलाई मन परेको एउटा कुनै लघुकथा याद छ ?जसले यहाँलाई लेख्न प्रेरित गर्यो।
मलाई लेख्नका लागि उत्प्रेरित गरेका लघुकथाहरू नभएका होइनन् , पर्याप्त छन् । यहाँ म तिनलाई उल्लेख गर्न असमर्थ छु । यद्यपि म इसपका कथा, आफन्तीका कथा, पञ्चतन्त्र, जातक कथा र खलील जिब्रानका लघुकथाहरूबाट अत्यधिक उत्साहित, प्रेरित र प्रभावित छु ।
यहाँ पुरानो पुस्ताका लघुकथाकार ,आफुले लेखेको र अति मन परेको एउटा लघुकथा बताइदिनु होस् न ?
हामीले अहिलेसम्म त्यस्तो लघुकथा लेख्न सकिएको छैन जस्तो लाग्छ । केही आफ्ना प्रिय लघुकथाहरू छन् , जुन मेरो प्रकाशोन्मुख सङ्ग्रहमा आउने नै छन् । प्रतीक्षा गर्नुहोला।
हालै मात्र हाम्रो लघुकथा केन्द्रद्वारा निर्माण गरिएको लघुकथा गानको तेस्रो वर्षको प्रवेशको कार्यक्रममा साहित्यका थुप्रै बिधामा कलम चलाइसक्नु भएका सिद्धहस्त साहित्यकार , गोरखापत्र दैनिकका पुर्व प्रधान सम्पादक, लघुकथा समाज नेपालका सस्थापक अध्यक्ष ( २०६५-२०७९) एवं श्रष्टा समाज नेपालका अध्यक्ष श्री ओम रोदन श्रेष्ठ सरले लघुकथा गान साहित्य बिधाको पहिलो र ऐतिहासिक गान भएको बताउनु भयो। नेपालको साहित्यिक गतिविधिलाई नजिकै बाट नियालिरहनु भएको यहाँ कत्तिको सहमत हुन्छ ? लामो प्रश्नको सटिक उत्तर दिनुपर्दा?
#- यहाँले सोध्नु भएको प्रश्नप्रती म पुर्ण सहमत छु। तर अन्य बाहिरी कुरा म त्यति जान्दिनँ।
मैले सोध्न भुलेका र आफुलाई भन्न मन लागेका केही कुरा छन् कि ?
लघुकथा सम्बन्धी काम-कुराहरू असङ्ख्य छन् , ती जम्मै यहाँ प्रस्तुत गर्न सम्भव छैन । त्यसका लागि अलग्गै एउटा आलेख लेख्नुपर्ला कि ! भन्ने लाग्दछ। अन्तमा , मेरो सानो भलाकुसारी आफ्नो पेज मार्फत पाठकसामु पुर्याइदिनु भएकोमा तपाईंलाई धेरै धेरै धन्यवाद ।
काठमाडौं / नक्कली भूटानी शरणार्थी मुद्दामा काठमाडौं जिल्ला अदालतले पूर्व मन्त्री सहित १६ जनालाई पुर्पक्षका लागि जेल पठाउन आदेश दिएको छ।
जिल्ला अदालतका न्यायाधीश प्रेमप्रसाद न्यौपानेको एकल इजलासले शुक्रबार अभियुक्तहरूलाई पुर्पक्षका लागि जेल पठाउन आदेश दिएको हो। अदालतले पूर्व उपप्रधानमन्त्री टोपबहादुर रायमाझी, पूर्व गृहमन्त्री बालकृष्ण खाण, गृहमन्त्रीका पूर्व सुरक्षा सल्लाहकार इन्द्रजीत राई, निलम्बित सचिव टेकनारायण पाण्डे लगायतलाई जेल पठाउन आदेश दिएको छ।
यो मुद्दामा दुई जनालाई मात्रै धरौटीमा रिहा गर्न आदेश भएको छ। टंक गुरुङलाई १० लाख र लक्ष्मी महर्जनलाई पाँच लाख धरौटीमा रिहा गर्ने आदेश दिइएको हो।
नेपालीलाई नक्कली भूटानी शरणार्थी बनाएर अमेरिका उडाउने प्रकरणमा संगठित गिरोह चलाएको आरोपमा ३० जना विरुद्ध जिल्ला अदालतमा मुद्दा दायर गरिएको थियो। जसमध्ये १८ जना पक्राउ परेका छन् भने १२ जना फरार छन्।
पूर्व मन्त्रीहरू सहित ३० जनाबाट २८ करोड ८१ लाख ७४ हजार ५०० रुपैयाँ बिगो भराउन पनि माग गरिएको थियो। उनीहरूमाथि ठगी, संगठित अपराध, लिखत कीर्ते, राष्ट्रहित प्रतिकूलको कसूर र एकीकृत कसूरमा मुद्दा लगाइएको हो।
यस मुद्दामा १२ दिनदेखि जिल्ला अदालतमा थुनछेकको बहस चलिरहेको थियो। पूर्व मन्त्रीहरूको बचाउमा वरिष्ठ अधिवक्तासहित दर्जनौं वकीलेले बहस गरेका थिए।
www.himalkhabar.com बाट