मकवानपुर । मकवानपुर जिल्लाको बागमती गाउँपालिकामा जारी छैठौं संस्करणको बागमती गोल्डकप फुटबल प्रतियोगिताको आइतबार भएको खेलबाट विभागीय टोली त्रिभुवन आर्मी क्लब सेमिफाइनलमा प्रवेश गरेको छ ।
यो सँगै खेलको सेमिफाइनल समीकरण पुरा भएको छ । आइतबार अन्तिम क्वाटरफाइनलका खेलमा आयोजक बागमती खेलकुद विकास समितीलाई ४–० गोलले हराउँदै विभागीय टोली त्रिभुवन आर्मी क्लब सेमिफाइनलमा प्रवेश गरेको थियो ।
आर्मीको जीतमा जिलेस्पी जंग कार्कीले खेलको पहिलो हाफको २६ औं मिनेटमा, रास बुढा मगरले दोस्रो हाफको ८ औं, फत्तेमान घलले १८ औं मिनेटमा र कमल थापाले ३० औं मिनेटमा समान एक–एक गोल गरे । निकै आकर्षक बनेको खेलको म्यान अफ द म्याच आर्मीका फत्तेमान घोषित भए । उनले नगद १० हजार रुपैयाँ प्राप्त गरे ।
प्रतियोगिता अन्तर्गत पहिलो सेमिफाइनल खेलमा सोमबार मछिन्द्र फुटबल क्लब र न्युरोड टिमबीच प्रतिस्पर्धा हुनेछ । यसैगरी सेमिफाइनल प्रवेश गरेको आर्मीले अब फाइनल प्रवेशका लागि भोली मंगलबार विभागीय टोली सशस्त्र प्रहरी बलको एपीएफ क्लबसँग प्रतिस्पर्धा गर्नेछ । यसअघि एपीएफसहित मछिन्द्र फुटबल क्लब र न्युरोड टिम एनआरटी सेमिफाइनल प्रवेश गरिसकेको छ ।
प्रतियोगिताको फाइनल खेल फाल्गुन १० गते हुनेछ । प्रतियोगिताको विजेता टोलीले १० लाख रुपैयाँसहित शिल्ड, मेडल तथा प्रमाणपत्र प्राप्त गर्नेछन् भने उपविजेता टिमले ५ लाख रुपैयाँ प्राप्त गर्नेछन् । यस्तै सर्वोत्कृष्ट खेलाडीले १ लाख १ हजार रुपैयाँ र अन्य विधागत उत्कृष्टले २५–२५ हजार रुपैयाँ प्राप्त गर्नेछन् ।
प्रतियोगितामा ७ वटा ए डिभिजन र तिन वटा मोफसलका गरी १० टिमको सहभागिता जनाएको बागमती गाउँपालिका खेलकुद विकास समितिले जनाएको छ । पाँचौं संस्करणको उपाधीको विजेता भुट्निज युथ स्पोर्ट्स क्लव अमेरिकाले भने यो प्रतियोगितामा सहभागिता जनाएको छैन ।
सौराहा,चितवन । १८औं सौराहा फुड फेस्टिवलमा होटल आइकावा उत्कृष्ट भएको छ । चितवन व्राण्डको रुपमा स्थापित महोत्सव पर्यटकीय नगरी सौराहामा प्रणय दिवसको अवसरमा रेष्टुरेण्ट एण्ड बार एशोसियसन नेपाल (रेवान) सौराहाले फेस्टिवल आयोजना गरेको थियो ।
फेस्टिवलमा उत्कृष्ट होटल तथा रेष्टुरेन्टमा होटल आईकावा प्रथम, केसी रेष्टुरेन्ट द्वितीय र होली लज तृतीय हुँदै पुरस्कृत भएकाे महासचिव नवीन नेपालले बताए । सौराहा सहित चितवनको पर्यटन विकासको लागि प्रणय दिवसको अवसर पारेर फेस्टिवल आयोजना गरिएको हो । सौराहाका व्यवसायीले मुनाफा आर्जन गर्नु भन्दा पनि सौराहामा पर्यटक भित्र्याउन हरेक वर्ष फेस्टिवल गर्दै आएको कार्यक्रम संयोजक सूर्यबहादुर रिमालले बताए ।
फेस्टिबल अन्तर्गत विभिन्न सांस्कृतिक कार्यक्रम, स्वादिष्ट खानाका परिकार र विभिन्न प्रतियोगिता गरिएको संयोजक रिमालले बताए । समापन कार्यक्रममा वेटर रेस, विद्यालय स्तरीय नृत्य प्रतियोगिता, ब्याडमिन्टन प्रतियोगिता र म्युजिकल चियर प्रतियोगितामा उत्कृष्ट हुनेलाई पुरस्कार तथा फेस्टिवल सफल बनाउन सहयोग गर्ने संघसंस्था तथा व्यक्तिहरुलाई मायाको चिनो प्रदान गरिएको थियो ।
उक्त अवसरमा रक्तक्यान्सरबाट पीडित व्यवसायी राजन तामाङको श्रीमतिलाई उपचारको लागि रेवान सौराहाले १५ हजार र सपना भिलेज सोसल इम्प्याक्टले १५ हजार आर्थिक सहयोग गरेका थिए ।
रत्ननगर नगरपालिका संरक्षक रहेको सो फेस्टिवलको सहआयोजकमा रेवान महिला समूह, क्षेत्रीय होटल संघ नेपाल, चितवन, युनाईटेड हात्ती सञ्चालन सहकारी संस्था रहेका थिए । ५ दिनसम्म सञ्चालन भएको फेस्टिवल पर्यटन प्रवर्द्बनका हिसाबले सफल भएको र ३० हजार पर्यटकले अवलोकन गरेकाे रेवान सौराहाका अध्यक्ष ध्रुुव गिरीले जानकारी दिए ।
चार दिन प्रवेश शुल्क नि:शुल्क गरेको रेवानले प्रणय दिवसको दिन फागुन २ गते मात्र प्रवेश शुल्क लिएको थियो । सो दिन १२ हजार बढीले फेस्टिवल अवलोकन गरेको अध्यक्ष गिरीले बताए । एक दिन लगाइएको प्रवेश शुल्क बापत भएको आम्दानी सौराहाको सौन्दर्यकणका लागि खर्च गर्ने योजना रहेको गिरीले बताए ।
समग्र सौराहाको पर्यटन विकास गर्ने, विभिन्न जातजातिका परम्परागत तथा स्थानीय, स्वदेशी, विदेशी खानाको प्रवर्द्धन गर्ने, स्थानीय कलासँस्कृति, भेषभुषाको जगेर्ना गर्दै पर्यटकीय गन्तव्यको रुपमा सौराहालाई राष्ट्रिय तथा अन्तराष्ट्रिय स्तरमा पहिचान गराउने, उज्यालो सौराहालाई निरन्तरता दिइने, प्रवेश टिकटबाट भएको आम्दानीले सौराहा पर्यटन मार्ग सौन्दर्यकरण गर्ने उद्देश्यले फेस्टिवल आयोजना गरिएको आयोजकले जनाएको छ ।
मकवानपुर । गजलकार अनिश न्यौपाने ‘भावना’ श्रीकृष्ण तालुमाया नमुना स्मृति गजल सम्मानबाट सम्मानित भएका छन् । गजल मञ्च मकवानपुरले २ सय ११ औं गजल यात्रामा गजलकार न्यौपानेलाई नगद ५ हजार रुपैयाँसहित उक्त सम्मान प्रदान गरेको हो ।
साहित्यकाे गजल विधाको उन्नयन, विकास र प्रवर्धनमा महत्वपूर्ण भूमिका खेलेको भन्दै युवा गजलकार न्यौपानेलाई सम्मान गरिएको हो । मकवानपुरमै अध्ययन र गजल कर्म गरेका न्यौपानेले २०७० मा ‘पढेपछि थाहा पाउँछौं’ गजल संग्रह प्रकाशन गरेका छन् । उनको ‘मनको आँखा’ *मुक्तक संग्रह पनि प्रकाशनमा छ ।
सम्मान पाएसँगै न्यौपानेले कार्यक्रममा आफ्ना तीन वटा गजल प्रस्तुत गरेका थिए ।भोला शिवाकोटीले आफ्ना बुबाआमा र छोरीको स्मृतिमा स्थापित गजल सम्मान पाउने न्यौपाने पहिलो गजलकार हुन् । मञ्चले अबदेखि हरेक वर्ष गजल सम्मान प्रदान गर्ने मञ्चका अध्यक्ष केशव समर्पणले जानकारी दिए ।
यसैबीच मकवानपुरका माध्यमिक तहस्तरीय गजल प्रतियोगितामार्फत सर्वोत्कृष्ट मनिका नेगी भइन् । बुद्ध मावि बकैया–३ हात्तिसुँडेमा कक्षा ९ कि छात्रा नेगीले नगद ५ हजार ५ सय ५५ रुपैयाँ राशीको मनमाया स्मृति गजल पुरस्कार प्राप्त गरेकी छन् । प्रतियोगितामा १७ जना विद्यार्थीको सहभागिता रहेको थियाे । गजल मञ्च मकवानपुरका पूर्वअध्यक्ष दीपक गौतमले आफ्नी हजुरआमाको स्मृतिमा स्थापना गरेको पुरस्कार हरेक वर्ष माध्यमिक तहमा अध्ययनरत विद्यार्थीहरुबीच गजल प्रतियोगिता गरी सर्वोत्कृष्टलाई प्रदान गर्ने गरिएको छ ।
मञ्चका अध्यक्ष केशव समर्पण, पुरस्कार संस्थापक भोला शिवाकोटी, प्रमुख अतिथि निमेष निखिल, विशिष्ट अतिथि तुलसी घिमिरेलगायतले न्यौपाने तथा नेगीलाई नगद र सम्मानपत्र प्रदान गरेका थिए ।
मकवानपुर। राष्ट्रिय युवासंघ नेपाल र प्रेस चौतारी नेपाल मकवानपुरबिच मैत्रीपूर्ण फुटबल हुने भएकाे छ । भाेली (फागुन ७ गते) प्रजातन्त्र दिवसको अवसरमा मैत्रीपुर्ण फुटबल प्रतियोगिता हुने भएको हाे ।
राष्ट्रकाे लागि र स्वास्थ्यकाे लागि खेल अनिवार्य भएकाेले मैत्रीपूर्ण प्रतिष्पर्धामा खेल आयाेजना गर्न लागिएकाे चाैतारी मकावानपुर अध्यक्ष बालकृष्ण अधिकारीले बताए । आगामी फागुन ११ गतेदेखि १९ गतेसम्म काठमाडौंमा हुने केपी ओली कप फुटबल प्रतियोगीताको प्रचारका लागि मैत्रीपुर्ण सेभेन ए साईड फुटबल आयोजना गरिएको राष्ट्रीय युवा संघ नेपाल मकवानपुरका संयोजक राजेश नगरकोटीले बताए ।
मैत्रीपुर्ण सेभेन ए साईड फुटबल खेलले केपी ओली कप फुटबल प्रतियोगिताको प्रचार हुनुका साथै २ संगठनबीचको सम्बन्ध सुमधुर हुने प्रेस चौतारी नेपाल मकवाननपुरका अध्यक्ष अधिकारीले बताए । फागुन ७ गते हेटौंडा ५ पिप्ले क्याम्पाचौरमा बिहान ८ बजे हुने प्रतियोगिताको उद्घाटन बागमती प्रदेशका प्रथम मुख्यमन्त्री डोरमणि पौडेलले गर्ने छन् ।
मकवानपुर । सहीखबर डटकम तथा सहीखबर साप्ताहिक पत्रिकाकाे सम्पादक सरिता दाहाल उत्कृष्ट पत्रकार वर्ष अवार्ड २०८० बाट पुरस्कृत भएकी छिन् ।
२०६१ साल माघबाट मिडिया क्षेत्रमा निरन्तर सकृय दाहाल पछिल्लाे १२ वर्षदेखि सहीखबर मिडिया सञ्चालन गरिरहेकी छिन् । न्यू मिडिया एकेडेमी प्रालि र पावर ईन्टरनेशन मिडिया नेपालको संयुक्त आयोजनामा हेटौंडामा भएकाे पाचौँ राष्ट्रिय जर्नालिज्म अवार्डमा सम्पादक दाहाल उत्कृष्ट पत्रकार वर्ष अवार्डबाट सम्मानित भएकी हुन् । पत्रकार दाहाल मकवानपुरबाट राष्ट्रिय स्तरका अन्य मिडियामा समेत आवद्ध छिन् ।
कार्यक्रममा अन्य विधाहरुमा पनि सम्मान र तथा पुरस्कार प्रदान गरिएकाे थियाे। जसमा अग्रज पत्रकार अवार्डबाट कृष्णराम परियार, सुवर्णलाल श्रेष्ठ र हरि हुमागाईलाई सम्मान गरिएकाे छ । संचार उद्यमीतर्फ उज्ज्वल चौलागाईं, माधव न्यौपाने, ध्रुवराज ढकाललाई सम्मान गरिएकाे छ ।
यसैगरी सर्वोत्कृष्ट पत्रकार राष्ट्रिय वर्ष अवार्डबाट कान्तिपुर दैनिकका हाेम कार्की, उत्कृष्ट पत्रकार पुरूष वर्ष अवार्डबाट राताेपाटी अनलाईनका श्यामलाल दुलाल (गणेश) खाेज पत्रकार वर्ष अवार्डबाट अनलाइन खबरका रेवति तिमल्सिना (नविन)
टेलिभिजन पत्रकार वर्ष अवार्डबाट टिम टेलिभिजनका मनिल महतो, अनलाइन पत्रकार वर्ष अवार्डबाट अनिरुद्र खबरका अनिल पराजुली, चलचित्र पत्रकार वर्ष अवार्डबाट राताे समाचारका राजेश थापा, ग्रामीण पत्रकार वर्ष अवार्डबाट नेपाल खबरकी कृष्णा विष्ट (सुनिता), खेलकुद पत्रकार वर्ष अवार्डबाट गाेल नेपालका बिक्रम बानियाँ, उदियमान पत्रकार वर्ष अवार्डबाट रवीन्द्र वाईवालाई पुरस्कृत गरिएकाे हाे ।
संस्थाले २०७५ सालदेखि स्थानीय तथा राष्ट्रीय मिडीयामा सकृय पत्रकारहरुलाई अवार्ड प्रदान गर्दै आएकाे न्यू मिडिया एकेडेमी प्रालि अध्यक्ष मणिराज गाैतमले बताए । श्रमजीवि पत्रकारहरुलाई निरन्तर फिल्डमा खटीएर काम गर्ने उर्जा मिलाेस् भनेर यस्ताे कार्यक्रम गरिएकाे गाैतमले बताए ।