मकवानपुर । झरना साहित्यिक परिवारकाे २ सय ७६ औं नियमित साहित्य शृङ्खलाकाे अवसरमा २८औं मुक्तक साँझ–२०७८ कार्यक्रम भएकाे छ । शनिबार भएकाे कार्यक्रम अन्तरगत सम्मान, प्रतियाेगिता एवम् टिकटमा मुक्तक कार्यक्रम भएकाे हाे ।
मुक्तक साँझ कार्यक्रममा मकवानपुरका ३ जना तथा अन्य जिल्लाका ३ जना अतिथि मुक्तककारकाे मुक्तक वाचन गरेका थिए ।मुक्तक साँझमा मकवानपुर, काठमाडौं, सिन्धुली र नुवाकोटका ६ जना मुक्तककारहरुले १०/१० वटा मुक्तक वाचन गरेका थिए । मकवानपुरका डिबी बर्तौला, देवेन्द्र सञ्जेल र भवानी तिमल्सिना न्याैपाने तथा सिन्धुलीका बिर्ख वाईबा, काठमाडौंकी निशा केसी र नुवाकोटकी सुशीला भट्टले १०/१० वटा मुक्तक वाचन गरेका हुन् ।
यसैगरी जनप्रिय प्राविधिक शिक्षालय हेटौंडा–१६ मा अध्ययनरत अजिता ओझा उत्कृष्ट मुक्तककार घोषित भएकी छिन् । मावि तहमा अध्ययनरत विद्यार्थीबीच आयोजित मुक्तक प्रतियोगितामा सहभागी भई उत्कृष्ट घोषित हुनुभएकी अजितालाई २ हजार ५ सय रुपैयाँ नगदसहित शिव–सावित्री अधिकारी स्मृति नवप्रतिभा मुक्तक पुरस्कार–२०७८ बाट सम्मान गरिएको छ । झरना साहित्यिक परिवारका संस्थापक अध्यक्ष रमेशमोहन अधिकारीले आफ्नो आमा र बुबाको स्मृतिमा उक्त पुरस्कार स्थापना गरेका हुन् ।
झरना साहित्यिक परिवारको आयोजनामा भएको प्रतियोगितामा १९ जनाको सहभागिता रहेको थियो । सहभागी मध्ये उत्कृष्ट १० मुक्तक छनोट गरी झरनाले शनिबार प्रस्तुतीको अवसर दिएको थियो । उत्कृष्ट १० मध्ये केही प्रतियोगी प्रस्तुतीको चरणमा सहभागी नभएकाे निर्णायक सानुबाबु खनालले जानकारी दिए ।
झरना साहित्यिक परिवार मकवानपुरका अध्यक्ष दीपक गौतमको सभाध्यक्षता तथा मुक्तककार रमेश पौडेलको प्रमुख आतिथ्यमा नियमित साहित्य शृङ्खला तथा मुक्तक साँझ भएको हो । साेही अवसरमा झसपाकाे आयाेजनामा भएकाे वकैया कला साहित्य महाेत्सवमा सहभागी तथा सहयाेग गर्ने विभिन्न व्यक्ति तथा संस्थालाई सम्मान तथा कदर पत्र प्रदान गरिएकाे थियाे ।
मकवानपुर । बालयौन दुर्व्यवहारको आरोप लागेका एक शिक्षक आफैं प्रहरीको सम्पकमा आएका छन् । पूर्वि मकवानपुरको बागमती गाउँपालिका–८, शान्तिपुरस्थित जनता माध्यमिक विद्यालयका ३ आरोपित शिक्षकहरु मध्ये हेम बिक आफैं प्रहरीको सम्पर्कमा आएको जिल्ला प्रहरी कार्यालय मकवानपुरका निमित्त प्रहरी प्रवक्ता देवेन्द्र दासले जानकारी दिए ।
विकसहित ३ जनाविरुद्ध प्रहरी कार्यालयमा जाहेरी दताए भएपछि हेम बिक भने आफैं प्रहरीको सम्पर्कमा आएका हुन् । अन्य दुइ फरार रहेको प्रहरीले जनाएको छ । तीन जना शिक्षकले विद्यार्थीमाथि यौन दुव्र्यवहार गरेको आरोप लगाउँदै अभिभावक र बालिकाहरुले विहीबार प्रहरीमा जाहेरी दिएका थिए । अभियोग लागेका अन्य दुई शिक्षकहरु लोकबहादुर विक र रुद्रबहादुर विक भने अझै फरार रहेको दासले बताए ।
प्रहरीका अनुसार उनीहरुको अहिले खोजी कार्य भइरहेको छ । सुरक्षा अवस्थालाई ध्यानमा राख्न भन्दै अहिले विद्यालयको पठनपाठन बन्द गरिएको छ । वर्षिक परिक्षाको तयारीमा रहेका विद्यार्थीहरु विद्यालय बन्द हुँदा अर्को मारमा परेका छन् ।
हेटाैडाकाे १६ वडामा एमालेकाे वडा अध्यक्ष सिफारीस
Tags: No Comments
मकवानपुर /स्थानीय तहको निर्वाचन नजिकिदै गर्दा नेकपा एमाले मकवानपुरले हेटौंडा उपमहानगरपालिकाको १९ मध्ये १६ वटा वडाका अध्यक्षहरू सिफारिस गर्ने काम टुङ्याएको छ ।
उपमहानगरपालिकाको मेयर उपमेयरबारे आज २५ चैतमा उमेदवार टुङ्याउने भनिएता पनि आगामी २७ चैतसम्मको लागि म्याद लम्ब्याईएको छ । पार्टी भित्र आकाक्षि बढि भएपछि मिति लम्ब्याईएको हो ।
बागमती प्रदेश राजधानी तथा प्रदेशको एक मात्रै उपमहानगर हेटौंडा उपमहानगरपालिकाको वडा ३, १० र १७ बाहेक अन्य वडामा वडाअध्यक्ष भने टुङ्याएको छ । पार्टी अध्यक्ष एकालाल श्रेष्ठका अनुसार यी मध्ये केहि वडाहरुमा सर्वसम्मत उमेद्वार छनौट भएका छन्, भने केहि वडाले वडा अध्यक्षमा ३ जनासम्मको नाम जिल्ला कमिटीलाई सिफारिस गरेको थियो ।
वडा अध्यक्षको लागि हेटौंडाको वडा नम्बर १ मा सर्वसम्मत उमेद्वार छनौट भएको छ । १ नम्बर वडामा उत्तमप्रसाद पौडेललाई अध्यक्षको उम्मेदवार बनाउने निर्णय गरेको छ । वडा कमिटीको अध्यक्ष समेत रहेका पौडेलको नेतृत्वमा वडा सदस्यमा खुलातर्फ सोनामसिं स्याङ्तान र रामकृष्ण अधिकारी, महिला सदस्यमा मनु दाहाल र दलित महिला सदस्यमा ईश्वरी रसाईलीलाई उम्मेदवार बनाउने निर्णय गरेको छ । वडा सदस्यमा ईश्वरी रसाईली र खुला सदस्यमा सोनामसिंह स्याङ्तान २०७४ सालको स्थानीय तहको निर्वाचनमा निर्वाचित वडा सदस्यहरु हुन् ।
वडा नम्बर २ बाट बर्तमान वडाध्यक्ष हरि राउत पुनः उम्मेद्वार बनेका छन् । वडा कमिटिको बैठकले राउतलाई सर्वसम्मत रुपमा वडाध्यक्षको उम्मेद्वार बनाएको हो । वडा नम्बर २ को दलित महिला सदस्यमा सुमित्रा सुनार कामीलाई सर्वसम्मत गर्दा बाँकी रहेको खुल्ला वडा सदस्य र महिला सदस्यहरुमा भने ८ जनालाई सिफारिस गरिएको छ । सिफारिस हुनेहरुमा रामकृष्ण तिमल्सिना, महेश्वरमान श्रेष्ठ, रेनु गुरुङ, शिशिर सुवेदी, जितेन्द्र श्रेष्ठ, चन्द्रावति पनेरु, सिता तिमल्सिना र अञ्जु अधिकारी रहेका छन् ।
वडा नम्बर ४ को अध्यक्षमा नेकपा एमालेले नवीन सिग्देललाई सिफारिस गर्ने निर्णय गरेको छ । एमाले ४ नम्बर वडा कमिटीको बैठकले सर्वसम्मत वडा अध्यक्ष र सदस्यहरुको नाम सिफारिस गर्ने निर्णय गरेको हो । बैठकले वडा सदस्यमा जनरल श्रेष्ठ, जगन्नाथ पाण्डे, गीता त्रिपाठी र विष्णुदेवी देउलालाई सिफारिस गरेको छ । वडा अध्यक्षमा सिग्देल र सदस्यमा जनरल श्रेष्ठ दोस्रो कार्यकालका लागि उम्मेदवार हुने भएको छ भने पाण्डे, त्रिपाठी र देउला नयाँ अनुहार हुन् ।
एमालेले हेटौंडा–५ को वडा अध्यक्षमा सुशील घिमिरेलाई उम्मेदवार बनाउने भएको छ । वडा कमिटीले वडा अध्यक्षमा घिमिरेलाई उम्मेदवार बनाउने सर्वसम्मत निर्णय गरेको हो । ५ नम्बर वडा कमिटीले वडा सदस्यमा ज्ञानु थापा, राम बहादुर राई, भगवती बिक र रञ्जीता सिलवालको नाम सिफारिस गर्ने निर्णय गरेको छ । ज्ञानु थापा र भगवती बिक अहिले पनि वडा सदस्य हुन्, भने राई र सिलवाल नयाँ हुन् ।
हेटौंडा–६ को वडा अध्यक्षमा विश्वराज राई सर्वसम्मत सिफारिस भएका छन् । वडा कमिटीले राईको नाम सर्वसम्मत सिफारिस गर्ने निर्णय गरेको हो । अन्य सदस्यहरू नाम सिफारिस बाकी रहेको छ ।
यस्तै एमाले ७ नम्बर वडा कमिटीले वर्तमान अध्यक्ष राजन थापालाई नै आगामी निर्वाचनमा उम्मेदवार बनाउने निर्णय गरेको छ । थापालाई सवसम्मत उमेदवार बनाउने निर्णय गरेको हो । यस्तै सदस्यमा देवराज रिमाल र नरबहादुर भ्लोन, दलित महिला सदस्यमा सपना बिक र महिला सदस्यमा तुलसा अधिकारी सर्वसम्मत चयन हुनुभएको छ । रिमाल हाल जिसस सदस्य हुन् ।
त्यसैगरी हेटौंडा ८ को अध्यक्षमा एमालेको तर्फबाट तीनजनाको नाम सिफारिस भएको छ । सिफारिस हुनेहरुमा युवा नेता बोलबहादुर कार्की, यसोधा उप्रेती र रमेशकुमार पौडेल छन् । वडा सदस्य खुल्लामा गोपाल श्रेष्ठ र राजु मुक्तान सर्वसम्मत हुँदा महिला सदस्यमा मञ्जु भुर्तेल, सुशिला मल्ल र सुमित्रा पाण्डे सिफारिस हुनु भएको छ । दलित महिला सदस्यमा कल्पना विक र ममता देउला सिफासिर हुनु भएको छ ।
त्यस्तै एमालले वडा नम्बर ९ मा युवा नेता नरेन्द्र भण्डारी सहित ३ जनाको नाम वडा अध्यक्षमा सिफारिस गरेको छ । पार्टी वडा कमिटीको बैठकले नरेन्द्र भण्डारीसँगै हालका वडा अध्यक्ष लक्ष्मण भण्डारी र गोमा शाहको नाम सिफारिस गर्ने निर्णय गरेको छ । यस्तै २ जना खुला सदस्यमा ६ जनाको नाम सिफारिस गरिएको छ । खुला सदस्यमा मदन न्यौपाने, यदुवंश खतिवडा, नारायण खतिवडा, रामकुमार श्रेष्ठ, टिका प्रसाद भट्टराई र सिताराम पौडेलको नाम सिफारिस गर्ने निर्णय भएको छ । महिला सदस्यमा मीना अर्याल र दलित महिलामा लक्ष्मी नेपालीको नाम सिफारिस गरिएको छ । लक्ष्मी नेपाली हालपनि पनि वडा सदस्य हुन भने अर्याल नयाँ हुन् ।
हेटौंडा–११ को वडा अध्यक्षमा तीनजनाको नाम सिफारिस गरेको छ । वडा कमिटीको बैठकले वडा अध्यक्षमा जुना दाहाल, रामचन्द्र न्यौपाने र दीपक सिवाकोटीको नाम सिफारिस गरेको छ । यस्तै वडाबाट सदस्यमा खुलातर्फ अक्कल बहादुर रोक्का (तीर्थ) र सूर्यबहादुर खुलाल, महिला सदस्यमा गोपिनी सापकोटा र दलित महिला सदस्यमा गीता सुनारको नाम सिफारिस गर्ने निर्णय सर्वसम्मत भएको छ । दाहाल र न्यौपाने हाल वडा सदस्य हुन् ।
यसैगरी हेटौंडा–१२ को अध्यक्षमा राजेश नगरकोटीलाई उम्मेदवार बनाउन सर्वसम्मत सिफारिस गर्ने निर्णय गरेको छ । वडा कमिटीले नगरकोटीलाई सर्वसम्मत अध्यक्ष पदको उम्मेदवार बनाउने निर्णय गरेको हो ।
खुला सदस्यतर्फ ज्ञानबहादुर श्रेष्ठ र महेश भट्टराई, महिला सदस्यतर्फ रुक्मिणी स्याङ्तान र दलित महिलातर्फ गीता परियारलाई सर्वसम्मत सिफारिस गर्ने निर्णय गरेको छ ।
हेटौंडा– १३ मा नेकपा एमालेका तर्फबाट वडाध्यक्षमा पेम्बा लामा सर्वसम्मत चयन भएका छन् । सदस्यहरुमा आशिष थापा, बुद्द गोले, बिष्णुमाया परियार र बिष्णुमाया थिङ सर्बसम्मतरुपमा सिफारिस भएको पार्टी अध्यक्ष श्रेष्ठले बताए।
त्यस्तै वडा नम्बर १४ मा पनि सर्वसम्मत रुपमा वडाध्यक्ष सिफारिस भएको छ । वडा कमिटिको बैठकले बर्तमान वडाध्यक्ष तथा नेकपा एमालेका जिल्ला सचिवालय सदस्य दिपक खड्कालाई वडाध्यक्षको उम्मेद्वार बनाउने निर्णय गरेको छ ।
त्यस्तै हेटौंडा–१५ को वडा अध्यक्षमा सुनिल मोक्तानलाई उम्मेदवार बनाउन सिफारिस गरेको छ । वडा कमिटीको बैठकले वडा अध्यक्षसहित सदस्यहरु पनि सर्वसम्मत सिफारिस गर्ने निर्णय गरेको छ । वडा कमिटीले वडा सदस्यमा महिलातर्फ पातलीमाया गोङ्बा, दलि महिलातर्फ मिनु विश्वकर्मा, खुलातर्फ राजेन्द्र तितुङ र सिंह बहादुर लोलाई उम्मेदवार सिफारिस गर्ने निर्णय गरेको छ ।
त्यस्तै एमालले हेटौँडा–१६ बाट बसन्तप्रसाद लामिछानेलाई वडाध्यक्ष बनाउन सिफारिस गरेको छ । वडा कमिटीको बैठकले लामिछानेलाई वडाध्यक्षमा सर्वसम्मत चयन गरेको हो । वडा सदस्यमा खुलातर्फ राजेन्द्र गरन्जा र कृष्ण बहादुर रुम्बा, दलित महिलातर्फ पवित्रा बिश्वकर्मा र महिलातर्फ अस्मिता भुषाललाई उम्मेदवार बनाउने निर्णय गरेको छ ।
त्यस्तै एमालेले हेटौँडा–१८ मा हालका अध्यक्ष अनिलकुमार बानीयाँलाई नै वडाध्यक्षमा उम्मेद्वार बनाएको छ । वडा कमिटिको बैठकले बर्तमान वडाध्यक्ष समेत रहेका बानीयाँलाई वडाध्यक्षको उम्मेद्वार बनाउने निर्णय गरेको हो । सदस्यहरुमा तोयानाथ तिमल्सिना, विश्वनाथ ढुंगाना, महिला सदस्यमा कल्पना कुईकेल र दलित महिला सदस्यमा पुजा मग्रातीलाई उमेदवार बनाउने सर्वसम्मत निर्णय गरेको छ ।
त्यस्तै हेटौंडा–१९ मा अध्यक्षका लागि तीनजना आकांक्षीको नाम सिफारिस गरिएको छ । वडा कमिटीको बैठकबाट अध्यक्षका आकांक्षी बाहालवाल वडा अध्यक्ष नरनाथ सुवेदी सहित रत्नबहादुर ब्लोन र इन्दिरा तामाङको नाम सिफारिस गर्ने निर्णय भएको छ । सदस्यमा दलित महिलामा शान्ति बिक र महिलामा रमा गोले सर्वसम्मत सिफारिस भएका छ्न । २ जना खुला सदस्यमा कृष्णमान स्याङ्तान, प्रताप थिङ र राजकुमार बज्युको नाम सिफारिस गरिएको छ । इन्दिरा तामाङ र शान्ति बिक हाल पनि वडा सदस्य हुन् ।
बाकी ३ वटा वडामा सक्दो चांडो उम्मेदवारी टुङ्याइने पार्टीले जनाएको छ ।
मकवानपुर । गैरसरकारी संस्था महासंघ नेपाल बागमती प्रदेश समिति अध्यक्षमा आरती पाठक सर्वसम्मत चयन भएकी छिन् ।हेटौंडामा विहीबार भएको दोस्रो अधिवेशन तथा तेस्रो साधरणसभाबाट मकवानपुरकी पाठकको नेतृत्वमा ९ सदस्यीय कार्यसमिति चयन गरेको हो ।
यसैगरी समिति उपाध्यक्ष कमलकुमार विश्वकर्मा (मकवानपुर), सचिव नरेश श्रेष्ठ (ललितपुर), सहसचिव मीनकुमार केसी (नुवाकोट), कोषाध्यक्ष सुमित्रा चेपाङ (धादिङ) रहेका छन् । यस्तै समिति सदस्यमा गणेश भण्डारी (काठमाडौं), अनिता नेपाली (चितवन), देवकी पौडेल (नुवाकोट), अनिता मानन्धर (काभ्रे) छन् । समितिको कार्यकाल ३ वर्षको रहनेछ । पाठक मानवअधिकार संरक्षण तथा मानब बेचबिखन विरुद्ध संजालका संयोजक समेत हुन् ।
दामोदर अर्यालको अध्यक्षतामा भएकाे साधारणसभामा बागमती प्रदेशका मुख्यमन्त्री राजेन्द्र पाण्डेको प्रमुख आतिथ्यता रहेकाे थियाे ।
मुख्यमन्त्री पाण्डेद्वारा राष्ट्रिय प्राथमिकता प्राप्त योजनाको निरीक्षण, कामको रफ्तार बढाउन निर्देशन
मकवानपुर/बागमती प्रदेश सरकारका मुख्यमन्त्री राजेन्द्रप्रसाद पाण्डेले राष्ट्रिय प्राथमिकता आयोजना काठमाण्डौँ तराइ मधेश द्रुतमार्गको सञ्चालित विकास निर्माण कार्यको निरीक्षण गरेका छन् ।
मुख्यमन्त्री पाण्डेले राष्ट्रिय विकास समस्या समाधान समितिको बैठक बसेपछि राष्ट्रिय प्राथमिकता प्राप्त योजनाको अवस्थाबारे निरीक्षण गरेका हुन् । समितिको बैठक १५ चैतमा बसेको थियो । बैठकमा भएको छलफल अनुसार आयोजनाको कामको अनुगमन गर्न बागमती प्रदेश सरकारका आन्तरिक मामिला तथा कानून मन्त्री कृष्णप्रसाद शर्मा खनाल सहित निरीक्षण गर्न आयोजना क्षेत्रमा पुगेका मुख्यमन्त्री पाण्डेले द्रुतमार्ग अन्तर्गत लेनडाँडा क्षेत्रमा निर्माणाधीन सुरुङ तथा पुलहरुको निरीक्षण गरे ।
उनले हाल भैरहेको कामको गति सकरात्मक भएको भन्दै आयोजना अन्तर्गत अन्य क्षेत्रमा कामको गतिमा तीब्रता प्रदान गर्न तोकिएको समय सीमा भित्र आयोजना सम्पन्न गर्ने गरी काम रफ्तार बढाउन निर्देशन दिए । राष्ट्रिय गौरवको प्राथमिकता आयोजनालाई नाम अनुसार कार्य प्रगति हासिल हुने गरी कार्यमा तीब्रता दिन उनले निर्देशन दिएका हुन् ।
उक्त कार्यक्रममा नेपाली सेना २८ नम्बरका बाहिनीपति सहायक रथी हिम्मत विष्ट, नेपाली सेना काठमाण्डौँ तराइ मधेश द्रुतमार्ग आयोजना लेन डाँडाका क्याम्पका प्रमुख मेजर राम सागर यादवले मुख्यमन्त्रीलाइ योजनाको समग्र कार्य प्रगतिको अवस्थाको बारेमा जानकारी गराएका थिए । सुरुङ्मार्गको निर्माण पश्चात ७२ दशमलब ५ किलोमिटर लम्बाइ रहने द्रुतमार्गको कामलाइ बागमती प्रदेशका मुख्यमन्त्री पाण्डेले समयमा नै सम्पन्न गरेर विकासमा नयाँ फड्को मारेको आभाष बागमती प्रदेशवासीका साथै समग्र नेपालीले गर्न पाउने वातावरण सृजना गर्न र मालसामानको ढुवानीमा हुने गरेको खर्च घटाउने र काठमाडौँ उपत्यका भित्र बढ्दो जनसंख्याको चापलाइ कम हुने अवस्था निर्माणका लागि समेत यो आयोजना नेपालको लागि अत्यावश्यक रहेको बताए ।
निरीक्षणका क्रममा आयोजना अन्तर्गत धेरे क्षेत्रमा निर्माणधानीन सुरुङ, गुणस्तर मापन प्रयोगशाला, रुख कटान गरिएका क्षेत्र लगायतको स्थलगत अवलोकन तथा फिल्डमा खटिएका प्राविधिक तथा मजदुरहरुसँग अन्तक्रिया गरेका थिए ।
प्रस्तावित निजगढ विमानस्थल र द्रुतमार्ग एक आपसमा परिपूरक आयोजना भएकोले बागमती प्रदेश र मधेश प्रदेश विचको सम्बन्धको सेतुको रुपमा अघि बढाउँदै यी दुबै आयोजनालाइ नेपालको गेम चेञ्जर आयोजनाको रुपमा सम्पन्न गर्न आवश्यक रहेको कुरामा जोड दिनु भए ।
बागमती प्रदेश सरकार आयोजना सम्पन्न गर्ने क्रममा आउने अवरोधहरुलाइ समयमा नै निराकरण गर्न र सहजीकरण गर्न प्रतिवद्ध रहेको बताए ।