मकवानपुर । प्राकृतिक विपत्तिको समयमा जनताको अवश्यकतालाई सम्बोधन गर्न सत्तासिन नेपाली काँग्रेसले आग्रह गरेको छ ।
नेपाली काँग्रेस बागमती प्रदेश सभापति इन्द्रबहादुर बानियाँले जनताको पीर मर्कामा सरकार चुप रहनु नहुने बताएका छन् । अविरल बर्षाका कारण बागमती प्रदेशमा भएको प्राकृतिक विपत्तिमा उद्धार तथा राहतका लागि नेपाली कांग्रेस बागमती प्रदेश समितिले अपिल गरेको हो ।
प्रदेश सभापति बानियाँद्वारा जारी विज्ञप्तिमा पछिल्ला दिनहरूमा अविरल वर्षाका कारण बागमती प्रदेशका विभिन्न जिल्लाहरुमा भएको प्राकृतिक विपत्तिबाट जनधनको क्षति भएकोप्रति दुःख व्यक्त गर्दै राहतका लागि आग्रह गरेको हो ।
निरन्तर वर्षाका कारण पहाडी भू–भागमा पहिरो र नदीहरूमा पानीको बहाव बढ्दा तटीय क्षेत्रका नागरिक उच्च जोखिममा रहेको विज्ञप्तिमा उल्लेख छ ।
“बागमती प्रदेश सरकारले विपदको पूर्व तयारी र जोखिम सम्भाव्य क्षेत्रहरूको पहिचान गरी त्यस क्षेत्रका नागरिकलाई सम्भाव्य जोखिमबारे पुर्व जानकारी दिई सुरक्षित रहने वातावरण बनाउनु जरुरी छ, यसका लागि प्रदेश सरकार अन्तरर्गतका निकायहरूलाई जोखिम क्षेत्रहरूको निगरानीका लागि आफ्ना सबै संयन्त्र परिचालन गर्नु आवश्यक छ”–विज्ञप्तिमा भनिएको छ ।
प्रदेशभर प्राकृतिक विपत्तिमा परेका नागरिकलाई तत्काल उद्धार, आवश्यक स्वास्थ्य उपचार, उचित राहतका साथै क्षतिपुर्ति प्रदान गर्न कुनै पनि कसर नराख्न र तयारी अवस्थामा रहन बागमती प्रदेश सरकारसँग नेपाली कांग्रेस बागमती प्रदेश कार्यसमितिले अपिल गरेको छ ।

काँग्रेसको विशेष अभियान समापन
नेपाली कांग्रेस मकवानपुरले केन्द्रीय परिपत्रअनुसारको आन्तरिक विशेष अभियान २०८० अनुसारको १० दिने अभियान समापन गरेको छ । समापन कार्यक्रममा पार्टी केन्द्रीय सदस्य तथा अभियानका मकवानपुर प्रतिनिधि लक्ष्मी खतिवडाले काँग्रेस विगतमाभन्दा बलियो जनविश्वास लिएर अघि बढीरहेको दाबि गरिन् ।
कार्यक्रममा बागमती प्रदेश सदस्य मकवानपुर प्रतिनिधि कैलाश कोइरालाले पार्टीलाई जनस्तरमा अझै बलियो बनाएर लैजान अभियानको अवश्यकता रहेको बताए । मकवानपुरको वडा, पालिका, प्रदेश तथा संघीय तहमा यही साउन २० गतेदेखि २९ गतेसम्म खटिएका जिल्ला तथा प्रदेशबाट खटिएका प्रतिनिधिहरुबाट पार्टीको अहिलेको अवस्था र पार्टी सुदृढिकरणको लागि भावी दिनमा गर्नुपर्ने क्रियाकलाप र सुझाव समेटी बनाईएको प्रतिवेदन जिल्ला कमिटी, बागमती प्रदेश प्रतिनिधि र केन्द्रीय प्रतिनिधिलाई बुझाएका थिए ।
केन्द्रीय प्रतिनिधि र बागमती प्रदेश प्रतिनिधिले वडा, गाउँपालिका, क्षेत्रीय र संघीय तहको आन्तरिक विशेष अभियानबाट आएको सुझावसहितको प्रतिवेदन लिएर आफ्नो रायसुझाव र आफूले बुझेको संगठनको अवस्थाबारे प्रतिबेदन तयार पारी केन्द्रीय कार्यालय र बागमती प्रदेश कार्यालयमा प्रतिवेदन बुझाउने छन् ।
कार्यक्रममा बागमती प्रदेशबाट खटिएका प्रदेश क्षेत्रीय प्रतिनिधिहरु देवकी गौतम, कृष्णकुमार श्रेष्ठ सिन्धुली, विवशकुमार वाइबा, कृष्णकुमार श्रेष्ठ चितवन, पूर्व सभापति रघुरमण न्यौपाने, उपसभापति आनन्द कठायत, सचिवद्वय भीमसेन महत र ईश्वर पाठक, जिल्ला सदस्यहरु, संघीयरप्रदेश सभापतिहरु, जिल्लाबाट वडामा खटिएका प्रतिनिधिहरु, गाउँपालिका वडा सभापतिलगायतको उपस्थिति रहेको थियो ।
मकवानपुर । उच्चशिक्षालाई उच्च प्रामथिकता दिदै मकवानपुरकाे एउटा वडा कार्यालयले विद्यार्थीलाई क्याम्पस जान नि:शुल्क बस सेवा प्रदान गर्ने भएकाे छ । यसकाे लागि सम्बन्धित वडाकाे स्थायीवासी हुनुपर्ने छ ।
यसकाे लागि वडा कार्यालयले सार्वजनिक सूचना प्रकाशित गरेकाे छ । मकवानपुरकाे हेटौडा उपमहानगरपालिकाबाट वडा नम्बर १८ ले क्याम्पस पढ्ने बिद्यार्थीहरुलाई बसभाडाकाे समस्या भएमा वडा कार्यालयले सहयाेग गर्ने भएकाे हाे । हेटौडा बजार पुग्न दैनिक १८ किलोमिटरको यात्रा गर्नुपर्दा वडावाट उच्च शिक्षा लिन हेटौडा बजार ओहाेर दाेहाेर गर्ने विद्यार्थीले दैनिक चर्को बसभाडा खर्च गर्नुपर्ने अवस्थालाई वडाले सम्बाेधन गर्न लागेकाे हाे ।

भाडाकै कारण क्याम्पस पढ्न समस्या नहाेस भनेर वडा कार्यालयले याे याेजना अघि सारेकाे वडाध्यक्ष अनिल बानियाँले बताए । वडाध्यक्ष बानियाँका अनुसार वडाले निर्णय नै गरेर कक्षा ११ देखि स्नातकोत्तरसम्म पढ्ने वडाभित्रका विद्यार्थीको हेटौडा आउजाउको भाडा तिर्ने निर्णय भएको छ । यसै वडामा कक्षा १२ सम्म अध्यापन हुने ज्याेती मावि छ ।
वडाबाट हेटाैंडा नआइपुग्दै जनप्रिय मावि प्राविधिक विद्यालय पनि हेटाैंडा १६ मा छ । तर हेटाैंडा बजारमै आएर आफूले राेजेकाे विषय पढीरहेकाहरुकाे सहजताकाे लागि वडाले याे याेजना अघि सारेकाे बताइएकाे छ ।
वडा कार्यलयले स्थानीय यातायात व्यवसायीसँग सहकार्य गर्ने याेजना बनाएकाे छ । हाल हर्नामाडीदेखि हेटौडा आवतजाआत गरेकाे भाडा प्रतिव्यक्ति ८० रुपैयाँ भाडा लिने गरेकाे छ ।
वडा कार्यालयको यो निर्णयसँगै अब वडाभित्रका ७५ जना भन्दा वढी विद्यार्थी निःशुल्क बस चढेर हेटौडासम्म अध्ययन गर्न सक्ने भएका छन् । वडामा जम्मा ४ वटा सामुदायिक विद्यालयमा कक्षा १० सम्म पढाइ हुन्छ । वाणिज्य, मानविकी र शिक्षा संकायका विषयमात्र पढाइ हुने र अन्य विषय पढ्न चाहने विद्यार्थीले हेटौडा बजारका क्याम्पससम्मै पुग्नुपर्ने बाध्यता छ । उपमहानगरपालिकाले एमविविएस पढ्न हरेक विद्यार्थीलाई ५ लाख रुपैयाँ सहयोग गर्दै आएकामा यस वर्षदेखि आफ्नो वडाले पनि १ लाख रुपैयाँ दिने नीति लिएको अध्यक्ष बानियाँले बताए । यसपटक याे वडाबाट २ जना एमविविएस पढ्न छानिएका छन् ।
मकवानपुर । बागमती प्रदेश सरकारले मध्ये साउनमा विकास समस्याबारे समीक्षा गरेको छ । मन्त्रालयस्तरीय विकास समस्या समाधान समितिको बैठकमा प्रदेशका मुख्यमन्त्री शालिकराम जमकट्टेलले प्रदेश सरकार नीतिगत निर्णय बिना नै अघि बढेको टिप्पणी आफैंले गरेका छन् ।
आफैंले प्रदेश सरकार डो-याइरहेका मुख्यमन्त्री जमकट्टेलले प्रदेश सरकार कुनै नीतिगत निर्णय बिना नै हिडीरहेको आफैं सार्वजनिक गरे । प्रदेशको मन्त्रालयस्तरीय विकास समस्या समाधान समितिको बैठक तथा समिक्षा कार्यक्रममा मुख्यन्त्री जमकट्टे्लले यस्तो स्वीकार गरेका हुन् ।
“नीतिगत कुरामा कमजोर भएको आभास भएको छ, मन्त्रीहरु जोजो आए पनि, सचिवहरु जो जो आएपनि ५ बर्षमा गर्ने कामको आधार एकै हुनुपर्छ, ५ वर्षमा हामीले के के काम गर्ने भन्ने नीतिगत स्पष्टता नै छैन, हामी के गर्दछौं” उनले भने अब दोस्रो आवधिक योजना बनाउने चरणमा छौ, मन्त्रालयको सचिब र कार्यालय प्रमुख बिचमा बसेर यो नीति बनाउने तयारी गर्नुहोस ।”
यस्तो योजना आर्थिक वर्ष सुरु हुनु पूर्व नै बन्नु पर्दथ्यो । अघिल्लो आर्थिक वर्षमै नीति तथा कार्यक्रम बन्नु पर्नेमा मुख्यमन्त्री स्वयम नै बजेट सार्वजनिक भैसकेको र आर्थिक वर्ष समेत सुरु भइसकेको अवस्थामा यस्तो सवाल आफैं बाहिर ल्याएका हुन् । उनको यस्तो टीप्पणीले प्रदेश सरकारको कार्य नीति कति प्रभाकारी छ भन्ने छर्लङ भएको छ ।
विषयगत मन्त्रालयहरु, महशाखाहरुमा समिक्षा गरेर नीति तथा कार्यक्रम बनाइनु पर्ने थियाे, यसै अनुसार बजेट ल्याइनु पथ्यो, अब यतिबेला मुख्यमन्त्रीले यस्तो टिप्पणी दिएका छन् । “समयमा नै नीतिगत निर्णय बनाउनु पथ्यो, हामी चुकेका छौं, नीतिगत निर्णयहरु छैन, काम गर्न खोज्यो योजना कहाँ छ,थाहै छैन” मुख्यमन्त्री जमकट्टेलले भने “न बजेट बनाउंदा हेरिन्छ, न कार्यगर्दा ध्यान दिइन्छ ।”
प्रदेश सरकारले कुन जिल्लाको कुन क्षेत्रमा के के गर्ने भन्ने बारेमा पटक पटक यो सवाल उठाउदै आएको जिकीर गरे ।
बजेट बनिसकेपछी मुख्यमन्त्रीले सचिबहरूलाई नीतिगत रूपमा स्पष्ट हुन निर्देशन दिइरहदा मन्त्रालयका सचिव र महाशाखा प्रमुखहरु भने मुखामुख गरिरहेका देखिन्थे ।
उनले सामाजिक विकास मन्त्रालयले प्रदेशको १३ जिल्लामा मन्त्रालयले सेवा दिने विधिमाथी प्रश्न गरेका थिए । विशेष गरी सानोतिनो कामको सम्झौता गर्न, नवीकरण गर्न पनि सर्वसाधारणलाई राजधानी आइपुग्नु पर्ने बाध्यता रहेको मुख्यमन्त्रीले स्वीकार गरे । “सम्झौता गर्दा नै खर्च हुन्छ, भोली त्यै कार्यक्रमको बजेट प्रदेशको राजधानी आउँदा जाँदा भएको खर्चमा कटौती हुन्छ, यसैगरी हो संघीयता महँगो हुने” उनले भने ।
१३ जिल्लाबाट नै सेवा दिन जिल्लागत सेवा कार्यालय स्थापना गर्न मन्त्रालयहरूलाई उनले निर्देशन दिएका छन् । यस्तो सेवा कार्यालय सामाजिक विकास मन्त्रालयमात्रै हैन सबै मन्त्रालयहरुको हुनु पर्ने उनले बताए ।
उनले प्रदेशको प्रदेश युवा परिषद, खेलकुद परिषद आवश्यक भएको भन्दै यि कार्यालयहरु संरचनागत बोझ भएको बताए । “महाशाखाहरू बढी भएमा पनि हटाउने बताउँदै उनले युवा तथा खेलकुद परिषद राख्दा दुबै काम हुने र ऐन बनाएर यी निकायहरू खारेज गर्ने बताए ।
सिटिइभिटिले तालीम दिएको युवा स्वरोजगार नभएको भन्दै अब प्रदेश मातहतकै सिटिइभिटी बनाउंन प्रदेश सरकार लागि परेको उनले बताए ।
कार्यक्रममा प्रदेशको सामाजिक विकास मन्त्री कुमारी मोक्तानले प्रदेशको २० वटा नमुना बिद्यालयलाई बजेट नहुदा उपलब्धि नभएएको स्वीकार गरिन् । उनले पनि नीतिको खांचो भएकै कारण प्रदेश सरकारको युवा बैज्ञानिक कोष संचालन गर्नको लागि समस्या भएको बताइन् । “सही संरचना छैन र ऐन बुझाइमा फरक पर्दा काम गर्न समस्या हुँदो रहेछ” मन्त्री मोक्तानले भनिन् ।
मकवानपुर । बागमती प्रदेश सरकारले प्रदेशको ७ वटा अस्पताललाई शव वाहन हस्तान्तरण गरेको छ ।
भन्सार छुटमा खरिद गरिएको ७ वटा शव वाहन टेण्डर मार्फत कुल एक करोड ८ लाख ६५ हजार रुपैयाँ लागतमा गत आर्थिक वर्षको कार्यक्रम अन्तरगत खरिद गरिएको थियो ।
बागमती प्रदेशको स्वास्थ्य मन्त्रालय अन्तरगतको स्वास्थ्य आपूर्ति व्यवस्थापन केन्द्र मकवानपुरले प्रदेश सरकार मातहतका ७ वटा अस्पताललाई शव वाहन हस्तान्तरण गरेको केन्द्रका लेखा अधिकृत राधाकृष्ण श्रेष्ठले जानकारी दिए । स्वास्थ्य आपूर्ति व्यवस्थापन केन्द्रले प्रदेश सरकार मातहतका सात वटा अस्पतालहरुलाई एकएक वटाको दरले शव वाहन हस्तान्तरण गरेको हो ।
कैन्द्रले प्रदेशको दोलखा जिल्लाको पशुपति चौलागाई अस्पताल, रसुवा जिल्लाको रसुवा अस्पताल, रामेछाप जिल्लाको रामेछाप अस्पताललाई शव वाहन वितरण गरेको हो । यसैगरी चितवनको रत्ननगर बकुलर अस्पताल, सिन्धुपाल्चोकको चौतारा अस्पताल, सिन्धुली अस्पताल र त्रिसुली अस्पताललाई शव बाहन हस्तान्तरण गरेको स्वास्थ्य आपूर्ति व्यवस्थापन केन्द्रका प्रमुख बसन्त अधिकारीले बताए ।
खरिद गरिएका शव वाहन बागमती प्रदेशका स्वास्थ्य मन्त्री उत्तम जोशीले अस्पतालका अध्यक्ष तथा प्रमुखहरुलाई हस्तान्तरण गरिएको हो । मन्त्री जोशीले शव वाहनहरुमा शव ओसार्दा सकेसम्म निशुल्क र रकम लिनै परेमा पनि थोरै रकममा ओसार्न अस्पतालहरुलाई निर्देशन दिएको बताए ।
यि अस्पतालहरुलाई केन्द्रले केही महिना अघि अत्याधुनिक प्रविधि जडान भएको एम्बुलेन्स वितरण गरेको थियो । प्रदेश स्तरको अस्पताल भनेपछि सबै प्रकारको सेवामा दक्ष बनाउन प्रदेश सरकार लागि परेको मन्त्री जोशीले बताए ।
हस्तान्तरण गरिएका शव वाहनहरुलाई व्यवस्थित रुपमा संचालन गर्न पनि उनले निर्देशन दिएका छन् । कार्यक्रममा मन्त्रालयका सचिब बद्रीबहादुर खड्काले शव वाहन सञ्चालन गर्नका लागि कार्यविधि बनाएर सञ्चालन गर्ने तयारी गरिने बताए ।
स्वास्थ्य मन्त्रालयका प्रवक्ता दीपकप्रसाद तिवारी, स्वास्थ्य निर्देशनालयका वरिष्ठ जनस्वास्थ्य प्रशासक सतिस विष्ट लगायतकाको उपस्थिति रहेको थियो ।
मकवानपुर । नेपाली चलचित्र सरी ममकाे हेटौडामा विशेष प्रदर्शन गरिएकाे छ । शनिबार हेटौडा ४ स्थित ओम म्याक्स सिनेमा हलमा विशेष प्रदर्शन गरिएकाे हाे । हेटौडा उपमहानगरपालिका वडा नं. ४ काे मुख्य आयाेजना तथा हेटौडा लेडी जेसीज र एनआएफ क्रियसनकाे संयुक्त आयाेजनामा चलचित्र प्रदर्शन गरिएकाे हाे ।
लागुऔषध दुर्व्यसन विरुद्धकाे उक्त चलचित्र प्रदर्शन अघि आयाेजित कार्यक्रमका प्रमुख अतिथी संविधान सभा सदस्य अनन्त पौडेलले पानी र बानी उकालो लगाउन धेरै गारो हुने भन्दै मानवीय जीवनमा उकालाे (प्रगती) तर्फ लैजान संघर्ष नै हुने बताए । ‘बानी एक पटक बिग्रिएपछि सुधार्न सहज छैन’ पौडेलले भने ‘आफ्नो नानीबाबुलाई घर परिवारले समय दिने, बेलाबेला उनीहरुका कृयाकलाप निरीक्षण गर्ने गर्दा उमेर बढ्दै जादा कुलतमा फस्ने सम्भावना कम हुन्छ ।’
कार्यक्रममा हेटौंडा उपमहानगरपालिका वडा नम्बर ४ का वडा अध्यक्ष नवीन सिग्देलले स्थानीय तहले भौतिक निर्माणका अलावा शिक्षा सचेतनामुलक कार्य समेत विकास हो भनेर बुझ्नु पर्ने बताए । हेटौंडा ४ ले शिक्षा र चेतनामूलक कार्यमा लगानी गर्दै आएको सिग्देलले बताए । ‘समाज चेतनशील भए विकासले फड्को मार्छ हामीले नयाँ आर्थिक वर्षकाे सुरुवात सामाजिक कामबाटै सुरु गरेका छाै’ सिग्देलले भने । उनले स्कुलका भाइबहिनीहरु बढी संबेदनशील हुने भएकाले अभिभावकले उनीहरुका कियाकलाप निगरानी गर्नु पर्नेमा जोड दिए ।
सामाजिक अभियान सञ्जाल हेटौडा ४ काे मुल व्यवस्थापनमा कार्यक्रम गरिएकाे थियाे । सञ्जालकाे संयाेजक माया तामाङले समाजमा युवा उमेरमा आउने समस्यालाई परिवारले गम्भिर भएर निगरानी गर्नु पर्ने बताइन् । लागूऔषध मुक्त वडा घोषणा गर्ने गरि कार्य गरिएकाेमा सञ्जालकाे पुर्ण सहयाेग हुने तामाङले बताइन् । माइती नेपाल मकवानपुर प्रमुख समेत रहेकी उनले लागू औषध सेवनको लतले घर झगडा सुरु हुने र सम्बन्ध बिच्छेदसम्मको घटना समाजमा बढ्ने भएकोले बेलैमा सचेत हुनुपर्ने बाताइन् ।
यसैगरी मकवानपुर प्रहरी प्रबक्ता टेक बहादुर कार्कीले दुर्व्यसनले अपराध बढाउने बताए । आत्महत्य, हत्या, बलात्कारजस्ता अपराधमा लाग्न उत्प्रेरित गर्ने तत्व लागू औषध भएकोले यस्तो कुलतबाट बेलैमा बच्नुपर्छ । मकवानपुर लागूऔषध ओसारपसारको क्षेत्र समेत भएको त्यस्को विकल्प समेत खोजी कुलत रहित समाज निर्माणमा सबै क्षेत्रबाट सहयोग हुनुपर्ने कार्कीले बताए ।
हेटौंडा लेडि जेसिजकी वर्ष २०२३ अध्यक्ष दिलमाया घर्तीले सकारात्मक सोचका साथ लागुऔषध दुर्व्यसन अन्त्य गर्न सबैले पहल गर्नुपर्ने बताइन् । कार्यक्रम जेसीज वर्ष २०२३ अध्यक्ष घर्तीकाे सभाध्यक्षता भएकाे थियाे । लागुऔषध दुर्व्यसनीले व्यक्ति, परिवार र समाजमा पार्ने प्रभाव तथा उचित व्यवस्थापनसँगै शैक्षिक जनचेतनामुलक सन्देश चलचित्रमा देखाइएकाे छ । चलचित्र ‘सरी मम’मा सरिता लामिछाने, सरोज खनाल.उत्तम केसी, प्रभात पाल,अलिश राई लगायतका कलाकारकाे अभिनय रहेकाे छ ।
आयुष बुढाथाेकीले लेखकाे चलिचत्रकाे कथा तथा स्क्रिनप्ले र कार्यकारी निर्माता बिनाेद लामा रहेका छन् । एनएफआई क्रियसन प्रालीबाट उत्पादन गरिएकाे चलचित्रकाे निर्देशन नविन बाेगटीले गरेका हुन् ।