मकवानपुर । जिल्ला अदालत मकवानपुरका जिल्ला न्यायाधीश डिल्लीरत्न श्रेष्ठ राष्ट्रिय सभा सदस्य उपनिर्वाचनका लागि निर्वाचन अधिकृत नियुक्त भएका छन्।
निर्वाचन ऐन, २०७५ को दफा ७ बमोजिम न्याय परिषद्को परामर्शमा प्राप्त नामावलीका आधारमा निर्वाचन आयोगको मंगलबार बसेको बैठकले श्रेष्ठलाई प्रमुख निर्वाचन अधिकृत नियुक्त गरेको हो। राष्ट्रिय सभा सदस्यको उपनिर्वाचनका लागि उनलाई वैशाख १६ गतेदेखि लागू हुने गरी नियुक्त गरिएको आयोगले जनाएको छ ।
नेकपा माओवादी केन्द्रले बागमती प्रदेशबाट राष्ट्रिय सभा सदस्य प्रतिनिधित्व गरेका रामबहादुर थापालाई कारबाही गरेपछि रिक्त रहेको सिटमा जेठ ६ मा उपनिर्वाचन हुन लागेको हो।

