बसन्त हरियाली
तिमी कस्तो छौ, तिम्रो बानीले पनि देखाउँछ।
ऐनाले देखाउने आकृति पानीले पनि देखाउँछ।
माटोको गाग्रोमा भरेको पानी हुँ भन्ने बिर्सिएर
एक समयमा औकात जवानीले पनि देखाउँछ।
मध्य रात सपनीमा पैशाले चिमोट्नेहरुलाई
मध्य दिनमा तारा जिन्दगानीले पनि देखाउँछ।
माया गर्छु भन्नेलाई म कसरी विश्वास गरूँ खै?
दुधको जस्तै रङ्ग त चौलानीले पनि देखाउँछ।
पहिले खाडी मुलुक पस्दा सत्र अठारको थिएँ
ऐले उमेर ढल्केको राहदानीले पनि देखाउँछ।
अछाम हाल किर्तिपुर

