मकवानपुर/स्वदेशी उद्यम तथा उद्यमशिलतालाई निरुत्साहि तथा विदेशी लगानीलाई प्रोत्साहन गरेको भन्दै कृषि क्षेत्रमा आबद्ध विभिन्न संगठनहरुले सरकारको विरोध गरेका छन् ।
नेपाल सरकारले गत पुस २० गते नेपाल राजपत्रमा सूचना प्रकाशित गरि प्रत्यक्ष वैदशिक लगानीमा आउन चाहने बहुराष्ट्रिय कम्पनीहरुलाई खुला गरिएको जानकारी गराएका थियो । यस कदमको कारण नेपालमा स्थापित कृषि क्षेत्र सक्षम हुँदा हुँदै स्वदेशी लगानीलाई प्रभाव पार्ने गरी मन्त्री
परिषदको निर्णयबाट कृषि क्षेत्रमा सर्त सहित डेरी उद्योग, पशुपंक्षीपालन, माहुरीपालन, माछापालन, फलफुल तरकारी आदी र कृषिका प्राथामिक उत्पादनसँग सम्बन्धित व्यवसायमा प्रत्यक्ष वैदेशिक लगानी खुल्ला गरिएको विरोधमा आन्दोलको घोषणा गरिएको हो ।
नेपालमा माहुरीपालनमा ४ अर्व, माछापालनमा करीव ११ अर्व, डेरी उद्योगमा ३० अर्व, पोल्ट्रीमा १ खर्व २५ अर्व, बाख्रा पालनमा १० अर्व, केरामा ३ अर्व, गरी कुल १ खर्व ८३ अर्वको लगानी भई करीव ३५ लाख भन्दा बढि कृषक तथा श्रमिकहरुमा रोजगारी श्रृर्जना भइरहेको छ । कृषि क्षेत्रमा वैदेशिक लगानी खुल्ला गरिदा यस पेशामा आवद्ध व्यवसायीलाई मजदुर बनाउने र त्यसको लाभ विदेशी लगानीकर्ताको हातमा स्वदेशी व्यवसायीहरुको उद्यमशीलता विकासमा कुठाराघात हुने नेपाल डेरी एशोसियसनका केन्द्रीय महासचिव प्रल्हाद दाहाललले बताए ।
विगतमा पनि कृषि क्षेत्रको प्राथामिक तहमा विभिन्न माध्यमबाट वैदेशिक लगानी भिœयाउने अभ्यास भएकोमा नेपाल उद्योग वाणिज्य महासंघ, नेपाल चम्वर अफ कमर्श लगायत कृषि क्षेत्रमा आवद्ध सबै उद्योग व्यवसायीहरुको असहमति तथा प्रतिनिधि सभाको उद्योग तथा वाणिज्य र श्रम तथा उपभोक्ता हित समिती समेतले कृषिमा बैदेशिक लगानी खुल्ला नगर्न निर्देशन पछि सरकार आफ्नो निर्णयमा पछि हटेको थियो ।
सोही अनुरुप विदेशी लगानी तथा प्रविधि हस्तान्तरण सम्बन्धि कानूनलाई संशोधन तथा एकीकरण गर्न बनेको विधयेक २०७५ को दफा ३ उपदफा (२) वैदेशिक लगानी खुल्ला नगरिएका उद्योग व्यवसायमा स्वदेशका मत्स्यपालन, दुग्ध उत्पादन/प्रशोधन, पशुपंक्षी तथा माहुरीपालन, पोल्ट्री उद्योगलगायत कृषिका प्राथामिक उत्पादनका अन्य क्षेत्रहरुलाई साविक अनुसार कुनै संशोधन नगरी यथावत राखिएको थियो ।
कृषिको प्राथामिक तहमा कुनै पनि शर्तमा वैदेशिक लगानी आउदा ठूलो जनसंख्याको आर्यश्रोत गुम्ने
खतरा भएकोले डेरीलगायत कृषिमा प्रत्यक्ष वैदेशिक लगानी ल्याउने निर्णय अविलम्ब फिर्ता लिन माग गरिएको दाहालले बताए । नेपाल डेरी एशोसिएसनले देशव्यापि आन्दोलनको लागि विभिन्न जिल्लाहरुमा संघर्ष समिति समेत गठन गरी सकेको छ । बागमती प्रदेशको राजधानी हेटौंडामा नेपाल डेरी एसोसिएसनले पत्रकार सम्मेलन गरी यसबारे जानकारी गराएको हो ।
कृषिमा वैदेशिक लगानी भित्रिदाँ स्वदेशी किसान र लगानीकर्ताहरु विस्थापित हुने अवस्था आउन सक्ने भन्दै यसको विरोध गरिएको एशोसिएसनका महासचिव दाहालले बताए । पत्रकार सम्मेलनमा नेपाल उद्योग बाणिज्य महासंघ केन्द्रीय सदस्य तथा कृषि उद्यम केन्द्रका सभापति अरुणराज सुमार्गीले चोरबाटो हुदँै ल्याइएको ऐन मान्य नहुने बताए ।
डेरी एशोसियनका केन्द्रीय अध्यक्ष राधाकृष्ण सापकोटाले सरकारले नेपालमा कृषिमा वैदेशिक लगानी भित्र्याउन ल्याएको अध्यादेश गलत भएको बताए । एशोसिएसनले सात प्रदेशका मुख्यमन्त्रीलाई ज्ञापनपत्र बुझाइएको र केन्द्रमा पत्रकार सम्मेलन गरेर सरकारलाई दबाव दिएको महासचिव दाहालले बताए । १७ वटा विषयगत संघसंस्था मिलेर संघर्ष समिति गठन गरिएको र आगामी १५ गतेबाट चरणबद्ध आन्दोलन गर्ने घोषणा गरिसकिएको दाहालले बताए ।
मकवानपुर । मेगा बैंक नेपाल लिमिटेडले विपन्नवर्ग, लघु, घरेलु, साना तथा मझौला उद्यमीहरुद्वारा संचालित उद्यम तथा व्यवसायलाई प्रवर्धन गर्ने उद्धेश्यले बेनीघाट रोराङ्ग गाउँपालिका, धादिङ्ग उद्योग वाणिज्य संघ तथा मेगा क्यापिटल मार्केटस्सँग सम्झौता गरेको छ । सम्झौतापत्रमा मेगा बैंक नेपाल लिमिटेड., बेनीघाट रोराङ्ग गाउँपालिका, धादिङ्ग उद्योग वाणिज्य संघ र मेगा क्यापिटल मार्केटस्का तर्फबाट सोमबार हस्ताक्षर भएकाे हाे।
सम्झौतापश्चात् मेगा बैंकले रोराङ्ग गाउँपालिका, धादिङ्गका साना किसान, व्यवसायीका साथै व्यवसाय गर्न चाहने व्यक्तिहरुलाई आफ्नो व्यवसाय विस्तार गर्नको लागि नेपाल राष्ट्र बैंकको सहुलियतपूर्ण ब्याज अनुदान कर्जा निर्देशिका र बैंकको सहुलियतपूर्ण ब्याज अनुदान कर्जा कार्यविधिको अधिनमा रही सहुलियतपूर्ण कर्जा प्रदान गर्नेछ ।
उक्त कार्यक्रममा बेनिघाट रोराङ्ग गाउँपालिकाका अध्यक्ष, धादिङ्ग उद्योग वाणिज्य संघका अध्यक्ष तथा मेगा क्यापिटलका प्रमुख कार्यकारी अधिकृतले सेवाग्राहीहरुलाई आ–आफ्नो पक्षबाट बेनिघाट रोराङ्ग गाउँपालिकाका उद्यमीहरुलाई सहुलियतपूर्ण ब्याज अनुदान कर्जा सेवा प्रदान गर्ने सिलसिलामा भरपुर सहयोग र सहकार्य रहने प्रतिबद्धता व्यक्त गरेका छन्।
कार्यक्रममा बैंकले गाउँपालिका तथा उद्योग वाणिज्य संघसँग आवद्ध साना किसान, लघु, घरेलु तथा साना उद्यमीहरुलाइ प्राथमिकताका साथ बैंकको मलेखु, धादिङ स्थित शाखा कार्यालयबाट सहुलियतपूर्ण कर्जा सेवा उपलब्ध गराउने बैंकका तर्फबाट विभागीय प्रमुख पुण्यप्रसाद खनियाले जानकारी दिएका छन्।
मकवानपुर । नेपाल इन्फ्रास्ट्रक्चर बैंकले सर्वसाधारणकाे लागि खुला गरेकाे ८ अर्ब रुपैयाँ बराबरको आईपीओमा आवेदन दिने आज मंगलबार अन्तिम दिन रहेकाे छ ।
बैंकले जारी पूँजीको ४० प्रतिशतले हुन आउने ८ अर्ब रुपैयाँ बराबरको ८ करोड कित्ता साधारण शेयर गत माघ २ गते शुक्रबारदेखि निष्काशनमा ल्याएको छ। त्यस मध्ये ७ करोड ५८ लाख ४० हजार कित्ता सर्वसाधारणका लागि बिक्री खुला गरिएको हो।
सोमबार साँझ ५ बजेसम्ममा ११ लाख ७७ हजार ९ सय २० वटा आवेदनबाट १४ करोड १९ लाख ९६ हजार ४२० कित्ता शेयर खरिद आवेदन सो बराबरको शेयर माग भएको हो। उक्त आवेदन सर्वसाधारण निष्काशन गरेको ७ करोड ५८ लाख ४० हजार कित्ताको १.८७ गुणा बढी हुन आउछ।
बैंकको आईपीओमा न्यूनतम १० कित्तादेखि अधिकतम २ करोड कित्तासम्मको लागि आवेदन दिन सकिनेछ। नेपाल धितोपत्र बोर्डबाट अनुमति प्राप्त आश्वा सदस्य बैंक तथा वित्तीय संस्थाहरू र मेरोशेयरको वेब तथा एप मार्फत पनि कम्पनीको आईपीओमा आवेदन दिन सकिने व्यवस्था छ।
बैंकले ठूलो संख्यामा शेयर निष्काशन गरेकोले आईपीओमा आवेदन गर्ने सबैले शेयर पाउने पक्का छ। पछिल्लो समय आईपीओमा आवेदन गर्नेको संख्या साढे १२ लाख नाघिसकेको छ। अझै डिम्याट खाता खोल्नेको संख्या पनि दैनिक तिब्र रुपले बढ्दैछ।
हाल बैंकको चुक्ता पूँजी १२ अर्ब रुपैयाँ रहेको छ। ८ अर्ब रुपैयाँ बराबरको आईपीओ बाँडफाँटपश्चात बैंकको चुक्ता पूँजी २० अर्ब पुग्नेछ।
यस्तै बैंकको आइपीओ खुलेको तेस्रो दिन पनि बैंक र क्यापिटलहरुमा भिडभाड उत्तिकै देखिएको छ। बैंकको शेयर खुल्नुभन्दा केहि दिन अघिदेखि नै सुरु भएको यो भिड अझै कम भएको छैन्।
बैंकहरुमा सिआरएन नम्बर लिने र शेयर भर्नेहरु बढी देखिन्छन भने क्यापिटलहरुमा डिम्याट खाता खोल्नेहरुको भिड बढी छ। शेयर खुलेको पहिलो दिन नै बैंकहरुमा शेयर खरिदको लागि आवेदन दिनेहरुको भिड बढेको थियो। डिम्याट खाता खोलेका तर मेरो शेयर लिइनसकेकाहरुले बैंकबाट आवेदन दिँदा बैंकमा भिडभाड बढेको हो।
पछिल्लो समय औसतमा दैनिक १० हजार भन्दा बढीले डिम्याट खोलिरहेको सिडिएससिको तथ्याँकले देखाउछ। सामान्य अवस्थामा बैंकहरुले तत्कालै सिआरएन नम्बर दिने गरेकोमा अहिले भिडभाढ बढी भएकोले केहि बेंकहरुले सिआरएन सम्बर लिन समेत केहि दिन लाग्ने बताउन थालेका छन्।
मकवानपुर । मेगा बैंक नेपाल लिमिटेडले छिमेकी मुलक चीनको प्रख्यात ‘वीच्याट–पे’ सँग भुक्तानी सेवाका लागि साझेदारी गरेको छ । यो सम्झौतापछि ‘वीच्याट–पे’ मोबाइल वालेट प्रयोगकर्ताहरुले मेगा बैंक अन्तर्गतका मर्चेन्टहरुमा राखिएका क्यूआर कोड स्क्यान गरी डिजिटल रुपमा रकम भुक्तानी गर्न सकिने ब्यवस्था मिलाइएको छ ।

नेपाल भ्रमण गर्ने चिनियाँ पर्यटकहरु तथा नेपालवाट सामान आयात गर्ने चिनियाँ व्यापारीहरुले अब बिभिन्न सामाग्री तथा सेवाको लागि ‘वीच्याट–पे’ मार्फत रकम भुक्तानी गर्न सक्नेछन् । नेपालमा वर्षेनी लाखौं चिनियाँ पर्यटकहरु आउने गरेका छन् । चीनमा निकै लोकप्रिय रहेका ‘वीच्याट–पे’ मार्फत नेपालमा रकम भुक्तानी गर्न पाउँदा चिनियाँ पर्यटकहरु लाभान्वित हुनेछन् भने राष्ट्रलाई विदेशी मुद्रा आर्जनमा सघाउ पुग्ने मेगा बैंकको विश्वास रहेको छ ।
डिजिटल बैंकिङ सेवालाई प्राथमिकतामा राख्दै आएको मेगा बैंकले भुक्तानी सेवालाई सहज र प्रभावकारी बनाउन आगामी दिनमा पनि यस्ता साझेदारीलाई प्राथमिकता दिने योजना बनाएको बैंकका प्रमुख बजार अधिकृत (सीएमओ) मनोज खड्काले बताए ।
मकवानपुर । नेपाल उद्योग वाणिज्य महासंघकाे पहलमा बागमती प्रदेश स्तरीय श्रम बजार सचिवालय परियोजनाको आइतबार घोषणा गरिएको छ । बागमती प्रदेशका प्रदेश प्रमुख विष्णु प्रसाद प्रसाईको प्रमुख आतिथ्यतामा हेटौंडामा उक्त घोषणा कार्यक्रम भएको हो ।
कार्यक्रममा प्रदेश प्रमुख प्रसाईले निजी क्षेत्रले ८० प्रतिशत भन्दा बढी रोजगारी प्रदान गर्ने क्षमता रहेको जिकिर गरे । उनले यस सचिवालय परियोजनाले बागमती प्रदेशमा श्रमिकको उपलब्धता, उद्योगको आवश्यक्ता, आवश्यक तालिम र रोजगारीको सुनिश्चितताको लागि काम गर्न गइरहेको प्रति खुशी प्रकट गरे। ‘परियोजनाको कारण तीन तहको सरकारी निकायहरुलाई नीति निर्माणमा सघाउ पुग्ने, रोजगारी सिर्जना भई विदेशिनु पर्ने वाध्यता हट्ने, मुलुककै सामाजिक आर्थिक विकासमा टेवा पुग्ने विश्वास लिएकाे छु’ प्रदेश प्रमुख प्रसाईले भने ।
कार्यक्रममा परियोजनाका टिम लिडर चन्द्रकान्त अधिकारीले परियोजनाको बारेमा प्रस्तुतिकरण गरेका थिए । विभिन्न वक्ताहरुले परियोजनाले स्थलगतरुपमै विस्तृत अध्ययन गरेर श्रमिकको तथ्यपरक अभिलेख तयार गर्ने र सरकारी निकायहरुलाई पनि योजना तर्जुमाको लागि उक्त अभिलेख महत्वपूर्ण दस्तावेज हुने विश्वास व्यक्त गरिएको थियो ।
कार्यक्रम नेपाल उद्योग वाणिज्य महासंघ, नेपाल उद्योग वाणिज्य महासंघ बागमती प्रदेश र मकवानपुर उद्योग वाणिज्य संघको संयुक्त तत्वावधानमा आयोजना गरिएको थियो ।
नेपाल उद्योग वाणिज्य महासंघको नेतृत्वमा गरिएको कार्यक्रममा नेपाल उद्योग वाणिज्य महासंघ बागमती प्रदेशका अध्यक्ष दिलसुन्दर श्रेष्ठको अध्यक्षता, जिल्ला समन्वय समिति मकवानपुरका प्रमुख रघुुनाथ खुलाल, सिटिइभिटी बागमती प्रदेशका प्रमुख टैलेन्द्र आचार्य, नेपाल उद्योग वाणिज्य महासंघका केन्द्रीय सदस्यद्वय अरुणराज सुमार्गी, सुमित केडियाकाे सहभागिता रहेकाे थियाे ।
यसै गरी मुख्यमन्त्री तथा मन्त्रिपरिषदको कार्यालयका शाखा अधिकृत रमेश सुवेदी, आर्थिक मामिला तथा योजना मन्त्रालयका शाखा अधिकृत विनोद विडारी, नेपाल घरेलु तथा साना उद्योग महासंघका केन्द्रीय कार्यवाहक अध्यक्ष उमेश प्रसाद सिंह, नेपाल होटल संघका केन्द्रीय प्रथम उपाध्यक्ष विनायक साह, नेपाल उद्योग परिसंघका केन्द्रीय उपाध्यक्ष विरेन्द्रराज पाण्डे, नेपाल निर्माण व्यवसायी महासंघका केन्द्रीय महासचिव रोसन दहाल, सि. एन. आई. का बागमती प्रदेश संयोजक ऋषिराम दहाल, दुग्द्य उत्पादक सहकारी संघका केन्द्रीय अध्यक्ष नारायण देवकोटा, पत्रकार महासंघ बागमती प्रदेश अध्यक्ष प्रताप बिष्ट, उद्योग संघ मकवानपुरका अध्यक्ष लेखराज पोखरेल, मकवानपुर निर्माण व्यवसायी संघका अध्यक्ष श्याम ढकाल, मकवानपुर होटल एशोसिएसनका अध्यक्ष शंकरलाल श्रेष्ठ, नारायणी यातायात व्यवसायी संघका विष्णु विडारीसहित उद्योगी व्यवसायीहरुको कार्यक्रममा सहभागिता रहेको थियो ।