मकवानपुर । नेपाली सुगम संगीतमा अग्रसर बन्दै गरेकी गायिका नित्याशिवाको आवाज रहेको गीत ‘तिम्रो यादमा’ काे भिडियाे सार्वजनिक भएको छ । हाइलाइट्स नेपालबाट सार्वजनिक गरिएको आँचल शर्माको गीतमा राजु लामाको संगीत रहेको छ ।
मीन अधिकारी ,रवि खडका र अमृता मगरको अभिनय रहेको सो गीतमा कृष्ण पाण्डेले छायाङ्कन गरेका छन् । प्रेम शर्मा पौडेलको सम्पादन रहेको छ भने शंकर अधिकारी घायलको निर्देशन रहेको छ ।
मकवानपुर । गायिका आस्था राउतको स्वर रहेको नयाँ गीत ‘यानी माया’ को भिडियो सार्वजनिक भएको छ । सुरेश अधिकारीको शब्द र सङ्गीत र महाराज थापाले एरेन्ज गरेका गीत यानी माया आस्थाको गीति एल्बम ‘आधार २’ मा समावेश गरिएको छ ।
कविता नेपाली, गौरभ बिष्ट, श्रीमाला तामाङ र निमा श्रेष्ठको अभिनय रहेको भिडियोमा एन्जिमा लामाको कोरियोग्राफी रहेको छ । वरिष्ठ लोकगायक हरि बहादुर राउत र म्युजिक नेपालको संयुक्त लगानीमा तयार भएको ‘यानी माया’को निर्देशन, छायांकन र सम्पादन हिमालयन इन्फ्रा टिमको रहेको छ ।
नेपाली सांगीतिक बजारमा फरक पहिचान कायम गरेकी आस्थाको केही समय अघि ‘फाट्यो नी माइतीको चिनो’ बोलको गीत सार्वजनिक भएको थियो । ‘यानी माया’ युवा पुस्तालाई मन पर्ने गीत बनेको आस्थाको भनाई छ ।
पाँच कविको पन्ध्र कविताको तेस्रो शृङ्खला
Tags: No Comments
मकवानपुर । प्रलेस मकवानपुरले आयोजना गर्दै आएको पाँच कविका पन्ध्र कविताको तेस्रो शृङ्खलाका रुपमा शुक्रबार फरक–फरक प्रदेशका पाँच कविहरूलाई प्रस्तुत गरिएको छ । अनलाइन माध्यमबाट भएको कविताको तेस्रो शृङ्खलामा मकवानपुरबाट कवि सुवास खनाललाई प्रस्तुत गरिएको थियो ।
खनालको पछिल्लो समय दोस्रो कविता कृतिको रुपमा ‘सपनाका अवयव’ बजारमा आउँदैछ । खनालले ‘सहरले ढुङ्गा खान्छ’, ‘लालबहादुरको किड्नी बिक्रीमा’ छ र ‘डाक्टर केसीको दिमाग ठीक छैन’ लगायत कवितामार्फत सामाजिक विद्रोहको आवाज प्रस्तुत गरेका थिए । अर्का कवि सुनसरीबाट लता कार्कीका तीन कविता प्रस्तुत गरिएको थियो । उनले नारी चेत र आजको चेतनशील समयमा समेत नारीहरू विभेदीकरणको सिकार हुनुपरेका पक्षलाई कवितामा समेटेकी थिइन् ।
सुर्खेतबाट कविता वाचनमा प्रस्तुत भएका बलभद्र भारतीले २०४६ अघिका सामाजिक परिस्थिति र जर्जर अवस्थालाई कवितामा बुनेका थिए र आजको समय पनि त्यसभन्दा अघि जान नसकेको सङ्केत गरेका थिए । दाङबाट कविता वाचनमा उपस्थित भएका केशव थापाले तल्लो वर्गमा परेका र गिट्टी कुटेर खाने मजदुरका कथाहरू कवितामा खिपेका थिए ।
पछिल्लो समय पद्य कविता लेखन र प्रवर्धनमा क्रियाशील कविराज पौडेल रुपन्देहीबाट कविता वाचनमा सामेल भएका थिए । उनी राष्ट्रिय तथा अन्तर्राष्ट्रिय छन्द कविताको अभियानमा संलग्न छन् र पद्य कवितामा सामाजिक र वैचारिक पक्षहरू समावेश गर्दछन् । माक्सवाद सौन्दर्य चिन्तक तथा प्रगतिवादी कवि डा. अमर गिरीको प्रमुख आतिथ्यतामा भएको उक्त कार्यक्रममा वाचित कविताहरूमाथि समीक्षात्मक टिप्पणी कवि तथा समालोचक विन्दु शर्माले गरेकी थिइन् ।
प्रलेस मकवानपुरका सचिव विशाल अधिकारीको सहजीकरणमा सञ्चालन भएको उक्त कार्यक्रमको अध्यक्षता प्रलेस मकवानपुरकी अध्यक्ष शान्ति प्रियवन्दनाले गरेकी थिइन् /
- स्वरुपा गुरागाईं , कक्षा ४
हुनत सानो छ मेरो कलम
तर गर्छ यसले ठुला काम ।
कलमका टुप्पा हाम्रा औलाभन्दा साना
तर यसले लेख्छौ हामी वीरताका गाना ।।
कमलकै साहाराले ज्ञानका कुरा लेख्छौ,
पढी लेखि ठुलो भई संसार हामी देख्छौ ।
कमललाई माया गर्छु कमल मेरो साथी
कलमकै साथ पाए पुग्छु म माथि ।।
यही कलमबाट लेख्छु म थरी थरी
माया गर्छु यसलाई राख्छु जतन गरी ।
हुन त सानो छ मेरो कमल
तर गर्छ यसले ठुला काम ।।

१.
मान्छे नकारात्मक मात्र हेर्छ
छन्द: इन्द्रबज्रा
मान्छे नकारात्मक मात्र खोज्छ
जे छन् नराम्रा तब हेर्छ‚ रोज्छ
कस्तो अनौठो मन पाल्छ मान्छे
सोच्दै नसोची मल फाल्छ मान्छे ।१।
हुन्छन् अनेकौ गुण वा स्वभाव
खोतल्छ मान्छे कम वा अभाव
आफ्नो भए बेस्कन टाल्छ मान्छे
भेटे अरुको त पखाल्छ मान्छे ।२।
केले गरेको बुझिसक्नु छैन
भन्दा नसुन्ने‚ भनिसक्नु छैन
बेकारमा लड्छ र जुध्छ मान्छे
उल्टो नराम्रो अनि बुझ्छ मान्छे ।३।
राम्रो भनेमा उपदेश बुझ्छ
“को होस् तँ” भन्दै अघि सर्छ‚ जुध्छ
“सोचौं सकारात्मक” भन्नुहुन्न
सामान्य मान्छे पनि गन्नुहुन्न ।४।
बिर्सौं भन्यो मान्छ कहाँ र चित्त
यस्तै छ मेरो परिवेश वृत्त
आफन्त बन्दा पनि टेर्न छाड्छ
“सत्चित्त बेकार” भनेर भाँड्छ ।५।
जे छन् नराम्रा सब देख्छ‚ छुन्छ
जान्ने र बुझ्ने म हुँ मात्र भन्छ
सद्भाव बेचेर विकार किन्छ
लाग्दैछ मान्छे हुन बिर्सिइन्छ ।६।
जस्तो छ आफूँ सब देख्नथाल्छ
शंका र कुण्ठा मनभित्र पाल्
छराम्रो छ देख्दा तर रुन्छ भित्र
देखावटी छन् सब इष्टमित्र ।७।
मान्छे नकारात्मक मात्र हेर्
छबोली नराम्रो मुख मात्र फेर्छ
राम्रो भएमा सयचोटि केर्छ
हेपे‚ हकारे अनि मात्र टेर्छ ।८।
केले छ यस्तो परिवेश हाम्रो
के गर्न सक्दा हुनजान्छ राम्रो
मेटे नकारात्मक सोचलाई
होला सबैको अनि पो भलाइ ।९।
२.
जब मानिस बिर्सन थाल्दछ मानवता
छन्द: भ्रमरावली
तन कोमल निर्मल शान्त सुधो छ त जो
दुख दिन्छ‚ पिरोल्छ समाज बनी बलियो
यसरी पथभ्रष्ट भएर त जान्छ कता
जब मानिस बिर्सन थाल्दछ मानवता ।१।
जिउने कसरी सहजै कसको भरमा
असुरक्षित‚ लाञ्छित छिन् तनया घरमा
किन रक्षक भक्षक बन्दछ दुष्ट पिता
जब मानिस बिर्सन थाल्दछ मानवता ।२।
जब फाल्दछ एसिड दुष्ट मुहार भरि
खलकर्म असैह्य छ त्यो सहने कसरी
युवती मन भत्किरहन्छ अनर्थ यहाँ
जब मानिस बिर्सन थाल्दछ मानवता ।३।
परिराख्दछ चोट सधैँ अनुहार भरि
अति चिन्तित छिन् गृहिणी घरमा यसरी
उनको मन शान्त हुने कसरी र कता ?
जब मानिस बिर्सन थाल्दछ मानवता ।४।
बधुले नदिए धन जल्छ शरीर किन?
धनमा मरिमेट्दछ‚ गिर्दछ‚ मार्छ किन?
किन मानव पाल्दछ क्रूर तथा पशुता?
जब मानिस बिर्सन थाल्दछ मानवता ।५।
यदि मारिनु पर्छ अकार्थ बलात्कृत भै
युवती‚ वनिता जगबाट सुरक्षित खै?
यसरी असुरक्षित दुखित छन् दुहिता
जब मानिस बिर्सन थाल्दछ मानवता ।६।
महिला यदि एकल औ कमजोर परे
मलमूत्र खुवाउँछ‚ भन्दछ डायन रे
परित्यक्त र बर्जित यो ननिको छ प्रथा
जब मानिस बिर्सन थाल्दछ मानवता ।७।
यसरी सदियौ कसरी सहने तिनले
हक खोज्दछ त्यो समतामय जीवनले
अब जाग्रित हौं अनि मास्न उठौं क्रुरता
जब मानिस बिर्सन थाल्दछ मानवता ।८।
३.
भित्री संसार
छन्द: उपजाति
यो चित्तको रूप छ भिन्न भिन्न
थाहै बिना बन्दछ झट्ट खिन्न
आफ्नै दुखेको पनि हुन्न पत्तो
आफ्नाहरूबाट थपिन्छ अत्तो।१।
मैले बुझेको मनको चरित्र
आफै छ आफ्नो कटु शत्रुमित्र
जे जे कुरा सञ्चय गर्छ मान्छे
त्यस्तै कुरा दिन्छ र भर्छ मान्छे ।२।
विश्वासमा सङ्कट देखिदैछ
आदर्शको चिन्तन फेरिदैछ
खोलिन्न साँचो मन मित्रलाई
सोचिन्छ यो जीवनको भलाइ ।३।
देखिन्न हाँसो‚ सहबास‚ कार्य
सुन्ने कुरामा पनि हुन्न धैर्य
बिर्स्यो खुसी‚ खिन्न छ यो समाज
बिश्वासिलो मानिस छैन आज।४।
भित्रै हरायो र खुबै करायो
कुण्ठा‚ उदासी मनमा भरायो
यो भित्रको विश्व भयो विचित्र
टेढिन्छ मान्छे तब भित्र भित्र।५।
बद्लिन्छ मान्छे‚ मन बद्लिइन्छ
आफ्नो हुँदो झट्ट छिनेर लिन्छ
मान्छे अनौठो, दुविधा छ धेर
अमूल्य यो जीवन जान्छ खेर।६।
आलोचना गर्छ सुधार छैन
आफै दुखी बन्छ‚ बिगार्छ चैन
औला ठड्याइन्छ असाध्य धेर
उर्जा अनावश्यक जान्छ खेर ।७।
देख्दा छ राम्रो‚ पिर हुन्छ भित्र
यो भित्रको चित्र अझै विचित्र
छाडा छ सारै घिन लाग्छ धेर
हिड्ने कताबाट? सधैं बचेर ।८।
अदृश्य यो घातक विश्वबाट
लुक्दै र छिप्दै पुगिइन्छ घाट
यो भित्रको जीवन हो तिलस्मी
खोजिन्छ भित्रैतिरबाट रश्मि ।९।
विराटनगर