मकवानपुर । अहिले मकवानपुर सहित देशकाे विभिन्न भागमा सामान्यदेखि पूर्ण बदली रहेकाे छ । देशमा पश्चिमी न्यून चापीय प्रणाली, दक्षिण-पूर्व भू-भाग नजिक रहेको पूर्व-पश्चिम फैलिएको न्युन चापीय रेखा तथा बंगालको खाडीबाट प्रवाह हुने जलवाष्प युक्त हावाको प्रभाव रहेकोले सामान्य देखि पूर्ण बदलीकाे सम्भावना रहेकाे जल तथा माैसम विज्ञान विभाग, माैसम पूवानुमान महाशाखाले जनाएकाे छ ।
अहिले देशका सुदुरपश्चिम प्रदेश, बाग्मती प्रदेश तथा प्रदेश नं १ का केही भू-भागमा आंशिक देखी सामान्य बदली रही पानी परिरहेकाे छ भने बांकी भु-भागहरुमा सामान्य देखि पूर्ण बदली रहेको छ महाशाखाले जनाएकाे छ । देशका केही स्थानहरुमा मेघगर्जन तथा चट्याङ्ग सहित हल्का देखि मध्यम वर्षाको सम्भावना साथै एक-दुई स्थानहरुमा भारी वर्षाको समेत संभावना रहेकोले आवश्यक सतर्कता अपनाउ समेत महाशाखाले अाग्रह गरेकाे छ।
मौसम पूर्वानुमान
बैशाख २९ गते बुधबार दिउँसो प्रदेश नं १, प्रदेश नं २ लगायत अन्य पहाडी भू-भागहरुमा सामान्य देखि पूर्ण बदली र बाँकी भू-भागहरुमा आंशिक देखि सामान्य बदलि रहने छ । देशका केही स्थानहरुमा मेघगर्जन/चट्याङ्ग सहित हल्का देखि मध्यम वर्षाको सम्भावना रहेको छ । साथै प्रदेश नं १, प्रदेश नं २,गण्डकी प्रदेश र बाग्मती प्रदेशका एक/दुई स्थानमा भारी वर्षाको सम्भावना रहेको माैसम पूर्वानुमान महाशाखाले जनाएकाे छ।
बुधबार राती देशका अधिकांश भू-भागहरुमा सामान्य देखि पुर्ण बदली रहि देशका केहि स्थानहरुमा मेघगर्जन,चट्याङ्ग र हावाहुरी सहित हल्का देखि मध्यम वर्षाको सम्भावना रहेको छ । प्रदेश नं १, प्रदेश नं २ र बाग्मति प्रदेशका तराइका भू-भागका एक/दुई स्थानमा भारी वर्षाको सम्भावना रहेको छ।
आजबाट मकवानपुरगढीमा भिडभाड नियन्त्रणमा थप कडाई
Tags: No Comments
मकवानपुर । काेराेना संक्रमण बढ्दै गएकाेले यसकाे राेकथामकाे लागि मकवानपुरगढी गाँउपालिकाले आज बुधबारबाट भिडभाड नियन्त्रणमा कडाइ गर्ने भएकाे छ । गाँउपालिका क्षेत्र भित्रका चियापसल, चोक चौतारो लगायतका ठाँउमा हुने अनावश्यक भिडभाड नियन्त्रणमा पालिकाले कडाई गर्ने भएको हाे ।
पालिका अध्यक्ष बिदुर हुमागाईले मंगलबार ईलाका प्रहरी कार्यालय मकवानपुरगढी मक्रान्चुलीका प्रहरी प्रमुख जनकराज कार्कीलाई भेटी अनावश्यक भिडभाड नियन्त्रणका लागि कडाई गर्न अाग्रह गरेका छन् । अनावश्यक भिडभाड नियन्त्रणका लागि वडा कार्यालय तथा टोलविकास संस्थाहरूलाई समन्वयकारी भूमिका निर्वाह गर्न समेत अध्यक्ष हुमागाईले अनुरोध गरेका छन् ।
साेमबार मात्र गाँउपालिका १४ जनामा काेराेना पुष्टी भएकाे थियाे । संक्रमण पुष्टि भएका ब्यक्तिका परिवारका सदस्यहरु यत्रतत्र हिड्ने गरेको गुनासो आएको भन्दै पुष्टि भएको दिनदेखि कम्तीमा ५ देखि ७ दिनसम्म सार्वजनिक स्थानहरुका जमघटमा ननिस्कन तथा काम गर्ने स्थानहरुमा नजान समेत स्वास्थ्य शाखा प्रमुख ध्रुब लामिछानेले अनुरोध गरे ।
मकवानपुर । मकवानपुर प्रहरीले निषेधाज्ञा उल्लङ्घन गर्ने २ सय ३५ वटा सवारी साधन नियन्त्रणमा लिएकाे छ ।
बैशाख २८ गते मंगलबार जिल्ला प्रहरी कार्यालय मकवानपुर र मातहत कार्यालयबाट खटिएकाे चेकिङ टोलीले मकवानपुर जिल्लाको बिभिन्न स्थानमा राखेको चेकप्वाईन्टमा चेकजाच गर्दा २ सय ३५ वटा सवारी साधन नियन्त्रणमा लिइएकाे जिल्ला प्रहरी कार्यालयका प्रवक्ता प्रहरी नायव निरीक्षक जयश्वर रिमालले जानकारी दिए । निषेधाज्ञा उल्लङ्घन गर्ने मोटरसाइकल तथा स्कुटर, अटो, सानो गाडी, टिपरलगायतका सवारी साधनहरुको कागजपत्र समेत नियन्त्रणमा लिईएको रिमालले बताए ।
यसैगरी मंगलबार निषेधाज्ञामा अटेर गरी पसल संचालन गर्ने ८ जनालाई नियन्त्रणमा लिइएकाे छ । निषेधाज्ञा उल्लङ्घन गर्ने सवारी धनी तथा पसल संचालक ५७ जनालाई संक्रामक रोग ऐन २०२० बमोजिम आवश्यक कारवाहिको लागि जिल्ला प्रशासन कार्यालय मकवानपुरमा पठाईएको प्रवक्ता रिमालले बताए ।
मकवानपुर । प्रधानमन्त्री केपी शर्मा ओलीले प्रतिनिधिसभामा साेमबार विश्वासको मत पाउन सकेनन् । प्रधानमन्त्रीले आफूलाई सरकार सञ्चालनमा कठिनाइ भएपछि नेपालको संविधानको धारा १०० को उपधारा (१) बमोजिम प्रतिनिधिसभामा विश्वासको मत लिन प्रस्ताव राखेका थिए ।
विश्वासको मतकाे पक्षमा ९३ सांसदले र विपक्षमा १ सय २४ जना सांसदले मतदान गरेका थिए भने तटस्थमा १५ मत परेको थियो । संविधानको धारा १०० को उपधारा (३) बमोजिम विश्वासको मत प्राप्त गर्न नसकेपछि प्रधानमन्त्री पदमुक्त हुने व्यवस्था छ । प्रधानमन्त्री ओलीले प्रतिनिधिसभामा विश्वासको मत प्राप्त गर्न नसकी पदमुक्त भएसँगै नयाँ सरकार गठनको बाटो खुलेको छ ।
नेपालको संविधानको धारा ७६ मा मन्त्रिपरिषद् गठनसम्बन्धी व्यवस्था छ । धारा ७६ को (१) मा प्रतिनिधिसभामा बहुमत प्राप्त संसदीय दलको नेतालाई राष्ट्रपतिले प्रधानमन्त्रीमा नियुक्त गर्ने र निजका अध्यक्षतामा मन्त्रिपरिषद्को गठन हुने व्यवस्था छ । मौजुदा प्रतिनिधिसभामा कुनै पनि दलको स्पष्ट बहुमत छैन । एउटै दलको बहुमत नहुँदा धारा ७६ (१) अनुसार प्रधानमन्त्री नियुक्त हुने अवस्था संसद्को गणितमा देखिँदैन । अाेली सरकार नेपालको संविधानको धारा ७६ (१) बमोजिम प्रतिनिधिसभामा बहुमत प्राप्त संसदीय दलको नेतालाई प्रधानमन्त्री नियुक्त गर्न सकिने व्यवस्थाअनुसार बनेको थियो । विश्वासको मत लिन नसकेपछि बहुमतको सरकार काम चलाऊ अवस्थामा पुगेको छ ।
प्रतिनिधिसभाको सबैभन्दा ठुलो दल नेकपा (एमाले) सँग १ सय २१ सांसद् छन् । दोस्रो ठुलो दल नेपाली काङ्ग्रेससँग ६३ (२ निलम्बित), नेकपा (माओवादी केन्द्र) सँग ५३ (४ निलम्बित), जनता समाजवादी पार्टी नेपालसँग ३४ (२ निलम्बित) तथा राष्ट्रिय जनमोर्चा, नेपाल मजदुर किसान पार्टी, राष्ट्रिय प्रजातन्त्र पार्टीका र स्वतन्त्र १/१ सांसद छन् ।
प्रतिनिधिसभाबाट विश्वासको मत पाउन नसकी प्रधानमन्त्री ओली पदबाट मुक्त भएकाले धारा ७२ (२) मा भएको व्यवस्थाअनुसार विश्वासको मतका विपक्षमा मतदान गर्ने प्रमुख ३ दल काँग्रेसका सभापति शेरबहादुर देउवा, माओवादी केन्द्रका अध्यक्ष पुष्पकमल दाहाल ‘प्रचण्ड’ र जसपाका अध्यक्ष उपेन्द्र यादवले साेमबार संयुक्त वक्तव्य जारी गरी नयाँ सरकार गठनको प्रक्रिया प्रारम्भ गर्न राष्ट्रपतिसँग आग्रह गरेका छन् । राष्ट्रपतिले संविधानको धारा ७६ (२) अनुसार नयाँ सरकार गठनका लागि सामबारै आह्वान समेत गरेकी छन् । धारा ७२ (२) मा प्रतिनिधिसभामा कुनै पनि दलको स्पष्ट बहुमत नरहेका अवस्थामा प्रतिनिधिसभा प्रतिनिधित्व गर्ने २ वा २ भन्दा बढी दलको समर्थनमा बहुमत प्राप्त गर्न सक्ने प्रतिनिधिसभाको सदस्यलाई राष्ट्रपतिले प्रधानमन्त्रीमा नियुक्त गर्ने प्रावधान छ । त्यसरी गठन हुने प्रधानमन्त्रीले प्रतिनिधिसभाको कुल सदस्य सङ्ख्याको बहुमत प्राप्त गर्नुपर्नेछ ।
नेपालको संविधान धारा ७७ मा प्रधानमन्त्री तथा मन्त्रीको पद रिक्त हुने अवस्थाअन्तर्गत (१) ख मा नेपालको संविधानको धारा १०० बमोजिम विश्वासको प्रस्ताव पारित हुन नसकेमा वा निजविरुद्ध अविश्वासको प्रस्ताव पारित भएमा भन्ने व्यवस्था छ । ‘संवैधानिक व्यवस्थाअनुसार धारा ७७ (३) बमोजिम कामचलाउ सरकार बनेको छ, अब संविधानको ७६ (२) बमोजिम ३० दिनभित्र संसदबाटै संयुक्त सरकार गठन हुनु पर्छ ।
उक्त व्यवस्थाअनुसार प्रतिनिधिसभामा अहिले कायम रहेका २ सय ७१ सदस्यमध्ये १ सय ३६ पुर्याउनुपर्ने हुन्छ । अहिले विश्वासको मत नदिने १ सय २४ छन् । बहुमतका लागि थप १२ मत आवश्यक पर्छ । धारा ७६ को (४) उपधारा (२) वा (३) बमोजिम नियुक्त प्रधानमन्त्रीले आफू नियुक्त भएको मितिले ३० दिनभित्र प्रतिनिधिसभाबाट विश्वासको मत प्राप्त गर्नुपर्नेछ संवैधानिक व्यवस्था रहेकाे छ ।
यदि सो अवस्थामा पनि सरकार बन्न सकेन भने तेस्रो चरणमा संविधानको धारा ७६ को (३) बमोजिम प्रतिनिधिसभाको निर्वाचनको अन्तिम परिणाम घोषणा भएको मितिले ३० दिनभित्र उपधारा (२) बमोजिम प्रधानमन्त्री नियुक्ति हुन सक्ने अवस्थामा नभएमा वा त्यसरी नियुक्त प्रधानमन्त्रीले उपधारा (४) बमोजिम विश्वासको मत प्राप्त गर्न नसकेमा राष्ट्रपतिले प्रतिनिधिसभामा सबैभन्दा बढी सदस्य भएको दलको संसदीय दलको नेतालाई प्रधानमन्त्री नियुक्त गर्ने संवैधानिक व्यवस्था छ ।
शरीरमा पसिना बगाएर पनि
माया र आशिर्वाद दिएर
नअघाउने मेरी आमा
भन न तिम्रो मनभित्र
कति गहिरो प्रेमको समुद्र छ ?
म सम्झिरहेको छु ती दिनहरु
तिमी दिनभर बारीमा
माटोको डल्ला फोडेर
थकित भई आउँदा पनि
हामीसँग अङ्कमाल गर्थ्यौ
साना- भाइबहिनीहरु
तिम्रो पछि पछि लाग्थे
तिमीले पटुकीमा नखाई राखेको
रोटी दिन्थ्यौ
मुसुक्क मुस्कुराउँदै
हामीले खाउञ्जेल हेरिरहन्थ्यौ
आमा भन न
तिम्रो मनभित्र
कति गहिरो प्रेमको समुद्र छ ?
आमा तपाईंको कतिवटा पेट छ ?
तपाईंको भोक कसरी मर्छ?
दिनभर काम गरेर पनि भोक लागेन ?
जवाफमा मेरी आमा भन्ने गर्थिन !
खाएर बचेको बाबु…
मनमनै सोच्थेँ,
कति मीठो झुठ !
आमा भन न
तिम्रो मनभित्र
कति गहिरो प्रेमको समुद्र छ ?
मुटुभरी मायाको पुलिन्दा बोकेर
स्नेहको हर्लिक्स खुवाउनु भयो
हौसलाको च्ववनप्रास खुवाउनु भयो
धर्तीमा अथकित हिड्न सिकाउनु भयो
आमा भन न
तिम्रो मनभित्र
कति गहिरो प्रेमको समुद्र छ ?
मेरी आमा !
तिमी स्नेहको आकाश बन्यौ
ममताको धर्ती बन्यौ
लड्थेँ म, दुख्थ्यो तपाईंलाई
आमा भन न
तिम्रो मनभित्र
कति गहिरो प्रेमको समुद्र छ ?
आमा ! म सम्झिरहेछु
सानोमा म बिरामी हुँदा
मेरो टाउको सुम्सुमाउँदै
हातगोडामा तेल लगाउँदै
रातभरि तिम्रा आँखा
रसिला हुन्थे
अनिदा हुन्थे
आमा भन न
तिम्रो मनभित्र
कति गहिरो प्रेमको समुद्र छ ?
कहिँ कतै जाँदा
म आउने बाटाभरि
बिच्छ्याइएकाे त्यो मुटुको कार्पेट
कसरी भुल्न सक्छु म ?
छोरो न भोकै छ कि भनेर
मीठो सन्त्रास बोकी
आँखाको दैलो खोली बसिरहने
मेरी आमा भन न
तिम्रो मनभित्र
कति गहिरो प्रेमको समुद्र छ ?
आमा!
यति गहिरो प्रेमको समुद्र
शितल निवासलाई पनि
सिकाइदेऊ न है !