मकवानपुर । सडक मर्मत गर्न उपमहानगरपालिकाकाे ध्यानाकर्षण गराइएकाे छ । सचेत नागरिक युवा समुहले हेटौंडा उपमहानगरपालिकालाई हेटाैडाकाे पारिजातपथ मर्मत गर्न ध्यानाकर्षण पत्र बुझाएको छ ।
हेटौंडा–४ परिजात पथ सडकखण्डमा रहेको खाल्डाहरु मर्मत गर्न भन्दै शुक्रबार हेटौंडा उपमहानगरपालिकाका उपमेयर मिना कुमारी लामालाई ध्यानाकर्षण पत्र बुझाइएको हो । सचेत नागरिक युवा समुह हेटौंडाका अध्यक्ष शिवनारायण श्रेष्ठसहितकाे टोलीले परिजातपथकाे कर्भड हल देखि सितल महल चोकसम्मकाे सडकका खाल्डो मर्मत गर्न माग गर्दै ध्यानाकर्षण पत्र बुझाएको छ ।
नेपालीहरुको महान चाड तिहार, छठ र ल्होसार जस्ता मुख्य चाडपर्वहरु नजिकिदै गर्दा यस सडक खण्डमा सवारी साधनहरुको चाप बढ्ने र सडक बिग्रिएका कारण दुर्घटना हुन सक्ने भन्दै ध्यानाकर्षण बुझाएको सचेत नागरिक युवा समुह हेटौंडाका श्रेष्ठ बताए ।

मकवानपुर । नेपाली कांग्रेस मकवानपुर सदस्य अर्जुन दाहाल नेकपा एकीकृत समाजवादी पार्टीमा प्रवेश गरेका छन् । शुक्रबार एक कार्यक्रमकाबीच पार्टीका केन्द्रीय उपाध्यक्ष केदार न्यौपानेले टिका र खादा लगाएर दाहाललाई स्वागत गरेका हुन् । पार्टी प्रवेश कार्यक्रममा बोल्दै दाहालले नेकपा एकीकृत समाजवादी पार्टी लोकतन्त्र र संविधानको रक्षाको लागि सदैव प्रतिवद्ध रहेको बताए ।
‘नेकपा एकीकृत समाजवादीमा प्रवेश गरेकाहरु अवसरभन्दा माथि उठ्नु भएको छ । त्यसकारण म प्रभावित भएँ ।’ उनले भने । उनले आफु कांग्रेसमा रहँदा पनि देश जनता र पार्टीप्रति इमान्दार भएको बताउँदै अब नेकपा एकीकृत समाजवादीमार्फत् जनताको घर दैलोसम्म पुग्ने बताए । अवसर नपाएर पार्टी त्यागेको आरोप आफुमाथि भएपनि त्यसमा सत्यता नभएको उनले बताए । कांग्रेसमा रहँदा सहयोग गर्ने सबैलाई उनले धन्यवाद समेत दिए ।
कार्यक्रममा नेकपा एकीकृत समाजवादीको पोलिटब्यूरो सदस्य एवम् मकवानपुर जिल्ला इन्चार्ज ललित बस्नेत, केन्द्रीय सदस्य एवम् मकवानपुर सह–इन्चार्ज मुनु सिग्देल र सुर्यचन्द्र न्यौपानेलगायतको उपस्थिति रहेको थियो । कार्यक्रम नेकपा (एस) मकवानपुर अध्यक्ष श्रीधर पोखरेलको सभाध्यक्षतामा भएको हो ।
मकवानपुर । मकवानपुर प्रहरीले विभिन्न मुद्दामा फैसला बमाेजिम कैद तथा जरिवाना भुक्तान नगरेका ८ जना प्रतिवादी पक्राउ गरेकाे छ । मकवानपुर जिल्ला अदालतकाे विभिन्न मितिकाे फैसलाले चेकअनादर मुद्दाका ३ जना, सवारी ज्यान मुद्दाका २ जना , लागुऔषध मुद्दाका २ जना र बैदेशिक रोजगार न्यायाधिकरणकाे फैसलाले वैदेशिक राेजगार ठगी मुद्दाका १ जना समेत गरी ८ जनालाई मकवानपुर प्रहरीले पक्राउ गरेकाे हाे ।
मकवानपुर जिल्ला अदालतको २०७८ बैशाक १६ गतेको फैसलाले चेक अनादर मुद्दामा २ हजार जरिवाना तोकिएका फरार प्रतिवादी हेटाैडा उपमहानगरपालिका वडा नम्बर १२ का २३ वर्षिय उमेश वि.क. २२ वर्षिय श्याम वि.क. र २२ वर्षिय विशाल भन्ने हरि वि.क. पक्राउ परेका छन् । उनीहरूलाई जिल्ला प्रहरी कार्यालय मकवानपुरबाट खटिएको प्रहरी टोलीले हेटौडा १२ बाट पक्राउ गरिएकाे जिल्ला प्रहरी कार्यालय मकवानपुरका निमित्त प्रवक्ता प्रहरी निरीक्षक देवेन्द्र दासले जानकारी दिए ।
यसैगरी मकवानपुर जिल्ला अदालतको २०६८ चैत २६ गतेको फैसलाले सवारी ज्यान मुद्दामा १ महिना ३ दिन कैद र २ हजार जरिवाना तोकिएका फरार प्रतिवादी बसामाडी १ नेवारपानी हाल हेटाैडा उपमहानगरपालिका १९ बस्ने वर्ष ३१ लक्ष्मण बहादुर गोले पक्राउ परेका छन् । गाेलेलाई जिल्ला प्रहरी कार्यालय मकवानपुरबाट खटिएको प्रहरी टोलीले हेटाैडा १९ (बसामाडी) बाट पक्राउ गरिएकाे प्रहरी निरीक्षक दासले बताए ।
यस्तै मकवानपुर जिल्ला अदालतको २०७६ मंशिर १० गतेको फैसलाले सवारी ज्यान मुद्दामा ४ महिना ३ दिन कैद सजाय भुक्तान गर्न बाँकी रहेका फरार प्रतिवादी हेटौडा उपमहानगरपालिका वडा नं. १५ बस्ने वर्ष २४ को प्रदिप प्रजा पक्राउ परेका छन् । जिल्ला प्रहरी कार्यालय मकवानपुरबाट खटिएको प्रहरी टोलीले हेटौडा वडा नं. १५ स्थितबाट प्रजालाई पक्राउ गरिएकाे प्रहरीले जानकारी दिएकाे छ ।
बैदेशिक रोजगार न्यायाधिकरणको २०७६ बैशाक १७ गतेको फैसलाले बैदेशिक रोजगार ठगी मुद्धामा १ वर्ष ६ महिना कैद र १ लाख ५० हजार जरिवाना भुक्तान गर्न बाँकी रहेका फरार प्रतिवादी मनहरी गाउँपालिका वडा नं. ३ हाँडीखोला घर भई हाल जिल्ला काठमाडौं २६ बस्ने वर्ष ४९ कुमार प्रसाद पौडेल पक्राउ परेका हुन् । जिल्ला प्रहरी कार्यालय मकवानपुरबाट खटिएको प्रहरी टोलीले मनहरी ३ बाट पाैडेललाई पक्राउ गरिएकाे हाे ।
मकवानपुर जिल्ला अदालतको २०७७ चैत ९ गतेको फैसलाले लागुऔषध मुद्धामा ७ महिना १३ दिन कैद भुक्तान गर्न बाँकी फरार प्रतिवादी हेटौडा उपमहानगरपालिका वडा नं. १५ बस्ने बर्ष ५८ को राम बहादुर बल पक्राउ परेका छन् । जिल्ला प्रहरी कार्यालय मकवानपुरबाट खटिएको प्रहरी टोलीले हेटौडा १५ स्थितबाट बललाई पक्राउ गरिएकाे मकवानपुर प्रहरीले जनाएकाे छ ।
यसैगरी निमित्त प्रवक्ता दासका अनुसार मकवानपुर जिल्ला अदालतको २०७७ फागुन २६ गतेको फैसलाले लागुऔषध मुद्धामा १ बर्ष ११ महिना ७ दिन कैद भुक्तान गर्न बाँकी फरार प्रतिवादी मकवानपुरगढी गाउँपालिका वडा नं. ४ बस्ने बर्ष ६८ को बिष्णु लाल रुम्बा पक्राउ परेका हुन् । जिल्ला प्रहरी कार्यालय मकवानपुरबाट खटिएको प्रहरी टोलीले मकवानपुरगढी ४ स्थितबाट रूम्बालाई पक्राउ गरिएकाे हाे ।
पक्राउ परेका ८ जनालाई आवश्यक कारवाहीको लागि कार्तिक ४ गते जिल्ला अदालत मकवानपुर उपस्थित गराईएको समेत मकवानपुर प्रहरीले जनाकारी दिएकाे छ ।
मकवानपुर/बागमती प्रदेशमा मुख्यमन्त्री अष्टलक्ष्मी शाक्यको सरकार पुनः एक साता लम्ब्याइएको छ । गठबन्धनको तर्फबाट नेकपा समाजवादीका राजेन्द्र पाण्डे मुख्यमन्त्री बन्ने लगाभग पक्का भएको छ । यद्यपि संसदीय प्रक्रिया अनुसार विश्वासको मत लिनुपर्ने भएकोले १० कात्तिकमा बस्ने प्रदेश सभाको बैठकमा शक्यले विश्वासको मत लिने भएकी छन् ।
विहीबार बसेको प्रदेश सभाको बैठक आगामी १० कात्तिकमा बस्ने स्थगित गरिएको र सोही बैठकमा विश्वासको मत प्राप्त गर्ने सम्बन्धी बाँकी सम्पूर्ण प्रक्रिया पुरा गरिने प्रदेशका सभामुख सानुकुमार श्रेष्ठले बताए । विहीबार १ बजेको लागि तोकिएको बैठक गठबन्धनको बैठक नसकिएको कारण दिउँसो साँढे ३ बजे सुरु भएको थियो । बैठकमा मुख्यमन्त्री अष्टलक्ष्मी शाक्यले विश्वासको मत प्राप्त गर्नको लागि एमाले नेतृत्वको सरकारले करिब साँढे ३ बर्षको कार्यकालमा गरेको कामको समिक्षा सुनाएकी थिइन् । एमालेको नेतृत्वमा जनहितकालागि प्रभावकारी काम भएकोले आफू नेतृत्वको सरकारलाई विश्वासको मत प्रदान गर्न आव्हान गरेकी थिइन् ।
प्रदेशमा ६ सय ४० पक्की सडकको बहुबर्षीय ठेक्का सम्झौता भएको, प्रदेशका १३ वटै जिल्लाहरुमा खानेपानीको पहुँच विस्तार गरिएको, राजधानीमा अवस्थित मदनभण्डारी स्वास्थ्य विज्ञान प्रतिष्ठानलाई स्वास्थ्य हबको रुपमा विकास गर्ने गरी काम भइरहेको, कृषि क्षेत्रको विकासका लागि कृषकहरुलाई मल, बीउबीजन उपलब्ध गराउने कार्य गरिएको, युवा र खेलकुद कार्यक्रम लक्षित गरी ९१ वटा खेल संचालन गर्ने गरी तयारी गरिएको, शैक्षिक गुणस्तर विस्तारको लागि पहल भएको, उद्योग कलकारखानाको संरक्षण तथा विस्तारमा पहल भएको सफल कार्यहरु सुनाउँदै मुख्यमन्त्री शाक्यले विश्वासको मत मागेकी थिइन् ।
२ भदौमा एमालेको एकल बहुमतबाट शाक्य मुख्यमन्त्री नियुक्त भएकी थिइन्। एमाले विभाजन भएर १३ सांसदले एकीकृत समाजवादी रोजेपछि उनी अल्पमतमा परेकी हुन्। बागमती प्रदेश सभामा कुल ११० सदस्यमध्ये हाल १०९ सांसद छन्। जसमा एमालेका ४३, नेपाली कांग्रेसका २२, माओवादी केन्द्रका २३, एकीकृत समाजवादीका १३, विवेकशील साझाका तीन, नेमकिपाका दुई, राप्रपाका दुई र स्वतन्त्र सांसद एक जना छन् ।
विपक्षी गठबन्धनले बागमती प्रदेशको मुख्यमन्त्रीमा राजेन्द्र पाण्डेलाई प्रस्ताव गरेको छ। बिहीबार बसेको विपक्षी गठबन्धनको बैठकले पाण्डेलाई मुख्यमन्त्रीमा प्रस्ताव गर्ने निर्णय गरेको हो। विपक्षी दलको तर्फबाट प्रदेश सभामा बोल्दै नेकपा (माओवादी केन्द्र) संसदीय दलका नेता शालिकराम जमकट्टेले पनि पाण्डेलाई मुख्यमन्त्रीका रुपमा प्रस्ताव गरेको बताएका छन्।
जमकट्टेले भने, “विपक्षी गठबन्धनको तर्फबाट नेकपा (एकीकृत समाजवादी) संसदीय दलका नेता राजेन्द्र पाण्डेलाई मुख्यमन्त्रीका रुपमा प्रस्ताव गरेका छौं।” यस विषयमा विपक्षी दलबीच सहमति भएको उनले बताए।
बिहीबार मुख्यमन्त्री अष्टलक्ष्मी शाक्यले प्रदेश सभा बैठकमा बोल्दै विश्वासको मत मागेकी छन्। २ भदौमा एमालेको एकल बहुमतबाट शाक्य मुख्यमन्त्री नियुक्त भएकी थिइन्। एमाले विभाजन भएर १३ सांसदले एकीकृत समाजवादी रोजेपछि उनी अल्पमतमा परेकी हुन्।
एक जना सांसदको निधन भएकाले ११० सदस्यीय प्रदेश सभामा अहिले १०९ सांसद छन्। बहुमतका लागि ५५ सांसदको समर्थन आवश्यक पर्छ। अहिले एमालेका ४३, कांग्रेसका २२, माओवादीका २३, एकीकृत समाजवादीका १३, विवेकशील साझाका तीन, नेमकिपाका दुई, राप्रपाका दुई र एक जना स्वतन्त्र सांसद छन्।
समाचार/ तस्बिर हिमालखबरबाट साभार