मकवानपुर । मकवानपुर प्रहरीले लागु औषध र अवैध कपडा सहित ३ जनालाई नियन्त्रणमा लिएकाे छ । लागु औषध ओरेनेक्स १ सय एमएल १४ बाेतल सहित हेटौडा १५ बाट १ जना तथा गाँजा ५ किलो ३ सय ग्राम सहित हेटौडा १० टिसिएनबाट १ जनालाई प्रहरीले नियन्त्रणमा लिएकाे जनाएकाे छ । यस्तै अवैध कपडासहित हेटौडा १५ राताेमाटेबाट १ जनालाई नियन्त्रणमा लिइएकाे छ ।
असार १० गते प्रहरी चौकी रातोमाटेबाट हेटौडा पथलैयासडक खण्डमा सवारी साधन जाँच गर्ने क्रममा बिरगंजबाट हेटौडा तर्फ आउदै गरेको ना ५ ख ०५५३ नं. तेल ट्याङ्करकाे क्याबिनबाट ओरेनेक्स १ सय एमएल १४ बाेतल बरामद गरिएकाे हाे । ट्याङ्कर चालक हेटौडा १ का ४९ वर्षीय शंकर अधिकारीलाई उक्त लागु औषध र ट्याङकर सहित नियन्त्रणमा लिइएकाे प्रहरीले जनाएकाे छ ।
यसैगरी प्रहरी चौकी रातोमाटेबाट खटिएकाे प्रहरी ना ५ ख ०५५३ नं. तेल ट्याङकरमा सवार निजगढ नगरपालिका ५ बारा का ३२ वर्षीय महिलाले भन्सार छली ल्याएको कपडा नियन्त्रणमा लिइएकाे मकवानपुर प्रहरी प्रवक्ता टेक बहादुर कार्कीले जानकारी दिए । १ लाख ४३ हजार ७ सय रुपैया मूल्य बराबरकाे सर्टको थानको कपडा र कुर्था सुरुवाल बिल बिजक नभएको अवस्थामा फेला परेकाेले उक्त महिलालाई कपडा सहित नियन्त्रणमा लिइएकाे प्रहरीले जनाएकाे छ ।
यस्तै असार ११ गते जिल्ला प्रहरी कार्यालय मकवानपुरबाट खटिएको प्रहरी टोलीले मकवानपुर १० स्थित टिसियन रोडबाट लागु औषध ५ केजी ३ सय ग्राम गाजा सहित गाेरखा बारपाक सुलिकोट ४ का ३२ वर्षीय आशिष गुरुङलाई नियन्त्रणमा लिएकाे छ । सडकमा हिडिहेका गुरुङलाई शंका लागि रितपूर्व जाँच तथा खानतलासी गर्दा गुरुङले बाेकेकाे झोलामा उक्त परिमाणमा लागु औषध गांजा फेला परेकाे प्रहरीले जनाएकाे छ ।
अबैध कपडा सहित नियन्त्रणमा लिइएकाे महिलालाई आवश्यक कारबाहीको लागि राजश्व अनुसन्धान कार्यालय पथलैया बारा पठाईएको कार्कीले बताए । यस्तै लागु औषध सहित नियन्त्रणमा लिइएकाे ट्याङ्कर, ट्याङ्कर चालक अधिकारी र गुरुङमाथि थप अनुसन्धान भइरहेकाे प्रहरीले जानकारी दिएकाे छ ।
मकवानपुर । मकवानपुरका निर्माण व्यवसायीहरुले जिल्लास्थित सरकारी कार्यालयहरुमा ज्ञापनपत्र बुझाएका छन् । निर्माण व्यवसायीले नौ बुँदे माग सहित जिल्लास्थित ५ सरकारी कार्यालयमा ज्ञापनपत्र बुझाएका हुन् ।
निर्माण व्यवसायी संघ मकवानपुरको अगुवाइमा विहीबार शहरी विकास तथा भवन कार्यालय, सडक डिभिजन कार्यालय, सङघीय खानेपानी तथा ढल व्यवस्थापन कार्यालय, जलश्रोत तथा सिँचाइ विकास डिभिजन कार्यालय र यातायात पूर्वाधार निर्देशनालय हेटौँडामा ज्ञापनपत्र बुझाइएको थियाे ।
निर्माण व्यवसायी संघ मकवानपुरले सबै निर्माण कार्यकाे भुक्तानी हुनु पर्ने, उपभोक्ता समितिबाट निर्माण कार्य गर्ने व्यवस्था रोक्नुपर्नेलगायतका ९ बुँदै माग राख्दै ज्ञापनपत्र बुझाएको थियो । निर्माण व्यवसायी संघ मकवानपुरका कार्यबाहक अध्यक्ष सागर कटुवाल द्धितीय उपाध्यक्ष भवनाथ अधिकारी, तृतीय उपाध्यक्ष भीमसेन श्रेष्ठ, महासचिव राजेन्द्रप्रसाद चौलागाई, उपमहासचिव दिनेश पनेरु, कोषाध्यक्ष अनल श्रेष्ठलगायतकाे उपस्थितिमा ज्ञापनपत्र बुझाइएकाे हाे ।

मकवानपुर । बागमती प्रदेश सरकारले सार्वजनिक सवारीसाधनको भाडा घटाएकाे छ । असार ११ गते विहीबारबाट लागू हुने गरी बागमती प्रदेशले नयाँ भाडादर समेत निर्धारण गरेकाे छ ।
प्रदेश श्रम, रोजगार तथा यातायात मन्त्रालय मन्त्रीस्तरीय निर्णयअनुसार भाडा घटाइएकाे । सरकारले उपत्यका बाहेकका प्रदेशका जिल्ला भित्र संचालनमा आउन सवारीसाधनमा गत जेठ ११ गतेदेखि लागु गरेको भाडादरमा २.३० प्रतिशत भाडा घटाएकाे छ । यात्रुले यो भाडादरमा १५ किलोग्रामसम्मको सामान निःशुल्क र सोभन्दा बढीको प्रति १० किलोग्रामको ५ रुपैयाँ दरले भाडा तिर्नुपर्ने गरी भाडादर तोकिएको छ ।
नयाँ भाडादरअनुसार काठमाडौँ उपत्यकाभित्रका सार्वजनिक सवारीसाधनको भाडा १ रुपैयाँले घटेको छ । यसअघि ५ किलोमिटरसम्मको १९ रुपैयाँ रहेकाेमा अहिले १८ रुपैया कायम गरिएकाे छ । यस्तै १० किलोमिटरसम्मको भाडा २५ रुपैयाँबाट घटाएर २४ रुपैयाँ कायम गरिएकाे छ । १५ किलोमिटरसम्म यात्रा गर्दा पहिला ३० रुपैयाँ रहेकोमा अहिले २९ रुपैयाँ तोकिएको छ । यस्तै, २० किलोमिटरसम्मको भाडा पहिला ३३ रुपैयाँ रहेकोमा अहिले ३२ रुपैयाँ तय गरिएको छ । २० किलोमिटरभन्दा लामो दूरीको भाडा पहिले ३८ रुपैयाँ रहेकोमा अहिले ३७ रुपैयाँ तोकिएको छ ।


मकवानपुर । हेटौंडा बजार क्षेत्रको सडक विस्तार नरोकिने डिभिजन सडक कार्यालय हेटौंडाले जनाएको छ । गत असार १० गते प्रकाशित सूचना अनुसार नै ३५ दिनपछी सडक सीमाभित्रका संरचना हटाउन सुरु गर्ने कार्यालयले जनाएकाे छ ।
हेटौंडाका केही घरधनीको हकमा भने सर्वोच्च अदालतले अल्पकालीन अन्तरिम आदेश जारी गरेको छ । विजयलाल जोशीले पेस गरेको रिट निवेदन माथि बहस गर्दै सोमबार सर्वोच्च अदालतले उक्त अल्पकालीन अन्तरिम आदेश जारी गरेको हो । सडक कार्यालयले आदेश भएका घरको हकमा अदालतकै आदेशानुसार गर्ने तर अन्य स्थानको सडक विस्तारको काम भने नरोकिने प्रष्ट पारेको छ ।
डिभिजन सडक कार्यालय हेटौंडाले गत असार १० गते महेन्द्र राजमार्गको हेटौंडा स्थित रातोमाटे-बुद्धचोक, राप्तीपुलसम्मको सडक सीमा सड़क केन्द्रबाट २५/२५ गजभित्र पर्ने संरचना हटाउन भन्दै सूचना प्रकाशित गरेको थियो । सडक कार्यालयको सूचनामा तोकेको मिति साउन १५ गते सकिदै छ । ३५ दिनको समयसीमा सकिएलगत्तै हेटौंडाको मुख्य बजार विस्तार कार्य सुरु गर्ने सडक डिभिजन कार्यालयले जनाएको छ ।
यसअघि हेटौंडाबजार भत्काउन सुरु गरेपछी यहाँका केहि घरधनीले अदालतमा रिट दायर गरेपछी अदालतले स्टे अर्डर दिएको थियो। २५ मिटर सडक विस्तारकै मुद्धामा सर्वोच्च अदालतले २५/२५ गज भत्काउन मिल्ने र त्यस भन्दा बढी भत्काउन परे क्षतिपुर्ति दिनुपर्ने भनि उत्प्रेषण आदेश दिएको थियो ।
अदालतकै आदेशलाई टेकेर सडक कार्यालयले २५/२५ गज भत्काउने तयारी गरेको छ ।

सडक बिस्तार हुनु पर्ने मागसहित बाबु छोरा अनशनमा
हेटौंडाको सडक विस्तार हुनै पर्ने भन्दै बाबु छोरा अनशनमा बसेका छन । सम्बन्धित पक्षले सडक फराकिलो बनाउने सबालमा खुट्टा कमाउन नहुने भन्दै ७३ बर्षीय बाबू र उनका ३४ बर्षीय छोरा सडक डिभिजन कार्यलय हेटौंडाको गेटमा अनसन बसेका छन् ।
हेटौंडा उपमहानरपालिका-८ कमानेका ३४ बर्षीय राजिव तामाङ र उनका पिता ७३ बर्षीय मानबहादुर तामाङ अब कुनैपनि बहानमा सडक विस्तारको काम रोक्न नहुने भन्दै कार्यलयको गेटमा अनसन बसेका हुन् । उनीहरुले सडक विस्तार देशकै विकाससंग जोडिएकोले रोक्न नहुने भन्दै गत साउन १ गतेदेखि अनसन बसेका हुन ।
सरकारले कमभन्दा कम क्षति हुनेगरि सडक विस्तारको उपाय खोज्नुपर्ने राजिव बताउँछन । मानबहादुरले भने समग्र हेटौंडाको विकासमा बर्षौदेखिको अन्यौलताले निकास पाएको हेर्न चाहेको बताए ।
डिभिजन सडक कार्यालय हेटौंडाले असार १० गते महेन्द्र राजमार्गको हेटौंडा–१५ रातोमाटेबाट-बुद्धचोक हुदै राप्तीपुलसम्मको सडक सीमा सड़क केन्द्रबाट २५/२५ गजभित्र पर्ने संरचना हटाउन सूचना प्रकाशित गरेको थियो । सडक कार्यालयको ३५ दिने सुचनाको म्याद साउन १५ गते सकिदैछ । सूचनाको अबधिमा रातोमाटे क्षेत्रमा संरचनाहरू भत्काउने काम भएका छन ।
मकवानपुर । पूर्व-पश्चिम राजमार्ग अन्तर्गत हेटौंडा उपमहानगरपालिकाभित्रको सडक खण्ड विस्तारका सम्बन्धमा सर्वोच्च अदालतले अल्पकालिन अन्तरिम आदेश जारी गरेकाे छ । हेटौडा १० का विजयलाल जोशीले पेस गरेको रिट निवेदनमाथि सुनुवाई गर्दै सर्वोच्चले सडक विस्तारकाे विषयमा अल्पकालीन अन्तरिम आदेश जारी गरेकाे हाे ।
मुद्दामा न्यायाधीश अनिल कुमार सिन्हाको इजलासले भौतिक पूर्वाधार तथा यातायात मन्त्रालयसँग सडक विस्तारको विषयमा १५ दिन भित्र लिखित जवाफ माग गर्दै उक्त आदेश गरेको हो । सर्वोच्चकाे अल्पकालिन अन्तरिम आदेशले निरन्तरता पाए हेटौडाकाे सडक फराकिलाे पार्ने कार्यमा तत्काल अवराेध हुने छ ।
‘यसमा के कसो भएको हो ? निवेदकको माग बमोजिम उत्प्रेषणको आदेश किन जारी हुन नपर्ने हो ? आदेश जारी हुनु नपर्ने भए सो को आधार र कारण सहित बाटोको म्याद बाहेक सूचना म्याद पाएका मितिले १५ (पन्ध्र) दिनभित्र प्रत्यर्थी नं. १, २, ३, ४, ५, ६, ७, ८, ९ ले महान्यायाधिवक्ताको कार्यालय मार्फत र प्रत्यर्थी नं. १० ले आफै वा आफ्नो कानुन बमोजिम प्रतिनिधिमार्फत लिखित जवाफ पेस गर्नू भनी प्रस्तुत आदेश र रिट निवेदनको एक एक प्रति नक्कल समेत साथै राखी विपक्षीहरूका नाममा सूचना म्याद जारी गरी म्यादभित्र लिखित जवाफ परे वा अवधि व्यतीत भएपछि नियमानुसार पेस गर्नुहोला,’ अदालतको आदेशमा उल्लेख गरिएको छ ।
निवेदकले अन्तरिम आदेश माग गरेकाे सम्बन्धमा निवेदनमा उल्लेखित सडक विस्तारमा पर्ने घर जग्गाका सम्बन्धमा यस अदालतबाट ०७३-WO-०६९७ र ०७३-WO- ०९१२ समेतमा जारी भएको परमादेश अनुरुपका कार्यसम्पन्न नभएको भनी रिट निवेदनमा उल्लेख भएको अवस्था हुँदा सो सम्बन्धमा भए गरेका सम्पुर्ण कार्य सम्बन्धी सक्कल वा प्रमाणित प्रतिलिपि लिई मिति २०८०।४।१६ को पेशी तोकी प्रस्तुत निवेदनलाई यसै प्रकृतीको ०८०-WO-०००८ साथै राखी पेश गर्नुहोला ।
आदेशमा भनिएकाे छ । मिति २०८०।४।४ मा निवेदकका हक स्वामित्व भित्रको घर जग्गाहरुमा हस्तक्षेप गर्ने वा भत्काउने कुनै कार्य नगर्नु, यथास्थितिमा राख्नु भनी अल्पकालीन अन्तरिम आदेश जारी भएकोले सोही अनुरुप प्रस्तुत निवेदकहरुका हकमा समेत गर्ने गरी सर्वोच्च अदालत नियमावली, २०७४ को नियम ४९ बमोजिम अल्पकालिन अन्तरिम आदेश सर्वोच्चले जारी गरेकाे छ ।
भौतिक पूर्वाधार तथा यातायात मन्त्रालयलाई विपक्षी बनाइ पेश गरेको मुद्दामा निवेदक जोशीको तर्फबाट वरिष्ठ अधिवक्ता युवराज भण्डारीले बहस गरेका थिए । सर्वोच्चकाे अल्पकालिन अन्तरिम आदेश भएकाेले यसले निरन्तरता पाउने वा खारेज हुने छलफलमा बाेलाएकाे समय पछिकाे आदेशले निर्धारण गर्ने छ ।
विगत १ दशक अघिबाट हेटौडामा पर्ने राजमार्ग फराकिलाे पार्ने कार्यले चर्चा पाइरहेकाे छ । गत असार १० गते डिभिजन सडक कार्यालय मकवानपुरले हेटौडा १५ काे राताेमाटेदेखि राप्तिपुलसम्मकाे सडक दायाँवायाँ फराकिलाे पार्न ३५ दिने सूचना जारी गरे पछि सडक विस्तारले पुनः चर्चा पाएकाे थियाे । सूचना अनुसारकाे म्याद साउन १५ गते सकिने र १६ गतेबाट २५ गज फराकिलो पार्ने तयारी सम्बन्धित निकायले गरिरहेका थिए ।


