१ सय ११ केजी गाँजासहित १ जना पक्राउ
Tags: No Comments
मकवानपुर । मकवानपुर प्रहरीले १ सय ११ केजी लागूऔषध गाँजासहित १ जना भारतीय नागरिकलाई पक्राउ गरेको छ ।
जिल्लाकाे हेटौंडा उपमहानगरपालिका वडा नम्बर ३, तीनताप्केबाट बा १० च ५३३ नम्बरको योद्धा पिकअप गाडीबाट १ सय ११ केजी लागूऔषध गाँजा बरामद भएकाेले गाडी चालक मोहम्मद समीरलाई पक्राउ गरिएकाे मकवानपुर प्रहरीले जनाएकाे छ ।
सोमबार प्रहरी चौकी लेवटबाट खटिएको प्रहरी टोलीले पूर्व–पश्चिम राजमार्गअन्तर्गत हेटौंडा–३, तीनताप्केमा सवारी साधन रोकी जाँच गर्ने क्रममा मनहरीबाट बीरगन्जतर्फ जाँदै गरेको उक्त गाडीबाट १ सय ११ किलो गाँजा बरामद गरेको हो । गाडी चालक भारतको बिहार राज्यको मोतिहारी जिल्लाका ३० वर्षीय समीरलाई गाँजासहित पक्राउ गरिएकाे जिल्ला प्रहरी कार्यालय मकवानपुरले जनाएकाे छ ।
बालुवा र मलले छोपेर उक्त लागूऔषध गाँजा लैजादै गर्दा गाडी र चालकलाई पक्राउ गरिएकाे प्रहरीले जनाएकाे छ । प्रहरीले बरामद गरेको लागूऔषध गाँजा, गाँजा तस्करीमा प्रयोग भएको पिकअप गाडी र चालक समीरलाई थप अनुसन्धान भइरहेकाे जनाएकाे छ ।
मकवानपुर । ‘विजुली माया वनः श्रेष्ठ अन्तर्राष्ट्रिय संगीत पुरस्कार’ कलाकार नीर शाहलाई प्रदान गरिने भएको छ । भीम विराग संगीत साहित्य कला प्रतिष्ठानले आईतबार काठमाडौंमा पत्रकार सम्मेलन गरी यस वर्षकाे लागि उक्त पुरस्कार शाहलाई प्रदान गरिने जानकारी दिएको हो ।
प्रतिष्ठान अध्यक्ष केशवलाल श्रेष्ठले १ लाख राशीको पुरस्कार गीतकार शाहलाई प्रदान गरिने निर्णय भएको जानकारी दिए । मूलतः चलचित्र निर्माण, निर्देशन एवम् अभिनयमा समर्पित शाह २०३२ सालदेखि निरन्तर नेपाली गीत लेखनमा समेत सक्रिय स्रष्टा हुन । उनले नेपाली गीत संगीतमा पुर्याएकाे योगदानको कदर गर्दै पुरस्कृत गर्न लागिएको प्रतिष्ठानले जनाएको छ ।
नेपाली गीत लेखनको क्षेत्रमा विगत पाँच दशकदेखि निरन्तर कलम चलाउदै आएका कलाकार शाहका पर्खी बसें आउला भनी.., बादल बनाइदेऊ.., गहिराइमा डुब्दै नडुब .. लगायतका गीत चर्चामा छन् । आगामी माघ १५ गते हेटौँडामा एक विशेष समारोहकाबीच नीर शाहलाई पुरस्कार समर्पण गरिने बताइएको छ । व्यवसायी कन्हैयाकृष्ण श्रेष्ठले आफ्नी आमाको सम्मानमा २०६४ सालमा पुरस्कारकाे स्थापना गरेका हुन् । २०६४ सालमा अम्बर गुरुङलाई ‘विजुली माया वनः श्रेष्ठ अन्तर्राष्ट्रिय संगीत पुरस्कार’ प्रदान गरिएकाे थियाे ।
त्यसपछि अम्बर गुरुङ- २०६४ प्रेमध्वज प्रधान- २०६५ भक्तराज आचार्य – २०६६, फत्तेमान राजभण्डारी- २०६७, शान्ति ठटाल- २०६८, दीप श्रेष्ठ- २०६९, प्रकाश श्रेष्ठ- २०७०, न्हुच्छेबहादुर डङ्गोल- २०७१, मीरा राणा- २०७२, कर्म योञ्जन- २०७३, चेतन कार्की- २०७४, दावा ग्याल्मो- २०७७, दीपक जङ्गम- २०७८, किरण प्रधान २०७९, राजेन्द्र थापा- २०८० पुरस्कृत भएका छन् । स्थापना हुँदा ५० हजार रुपैंया रहेकाे उक्त पुरस्कारकाे राशी २०६७ सालबाट बृद्धि गरी १ लाख रुपैंया पुऱ्याइएको छ ।
वरिष्ठ कलासाधक भीम विरागको सम्मानमा तरङ्ग साँस्कृतिक परिषद्को पहलमा ७ भाद्र २०५९ मा स्थापना भएको भीम विराग सङ्गीत साहित्य कला प्रतिष्ठान नेपाल नेपाली सङ्गीत, साहित्य र कला क्षेत्रकाे संस्था हाे । देश तथा विदेशमा रही नेपाली वाङमयकाे क्षेत्रमा उल्लेखनीय योगदान पुन्याउँदै आएका सर्जक, स्रष्टाहरूलाई सम्मानित एवम् पुरस्कृत गर्दै आएको यो संस्थाले मकवानपुरको माटोबाट वार्षिक रुपमा विभिन्न राष्ट्रिय तथा अन्तर्राष्ट्रिय पुरस्कार तथा सम्मान समर्पण गर्दै आइरहेको प्रतिष्ठानले जनाकारी दिएकाे छ ।
प्रतिष्ठान आफैंले स्थापना गरेकाे भीम विराग राष्ट्रिय सङ्गीत पुरस्कार (२०७७), भीम विराग राष्ट्रिय साहित्य पुरस्कार (२०८०), भीम विराग राष्ट्रिय कला पुरस्कार (२०८०), भीम विराग राष्ट्रिय पत्रकारिता पुरस्कार (२०८१) प्रदान गर्दै आएकाे छ । यसैगरी प्रतिष्ठानले तुलसीमाया – शिवकुमारी सिर्जनशील नारी पुरस्कार ( सस्थापक मुक्तिगोविन्द वैद्य, २०६०), भीम – मथुरा बाल प्रतिभा पुरस्कार (संस्थापक विन्दुगोपाल गोर्खाली, २०६०), कमला भवानी सङ्गीत पुरस्कार (सस्थापक घनश्यामशङ्कर शर्मा, २०६५) प्रदान गर्दै आएकाे छ ।
यस्तै शीला नारी सङ्गीत पुरस्कार (संस्थापक आशीष श्रेष्ठ, २०६५), हर्षनर बज्राचार्य स्मृति स्वर्ण पुरस्कार (संस्थापक ज्योतिरत्न बज्राचार्य, २०६६), विजय बानियाँ स्मृति लोक सङ्गीत पुरस्कार (सस्थापक चुनु बानियाँ, २०७०), चिनुकुमारी लामा स्मृति साहित्य पुरस्कार (संस्थापक रामबहादुर पाख्रिन, २०७१), मङ्गलादेवी श्रेष्ठ स्मृति स्वास्थ्य सेवा पुरस्कार (संस्थापक देवप्रसाद श्रेष्ठ/दीपकप्रसाद श्रेष्ठ, २०७३), अजित सेन गुप्ता स्मृति भिन्न क्षमता पुरस्कार (संस्थापक रोशन सेन गुप्ता, २०७४ ) पुरस्कार समेत प्रदान गर्दै आएकाे छ ।
पाल्पा । बागमती प्रदेश प्रमुख दीपक प्रसाद देवकोटालाई पाल्पा जिल्लामा सम्मान गरिएकाे छ । पाल्पाको पुर्वखोला गाउँपालिका ३ स्थित उद्बुद्व माविले सम्मान गरेको हाे ।
बाल्यकालमा सोही बिद्यालय पढ्नु भएका उहाँलाई बागमतीको प्रदेश प्रमुख हुनुभएपछी सम्मान गरिएको बिद्यालय व्यवस्थापन समिति अध्यक्ष पदम बहादुर थापाले बताए । विद्यालयको ७४ औं बार्षिकोत्सव समारोहमा शनिबार प्रमुख अतिथिको रुपमा सहभागी प्रदेश प्रमुख देवकोटाले आफू जन्मेको हुर्केको माटोमा पुग्दा बाल्यकालको स्मृति ताजा भएको बताए ।
“पाल्पा जिल्लाको शैक्षिक जगतको धरोहर उद्बुद्व माविले नै मलाई आजको स्थानमा पुर्याउन भूमिका खेलेको हो” प्रदेश प्रमुख देवकोटाले भने “एक दिन एक जुगमा एकपटक मात्र आउँछ भनेझैं आजको यो सद्भाव मेरो जीवनको उत्कृष्ट क्षणभित्र पर्दछ ।” पाल्पाको जिल्लाको साबिक देविनगर २ हाल पुर्वखोला वार्ड नं ४ लेम्धेममा जन्मनु भएका देवकोटा प्रारम्भिक शिक्षा हासिल गर्दै यहाँको पाखा बारीमा हुर्कदै शुरुमा बेसर्घा र लेम्धेममा रहेको रम्भादेवी प्रावि शिक्षण पेशामा समेत संलग्न भएका थिए ।
“मान्छे भौतिक रूपमा कहाँ छ भन्नुभन्दा उसको आत्मामा के कुराले जरो गाडेको छ भन्ने कुरा महत्वपूर्ण हुन्छ” प्रमुख देवकोटाले भने “मलाई जन्म, सुससंस्कार , गृहस्थ र जागिरे जीवनमा प्रवेश गराउने पाल्पाको माटो मेरो लागि यो धर्तीका मूल्यवान धातु सुन र हीराभन्दा कमी छैन ।” आफू भौतिक रूपले पाल्पाको माटो भन्दा टाढा रहे पनि शरीरको रक्त नलीहरूमा पाल्पाको मीठो सम्झनाको तिनाउ र कालीगण्डकी बगेको देवकाेटाले बताए ।
“मेरा पितामाता, पूर्खा, नातेदार, छिमेकी, गुरूबर्ग, साथीसङ्गीलगायत सम्पूर्णमा नमन गर्दछु” उनले भने “म हुर्केको मगर समूदाय र दौँतरीहरूलाई बिर्सेको छैन र बिर्सिन पनि सक्दिन ।” उद्बुद्व माविका विद्यार्थीहरूलाई बिद्यालय उमेरमा नै धेरै भन्दाधेरै मेहनत गर्न उहाँले प्रेरित समेत गरे । “तपाइँहरू जीवनको उर्जाशील उमेरमा हुनुहुन्छ, मेहनतभन्दा अर्को बिकल्प छैन, संसार मेहनतीहरूको हो” प्रमुख देवकोटाले भने “तपाईहरूसङ्ग सपना हुनुपर्छ, जुन सपनाले तपाईको निन्द्रा हराओस्, यति पढ्नुस् कि अभिभावकले अब त सुत भो नानी बाबू भन्नुपरोस् ।”
उनले विद्यार्थीहरूलाई जहाँ भएपनी संस्कारी बन्न आग्रह गर्दै भने ” संस्कार बिनाको शिक्षा बिँडबिनाको खुर्पाजस्तै हुन्छ, हरेक आमाबाबुले आफ्नो भन्दा सुखद जीवन छोराछोरीको होस् भन्ने चाहन्छन्, अभिभाबकको सपना तुहाउने छुट तपाइँ बिद्यार्थीलाई छैन ।” “मेहनत गर्दागर्दै कहिलेकाही असफल हुनु नौलो होइन तर मेहनत नगरी सफलता खोज्नु धान रोपेर मकै फल्छ भन्ने सोच्नुजस्तै हो” उनले भने ।

शिक्षक अभिभावकलाई पनि सुझाव
प्रदेश प्रमुख देवकोटाले पाल्पाली अभिभावकलाई पनि सुझाव दिएका छन् । घर बालबालिकाको पहिलो पाठशाला भएको उल्लेख गर्नुहुदै उनले भने “अहिलेका नानीबाबुहरू भिन्न समयमा जन्मेका छन्, हाम्रा थुप्रै अनुभबहरू उनीहरूलाई अर्थ नलाग्लान् । जे भए पनि संस्कार र श्रमको मूल्य नानुबाबुलाई बुझाउनुपर्छ ।”
बिद्यालयका प्रधानाध्यापक , शिक्षकवर्ग ,ब्यवस्थापन समिति, समाज अब्बल दर्जाको पाएँ, यो बिद्यालयले कितावी ज्ञानलाई मात्र जोड नदिएर कला, संस्कृति, कौशल, श्रमको सम्मान तथा नानीबाबुको सर्बाङ्गीण विकासमा जोड दिएको छ जुन अति प्रशंसनीय भएको उनले बताए । “संसारका हरेक पत्थरहरू मूर्ति बन्न लायक छन् तर ती पत्थरहरू असल कालिगढको हातमा पर्नुपर्छ” देवकाेटाले शिक्षक तथा विव्यास प्रती लक्षित गर्दै भने ” तपाईं सम्पूर्ण समुदायलाई आफ्नो कालिगढी सिपमा अझै पोख्त हुने हौसला दिदै, नानीबाबुहरूबाट अझै मिहिनेतको अपेक्षा राख्दै अघि बढाउनुहोस ।”
२००७ सालमा स्थापित यो विद्यालयमा हाल ५५३ जना विद्यार्थीहरू अध्ययनरत छन् भने ४७ जना शिक्षक कर्मचारी रहेको बिद्यालयका कम्प्युटर शिक्षक शंकर न्यौपानेले जानकारी दिए । बार्षिक कार्यक्रममा बिद्यालयका प्रध्यानाध्यापक पिताम्बर न्यौपानेले बार्षिक आयब्याय प्रतिवेदन प्रस्तुत गरेका थिए ।
मकवानपुर । मकवानपुरकाे हेटौंडा उपमहानगरपालिका वडा नम्बर १६ स्थित जनप्रिय माध्यमिक (प्राविधिक शिक्षालय) ले ४९ औं स्थापना दिवस मनाएकाे छ । स्थापना दिवसको अवसरमा शनिबार विद्याललये रक्तदान कार्यक्रम गरेको छ ।
विद्यालयका शिक्षक, समितिका सदस्यहरू र स्थानीय व्यक्तिलगायत २४ जनाले रक्तदान गरेका अतिरिक्त तथा साँस्कृतिक विभाग संयोजक युक्तलाल विश्वकर्माले बताए । विद्यालयका प्रअ भुपेन्द्र चौलागाईंले रक्तदान गर्दै विद्यालयको सामाजिक उत्तरदायित्व बहनका लागि समेत यस्ता कार्य गर्नुपर्ने बताए । कार्यक्रममा हेटौडा १८ हर्नामाडीका हर्क रम्तेलले आफूले बिसौं पटक रक्तदान गरेको बताए ।
यस्तै स्थापना दिवसकाे अवसरमा शुक्रबार १ सय मिटर दौड, ४ सय मिटर रिले, म्याराथन, लङ्ग जम्प, हाइ जम्पलगायतका खेलकूदका विविध प्रतिष्पर्धा भएका थिए । यसैगरी शुक्रबार नै कविता तथा समीक्षा लेखन प्रतियोगिता सम्पन्न गरेको विद्यालयले आइतबार हाजिरीजवाफ प्रतियोगिता आयोजना गर्ने साहित्य तथा बौद्धिक विभाग संयोजक संप्रस पौडेलले जानकारी दिए ।
‘समय समयमा विद्यालयले साहित्य, कला तथा लेखन शील्प मात्रै नभइ कृषिमार्फत् उत्पादनमूलक कार्यक्रमहरूका लागि कार्यशालामा जोड गरिरहेका छौं प्रअ भुपेन्द्र चौलागाईंले भने ‘कार्यक्रमका लागि साँस्कृतिक, साहित्यिक, सामाजिक सङ्गसंस्था र व्यक्तिहरूसँग सहकार्य गरिरहेका छौं ।
विद्यालय व्यवस्थापन समितिका अध्यक्ष मोहनप्रसाद बस्ताकोटीको सभाध्यक्षता तथा हेटौंडा उपमहानगरपालिका सामाजिक विकास संयोजक तथा १६ नम्बर वडाध्यक्ष रामकृष्ण कोइरालाको प्रमुख आतिथ्य भएकाे कार्यक्रममा राष्ट्रिय परीक्षा बोर्ड प्रमुख कृष्ण घिमिरेको विशिष्ट आतिथ्य थियो । यस्तै जिल्ला रेडक्रसका सदस्यद्वय पिताम्बर बास्तोला र कृष्णबहादुर सापकोटा, इकाइका पदाधिकारीहरू, सामाजिक, राजनीतिक, शैक्षिक व्यक्तित्व तथा शिक्षक, विद्यार्थीहरूको उपस्थिति रह्यो ।
मकवानपुर । बागमती प्रदेशकाे धादिङ जिल्लाकाे रुबीभ्याली गाउँपालिकामा स्वास्थ्य शविर भएकाे छ । प्रदेश स्वास्थ्य मन्त्रालय जनस्वाथ्य कार्यालय धादिङको आयोजना र रुबीभ्याली गाउँपालिकाको ब्यबस्थापनमा समन्वयमा धादिङको विकट क्षेत्रमा रहेकाे रुबीभ्यालीमा ३ दिने स्वास्थ्य शिविर भएको हाे ।
शिविरमा बिभिन्न रोगका बिशेषज्ञ सहितको डाक्टरहरुद्वारा जाच तथा अन्य सेवाहरु प्रदान गरिएको थियो । शिविरमा हार्डजोर्जी तथा नशारोग, स्त्रीरोग सम्बन्धी, भिडियो एक्सरे सेवा, दन्त चिकित्सा सेव, नेत्र चिकित्सक द्वारा आँखा परिक्षण तथा तथा उपचार सेवा, बालरोग उपचार तथा ब्यबास्थापन, जनरल फिजिसियन द्वारा परिक्षण तथा उपचार सेवा,आयुर्बेद सेवा, पाठेघरको मुखको क्यान्सर स्क्रिनिङ गर्ने,स्वास्थ्य आमा समुहमा पोषण मुख स्वास्थ्य तथा हातको सरसफाई बारे अन्तरक्रिया कार्यक्रम, विद्यालयको विद्यार्थीहरुको पोषण मुखको सरसफाई तथा हात धुने तरिकाबारे सिकाईरअन्तरक्रिया लगायतका सेवाहरु प्रदान गरिएको थियो ।
कार्यक्रमम ७३० जनाले उपचारात्मक सेवा पाएका थिए भने सेर्तुङ र तिप्लिङका समेत गरी १२५ जना आमालाई स्वास्थ्य शिक्षा दिइएको थियो । त्यसै गरी १०५ जना विद्यार्थीलाई विभिन्न विषयमा स्वास्थ्य शिक्षा प्रदान गरिएको थियो ।
बागमती प्रदेशका स्वास्थ्य मन्त्री थापाले रुबिभ्याली गाउँपालिका लाई १ थान ग्रामीण अल्ट्रासाउन्ड मेसिन र २ थान अक्सिजन कन्सल्ट्रेटर हस्तान्तरण गरेका छन् । मन्त्री थापाले स्वास्थ्य सेवा दुर्गम देखि सुगम क्षेत्रमा पुर्याउने बताए । ‘स्वास्थ्य सेवा हरेक नागरिकको अधिकार भएको भन्दै यसको बिस्तारमा मन्त्रालयले काम गरिरहेको मन्त्री थापाले भने ।
बागमती प्रदेशका स्वास्थ मन्त्री किरण थापाको प्रमुख आतिथ्यता तथा रुबीभ्याली गाउँपालिका अध्यक्ष रामसिंह तामाङको अध्यक्षता कार्यक्रम भएको कार्यक्रममा पुर्व मन्त्री एवम् प्रदेश सभा सदस्य डम्बर तामाङ, रुबीभ्याली गाउँपालिका उपाध्यक्ष फेलामा तामाङ, जनस्वास्थ्य प्रयोगशाला निर्देशक नारायण कार्की, बागमती प्रदेश स्वास्थ मन्त्रालयका चिकित्सक महाशाखाका प्रमुख डा खगेश्वर गेलाल, धादिङ अस्पतालका निमित्त मेडिकल सुपरिटेन्डेन्ट डा गगन अधिकारीलगायतको सहभागिता थियो ।