मकवानपुर/ छरितो स्वास्थ्य सेवाको माग गर्दै नागरिक समाज मञ्च मकवानपुरले हेटौंडा सामुदायिक आँखा अस्पताललाई ध्यानाकर्षण पत्र बुझाएको छ ।
दैनिक ३ सयभन्दा बढी बिरामीलाई सेवा दिंदै आएको हेटौंडा सामुदायिक आँखा अस्पतालले कोडिभको कारण पछिल्लो समय सेवामा कोटा निर्धारण गरेपछि नागरिकलाइ सेवा प्रवाहमा समस्या भएको भन्दै मञ्चले ध्यानाकर्षण पत्र बुझाएको हो ।
आँखाको उपचार सबैले सर्वसुलभ र छरितो पाउन अति जरुरी भएको र अस्पतालले टोकन प्रणाली मार्फत निश्चित बिमारीको आँखा उपचार गरेपछि टाढाबाट उपचारको लागि आएकाहरुको समस्यालाई व्यवस्थापन गर्न समाजले माग गरेको अध्यक्ष रमिला सापकोटाले बताइन् ।
अस्पतालले हाल विहान साँढे ७ बजेबाट टोकन बाँड्ने समय सुरुगर्दा रातिदेखि नै बिरामीहरु लाइन बस्नुपर्दा समस्या भोग्नु परेको गुनासो आएको अध्यक्ष सापकोटाले बताइन् ।
यसैगरी दैनिक १ सय २५ वटा मात्रै टोकन वितरण गर्ने गरेको कारण लामो समय लाइनमा बसेकाहरु उपचार नपाई फर्कनु पर्ने वाध्यतालाई अस्पताल प्रशासनले व्यवस्थापन गर्नुपर्ने माग गरिएको छ ।
अस्पतालको समयमा आउने सबैले टोकन प्राप्त गर्ने तर उसको पालो आउने मिति समयको जानकारी प्रदान गरेर पठाउनु पर्ने ताकी उसले टोकन नपाएर फर्किने अवस्था नआओस् भन्ने माग गरिएको हो । यसैगरी एक परिवारको एकभन्दा बढी व्यक्ति आँखा जाँचको लागि आएमा एकाघर परिवारको एक जनामात्रै लाइन बसेर आवश्यक अन्य सदस्यले पनि टोकन पाउनु पर्ने माग गरिएको हो । ध्यानाकर्ष पत्र बुझाएपछि हेटौंडा आँखा अस्पतालका प्रशासकीय प्रमुख सुधिर श्रेष्ठले अस्पतालमा स्वास्थ्य सेवालाई प्रभावकारी र छरीतो पार्नको लागि पहल जारी राखेको बताए ।
कोभिडको कारण स्वास्थ्य सुरक्षा अपनाउँदा सेवा प्रवाहमा केही समस्या आइपरेको उनले बताए । ‘बिरामीहरु उपचार नभए फर्कनु पर्दा हामीलाई पनि राम्रो लाग्दैन’ श्रष्ठले भने ‘अब कार्यालय समयभन्दा बाहेकको समयमा पनि सेवा प्रवाह गर्नको लागि अन्तिम तयारीमा पुगेका छौ’ उनले भने । आँखा उपचारको लागि नोभेम्बरबाट टोकन बिना नै दिउँसोको समयमा थपशुल्क सहित आँखा जाँचको प्रवन्ध मिलाउन लागिएको उनले बताए । हेटौंडा सामुदायिक आँखा अस्पतालमा हेटौंडा बाहेक प्रदेश २ का विभिन्न जिल्लामा बिरामीहरु आँखा जाँचको लागि आउने गरेका छन् ।
मकवानपुर/कोरोना भाइरस (कोभिड–१९) विरुद्धको खोप आज विहीबार नेपाल ल्याइदै छ ।
बागमती प्रदेशको राजधानी हेटौंडाबाट मकवानपुर, चितवन र सिन्धुली तथा प्रदेश २ का ६ वटा जिल्लामा खोप वितरण गरिने छ । खोपको भण्डारण व्यवस्था सबै जिल्लामा नभएकोले हेटौंडा भण्डारणबाट खोप व्यवस्थापन हुने विभागले जनाएको छ ।
हेटौंडामा २ हजार २ सय ५० लिटर भण्डारण क्षमताको चिस्यान भएकाेले साेही मात्रामा भण्डारण गरिनेछ । बागमतीका अन्य १० जिल्लाका लागि भने काठमाडौंको भण्डारणबाट खोप पठाइनेछ ।
प्रदेश १ को विराटनगरस्थित भण्डारमा पठाइएको खोप प्रदेशका सबै जिल्लाका साथै प्रदेश २ को सप्तरी र सिरहामा पनि वितरण गर्नुपर्ने हुन्छ । विभागका अनुसार भ्याक्सिन चिस्यान भण्डारण विराटनगरमा ९ हजार ७ सय लिटर क्षमताको छ । प्रदेश २ मा भण्डार छैन ।
कर्णालीमा पनि आफ्नै चिस्यानयुक्त भण्डारण छैन तर विगतदेखि नेपालगन्जबाट वितरण
गरिँदै आएको छ । नेपालगन्जमा ७ हजार ५ सय लिटर क्षमताको भण्डार छ । गण्डकी प्रदेशको पोखरामा ९ हजार ७ सय भण्डारण क्षमता छ । यहींबाट प्रदेशका सबै जिल्लामा खोप पठाइनेछ । लुम्बिनी प्रदेशको बुटवलमा ११ हजार २ सय लिटर खोप भण्डारण क्षमता छ । त्यहींबाट जिल्ला अस्पतालहरूमा खोप पठाइनेछ। सुदूरपश्चिम प्रदेशको धनगढीमा ९ हजार ७ सय लिटरको भण्डारण क्षमतारहेको विभागले जनाएको छ ।
नेपाल सरकारले सरकारले भारतद्वारा उपलब्ध गराएको खोप पाँच दिनभित्र देशको सबै जिल्लाका भण्डारणसम्म पु-याइसक्ने योजना बनाएको छ । खोप लगाउने दिन भने अझै तय हुन सकेको छैन । ‘कानुनी, प्रशासनिक, आर्थिक र प्राविधिक प्रक्रिया पूरा गरेर खोप लगाउनका लागि सम्पूर्ण तयारी सम्पन्न भएको छ,’ स्वास्थ्यमन्त्री हृदयेश त्रिपाठीले भने, ‘प्राथमिकतामा स्वास्थ्यकर्मी, सरसफाइकर्मी, एम्बुलेन्स चालक, शव व्यवस्थापनमा खटिनेहरू छन्। ‘स्वयंसेविकालाई पनि स्वास्थ्यकर्मीसँगै पहिलो चरणमै खोप लगाइने मन्त्रालयले जनाएको छ । देशभरि ५२ हजार महिला स्वयंसेविकासहित करिब ३ लाख स्वास्थ्यकर्मी रहेको मन्त्रालयको दाबी छ ।
आज विहीबार बिहान ११ः४५ बजे एयर इन्डियाबाट आइपुग्ने खोप त्रिभुवन विमानस्थलबाट सिधै टेकुस्थित केन्द्रीय खोप भण्डारणमा लगिने छ । भारतीय राजदूत विनयमोहन क्वात्राले विमानस्थलबाटै स्वास्थ्य मन्त्रालयलाई खोप हस्तान्तरण गर्ने कार्यक्रम रहेको छ । विमानस्थलबाट टेकुको केन्द्रीय खोप भण्डारणसम्म लैजान तापक्रम कायम गर्न मिल्ने उपकरण जडान गरिएको दुईवटा ट्रक तयारी अवस्थामा राखिएको छ ।
‘कुन प्रदेशमा कति खोप पठाउने भन्ने विवरण तयार भएको छैन’ स्वास्थ्य सेवा विभागका एक कर्मचारीले भने, ‘बिहीबार जिल्ला पठाउने विवरण तयार भयो भने शुक्रबार बिहान खोप प्रदेशको भण्डारण स्थलमा पठाइसक्छौ ।’ जिल्लागत विवरण बिहीबार साँझसम्म तयार भइसक्ने मन्त्री त्रिपाठीले बताए ।
केन्द्रीय भण्डारणबाट दुई दिनभित्र प्रदेशमा र प्रदेशबाट थप दुई दिनभित्र जिल्लास्थित भण्डारण स्थलमा पु-याउने योजना रहेको विभाग स्रोतले जनाएको छ । ‘बढीमा ५ दिनभित्र जिल्लामा खोप पुगिसक्नेछ’ स्रोतले भन्यो । खोप लगाउन खटिने व्यक्तिलाई तालिम दिन भने अझै बाँकी छ । खोप लगाउने स्थानमा पु-याउनुपर्ने आवश्यक सामान पनि पठाइएको छैन ।
यस्तो प्रकृया बाँकी रहेकोले सर्वसाधारणले खोप लगाउने समय भने अझै हप्तादिनबढी समय लाग्ने अनुमान गरिएको छ ।
विभागको खोप शाखा प्रमुख डा. झलक गौतमले माथिल्लो तहका कर्मचारीलाई तालिम चलिरहेको जानकारी दिए । ‘खोप वितरण, ढुवानी, भण्डारण, स्वास्थ्यकर्मीको तालिम र सामग्रीहरू वितरण एकसाथ गर्छौं,’ उनले भने । विभागले बुधबार काठमाडौं उपत्यकाका अस्पताल प्रमुखहरूसँग कसरी व्यवस्थित रूपमा खोप लगाउन सकिन्छ भन्ने छलफल गरेको थियो ।
उनका अनुसार पहिलो चरणमा स्वास्थ्यकर्मी र फ्रन्टलाइनमा खटिनेलाई जिल्ला अस्पतालबाट खोप दिइनेछ । विभागले यसअघि नै स्थानीय तहमार्फत खोप लगाउने स्वास्थ्यकर्मीको तथ्यांक संकलन गरिसकेको छ । यसकै आधारमा मन्त्रालयले खोप पठाउन लागेको हो। जिल्ला अस्पतालमा बुथ राखेर खोप कार्यक्रम सञ्चालन गर्न लागिएको विभागले जनाएको छ ।
उपत्यकाबाहिर जिल्ला अस्पतालमा एउटा बुथ कायम हुने निश्चित भए पनि काठमाडौं, भक्तपुर र ललितपुरमा भने कति बुथ कुन–कुन अस्पतालमा रहने निश्चित नभएको गौतमले बताए । खोप लगाउन आठ हजारभन्दा बढी स्वास्थ्यकर्मी परिचालन हुनेछन् । कुल जनसंख्याको ३ प्रतिशत अर्थात् ९ लाख ११ हजारलाई पहिलो चरणमा खोप दिने योजना रहेको स्वास्थ्य मन्त्रालयका प्रमुख विशेषज्ञ डा. रोशन पोखरेलले बताए । खोप लगाउने स्वास्थ्यकर्मीको तथ्यांक संकलन भइसकेको र सफाइमा खटिने गाउँपालिका र नगरपालिकाका कर्मचारीको तथ्यांक संकलन भइरहेको स्वास्थ्य सेवा विभागले जनाएको छ ।
भारतले अनुदानमा उपलब्ध गराएको खोप एकै पटक लगाउने कि निश्चित समूहलाई दुवै डोज लगाउने भन्ने टुंगो लाग्न बाँकी रहेको डा. पोखरेलले बताए । नेपालको कुल जनसंख्याको ७२ प्रतिशतलाई खोप दिने सरकारको योजना छ । स्वास्थ्यकर्मी, शव व्यवस्थापनमा खटिनेहरू, एम्बुलेन्स चालक र स्वयंसेविकालाई लगाएर बाँकी रहेको खोप निजामती कर्मचारीलाई लगाउने कि वृद्धवृद्धालाई भन्ने निर्णय भइसकेको छैन ।
भन्सार विभागले नेपाल भित्रिने खोपलाई भन्सारमा जाँचपास सहज बनाउन छुट्टै इकाई खडा गर्ने भएको छरु। खोप सामग्रीको जाँचपाससम्बन्धी जानकारीका लागि त्रिभुवन विमानस्थल भन्सार कार्यालयमा छुट्टै इकाई खडा गरी कर्मचारी व्यवस्थापन गर्न लागेको हो । विभागमा समेत तत्काल समस्या समाधान गर्ने कार्यदल रहनेछ।
‘खोप पैठारीपूर्व नै कागजात उपलब्ध भएमा इकाईमार्फत जाँचपासपूर्वको प्रक्रिया मिलाइनेछ,’ विभागले स्वीकृत गरेको खोप सामग्रीहरू शीघ्र भन्सार जाँचपासका लागि अपनाइने प्रक्रियामा भनिएको छ, ‘कागजमा खोपको परिणाम तथा मूल्य नखुलेको पाइएमा स्वास्थ्य मन्त्रालयसँग समन्वय गरी जाँचपास गरिनेछ।’ खोप ल्याउने व्यक्ति वा संस्थाले औषधि व्यवस्था विभागबाट प्राप्त गरेको अनुमति प्रमाणपत्रलगायतका कागज पेस गर्नुपर्ने हुन्छ । कान्तिपुरकाे सहयाेगमा
मकवानपुर/ स्वास्थ्य सेवाको व्यवस्थालाई प्रभावकारी बनाउन लागिपरेको बागमती प्रदेश सरकारले स्वास्थ्य शिक्षाको पनि गुणस्तरीयतामा पनि विशेष ध्यान दिंदै आएको प्रदेशका मुख्यमन्त्री डोरमणी पौडेलले बताएका छन् ।
मुख्यमन्त्री पौडेलले मदनभण्डारी स्वाथ्य विज्ञान प्रतिष्ठानद्वारा छिट्टै नै हेटौंडामा चिकित्साशास्त्रको पढाइ सुरु गर्ने बताएका छन् । बुधबार प्रदेशको राजधानी हेटौंडामा मुख्यमन्त्री पौडेलले यस्तो बताएका हुन् । हेटौंडा–१, भिन्तुना पथस्थित मकवानपुर सहकारी अस्पतालको अति सघन उपचार कक्ष (आइसीयु) सहितको ट्रमा सेन्टरको उद्घाटन गर्दे मुख्यमन्त्री पौडेलले यस्तो बताएका हुन् ।
‘हेटौंडामा स्वास्थ्य शिक्षा उच्च तहको हुनेछ’ पौडेलले भने ।
जिल्लाको ठुलो रकम स्वास्थ्य उपचारको लागि बाहिर गएको भन्दै अब मकवानपुरमै उच्च स्तरको स्वास्थ्य सुविधा र त्यहि अनुसारको पढाई गर्ने उनले बताए । उद्घाटन कार्यक्रममा मकवानपुर सहकारी अस्पतालका अध्यक्ष विष्णुगोपाल महर्जनले सहकारी अस्पताल सञ्चालनमा आएको १० वर्षको अवधिमा थप सेवा विस्तार गर्न पाउँदा खुसी व्यक्त गर्दै अस्पतालले आगामी दिनमा थप सेवा विस्तार गरेर गुणस्तरमा सुधार गर्ने बताए ।
दुई करोड २५ लाख रुपैयाँ लगानी थप गरेर मकवानपुर सहकारी अस्पतालले आइसीयुसहितको ट्रमा सेन्टर विस्तार गरेको अध्यक्ष महर्जनले बताए ।
मकवानपुरगढीमा १५ शैयाकाे अस्पताल निर्माणार्थ शिलान्यास
Tags: No Comments
मकवानपुर/ ग्रामीण क्षेत्रका सर्वसाधारणहरूमा स्वास्थ्य सेवाकाे पहुँच अभिवृद्वि गर्न गाउँपालिका स्तरमा भरलाग्दा स्वास्थ्यसंस्थाहरू बन्ने भएका छन् ।
मकवानपुरगढी गाउँपालिका वडा नम्बर ६ डुम्रेकुनामा १५ शैयाको अस्पताल निर्माणको काम आजबाट सुरु भएको छ । अस्पतालको नेकपाका केन्द्रीय सदस्य तथा समकवानपुर क्षेत्रनम्बर २ का सांसद विरोध खतिवडाले शिलान्यास गरे ।
यस गाउँमा अस्पताल निर्माण भएपछि सामान्य बिरामी हुँदा पनि जिल्ला अस्पतालसम्म धाइरहनुपर्ने बाध्यता हट्ने खतिवडाले बताए ।
कुल ६ करोड ५ लाख रुपैयाँ लागतमा निर्माण गर्न लागिएको गढी गाउँपालिकाका अध्यक्ष बिदुर हुमागाईले बताए । अस्पताल निर्माण भएपछी धेरैलाई सहज हुने उनले बताए । शिलान्यास कार्यक्रममा मकवानपुरगढी ५ का वडा अध्यक्ष जितबहादुर घिमीरे, ६ का वडा अध्यक्ष टिका दाहाल लगायतकाको उपस्थिति थियो ।
मकवानपुर/चिसोबढी बालबालिका, दीर्घरोगी तथा वृद्धवृद्धाहरुको स्वास्थ्यमा समस्या आउन सक्ने संभावना बढेको छ । यसैबीच चिसोमा कपडा अभावले जाडोको समस्या भोग्दै आएका लोपोन्मुख जाति वनकरियाका बालबालिका र एकल महिलालाई न्यानो कपडा वितरण गरिएको छ ।
आदिवासी जनजाति विकासका लागि संजाल काठमाडौंले सदस्यहरुबाट संकलित रकमबाट तयारी कपडा वितरण गरिएको हो । आदिवासी जनजाति विकासका लागि संजालकी अध्यक्ष सावित्रा चेपाङ, उपाध्यक्ष सुदीप ठकुरी, कोषाध्यक्ष निर्मला भुजेल, सदस्य सुमिन गुरुङलगायतले वनकरिया बालबालिकालाई कपडा वितरण गरेका थिए । १ देखी २० वर्षसम्मका ११ छात्रासहित ३३ विद्यार्थी वनकरिया, एक जना शारिरीक अपाङ्गता भएका र ३ जना एकल महिलालाई जाडोमा लगाउँने कपडा वितरण गरिएको थियो ।
कपडा वितरणले बनकरिया बालबालिकालाई विद्यालयमा पढ्न र ट्युसन पढ्न सहज हुने अपेक्षा गरिएको छ । २०६५ सालमा स्थापित संस्थाले आदिवासी जनजातिका क्षेत्रमा विभिन्न कार्यक्रम गर्दै आएको छ ।
यसअघि, २० घर रहेको वनकारियावस्तीमा ३ लाख ३० हजार रुपैंयाको लागतमा दश वटा ट्युवेल निर्माण भएपछि भाँडा माझ्न, लुगा धुन कुलोको मलमुत्र मिसिएको पानी प्रयोग गर्नुपर्ने बाध्यताबाट मुक्ती पाएको वनकरियाहरुले बताएका छन् ।


आदिवासी मामिलाहरुको लागि अन्तर्राष्ट्रिय कार्य समूह (आईडब्लुजीआईए) को आर्थिक सहयोगमा राष्ट्रिय आदिवासी जनजाति महिला महासंघमार्फत् ट्युवेल निर्माण गरिएको थियो ।