मकवानपुर । युवा तथा खेलकुद मन्त्रालयले बागमती प्रदेश युवा परिषदका कार्यकारी उपाध्यक्ष हटाउन चलखेल सुरु गरेकाे छ । मन्त्रालयले कार्यकारी उपाध्यक्ष सन्तोष चौलागाईलाई माघ २५ गते स्पष्टीकरण सोधेपछि उनले आफूलाई हटाउने तयारी गरिएकाे प्रतिक्रिया दिएका हुन् ।
डोरमणि पौडेल नेतृत्वको सरकारले नियुक्ती गरेका उपाध्यक्ष चौलगाईलाई हटाउन राजेन्द्र पाण्डे नेतृत्वको सरकारका युवा तथा खेलकुद मन्त्री रत्न ढकालले मन्त्रालयका कर्मचारीलाई निर्देशन नै दिएको बुझिएको छ । लामो समयसम्म परिषद बैठकले कार्ययोजना नै स्वीकृत नगर्दा परिषदले सोचे अनरुप काम गर्न नसकेको चौलागाईले बताए । २०७८ असोज ६ गते परिषद बैठकबाट योजना स्विकृत भएपछि परिषदले त्यही स्वीकृत योजना कार्यान्वयन गरेको उपाध्यक्ष सन्तोष चौलागाईले बताए ।
मन्त्रालयले राजनीतिक पूर्वाग्रह नराखी कार्यक्रम प्रभावकारी बनाउन खोजे सहकार्यको लागि आफू तयार रहेको उनको भनाई छ । मन्त्रालय र मन्त्रीस्तरको सुझाव कार्यान्वयन गर्न कुनै समस्या छैन, तर राजनीतिक पूर्वाग्रह राखेर स्पष्टीकरण सोध्नु अन्याय भएको उनको तर्क छ । सामाजिक विकास मन्त्रीको अध्यक्षतामा बसेको परिषद बैठकको निर्णय कार्यान्वयन गरिएको हो । मन्त्रालयसंग समन्वय नभएको आरोप मिथ्या हो । मन्त्रालयले मागेको प्रगति विवरण समयमै बुझाईएको उनले बताए । अहिले युवा तथा खेलकुद मन्त्रालय मातहतमा रहेको प्रदेश युवा परिषदले मन्त्रालयसंग समन्वय गरिरहेको छ । परिषदले बनाएका भावी योजनाका सन्दर्भमा मन्त्रालयले सुझाब दिने हो भने पनि ती सुझाब समेट्न सकिने उनले बताए ।
मन्त्रालय योजना फेर्नु भन्दा कार्यकारी उपाध्यक्ष फेर्ने दाउमा अघि बढेको छ । चार वर्षे कार्यकालका लागि २०७८ असार १ गते नियुक्त गरिएको कार्यकारी उपाध्यक्ष हटाएर आफू अनुकुलको कार्यकारी उपाध्यक्ष नियुक्ती गर्ने योजनाका साथ मन्त्रालय र मन्त्री अघि बढेका छन् । युवा तथा खेलकुद मन्त्री रत्नप्रसाद ढकालले प्रदेश युवा परिषदलाई काम गर्ने वातावरण नदिएको उपाध्यक्ष चौलागाईले आरोप लगाए । एकातर्फ काम गर्ने वातावरण नदिने अर्कोतर्फ काम भएन भनेर मन्त्री नै राजनितीक प्रतिशोध साध्न उद्यत देखिएको उनले बताए ।
परिषदले कार्यक्रम स्विकृत गरेको २ महिना भित्रै प्रदेशको लोगो र स्लोगन सार्वजनिक गरेको छ । युवा परिषदको वेभ साइट निर्माण भएको छ । दुई महिनाभित्र परिषदबाट थुप्रै काम भएको उपाध्यक्ष चौलागाईको दावी छ । बागमती प्रदेश सरकारका आन्तरिक मामीला तथा कानून मन्त्री कृष्णप्रसाद शर्मा खनालले एक हप्ता भित्रै अघिल्लो सरकारले गरेका नियुक्ती खारेज गर्ने बताए ।
मकवानपुर । हेटाैंडा स्थित नवोदय शिशु सदन अङ्ग्रेजी माध्यमिक विद्यालयमा कफी हाउस कार्यक्रम सञ्चालन भएको छ । गत वर्षझैँ यस वर्ष पनि कफी हाउस कार्यक्रम सञ्चालन गरिएकाे हो । बुधबार कक्षा ७, ८ र ९ काे सेक्सन ‘ए’ समूहमा अध्ययनरत विद्यार्थीहरुले निर्माण गरेका पुस्तक कफी हाउस कार्यक्रममार्फत विमोचन गरी त्यस पुस्तकबाट एउटा सिर्जना आफ्नो अभिभावकमाझ प्रस्तुत गरेका थिए ।
विद्यालयले फरक–फरक समयमा कार्यक्रम आयोजना गरिएको छ । विद्यार्थीको सिर्जनशील क्षमता, तार्किक क्षमता, कल्पनाशक्ति, नेतृत्व विकास तथा व्यक्तित्व विकास पुर्याउने विश्वासका साथ विद्यालयले विगत ५ वर्षदेखि कफी हाउस कार्यक्रम गर्दै आइरहेको छ । कार्यक्रममा कक्षा ७ सेक्सन ए को कफी हाउस कार्यक्रममा प्रमुख अतिथि रहेका सर्जक सञ्जाल मकवानपुरका अध्यक्ष निमेष निखिलले साहित्य क्षेत्रमा कलम चलाएर दाम नकमाए पनि नाम भने पक्कै कमाइने बताएका छन् । ‘लेख्नु पनि वृद्धि विकासको पाटो हो ।’ उनले भने –‘लेखेर नै महाकवि लक्ष्मीप्रसाद देवकोटा, लेखनाथ पौडेलले साहित्य जगतमा आफ्नो प्रभुत्व जमाउन सफल हुनुभएको हो । लेख्ने बानीको जति विकास हुन्छ त्यति नै लेखाइमा निखारता आउने गर्दछ ।’

किताब पढ्दा धेरै कुरा सिक्ने भएकाले गर्दा विद्यार्थीलाई विद्यालयको कोर्षसँगै बाहिरी किताब किनिदिन उनले अभिभावकसँग आग्रह गरे । भाषा, साहित्यलाई अभिन्न पाटोको रुपमा अगाडि बढाइरहेको नवोदय विद्यालयले कफी हाउस कार्यक्रममार्फत विद्यार्थीहरुलाई आफ्नो पेरिफेरिमा रही रचना तयार पारी प्रस्तुत गर्ने अवसर प्रदान गरेकोमा उनले विद्यालयको प्रशंसा व्यक्त गरे ।
विद्यार्थीहरुको पठन संस्कृतिको विकास गर्ने तथा भाषिक सिपको विकास गराउने मूल उद्देश्यले कार्यक्रमको आयोजना गरिएको नवोदय शिशु सदन विद्यालयका नेपाली विषयका सुपरिवेक्षक सिएम रिमालले जानकारी दिए । यसैगरी, कक्षा ८ कको कफी हाउस कार्यक्रमका प्रमुख अतिथि हेटौंडा क्याम्पसका प्राध्यापक तथा साहित्यकार मनोज पोखरेलले कफी हाउस कार्यक्रममा विद्यार्थीले प्रस्तुत गरेको रचना तारिफयोग्य रहेको बताए । उनले विद्यार्थीले किताबी ज्ञानलाई मात्र नभई सिर्जनात्मक र व्यवहारिक शिक्षालाई पनि जोड दिनुपर्ने बताए ।
मकवानपुर । जिल्ला समन्वय समिति (जिसस) मकवानपुरले बकैया गाउँपालिकामा अनुगमन गरेको छ । जिससले मंगलबार बकैया गाउँपालिकाकाे चालु आर्थिक वर्षको योजना, आर्थिक, सामाजिक, पुर्वाधारलगायतको प्रगति, सुशासनको अवस्था, समन्वय तथा सजजिकरणलगायत क्षेत्रमा भएका कार्यहरुको अनुगमन गरेको हो ।
जिल्ला समन्वय समिति प्रमुख रघुनाथ खुलाको नेतृत्वमा गएको अनुगमन टोलीले गाउँपालिकाको चालु आवको प्रगति, बालमैत्री स्थानीय तहको अवस्था, स्थानी तह स्वमुल्याङ्कनका विषयमा समेत जानकारी लिएको थियो । यस्तै टोलीले मौजदात कोषबाट सञ्चालित जुरेली खानेपानी आयोजना, जिससबाट उपलब्ध गराईएको ट्रष्ट ब्रिजलगायत गाउँपालिकाको विभिन्न आयोजनाहरुको स्थलगत अनुगमन गरेको थियो । जुरेली खानेपानी आयोजनाका लागि जिससको मौजदात कोषबाट एक करोड उपलब्ध गराइएको छ भने, ट्रष्टब्रिजमा गाउँपालिकाले थप ७० लाख लागत लगाएर निर्माण गरिरहेको छ ।
अनुगमन टोलीलाई गाउँपालिका उपाध्यक्ष सरला बोलखे, प्रमुख प्रशासकिय अधिकृत लक्ष्मण पुडासैनी, स्वास्थ्य शाखा प्रमुख फणिकमणि प्याकुरेललगायतले समग्र अवस्थाका बारेमा जानकारी गराएका थिए । सो क्रममा गाउँपालिकामा चालु आर्थिक वर्षको करीब ४० प्रतिशत योजना सम्झौता भएर कार्यान्वयनमा रहेको जानकारी दिइएको छ । गाउँपालिकाले आन्तरिक आयबाट सञ्चालन गर्ने योजनाहरुमा स्रोतको अभावमा काम गर्न समस्या रहेको जानकारी दिइएको छ । गाउँपालिकाले आन्तरिक स्रोत मध्ये महत्वपूर्ण नदिजन्य पदार्थको ठेक्का बन्दोबस्ती हुन नपाउँदा समस्या भएको बताएको छ ।
यस्तै गाउँपालिकामा कोरोना बिरुद्धको कुल २८ हजार खोप लगाउने लक्ष्य रहेकोमा पहिलो मात्र २४ हजारलाई र दोस्रो मात्र १८ हजारलाई लगाईएको जनाईएको छ । गाउँपालिकाले खोप केन्द्र तथा टोलटोलमै पुगेर खोप अभियन सञ्चालन गरिहेको समेत जानकारी दिएको छ । त्यस्तै बालमैत्री घोषणा भईसकेको बकैया गाउँपालिकाले हालको परिमार्जित बालमैत्री सुचकमा समेत काम गरिरहेको जनाएको छ । हाल बालमैत्रीका सुचकहरु परिमार्जन भएर ५१ वटा पुगेको र सो सुचकमा काम भईरहेको बताइएकाे छ । आगामी जेष्ठमहिना सम्ममा पूर्ण वालमैत्री सुनिश्चित गर्ने योजनाका साथ काम भईरहेको गाउँपालिकाकाले जनाएकाे छ ।
अनुगमन टोलीमा जिसस उपप्रमुख भगवती पुडासैनी, सदस्य देवराज रिमाल, समन्वय अधिकारी आनन्दराज पोखरेल, नायबसुब्बा उपेन्द्रनाथ पोखरेल, प्रेस संयोजक बिवश अधिकारीलगायतको सहभागिता थियो ।
मकवानपुर । मकवानपुरकाे मनहरीमा भएकाे सवारी दुर्घटनामा १ जना घाइते भएका छन् । हेटौंडा–नारायणगढ सडकखण्डअन्तर्गत मनहरीकाे रजैयामा भारतीय नम्बर प्लेटको कारले मोटरसाइकललाई ठक्कर दिँदा मोटर साइकल चालक कैलाश गाउँपालिका–८ का ३२ वर्षीय सुरेश मोक्तान गम्भीर घाइते भएका हुन् ।
सोेमबार राती ९ बजेर ४५ मिनेटको समयमा मनहरीबाट हेटौंडातर्फ आउँदै बा प्र ०२–०३१ प ५९०० नम्बरको मोटरसाइकललाई विपरित दिशाबाट जाँदै गरेको युपी ५२ बीबी ९९०० नम्बरको भारतीय कारले ठक्कर दिँदा दुर्घटना भएको थियो । दुर्घटनामा परी गम्भीर घाइते भएका मोक्तानलाई उपचारको क्रममा चुरेहिल ल्याइएको थियो ।
घाइतेको अवस्था जटिल भएपछि सीएमसी अस्पताल रिफर गरिएकाेमा मोक्तानको सीएमसीमा उपचार भइरहेको प्रहरीले जनाएको छ । मोटरसाइकललाई ठक्कर दिने कार र चालक प्रहरीको नियन्त्रणमा रहेको प्रहरीले जनाएको छ ।
मकवानपुर । बकैया गाउँपालिकाका ६० जना नेपाली काँग्रेस पार्टीमा प्रवेश गरेका छन् । पार्टी प्रवेश गर्नेमा गाउँपालिकाकाे अध्यक्ष पदकाे प्रत्यासी लक्ष्मी जिम्बासहित राष्ट्रिय प्रजातन्त्र पार्टी (राप्रपा) का ६० जना गरेका छन् ।
राष्ट्रिय प्रजातान्त्रिक महिला संघको केन्द्रीय सदस्यसमेत रहेकी जिम्बासहित नवप्रवेशीहरुलाई कांग्रेस केन्द्रीय सह–महामन्त्री महालक्ष्मी उपाध्याय डीना र बागमती प्रदेश सभापति इन्द्रबहादुर बानियाँले स्वागत गर्दै सदस्यता प्रदान गरेका हुन् ।
नवप्रवेशीहरुमा राप्रपाका जिल्ला सदस्य अर्जुनप्रसाद तिमल्सिना, राप्रपा बकैयाका सचिव गोवर्धन गौतम, सहसचिव सुदजराज ढकुरी, कोषाध्यक्ष बलराम लामिछाने, गाउँ समिति सदस्यहरु सुवास राई, सोमबहादुर राई, डक्बर बहादुर भोम्जन, रामप्रसाद दाहाल, लक्ष्मण राई, स्यामकुमार राई, कृष्णबहादुर शाही लगायत राप्रपाको महिला, युवा तथा अन्य भातृ संगठनका सदस्यहरु रहेका छन् ।
पार्टी प्रवेश कार्यक्रम सम्बाेधनकाे क्रममा नवप्रवेशीहरुलाई बधाई दिँदै कांग्रेस केन्द्रीय सदस्य डीनाले आसन्न स्थानीय तहको निर्वाचनका लागि तयारीमा जुट्न लागिपर्नुपर्ने बताइन् । उनले भनिन् जनताको बीचमा कांग्रेसका उम्मेदवार निर्वाचित हुने वातावरण बनाउन सबैको भूमिका महत्वपूर्ण हुनेछ ।
त्यस्तै बागमती प्रदेश सभापति बानियाँले नवप्रवेशीहरुलाई पनि विभेद नगरी समान अवसरको वितरण गरिने बताए । उनले जनताको हितमा काम गर्न इच्छा र लगनशीलता देखाउनेलाई कांग्रेसले समान अवसर दिँदै उनीहरुलाई पार्टी तथा देश र जनताप्रति थप जिम्मेवार बनाइने प्रतिवद्धता व्यक्त गरे । बानियाँले राप्रपाका पूर्व केन्द्रीय अध्यक्ष कलम थापाको राजनीतिक भविष्य समाप्त भइसकेको समेत बताएका छन् । उनले भने,‘आफू केन्द्रीत राजनीति गर्ने, म भए हुने नभए नहुने भन्ने स्वार्थबाट ग्रसित मानसिकताले राजनीति चल्दैन ।’
कांग्रेस प्रवेश गरेसँगै नेतृ जिम्बाले आफू जनताको सेवा गर्नका लागि राजनीतिमा लागेको र सोही अनुसारको जिम्मेवारी दिन आग्रह गरिन् । कार्यक्रममा कांग्रेस मकवानपुरका कार्यबाहक सभापति विष्णु लामिछाने, प्रवक्ता प्रदीप कोइराला, संघीय सभापति दामोदर खनाल, क्षेत्रीय सभापति सुशान्त श्रेष्ठ, सचिव भूमिनन्द गौतमलगायतको उपस्थिति रहेको थियो ।