मकवानपुर । मकवानपुर प्रहरीले ३ जना फरार प्रतिवादी पक्राउ गरेकाे छ । मकवानपुर जिल्ला अदालतबाट कैद तथा जरिवाना ताेकिइ भुक्तान गर्न बाँकी रहेकाे उनीहरूलाइ माघ २१ गते पक्राउ गरिएकाे प्रहरीले जनाएकाे छ ।
जिल्ला अदालत मकवानपुरकाे फैसलाले डाँका मुद्दामा ६ वर्ष कैद तथा . २ लाख ६४ हजार रूपैया जरीवाना ताेकी भुक्तान गर्न बाँकी रहेका फरार प्रतिवादी मकवानपुर हेटाैडा वडा नं. १६ का बस्ने ४५ को प्रेम बहादुर स्याङतानलाई माघ २१ बुधबार पक्राउ गरी कैद तथा जरीवाना भुक्तानको लागि जिल्ला अदालत मकवानपुरमा उपस्थित गराइएकाे जिल्ला प्रहरी कार्यालय मकवानपुरका प्रवक्ता प्रहरी नायव उपरीक्षक इन्द्र बहादुर रानाले बताए ।
यस्तै जिल्ला अदालत मकवानपुरको फैसलाले वन मुद्दामा १८ दिन कैद र रु १९ हजार ७ सय ५० जरीवाना भुक्तान गर्न बाँकी फरार प्रतिवादी मकवानपुर मनहरी गाउँपालिका वडा नं. ९ बस्ने वर्ष ४८ को हरीकृष्ण न्यौपानेलाई २१ गते जिल्ला मकवानपुर मनहरी गा.पा. वडा नं. ९ बाट पक्राउ गरी कैद तथा जरीवाना भुक्तानको लागि सम्मानित जिल्ला अदालत मकवानपुरमा उपस्थित गराउने कार्य भइरहेको प्रहरीले जनाएकाे छ ।
यस्तै जिल्ला अदालत मकवानपुरको फैसलाले वन मुद्दामा १८ दिन कैद र रु १९ हजरा ७ सय ५० जरीवाना भुक्तान गर्न बाँकी फरार प्रतिवादी मकवानपुर मनहरी वडा नं. ९ बस्ने वर्ष ४२ को भेष बहादुर अधिकारीलाई माघ २१ गते पक्राउ गरी कैद तथा जरीवाना भुक्तानको लागि सम्मानित जिल्ला अदालत मकवानपुरमा उपस्थित गराउने कार्य भइरहेको रानाले बताए ।
मकवानपुर । झरना साहित्यिक परिवारले दाेस्राे बकैया साहित्य महोत्सवमा विभिन्न क्षेत्रमा योगदान पुर्याएका साहित्यकार, पत्रकारलाई सम्मान गर्ने भएको छ । गतवर्षबाट सुरु गरेको महोत्सवलाई निरन्तरता दिन यस बर्ष पनि आयोजना गरी विभिन्न क्षेत्रमा योगदान पुर्याएकाहरुलाई सम्मान गर्ने कार्यक्रम रहेको झरनाका अध्यक्ष दीपक गौतमले जानकारी दिए ।
बकैया गाउँपालिका–५ श्रीपुरमा रहेको प्रभात माविमा फागुन १४ र १५ गते महोत्सवको आयोजना गर्न लागिएको अध्यक्ष गौतमले बताए । महोत्सवमा पहिलो दिन फागुन १४ गते शुक्रबार नवसर्जक (बालबालिका विशेष) रचना वाचन, पुरस्कार वितरण एवम् बहसमूलक कार्यक्रम रहेको छ । दोस्रो दिन फागुन १५ गते शनिबार स्रष्टा सम्मान, स्थानीय सांस्कृतिक नृत्य, जग्गा दाताहरूलाई सम्मानसँगै साहित्यिक रचना वाचन तथा गायन कार्यक्रम रहेको गौतमले जानकारी दिए ।
साहित्यिक महाेत्सवमा यसवर्ष होमनाथ–टीकामाया प्रतिभा सम्मान–२०७७ सुनसरीका अग्रज साहित्यकार प्रा.डा. भीम खतिवडालाई प्रदान गरिने छ । १५ हजार ५ सय ५५ रुपैयाँ नगद राशी रहेको पुरस्कारका संस्थापक नुरप्रसाद गौतम हुन् रहेका अध्यक्ष गाौतमले जानकारी दिए ।
यस्तै, बाबुलाल–भोजमाया प्रतिभा सम्मान–२०७७ मकवानपुरे अग्रज कवि आर.आर. चौलागाईँ प्रदान गरिने भएको छ । ११ हजार १ सय ११ रुपैयाँ राशीको यस पुरस्कारका संस्थापक विनोद सुवेदी रहेका छन् । शिव–सावित्री अधिकारी स्मृति मुक्तक सम्मान– २०७७ अग्रज मुक्तककार ज्ञानुवाकर पौडेललाई प्रदान गरिने झरनाका सचिव मसान उपासकले जानकारी दिए । काठमाडौँ निवासी पौडेललाई प्रदान गर्न लागिएको ११ हजार १ सय ११ राशीको पुरस्कारका संस्थापक रमेशमोहन अधिकारी हुन् ।
यसैगरी, खडानन्द–मनमाया स्मृति प्रतिभा सम्मान–२०७७ नुवाकोटकी युवा साहित्यकार सुमित्रा सुमीलाई प्रदान गरिने छ । अर्पण र दर्पण पराजुलीले स्थापना गरेको उक्त पुरस्कारको राशी ५ हजार ५ सय ५५ रुपैया रहेको छ । सुशीला दङ्गाल स्मृति सिर्जनशील नारी सम्मान–२०७७ मकवानपुरे साहित्यकार रुकु कार्की प्रदान गरिने भएको छ । राजन दङ्गालले स्थापना गरेको उक्त पुरस्कारको राशी पनि ५ हजार ५ सय ५५ रुपैया रहेको छ ।
यस्तै, सञ्जीवनी बुटी साहित्य सेवा सम्मान–२०७७ मकवापुर बकैयाका मनहरी लामिछानेलाई प्रदान गरिने सचिव उपासकले बताए । ५ हजार ५ सय ५५ रुपैया राशीको उक्त पुरस्कारका संस्थापक तुलसी गिरी रहेका सस्थाले जनाएकाे छ .
झरना–बकैया पत्रकारिता पुरस्कार–२०७७ बाट रौतहटका खेम बोलखेलाई प्रदान गरिनेछ । पुरस्कार संस्थापक रहेको बकैया गाउँपालिका रहेको उक्त पुरस्कारको राशी ५ हजार ५ सय ५५ रुपैया रहेको छ । यसैगरी, झरना–बकैया नवप्रतिभा पुरस्कार–२०७७ बाट बकैयाका दीपशिखा घिमिरेलाई प्रदान गरिने छ । पुरस्कार संस्थापक चन्द्रकुमार राई रहेको उक्त पुरस्कारको राशी २ हजार ५ सय ५ रुपैया रहेको झरनाले जनाएको छ ।
झरना २०५० सालमा साविक छतिवन गाविस (हाल बकैया गाउँपालिका) मा स्थापित भई हालसम्म क्रियाशील मकवानपुरको अग्रणी साहित्यिक संस्था हो । यसले मासिक साहित्य शृङ्खला सञ्चालन, ‘झरना’ नामक अर्धवार्षिक पत्रिका प्रकाशन, प्रकाशन कोषमार्फत् साहित्यिक कृतिहरू प्रकाशन लगायत विविध साहित्यको क्षेत्रमा विविध गतिविधिहरू गरिरहेको छ ।
स्थापना कालदेखि नै साहित्यिक कार्यक्रमहरू गर्ने र विद्यालय तहमा अध्ययनरत विद्यार्थीहरूलाई साहित्यमा लाग्न प्रेरित गर्ने अभियानहरू सञ्चालन गर्दै आएको छ । अहिले सिर्जनशील नयाँ पुस्ता निर्माण अभियान अन्तर्गत पछिल्ला ६ वर्षमा झरनाले ५० भन्दा बढी विद्यालय र कलेजहहरूमा पुगेर १ दिने काव्य प्रशिक्षण सञ्चालन गर्दै बाल साहित्य समितिहरू गठन गरिसकेको छ । नवसर्जकहरूमा लेखन र पठन संस्कृतिको विकासमा नेतृत्वदायी भूमिका निर्वाह गर्दै आएको अध्यक्ष गाैतमले जानकारी दिए ।
यसैबीचमा झरना साहित्यिक परिवार मकवानपुरले बकैया–५ मा आफ्नै भवन तथा पुस्कालय सञ्चालन प्रयोजनार्थ २ कठ्ठा जग्गासमेत गाउँपालिका कार्यालयबाट प्राप्त गरेको छ ।
मकवानपुर । भूमि सम्बन्धी समस्या समाधान आयोग मकवानपुरको अध्यक्षमा रामेश्वर राना मगर नियुक्त भएक छन् । विहीबार बसेकाे मन्त्रीपरिषद बैठकले आयोग मकवानपुरको अध्यक्षमा रानालाइ नियुक्त गरेको हो ।
भूमि व्यवस्था मन्त्रालयको सिफारिसमा नेकपाका केन्द्रीय सदस्य तथा मकवानपुर जिल्लाका सहइन्चार्ज समेत रहेका रानालाई आयोगको जिल्ला अध्यक्षमा नियुक्त गरेको हो । यस्तै आयोगको जिल्ला विज्ञमा हेटौंडा ४ का तुलसी प्रसाद रिजाल र सदस्यमा हेटौंडा ८ का प्रतिमा श्रेष्ठलाई नियुक्त गरेको छ ।
समितिको अध्यक्षले नेपाल सरकारको सह सचिवको सुविधा पाउनेछन् भने विज्ञ र सदस्यले उप सचिव सो सरहको सुविधा पाउनेछन् । सरकारले ७७ वटै जिल्लामा भूमि सम्बन्धी समस्या समाधान गरी भूमिहीन, अव्यवस्थित बसाेवासी, दलित र सुकुम्बासीलाई जग्गा उपलब्ध गराउन जिल्ला समिति गठन गरेको हो । मन्त्रिपरिषद बैठकले ७७ जिल्लामा अध्यक्ष, विज्ञ र सदस्य नियुक्त गरेको हो ।
मकवानपुर । मकवानपुरसहित ३ जिल्लामा १२ स्वास्थ्य संस्था आज मंगलबार एकै दिन शिलान्यास हुने भएकाे छ । राष्ट्रिय पुनर्निमाण प्राधिकरण जिल्ला आयोजना कार्यान्वयन इकाई (भवन) मकवानपुरले मंगलबार मकवानपुरसहित ३ जिल्लामा १२ वटा स्वास्थ्य संस्था शिलान्यास हुने जनाएकाे हाे ।
कार्यालयका प्रमुख तुलसीराम खर्बुजाले मकवानपुरका ४, नवलपुरका ४ र परासी जिल्लाका ४ गरी १२ वटा स्वास्थ्य संस्थाको शिलान्यास हुने जानकारी दिए । भुकम्पबाट क्षति पुगेका मकवानपुरको थाहा नगरपालिका ११ को टिष्टुङ स्वास्थ्य चौकी, राक्सिराङ गाउँपालिका ८ को खैराङ स्वास्थ्य केन्द्र, बकैया गाउँपालिका २ को धियाल स्वास्थ्य चौकी र भीमफेदी गाउँपालिका ३ को निबुवाटार स्वास्थ्य चौकीको शिलान्यास आज मंगलबार गरिने प्रमुख खर्बजाले बताए ।
टिष्टुङ र खैराङ गरी ७ करोड ४१ लाख ९७ हजार ११ रुपैंया, धियाल र निबुवाटारमा ३ करोड ७ लाख ८५ हजार ८ सय १० रुपैंयाको लागतमा भवन निर्माण हुने उनले जानकारी दिए । टिष्टुङको भवन राष्ट्रियसभा सदस्य रामनारायण विडारी र थाहा नगरपालिकाका प्रमुख लवशेर विष्ट, खैराङको भवन राक्सिराङ गाउँपालिकाका अध्यक्ष राजकुमार मल्ल, धियालको भवन बकैया गाउँपालिकाका अध्यक्ष दामोदर खनाल र निबुवाटारको भवन भीमफेदी गाउँपालिकाका अध्यक्ष हिदम लामाले शिलान्यास कार्यक्रम रहेकाे छ ।
त्यसैगरी, नवलपुर जिल्लाको कुमारवर्ती स्वास्थ्य चौकी कावासोती नगरपालिका, नारायणी स्वास्थ्य चौकी मध्यविन्दु नगरपालिका, गैडाकोट स्वास्थ्य चौकी गैडाकोट नगरपालिका, देउराली प्राथमिक स्वास्थ्य चौकी हुप्सेकोट गाउँपालिका, परासी जिल्लाको पञ्चनगर स्वास्थ्य चौकी बर्दघाट नगरपालिका, हुकई स्वास्थ्य चौकी रामग्राम नगरपालिका, रामनगर स्वास्थ्यचौकी सुनवल नगरपालिका र रामग्राम नगरपालिकामा रहेको उनवच स्वास्थ्य चौकी पनि मंगलबार नै शिलान्यास हुने कार्यालय प्रमुख खर्बुजाले जानकारी दिए ।
प्रमुख खर्बुजाका अनुसार अनुसार यी सबै स्वास्थ्य संस्था भवन १५ देखि १८ महिनाभित्र सम्पन्न गर्नुपर्ने गरी टेण्डर सम्झौता भएको छ ।
काठमाडाैं । प्रदेश सुशासन केन्द्र बागमती प्रदेशले प्रदेश तथा स्थानीय तहमा क्षमता विकास कार्यक्रमका बिद्यमान आयामहरु बिषयक मिडिया संवाद कार्यक्रम गरेको छ । प्रदेश नीति योजना आयोगका कार्यवाहक उपाध्यक्ष श्यामप्रसाद बस्नेतको प्रमुख आतिथ्यमा कार्यक्रम गरिएको थियो ।
कार्यक्रममा बागमती प्रदेश सरकारका महत्त्वपूर्ण उपलब्धिहरुबारे जानकारी गराईएको थियो । कार्यक्रम प्रदेश नीति योजना आयोगका कार्यवाहक उपाध्यक्ष बस्नेतले प्रदेश सरकारले सम्पन्न गरेको कार्य तथा उपलब्धि बारे कार्यपत्र प्रस्तुत गरेका थिए ।

बागमती प्रदेशले ३ बर्ष पूरा गरेकै दिन ललितपुर जावलाखेलमा आयोजना गरिएको कार्यक्रम संघीयताका बिज्ञ डा.श्यामकृष्ण भुर्तेलले प्रदेश सरकारले आफ्नो उपस्थिति महत्त्वपूर्ण देखाउदै आएको बताए । राज्य एकात्मकबाट संघीयतामा गएको कारण केही उपलब्धि देखिनु चुनौती देखिनु स्वभाविक भएको भन्दै उनले ३ तहबिचको कार्य बांडभाड अझै राम्रो गर्नु पर्ने बताए । संघीयता भित्र संघ, प्रदेश र स्थानीय तहहरु आपसमा समन्वय र सहकार्य जरुरी रहेको बताए । नेपालमा संघीयतको नयाँ आयाम भएकोले महत्वाकांक्षा अनुसार काम हुँदै आएको उनले बताए ।

केन्द्रका कार्यकारी निर्देशक बिमल पोखरेलले प्रदेश सरकारको व्यवस्थापछि स्थापना गरिएको केन्द्रले क्षेमता विकासको लागि तालीम प्रदान गर्ने, तालीमको लागि पाठ्यक्रम तयारी गर्ने, सरकार प्रती जनताको सन्तुष्टिलगायतको अध्ययन गर्ने जस्ता कार्य गर्ने बताए । प्रदेश सुशासन केन्द्रले स्थानीय तहको संस्थागत क्षमता विकासको कार्यक्रम गर्ने, राजश्व सुधार कार्यक्रम, सार्वजनिक उत्तदायित्वको बारेमा तालिम प्रदान गर्ने उनले बताए ।
जनताको माअग अनुसार अन्य काम पनि गर्ने उनले बताए । प्रदेश सरकारको क्षमता विकासमा केन्द्रले अन्य आवश्यक अनुसन्धानको काम गर्ने केन्द्रको रुपमा काम जारी राखेको उनले बताए ।