मकवानपुर । मकवानपुरकाे हेटौंडामा एन्फा प्रेसिडेण्ट लिग फुटबल प्रतियोगिता हुने भएको छ । अखिल नेपाल फुटबल संघ (एन्फा) को आयोजनामा हुने प्रतियोगिता १९ कात्तिक बुधबारबाट सुरु हुनेछ ।
मकवानपुर जिल्ला फुटबल संघको समन्वयमा हेटौंडा उपमहानगरपालिका वडा नं. ६ स्थित गौरिटार रंगशालामा सञ्चालन हुने प्रतियोगितामा देशका सात वटै प्रदेशका लिग च्याम्पियन क्लबसहित १० टोलीको सहभागिता रहने सोमबार हेटौंडामा पत्रकार भेटघाट गरी जानकारी दिइएकाे छ । २ मंसिरसम्म हुने प्रतियोगिताको विजेता र उपविजेता टोलीले क्रमशः १० लाख र ५ लाख रुपैयाँसहित ट्रफी, मेडल र प्रमाणपत्र प्राप्त गर्नेछन् ।
एन्फा प्रवक्ता सुरेश शाहका अनुसार प्रतियोगिताको सर्वोत्कृष्ट खेलाडी तथा फेअर प्ले टिमले ५०/५० हजार रुपैयाँ तथा र ट्रफी प्राप्त गर्ने छन् ।
प्रतियोगितामा धेरै गोल गर्ने खेलाडी तथा उत्कृष्ट गोलकिपरले २५/२५ हजार रुपैंया र ट्रफी प्राप्त गर्ने छन् । यसैगरी प्लेयर अफ द म्यादले ५ हजार रुपैयाँ र ट्रफी प्राप्त गर्दा अन्य विधागत उत्कृष्ट खेलाडीहरूलाई जनही २५ हजार रुपैयाँ प्रदान गरिनेछ ।
प्रतियोगितामा गाईघाट फुटवल क्लब (उदयपुर), देउराली युथ क्लब (धनकुटा), नव जागृति क्लब (बारा), चित्लाङ्ग फुटवल क्लब (काठमाडौं), टाईगर्स टिम (दोलखा), जन जागृति युवा क्लव (बर्दिया), काक्रे विहार युथ क्लब (सुर्खेत), विजय स्पोर्टस् क्लब (कैलाली), हैरान्स क्लब (तनहुँ, लालीगुराँस एसोसियन क्लब (कास्की) प्रतियोगिताको उद्घाटन खेल चित्लाङ एफसी र देउराली युथ क्लबबीच हुने एन्फा प्रवक्ता शाहले जनाकारी दिए । प्रतियोगितामा सहभागी टिमलाई तयारी खर्च वापत ७ लाख प्रदान गरिने समेत उनले बताए ।
एन्फा फुटवल विकास कार्यक्रम अर्न्तगत एन्फामा आवद्ध जिल्ला लिगबाट च्याम्पियन भई प्रदेश लिगबाट छनौट भएका कुल १० टिमको सहभागिता रहेकाे उनले जानकारी दिए । सहभागी १० टिमलाई दुई समुहमा विभाजन गरी लिग कम नकआउटको आधारमा खेलहरु खेलाईने बताइएकाे छ । प्रत्येक समुहको विजेता र उपविजेता नकआउट चरणमा प्रवेश गर्ने आयोजकले जनाएकाे छ । एन्फाले सेमिफाईनल पुग्ने ४ वटा टिम यसै वर्ष संचालन हुने राष्ट्रिय लिग प्रतियोगितामा सहभागी हुन पाउने जानकारी दिएकाे छ ।
प्रतियोगितामा सहभागी टिमलाई ट्रेनिङ्गको लागि हेटौंडा उपमहानगरपालिका भित्रको २ वटा खेल मैदानको व्यवस्था गरिएको स्थानीय आयोजक मकवानपुर जिल्ला फुटबल संघले जानकारी दिएकाे छ । प्रतियोगिताकाे तयारी अन्तिम चरणमा पुगेकाे बताइएकाे छ । प्रतियोगिताको लागि १ करोड ५४ लाख ५४ हजार ४ सय २५ रुपैयाँ लाग्ने आयोजकले जनाएकाे छ ।
राष्ट्रपति रामचन्द्र पौडेल सामाजिक विकासका लागि दोस्रो विश्व शिखर सम्मेलनमा भाग लिन आज कतार प्रस्थान गरेका छन् । उनले कतारका अमिर र संयुक्त राष्ट्रसङ्घका महासचिवसँग भेटवार्ता गर्नेछन्, र सम्मेलनमा सम्बोधन गर्नेछन्।
सम्मेलनमा विकास असमानता, जनसङ्ख्या असन्तुलन र प्रविधिले समाजमा पारेको प्रभावबारे छलफल हुनेछ। नेपाली प्रतिनिधिमण्डलको नेतृत्व गर्दै राष्ट्रपति पौडेल कतारका अमिर शेख तमिम बिन हमद अल थानीको निमन्त्रणामा यो सम्मेलनमा सहभागी हुन गएका हुन्। यो सम्मेलन कात्तिक १८ गतेदेखि २० गतेसम्म आयोजना हुँदैछ।
राष्ट्रपति पौडेललाई बिदाई गर्न त्रिभुवन अन्तर्राष्ट्रिय विमानस्थलमा उपराष्ट्रपति रामसहायप्रसाद यादव, प्रधानमन्त्री सुशीला कार्की, गृहमन्त्री ओमप्रकाश अर्याल, नेपालका लागि कतारका राजदूत, उच्च सरकारी अधिकारी र सुरक्षा निकायका प्रमुखहरू पुगेका थिए।
सो अवसरमा नेपाली सेनाको एक टुकडीले राष्ट्रपति पौडेललाई सलामी पनि अर्पण गरेको थियो।
के छन् कार्यक्रम
राष्ट्रपति पौडेलले संयुक्त राष्ट्रसङ्घको महासभाको निर्णयअनुसार दोहामा हुन लागेको यो ‘सामाजिक विकासका लागि दोस्रो विश्व शिखर सम्मेलन’को मुख्य सत्रलाई कात्तिक १८ गते सम्बोधन गर्ने कार्यक्रम छ।
सम्मेलनको क्रममा उनले कतारका अमिर शेख तमिम बिन हमद अल थानी र संयुक्त राष्ट्रसङ्घका महासचिव एन्टोनियो गुटेर्रेस लगायतसँग भेटवार्ता गर्नेछन्।
यो सम्मेलनमा वर्तमान विश्वले सामना गरिरहेको विकासको असमानता, जनसङ्ख्यामा आएको असन्तुलन र प्रविधिले समाजमा पारेको प्रभाव जस्ता विषयमा छलफल हुनेछ। यसअघि, यस्तै सम्मेलन सन् १९९५ मा डेनमार्कको कोपनहेगनमा भएको थियो।
नेपाल सन् १९५५ मा संयुक्त राष्ट्रसङ्घको सदस्य बनेदेखि नै विश्व शान्ति र स्थायित्वका लागि सक्रिय सदस्यको रूपमा रहेको छ। अहिले नेपाल राष्ट्रसङ्घको आर्थिक तथा सामाजिक परिषद्को अध्यक्ष पनि छ। राष्ट्रपति पौडेल कतारको औपचारिक भ्रमण पूरा गरेर कात्तिक २० गते स्वदेश फर्किने कार्यक्रम छ।
रातोपाटीबाट
मकवानपुर । मकवानपुर प्रहरीले पेट्रोलियम पदार्थ अबैध रुपमा बिक्री गर्ने ट्याङ्कर चालक सहित ४ जनालाई नियन्त्रणमा लिएकाे छ ।
नेपाल आयल निगम, अमलेखगंजबाट नेपाल आयल निगम, थानकोट डिपोकाे लागि पेट्रोलियम पदार्थ लैजादै गरेको ना.४.ख ९३७७ नम्बरको ट्याङ्करबाट अवैध रूपमा पट्रोल झिक्ने कार्य भईरहेको अवस्थामा मकवानपुर प्रहरीले उक्त ट्याङ्कर चालक तथा पेट्रोल पम्पमा काम गर्ने ३ जनालाई नियन्त्रणमा लिइएकाे जनाएकाे छ ।
मकवानपुरकाे मनहरी गाउँपालिका वडा नं. ८ स्थित जय शिव शरणम् फ्यूल सेटर प्रा.लि. उक्त ट्याङ्करबाट पेट्राेलियम पदार्थ झिक्दै गरेका अवस्थामा चालक पम्पमा काम गर्ने ३ जनासहित ४ जनालाई नियन्त्रणमा लिइएकाे जिल्ला प्रहरी कार्यालय मकवानपुरले जानकारी दिएकाे छ । नियन्त्रणमा लिइएका उनीहरुलाई थप अनुसन्धान भइरहेकाे प्रहरीले जनाएकाे छ ।
मकवानपुर । नेकपा (माओवादी केन्द्र) र नेकपा (एकीकृत समाजवादी)सहित ८ वटा राजनीतिक दलले एकताका लागि १८ बुँदे सहमतिमा हस्ताक्षर गरेका छन् । ८ दलबीच नयाँ पार्टीको नाममा सहमति नभएकाे बताइएकाे छ भने चुनावचिन्ह पाँचकुने तारामा सहमति भएकाे छ ।
सहमतिपत्रमा माओवादीका संयोजक प्रचण्ड र एसका अध्यक्ष माधव नेपालसहित नेपाल समाजवादी पार्टीका अध्यक्ष महेन्द्र राय यादव, जनसमाजवादी पार्टीका अध्यक्ष सुवासराज काफ्ले, नेकपा (समाजवादी) पार्टीका अध्यक्ष राजु कार्की, नेकपाका महासचिव चिरन पुन, नेकपा माओवादी स्समाजवादीका अध्यक्ष कर्णजित बुढाथोकी र नेकपा साम्यवादीका अध्यक्ष प्रेमबहादुर सिंहले हस्ताक्षर गरेका छन् ।
आइतबार नेकपा माओवादी केन्द्रको केन्द्रीय कार्यालय पेरिसडाँडामा बसेको पार्टीकाे बैठकमा १८ बुँदे सहमति भएको हो । आगामी १९ कार्तिकमा उक्त ८ पार्टीहरूबिच एकता घाेषणा गरिने भएकाे छ ।
पार्टी एकताका लागि ८ पार्टीले गरेका सहमतिका बुँदाहरुमा के के छन्??
- पार्टीको मार्ग निर्देशक सिद्धान्त : मार्क्सवाद–लेनिनवाद हुनेछ ।
- नेपाली कान्तिको कार्यक्रम : नेपाली विशेषताको वैज्ञानिक समाजवाद हुनेछ।
- पार्टीको तात्कालिक कार्यनीति : पुँजीवादी जनवादी कान्तिका उपलब्धिको रक्षा राष्ट्रिय स्वाधीनताको संरक्षण, सुशासन, सामाजिक न्याय, सामाजिक आर्थिक समृद्धि र रूपान्तरण गर्दै समाजवादको आधार तयार गरिने छ ।
- आन्दोलनको स्वरूप आन्दोलन मूलतः शान्तिपूर्ण हुनेछ। परिस्थिति अनुसार सडक, सदन र सरकार लगायत आवश्यकता अनुसारका सबै मोचाहरु आन्दोलनको मोर्चा हुनेछन् ।
- पार्टीको एकता राष्ट्रिय सम्मेलन : एकता प्रक्रियामा सहभागी सबै घटकहरूका केन्द्रीय समितिहरूको संयुक्त भेलाको रूपमा एकता राष्ट्रिय सम्मेलनको आयोजना २०८२ कात्तिक १९ गते गरिने छ । एकता राष्ट्रिय सम्मेलनबाट पार्टी एकताको घोषणा, घोषणा पत्र र अन्तरिम विधान पारित र केन्द्रीय समितिको गठन लगायतका कार्यहरू गरिनेछ ।
- एकता राष्ट्रिय महाधिवेशन :आगामी ६ महिनाभित्र एकता राष्ट्रिय महाधिवेशनको आयोजना गरिनेछ ।
- केन्द्रीय समितिको गठन : एकता प्रक्रियामा सहभागी भएका पार्टीहरूका साविकका केन्द्रीय समितिहरूलाई समायोजन गर्दै आपसी सहमतिको आधारमा केन्द्रीय समिति गठन गरिने छ ।
- केन्द्रीय समिति भित्रको संरचना : केन्द्रीय समिति, राजनीतिक समिति सचिवालय, कार्य संयोजन समिति हुनेछ ।
- संयोजक र सहसंयोजक : केन्द्रीय समितिमा संयोजक र सहसंयोजक पद हुनेछ । प्रदेश, जिल्ला, पालिका र वडा तहका सबै समितिहरूमा पनि संयोजक र सहसंयोजक व्यवस्था हुनेछ ।
- सहमति र समन्वय एकता : राष्ट्रिय सम्मेलन र एकता महाधिवेशनमा सहभागी हुने प्रतिनिधिहरू, आयोजना, सङ्गठनात्मक संरचनाको गठन सबै आपसी सहमति र समझदारीमा गरिनेछ ।
- सबै तहको पार्टी पङ्क्तिमा एकता समायोजन : सबै तहका पार्टी समितिहरू र जनसङ्गठनहरूमा इन्चार्ज तथा सहइन्चार्ज र संयोजक तथा सहसंयोजकहरु सम्भव भएसम्म एकतामा सहभागी घटकहरूबाट रहने व्यवस्था गरिने छ ।
- दुई तहमा रहनसक्ने : कुनै पनि सदस्यहरू दुई तहको समितिमा रहन सक्ने छन् ।
- पार्टी समितिहरूको सञ्चालन : पार्टी समितिहरूको सञ्चालन सामूहिक नेतृत्व प्रणालीमा आधारित जनवादी केन्द्रियताको सिद्धान्त अनुरूप हुने छ ।
- राजनीतिक प्रतिवेदन र कार्यक्रम : पार्टी एकता घोषणापश्चात् राजनीतिक प्रतिवेदन कार्यक्रम लगायतका दस्ताबेजहरू निर्माण गर्न कार्यदल गठन गरिने छ ।
- सङ्गठनात्मक समायोजन : पार्टी समितिहरू र जनसङ्गठनहरूमा सङ्गठनात्मक एकता र समायोजनका लागि विभिन्न तहमा कार्यदल गठन गरिनेछ ।
- पार्टीको तहगत कार्यकारी समितिहरु: केन्द्र, भौगोलिक र गैरभौगोलिक दुवै तर्फका प्रदेश, जिल्ला, पालिका र वडा तह कार्यकारी हुनेछन्। सङ्घ र प्रदेश निर्वाचन क्षेत्रमा समन्वय समिति हुने र टोल तथा प्रारम्भिक स्तरका समितिहरू सङ्गठन समितिको रूपमा रहने छन् ।
- पार्टीको नाम र चुनाव चिन्ह : पार्टीको नाम………………….. रहने र चुनाव चिन्ह पाँचकुने तारा हुने छ ।
- मतभेद समाधान : वैचारिक राजनीतिक विषयमा एकआपसमा रहन सक्ने मतहरूबारे निरन्तर छलफल गर्दै जाने र एकता राष्ट्रिय महाधिवेशनबाट निष्कर्षमा पुर्याइने छ ।

मकवानपुर । मकवानपुरकाे हेटौंडा उपमानगरपालिका ४ स्थित भुटनदेवी माध्यमिक विद्यालय (प्राविधिक शिक्षालय) का प्रधानाध्यापक माधवप्रसाद दाहालले सेवाबाट अवकाश पाएका छन् । उमेर हदका कारण अवकाश भएका उनकाे आइतबार बिदाइ गरिएको छ ।
गत शनिबारबाट ६० वर्षे उमेर हदका कारण अनिवार्य अवकाश भएपछि आइतबार बिद्यालयले उनकाे बिदाइ गरेको हो । दाहालको अवकाश पश्चात निमित्त प्रअकाे जिम्मेवारी विद्यालयमै कार्यरत सहायक प्रअ सूर्यप्रसाद घिमिरेलाई दिइएको छ । दाहालकाे बिदाइ कार्यक्रममा निमित्त प्रअ घिमिरेकाे स्वागत समेत गरिएकाे हाे ।
दाहाल ५ जेठ २०४८ मा माध्यमिक तहको गणित बिषय शिक्षकको रुपमा भुटनदेवी माविमा नियुक्त भइ करिब ३५ वर्ष सेवारत रहे । २०६३ सालमा स्थायी नियुक्ति भए पश्चात दाहाल ७ कात्तिक २०६७ देखि उक्त बिद्यालयको प्रअ नियुक्त भइ कार्यरत थिए । उहाँकाे प्रअ कार्यकालमा २०७० सालबाट साधारणतर्फ अंँग्रेजी माध्यमसँगै प्राबिधिक धारतर्फ पनि पठनपाठन शुरु भएको विद्यालयले जनाएकाे छ । करिब ७ सयको संख्यामा अध्ययन रहेकाे विद्यालयमा साधारण र प्राविधिक धारतर्फ समेत गरि २४ सय बिद्यार्थीहरु अध्ययनरत छन् ।
बिदाइ कार्यक्रममा दाहालले भने ‘विद्यालय मेरो मुटु हो, मलाई माया गरिरहँदा विद्यालयको शैक्षिक विकासमा समेत योगदान गर्नुहाेस् ।’ बिद्यालयले समपसापेक्ष परिस्कृत बिषय तथा कार्यक्रमहरु थप्दै जानुपर्ने सुझाव समेत दिए । उनले विद्यार्थी संख्या वृद्धिसँगै गुणस्तरीय शिक्षामा समेत ध्यान दिनुपर्ने उनले जोड दिए । आफू निवृत भए पनि बाँकी समय समेत शिक्षासँगै सामाजिक क्षेत्रमा विताउने उनले बताए ।
बिदाइ कार्यक्रममा हेटौंडा उपहानगरपालिका २ नम्बर वडाध्यक्ष तथा भुटनदेवी अल्मुनाई एसोशियसन अध्यक्ष बिष्णु गोपाल महर्जन, विद्यालयका निमित्त प्रधानाध्यापक सुर्य प्रसाद घिमिरे, श्रमिक माविका प्रअ तथा शैक्षिक गुणस्तर सुधार समिति ४ नम्बर वडा संयोजक श्रीराम दाहाल, विद्यालयका पूर्व प्रधानाध्यापक देव श्रेष्ठ लगायतले दाहालकाे सेवा निवृत्त जीवन सहज क्रियाशीलताकाे कामना गरेका थिए ।
विद्यालय व्यवस्थापन समितिका अध्यक्ष एवं हेटौंडा ४ का वडाध्यक्ष नवीन सिग्देलको प्रमुख आतिथ्यतामा भएको कार्यक्रममा आधुनिक माविका प्रअ रामसागर गुरागाईं, विद्यालय व्यवस्थापन समिति सदस्यहरु, शैक्षिक व्यक्तित्व तथा बिद्यालयका शिक्षक, कर्मचारीलगायतकाकाे उपस्थिति थियो ।