मकवानपुर । लाेक सेवा आयाेगले शाखा अधिकृतको नतिजा प्रकाशन स्थगित गरेकाे छ । लाेक सेवा आयोग केन्द्रीय कार्यलय अनामनगरले भदाै २८ गते सूचना प्रकाशित गर्दै आयोगले २०७६ सालमा विज्ञापन गरेको व्यवस्थापिका संसद, परराष्ट्र, प्रशासन र लेखापरीक्षण सेवाका शाखा अधिकृतको अन्तिम याेग्यतक्रम सम्बन्धी नतिजा प्रकाशन स्थगित गरेको जनाएकाे छ ।
सर्वोच्च अदालतले कर्मचारी समायोजन सम्बन्धमा दिएका आदेशलाई कारण देखाउँदै आयोगले सबै परीक्षा लिइसकेको शाखा अधिकृतको योग्यताक्रम प्रकाशन र सिफारिस स्थगित गरेको हो । यसअघि प्रदेश र स्थानीय तहमा समायोजन भएका शाखा अधिकृतहरुलाई उनीहरुले रोजेको संघमा समायोजन गर्न सर्वोच्चले आदेश दिएसँगै लोकसेवा आयोगको संसद, परराष्ट्र, प्रशासन र लेखापरीक्षण समूहका परीक्षाका सम्पूर्ण चरण पार गरी अन्तिम नतिजाको पर्खाइमा रहेका परीक्षार्थी समस्यामा परेका छन् ।
‘आयोगबाट प्रकाशित वि नं १६६९४–१६७००/०७६–७७ सम्मका व्यवस्थापिका संसद, परराष्ट्र, प्रशासन र लेखा परीक्षण सेवाका राजपत्रांकित तृतीय श्रेणी शाखा अधिकृत वा सो सरह (अप्राविधिक) पदको योग्यताक्रम प्रकाशन तथा सिफारिस स्थगित भएको व्यहोरा आयोगको मिति २०७८÷०५÷२८ को निर्णयअनुसार सम्बन्धित सबैको जानकारीको लागि यो सूचना प्रकाशन गरिएको छ’ आयोगको सूचनामा भनिएको छ ।
लोक सेवा आयोगले मिति २०७६ मंसिरमा शाखा अधिकृतमा बढुवा तथा खुला समेत गरी सामान्य प्रशासन समूहका ५ सय ६० रिक्त पदमा पदपूर्तिको लागि विज्ञापन प्रकाशन गरेको थियो । उक्त विज्ञापनमध्ये ३० प्रतिशत बढुवातर्फ छुट्याएको १ सय ६८ पद सोही वर्ष नै पदपूर्ति भइसकेको छ । बाँकी खुला तथा समावेशीतर्फ छुट्याएको ३ सय ९२ पदको परीक्षा भने काेराेना भाइरस (कोभिड-१९) का कारण गत भदौ ५ गतेमात्र सबै चरण सम्पन्न भएको आयाेगले जनाएकाे छ ।

मकवानपुर । नेकपा एकीकृत समाजवादी पार्टी बागमती प्रदेशकाे प्रमुख सचेतकमा मुनु सिग्देल चयन भएकी छिन् । पार्टीकाे साेमबार हेटाैडामा बसेकाे बैठकले सचेतकमा सिग्देल सहित संसदीय दलकाे उपनेतामा कृष्ण प्रसाद खनाल र सचेतकमा बसुन्धरा हुमागाईलाई चयन गरेकाे छ ।
यसअघि पार्टीकाे आइतबार बसेको बैठकले राजेन्द्र प्रसाद पाण्डेलाई दलको नेता चयन गरेको थियो । आजको बैठकले दलको प्रमुख सचेतकमा सिग्देल दलकाे उपनेतामा खनाल र सचेतकमा बसुन्धरा हुमागाईंलाई सर्वसम्मत चयन गरेको पार्टीले साेमबार जारी गरेकाे विज्ञप्तीमा उल्लेख छ ।
त्यस्तै, बागमती प्रदेशमा गठबन्धनको सरकार बनाउनका लागि गठबन्धनमा सामेल भएका दलहरू नेकपा माओवादी केन्द्र र नेपाली कांग्रेसका नेताहरूसँग समन्वय गर्ने जिम्मा दलका नेता पाण्डेलाई दिइएको प्रमुख सचेतक सिग्देलले जारी गरेकाे विज्ञप्तीमा जनाइएकाे छ ।
तीन दलको सरकार निर्माण भएपश्चात सरकारको तर्फबाट गर्ने न्यूनतम साझा कार्यक्रमको मस्यौदा तयार गर्न प्रदेशसभा सदस्यहरू माधव प्रसाद पौडेल, बसन्त प्रसाद मानन्धर , मीना ज्ञवाली र बसुन्धरा हुमागाईंलाई जिम्मा दिइएको नेकपा एकीकृत समाजवादी पार्टीले जनाएको छ ।
त्यस्तै ५६ प्रदेशसभा सदस्य रहेको बागमतीमा १३ जना नेकपा एकीकृत समाजवादीका सांसदहरू रहेको हुनाले मुख्यमन्त्री अष्टलक्ष्मी शाक्यले बहुमत गुमाइसकेको जनाइएको छ । ‘नेकपा (एमाले) प्रदेश सभा सदस्यहरु मध्ये १३ जना सदस्यहरु नेकपा (एकीकृत समाजवादी) मा समावेस भएको हुदाँ बर्तमान अष्टलक्ष्मी शाक्यको सरकार अल्पमतमा परी सकेको कारण बहुमत गुमाई सकेको सरकारलाई बर्तमान अबस्थामा बिकास निर्माणका नयाँ कार्यक्रमहरु स्वीकृत गर्न, निश्चित शर्तका आधारमा बितरण गर्ने गरी राखिएको अबण्डाका रकम निकासा नगर्न र आर्थिक अनुशासनलाई कायम गर्न प्रदेश मुख्यमन्त्री तथा मन्त्री परिषदको कार्यलयलाई पत्राचार गर्ने निर्णय गरिएको छ।’ विज्ञप्तीमा भनिएकाे छ ।

प्रमुख प्रतिक्षी दल नेकपा एमालेले आइतबार पनि प्रतिनिधि सभाको बैठकमा अवरोध गरे । तर, पछिल्ला केही दिनको तुलनामा प्रतिनिधिसभाको आइतबारको बैठकको दृश्यमा केही फरक देखियो । यसले संवादको वातावरण बन्दै गएको संकेत मिलेको छ ।
अघिल्ला दिनमा मर्यादापालक र सांसदहरूबीच घम्साघम्सी देखिएको थियो । प्रतिस्थापन बजेट पेस गर्ने क्रममा एमाले सांसदहरूले काँधमा चढेर रोस्टम पुग्ने प्रयास गरेका थिए । मर्यादापालकहरूले पनि एमाले सांसदहरूलाई वेलको आधा भागमा रोकेका थिए । तर, आइतबारको बैठकमा एमाले सांसदहरूले वेल घेराउ गर्दै नारा लगाए पनि कुनै घम्साघम्सी भएन । प्रतिनिधि सभाको बैठक अघि एमाले दलका नेता केपी शर्मा ओलीले मर्यादित भएर प्रस्तुत हुन आफ्ना सांसदहरूलाई निर्देशन दिएका थिए ।
अघिल्लो बैठकमा मर्यादापालकहरूले सभामुख बस्ने स्थानअघिको खाली ठाउँको आधा भागमा मात्र प्रतिपक्षीलाई रोकेका थिए । तर, आइतबार उनीहरूले पुरै वेल खुला छाडेका थिए । बैठकमा सभामुख अग्नि सापकोटाले संवादतर्फ अग्रसर हुन सांसदहरूलाई आग्रह गरिरहे । ‘आखिरमा हामीले सहकार्य र समन्वयमा जानैपर्छ । संवादतिर जान सत्तापक्ष र प्रतिपक्षले पहल गर्नुपर्छ । म विनम्रतापूर्वक आग्रह गर्दछु । वातावरण सहज बनाउने भूमिका खेलौं,’ सापकोटाले भने, ‘बैठक सहज ढंगले सञ्चालन गर्ने वातावरण बनाउन विपक्षी दलका सांसदहरूलाई अनुरोध गर्छु । सत्तापक्ष, विपक्ष र संसद्मा प्रतिनिधित्व गर्ने सबै दलका नेताहरू जनताको सर्वोच्च प्रतिनिधि संस्थालाई मर्यादित बनाउन संवादतिर अग्रसर होऔं ।’
आइतबारको बैठकमा पनि नेकपा एमालेका सांसदहरूले नाराबाजी जारी राखेका थिए । उनीहरूले पार्टी फुटाउने षड्यन्त्र मुर्दावाद, संसदीय मर्यादा कायम गर, पक्षपातपूर्ण व्यवहार मुर्दावादजस्ता नारा लगाएका थिए । सभामुख अग्नि सापकोटाले नियमित अवरोधले अन्य सांसदहरूले आफ्नो कुरा राख्न नपाएको उल्लेख गरे । उनले अदालतमा विचाराधीन विषयमा छलफल संविधानमा निषेध गरेको सम्झाए । तर, एमाले सांसदहरूले नाराबाजी कायम राखे । एमाले सांसदहरूले माधव नेपालसहित १४ सांसदलाई कारबाहीको सूचना सभामखुले प्रकाशित नगरेकोमा प्रश्न उठाउँदै आएका छन् । उनीहरूले गैरसांसदलाई प्रवेश निषेध गर भन्दै नारा लगाएका थिए ।
आइतबारको वेल घेराउमा प्रमुख प्रतिपक्षी दलका नेता अध्यक्ष केपी शर्मा ओली पनि उभिएका थिए । अघिल्ला दिनमा उनी कुर्सीमा बस्ने गरेका थिए । तर, उनी आइतबारको बैठकमा वेलमै उभिए । आइतबारको दोस्रो बैठकमा पनि नेकपा एमालेका सांसदले अवरोध गरेपछि सभामुख सापकोटाले मंगलबार १ बजेसम्मका लागि बैठक स्थगित गरेका छन् । पहिलो बैठक बसेर १५ मिनेटका लागि स्थगित भएको बैठक पुनः सुचारु भएलगत्तै बैठकमा एमाले सांसदले नाराबाजी गरेपछि बैठक स्थगित भएको हो । १४ सांसदलाई सभामुखले कारबाही नगरेको भन्दै उनीहरूले नाराबाजी गरेका हुन् ।
यसअघि बैठक खुलाउन सभामुख अग्नि सापकोटाको नयाँ बानेश्वरस्थित संसद् भवनको कार्यकक्षमा एमालेका प्रतिनिधिसँग छलफल गरेका थिए । छलफलमा सभामुख सापकोटासँगै नेकपा एमालेका प्रमुख सचेतक विशाल भट्टराई, सचेतक शान्ता चौधरी र एमालेका सांसद खगराज अधिकारी सहभागी थिए । त्यस्तै, सरकारका तर्फबाट कानुनमन्त्री ज्ञानेन्द्रबहादुर कार्की बैठकमा सहभागी रहेको सभामुख सापकोटाका प्रेस संयोजक श्रीधर न्यौपानेले जानकारी दिए ।
प्रतिनिधि सभाको नवौं अधिवेशनको पहिलो बैठकबाट नै एमालेले अवरोध गर्दै आएको छ
पार्टी सांसदको विरोध शैलीप्रति ओली असन्तुष्ट
प्रमुख प्रतिपक्षी दल नेपाल कम्युनिस्ट पार्टी (एमाले)का अध्यक्ष केपी शर्मा ओलीले संसद्मा विरोध गर्ने कार्यक्रम जारी नै रहने बताएका छन् ।
एमाले संसदीय दलको आइतबार बसेको बैठकलाई सम्बोधन गर्दै अध्यक्ष ओलीले मर्यादित तरिकाले विरोधका कार्यक्रम जारी राख्न सांसदहरूलाई निर्देशनसमेत दिए । एमाले संसदीय दलका नेतासमेत रहेका अध्यक्ष ओलीले सभामुखको आलोचना गर्दै विरोधका कार्यक्रम नरोकिने बताए ।
‘सभामुखको व्यवहार र आचरणका कारण विरोधका कार्यक्रम जारी नै रहन्छ । तर, विरोधका कार्यक्रम मर्यादित तरिकाले हुनुपर्छ,’ अध्यक्ष ओलीले भने, ‘सभामुख सभामुखको कुर्सीमा बस्न लायक छैनन् । उहाँको पदीय गरिमा, मर्यादा र निष्पक्षता कायम गर्न सक्नुभएन भन्ने कुरा जगजाहेर छ ।’
एमाले विभाजन गराउने कुरामा सभामुखको षड्यन्त्रमूलक सहभागिता देखिएको आरोप ओलीले लगाए । सांसदलाई संसद्मा मर्यादित भएर प्रस्तुत हुन भन्दै उनले सीमाभन्दा बाहिरका व्यवहार नगर्न निर्देशन दिए ।
‘कतिपय माननीयज्यूलाई लागेको हुन सक्छ, अवरोध गर्न हुन्छ कि हुँदैन । अवरोध गर्नुपर्छ,’ उनले भने, ‘यस्तो सभामुख जसले प्रमुख प्रतिपक्षी पार्टी फुटाउने षड्यन्त्र गर्छ । त्यसमा प्रत्यक्ष संलग्न हुन्छ र त्यस पदको दुरुपयोग गरिन्छ । त्यसमा गम्भीर प्रश्न नउठ्ने भन्ने कुरा हुन सक्दैन । त्यो गम्भीर प्रश्न उठ्छ ।’
अमर्यादित तरिकाले एमाले सांसदहरू संसद्मा प्रस्तुत भएपछि आलोचना भएको थियो । सोही विषयलाई उल्लेख गर्दै ओलीले भने, ‘हाम्रो लिमिटेसनभन्दा बाहिरका कुरा अर्थात् काँध चलेरमाथि जान खोज्ने कुरा नगरौं । किनभने, त्यो देखाउने कुरा मात्रै हुन्छ । के हामीले साँच्चै मर्यादापालकको घेरा तोड्नै खोजेको हो ? तोड्नै खोजेको भए हामी बेग्लै ढंगले प्रस्तुत हुन्थ्यौं होला नि । मर्यादापालकको घेरा तोड्न खोजेको होइन ।’
उनले तोकिएको नारा मात्रै लगाउन निर्देशन दिँदै भने, ‘म माननीयज्यूहरूलाई आग्रह गर्न चाहन्छु, संसदीय मर्यादाभित्र तोकिएका नारा मात्र लागोस् । त्योभन्दा फाल्तु नारा हामी लगाउँदैनांै ं। हामीले तोकेका व्यवहार छन् । हामी वेलमा जान्छौं र नारा लगाउँछौं । नारा लगाउने तरिका हुन सक्छ । अलि सामान्य अवस्था आयो भने विस्तारै विस्तारै नारा लगाउने । अलि बढी एग्रेसिभ भएर सभामुख आउँदा वा सत्ता पक्ष एग्रेसिभ भएर आउँदा अलि चर्को आवाजमा नारा लगाउने हुन सक्छ । तर, हामीले नारा लगाउने र वेलमा जानेभन्दा बाहिर त्यो मर्यादाभन्दा बाहिर जानुहुँदैन ।’
आफूले कतिपय सांसदहरूले सभामुखलाई माइक हान्ने योजना थियो भनेर सुनेको तर त्यस खालका योजना नभएकाले त्यस्तो कुरा मिडियामा नभन्न उनले आग्रह गरेका थिए । सरकारले सर्वसाधारणले बोल्न पाउने अभिव्यक्ति स्वतन्त्रता खोसेको ओलीले आरोप लगाए ।
सभामुखले बोलाए सर्वदलीय बैठक
सभामुख अग्निप्रसाद सापकोटाले संसद् अवरोध अन्त्य गर्ने विषयमा शीर्ष नेतालाई सोमबार छलफलमा बोलाएका छन् । प्रमुख विपक्षी दल नेकपा एमालेले लगातार संसद् अवरोध गरेपछि सभामुख सापकोटाले सोमबार दिउँसो साढे २ बजे संसद्मा भएका प्रमुख दलका शीर्ष नेतालाई छलफलका लागि बोलाएको उनका प्रेस सल्लाहकार श्रीधर न्यौपानेले जानकारी दिए ।
आफूले गरेको १४ सांसदको कारबाहीलाई सभामुखले मान्यता नदिएको विरोधमा नेकपा एमालेले लगातार संसद् अवरोध गर्दै आएको छ । सभामुख सापकोटाले आइतबार कानुन, न्याय तथा संसदीय मामिलामन्त्री र नेकपा एमालेका सांसदहरूसँग छलफल गरेका थिए । छलफलका क्रममा एमालेले सभामुखबाट विश्वासको वातावरण नबनाएसम्म संसद् अवरोध कायमै राख्ने अडान लिएका थिए । ‘हामीमा गरिएको अन्यायबारे प्रस्ट नपारेसम्म संसद् चल्न दिन्नौं,’ एमाले प्रमुख सचेतक विशाल भट्टराईले भने । एमाले विभाजनमा भूमिका सभामुख सापकोटाले खेलेको एमाले नेताहरूले आरोप लगाए ।
प्रमुख सचेतक भट्टराई, सचेतक शान्ता चौधरी, नेता खगराज अधिकारी सभामुख सापकोटासँगको छलफलमा बसेका थिए । ‘सभामुखले पार्टी फुटाउने मतियारको भूमिका खेलेको कुरा प्रस्ट भन्यौं,’ भट्टराईले भने । सभामुख सापकोटाले विश्वासको वातावरण बनाउने बताएका थिए । तर, कानुनमन्त्री कार्कीले उच्च राजनीतिक तहमा नै यसबारे छलफल गरिनुपर्ने प्रस्ताव गरेका थिए । यसपछि सभामुख सापकोटाले उच्च तहमा संवाद अगाडि बढाउने बताए । राजधानी दैनिकमा प्रकाशित समाचार साभार
मकवानपुर । बागमती प्रदेशसभा सदस्य राजेन्द्र पाण्डे नेकपा (एकिकृत समाजवादी) प्रदेश संसदीय दलको नेता चयन भएका छन् । नेकपा विभाजन पछी गठन भएकाे नेकपा (एस) पार्टीको ज्येष्ठ सदस्य सांसद माधव पौडेलको अध्यक्षतामा आइतबार बसेको पहिलो संसदीय दलको बैठकले पाण्डेलाई दलको नेताको रुपमा चयन गरेको हो ।
निर्वाचन आयोग काठमाडाैबाट पठाइएकाे नेकपा (एस) मा सनाखत गरेका १३ सांसदहरुलाई मान्यता दिँदै नामावलीसहितको पत्र प्रदेशसभा सचिवालयमा दर्ता भएसँगै ससदीय दलकाे नेता चयन गरिएकाे हाे ।
बैठकले संसदीय दलको विधान पारित गरेको र अष्टलक्ष्मी शाक्य नेतृत्वको प्रदेश सरकार दिएको समर्थन फिर्ता लिने निर्णय समेत गरेको छ । नेकपा (एस) ले प्रदेशसभा सचिवालयभित्रै संसदीय दलको कार्यालयसमेत स्थापना गरेको छ ।
नेकपा (एस) आधिकारीक रुपमा प्रदेशसभा दर्ता भएसँगै वाग्मती प्रदेशसभामा प्रतिनिधित्व गर्ने दलको संख्या ७ पुगेको छ । नेकपा एमाले, नेपाली कांग्रेस, नेकपा माओवादी केन्द्र, राष्ट्रिय प्रजातन्त्र पार्टी, विवेकशिल साझा, नेपाल मजदुर किसान पार्टी २०७४ सालकाे निर्वाचनबाट प्रतिनिधित्व गर्ने दल हुन् । एक स्वतन्त्र सांसद् रहेका छन् । उनी जसपा निकट रहेका छन् । बागमती प्रदेशमा नेकपा (एस) १३ सांसदसहित चौथो दल भएको छ ।
मकवानपुर । एकिकृत समाजवादीका सांसदहरुकाे पत्र बागमती प्रदेशसभामा दर्ता भएकाे छ । याे सँगै बागमती प्रदेशसभामा नयाँ दल नेकपा (एकिकृत समाजवादी) थपिएको छ । नेकपा (एकिकृत समाजवादी) नेकपा एमाले विभाजन भइ बनेकाे नयाँ दल हाे ।
निर्वाचन आयोगले पठाएकाे एकिकृत समाजवादीमा सनाखत गरेका सांसदहरुको नामावली सहितको पत्र आइतबार प्रदेशसभामा दर्ता भएको हाे । नेकपा एसका सांसद राजेन्द्र पाण्डेसहितको टोली पत्र दर्ताका लागि प्रदेशसभामा पुगेका थिए ।
बागमती प्रदेशसभामा एकिकृत समाजवादीका १३ सांसद रहेको पत्रमा उल्लेख गरिएको छ । यसअघि २०७४ सालकाे निर्वाचनबाट बागमती प्रदेशसभामा नेकपा एमाले, नेपाली कांग्रेस, नेकपा माओवादी केन्द्र, राष्ट्रिय प्रजातन्त्र पार्टी, विवेकशिल साझा, नेपाल मजदुर किसान पार्टी रहेका थिए । एक स्वतन्त्र सांसद् रहेका छन् । उनी जसपा निकट रहेका छन् । याे सँगै बागमती प्रदेशसभमा दलकाे संख्या ७ भएकाे छ ।

