मकवानपुर । सरकारले बाढीपहिरोमा परी मृत्यु भएका परिवारलाई राहत दिने र घाइतेकाे निःशुल्क उपचार गर्ने निर्णय गरेको छ ।
कात्तिक ३ गते बुधबार बसेको मन्त्रिपरिषद्को बैठकले बैठकले परिवारको १ जनामात्रै मृत्यु भएको भए प्रति व्यक्ति २ लाख रुपैयाँ र १ जना भन्दा धेरैको मृत्यु भएको भए प्रतिव्यक्ति थप १ लाखका दरले राहत दिने निर्णय गरेको हाे । यसैगरी बाढीपहिरोमा परी घाइते भएकाहरुको सरकारले निःशुल्क उपचार गर्ने भएकाे छ ।
मन्त्रिपरिषद् बैठकले अवरुद्ध सडक, विद्युत् र सञ्चारलाई सुचारु गर्ने निर्णय गरेको छ । बाढी पहिरोबाट घर भत्केकाहरूको घर निर्माणका लागि ५ लाखसम्म आर्थिक सहयोग उपलब्ध गराउने निर्णय समेत सरकारले गरेकाे छ । आजकाे मन्त्रिपरिषद् बैठकले पहाडमा घर बनाउन ४ लाख, हिमालमा ५ लाख र तराईमा ३ लाख उपलब्ध गराइने निर्णय गरेकाे हाे ।
घर निर्माणका लागि जग्गाको अभाव हुनेका लागि थप ३ लाख पनि उपलब्ध गराइनेछ । यस्तै विपद् व्यवस्थापन समितिको तर्फबाट घरबारविहीन भएकाहरुलाई तत्काल ५० लाख पनि उपलब्ध गराउने निर्णय भएको छ ।
मकवानपुर । कात्तिक ४ गते विहीबारकाे लागि यस अघी नै तय भएकाे बागमती प्रदेशसभाको बैठक सार्न नेकपा एमालेले प्रदेशसभा सचिवालयलाई आग्रह गरेको छ । लिखित पत्र पठाउँदै एमालेले कात्तिक ४ काे प्रदेशसभा बैठक सार्न सचिवालयलाई आग्रह गरेको हो ।
बैठक कात्तिक ११ गतेका लागि बोलाउन एमालेले ३ कात्तिकमा लिखित प्रस्ताव गरेको हो । कात्तिक पहिलो हप्ताभित्र नेकपा एमालेको स्थानीय अधिवेशन हुने र सो अधिवेशनका कारण एमालेबाट प्रतिनिधित्व गर्ने प्रदेशसभा सदस्यहरु बैठकमा उपस्थित हुन नसक्ने कारण देखाउँदै बैठक ११ गते सार्न नेकपाका प्रमुख सचेतक दीपक निरौलाले प्रदेशसभा समक्ष लिखित प्रस्ताव गरेका हुन् ।
प्रदेश मुख्यमन्त्री अष्टलक्ष्मी शाक्यले गत असाेज २४ गते विश्वासको मतको लागि संसदमा प्रस्ताव पेश गरेकी थिइन् । साेही अनुसार कात्तिक ४ गते सम्मकाे लागि बैठक स्थगित गर्दै साेही दिन प्रदेश सभा बैठकमा शाक्यले विश्वासको मत लिने कार्यक्रम रहेको थियो । बैठकमा मुख्यमन्त्री शाक्यले विश्वासको मत लिने कार्यसूचि समेत रहेकाे प्रदेश सभा सचिवाललयले जनाएकाे छ ।
मुख्यमन्त्री शाक्यले गएको असोज २४ गते बसेको प्रदेशसभा बैठकमा नेपालको संविधानको धारा १८८ को उपधारा २ तथा प्रदेश नियमावली २०७४ को नियम १४३ को उपनियम १ बमोजिम विश्वासको मतसम्बन्धी प्रस्ता पेस गरेकी थिइन् । सो प्रस्तावमाथि कात्तिक ४ गतेकाे बैठकमा छलफल हुने र विश्वासको मत लिने प्रकृया अगाडि बढाइने प्रदेशसभा सचिवालयका प्रमुख सचिव कृष्णहरि खड्काले जानकारी दिए । प्रमुख सचिव खड्का अनुसार, ४ कात्तिकका हुने प्रदशे सभाको बैठकमा हुने विश्वासको मतको लागि सत्तापक्ष र प्रतिपक्षहरुको लागि मतदान कार्यको निमित छुट्टाछुट्टै कोठाको व्यवस्था गरिसकिएको छ ।
भदौ २ गते नेकपा एमालेको एकल बहुमतबाट मुख्यमन्त्री नियुक्त भएकी शाक्य अहिले अल्पमतमा छिन् । नेकपा (एमाले) विभाजन भएसँगै एमालेका १३ सांसदले नेकपा एकीकृत समाजवादी रोजेपछि मुख्यमन्त्री अल्पमतमा परेकी हुन् । मुख्यमन्त्री शाक्य अल्पमतमा परेपछी विश्वासको मत लिन लागेकी हुन्।
बागमती प्रदेश सभामा रहेका कुल १ सय १० सदस्यमध्ये हाल १ सय ९ सांसद छन्। जसमा एमालेका ४३, नेपाली कांग्रेसका २२, माओवादी केन्द्रका २३, एकीकृत समाजवादीका १३, विवेकशील साझाका ३, नेमकिपाका दुई, राप्रपाका २ र स्वतन्त्र सांसद १ जना छन्।

मकवानपुर । विगत ३ दिनदेखि परेको अविरल बर्षापछि आएको बाढी र पहिरोमा परेर ६ जनाको मृत्यु भएको छ भने ५ जना घाइते भएका छन् । बाढी–पहिरोमा परेर कालिकोटमा १, डडेल्धुरामा १, डोटीमा २ र सुनसरीमा २ जनाको मृत्यु भएको र ५ जना घाइते भएकाे गृह मन्त्रालयले जनाएकाे छ।
मन्त्रालयका अनुसार बर्षाका कारण १९ जिल्ला प्रभावित भएका छन् । प्रभावित जिल्लाहरुमा कालिकोट, डडेल्धुरा, कञ्चनपुर, बझाङ, बर्दिया, कैलाली, डोटी, सुनसरी, दैलेख, दार्चुला, बाजुरा र सुर्खेत लगायत रहेका छन् । बाढी र पहिरोबाट प्रभावित ४ वटा घरमा पूर्ण रुपमा क्षति पुगेको छ र करिव ५ सय घरपरिवारलाई सुरक्षित स्थानमा स्थानान्तरण गरिएको मन्त्रालयले जनाएको छ ।
मन्त्रालयले बर्षा कायमै रहेको र अझै केही दिन कायम रहने भनी जल तथा मौसम विज्ञान विभागबाट जानकारी प्राप्त भएको भन्दै तटीय र जोखिमयुक्त स्थानमा रहेका सम्पूर्ण नागरिकहरुलाई उच्च सतर्कता कायम राख्न अनुरोध समेत गरेको छ ।
त्यस्तै गृहमन्त्रीद्वारा प्रभावित जिल्लाहरुमा नागरिकको जीउ धनको सुरक्षाका लागि सबै सुरक्षा निकायहरुलाई संयुक्त प्रयास जारी राख्न निर्देशन दिएका छन् । प्रभावित स्थानहरुलाई मध्यनजर गरी नेपाली सेनाको हेलिकप्टरलाई तयारी अवस्थामा राख्न र राहत तथा उद्धारका लागि आवश्यक सामाग्रीहरु समयमै उपलव्ध गराउन सकिने व्यवस्थापन गर्न समेत निर्देशन दिएका छन् ।

मकवानपुर । नेकपा एमालेकाे संसाेधित विधान अनुसार ४ नेतालाई एमालेको केन्द्रीय सदस्य बन्ने ढोका बन्द भएकाे छ । एमालेले नयाँ विधानमा महाधिवेशन प्रतिनिधि र केन्द्रीय सदस्य बन्ने योग्यता तोकेपछि आगामी दशौं महाधिवेशनमा अन्य पार्टी परित्याग गर्दै विभिन्न समयमा एमाले प्रवेश गरेका ती नेताहरु केन्द्रीय सदस्य बन्न नपाउने गरी ढोका बन्द भएको हो ।
एमाले केन्द्रीय सदस्य बन्ने ढोका बन्द हुनेमा एमाले अध्यक्ष केपी शर्मा ओली निकट रहेकी नेतृ कोमल वली, जसपाबाट एमाले प्रवेश गरेका शिवजी यादव र राजकुमार लेखी तथा पूर्व उपसभामुख गंगा यादव रहेका छन् । एमालेको विधानअनुसार एमाले महाधिवेशन प्रतिनिधि बन्न पार्टी सदस्य भएको १० वर्ष हुनुपर्नेछ भने महिलाको हकमा ७ वर्ष कायम छ । यी दुवै योग्यता वली लगायत अन्यकाे हकमा नपुग्ने देखिएको छ । वली २०७४ सालमा राप्रपा छोडेर एमाले प्रवेश गरेकी थिइन् ।
तर, पार्टी एकताका क्रममा एमाले प्रवेश गरेका अन्य नेताहरुलाई भने पूर्ववत् पार्टीको इतिहासलाई कायम गरिने भएकाले उनीहरु एमाले केन्द्रीय सदस्य बन्नबाट रोकिने छैनन् । उदाहरणका लागि माओवादीबाट आएका रामबहादुर थापा ‘बादल’ देखि टोपबहादुर रायमाझीलाई केन्द्रीय सदस्य बन्न विधानले छेक्ने छैन ।
गत भदौ १५ देखि १७ सम्म सम्पन्न विधान महाधिवेशनले विधान संशोधन गर्दै संशोधित नयाँ विधानकाे धारा ६३ एमाले महाधिवेशनमा प्रतिनिधि बन्न कम्तीमा १० वर्ष पार्टी सदस्य भएको योग्यता भएको हुनुपर्ने व्यवस्था गरेको हो । तर धारा ६३ को उपधारा १ मा महिला, दलित, श्रमिक, अल्पसंख्यक, आदिवासी जनजाति र अपांगता भएका व्यक्तिको हकमा ७ वर्ष पार्टी सदस्य भए पुग्ने व्यवस्था राखिएको छ ।
त्यसैगरी एमालेको केन्द्रीय कमिटीको पदाधिकारी र स्थायी कमिटी सदस्यको उम्मेदवार हुन केन्द्रीय कमिटीको सदस्य भएर एक कार्यकाल काम गरेको हुनुपर्ने व्यवस्था पनि गरेको छ । एमालेले केन्द्रीय कमिटी सदस्य उम्मेदवार हुने मापदण्ड पनि एमालेले विधानमै तोकेको छ । यसका लागि कम्तीमा १० वर्ष पार्टी सदस्य भएर केन्द्रीय कमिटी वा केन्द्रीय निकायको सदस्य भएपछि मात्रै उम्मेदवार बन्न पाउनेछन् ।
मकवानपुर । आउँदाे कात्तिक ७ र ८ गते भिटामिन ए र जुकाको औषधि खुवाइने भएकाे छ । सरकारले हरेक वर्ष कात्तिक २ र ४ गते खुवाउँदै आइरहेको भिटामिन ए र जुकाको औषधि यसपटक दसैं अवधिमा परेकाले ७ र ८ गते खुवाउने निर्णय गरेको जनाइएको छ ।
सरकारले राष्ट्रिय भिटामिन ए र जुकाको औषधि खुवाउने मिति परिवर्तन गरी ७ र ८ गते संचालन गर्ने भएको हाे । ७५३ वटै पालिकामा ६ महिनादेखि ५ वर्षसम्मका बालबालिकाहरुलाई भिटामिन ए र १ देखि ५ वर्षसम्मका बालबालिकाहरुलाई जुकाको औषधि खुवाउने कार्यक्रम रहेको छ ।
बालबालिकाहरुलाई भिटामिन ए र जुकाको औषधि खुवाउन जाँदा जनस्वास्थ्यका मापदण्ड अपनाएर खुवाउन स्वास्थ्य मन्त्रालयले अनुरोध गरेको छ।