आगामी ३० वैशाखमा हुने स्थानीय तह निर्वाचनका लागि सत्तारूढ गठबन्धन आबद्ध चार दलबीच ६ महानगरपालिकामा तालमेल सहमति भए पनि उपमहानगरमा किचलो बढेको छ । पोखरा महानगरमा नेपाली कांग्रेसले अडान छाडेपछि सत्ताधारी दलबीच ६ महानगरको मेयर पदमा भने मंगलबार दिउँसै भागबण्डा मिलेको थियो ।
ती महानगरमा उपमेयरमासमेत भागबण्डा भइसकेको छ । तर, ११ उपमहानगर मेयर र उपमेयरमा सहमति जुट्न नसकेपछि सत्तारूढ दलले भागबण्डालाई अन्तिम रूप भने दिन सकेनन् । मंगलबार राति १० बजेबाट आज बुधबार बिहान २ बजेसम्म बसेको बैठकमा सहमति हुन नसकेको हो ।
सत्तारूढ दलले बनाएको निर्वाचन अनुगमन तथा परिचालन समिति संयोजक कांग्रेस नेता रामचन्द्र पौडेलले महानगर विषयमा सहमति भए पनि उपमहानगरमा बन्न नसकेको जानकारी दिए । ‘आज बुधबार ११ बजे पुनः बस्ने गरी बैठक सकियो, महानगरका विषयमा सहमति भए पनि उपमहानगरमा कुरा मिलेन,’ समिति संयोजक पौडेलले राजधानीसँग भने ।
६ वटै महानगर र ११ उपमहानगरमा गठबन्धन दलबीच तालमेल सहमतिलाई अन्तिम रूप दिन भन्दै रातारात बैठक बसिएको थियो । मंगलबार राति १० बजेबाट प्रधानमन्त्रीको सरकारी निवास बालुवाटारमा भएको चार घण्टा लामो छलफल बुधबार बिहान २ बजे बिनानिश्कर्ष सकिएको हो ।
गठबन्धन आबद्ध नेपाली कांग्रेस, नेकपा माओवादी केन्द्र, नेकपा एकीकृत समाजवादी र जसपा नेपालबीच ६ महानगरमा भने मेयर पदमा भागबण्डा भइसकेको छ । जसअनुसार ६ मध्ये तीन महानगर काठमाडौं, ललितपुर र विराटनगरको मेयर कांग्रेसले लिने, माओवादीलाई भरतपुर, एकीकृत समाजवादीलाई पोखरा र जसपालाई वीरगन्ज महानगर भाग परेको छ ।
स्रोतका अनुसार काठमाडौं महानगरमा मेयर कांग्रेसले लिँदा उपमेयर नेकपा एसलाई दिने सहमति भएको छ । ललितपुरमा उपमेयर माओवादी केन्द्रको भागमा परेको छ । यसैगरी, विराटनगरमा मेयर कांग्रेसले लिने भएपछि उपमेयर जसपाको भागमा परेको छ ।
भरतपुरमा मेयर माओवादीले लिने र उपमेयरसहित सबै वडाअध्यक्ष कांग्रेसले निलेगरी सहमति गरिएको दाबी गरिएको छ । त्यस्तै, पोखरामा नेकपा एसलाई मेयर दिएर सहमति गरिएपछि कांग्रेसलाई उपमेयर दिइएको छ ।
वीरगन्ज महानगरमा मेयर जसपालाई दिएर उपमेयर कांग्रेसले लिनेगरी सहमति भएको छ । पोखरा महानगर विषयमा कांग्रेसको अडान कायम रहँदा सोमबार गठबन्धनबीच सहमति जुटेको थिएन । तर, प्रधानमन्त्रीसमेत रहेका कांग्रेस सभापति शेरबहादुर देउवाले मंगलबार पोखरा कांग्रेसका नेतालाई मनाएपछि सहमति बनेको हो ।
पोखरा महानगरका कारण गठबन्धन नै टुट्ने अवस्था आएपछि देउवाले मंगलबार दिउँसो पोखराका कांग्रेस नेताहरूलाई काठमाडौं बालुवाटार बोलाएरै गठबन्धनको बाध्यता बुझिदिन आग्रह गरेका थिए । देउवाले बोलाएपछि कास्की कांग्रेसका सभापति किशोरदत्त बराल, गण्डकी प्रदेशका कांग्रेस सभापति शुक्रराज शर्मा र नेता यज्ञबहादुर थापासहितको टोली काठमाडौं आएको थियो ।
गठबन्धनमा आबद्ध दल शनिबारदेखि नै महानगर र उपमहानगर मेयर तथा उपमेयर पदको भागबण्डामा थिए । आइतबार र सोमबार दलबीच प्रमुख पद भागबण्डा’मा घनीभूत छलफल भएको थियो । सोमबार राति नै ६ महानगर विषयमा गठबन्धनमा आबद्ध दल सहमतिनजिक थिए । तर, पोखरा महानगरमा प्रमुख पदमा कांग्रेस र नेकपा एसको अडान जारी रहेपछि सहमति बनेको थिएन ।
मंगलबार प्रधानमन्त्रीसमेत रहेका कांग्रेस सभापति देउवाले कास्की कांग्रेस नेताहरूलाई बालुवाटारमै बोलाएर मनाएपछि गठबन्धन आबद्ध दलबीच महानगर भागबण्डामा सहमति भएको हो । २०७४ सालमा सम्पन्न स्थानीय तह निर्वाचनमा कांग्रेसले विराटनगर र ललितपुर महानगरपालिकामा जित हात पारेको थियो ।
वीरगन्ज महानगरमा जसपा, पोखरामा नेकपा एमाले तथा भरतपुरमा नेकपा माओवादी केन्द्रका उम्मेदवार निर्वाचित भएका थिए ।
गठबन्धनबीच ११ उपमहानगरमा मिलेन कुरा
सत्तारूढ गठबन्धन आबद्ध दलले ११ उपमहानगर मेयर तथा उपमेयरमा पनि भागबण्डाको अन्तिम तयारी गरेका थिए । यसका लागि मंगलबार राति १० बजे बैठक बोलाइएको थियो । दिउँसोको बैठकमा जसपा अध्यक्ष उपेन्द्र यादव सहभागी थिएनन् । रातिको बैठकमा भने उनीसमेत पुगे ।
उनले आफ्नो सहभागीबिना दिउँसो भएको सहमतिा इन्कार गरेपछि थप विवाद भएको हो । गठबन्धन आबद्ध बैठकमा सहभागी एक नेताका अनुसार मंगलबार दिउसो कांग्रेसलाई ७, माओवादी केन्द्रलाई २ र जसपा र नेकपा एकीकृत समाजवादीलाई एक– एक वटाका दरले उपमहानगरपालिका भागवण्डा गरिएको थियो ।
सहमतिअनुसार घोराही र जितपुर सिमरा उपमहानगर मेयर माओवादी केन्द्रको भागमा राखिएको थियो । हेटौंडा उपमहानगरपालिका नेकपा एकीकृत समाजवादीको भागमा राखिने सहमति थियो । तर, जनकपुर र नेपालगन्जमा भने कांग्रेस र जसपाको अडान रहेपछि उपमहानगरमा सहमति जुट्न नसकेको हो ।
दिउँसोको सहमतिअनुसार इटहरी, धरान, कलैया, बुटवल, तुल्सीपुर, नेपालगन्ज र धनगढी मेयर नेपाली कांग्रेसको भागमा परेको थियो । जनकपुर जसपालाई दिने सहमति थियो । राति ती दुई उपमहानगरमै सहमति जुट्न नसकेपछि बैठकबाट नेताहरू उठेका हुन् ।
यसैगरी, उपमेयरतर्फ कांग्रेसले जनकपुर, हेटौंडा, जितपुर सिमरा र घोराही उपमहानगर उपमेयर लिने धरान उपमहानगरपालिका उपमेयर माओवादी केन्द्रलाई दिने सहमति मंगलबार दिउँसो भएको थियो ।
त्यस्तै, एकीकृत समाजवादीले इटहरी, बुटवल र तुल्सीपुरमा उपमेयर लिने तथा जसपाको भागमा कलैया उपमहानगरपालिका उपमेयर दिने सहमति थियो । नेपालगन्ज उपमेयर जसपा र धनगढी उपमेयर माओवादीले राख्ने सहमति थियो । राजधानी दैनिकबाट
मकवानपुर/ आसन्न स्थानीय तहको निर्वाचनमा दलको प्रचारमा नलाग्न राष्ट्रसेवक कर्मचारीलाई मकवानपुरका मुख्य निर्वाचन अधिकृत एबम् जिल्ला न्यायाधिश डिल्लीरत्न श्रेष्ठले आग्रह गरेका छन् । चुनावलाई निष्पक्ष र भयरहित वातावरणमा सम्पन्न गराउन राष्ट्रसेबक कर्मचारीको ठुलो जिम्मेवारी रहेको बताउँदै उनले मतदातालाई घात हुने र आचरसंहिता विपरीत हुने भएकोले दलको प्रचारमा नलाग्न कर्मचारीलाई आग्रह गरेका हुन् ।
आज जिल्ला प्रशासन कार्यालय मकवानपुरले आयोजना गरेको कार्यालय प्रमुखहरुको बैठकमा निर्वाचन आचारसंहिताको पालना र निर्वाह गर्नुपर्ने भुमिकाबारे जानकारी दिंदै उनले यस्तो बताएका हुन् । मुख्य निर्वाचन अधिकृत श्रेष्ठले राष्ट्रसेवक कर्मचारीले कुनै पनि राजनैतिक दलको प्रचारप्रसार गर्न र बिभिन्न कार्यक्रममा भाग नलिइ तटस्थता हुनुपर्नेमा बताए । “लोकतन्त्रमा आ—आफ्नो बिचार सबैको हुन्छ तर कर्मचारीको भूमिका निर्वाह गर्दा निर्वाचन आचारसंहिता पालना गर्नैपर्छ” उनले भने । मकवानपुरका प्रमुख जिल्ला अधिकारी भरतमणी पाण्डेले स्थानीय तहको निर्वाचनलाई निष्पक्ष गराउनु सबैको साझा दायित्व रहेको बताए ।
स्थानीय तहको निर्वाचनलाई उत्साहजनक बनाउन उनले आग्रह गरे। प्रदेश निर्वाचन कार्यालय वाग्मती प्रदेश हेटौंडाका प्रमुख लुम्बनाथ पोखरेलले स्थानीय निर्वाचनको तयारी लगभग सकिएको बताए । जिल्लामा निर्वाचनमा खटीने कर्मचारीको बिबरण संकलन, मतदानस्थलको निरिक्षण, अनुगमन र सम्बन्धित निकायहरुसँग समन्वय र छलफल भैरहेको उनले बताए।
जिल्लाका निजामती, नेपाली सेना, नेपाल प्रहरी, सशक्त प्रहरी सहित विभिन्न संस्थानका कार्यालय प्रमुख तथा प्रतिनिधीको सहभागिता रहेको बैठकमा सहभागीहरुले निर्वाचनका बिषयमा जिज्ञासा राखेका थिए । मकवानपुरमा कूल मतदाता करिब ३ लाख १० वटा स्थानिय तह रहेको मकवानपुरमा कूल मतदाता संख्या २ लाख ९५ हजार ५ सय ५० जना रहेको छ । बिगतको तुलनामा यसपटक जिल्लामा ३९ हजार ९ सय ४६ जना मतदाता थपिएको निर्वाचन कार्यालयले जनाएको छ ।
जसअनुसार ईन्द्रसरोबर गाउँपालिकामा १२ हजार ४ सय ९५, कैलाश गाउँपालिकामा १४ हजार ६ सय २०, थाहा नगरपालिकामा ३२ हजार ३ सय १६, बकैया गाउँपालिकामा ३० हजार १३, बागमती गाउँपालिकामा २२ हजार ९०, भिमफेदी गाउँपालिकामा १७ हजार ४ सय ९०, मकवानपुरगढी गाउँपालिकामा १९ हजार १ सय ५०, मनहरी गाउँपालिकामा २६ हजार ७ सय ५१, राक्सिराँग गाउँपालिकामा १५ हजार ८ सय ७३ र हेटौंडा उपमहानगरपालिकामा १ लाख ४ हजार ४ सय ७३ रहेको निर्वाचन कार्यालय मकवानपुरले जानकारी दिएको छ ।
२०७४ सालको स्थानियतहको निर्वाचनमा मकवानपुरमा २ लाख २७ हजार ७ सय मतदाता रहेका थिए । स्थानिय तहको निर्वाचनका लागि मकवानपुरको १ मतदान स्थल सारिने र १ थपिने भएको छ । जिल्लाको हेटौंडा उपमहानगरपालिका —४ स्थित बासुदेशसभागृहको मतदानस्थल हेटौंडा उपमहानगरपालिका—४ भुटनदेबी माध्यमिक बिद्यालयमा सारिने निर्णय भएको निर्वाचन कार्यालयले जनाएको छ ।
बासुदेबसभागृह भत्काएर नयाँ भवन निर्माण कार्य भैरहेकोले मतदानस्थल सारिएको हो । त्यसैगरी मनहरी गाउँपालिकामा १ मतदानस्थल थप्ने निर्णय भएको छ । मनहरी—६ मा मतदानस्थल थपिने बताइएको छ ।
मकवानपुर। बैशाख ३० गते हुने स्थानीय तह निर्वाचनका लागि हेटौंडा उपमहानगरपालिका प्रमुखमा ३ जनाकाे नाम सिफारिस गरिएकाे छ । नगर प्रमुखमा १ महिला र २ पुरुष सहित ३ जनाको नाम सिफारिस गरिएको छ भने उपप्रमुखमा ३ महिलाको नाम सिफारिस गरिएको छ।
सोमबार बसेको कांग्रेस हेटौंडानगर कार्य समितिको बैठकले नगरप्रमुखमा आनन्दराम पराजुली, उत्सव इटेनी र लक्ष्मी श्रेष्ठको नाम सिफारिस गरेको हो। त्यसैगरी बैठकले उपप्रमुखमा अमृता थापा, इन्दिरा न्यौपाने र तारा राई कार्कीको नाम सिफारिस गरेकाे छ । नगर कार्य समितिले प्रमुख र उपप्रमुखको नाम कांग्रेस मकवानपुर क्षेत्रीय कार्य समिति र जिल्ला कार्य समितिलाई सिफारिस गरिएको कांग्रेस हेटौंडानगर सभापति उत्सव इटेनीले बताएका छन्।
नगर प्रमुखमा सिफारिस भएका पराजुली २०७४ को स्थानीय तहको निर्वाचन अन्तर्गत हेटौंडानगर प्रमुखमा झिनो मतान्तरले पराजित भएका थिए। पराजुली हेटौंडानगर निवर्तमान सभापतिका साथै प्रभावशाली नेताका रुपमा चिनिन्छन्। नगर प्रमुखको प्रमुख दाबेदार पराजुलीनै रहेको कांग्रेस नेता कार्यकर्ताले बताएका छन्। साथै नगर कार्य समितिको बैठकले हेटौंडा उपमहानगरको प्रमुखको नेतृत्व कांग्रेसले पाउनुपर्ने निर्णय समेत गरेको छ।
मकवानपुर । साहित्यकार एवम् अनुवादक सिर्जना शर्मा हेटाैडामा सम्मानित भएकी छिन् । पारिजातको २९ औं स्मृति दिवसमा साहित्य संगम मकवानपुर र आदर्श टोल विकास संस्था हेटाैडाको संयुक्त आयोजना भएकाे कार्यक्रममा सोमबार शर्मालाई परिजात स्मृति सम्मानबाट सम्मानित गरिएकाे हाे ।
परिजात स्मृति सम्मान समर्पण तथा रचना वाचन कार्यक्रममा शर्मालाई नगद १५ हजार ५ सय ५५ राशी सहित सम्मानित गरिएकाे छ । कार्यक्रम बुढ्यौली साहित्य समाज मकवानपुरका अध्यक्ष आरसी रिजालले हेटौंडा–१० स्थित पारिजातको अर्धकदको शालिकमा माल्यार्पण गरि शुभारम्भ भएकाे थियाे । सम्मानित सिर्जनाले पारिजातले गरेका कृति र रचनाका बारेमा चर्चा गरेकी थिइन् ।
कार्यक्रममा साहित्य क्षेत्रमा पारिजातको योगदानको स्मरण गरिएको थियो । बुढ्यौली साहित्य समाज मकवानपुरका अध्यक्ष रिजाालको प्रमुख आतिथ्य तथा साहित्य संगम मकवानपुरकी अध्यक्ष अनिता न्यौपानेको सभाध्यक्षतामा भएकाे कार्यक्रममा पारिजातका कविता वाचन गरिएकोे थियो ।
मकवानपुर । हेटौँडा उपमहानगरपालिका १८ स्थित गुम्बाडाँडामा २५ फीटको बुद्धको मुर्ती अनाबरण गरिएको छ । बौद्ध धर्मगुरु लोमसाङ नाङ्गेलले २५ फीटको ढुंगाकाे मुर्ती अनावरण गरेका हुन् ।
१ करोड ४४ लाखको लागतमा बोधी चैत्य बौद्ध स्तुपा मुर्ती निर्माण गरी अनाबरण गरिएको हो। समाजसेवी दुर्गामान शाक्य, सुभाषराज शाक्य, कमलचन्द्र सुमनको सक्रियतामा हेटौँडा १८ गुम्बाडाँडामा बौद्ध मुर्ती निर्माण गरीएको थियाे । धार्मिक महत्वको मुर्ती अनावरण हुँदा गुम्बाडाँडामा धार्मिक पर्यटन सम्वन्धी गतिविधी बढ्ने १८ नम्बर वडा अध्यक्ष अनिल बानियाँले बताए ।
सम्पूर्ण कुमार लामाको अध्यक्षतामा भएको मुर्ती अनावरण कार्यक्रममा मकवानपुरका समाजसेवी एवम् मुर्ती निर्माण ब्यवस्थापन समितीका उपाध्यक्ष ज्योतीरत्न बज्राचार्य लगायतकाे उपस्थिति रहेकाे थियाे ।