मकवानपुर । हेटौंडा उपमहानगरपालिकाका १९ वटै वडामा पुस्तकालय स्थापना गर्न आगामी आर्थिक वर्षमा बजेट विनियोजन गरिने भएको छ । पुस्तकालय अभियान समूह मकवानपुरले अभियानको प्रथम वार्षिकोत्सवको अवसरमा आइतबार उपमहानगरपालिकाकै सभाहलमा आयोजना गरेको कार्यक्रममा सहभागी नगर प्रमुख मीना कुमारी लामा, उपप्रमुख राजेश बानियाँसहित वडा अध्यक्षहरुले पुस्तकालय स्थापनाका लागि बजेट विनियोजन गर्न सहमति जनाएका हुन् ।
पुस्तकालय अभियान समूहले पुस्तकालय स्थापनाका लागि सञ्चालित अभियानको विषयमा जानकारी गराउँदै नगर प्रमुख र उपप्रमुखलाई अनुरोध पत्र समेत बुझाएको छ । पुस्तकालय अभियान समूहका सदस्य निमेष निखिल र प्रतिमा श्रेष्ठले नगर प्रमुख र उपप्रमुखलाई अनुरोधपत्र बुझाएको हो । पुस्तकालय अभियान समूहका सदस्य सुरेश श्रेष्ठले अभियानका बारेमा जानकारी गराएका थिए । सचेत र जागरुक नागरिक समाज निर्माणका लागि पुस्तकालयको आवश्यकता महसुस गरी अभियान नै सञ्चालन गरिएको र अब स्थानीय सरकारले पुस्तकालय अभियानको विस्तार र विकासमा ध्यान दिनुपर्ने श्रेष्ठले बताए । स्थानीय सरकारले पुस्तकालय स्थापना, सञ्चालन तथा व्यवस्थापनसम्बन्धी कानुन नै बनाएर कार्यान्वयन गर्नुपर्नेमा उनले सुझाव समेत दिएका छन् ।
अनुरोधपत्र बुझेपछि नगरप्रमुख मीना कुमारी लामाले पुस्तकालय स्थापना र सञ्चालनका लागि नागरिकस्तरबाट आएको प्रस्ताव महत्वपूर्ण रहेको बताउँदै पुस्तकालय स्थापनाको योजनालाई आगामी आर्थिक वर्षको बजेटमा समावेश गरेर कार्यान्वयन गरिने बताइन् । पुस्तकालय सञ्चालन र व्यवस्थापन गर्नु जटिल विषय भएको औँल्याउनुहुँदै नगरप्रमुख लामाले पुस्तकालय अभियान समूहसँगको सहकार्य र समन्वयमा नगरका सबै वडामा पुस्तकालय स्थापना गरिने प्रतिवद्धता व्यक्त गरिन् ।
नगर उपप्रमुख राजेश बानियाँले सभ्य समाज निर्माणका लागि पठन संस्कृतिको विकास गर्नुपर्ने उल्लेख गर्नुहुँदै इतिहास जान्न पढ्नुको विकल्प नभएको र पढ्नका लागि पुस्तकालय आवश्यक भएको बताए । बानियाँले हाम्रो समाजमा अध्ययन संस्कृति नभएको स्वीकार गरदै धन भए ज्ञान चाहिँदैन भन्नेको बाहुल्य भएको समाजमा अब परिवर्तन जरुरी रहेको बताए । वडा अध्यक्षहरुको तर्फबाट १ नम्बर वडा अध्यक्ष सविन न्यौपानेले सकारात्मक सोँचको विकास गर्न पुस्तकालय आवश्यक भएको बताए । उनले हरेक वडाले पुस्तकालय स्थापना, सञ्चालन र व्यवस्थापनमा सहयोग गर्ने बताए ।
एक वर्षको अवधिमा पुस्तकालय अभियान समूह मकवानपुरले जिल्लामा १२ वटा तथा बारा र रौहतटमा एक/एक वटा गरी कुल १४ वटा पुस्तकालय स्थापना गरिसकेको छ । आगामी दिनमा पनि पुस्तकालय स्थापना गरी पठन संस्कृतिको विकास गरिने पुस्तकालय अभियान समूहका सदस्य सुशील राज गिरीले जानकारी दिए । पुस्तकालय अभियान समूहले २०७८ साल जेठ २९ गते पहिलो पुस्तकालय स्थापना गरेको एक वर्ष पूरा भएको दिन मकवानपुरको भीमफेदी गाउँपालिका र मनहरी गाउँपालिकामा अभियानअन्तर्गत नै स्थापित पुस्तकालयहरुले पनि स्थानीय सरकारसँग पुस्तकालय स्थापना, सञ्चालन र व्यवस्थापन सम्बन्धमा छलफल गरेको छ ।

मकवानपुर । नवसर्जक साहित्य चौतारी नेपालले आयाेजना गरेकाे प्रथम राष्ट्रिय बालसाहित्य उत्सवमा ८ जना स्रष्टा सम्मानित भएका छन् । नवसर्जक साहित्य चौतारीले शनिबार हेटौंडामा आयोजना गरेको बालसाहित्य उत्सवको अवसरमा ८ जना स्रष्टालाई सम्मान गरिएको हो ।
१५ हजार ५ सय ५५ रुपैयाँ राशीकाे लोकनाथ न्यौपाने स्मृति अग्रज बालसाहित्यकार सम्मान–२०७९ बाट प्रमोद प्रधान सम्मानित भएका छन् । यस्तै प्रदेश–१ नवसर्जक सम्मान–२०७९ बाट अन्वेषा चापागाई, मधेस प्रदेश नवसर्जक सम्मान–२०७९ बाट अभिजित राम, बागमती प्रदेश नवसर्जक सम्मान–२०७९ बाट अनुज्ञा नेपाल सम्मानित भएका छन् ।
यसैगरी गण्डकी प्रदेश नवसर्जक सम्मान–२०७९ बाट अनुराग सापकोटा, लुम्बनी प्रदेश नवसर्जक सम्मान–२०७९ बाट पवन अधिकारी, कर्णाली प्रदेश नवसर्जक सम्मान–२०७९ बाट नवीन पाण्डे, सुुदुरपश्चिम प्रदेश नवसर्जक सम्मान–२०७९ बाट ऋष्टिना करिया प्रधान थारुलाई सम्मान गरिएको छ । जनही ७ हजार ७ सय ७७ रुपैयाँ राशीसहित उक्त सम्मानबाट सम्मानित गरिएको हो ।
नवसर्जक साहित्य चौतारी नेपालकी अध्यक्ष प्रशन्ना चौलागाइँको सभाध्यक्ष तथा नेपाल प्रज्ञा प्रतिष्ठानका बालसाहित्य तथा लोकवार्ता विभाग प्रमूख प्राज्ञ डा. देवी नेपालको प्रमुख आतिथ्यमा कार्यक्रम भएको हो । रमेशमोहन अधिकारी, विष्णुप्रसाद न्यौपाने, डिबी बर्तौला, पत्रकार सुरेश श्रेष्ठ, अर्चना दाहाल जयन्ती आचार्य, ओमकुमारी बन्जारा रानाभाट, रुबिना शर्मा, प्रभा पौडेल, पुस्कल नेपाल, सञ्जय साह, जागेश्वर नेपाल, अजमत अली अन्सारीको निर्णयबाट उक्त सम्मानबाट स्रष्टाहरुलाई सम्मान गरेका हुन् ।
नवसर्जक साहित्य चौतारी स्थापनाको प्रथम वार्षिकोत्सवको अवसरमा गत पुसमा आयोजना गर्ने योजना बनाइएको कार्यक्रम कोभिडको दोस्रो लहरसँगै स्थगित गरिएको थियो । हेटौंडा स्कुल अफ म्यानेजमेन्ट मुख्य प्रायोजक रहेको कार्यक्रममा प्याब्सन मकवानपुर र हेटौँडा नगर समितिकाे सहकार्य रहेकाे छ ।
मकवानपुर । साविक विजेता विभागीय टाेली त्रिभुवन आर्मी क्लब चौथो स्थानीय तह सहिद स्मृति अन्तर्राष्ट्रिय मकवानपुर गोल्डकप फुटबल प्रतियोगिताको फाइनलमा प्रवेश गरेको छ । क्यामरुनी क्लब एभेनिर एफसी डोउलालाई सडन डेथमा पराजित गर्दै आर्मी क्लब फाइनलमा प्रवेश गरेको हाे ।
खेलको ४९औं मिनेटमा दिनेश हेन्जनले गोल गर्दै आर्मीलाई अग्रता दिलाएका थिए । तर, आर्मी अन्तिम समयमा सम्हालिन नसक्दा गोल खान पुगेको थियो । जिकाले इन्ज्युरी समयको थप गरिएको तेस्रो मिनेटमा गोल गर्दा खेलकाे निर्धारित समय बराबरीमा सकिएकाे थियाे । रोमाञ्चक र प्रतिस्पर्धात्मक बनेको निर्धारित समयको खेल १–१ गोलको बराबरीमा सकिएपछि खेलको निर्णय टाइब्रेकरमा लिइएको हो ।
टाइब्रेकरमा आर्मीका दीपक गुरुङ, सिमन्त थापा मगर र दिनेश हेन्जनले गोल गर्न सफल भए । कमल बहादुर थापाको प्रहार पोलमा लाग्दै बाहिरिदा सन्तोष केसीले गोल गर्न सकेनन् । टाइब्रेकरमा ३–३ गोलको बराबरीपछि खेल सडनडेथमा लम्विएको थियो । सडन डेथमा आर्मीले एभेनिरलाई ११–१० ले पराजित गर्दै फाइनलमा स्थानीय टोली विजय युथ क्लबसँगको भेट पक्का गरेको हो ।
सडन डेथसम्ममा ११–११ जनाले पेनाल्टी प्रहार गर्दा ८–८ गोलको बराबरी भएको थियो । त्यसपछि आर्मीले तीनै पेनाल्टीमा गोल गर्दा एभेनिरको अन्तिम पेनाल्टी सदुपयोग हुन नसक्दा आर्मी विजेता बन्दै फाइनलमा पुग्न सफल भयो । सडन डेथमा युद्ध शाही, विकेश कुथु, सुरज बस्नेत, विमल पाण्डेय र भरत खवासले गोल गर्दा जितेन्द्र कार्कीले गोल गन सकेनन् । त्यसपछिको टाइब्रेकरमा दीपक गुरुङ, दिनेश हेन्जन र सिमन्त थापाले गोल गर्न सफल भए ।
अब जेठ ३० गते साेमबार हुने फाइनलमा विजय युथ र आर्मी उपाधिकाे लागि भिड्ने छन् । विजय युथले शुक्रबार विभागीय टाेली नेपाल पुलिसलाई १–० ले पराजित गर्दै फाइनल प्रवेश गरेकाे थियाे ।
मकवानपुर जिल्ला फुटबल संघको आयोजनामा १२ टोलीहरुको सहभागिता रहेको प्रतियोगिताको विजेताले उपाधिसहित नगद १५ लाख हात पार्नेछ । दोस्रो हुनेले १० लाख प्राप्त गर्नेछ । प्रतियोगिताको सर्वाेत्कृष्ट खेलाडीले हेटौंडा स्कुल अफ म्यानेजमेन्टले प्रायोजन गरेको एक थान बुलेट मोटरसाइकल हात पार्नेछ । व्यक्तिगत विधाका उत्कृष्टले जनही २५ हजार ट्रफी प्राप्त गर्नेछ ।
मकवानपुर । अहिले देशभर आंशिक देखि सामान्य बदली रहेको छ । नेपालमा मनसुन प्रवेश गरेको छ ।
जल तथा मौसम विज्ञान विभागको मौसम पूर्वानुमान महाशाखाका अनुसार सुदुरपश्चिम, लुम्बिनी तथा गण्डकी प्रदेशका एक दुई स्थानहरूमा मेघ गर्जन चट्याङ सहित हल्का वर्षा भईरहेको छ ।
नेपालको प्रदेश न १, मधेश प्रदेश, बागमती र गण्डकी प्रदेशका भू-भागमा मनसुनी वायुको सामान्य प्रभाव र अन्य प्रदेशका भू-भागमा स्थानीय वायुको तथा भारतको उत्तर प्रदेश र विहारमा रहेको पूर्व-पश्चिमी न्यून चापीय रेखाको प्रभाव रहेको महाशाखाले जनाएको छ।
शनिबार आज राती प्रदेश १, मधेश प्रदेश, बागमती र गण्डकी प्रदेशका पहाडी भू-भागहरूमा आंशिक देखि सामान्य बदली तथा बाँकी भू-भागमा आंशिक बदली देखि मौसम सामान्यतया सफा रहने छ।
प्रदेश १ का केही स्थानहरू र अन्य प्रदेशका पहाडी भू-भागहरूका थोरै स्थानहरुमा मेघ गर्जन / चट्याङ्ग सहित हल्का देखि मध्यम वर्षाको सम्भावना रहेको महाशाखाले जानकारी दिएको छ।
जेठ २९ गते आइतवार प्रदेश १, मधेश प्रदेश, बागमती प्रदेश, गण्डकी प्रदेश र कर्णाली प्रदेशमा सामान्य बदली रही अन्य प्रदेशमा आंशिक बदली रहनेछ।
प्रदेश १, मधेश प्रदेश, बागमती प्रदेश, गण्डकी प्रदेश र कर्णाली प्रदेशका केही स्थानहरू तथा अन्य प्रदेशका पहाडी भू-भागका थोरै स्थानहरुमा हल्का देखि मध्यम वर्षाको सम्भावना रहेको छ।
उल्लेखित प्रदेशका केही स्थानहरू तथा अन्य प्रदेशका पहाडी भू-भागका थोरै स्थानहरूमा मेघ गर्जन / चट्याङ्ग सहित हल्का देखि मध्यम वर्षाको सम्भावना रहेको हुनाले आवश्यक सतर्कता अपनाउन समेत महाशाखाले भनेको छ ।
स्थानीय तहको निर्वाचन र जिल्ला समन्वय समितिमा प्रमुख प्रतिपक्षी नेपाल कम्युनिस्ट पार्टी (एमाले)ले अपेक्षित परिणाम नल्याए पनि अध्यक्ष केपी शर्मा ओलीको कार्यशैली बदलिएको छैन ।
हालै सम्पन्न स्थानीय तहको निर्वाचन अघि एमालेलाई ‘किलो’ र अन्य दललाई ‘ढक’सँग तुलना गरेका अध्यक्ष ओलीले शुक्रबार पाँच दलीय गठबन्धनमा रहेका दलहरूको हैसियत बाख्रासँग लड्न नसक्ने खालको रहेको टिप्पणी गरेका छन् । अरू दललाई बाख्रासँग लड्न नसक्ने खालको भएको बताएका उनले एमालेलाई ‘साँढे’सँग तुलना गरेका छन् ।
‘गठबन्धन टुटाउन बल गर्नु प¥यो भनेर हल्ला चले पनि एक्लै चुनावमा जाँदा धुलोपिठो हुने डरले उनीहरू गठबन्धन टुटाउन चाहँदैनन्’ शुक्रबार विराटनगर पुगेका ओलीले भने, ‘साँढेसँग लड्न सक्दिनँ भनेर उनीहरूले गठबन्धन गरेका हुन् । गठबन्धनमै रहेका केही दलहरूको हैसियत बाख्रासँग लड्न सक्ने खालको पनि छ ।’
स्थानीय तहको निर्वाचनमा गत निर्वाचनभन्दा यो निर्वाचनमा एमालेको जित संख्या निकै घटे पनि उनले एमालेसँग असाधारण शक्ति रहेको दाबी गरे । उनले एमालेसँग जुध्ने सामथ्र्य कुनै पार्टीमा नरहेको पनि जिकिर गरे । पाँच दलीय गठबन्धनले चुनावमा जित निकाले पनि एउटै प्रकारको जुठो गाँस भएको उनको टिप्पणी छ ।
‘आफ्नो गठबन्धनभित्रको दल कांग्रेसले दम्भ देखाए एमालेको जस्तो हालत बनाउने चेतावनी दिने एक नेताको भाषण सुन्नुभएको होला नि तपाईंहरूले’ उनले भने, ‘धम्की दिने तिनको उचाइ कति छ भनेको कम्मरकम्मर अलि पुग्दा रहेनछन्, धाक चाहिँ कत्रो थियो भने कांग्रेसले घमण्ड नगरोस्, एमालेको हालत बनाइदिउँला । आफ्नो हालत के छ भन्दा घुँडाघुँडा । यस्ताले धाक लगाउँछन् एमाले जस्तो बनाउने’ माओवादी केन्द्रका अध्यक्ष पुष्पकमल दाहाल प्रचण्डलाई इंगित गर्दै उनले कटाक्ष गरे ।
दुई÷दुईपटक संविधानविपरीत संसद् विघटन गरेका ओलीले आफूले गरेको संसद् विघटनको बचाउ गर्दै संसद् विघटन प्रतिगमन नभएको दाबी गरे । उनले कसैले प्रतिगमन भन्यो भने मुखमा औंला ठड्याएर विरोध गर्न कार्यकर्तालाई निर्देशनसमेत दिए ।
पार्टीभित्रै नेतृत्वले आफ्नो कमीकमजोरी सच्याउन नेताहरूबाट सुझाव आएको भए पनि ओली आफ्नो कमीकमजोरी सच्याउन तत्पर नभई उल्टै ढाकछोप गरेर हिँड्ने गरेका छन् । स्थायी कमिटीका सदस्य घनश्याम भुसालले पार्टी नेतृत्व सच्चिनुपर्ने आवाज उठाउँदा ओलीले उल्टै कारबाहीको ‘डन्डा’ चलाउन खोजेका छन् । पार्टी विभाजनअघि र अहिले पनि ओलीको शैली केही नफेर्रिएको एमालेकै नेताहरू बताउँछन् ।
पार्टीभित्र एकता कायम गरेर पार्टीलाई बलियो बनाउनुको साटो अनुशासन आयोगमार्फत कारबाहीको डन्डा चलाउन थालेका ओलीले एमाले विभाजन गरेकालाई पार्टीमा स्वागत नहुने अडान व्यक्त गरेका छन् । एमाले विभाजन गरेर गएकालाई पार्टीमा ल्याउनुपर्ने वा वामगठबन्धन गर्नुपर्ने आवाज उठे पनि उनी पार्टीविभाजन गर्नेलाई पार्टीमा स्वागत नगर्ने अडानमा छन् ।
यस्तै, ओलीले अन्य दलसँग सहकार्य र समन्वयन गर्नुको साटो अनावश्यक आलोचनामै रमाउने गरेका छन् ।
यसअघि, संसद् बैठकमा उनले अन्य दललाई चर्काे आलोचना गर्दै आफ्नो बचाउ गरे । लगत्तै माओवाद्री केन्द्र्रका अध्यक्ष प्र्रचण्डले ओलीले आफ्नो कमजोरी सच्याउने र वाम एकताका लागि आह्वान गर्लान् भन्ने आफूलाई लागे पनि दम्भ अझै नहटेको संसद् बैठकमै टिप्पणी गरे ।
एमालेका अधिकांश नेताहरू पार्टी नेतृत्वले कमीकमजोरी सच्याएर वाम एकता गरेर जानुपर्ने पक्षमा देखिएका छन् । तर, ओली भने विगतको समीक्षा गर्नेभन्दा पनि आरोपप्रत्यारोप र आफ्ना कमजोरी ढाकछोप गरेरै अघि बढ्ने पक्षमा देखिएको पाइएको छ । राजधानी दैनिकबाट
