मकवानपुर । मकवानपुरको भिमफेदी गाउँपालिका वडा नंबर २ भैसेंबाट बरामद गरिएकाे मांगुर माछा नष्ट गरिएकाे छ । अस्थाई प्रहरी पोष्ट भैंसे चेकपोष्टमा चेकजाँच गर्ने क्रममा बरामद भएको नेपालमा प्रतिबन्धित मांगुर माछा ५० केजी र खानका लागि अयोग्य अन्य माछा १ सय २० केजी नष्ट गरिएको हो ।
वीरगंजबाट भन्सार छलेर ल्याईएको माछा मकवानपुर प्रहरी र चितवन माछा व्यवसायी संघको संयुक्त टोलीले असोज ७ गते शुक्रवार राती ११ बजे बरामद गरेकाे थियाे । नेपाल र भारतको माछा मिसावट गरि खानको लागि अयोग्य र प्रतिबन्धित माछा काठमाडौं लैजाने क्रममा भैंसेबाट बरामद गरिएको थियो । बरामद गरेको १ सय ७० किलो माछा भैंसेमा खाल्डो खनी नष्ट गरिएको हाे ।
भेटेनरी अस्पताल तथा पशु सेवा विज्ञ केन्द्र हेटौंडाका प्रमुख बज्र किशोर ठाकुर, नेपाल मत्स्य व्यवसायी संघका महासचिव जोगेन्द्र महत्तो, बरिष्ठ उपाध्यक्ष अर्जुन लामिछाने, स्थानीय सरोज चौलागाई, प्रहरीसमेतकाे उपस्थितिमा बरामद गरिएकाे उक्त परिणामकाे माछा नष्ट गरिएको थियो ।
एसके ज्ञवाली
भन्न त मन थियो-
बा! तपाईं त खत्तम मान्छे
तर
मर्यादाको कसम, नैतिक शिक्षाले रोक्यो।
बा गुनासो गर्नुहुन्छ :
चाडपर्वको महत्त्व हराउँदै गयो रे
कुनै खुशी र उमंग देखिदैन रे आजकाल
दशै त दशै जस्तो नै भएन रे
बा भन्नुहुन्छ :
रोटे पिङ्मा चचहुईई गरिन्थ्यो र पो दशै दशै हुन्थ्यो
नयाँ नयाँ लुगामा रमाईन्थ्यो र पो दशै दशै हुन्थ्यो
लङ्घुर बुर्जा खेलिन्थ्यो र पो दशै दशै हुन्थ्यो
कौडा चाके दाउ हालिन्थ्यो र पो दशै दशै हुन्थ्यो
आह !
खसी काटेर केराको पातमा भाग लगाएको हेर्नुको मजा
गाउको कोटमा सराय नाच मेला हेर्नुको मजा
निधार भरी टीका थाप्दै गाउँ डुल्नुको मजा
मामा घर गएर गोजिभरी दक्षिणा बटुल्नुको मजा
अहिले कहाँ पाईन्छ र खै!
भन्न त ,भन्दिउ जस्तो लागेको हो:
मेरा बा,
छोरो हुन नजानेको बा बन्न नसकेको खत्तम मान्छे हुन
तर मर्यादाको कसम,नैतिक शिक्षाले रोक्यो।
बालाई स्पष्ट थाह छ
I hardly managed to pass
तर
दशैमा घर आएको पहिलो रातमै रिजल्ट सोध्नुहुन्छ
र गधालाई जस्तै घाँस हाल्नुहुन्छ
ए+ल्याएको भए
दशैमा साईकल किनिदिन्थे
तैले भने जस्तै ड.मार्टिनको जुत्ता हालिदिन्थे
बाले फिटिक्कै देख्नु हुन्न,
डि+बाट सि + मा उक्लिन मैले गरेको प्रयास
मात्रै आक्रोश युक्त गुनासो गर्नुहुन्छ
तैंले जिन्दगीमा केही गरि खादैनस
नाथे सि + ले के लछारिन्छ?
खाते बन्छ्स खाते,
गाउँ बाट झरेर मैले दुखले जोडेको
यत्रो घर ,जग्गा गाडी बेचेर खान्छ्स
र अलपत्र पार्छ्स तैंले हामीलाई बुढेसकालमा ।
बाले जत्ती फुर्ति लाएनि
मेरा बा का बा अर्थात बुढो हजुर बा गाउमै हुनुहुन्छ
यसैले जुरुक्क उठेर
भनिदिउ जस्तो लागेको थियो :
यत्रो बर्ष सहरमा बसेर
बा अटाउन सक्ने जाबो घर पनि बनाउन नसक्ने
तपाईं त खत्तम मान्छे हो
तर
मर्यादाको कसम , नैतिक शिक्षाले रोक्यो।
कहिलेकाही त
भत्काई दिउ जस्तो लाग्छ मर्यादाको पर्खाल
च्यातिदिउ जस्तो लाग्छ नैतिक शिक्षाको पाठ
र सोध्न मन लाग्छ:
बाल्यकालमा तपाईं जस्तै म रमाउन पाउने कि नपाउने ?
तपाईं सानो हुँदाको जस्तै दशै मलाई आउँछ कि आउदैन?
हजुरबुबाले तपाईंलाई हालिदिएको जस्तै पिङ
तपाईंले मलाई हालिदिने कि नदिने?
कोट र सरायको कथा-
मैले सुन्ने मात्रै हो कि हेर्न पनि पाउछु?
अझै भनौ तपाईं बा बन्ने कि नबन्ने?
मात्रै भने,
म होस्टेल बस्नेलाई किन चाहियो साईकल ?
स्कुल जुत्ता छदै छ किन चाहियो ड. मार्टिन ?
किताबमा दशै पढेकै छु किन जानू पर्यो गाउँ ?
तपाईं हरु जानुस , म होस्टेल फर्किन्छु
यसपटक
बाले मलाई केही भन्नू भएन
आमालाई गाली गर्नु भो-
“तैंले छोरो बिगारिस,मुखमुखै लाग्न थाल्यो
यसलाई श्रावण कुमारको कथा पढ्न भन “
झोक चल्यो म चिच्याय:
मैले पढ्ने नैतिक शिक्षा बाले पढ्नु पर्छ कि पर्दैन ?
बाले थप्पड हान्दै सोध्नु भो ” तैले खोजेको के ?”
मैले भने ” म श्रावण कुमारको छोरो हुन चाहन्छु।”
हेटौडा
मकवानपुर । बागमती प्रदेश सभा सदस्य रिता माझी राप्रपा नेपाल पार्टी प्रबेश गरेकी छिन । राप्रपाका निर्वाचित केन्द्रीय सदस्य माझी राप्रपा नेपाल प्रवेश गरेकी हुन् ।
शुक्रबार बागमती गाउँपालिका-३ मा भएको कार्यक्रममा माझीलाई राप्रपा नेपाल अध्यक्ष कमल थापाले पार्टी प्रवेश गराउदै स्वागत गरेका थिए । कार्यक्रममा अब कोहि पनि अलमलमा नपरी, भ्रमित नबनी राप्रपा नेपाललाई बलियो बनाउन लाग्नुपर्नेमा थापाले बताए ।
मुलुकलाई एउटा बलियो राष्ट्रवादी प्रजातान्त्रिक शक्तिको आवश्यकता भएको र त्यो शक्ति राप्रपा नेपाल बन्न सक्ने थापाको दाबी रहेको थियो । उनले मकवानपुरको विकासको अधुरो काम सम्पन्न गर्न आउने निर्वाचनमा उम्मेदवारी दिन लागेको समेत बताए ।
कार्यक्रममा बोल्दै माझीले इमानदारीता, निष्ठाका कारण राप्रपा नेपाल रोजेको बताइन् । उनले कमल थापा विचार र पार्टीको जन्मदाता भएकोले थापा सङ्ग काम गर्दा गौरवको अनुभूति हुने समेत विचार व्यक्त गरिन् ।
कार्यक्रममा राप्रपा बागमती गाउँ समितिको सिङ्गो ३ नम्बर वडा समिती राप्रपा नेपालमा समाहित भएको थियो । सबैलाई थापाले स्वागत गरेका थिए । कार्यक्रममा महामन्त्री राजाराम बर्तौला, दिल बहादुर बल, सुबर्ण लामा, ज्ञान बहादुर माझी लगायतको उपस्थित रहेको थियो ।
मुलुकको पर्यटकीय सुन्दर नगरी पोखरामा यही असोज २८ देखि कात्तिक ३ गतेसम्म सञ्चालन हुने नवौँ राष्ट्रिय खेलकुद प्रतियोगिताको तयारी तीव्ररूपमा अघि बढेको छ । प्रतियोगितालाई भव्यरूपमा सम्पन्न गर्न मूल आयोजक राष्ट्रिय खेलकुद परिषद्, सातै प्रदेशका खेलकुद मन्त्रालय र मातहतका निकायको सक्रियाता बढाइएको युवा तथा खेलकुद मन्त्रालयका सचिव डा दामोदर शर्माले जानकारी दिए ।
उनले भने, “हामी नवौँ राष्ट्रिय खेलकुदको नजिक आइपुगिसकेका छौँ । प्रतियोगिता सुरु हुन अब २० दिन मात्र बाँकी छ । अब बाँकी तयारीलाई घनिभूतरूपमा पूर्णता दिने, कहीँकतै कमी–कमजोरी देखिए सुधार गर्दै समन्वय र सहकार्यलाई बलियो तुल्याइनेछ ।” प्रतियोगिताका सन्दर्भमा गठन भएका समिति र उपसमितिले आ–आफ्नो कार्य जिम्मेवारीलाई तीव्र तुल्याएको जानकारी दिइएको छ । मन्त्रालयले पनि सरोकारवाला र निजी क्षेत्रसँग छलफल गरी प्रतियोगिताका लागि प्रायोजन गर्ने वातावरण बनाएको छ । राष्ट्रपतिलाई प्रतियोगिता उद्घाटन तथा प्रधानमन्त्रीलाई समारोहमा सरिक हुन मन्त्रालयले केही दिनभित्रै औपचारिकरूपमा अनुरोध गर्नेछ ।
यसबीचमा प्रतियोगिताका लागि तयार गरिएको ‘राष्ट्रिय रनिङ ट्रफी’लाई देशका सातै प्रदेश र विभागीय टिमको मुकाम पु¥याएर देखाउने काम भइरहेको छ । उक्त ट्रफी केही दिनअघि प्रधानमन्त्री शेरबहादुर देउवाले सार्वजनिकीकरण गर्नुभएको थियो । सचिव डा रेग्मी भन्छन, “खेलाडीको नाम दर्ता गराउने प्रक्रिया भइसकेको छ, वास्तविक सङ्ख्या परिषद्बाट केही दिनमै सार्वजनिक हुनेछ । प्रतियोगिताका लागि आवश्यक सामग्री सार्वजनिक खरिद प्रक्रियाअनुसार नै अघि बढिसकेको छ ।” खेलाडी, प्रशिक्षक, अफिसियल र अतिथिसहित करिब १० हजारको सङ्ख्यामा सहभागी हुने व्यक्तिलाई आवास व्यवस्थापनको चुनौतीलाई सहज तुल्याउँदै मन्त्रालयले प्रतियोगितालाई खेलउत्सवका रूपमा व्यवस्थित र ऐतिहासिक तुल्याउने ढङ्गबाट तयारी गरिरहेको छ ।
पहिलोपटक प्रदेशिक आधारमा हुन लागेको प्रतियोगितामा सहभागी ११ वटै टोलीका खेलाडीको सहभागिता बढाएर पदकमाथि प्रभुत्व जमाउने हिसाबले अन्तिम तयारीमा जुटिरहेका छन् । प्रतियोगितामा सात प्रदेशका सात, नेपाली सेना, नेपाल प्रहरी र सशस्त्र प्रहरी बल नेपाल तथा गैरआवासीय नेपाली सङ्घ (एनआरएन)को टिमबीच प्रतिस्पर्धा हुनेछ । यसअघिका प्रतियोगितामा पदकमाथि विभागीय टोलीले कब्जा जमाउँदै आएको थियो ।
यसपटक भने विभागीय टोलीलाई प्रदेश टोलीले चुनौती खडा गर्ने अनुमान गरिएको छ । प्रतियोगिता सञ्चालनका क्रममा प्रस्तुत हुने झाँकीले प्रदेशको पहिचान उजागर गर्दै आन्तरिक तथा बाह्य पर्यटक भित्र्याउन योगदान पुर्याउने छ । प्रतियोगितामा तीन हजार छ सय ८५ महिलासहित सात हजार सात सय ९० खेलाडीले विभिन्न ३६ खेल विधामा प्रतिस्पर्धा गर्ने प्रतियोगिता आयोजक कार्यकारिणी समितिका सदस्यसचिव फणिन्द्र पौडेलले जानकारी दिए ।
नेपालको खेलकुदको इतिहासमा पोखरामा ३९ वर्षपछि दोस्रोपटक राष्ट्रिय खेलकुद प्रतियोगिता हुन लागेको हो । प्रत्येक टोलीबाट कम्तीमा तीन सय ३५ महिला र तीन सय ७४ पुरुष खेलाडीको सहभागिता रहने छ । प्रतियोगिताका खेल नवौँ राष्ट्रिय खेलकुदमा फुटबल, क्रिकेट, टेनिस, एथलेक्टिस, भारत्तोलन, सुटिङ, ब्याडमिन्टन, टेबल टेनिस, बक्सिङ, भलिबल, बुद्धिचाल, खोःखो, कराँते, जिम्न्याष्टिक, पौडी र कबड्डी खेल समावेश गरिएका छन् ।
त्यस्तै हयाण्डबल, जुडो, कुस्ती, कराते, सफ्टटेनिस, स्क्वास, तेक्वान्दो, उसु, बास्केटबल, शारीरिक सुगठन, आइटिएफ तेक्वान्दो, सेपाताक्रोे, गल्फ, आर्चरी, साइक्लिङ, फेन्सिङ, ट्रायथलन र प्याराग्लाइडिङ पनि प्रतियोगितामा समेटिएका खेल हुन् । प्रतियोगिता धेरैभन्दा धेरै खेलाडीबीच प्रतिस्पर्धा होस् भन्ने हेतुले खेलाडी तयार गर्न प्रत्येक प्रदेशलाई रु ४९ लाखका दरले रकम उपलब्ध गराएको थियो ।
प्रतियोगिताअन्तर्गत व्यक्तिगत प्रतिस्पर्धामा स्वर्ण पदक विजेतालाई रु २५ हजार तथा सामूहिकतर्फका स्वर्णधारीलाई रु १५ हजार पुरस्कार प्रदान गरिने मन्त्रालयले जनाएको छ । चार सय आठ प्रतिस्पर्धा हुने प्रतियोगिताका लागि तीन सय ९३ स्वर्ण, तीन सय ९३ रजत र छ सय कास्य पदकको यसअघि नै तय भइसकेको छ । पोखरा घुम्नका लागि अन्यन्तै अनुकूल मौसम र वातावरणमा हुन लागेको प्रतियोगिताले पोखराको सौन्दर्य प्रवद्र्धन गर्न थप योगदान पुर्याउने छ । राजधानीडेली डटकमबाट
मकवानपुर । मकवानपुरका २ विद्यालयमा पूर्व विद्यार्धीहरुले शिक्षककाे भाषा पुस्तक हस्तान्तरण गरेका छन् । आकृति क्रिएसनले प्रकाशनमा ल्याएकाे पुस्तक शिक्षकमाझ पुर्याउने अभियानअन्तर्गत शुक्रबार २ विद्यालयमा पुस्तक हस्तान्तरण गरिएको छ ।
हेटौंडा–१६ स्थित जनप्रिय मावि र हेटौंडा १३ स्थित महेन्द्र माध्यमिक विद्यालयमा सोही विद्यालयका पूर्व विद्यार्थीको प्रायोजनमा पुस्तक हस्तान्तरण गरिएको हो । पूर्व विद्यार्थी तथा नेशनल लाइफ इन्स्योरेन्स हेटौंडाका प्रबन्धक शर्मिला बलामीको प्रायोजनमा जनप्रियका सहप्रधानाध्यापक राम आशिष मण्डललाई पुस्तक हस्तान्तरण गगरिएको हो । बलामीले विद्यालयका ४८ शिक्षक कर्मचारीका लागि ‘शिक्षकको भाषा’ पुस्तक हस्तान्तरण गरेकी हुन् ।
यस्तै हेटौंडा १३ पदमपोखरीमा रहेको महेन्द्र माविमा पनि पूर्व विद्यार्थी समूहले सबै शिक्षकहरूका लागि पुस्तक उपहार दिएका छन् । पूर्व विद्यार्थीहरू फेन्चु लामा, राम मिजार, गुणराज थिङ, मङ्गलबहादुर स्याङ्तान र रामकृष्ण वाइबाले विद्यालयका ३५ शिक्षकलाई पुस्तक हस्तान्तरण गरेका हुन् ।
अनित्यको पुस्तक ‘शिक्षकको भाषा’ गत शनिबार हेटौंडामा विमोचन भएको थियोे । यस अघी वंशगोपाल माध्यमिक विद्यालय, चौघडाका शिक्षकहरूलाई पूर्व विद्यार्थी दम्पतीले पुस्तक उपहार दिएका थिए । हेटौंडा – ६, हात्तीलेट निबासी अरुण सापकोटा र मालती फयलले ‘शिक्षकको भाषा’ २५ थान उपहारस्वरुप प्रदान गरेका हुन् ।
