एसियाली टोली जापान र दक्षिण कोरिया विश्वकप फुटबलबाट बाहिरिएका छन् । सोमबार राति भएको खेलमा जापान क्रोसियासँग पेनाल्टी सुटआउतमा पराजित भयो भने मंगलबार बिहान भएको खेलमा दक्षिण कोरिया ब्राजिलसँग ४–१ ले पराजित भयो ।
यो बिजयीसंगै ब्राजिल र क्रोसिया अन्तिम १६ औ बाट क्वाटरफाइनलमा प्रवेश गरेको छ । ब्राजिलले मध्यान्तर अगाडी नै ४-० ले अग्रता लिएको थियो भने मध्यान्तर पछि दक्षिण कोरियाले एक गोल गरेको थियो । ब्राजिलको तर्फबाट भिनिसियस जुनियर, नेमार, रिचार्लिसन र लुकास पक्वेटाले पहिलो ४५ मिनेट अगाडी पालैसंग गोल गरेका थिए । ७६ औं मिनेटमा दक्षिण कोरियाले एक गोल फर्कायो । अब ब्राजिल शुक्रबार क्रोसियासंग भिड्ने छ ।
यता, फिफा विश्वकपको अन्तिम १६ अन्तर्गत सोमबार पेनाल्टी सुटआउटमा जापानलाई पराजित गर्दै साविक उपविजेता क्रोएसिया विश्वकपको क्वार्टरफाइनलमा पुगेको हाे । जापान र क्रोएसियाबीचको खेल निर्धारित/अतिरिक्त समयमा १–१ गोलको बराबरीपछि पेनाल्टी सुटआउटमा पुगेको थियो । सुटआउटमा जापान दुर्भाग्यशाली साबित हुँदा क्रोएसिया १–३ ले विजयी भयो ।
शुष्मा थापा
रात थियो बात गर्न, तिमी भन्छौ म एक्लै थिए ।
साथ थियो घात गर्न, तिमी भन्छौ म एक्लै थिए ।
को रूदैन र रुवाउने साथैमा रहिरहँदा
विश्वास, भरोसा थियाे तिमी भन्छौ म एक्लै थिए
चिप्लेर लडे पो रूनु लडाउने साथैमा रहिरहँदा
खास थियो आस गर्न तिमी भन्छौ म एक्लै थिए ।
पछ्याउने उही छलाउने उही साथैमा रहिरहदा
सास थियो पश्चाताप गर्न तिमी भन्छौ म एक्लै थिए ।
पोखरा
मकवानपुर । नेपाल पत्रकार महासंघ मकवानपुरले सोमबार हेटौंडामा फुटसल प्रतियोगिताको आयोजना गरेको छ ।
लैङ्गिक हिंसा विरुद्धको १६ दिने अभियानका अवसरमा महिला पत्रकार तथा महिला अधिकारकर्मी बीच फुटसल प्रतियाेगिता भएकाे हाे । अभियानको अवसरमा महासंघले पत्रकार महिला र फ्रीमिडिया नेटवर्कका महिला अधिकारकर्मी बीच मैत्रीपूर्ण फुटसल प्रतियोगिता हेटौंडा–४ मा आयोजना गरेको हो ।
प्रतियोगितामा महिला अधिकारकर्मी संजालले महिला पत्रकारलाई २–१ को गोल अन्तरले पराजित गर्दै विजयी हाँसिल गरेको छ । महिला संजालको तर्फबाट एलिसा जिम्बा र लक्ष्मी श्रेष्ठले १/१ गोल गरेका थिए भने महिला संचारकर्मीको तर्फबाट सम्झना घिमिरेले १ गोल गरेकी थिइन् ।
कार्यक्रम नेपाल पत्रकार महासंघ मकवानपुरका अध्यक्ष मणिराज गौतमको अध्यक्षता एवम् नेपाल पत्रकार महासंघका केन्द्रीय सल्लाहकार निर्मला शर्माको प्रमुख आतिथ्यता भएको हो । कार्यक्रममा नेपाल पत्रकार महासंघ बागमती प्रदेशका निवर्तमान अध्यक्ष प्रताप विष्ट, नेपाल पत्रकार महासंघ बागमती प्रदेशका उपाध्यक्ष रुपेश दुलाल, विभिन्न संगठनका प्रतिनिधीहरु, महिला संजालमा आवद्ध विभिन्न संस्थाका प्रतिनिधी लगायतको उपस्थिती रहेको थियो ।

सुरिलो भावमा गीत गाएरै तिमी चम्कियौ ।
चुम्दा ती ओठले शब्द गीत जीवन्त पार्दियौ ॥१॥
गाएका कण्ठले तिम्रा जति छन् गीत नै यहाँ ।
सदाबहार छन् ती ता शब्द कालजयी जहाँ ॥२॥
राम्रा शब्द हुँदा मात्र गायकी हुन्न सुन्दर ।
कला जो गाउने तिम्रो प्रतिभा अति अद्भुत ॥३॥
स्वर जादूमयी तिम्रो मन्त्रमुग्ध भए जन ।
जुनै प्रकारका गीत सुनिँदा भुल्दछन् जन ॥४॥

सबै शब्द तिमी तौली गाउँथ्यौ पूर्ण भावले ।
प्रेम-प्रकृति या पीडा हियाका सब ढङ्गले ॥५॥
तिम्रा गायनका स्रोता बाल वृद्ध सबै भए ।
तिम्रै भाव सुसेलेर कति ता गायकै बने ॥६॥
तिम्रै गायन सुन्छन् है जनले सुख-दुःखमा ।
चाहे स्वदेशमा व्यक्ति चाहे होस् है विदेशमा ॥७॥
गीतका स्वरसम्राट नेपाली स्वर नायक ।
तिमीलाई उछिन्ने क्वै जन्मेको छैन है अझ ॥८॥
हे नारायण गोपाल ! स्मृतिका शब्द यी चुनेँ।
प्रीतिले भावले श्रद्धा अर्पिँदै कविता उनेँ ॥९॥
छन्दः अनुष्टुप्
१९ मंसीर २०७९
स्वरसम्राट नारायण गोपाल स्मृति दिवस
बुटवल हाल कम्बोडिया
सुमित्रा सुमी
तिमी निसास्सिएर,
सिकार खोसिएको बाघले झैँ झम्टन्छौ,
आफ्ना क्रुर पन्जाले मलाई चिथोर्छौ,
मेरो मुलायम छाती गिद्धले झैँ लुछ्छौ ,
लाखेका झैँ डरलाग्दो आँखाले हेर्छौ ,
सजिलै मेरो भावानाको निर्मम हत्या गर्छौ,
आफ्नो मनको सारा भोक मेट्छौ,
अनि
निर्विवेक मेरै निर्दोष मुटुमा
लात बजार्दै फर्कन्छौ ,
बस् …..
यत्ती सहनकै लागि,
म स्वास्नी बन्न सक्दिन ।
ज्यूँदो भएर पनि मैले
ज्यूँदो हुनुको पराकाष्ठा त्याग्नुपर्छ,
आफैँलाई तिलान्जली दिएर बाँच्नुपर्छ,
तिमीलाई निर्विरोध जवानी पिलाएर,
हरपल मैले आँसुले तीर्खा मेट्नुपर्छ ,
यदि यस्तै-यस्तै नियत स्वीकार गर्दै,
तिम्रो आरामदायी बिछ्याउना मात्र
बनिदिनुपर्ने हो भने …..
भयो,
म स्वास्नी बन्न सक्दिन ।
शब्दकोषमा स्वास्नीको अर्थ सुवासिनी लेखिएजस्तै,
प्रेमले बोलिने प्रेमिका र शास्त्रमा मानिने अर्धाङ्गिनीजस्तै,
जिवनको आवश्यकता जीवनसाथी,
तर..
जो साथै भएकाबाट पनि
पाउनुपर्ने सहारा मिल्दैन भने,
भो महासय,
तिम्रो कामुकता मेटाउन मात्र …
म स्वास्नी बन्न सक्दिन ।
हर कोही नारीको जिन्दगी तयारी चाउचाउ होइन
भोक लागेको बेला काँचै खान,
र होईन पनि बाँदरको सिरानी ….
निद पुर्याएर च्यात्ने फाल्ने ,
त्यसैले त ,
मलाई स्वयं म हुनुको अर्थ खोज्नुछ ,
भयो अब
खोक्रो तिम्रो देखावटी रक्षाशास्त्र आफैंसँगै राख ,
जर्जर समाजको सामन्ती बकपत्र सुन्नुछैन मलाई ,
निदाउनकै लागि स्लीपिङ ट्याब्लेट खानुपनि छैन,
मलाई त केबल,
निर्दयी मान्छेका बन्द आँखा खोलेर,
अन्धो धृतराष्ट्रलाई,
नारीभित्रकी आमा, प्रीया, छोरी चिनाउनु छ,
प्रेम, आफ्नोपन र मानवीयता पढाउनुछ ,
त्यसैले ….
माफ गर प्रीय
म कोही कसैको भोक र मृगतृष्णा मेटाउन मात्र
स्वास्नी बन्न सक्दिन ,
जरुर, म स्वास्नी बन्न सक्दिन।
नुवाकोट
