चितवन । कवि गणेश श्रमणको `आगो लिएर गाउँ गाउँमा´ कवितासङ्ग्रहको गृह विमोचन गरिएको छ । बुधबार कविहरू एलबी क्षेत्री, केदारनाथ खनाल, उदय अधिकारी, रमेश प्रभात र डाक्टर हेमनाथ घिमिरेले उक्त पुस्तककाे विमोचन गरेका हुन् ।
सम्पूर्ण किताब नारायणगढमा गरिएकाे विमाेचनमा कार्यक्रममा बोल्दै समीक्षक रमेश प्रभातले कवि गणेश श्रमण गतिशील व्यक्तित्वका लेखक भएको बताए । `गाउँको परिवेशमा रमाउन जानेका कविले ‘आगो लिएर गाउँ गाउँमा’ कवितासङ्ग्रहमा गाउँको चित्रण गरेका छन्’ प्रभातले भने । विभिन्न बाहना बनाएर गाउँका मानिसहरू सहर पस्नेक्रम हिजोदेखि आजसम्म निरन्तर रहेको धारणा राखेको समीक्षक प्रभातले बताए । `यसले गर्दा गाउँ रित्तो रित्तो भएको छ । यसरी रित्तो भएको गाउँमा विकास कसरी सम्भव हुन्छ ? भनेर कविले खोतल्ने काम गरेका छन् ।´, उनले भने ।
त्यसैगरी अर्का समीक्षक उदय अधिकारीले कवि गणेशका कविता सरल र स्पष्ट भएको धारणा राखे । `समाज र राजनीतिको सरल चित्रण उनका कवितामा देख्न पाइन्छ । उनले कवितामार्फत यी कुरा प्रष्टरूपमा उल्लेख गरेका छन् ।´, अधिकारीले भने ।
त्यसैगरी कविडाँडा साहित्य समाजका अध्यक्ष एलबी क्षेत्रीले गणेशका कवितामा समेटिएका विषयवस्तु फराकिलो रूपमा आएको बताए । उनले गणेशका कविता काव्यिक मात्रै नभएर आख्यानका रूपमा पनि पढ्न सकिने बताए । भरतपुर महानगर प्रज्ञाप्रतिष्ठानका सदस्यसचिव बालकृष्ण थपलियाले गणेशका कविता उत्कृष्ट भएको प्रतिक्रिया दिए । `कविले कवितामा मेहनत गरेका छन् । पाठकलाई वास्तविक कविताको स्वाद पस्किन कवि सफल देखिएका छन् ।´, थपलियाले भने ।
कार्यक्रमका सभापति सम्पूर्ण किताबका प्रमुख लेखराम सापकोटाले कवि गणेश श्रमणका कवितामा काव्यिक रस भएको बताउँदै कविता पारखीले यो सङ्ग्रह चाख दिएर पढ्ने अनुमान गरे । गणेशका कविताहरूले राष्ट्रिय रूपमा चर्चा बटुल्ने पनि सापकोटाले दाबी गरे । कार्यक्रममा चितवन साहित्य परिषद्का अध्यक्ष केदारनाथ खनालले पनि शुभकामना मन्तव्य राखेका थिए । कार्यक्रमलाई प्राध्यापक एवम् सञ्चारकर्मी गोविन्द रिमालले सहजीकरण गरेका थिए ।
नेपाली कविता र लघुकथाका क्षेत्रमा क्रियाशील रहेका लेखक गणेश श्रमणको पहिलो प्रकाशित कृति ‘शब्दहरू अविराम यात्रामा’ हो । २०५७ सालमा प्रकाशित यो संयुक्त कवितासङ्ग्रहमा कवि गणेशसँगै सुरेन्द्र अस्तफल, नवराज ढुंगाना, प्रभा बराल, रमेश प्रभात, दीपकप्रसाद गौतम, लक्ष्मी ढकाल बास्तोला, गोपाल पौडेल, प्रकाश थापा र बुद्धिनाथ अधिकारीका पनि कविता छन् । त्यसपछि एकल कविताका कृतिहरू ‘शब्दक्रान्ति’ (२०६६) र ‘आगो लिएर गाउँ गाउँमा’ (२०८०) हुन् । त्यस्तै उनको लघुकथाको कृति ‘गुलियो काठमाडौँ’ (२०७५) प्रकाशित छ ।
मकवानपुर । कैलाश गाउँपालिकाले भीमफेदी कारागारका कैदीबन्दीलाई खाद्यान्न सहयाेग गरेकाे छ । नेपालीहरुको महान चाड दशैंकाे उपलक्ष्यमा पालिकाले खसी र खाद्यान्न कारागारका कैदीबन्दीलाई उपलब्ध सहयाेग गरेकाे हाे ।
पालिका अध्यक्ष लोकबहादुर मुक्तान र उपाध्यक्ष बालकुमार मल्ल ठकुरीले दशैंकाे लागि २ वटा खसी, चिउरा र तेल कारागारलाई हस्तान्तरण गरेका हुन् । अध्यक्ष मुक्तान गाउँपालिकाका कर्मचारीसहितको टोलीले कारागारमा रहेका कैदीबन्दीसँग भेटघाट गरि शुभकाकना आदानप्रदान समेत गरेका थिए । अध्यक्ष मुक्तानले कारागारमा रहेकासँग भ्रातृत्वको सम्बन्ध स्थापित गर्न र कैदीबन्दीमा सकारात्मक भावना जागृत गराउन शुभकामना आदानप्रदान गरी खसी र खाद्यान्न उपलब्ध गराइएको बताए ।
कार्यक्रममा पालिका लेखा प्रमुख नविन धिताल, रोजगार संयोजक अर्पण लामा, १० नम्बर पुर्ववडाध्यक्ष माणिकलाल मुक्तान लगायतको उपस्थिति थियो । २ वटा पुरुष ब्लक र १ वटा महिला ब्लक रहेको कारागारमा हाल १ हजार ३८ पुरुष, ३७ महिला कैदीबन्दी र २ जना आश्रित नाबालक रहेका छन् ।
मकवानपुर । सरकारले यस वर्षको राष्ट्रिय भिटामिन ‘ए’ कार्यक्रम आगामी कात्तिक १७ र १८ गते सञ्चालन गर्ने भएको छ ।
सरकारले प्रत्येक वर्ष पहिलो चरणमा कात्तिक २ र ३ गते तथा दोस्रो चरणमा वैशाख ६ र ७ गते गरी २ पटक सो राष्ट्रिय भिटामिन ‘ए’ कार्यक्रम सञ्चालन गर्दै आइरहेको छ । बालबालिकामा हुनसक्ने स्वास्थ्य जटिलता तथा कुपोषणको जोखिम न्यूनीकरण गर्नका लागि सरकारले २०५० सालदेखि राष्ट्रिय भिटामिन ‘ए’ कार्यक्रम सञ्चालन गर्दै आएको छ । जुकाको औषधि भने २०५६ बाट खुवाउन थालिएको हो ।
यस वर्ष दशैं परेका कारण पहिलो चरणको कार्यक्रम कात्तिक १७ र १८ गते तय गरिएको स्वास्थ्य सेवा विभागले जनाएकाे छ । विभागका अनुसार २ दिने अभियानमा ६ देखि ५९ महिनाका करिब ३२ लाख बालबालिकाहरुलाई भिटामिन ‘ए’ क्याप्सुल खुवाइने छ । यसैगरी १ देखि ५ वर्षसम्मका २९ लाख भन्दा बढी बालबालिकाहरुलाई जुकाको औषधि खुवाइने छ ।
आफ्नो घर नजिकको खोप केन्द्रमा लगेर बालबालिकाहरुलाई भिटामिन ‘ए’ र जुकाको औषधि खुवाउन सकिन्छ । यो कार्यक्रममा देशभरिका ५२ हजार स्वास्थ्य स्वयंसेविका र १५ हजार स्वास्थ्यकर्मीलाई परिचालन गरिने विभागले जानकारी दिएकाे छ ।
स्वास्थ्य मन्त्रालयले भिटामिन ‘ए’ कार्यक्रम सफल बनाउन सातवटै प्रदेश सरकार अन्तर्गतका सामाजिक विकास मन्त्रालय र स्थानीय तहलाई परिपत्र गरिसकेको छ ।
मकवानपुर । मकवानपुरको बागमती गाउँपालिकामा आफ्नै दाइमाथि खुकुरी प्रहार गरी घाइते बनाएकाे आराेपमा भाइलाई प्रहरीले पक्राउ गरेकाे छ । बागमती वडा नं.९ बेतिनी अगौटेमा आफ्नै दाजुमाथि खुकुरी प्रहार गरी फरार रहेका भाइलाई प्रहरीले मंगलबार पक्राउ गरेको हाे ।
मकवानपुर । बागमती प्रदेश सरकारका मुख्यमन्त्री शालिकराम जम्कट्टेलले प्रहरी समायोजन छिट्टै गरिने भएकाेले समस्या समाधान हुने बताएका छन् । बागमती प्रदेश प्रहरी कार्यालय हेटौंडाले ६८ औं प्रहरी दिवसको अवसरमा आयोजित कार्यक्रमलाई सम्बोधन गर्दै मुख्यमन्त्री जम्कट्टेलले यस्ताे बताएका हुन् ।
प्रहरी समायाेजन ऐन मार्फत प्रदेश सरकारको मातहतमा प्रहरी संगठन आएपछि मातहतका निकायलाई रुपान्तरण गर्दै लैजान सजिलो हुने मन्त्री जम्कट्टेलले बताए । आफूहरुले संविधानमा रहेको अधिकार अनुसार काम गर्दा संघीय कानूनले व्यवधान देखाएकाले प्रहरी समायाेजन समेत हुन नसकेकाे उनकाे भनाइ थियाे ।
‘शान्ति सुरक्षा र अमनचयनमा नेपाल प्रहरीले खेलेको भूमिकाकाे उच्च सम्मान रहेको छ’ मन्त्री जम्कट्टेलले भने ‘प्रहरी संगठनलाई रुपान्तरण गर्दै अझ सुदृढ बनाउनु पर्छ ।’ नागरिकले सबैभन्दा पहिला प्रहरीलाई खोज्ने हुदाँ प्रहरीप्रतिको विश्वास जन मानसमा रहनु पर्ने उनले बताए । उनले विभिन्न आन्दोलनमा वीरगति प्राप्त गर्ने अमर प्रहरीहरुलाई सम्मान व्यक्त गर्दै देशको विभिन्न आन्दोलनहरुमा अग्रभागमा शान्ति सुरक्षाको लागि भूमिका निर्वाह गर्ने प्रहरी संगठनप्रति आभार व्यक्त गरे ।
पछिल्लो समय सामाजिक सञ्जालहरुले सकारात्मक भन्दा पनि नकरात्मक प्रचारलाई बढी प्राथमिकता दिएको भन्दै यसले सुरक्षा निकायमा चुनौति थपिएको उनले बताए । ‘प्रहरी सेवालाई संख्यात्मक मात्र होइन प्रविधिको प्रयोग गरेर अपराध नियन्त्रण गर्न लाग्नुपर्छ’ मन्त्री जम्कट्टेलले भने ।
प्रदेश सरकारका आन्तरिक मामिला तथा कानून मन्त्री गंगानारायण श्रेष्ठले प्रदेशको शान्ति सुरक्षामा प्रहरी संगठनले खेलेको भूमिकाप्रति सम्मान व्यक्त गरे । सबैको त्याग तपस्या र संघर्षबाट ल्याइएको व्यवस्थालाई अपनत्व लिनु पर्ने उनकाे भनाइ थियाे । कार्यक्रममा पूर्व प्रहरी हवल्दार डम्बर बहादुर सापकोटा(खत्री)लाई सम्मान गरिएको थियो । यसैगरी प्रदेश प्रहरीका उत्कृष्ट कर्मचारीहरुलाई नगद सहित सम्मान गरिएको थियो । साथै विभिन्न स्थानीय तह, समाजसेवी, सञ्चारक्षेत्र र संघसंस्थालाई सम्मान गरिएको थियो ।
कार्यक्रम प्रदेश प्रहरी प्रमुख प्रहरी नायव महानिरीक्षक किरण राणाको अध्यक्षतामा भएको थियो ।
