मकवानपुर । बागमती प्रदेश सामाजिक विकासमन्त्री कुमारी मोक्तानले आफ्नो कार्यकालमा भएको उपलब्धी सार्वजनिक गरेकी छन् । मन्त्री मोक्तानले सोमबार मन्त्रालयमा आफ्नो कार्यकालमा भएको मुख्य–मुख्य कार्य विवरण समेटिएको पुस्तक सार्वजनिक गरेकी हुन् ।
सार्वजनिक पुस्तिकामा मन्त्रालयको कार्य क्षेत्र भित्र पर्ने शिक्षा, गरिबी निवारण, महिला तथा बालबालिका, ज्येष्ठ नागरिक, अपांगता भएका व्यक्ति, सामाजिक सुरक्षा, सीपमूलक तालिमको विषयमा भएको कार्य समेटिएको छ । सो क्रममा उनले आफ्नो कार्यकालमा शिक्षा क्षेत्र सुधारमा उल्लेखनीय प्रगति भएको दाबी गरिन् ।
यसैगरी, प्रदेशका ३५ वटा स्थानीय तहसँगको साझेदारीमा गृहिणी महिला सशक्तिकरण कार्यक्रम सञ्चालन भइरहेको प्रकाशित पुस्तकमा उल्लेख छ । चेपाङ समुदायको उत्थानका लागि प्रदेशका ६ वटा स्थानीय तहमा चेपाङ, चमेरो र च्यूरी संरक्षण कार्यक्रम सुरु उनको भनाई छ ।
उनी नेकपा माओवादी केन्द्रकाे तर्फबाट दोश्रो कार्यकालकाे लागि २०७९ माघ ११ गतेबाट मन्त्री भएकी हुन् । साउन ६ गते प्रदेश मुख्यमन्त्री शालिकराम जम्कट्टेलले पदबाट राजिनामा दिएसँगै उनकाे समेत पदावधी समाप्त भएकाे छ ।
चितवन । चितवनकाे पर्यटकीय नगरी सौराहमा चन्द्रमा होटल एण्ड रेष्टुरेण्ट सञ्चालनमा आएको छ । जापानमा होटल व्यवसाय गर्दै आएका चितवनका युवा व्यवसायी चेतराम गैरेले सौराहमा ७ करोड लगानीमा सुविधा सम्पन्न होटल सञ्चालनमा ल्याएका हुन्।
भरतपुर महानगरपालिका वडा नं. ९ शरदपुरका व्यवसायी गैरेले रत्ननगर वडा नं. ६ साैराहामा १७ काेठे सुविधा सम्पन्न हाेटल सञ्चालनमा ल्याएका हुन् । हाेटलकाे आइतबार राष्ट्रिय आविस्कार केन्द्र नेपालका अध्यक्ष डा. महाविर पुनले उद्धघाटन गरे । उनले साैराहाका हाेटलहरूले गुणस्तरीय सेवा सुबिधामा दिनुपर्ने बताए ।
२००९ सालबाट जापानकाे टाेकियाेमा व्यवसाय सुरू गरेका गैरेले नेपालकाे तेस्राे पर्यटकीय नगरी साैराहामा सुबिधा सम्पन्न हाेटल सञ्चालनमा ल्याएका हुन् । टोकियोमा पनि चन्द्रमा रेस्टुरेन्ट सञ्चालन गरिरहेका गैरेले विदेशको कमाई स्वदेशमै लगानी गर्न एउटै नामबाट सौरामा होटल व्यवसाय सञ्चालन गरेको बताए।
होटलमा एसीसहितका सुबिधा सम्पन्न कोठा, बिदेशी तथा आन्तरिक पर्यटकलाई स्वादिष्ट परिकारको व्यवस्था रहेको सञ्चालक गैरेले बताए । गैरेले पुनले लेखेका १०० वटा पुस्तक होटेलमा लाइब्रेरीको रुपमा राख्ने जानकारी दिए। उनले उक्त किताब बापत नेपाल आविष्कार संघलाई १ लाखको चेक हस्तान्तरण गरे।
गैरेको अध्यक्षतामा भएकाे उद्घाटन कार्यक्रममा रत्ननगर ६ का वडा अध्यक्ष किरण महतो, रेवान सौराहाका अध्यक्ष ध्रुव गिरी, क्षेत्रीय होटल संघ सौराहाका अध्यक्ष गंगा गिरी बाघमार वनका अध्यक्ष जितबहादुर तामाङ व्यवसायी तथा समाजसेवी पुरूषोत्तम लामिछाने,रेवानका पूर्व अध्यक्ष गोकर्ण गिरी, नेचर गाईड एसोशियसनका अध्यक्ष अनिल गुरूङ, बछौली प्रहरी चौकी प्रमुख श्याम थापालगायतकाको सहभागिता रहेको थियो ।
काठमाडौ । खेमनाथ दाहालको कृति ‘सिर्जनामा दृष्टि’को लोकार्पण गरिएको छ। काठमाडौंमा शनिबार साहित्यिक पत्रकार संघको आयोजनामा भएको कार्यक्रममा स्रष्टा दाहलको उक्त कृति लोकार्पण गरिएको हो ।
संघका अध्यक्ष राधेश्याम लेकालीको सभापतित्वमा भएको कार्यक्रममा इतिहासविद् प्राडा सुरेन्द्र केसी, कृति सर्जक खेमनाथ दाहाल, कलाकार मदनदास श्रेष्ठ, पत्रकार पुरुषोत्तम दाहाल, सामालोचक प्राडा कृष्णप्रसाद दाहाल, समीक्षक डा.यज्ञश्वर निरौला, गीतकार सोभित उप्रेती, डा.गोविन्दमान सिंह कार्की, उषा दाहाललगायतले उक्त कृतिको लोकार्पण गरेका हुन् ।
विभिन्न साहित्यकार र विद्वानहरूले दाहालको लेखन शैली र योगदानको प्रशंसा गरे। कृतिको समीक्षा गर्दै यज्ञश्वर निरौलाले दाहालको साहित्य क्षेत्रमा नयाँ परिचय स्थापित गरेको बताए। यस्तै, समालोचक कृष्णप्रसाद दाहालले ‘स्रष्टा दाहालले नियात्रा, उपन्यास र कवितामा आफूलाई प्रस्तुत गर्दै आएको बताए । ‘सिर्जनामा दृष्टि’मा स्रष्टा दाहालले भूमिका लेखनमा कृतिलाई न्याय गरेको आफूले पाएको उनले बताए ।
समालोचक प्रमोद प्रधानले दाहालको व्यक्तित्व र कृतित्वका बारेमा आफू परिचित रहेको बताउँदै उहाँको नियात्रा ‘यात्राको सिकर्नीमा’मा आफूले समीक्षा लेखेको सम्झना गर्दै उहाँ सधैं सक्रिय तर चर्चामा आउन नचाहने साहित्यकार रहेको आफूले पाएको बताए । ‘उहाँको साहित्यमा जीवन र दर्शनका साथै हाम्रो परिवेश पाइन्छ । उहाँ सक्रिय रूपमा साहित्य साधानमा तल्लिन हुनुहुन्छ र चर्चाबाट टाढा रहन मन पराउनुहुन्छ’ प्रधानले भने ।
पुरुषोत्तम दाहालले स्रष्टा दाहालसँग आफू सानोछदादेखि नै परिचित भएको बताउदै नेपाली साहित्यको श्रीवृद्धिमा सिक्किम, दार्जिलिङको ठूलो योगदान रहँदै आएको भनाई राखे । कृति ‘सिर्जनामा दृष्टि’मा रहेका भूमिकामध्ये केही आफूले अध्ययन गरेको बताउँदै स्रष्टा दाहालको लेखनमा वेजोडको कलात्मकता रहेको बताए । कलाकार मदनदाश श्रेष्ठले भाषा, साहित्य कला र संस्कृतिले हामीलाई जीवन्त बनाइ राख्ने बताउँदै यसको संरक्षण, सम्बद्र्धनमा सबैले आ–आफ्नो स्थानबाट भूमिका निभाउनुपर्ने धारणा राखे ।
सुरेन्द्र केसीले समसामयिक देशको परिस्थितिको चर्चा गर्दै देशमा देखिएका तमाम विकृतिलाई पनि सर्जकहरूले उजागर गर्नुपर्ने धारणा व्यक्त गरे । ‘देशको राजनीतिक परिस्थिति राम्रो हुँदामात्र सबैतिर राम्रो हुन्छ, कठिन परिस्थितिमा पनि सर्जकहरू निरन्तर आफ्ना सधानामा तल्लिन रहेका छन् तर राज्यनिरीह छ । हामी सबैले आ–आफ्नो कर्त्व्य पूरा गर्नुपर्छ’ उनले भने ।
साहित्यकार लेकालीले स्रष्टा सर्जकले आफ्नोे सिर्जनमा मौलिकतालाई प्राथकितमा राख्नुपर्ने बताए । पछिल्लो समयमा भएका साहित्यिक गतिविधि, सम्मान र पुरस्कारको चर्चा गर्दै साहित्यिक पत्रकार संघले त्यसको समन्वय गर्दै अघि बढिरहेको उनले जानकारी दिए ।
उक्त कार्यक्रममा सर्जक दाहललाई सम्मान गरिएको थियो । दाहालले आफ्नो मूल विधा काव्य रहेको स्वीकार गर्दै नयाँ उपन्यासको तयारीमा रहेको जानकारी दिए।
३५६ पेजको ‘सिर्जनमा दृष्टि’मा पुण्यप्रसाद शर्मा (सिक्किम)को ‘विश्वका सर्वश्रेष्ठ कविताहरू’, लेखनाथ पोखरेलका ‘फकलीको गाउँ’, मार्वल हाउसकी शालिनी र चिबे नकटो’, विमला ढुंगना निरौला (अमेरिका)को ‘यात्रामा देश’, वसन्त श्रेष्ठ (अमेरिका)को ‘अंगालो भरिको अनुभूति’, डा.डीआर उपाध्यायको ‘कसुर’, मिलन शाह शंकरको ‘कर्ना’, जनक रावलको ‘खाटा बसेको घाउ’, मायादेवी गुरुङ (बेलायत)को ‘ऐना’, अनुशाह (अमेरिकाको) ‘अनुराग’, गोपाल भण्डारी (अमेरिका)को ‘गोपाल भण्डारीका छन्द कविताहरू’, गीता अधिकारीको ‘मैले पढेका ५१ पुस्तक’, लक्ष्मी श्रेष्ठ ‘सगरमाथाको आर्तनाद’, ईश्वरीप्रसाद भुसालको ‘अर्पण’ र राजु सिटौला (अमेरिका)को ‘जीवन मृत्यु’जस्ता १६ कृतिका भूमिका समावेश छन् । कृतिको सम्पादन रमेश दाहालले गरेका छन।
दाहालका कवितासंग्रह ‘श्रद्धाञ्जलि’, खण्डकाव्य ‘रश्मी’, काव्य ‘योद्धा’, कवितासंग्रह ‘हावर्डको चौतारीमा’, महाकाव्य ‘स्वेतपत्र’, कवितासंग्रह ‘म त बन्दी भएको छु’, नियात्रा ‘यात्राको सिकिर्नी’, उपन्यास ‘अहोरात्र’ लगायका कृति प्रकाशित छन् । उनको मिलाप, जनमत, बगरजस्ता पत्रिकामा कभर स्टोरी प्रकाशित हुनुका साथै ‘नव छायाँवादको छवि’, ‘खेमनाथ दाहाल : सिर्जना र मूल्यांकन’, ‘समालोचना वृतमा खेमनाथ दाहाल’ जस्ता कृति प्रकाशित छन् ।
गीतकार गणेश सुवेदीले सहजीकरण गरेको कार्यक्रममा साहित्यकार, पत्रकार,विभिन्न क्षेत्रका व्यक्तिहरुको उपस्थिति थियो। उक्त कृति जनपक्ष प्रकाशन सिक्किमले प्रकाशन गरेको हो ।
मकवानपुर । बागमती प्रदेशका मुख्यमन्त्री शालिकराम जम्कट्टेलले पदबाट राजीनामा दिएका छन् ।
आइतबारको प्रदेशसभा बैठकमा एक घण्टा सम्बोधन गर्दै विश्वासको मत नलिने तर मार्ग प्रसस्त गर्ने घोषणा गरेका मुख्यमन्त्री जम्कट्टेलले प्रदेश प्रमुख यादव चन्द्र शर्मासमक्ष राजीनामा बुझाएका हुन् ।
प्रदेश सभाबाट प्रदेश प्रमुख कार्यालय पुगेर मुख्यमन्त्री जम्कट्टेलले राजीनामा बुझाएका छन् । केन्द्रमा सत्ता समीकरण फेरिएसँगै अल्पमतमा रहेका उनले प्रदेश सभाबाट विश्वासको मत नपाउने निश्चित भएपछि राजीनाको बाटो लिएका हुन् ।
विश्वासको मतको लागि भन्दै प्रदेश सभा बैठक आइतबारको लागि आव्हान गर्न लगाएका उनले आफ्नो कार्यकाल भएका कामको फेहरिस्ता सुनाएका थिए । असार २४ गते एमाले सरकारबाट बाहिरिए संगै अल्पमतमा परेका उनी राजिनामा नदिने तर प्रदेश सभाको सामना गरेर अघि बढने बताउदै आएका थिए । आफ्नो कुरा प्रदेश सभाको रेकर्डको लागि सभा रोजेको बताउदै उनले राजिनामा रोजेका हुन् । गत २०७९ पुस २५ मा जम्कट्टेल मुख्यमन्त्रीमा नियुक्त भएका थिए ।
नयाँ सरकार गठन गर्न आव्हान
मुख्यमन्त्री जम्कट्टेलको राजिनामा संगै बागमतीमा नयाँ सरकार गठनको बाटो खुलेको छ । प्रदेश प्रमुखबाट नयाँ सरकार गठनको आइतबार आव्हान गरेका छन् ।
प्रदेश प्रमुखबाट प्रदेश सभामा प्रतिनिधित्व गर्ने दुई वा दुई भन्दा बढी दलको समर्थनमा बहुमत प्राप्त गर्न सक्ने प्रदेश सभा सदस्यलाई मुख्यमन्त्री नियुक्त गर्न साउन ८ गते बेलुका ५ बजेसम्मको समय तोकी आव्हान गरेका हुन् ।
अब बागमतीमा नेपाली काग्रेसको नेतृत्वमा एमालेसहितको दलको प्रतिनिधित्व हुने गरि सरकार गठनको प्रक्रिया अगाडि बढ्ने छ ।

मकवानपुर । पछिल्लो पटक १८ महिना बागमती प्रदेश सरकारको नेतृत्व गरेका नेकपा माओवादी नेता तथा प्रदेशका मुख्यमन्त्री शालिकराम जमकट्टेलले बागमती प्रदेश सभामा एक घण्टा सम्बोधन गर्दै अर्को सरकार गठनलाई मार्ग प्रसस्त गरेका छन् ।
आइतबार उनले विश्वास मत लिने कार्य सूचिमा रहेको भए पनि बदलिएको सत्ता समीकरण अनुसार विश्वासको मतमा प्रवेश नै नगरी नयाँ सरकार गठनको लागि मार्ग प्रसस्त गरेका हुन् । यसअघि प्रदेश सभाको फेस गर्ने तर राजिनामा नदिने बताउदै आएका जम्कट्टेलले सम्बोधनको अन्तमा नयाँ सरकार गठनको लागि मार्ग प्रसस्त गरेको घोषणा गरे।
“सरकारमा रहनको लागि विश्वासको मत पाउनु पर्छ” उनले भने । संसदको पहिलो र दोस्रो ठुला दलहरु मिलेर सरकार बनाउने स्थिती बनिसकेको अवस्थामा आफूले लिने विश्वासको मतले सार्थकता पाउने अवस्था नभएको भन्दै उनले विश्वासको मत नलिने र समिकरण अनुसार नयाँ सरकार बनाउनको लागि मार्ग प्रसस्त गर्ने सभालाई जानकारी गराए ।
आइतबारको संसदमा उनले आफ्नो नेतृत्वमा गरेको सरकारी कामको बचाउ गर्दा एक घण्टा सम्बोधन गरेका थिए । आफ्नो कार्याकालमा संदसभित्र प्रतिपक्षिदलले अमर्यादित हर्कतहरु गरेको आरोप लगाउँदै काम चलाउ सरकारका मुख्यमन्त्री जमकट्टेलले अब माओवादी प्रतिपक्षमा हुदाँ आफूहरुले मर्यादा ‘क्रस’ नगर्ने घोषणा गरे ।
जम्कट्टेलले देशलाई द्वन्द्वमा फसाउने काम नयाँ गठकन्धनबाट भइरहेको टिप्पणी गरे । संविधान संशोधनको नाममा २ ठुला दलले देशलाई इतिहासमा फर्काउने काममा अग्रसर भएको जम्कट्टेलले बताए ।
प्रदेशसभा बैठकमा धारणा राख्दै जम्कट्टेलले दुई ठुला दलले अदृश्य सहमति गरेर समावेशी सहभागिता हटाउने प्रयत्न भएको बताए । राजनीतिक स्थिरताको नाममा संविधान संशोधन गरेर उत्पीडित वर्गको अधिकार माथि हस्तक्षेप गर्न नयाँ समीकरणका दलहरू अघि बढेको उनको भनाई छ ।
दुई ठुला दलले अदृश्य रूपमा राजनीतिक सहमती छोपेर राखिएको उनले बताए । दलले गर्ने राजनीतिक सहमति गोप्य नहुने र जनतालाई ढाँट्न दलहरूले राजनीतिक सहमति गरेको उनले स्पष्ट पारे । मुख्यमन्त्री जम्कट्टेलले बहुमत हुँदैमा सरकार निरन्तर नजाने दाबी गर्दै अब बन्ने मन्त्रीहरुको कार्यकाल बढीमा ४ महिना हुने ठोकुवा गरे ।
संविधान संशोधन गरे समानुपातिक निर्वाचन प्रणाली हटाउने प्रयत्न भएको भन्दै उनले भने “निर्वाचन प्रणाली परिवर्तन गरेर समावेशिता हटाउने काममा दुई ठुला दलहरू लागेका छन् ।” निर्वाचन प्रणाली फेर्ने नै भए पूर्ण समानुपातिक प्रणालीमा अघि बढ्नुपर्ने उनले बताए । “यसले नेपाललाई अग्रगामी रूपमा स्थायित्व दिन सक्छ । संशोधन नै गरेर कार्यकारी भूमिकामा जान तयार हुनुपर्छ” उनले भने ।
मुख्यमन्त्री जम्कट्टेलले राष्ट्रिय सहमति अंक गणित नभएको बताए । संसद्भित्र र बाहिर रहेका सरोकारवालाको सहमति नै राष्ट्रिय सहमति भएको उनको भनाई छ । प्रदेशलाई अधिकार आउँछ भन्नेमा विश्वस्त नरहेको उनको भनाई छ । अहिलेको समीकरणले प्रदेशलाई अधिकार दिने र संघीयता बलियो नबनाउने उनले बताए ।
मन्तव्यको अन्तमा जमकट्टेलले नयाँ सरकारको लागि मार्ग प्रसस्त गरेपछि सभामुख भुवन पाठकले कार्य सूचिमा भएको विश्वासको मत लिने कार्यक्रम कार्य सूचिबाट हटाएका थिए । बैठक अर्को सूचना जारी नभएसम्मको लागि स्थागित गरिएको छ ।
मुख्यमन्त्री जम्कट्टेलले आइतबार नै प्रदेश प्रमुख समक्ष राजीनामा बुझाउने बताइएको छ । उनको राजिनामा पछि प्रदेश प्रमुखले नयाँ सरकार गठनको लागि आव्हान गर्नेछन् ।