मकवानपुर । हिन्दु धर्मावलम्बीले तुलसीको दामोदरसँग विवाह र विशेष पूजा गरी मनाइने हरिबोधिनी ठुलो एकादशी पर्व आज मनाइँदैछ। ठूलो एकादशी अर्थात् हरिबोधनी एकादशी वर्षमा पर्ने चौबीसवटा एकादशीमध्ये सबैभन्दा ठूलो एवं महत्वपूर्ण एकादशीकाे रुपमा मानिने भएकाेले यसलाई ठूलो एकादशी पनि भनिन्छ। हिन्दू धर्ममा एकादशीलाई भगवान् विष्णुको उपासना गर्ने पर्वको रूपमा लिइन्छ।
कार्तिक शुक्ल एकादशीका दिनमा भगवान् विष्णुको प्रतीकका रुपमा तुलसीको पुजा गरि मनाउने गरिन्छ । आज देशका सबै जसो नारायण मन्दिरहरुमा पुजाआजा गरि मेला लाग्ने गर्दछ । मकवानपुरको भैसे स्थित त्रिखण्डीमा बिशेष मेला लाग्ने गरेको छ । यो पटक कोरोनाको कारण स्थानीय प्रशासनले मेला पर्व जात्रा नमनाउन आग्रह गरेकोले नारायण मन्दिर हरु सुनसान हुनेछन् ।
यस वर्ष बुधबार र बिहीबार दुई दिन एकादशी परेकाले स्मृतिमा आधारित भई धार्मिक कर्म गर्नेले अघिल्लो दिन र वेदमा आधारित भई धार्मिक काम गर्नेले बिहीबार एकादशी व्रत गरी विशेष पूजा आराधना गर्दैछन्। आषाढ शुक्ल एकादशी अर्थात् हरि शयनी एकादशीका दिनमा क्षीरसागरमा सुतेका विष्णु ब्युँतिने भएकाले आजको एकादशीलाई हरिबोधिनी वा प्रवोधिनी एकादशी पनि भनिन्छ। हरि शयनीदेखि हरि बोधिनी एकादशीका दिनसम्म चार महिना विष्णुका भक्तले तुलसीको व्रत गरी विशेष पूजा गर्दछन्।
विष्णु क्षीर सागरमा सुतेकाले यी चार महिना विवाह व्रतबन्ध जस्ता माङ्गलिक कार्य नगरिने परम्परा छ। यस समयमा खोला, नदीनालामा बाढीपहिरो आउने र सर्पजस्ता जीवको भयका कारण यात्रा नगर्नु शुभ मानिन्छ। हरिशयनी एकादशीका दिन घरघरमा रोपेर विशेष पूजा गरिएको तुलसीको मठमा गाईको गोबर र रातो माटोले पोतेर सिँगारी फूल मालाले सजाएर विवाह गरिन्छ। तुलसी विष्णुप्रिया भएकाले यस दिन तुलसीको दामोदरसँग विवाह गर्ने परम्परा बसेको हो। तुलसीको मठ नजिकै विष्णुको प्रतीकका रुपमा निगालाको लिङ्ग गाडेर विधिपूर्वक पूजा गरिन्छ। कार्तिक महिनाभर सबै देव देवी तुलसीमै निवास गर्छन् भन्ने धार्मिक विश्वास छ।
आदिकालदेखि पूजाको परम्परा बसेको तुलसीको महिमा वैज्ञानिकरुपमा पनि लाभदायक प्रमाणित भएको छ। यसैले तुलसीको मठ हुने घरलाई तीर्थ समान मानिन्छ। तुलसीको सुगन्धले दश दिशा पवित्र हुन्छ भनिन्छ। तुलसीको पूजा गरिएको घरमा यमदूत पनि पस्दैनन् भन्ने आस्थाका कारण हिन्दू धर्मावलम्बीले घरमा तुलसीको मठ बनाउँछन्। तुलसीको पात, डाँठ वा फूलको रस रुघाखोकी, औलोलगायत रोगका लागि औषधि हुन्छ। यो रस शरीरमा लगाएर सुतेमा लामखुट्टेले टोक्दैन। तुलसीको मठ भएको स्थल वरपर विषालु सर्प पनि आउँदैन। मठको वरपर बहने हावाले विषालु कीटाणुलाई नष्ट गर्दछ। शरद ऋतुभर सबै प्राणीका लागि तुलसीलाई महा औषधि मानिन्छ।
तुलसीबाट बनेको चिया मानव शरीरमा रोग प्रतिरोधी क्षमता वृद्धि गर्न उपयुक्त मानिन्छ। कोरोनाबाट बच्न तुलसीको चिया नियमित सेवन गर्नाले लाभ मिल्ने चिकित्सक बताउँछन । कार्तिक महिनामा तुलसीको माला लगाउँदा र एक लाख तुलसी पत्र विष्णुलाई अर्पण गर्दा मनोकाङ्क्षा पूरा हुन्छ भन्ने विश्वास छ। गरुड पुराणमा उल्लेख भएअनुसार यस महिनामा एउटा तुलसी पत्र भगवान् विष्णुलाई अर्पण गर्दा १० हजार गाई दान गरे बराबरको फल मिल्दछ।
आजको दिन अन्न खान नहुने भएकाले सखरखन्ड, पिँडालु र वनतरुल उसिनेर फलाहार गरिन्छ। यसरी व्रत गरेमा पापको नाश भई पुण्य वृद्धि हुने र मोक्ष प्राप्ति हुन्छ भन्ने धार्मिक विश्वास छ। ठूलो एकादशी पनि भनिने आजको एकादशी व्रतले हजार अश्वमेध यज्ञ तथा राजसूय यज्ञ गरे बराबरको फल पाइने शास्त्रीय मान्यता छ। कार्तिक महिनामा भगवान् विष्णुलाई भक्तिपूर्वक सम्झी गरिएको स्नान, दान, जप र होमले फल पाइने एवम् सय जन्मका पापबाट मुक्ति मिल्ने प्रसङ्ग विभिन्न ग्रन्थमा वर्णन गरिएको छ।
मकवानपुर । निजामती कर्मचारीको आधिकारिक ट्रेड युनियनको निर्वाचन पुनः स्थगित भएको छ। कोरोनाको जोखिम देखाउदै बुधबारको मन्त्रिपरिषद् बैठकले आउँदो मङ्सिर २७ गते हुने भनिएको निर्वाचन स्थगन गर्ने निर्णय गरेको हो।
निर्वाचनको सम्पूर्ण तयारी पुरा भइसकेको अवस्थामा कोभिडका कारण देखाउँदै अर्को मिति नतोकिएसम्मका लागि निर्वाचन दोस्रोपटक स्थगन भएको एक मन्त्रीले बताए । त्यसअघि ट्रेड युनियनको निर्वाचन सरकारले गत असोज २४ गते तय गरेको भएपनि कोभिड सङ्क्रमणको जोखिमका कारण देखाउँदै मङ्सिर २७ गतेलाई सारिएको थियो।
प्रमुख निर्वाचन अधिकृतको कार्यालयले मङ्सिर २७ गते हुन गइरहेको निजामती कर्मचारीहरूको आधिकारिक ट्रेड युनियनको निर्वाचनको सबै तयारी पूरा गरेको थियो । निर्वाचनको लागि चाहिने खर्च तत्काल उपलब्ध गराउन सरकारलाई अनुरोध गरेको कार्यालयले २७ गते हुने तय भएको निर्वाचनको लागि देशभरबाट प्राप्त मतदाता नामावली आफ्नो वेबसाईटमा अपलोड गर्ने कार्य सम्पन्न गरिसकेको थियो ।
कार्यालयले विभागस्तरीय ३० र जिल्लास्तरीय ७७ गरी सबै एक सय सात वटै निर्वाचन कार्यालयहरूबाट गरी ४५ हजार ६ सय १३ जना कर्मचारीको मतदाता नामावली कार्यालयको वेवसाइडमा अपलोड गरेको हो । उक्त मतदाता नामावलीमा दाबी विरोध प्रयोजनकै लागि सबै निर्वाचन अधिकृतहरूले आ–आफ्नो विभाग स्तरीय र जिल्ला स्तरीय निर्वाचन कार्यालयमा निर्वाचन कार्यक्रम अनुसार १० गते मतदाता नामावली प्रकाशन गरिएको थियो ।
यस्तै नेपाल मधेसी निजामती कर्मचारी मञ्चले मङ्सिर २७ गते हुन गइरहेको निजामती कर्मचारीहरूको आधिकारिक ट्रेड युनियनको निर्वाचन रोक्नुपर्ने मागसहित सर्वोच्च अदालतमा मुद्दा दायर गरेका छन् ।
थ्रेसहोल्ड, स्वास्थ्य र स्थानीय तहका नव कर्मचारीलाई चुनावी प्रक्रियामा सहभागी नगराएकोले तत्काल चुनाव रोक्नु पर्ने मागसहित मञ्चले सर्वोच्च अदालतमा मुद्दा दायर गरेको हो । मुद्दा प्रधानमन्त्री तथा मन्त्रिपरिषद्को कार्यालयलाई समेत विपक्षी बनाइ दायर गरेको हाे ।
यसै गरि सरकारले तीन जना सहसचिवलाई सचिवमा बढुवा गरेको छ । बुधवार बसेको मन्त्रिपरिषद् बैठकले सहसचिवत्रय गोकर्ण दवाडी, डा.योगेन्द्र कार्की र सुरेश आचार्यलाई सचिवमा बढुवा गरेको हो ।
प्रशासनतर्फ गोकर्णमणि दुवाडी, सुमनराज अर्याल र भरतमणि सुवेदीको नाम सिफारिस गरिएकोमा गरेकोमा पहिलो नम्बरका दुवाडी बढुवा भएका छन् भने कृषि र इन्जिनियरिङतर्फ ज्येष्ठताका आधारमा क्रमशः कृषि तथा पशुपन्छी विकास मन्त्रालयका ज्येष्ठ सहसचिव डा. योगेन्द्र कुमार कार्की र संस्कृति, पर्यटन तथा नागरिक उड्डयन मन्त्रालयका ज्येष्ठ सहसचिव सुरेश आचार्यलाई बढुवा गरेको गरिएको हो ।
मकवानपुर । हेटैडामा सुविधा सम्पन्न सभाहल निर्माण हुने भएक छ । हेटैडा उपमहानगरपालिकाक खाली रहेके जग्गामा सभाहल बागमति प्रदेश सरकारले सभाहल निर्माण सुरू गरेकाे हाे ।
शहरी विकास तथा भवन कार्यालय मकवानपुरले निर्माण गर्न लागेको सभाहलको बागमती प्रदेशका मुख्यमन्त्री डोरमणि पौडेलले बुधबार शिलान्यास गरेका छन् । सभाहल शिलान्यास कार्यक्रममा मुख्यमन्त्री पौडेलले सभाहल हेटौंडाको गहना भएको वताए । हल निर्माणको काम छिटो सक्न निर्देशन दिदै मुख्यमन्त्री पैडेलले भने‘हल बैज्ञानिक र आधुनिक तरिकाले निर्माण गर्न लागिएको छ । यसपछी प्रदेशके कार्यक्रम गर्न सहज हुने छ ।’
कार्यक्रममा प्रदेशका भौतिक पूर्वाधार विकास मन्त्री रामेश्वर फूँयालले प्रदेश सरकारले पुल, सडक, भवन निर्माणका काममा तिव्रता दिएको वताए । प्रदेशको राजधानी हेटौंडा र काठमाडाै जोड्ने सुरुङमार्ग निर्माण र अरु जिल्लासंग जोड्ने सडक निर्माणको कामले तिब्रता पाउने वताए ।
हेटौंडा उपमहानगरपालिका कार्यालयको प्रशासनिक भवन पछाडी रहेकाे खाली जग्गामा कुल ५ करोड २६ लाख ८३ हजार रुपैयाँ लागतमा सभाहल निर्माण गर्न लागिएको हो । सभाहल निर्माण भएपछी बागमती प्रदेश सरकार र उपमहानगरपालिकाले प्रयोग गर्ने उपमहानगरपालिकाले जनाएकाे छ ।
प्रदेश राजधानीमा रहेका सातवटा मन्त्रालयकाे सभाहल नरहेकाेले हेटाैडा उपमहनगरपालिकासँग समन्वय गरी सभाहल निर्माण गर्न लागिएकाे हाे । प्रदेश राजधानी रहेकाे हेटैडा उपमहानगरपालिकाको अाफ्नै सभाहल नहुँदा कार्यक्रम गर्नका लागि समस्या हुने गरेको थियो । सभाहल निर्माण पछी यस्ता खालका समस्या हट्ने र हलको स्वामित्व उपमहानगरपालिकाको हुने मेयर हरि बहादुर महतले वताए । सभाहलमा साना र ठुला कार्यक्रम गर्नका लागि सहज हुने छ । यसअघि उपमहानगरपालिकाको नगरसभा तथा अन्य कार्यक्रम र प्रदेश मन्त्रालयले कार्यक्रम गर्दा पाटी प्यालेस, विद्यालयका हल, पल्पसा सभागृहमा गरिदै आएका थिए । सभाहलमा चार सय जना अट्ने क्षमताकाे हुने बताइएकाे छ ।
सभाहल शिलान्यास हेटौंडा उपमहानगरपालिकाका मेयर हरिबहादुर महतको अध्यक्षतामा भएको हे । कार्यक्रममा प्रदेशका आर्थिक मामिला तथा योजना मन्त्री कैलाश ढुंगेल, सामाजिक विकास मन्त्री युवराज दुलाल, जिल्ला समन्वय समिति मकवानपुरका उपप्रमुख भगवती पुणासैनी, उपमहानगरपालिकाका उपप्रमुख मिना कुमारी लामा लगायतकाको आतिथ्यता रहेको थियो ।
यसै गरी बुधबार बागमती प्रदेश सभाके सभाहल समेत निर्माण गरिने गरी कार्य थालिएकाे छ । बागमती प्रदेशको राजधानी हेटौंडा ताेकिए पछी प्रदेश सभाकाे लागि सभाहलकाे अभाव थियाे । हेटैडा स्थायी राजधानी भएसंगै प्रदेशभाको सभाहल निर्माणको काम सुरु भएको हाे । कुल ४ करोड ३७ लाख २४ हजार रुपैयाँ लागतमा प्रदेशभाको हल निर्माण गर्न लागिएको बताइएकाे छ ।

हेटौंडा १० टिसिएनमा रहेको प्रदेशसभा भवनसंगै सभाहल पनि निर्माण गर्न लागिएको हो । सभाहलको बुधबार सभामुख सानुकुमार श्रेष्ठले शिलान्यास गरेका छन् । २ सय ५० जना अट्ने क्षमताकाे सभाहल एक सय ४० मिटर लम्बाइ र ८० फिट चौडाइ रहने छ । भवनको शिलान्यास गर्दै सभामुख श्रेष्ठले समय भन्दा अगाडीनै काम सक्नका लागि निर्देशन दिए । प्रदेशका सवै मन्त्रालयका भवन एकै स्थानमा बनाउने तयारी रहेको उनले वताए ।
कार्यक्रममा प्रदेशका भौतिक पूर्वाधार विकास मन्त्री रामेश्वर फूयालले तीन तहकै सरकार मिलेर काम गरेर देखाउने चरणमा लागेको वताए । हरेक विकास निर्माणका काम तीन तहका सरकार र जनसहभागितामा काम द्रुत गतिमा अगाडी वढेको उनले वताए । कार्यक्रममा बागमती प्रदेशका प्रमुख प्रतिपक्ष दलका नेता इन्द्र बहादुर बानियाँले अहिलेकै सांसदले प्रयोग गर्न सक्नेगरी छिटो सभाहल निर्माण सक्न आग्रह गरे ।
कार्यक्रममा उपसभामुख राधिका तामाङ, प्रदेशसभाका सदस्यहरु, जिल्ला समन्वय समिति मकवानपुरका उपप्रमुख मिना कुमारी लामा, हेटौंडा उपमहानगरपालिकाका मेयर हरिबहादुर महत, उपमेयर मिना कुमारी लामा लगायतकाको आतिथ्यता रहेको थियो ।
मकवानपुर । काेराेना भाइरसकाे संक्रमण जोखिममा संघीय सरकारले गरेकाे लकडाउन तथा स्थानीय प्रशासनले लगाएकाे पटक पटककाे निषेधाज्ञाकाे कारण ८ महिना देखि बन्द रहेका हेटौंडा उपमहानगरपालिका क्षेत्रका विद्यालयहरु नियिमत खुल्ने भएका छन् । मंगलबारकाे शिक्षा समितिको बैठकले मंसिर ११ गतेबाट विद्यालय खोल्ने निर्णय गरेकाे हेटौंडा उपमहानगरपालिकाकाले जानकारी दिएकाे छ ।
नेपाल सरकारले तयार पारेको विद्यालय सञ्चालन कार्यढाँचा अनुसार विद्यालय खोल्ने निर्णय गरिएको हो । सरकारले तोके अनुसारको स्वास्थ्य सावधानी मापदण्ड पूर्ण रुपमा पालना गरेर बिद्यालय खोलिने र मापदण्ड पालना भए नभएको नगर शिक्षा समिति र वडा शिक्षा समितिले अनुगमन गर्ने भएको छ । कोरोना त्रासका कारण घरमै बस्नुपरेका हजारौ बालबालिका अव भने विद्यालय जान पाउने भएका छन् ।
काराेनाकाे कारण सरकारले पटक पटक वैकल्पिक शिक्षा मार्फत अध्ययन अध्यापन गराउन निर्देशिका जारी गरेकाे भए पनि शहरी क्षेत्रका सिमित विद्यालय र प्रविधिमा पहुँच पुगेका विद्यार्थीले मात्र त्यसकाे उपयाेग गरेकाेले अधिकांश विद्यार्थी पहुँच वाहिर थिए । कतिपय विद्यालयले गृहकार्य मात्र दिएर पनि सिकाइ अगाडी बढाएका थिए । केही विद्यालयले १–२ घण्टा विद्यालय सञ्चालन गरेर निरन्तरता दिएका थिए । हेटाैडा नगर क्षेत्र सहित मकवानपुर जिल्लाका केही विद्यालयले गत आइतबारबाटै सूरक्षाकाे मापदण्ड अपनाएर विद्यालय सञ्चालन गरेकाे पाइएकाे छ । आइतबारबाट विद्यालय सञ्चालन हुने भएकाेले साेही अनुसार विद्यार्थीलाइ उपस्थित हुन सूचना समेत जारी गरेर विद्यालय खाेलेका छन् ।
शिक्षा, विज्ञान तथा प्रविधि मन्त्रालयले जारी गरेको कार्यढाँचा तथा कार्यविधि २०७७ मा विद्यालय सञ्चालन गर्ने निर्णय सम्बन्धित स्थानीय तहलाई दिने उल्लेख छ । यही व्यवस्थालाई अँगाल्दै विद्यालय सञ्चालन सम्बन्धी कार्यढाँचा कार्यान्वयन गर्न गराउन सम्बन्धित जिल्लास्थित सामुदायिक तथा संस्थागत विद्यालयहरुलाई कतिपय स्थानीय तहले सूचना जारी गरिसकेका छन् । केही स्थानीय तह विद्यालय खुलाउने तयारीमा जुटेका छन् । विद्यालय खोल्ने अधिकार स्थानीय तहलाई दिएकाे भएता पनि अहिलेकै अवस्थामा काेराेनाकाे जाेखिम कायम रहेका कतिपय जिल्लाका विद्यालय खोल्नसक्ने अवस्थामा रहेकाे देखिदैन । मकवानपुरमा काेराेनाकाे संक्रमण र जाेखिम कायम मै रहेकाे छ ।

कोरोना महामारी सुरु भएपश्चात विगत ८ महिनादेखि बन्द विद्यालय खोल्ने तयारीमा लागेका स्थानीय तह र विद्यालयले यतिबेला विद्यालय खोल्नुअघि र खोलेपछि आउनसक्ने समस्याको बारेमा गम्भीर हुनु जरुरी देखिन्छ । कोरोना संक्रमणको डर अझैं हटेको अवस्था छैन । अभिभावकहरु सरकारको यस व्यवस्थापनप्रति ढुक्क हुन नसकिरहेको अवस्था छ । सरकारले तयार गरेको पूर्वाधार भरपर्दो छ र आफ्ना बालबालिकालाई विद्यालय पठाउनु सुरक्षित छ भन्नेमा अभिभावकहरु विश्वस्त हुन नसकेकाे अवस्थामा विद्यालय पूर्ण रूपमा सञ्चालन हुन सक्ने देखिदैन ।
विद्यार्थी विद्यालय नजाने, गए पनि नियमित नहुने, अभिभावकले नै जाेखिम माेलेर विद्यालय नपठाउने लगायतका समस्या आउन सक्ने सिद्धार्थ माध्यामिक विद्यालय हेटाैडाका अभिभावक निरञ्जन विष्ट वताउँछन् । आफ्ना छाेरा छाेरीलाइ विद्यालय पठाएर लामाे समय भीडभाडमा राखी जाेखिम माेल्नु भन्दा सक्ने र सुविधा हुनेले अनलाइन कक्षा मार्फत र पहुँच नहुने र नसक्नेहरूकाे लागि साप्ताहिक गृर्हकार्य दिनु नै उपयुक्त हुने उनी बताउँछन् । शैक्षिक सत्रकाे अवकाे ४ महिनामा थारै समय थाैरै विद्यार्थी राखेर आलाेपालाे कक्षा सञ्चालन गरे मात्र आफ्नाे छाेराछाेरी स्कुल पठाउन तयार रहेकाे एक अभिभावक बताउँछन् ।

कोरोना संक्रमणको समयमा कतिपय विद्यालयले अनलाइनमार्फत कक्षा सञ्चालन गरिरहेका छन् । तर अनलाइनमार्फत कक्षा सञ्चालन गर्नका लागि सबै विद्यालयमा पूर्वाधार नहुँदा र सवै विद्यार्थीकाे पहुँच नपुग्दा यस विकल्पलाई प्रभावकारी रूपमा लागू गर्न नसकिएकाे शिक्षाविद् बताउँछन् । त्यसैले विभिन्न वैकल्पिक उपायहरु अवलम्बन गर्दै मापदण्ड पालना गरी विद्यालय सञ्चालन गर्नुपर्ने देखिएकोले सरकारले विद्यालय सञ्चालन कार्यढाँचा तथा कार्यविधि ल्याएकाे हाे ।
कार्यढाँचाअनुसार विद्यालयले सुरक्षाका लागि फर्निचर, शौचालय, पर्याप्त प्रकाश र हावा आवतजावत गर्नसक्ने कक्षाकोठा लगायतका पूर्वाधार, स्वास्थ्य तथा सरसफाइका लागि साबुन, पानी, सेनिटाइजर तथा विद्यालयमा आउनेहरूका लागि तापक्रम लिने व्यवस्था गर्ने, अनिवार्य मास्क लगाउने र खाजा व्यवस्थापन गर्ने गरी व्यवस्था गर्नुपर्नेछ ।
विद्यालय जाँदा , विद्यालयमा रहँदा, विद्यालयबाट घर फर्किदा एवं घरमा पुगेपछि पालना गर्नुपर्ने आचारसंहिता शिक्षक र विद्यार्थीहरुको सहभागितासमेत गराई तयार गर्ने, यसरी तयार भएको आचारसंहिता सरोकारवाला सबैले अनिवार्य रुपमा पालना गर्ने व्यवस्था मिलाउने र विद्यालयले तयार गरेको आचारसंहिता तथा छनौट गरेको उपयुक्त प्रयोग गर्ने विकल्प स्थानीय तहको सम्बन्धित निकायमा पेश गर्ने गरि निर्देशन भएको छ ।
स्थानीय तहले विद्यालय सञ्चालनका लागि केही विकल्पहरु पनि दिएका छन् । सबै कक्षा र विद्यार्थीलाई एकै समयमा सञ्चालन गर्ने, अलग अलग सिफ्टमा अलग अलग कक्षा वा तह सञ्चालन गर्ने, विद्यालय खुल्ने तथा कक्षा सञ्चालनको अवधी घण्टी छोट्याउने, अवस्था हेरी तल्लो तहका कक्षा पहिले वा माथिल्लो तहका कक्षा पहिले जोखिम र सहजता हेरी कक्षा सञ्चालन गर्ने, कुनै दिन केही कक्षा र कुनै दिन बाँकी अरु कक्षा सञ्चालन हुनेगरी पालैपालो कक्षा सञ्चालन गर्ने, कक्षाका केही विद्यार्थी कुनै दिन वा सिफ्ट र बाँकी विद्यार्थी अर्को दिन वा सिफ्टमा सञ्चालन हुने गरी पालैपालो कक्षा सञ्चालन गर्ने, हप्तामा केही दिन वा दिनमा केही घण्टा सञ्चालन गर्नेलगायत विकल्पहरु छन् ।

केही दुर्गम जिल्लाहरुमा रहेका कतिपय स्थानीय तहले महामारीकैबिच केही साता अगाडी विद्यालय खोलेपछि मन्त्रालयले बाध्य भएर कार्यढाचा तयार गरेको हो । हुम्लालगायत केही स्थानीय तहले कोरोना महामारीकैबिच विद्यालय खोलेका थिए । ती स्थानीय तहमा कोरोना संक्रमण पुनः बढ्न थालेपछि विद्यालय बन्द भएका थिए । विद्यालय खोल्नु त्यति महत्वपूर्ण विषय होइन, तर विद्यालयमा आएका विद्यार्थीलाई संक्रमण हुनबाट कसरी बचाउने भन्ने कुरा महत्वपूर्ण हो ।
कार्यढाँचालाई आत्मसात गरी विद्यालय खोल्दा सबै विद्यालयले सावधानी अपनाउनु जरुरी छ । सरोकारवाला सबैले कोरोना महामारीको जोखिम ध्यान नराखी विद्यालय सञ्चालन गरेमा विद्यालय कोभिड सर्ने थलोको रुपमा परिणत हुनसक्ने जोखिम देखिन्छ ।
मकवानपुर । नेपालमा पछिल्लो २४ घण्टामा १ हजार ७ सय ९० जना कारेाना संक्रमित थपिएका छन्। महिला ७ सय २१ जना र पुरुष १ हजार ६९ जना कोरोनाभाइरस संक्रमण पुष्टि भए देशभर कोरोना संक्रमितको कुल संख्या २ लाख २४ हजार ७८ पुगेको स्वास्थ्य तथा जनसंख्या मन्त्रालयले जनाएकाे छ ।
मन्त्रालयका अनुसार थपिएका संक्रमितमा प्रदेश १ मा २ सय ४९ जना , प्रदेश २ मा ३७ जना , बागमती प्रदेशमा १ हजार ७८ जना , गण्डकी प्रदेशमा १ सय ४८ जना , कर्णाली प्रदेशमा १३ जना र सुदूरपश्चिम प्रदेशमा ७६ जना रहेका छन् । यस्तै काठमाडौं उपत्यकामा ९ सय ४७ संक्रमित थपिएका छन् । संक्रमितमा महिला ४ सय १० र पुरुष ५ सय ३७ जना रहेका छन् ।
यस्तै पछिल्लो २४ घण्टामा २ हजार ७ सय ९१ जना संक्रमणमुक्त भएकाे स्वास्थ्य मन्त्रालयले जानकारी दिएकाे छ । वितेकाे २४ घण्टामा २४ जनाको ज्यान समेत गएको छ ।
यसै गरी काेराेना संक्रमण मुक्त हुनेको संख्या २ लाख ४ हजार ८ सय ५८ पुगेको मन्त्रालयले जनाएकाे छ । हाल देशभर सक्रिय संक्रमित १७ हजार ८ सय ५९ रहेका छन् भने निको हुने दर ९१ प्रतिशत रहेको छ । यस्तै देशभर मृत्यु हुनेको कुल संख्या १ हजार ३ सय ६१ जना पुगेकाे छ । क्वारेन्टिनमा ६२७ जना रहेका छन् ।
यसै गरी मकवानपुरमा मकवानपुरमा थप १० जनामा कोरोना भाइरस संक्रमण पुष्टि भएको छ ।
पछिल्लो २४ घण्टामा गरिएको ५६ जनाको स्वाब परीक्षणमा १० जनामा संक्रमण पुष्टि भएको हो । पुष्टि हुनेमा ९ जना हेटौंडा उपमहानगरपालिका र १ जना मनहरी गाउँपालिकाका रहेका हेटाैडा उपमहानगरपालिकाका स्वास्थ्य अधिकृत भाेला चाैलागाइले बताए ।
