मकवानपुर । बागमती सरकारका खानेपानी, उर्जा तथा सिंचाई मन्त्री एकालाल श्रेष्ठले उधोग तथा व्यापारको माध्यमबाट मारवाडी समुदायले राष्ट्रलाई योगदान पुर्याएको बताएका छन् । मारवाडी एशोसिएसन मकवानपुरको २८ औं वार्षिक साधारणसभामा उनले यस्ताे बताएका हुन् ।
मन्त्री श्रेष्ठले देशको जनसंख्या अनुसार माडवाडीकाे संख्या कम भएपनी राज्यलाई राजश्व बुझाउनेमा ठूलो हिस्सेदार रहेको बताए । ‘राज्यले सबै जातजाति र समुदायलाई समान रुपमा व्यवहार गर्दै आएकाे छ’ उनले भने । ‘नेपाल बहुजातिय बहुभाषिक राष्ट्र भएकोले यहाँ सबै जातजाति समुदायको उत्तिकै समान अधिकार छ’ उनले भने ‘कानुनतः जातीय विभेद दण्डनीय हुन्छ ।’ विशेषगरी व्यवसायिक घराना भनेर चिनिने मारवाडी समुदाय र नयाँ पिढीलाई उधोग व्यवसायको क्षेत्रमा मात्रै नभई अन्य क्षेत्रमा अघि बढ्न उनले आग्रह गरे।
मकवानपुरका प्रमुख जिल्ला अधिकारी सुर्यप्रसाद सेढाईले व्यापारको क्षेत्रमा अगाडि रहेको मारवाडी समुदायले परोपकारी र सामाजिक कार्यका क्षेत्रमा खेलेको भूमिकाको प्रसंशा गरे । हेटौंडा उपमहानगरपालिका वडा नम्बर ४ का अध्यक्ष नवीन सिग्देलले आफू निर्वाचित भएर आएदेखी मारवाडी समुदायलाई हरेक प्रकारको साथ र सहयोग प्रदान गर्दै आएको बताए । हेटौंडा बजारको मुख्य क्षेत्र रहेको ४ नम्बर वडामा आउने सर्वसाधारणको लागि हुप्रचौरमा निशुल्क सार्वजनिक शौचालय निर्माण गरिएकाे बताउँदै सिग्देलले भने ‘कान्तिराजपथ क्षेत्रमा निशुल्क सार्वजनिक शौचालय निर्माणको चरणमा रहेको छ ।’
साधारण सभामा जेष्ठ नागरिक ४ दम्पतीलाई सम्मान गरिएको थियो । मकवानपुर उधोग वाणिज्य संघका अध्यक्ष कृष्ण गुप्ता अग्रवाल, रुङ्टा ग्रुपका प्रमुख मुरलिधर रुङ्टा, मारवाडी महिला मञ्चकी अध्यक्ष सुनिता शर्मालगायतले कार्यक्रममा मन्तव्य राखेका थिए ।
मकवानपुर । मकवानपुरकाे हेटौंडा उपमहानगरपालिका १९ मा बस्तीपुरमा सात दिने उद्यमशिलता तथा सिप विकास तालिम सुरु भएको छ। प्रदेश युवा परिषद बागमतीको आर्थिक सहयोग र हेडम्वा डेभलवमेन्ट एडभाजर फाउन्डेशनको आयोजनामा शनिबारबाट सुरु भएकाे तालिम ७ दिन सम्म सञ्चालन हुनेछ ।
तालिममा नव उद्यमीहरूका लागि व्यवसायिक योजना, व्यवसाय गर्दा ध्यान दिनुपर्ने क्षेत्रहरू, व्यवसायमा जोखिम तथा जोखिम व्यवस्थापन, व्यवसाय दर्ता प्रक्रिया तथा सरकारी नीतिनियम, र थोरै लगानीमा गर्न सकिने साना व्यवसायहरू जस्तै चटपटे, पानीपुरी, मम र आलुचप लगायतका विषयमा प्रशिक्षण दिने कार्यक्रम रहेको छ। यस तालिममा मनहरी, पदमपोखरी, बस्तीपुर, हाडीखोला र बसामाडीका २० जना युवाहरूको सहभागिता रहेको छ।
प्रदेश युवा परिषद बागमतीका कार्यकारी अध्यक्ष सन्तोष चौलागाईले थोरै लगानी गरेर साना व्यवसाय गर्न खोजिरहेको नव उद्यमीहरुका लागि लक्षित गरि सञ्चालन गरिएकाे बताए । मेहनत गर्ने सोचका साथ उद्यम सुरु गरेमा सफल भइने भन्दै चौलागाईंले मेहनतीकालागि उद्यमको सम्भावना रहेकोले युवालाई उद्यम सुरु गर्न आग्रह गरे । फाउन्डेशनका अध्यक्ष अनन्त कुमार बानियाले यस्ता तालिमले युवाहरूलाई व्यवसायिक जीवनमा प्रवेश गर्न सहज हुने बताए ।
बाँनियाकाे अध्यक्षता तथा चौलागाईंकाे प्रमुख आतिथ्यतामा भएकाे तालिम उद्घाटनमा टोल बिकास सस्था नगर समन्वय समितिका सदस्य अन्जु पण्डित, जनजागरण दुद्य उत्पादन सहकारी संस्थाका अध्यक्ष देवेन्द्र अर्याल, निर्मल बहुमुखी क्याम्पसका स्ववियु सभापती सरोज अर्याल लगायतकाे सहभागिता रहेकाे थियाे ।
मकवानपुर । मकवानपुरकाे हेटौंडा उपमहानगरपालिकाबाट १२ किलो ९ सय ग्राम गाँजासहित २ जना महिलालाई प्रहरीले नियन्त्रणमा लिएकाे छ ।
हेटौड–१५ रातोमाटेस्थित सडकबाट करिब १२ किलो ९ सय ग्राम गाँजासहित २ जना महिलालाई शुक्रबार प्रहरीले नियन्त्रणमा लिएकाे प्रदेश प्रहरी कार्यालय बागमतीले जनाएकाे छ। मकवानपुरकाे बकैया गाउँपालिका–४ बस्ने ३२ वर्षीया चमेली माया घलान र बकैया–१० मन्थली बस्ने २५ वर्षीया रोजिना घलानलाई उक्त परिणामकाे गाँजासहित नियन्त्रणमा लिइएकाे हाे ।
प्रहरी चौकी रातोमाटेबाट खटिएको प्रहरीले हेटौडाबाट काकडभिट्टा तर्फ जादै गरेकाे मे.१ ख ३३३७ नम्बरको बसलाई जाँच गर्ने क्रममा बसमा सवार चमेली मायाको साथबाट करिब ६ किलो ५ सय ग्राम र रोजिनाको साथबाट करिब ६ किलो ४ सय ग्राम गाँजा सहित नियन्त्रणमा लिइएकाे प्रदेश प्रहरी कार्यालयले जानकारी दिएकाे छ ।
मकवानपुर । हेटौडामा चैत २४ गतेबाट हुने चौथो मेयर कप फुुटबल प्रतियोगिताको खेल तालिका सार्वजनिक भएको छ । हेटौडा उपमहानगरपालिकाकाे सहयाेग तथा नगर खेलकुद विकास समितिकाे व्यवस्थापनमा हुने प्रतियाेगिताकाे खेल तालिका बिहीबार सार्वजनिक गरिएकाे छ ।
सार्वजनिक खेलतालिका अनुसार चैत २४ गतेकाे उद्घाटन खेल साविक विजेता हेटौंडा ११ र ३ नम्बर वडा भिड्ने भएका छन् । चौथो संस्करणको प्रतियोेगितामा हेटौँडा उपमहानगरका १९ वटै वडाले सहभागिता जनाएकाे युवा तथा खेलकुद शाखाका अधिकृत बसन्त कुमार सिटौलाले जानकारी दिए । हेटौंडा–५ स्थित पिप्ले–क्याम्पा रंगशालामा हुने प्रतियोेगिताको फाइनल खेल बैशाख ४ गते हुनेछ ।
प्रतियोेगिताकाे विजेता टिमले नगद २ लाख रुपैयाँसहित सिल्ड, मेडल तथा प्रमाणपत्र प्राप्त गर्नेछ भने उपविजेताले १ लाख ५० हजार रुपैयाँसहित सिल्ड, मेडल र प्र्रमाणपत्र प्राप्त गर्नेछ । प्रतियोगितामा सहभागी भई तृतीय र चौथो हुने टिमले सान्त्वना स्वरुप ५० हजार र २५ हजार रुपैैयाँ नगद प्राप्त गर्ने सिटौलाले बताए ।
गत जेठ १६ गतेबाट भएकाे तेस्राे संस्करणकाे मेयर कपकाे उपाधी ११ नम्बर वडाले हात पारेकाे थियाे । फाइनल खेलमा १५ नम्बर वडालाई टाइब्रेकरमा ५–३ गाेल अन्तरले हराउदै ११ ले उपाधी जितेको हो । प्रतियोगिताको पहिलो र दोस्रो संस्करणकाे उपाधी १० नम्बर वडाले जितेको थियो ।
मकवानपुर । मकवानपुरको हेटौंडा उपमहानगरपालिकाको कार्यपालिका बैठक प्रत्यक्ष प्रसारण गर्न राष्ट्रिय स्वतन्त्र पार्टी बागमती प्रदेश द्रुत कार्य टोलि(र्याट)ले नगर प्रमुख(मेयर) मिना कुमारी लामाको ध्यानाकर्षण गराएको छ ।
आईतबार र्याट बागमती प्रदेश संयोजक महेन्द्र श्रेष्ठसहितको समुहले नगर प्रमुख लामालाई कार्यपालिका बैठक नियमति रुपमा प्रत्यक्ष प्रसारण गर्न ध्यानाकर्षण गराएको हो ।
‘कार्यपालिका बैठक कहिले प्रत्यक्ष प्रसारण गर्ने,कहिले नगर्ने, कहिले निर्णय सार्वजानिक गर्ने कहिले नगर्ने कहिले आधा सार्वजनिक गर्ने । हामी पारदर्शीता चाहन्छौ तसर्थ बैठकको नियमित प्रत्यक्ष प्रसारण साथै निर्णयहरुको पूर्ण लिखित विवरणसहित सार्वजनिक गर्न माग गर्दछौं’ ध्यानाकर्षण पत्रमा भनिएको छ ।
साथै समुहले उपमहानगरको संरक्षणमा राखिएको ४८ मध्य आधा भन्दा धेरै सिसि क्यामरा हालको अवस्थामा संचालन नरहेको भन्दै जनताको सुरक्षासँग जोडिएको विषयमासमेत नगरको ध्यान नगएको भन्दै आपत्ति जनाएको छ । क्यामरा नभएको र भएका पनि सञ्चालनमा नआएकोले कुनै पनि दुर्घटना,चोरीलगायतको घटना हुँदा असहज पुगेको भन्दै जनता र सरकारी क्षेत्रकोसमेत सुरक्षालाई ध्यानमा राखेर यथाशीघ्र मर्मत तथा नयाँ जडान गर्न सुझाव दिएको र्याट बागमती प्रदेश संयोजक श्रेष्ठले जानकारी दिए ।
त्यसैगरि हेटौंडाको मुख्य बजार क्षेत्रका फुथपाथमा समेत जथाभाबी पार्किङ तथा व्यवसाय हुँदा सर्वसाधरणलाई आवगमणमा असर पुगेको भन्दै नगर प्रमुखको ध्यानाकर्षण गराइएको प्रमुख श्रेष्ठले बताए ।
ध्यानाकर्षण पत्र बुझेपछि नगर प्रमुख लामाले र्याटले बुझाएको ध्यानाकर्षण ठिक भएको प्रतिक्रिया दिदै छिटोभन्दा छिटो एक्सनमा लैजाने बताइन् । सीसीटीभीको सम्बन्धमा बजेट ब्यवस्थापन गरेर थप क्यामेरा जडानको तयारीमा लागेको जानकारी दिइन् । पहिले राखिएका सीसीटीभी कमसल रहेको सन्दर्भमा उनले बिनियोजन भएको मध्येबाट खरिद भएकोले त्यस्तो हुन सक्ने भन्दै अब सीसीटीभी जडान गर्दा एडभान्स राख्नु पर्ने अनुभव भएको बताइन् ।
टोलीमा प्रदेश र्याट सदस्य राजकुमार घिमिरे, पार्टी जिल्ला जिल्ला सचिवालय सचीव भुवन खनाल, हेटौंडा उपमहानगरपालिका संगठन विभाग प्रमुख बिशालराज महत, उपमहानगरपालिका र्याट विभाग प्रमुख दामोदर दाहाल लगायतको उपस्थिति रहेको थियो ।