मकवानपुर । मकवानपुर जिल्ला मनहरी गाउँपालिका क्षेत्रभित्र रहेका प्राथमिक विद्यालयका १८ जना र माध्यमिक विद्यालयका १ जना गरी १९ प्राध्यानाध्यापकहरुले सामुहिक राजीनामा दिएका छन् ।
गाउँपालिका अध्यक्षको व्यवहार चित्तबुझ्दो नभएको भन्दै उनीहरुले आज सामुहिक राजिनामा दिएका हुन् । शिक्षाको गुणस्तरमा सुधार ल्याउने वाहानामा आफूहरुलाई गाउँपालिका अध्यक्ष रञ्जन कालाखेतीले लामो समयदेखि मानसिक तनाव हुने गरी व्यवहार गरेको उनीहरुले बताएका छन् ।
विद्यालयको गुणस्तर सुधार गर्न प्रअहरु सरुवा गर्छु भन्दै हिडेपछि प्रअहरुले सरुवा नगरीकनै विद्यालयको शैक्षिक गुणस्तर सुधार गर्ने योजना अघि सार्न सुझाव दिएका थिए । प्रअ सरुवा गरेर मात्रै शिक्षामा गुणस्तर ल्याउने धारणा सही नलागेको भन्दै उनीहरुले सामुहिक राजिनामा दिएका हुन् । “कि त प्रअको जिम्मेवारीमा हेरेफेर गर्नुपर्यो, कि त प्रअ लाई अन्यत्र सरुवा गर्दा शिक्षकको हैसियतामा सरुवा गरिनु पर्यो, पुरानो स्कुलमा जति सुधार गर्न सकिन्छ, नयाँमा गएर बातावरण बुझ्नै समय लाग्छ, बरु विकल्पमा त्यहीको शिक्षकलाई प्रअको जिम्मेवारी दिन सकिन्छ” पशुपति मावि मनहरी ४ मसिनेका प्रअ भानुभक्त आचार्यले भने “प्रअलाई प्रअकै हैसियतामा सरुवा गरेर शैक्षिक गुणस्तर सुधार्न सकिदैन, भोली फेरी प्रअकै काँधमा दोष थोपरिन्छ ।”
पहिलो लटमा १९ जनाले राजिनामा दिएको भएपनि गाउँपालिका भरका ३२ वटै विद्यालयका प्रअहरु गाउँपालिका अध्यक्ष रञ्जन कालाखेतीको विचारमा सहमत नभएको उनले बताए । “संभवत उहाँहरुको पनि राजिनामा आउने छ” आचार्यले भने ।
गाउँपालिका अध्यक्षले यस विषयमा छलफलका लागि गाउँपालिकामा बैठकका लागि बोलाउनु भएको र पछी आफुलाई पालिका कार्यालयबाट बाहिर निस्की जस्ता अभिब्यक्ति गाउँपालिका अध्यक्षले दिएको नेपाल शिक्षक महासंघ मनहरीका अध्यक्ष नबराज डोटेलले बताए ।
उनले आफ्नो बिद्यालयको प्रधानध्यापकको जिम्मेवारीबाट राजिनामा दिइसकेको र सरुवा हुनका लागि पनि गाउँपालिकाबाट प्रक्रियामा रहेको बताए ।
गाउँपालिकाले बिना कारण प्रधानाध्यापकहरुको सरुवा गर्न खोजेको तर, योग्य, सक्षम र क्षमतावान शिक्षकलाई प्रधानाध्यापक नियुक्त गर्न मार्गप्रशस्त गर्नका लागि राजीनामा दिइएको प्रधानध्यापकहरुले बताएका छन् ।
प्राथमिक तहका प्रधानध्यापकहरुको आपसी सहमतमिा सरुवा गर्ने गाउँपालिका शिक्षा समितिले निर्णय गरेको र त्यही अनुसार कार्यान्वयनका क्रममा सरुवा गर्न लागिएको मनहरी गाउँपालिकाका अध्यक्ष रंजन कालाखेतीले बताए ।
गाउँपालिकामा कसैले पनि संयुक्त रुपमा राजिनामा नबुझाएको र आफुलाई पायक पर्ने बिद्यालयमा जान दुइ वटा बिद्यालयको सहमतीमा प्रधानाध्यापकहरुको सरुवा गर्न लागिएको उनले बताए । गाउँपालिकाको यो निर्णयमा सबै प्रधानध्यापकहरु राजी रहेको र कार्यान्वयन गर्नका लागि प्रधानध्यापकहरुले आफुले जान चाहेको बिद्यालयमा फाइल समेत पेस गर्न थालेको अध्यक्ष कालाखेतीको दाबि छ ।
बिद्यालयको शिक्षामा गुणस्तर सुधार गर्नका लागि यो काम गरेको गाउँपालिकाले जनाएको छ । गाउँपालिका अध्यक्ष कालाखेतीले यस अघि पनि बिद्यालय सुधार गर्ने भन्दै बिद्यालयका प्रधानध्यापक तथा शिक्षकहरुलाई अनावश्यक रुपमा कानून विपरितका कुरा गरेर टर्चर दिएको र अहिले पनि प्रधानध्यापकहरुको सरुवा गरेर बिद्यालय सुधार गर्ने भनेपछी संयुक्त राजिनामा दिइएको उनीहरुको भनाइ छ ।
‘प्रधानाध्यापकहरुले दिएको सामूहिक राजीनामा साउन १ गतेबाट लागू हुने गरी दिइएको उल्लेख छ । तर सामूहिक राजीनामा गाउँपालिका अध्यक्षलाई बुझाउन जाँदा गाउँपालिकाले नलिएको र अपमानपूर्वक फर्काइएको महासंघ मनहरीका अध्यक्ष डोटेलले बताउनुभयो । संघीय शिक्षा ऐन, नियमावली तथा गाउँपालिका शिक्षा ऐन तथा नियमावलीहरुमा समेत प्रधानाध्यापक सरुवा गर्ने कुनै प्रावधान नरहेको बताइएको छ । मकवानपुरको मनहरी गाउँपालिकामा १८ प्रावि, ९ मावि ५ निमावि छन् ।


मकवानपुर । हेटौंडा उपमहानगरपालिका वडा नम्बर ४ स्थित श्रमिक माध्यमिक विद्यालयमा छात्रवृत्ति अक्षयकोष स्थापना गरिने भएको छ।
विद्यालय ब्यवस्थापन समिति अध्यक्ष विवेक कार्कीले आफ्नो वैवाहिक बर्षको अवसरमा पूर्व योजना अनुसार गरीब तथा जेहेन्दार विद्यार्थीहरुको लागि छात्रबृत्ति अक्षय कोषको स्थापना घोषणा गरेका हुन ।
उनले छात्रबृत्ति अक्षय कोषको लागि १० हजार २७ रुपैयाँको चेक बिद्यालयका प्रधानध्यापक श्रीराम दाहाल लाई हस्तान्तरण गरेका छन्। कोष घोषणा पश्चात शिक्षक गोपीरमण प्याकुरेलले १० हजार भूतपूर्व विद्यार्थी तथा PTA सदस्य नीरज सिंह ठकुरीले १५ हजार रुपैयाँ सहयोग प्रतिबद्धता गरेका छन् ।
हेटौंडा उपमहानगरपालिका वडा नम्बर ४ का वडा अध्यक्ष नवीन सिग्देलले कोषको घोषणा र सहयोग निकै सराहनीय कार्य भएको बताए । कार्की बिद्यालय ब्यवस्थापन समिति अध्यक्ष भए पश्चात् बिद्यालयमा रचनात्मक कामको थालनी भएको स्मरण उनले गरे ।
विद्यालयका कार्यहरूको उच्च प्रशंसागर्दै सिग्देलले अक्षयकोष कोषमा ५ लाख रुपैयाँ रवडा कार्यालयबाट सहयोग गर्ने प्रतिवद्धता व्यक्त गरे ।
मकवानपुर । हेटौैंडा उपमहानगरपालिका वडा नम्बर २ मा रहेकाे सिद्धार्थ माध्यमिक विद्यालयबाट एसईई उत्कृष्ट विद्यार्थीहरूलाई वडा कार्यालय र विद्यालयद्वारा सम्मान गरिएकाे छ । २०७९ सालको एसईई परीक्षामा ए प्लस ल्याएका तथा उत्कृष्ट भएका विद्यार्थीहरुलाई विद्यालय र २ नम्बर वडा कार्यालयले पुरस्कृत र सम्मान गरेको हाे ।
मंगलबार विद्यालय र वडा कार्यालयले संयुक्त रुपमा विद्यार्थीलाई पुरस्कृत गरेको हो । वडा कार्यालयले जिपीए ए प्लस ल्याउने विद्यार्थीलाई नगद १० हजार र विद्यालयले ५ हजार र ए ल्याउनेलाई प्रशंसापत्रले सम्मान गरेको हो । परीक्षामा सहभागी १ सय ८५ जना विद्यार्थीमध्ये ए प्लस ल्याउने ९ जना, ए ल्याउने २२ जना, बी प्लस ल्याउने ३२ जना, बी ल्याउने ४८ जना, सी ल्याउने ४६ जना र सी प्लस ल्याउने २८ जना रहेको विद्यालयले जनाएको छ ।
सम्मान कार्यक्रममा शिक्षा विकास समन्वय इकाई मकवानपुरका प्रमुख दिनानाथ गौतमले जिल्लाकै उत्कृष्ट मानिएको विद्यालयको नतिजाले सबैलाई खुसी तुल्याएको बताए । उनले शिक्षक र विद्यार्थीको सहकार्यले नतिजा संम्भव रहेको बताए । त्यसैगरी वडाध्यक्ष मर्हजनले २०८० को एसईई नतिजामा ए प्लस हासिल गर्नेलाई नगद १५ हजारले सम्मान गर्ने उद्घोष गरका थिए ।

विद्यालयले सम्मान कार्यक्रमसँगै एसईई उतिर्ण विद्यार्थी तथा अभिभावकलाई परामर्श समेत गरेकाे थियाे । वन बिज्ञान अध्ययन संस्थान हेटौंडाका प्रोफेसर कृष्णप्रसाद दाहाल र सिद्धार्थ माविमा कानुन बिषय अध्यापनरत अधिवक्ता मनप्रसाद भट्टराईले बिषयगत जानकारी सहित परामर्श गराएका थिए ।
विद्यालय व्यवस्थापन समितिका अध्यक्ष बलराम घिमिरेको अध्यक्षतामा भएको कार्यक्रममा शिक्षा विकास समन्वय इकाई मकवानपुरका प्रमुख गौतमको प्रमुख आतिथ्यता र वडा नम्बर २ का वडाध्यक्ष मर्हजनको विशेष आतिथ्यता रहेको थियो । विद्यालयका प्रअ मोहनप्रसाद शर्मा, हेटौंडा २ नम्बर वडा सदस्य सुरज बतौँला, विद्यालय व्यवस्थापन समितिका सदस्यहरु रामचन्द्र बतौँला, ज्ञानु महरा, सरिता दाहाल, लक्ष्मी श्रेष्ठ, पीटीए अध्यक्ष भीमकुमार श्रेष्ठलगायतको आतिथ्यता थियो । कार्यक्रममा बिद्यालयबाट सर्वोत्कृष्ट भएका छात्र भूषण दाहालले सिद्धार्थ माविको शैक्षिक वातावरण उत्कृष्ट भएको बताएका थिए ।
मकवानपुर । जिल्ला समन्वय समिति (जिसस) मकवानपुरले स्नातक र स्नातकोत्तर तहमा अध्ययनरत विद्यार्थीलाई छात्रवृत्ति वितरण गरेको छ । सोमबार जिल्लाका ४ सामुदायिक क्याम्पसमा अध्ययनरत ४४ विद्यार्थीलाई छात्रवृत्ति वितरण गरिएको हो ।
प्रतिविद्यार्थी ९ हजार रुपैयाँका दरले छात्रवृत्ति प्रदान गरिएको जिसस मकवानपुरले जनाएको छ । छात्रवृत्ति प्राप्त गर्नेमा मकवानपुर बहुमुखी क्याम्पसबाट सम्झना महर्जन, पूर्णिमा पोखरेल, निष्मा घिमिरे, सुजिना श्रेष्ठ र उसिपा पौडेलसहित ६ जना रहेका छन् ।
यस्तै हेटौँडा क्याम्पसबाट निमा महत, आशिष घलान, अजिता बिडारी र ज्योति पुडासैनीसहित ४ जना रहेका छन् । यसैगरी वंशगोपाल बहुमुखी क्याम्पसबाट अनुजा ढकाल, उत्कर्ष पौडेल, सन्तोष पुडासैनी र सुभाष राई सहित ४ विद्यार्थी रहेका छन् । थाहा नगरपालिकास्थित पालुङ बहुमुखी क्याम्पसबाट एलिना मोक्तान, सविता अधिकारी, देवनाथ वाईबा, सरु थोकर, सुनिता भट्ट, खुशी थोकर, पुष्पा पाख्रिन र रोजिना बलामी सहित ८ जना रहेको जिससले जानकारी दिएको छ ।
यस्तै निर्मल बहुमुखी क्याम्पसका पावल प्रजा, विष्णुमाया थोकर, समिना थोकर, गोमा स्याङ्तान, सुनिता बल, सुनिल थिङ, अस्मिता थिङ र सुस्मिता स्याङ्तान सहित ९ जनाले छात्रवृत्ति प्राप्त गरेका छन् । छात्रवृत्ति पाउनेमा मनहरी बहुमुखी क्याम्पसबाट गुणराज स्याङ्बो, शितल लामा, दिपेन्द्र प्रजा, मनिराज मोक्तान, लेबी भोलन र निराजन अर्यालसहित ६ जना रहेका छन् । यस्तै पदमपोखरी बहुमुखी क्याम्पसका मिरा वाईबाले छात्रवृत्ति पाएका छन् । हटिया जनप्रिय बहुमुखी क्याम्पसबाट छात्रवृत्ति पाउनेमा सरस्वती ढकाल, बिनिता तिमल्सिना, सुजता राई, मुना गोले, पुष्पा बास्तोला, प्रमिला स्याङ्बो र आइश्री भोलन सहित ७ रहेका छन् ।
छात्रवृत्ति वितरण कार्यक्रममा जिसस मकवानपुरका प्रमुख ललित घलानले जिल्लाभित्रका सामुदायिक क्याम्पसमा अध्ययनरत आर्थिक अबस्था कमजोर भएका विद्यार्थीलाई छात्रवृृत्ति वितरण गरिएको बताए । जिसस मकवानपुरका उपप्रमुख सानुकाजी लुइटेलको सभाध्यक्षतामा भएको कार्यक्रममा शिक्षा विकास तथा समन्वय इकाई मकवानपुर प्रमुख दीनानाथ गौैतम, जिससका सदस्यहरु, क्याम्पस प्रमुखलगायको उपस्थिति रहेको थियो ।
काठमाडाैँ । राष्ट्रिय परीक्षा बोर्ड मातहतको परीक्षा नियन्त्रण कार्यालयले विसं २०७९ को माध्यमिक शिक्षा परीक्षा (एसइई) कक्षा १० को परीक्षाफल प्रकाशित गरेको छ ।
राष्ट्रिय परीक्षा बोर्डका अध्यक्ष डा महाश्रम शर्मासहितको उपस्थितिमा भक्तपुरस्थित कार्यालयमा आज बसेको बोर्डको बैठकले परीक्षाफल प्रकाशित गर्ने निर्णय गरेको थियाे । बोर्डले यसवर्ष अन्तिम पटकका लागि २०७२ सालको पद्धतिअनुसार नै सैद्धान्तिक र प्रयोगात्मकको अङ्क जोडेर परीक्षाफल प्रकाशित गरेको छ ।
विसं २०७२ को पद्धतिअनुसार ९० देखि १०० प्रतिशत प्राप्ताङ्क हुनेलाई ए प्लस, ८० देखि ९० भन्दा कम प्राप्ताकङ्क हुनेलाई ए, ७० देखि ८० भन्दा कम प्राप्ताङ्क हुनेलाई बी प्लस ग्रेड प्रदान गरिन्छ । साथै ६० देखि ७० भन्दा कम प्राप्ताङ्क हुनेलाई बी, ५० देखि ६० भन्दा कम प्राप्ताङ्क हुनेलाई सी प्लस, ४० देखि ५० भन्दा कम प्राप्ताङ्क हुनेलाई सी, ३० देखि ४० भन्दा कम प्राप्ताङ्क हुनेलाई डी प्लस, २० देखि ३० प्राप्ताङ्क हुनेलाई डी तथा २० भन्दा कम प्राप्ताङ्क हुनेलाई ई ग्रेड प्रदान गरिन्छ ।
गत चैत १७ गतेदेखि २९ गतेसम्म देशभरका दुई हजार ३७ परीक्षा केन्द्रमा सञ्चालित परीक्षामा सामुदायिक र संस्थागत विद्यालयका साधारणतर्फ कूल चार लाख ८५ हजार तीन सय ९६ विद्यार्थीको सहभागिता रहेको थियो । परीक्षामा दुई लाख ४२ हजार सात सय १२ जना छात्रा र दुई लाख ४२ हजार छ सय ७४ जना छात्रले भाग लिएको बोर्डको भनाइ छ । बोर्डका अनुसार प्राविधिक धारतर्फ १५ हजार चार सय ६१ जना परीक्षार्थी थिए ।
विद्यालय शिक्षाको लागि सबैभन्दा महत्त्वपूर्ण मानिदै आएको यो परिक्षाको लागि मकवानपुरबाट ६ हजार ३३३ जना विद्यार्थी सहभागी भएका थिए । यसैगरी बागमती प्रदेशभित्रका १३ वटा जिल्लाहरूको गरी १ लाख १ हजार ७३३ जना विद्यार्थी सहभागी हुने भएका थिए ।