मकवानपुर/ मकवानपुरमा ८ जना युवाहरु लागु औषध गाँजा सहित पक्राउ परेका छन् । शुक्रबार बिहान मनहरी गाउँपालिका–८ सिमपानी स्थितपुर्व पश्चिम लोकमार्ग सडक खण्डको किनाराबाट लागु औषध गाँजा ४४ के जी सहित ८ जनालाई नियन्त्रणमा लिइएको जिल्ला प्रहरी कार्यलय मकवानपुरले जनाएको छ ।
पक्राउ पर्नेहरु राक्सिराङ गाउँपालिका–२ का ७ जना तथा कैलाश गाउँपालिकाका १ जना रहेका छन् । पक्राउ पर्नेहरुमा राक्सिराङ–२ का २२ वर्षीय सुजन प्रजा, २५ वर्षीय दिपक लामा, ५२वर्षीय कान्छाराम लामा, ४५ वर्षीय गोपाल चेपाङ, ३१ वर्षीय रतन सिङ्तान, ३६वर्षीय उद्धास ब्लोन, २५ वर्षीय प्रेम मोक्तान र कैलाश गाउँपालिका ४ का ३४ वर्षीय सिताराम सिङ्तान रहेका छन् ।
यसैगरि प्रहरीले विहीबार राति मनहरी गाँउपालिका–६ बाट लागु औषध गाँजा ८६ के जी बरामद गरेको छ । इलाका प्रहरी कार्यालय मनहरीबाट खटिएको प्रहरीलाई देखेर गाँजा छोडी भागेका थिए । गाँजा छोडेर फरार रहेकोको खोजि भैरहेको प्रहरीले जनाएको छ ।
मकवानपुर / मकवानपुर जिल्ला मनहरी गाउँपालिका उपाध्यक्ष मनिला विष्टले आफूलाइ अन्याय भएकाे बताउँदै अब न्यायकाे लागि कानुनकाे सहयाेग लिने बताउनु भएकाे छ । आफूले दिंदै नदिएकाे राजिनामा स्वीकृतिकाे समाचार बाहिएकाे भन्दै उपाध्याक्ष विष्टले अब कानुनी बाटाे लड्ने बताउनु भएकाे हाे । आज आइतबार हेटाैंडामा पत्रकार सम्मेलन गर्दै उहाँले यस्ताे बताउनु भएकाे हाे ।
यसअघि मंसीर २९ गते गाउँपालिका उपाध्यक्ष मनिला बिष्टले स्वेच्छाले दिनु भएको राजीनामा आफूले स्वीकृत गरिदिएको मनहरी गाउँपालिका अध्यक्ष एकराज उप्रेतीले सञ्चार माध्यमसमक्ष भन्नु भएको छ ।
उहाँका अनुसार पुस १७ गते शुक्रबार राजीनामा स्वीकृत भएको हो । शुक्रबार स्वीकृत भएको राजीनामाबारे आइतबार मात्रै समाचार प्रकाशन भएको थियो । आइतबार कार्यालय समयमा उपाध्यक्ष मनिला बिष्टले भने आफूले दिँदै नदिएको राजीनामा कसरी स्वीकृत हुन्छ भन्ने प्रश्न गर्नु भएको छ । उहाँले फेसबुकमा गाउँपालिका अध्यक्षका छोरा विकास उप्रेती र कर्मचारी डिल्लीराम रेग्मीले शुक्रबार साँझ राजीनामा स्वीकृत भएको पत्र दर्ता गराएको सुनेको सामाजिक सञ्जाल फेसबुकमा लेख्नु भएको छ ।
अध्यक्ष उप्रेती र उपाध्यक्ष बिष्टका यी दुईखाले फरक फरक भनाईले अन्यौलता सिर्जना गरेको छ ।
बिगतको हल्ला के हो ?
पूर्व नेकपा एमालेबाट निर्बाचित अध्यक्ष उप्रेती र उपाध्यक्ष बिष्ट तथा कर्मचारीहरुबीच समन्वय अभाव भएकाले पटक पटक विवाद हुने गरेको र त्यसै क्रममा उपाध्यक्षले राजीनामा दिएका समाचारहरु सञ्चारमाध्यमहरुमा प्रकाशित भएका थिए । यो घटना गत मंसीर २९ गतेको हो । केही दिन यही कुराले स्थानीय सञ्चारमाध्यमहरुमा चर्चा पायो । तर, त्यतिखेरै अध्यक्ष उप्रेती र उपाध्यक्ष बिष्टले यो हुँदै नभएको कुरा भएकाले भ्रममा नपर्न भन्दै मिडियाहरुलाई प्रतिक्रिया दिएका थिए । अध्यक्ष उप्रेतीले भन्नु भएको थियो–‘राजीनामा दिएको हो भने बुझ्ने मै हूँ, मैले बुझ्न पाएको छैन, दिने व्यक्तिले पनि मैले दिएको छैन भन्नु भएको छ, यो अनावश्यक हल्ला कसरी चल्यो ?’
गाउँपालिकाको संस्थागत धारणा
उपाध्यक्ष बिष्टको राजीनामासहित अध्यक्ष र कर्मचारीहरुसँग विवाद बढेको भन्ने समाचारहरु आएपछि पुस १ गते कार्यपालिका बैठक बस्यो । बैठकको माइन्युटमा लेखिएको छ–यस गाउँपालिका उपाध्यक्ष मनिला बिष्टले आफ्नो पदबाट राजीनामा दिएको भन्ने बिषयसँग जोडेर भ्रामक र कपोलकल्पित बिषयहरु समेटेर फेसबुक, पत्रपत्रिका, अनलाइन सञ्चार माध्यमहरुमा आएका खबरको बारेमा कार्यपालिका बैठकमा गम्भिर ध्यानाकर्षण र छलफल भयो । पुष्टयाइँ बिना सत्य तथ्य नबुझी अनावश्यक भ्रमपूर्ण, कपोलकल्पित आरोपका समाचार आउनु दुखद् र भत्र्सनायोग्य र खेदपूर्ण भएको । मिडियाकर्मीहरुले समाचार प्रकाशन/प्रसारण गर्दा आधिकारिक रुपमा बुझी प्रकाश/प्रसारण गर्नु हुन बैठक हार्दिक आग्रह गर्दछ ।’
उल्लेखित निर्णयले पनि मंसीर २९ गते दिइएको भनिएको राजीनामासम्बन्धी हल्लालाई खारेज गरेको छ । त्यससँगै गाउँपालिकाले मंसीर २ गते निकालेको विज्ञप्तीले पनि कार्यपालिकाको बैठकको निर्णयलाई सार्बजनिक गरी भ्रमपूर्ण समाचारको पछि नलाग्न आग्रह गरिएको छ ।


राजनीतिक स्वार्थको असर
अहिले राजीनामा स्वीकृत भएको भनिएको बिषय अब अध्यक्ष एकराज उप्रेती वा उपाध्यक्ष मनिला बिष्टको मात्रै रहेन । यो नेपाल कम्युनिष्ट पार्टीको फुटसँग जोडिएर अघि बढ्यो । फुटसँगै ओली पक्षधरतातिर लाग्नु भएको उप्रेतीले २० दिनपछि राजीनामा स्वीकृत भएको खबर सार्बजनिक हुनुलाई फुटकै असरको रुपमा हेरिएको छ । उपाध्यक्ष पार्टी फुटपछि कुनै पनि गुटमा खुल्नु भएको छैन । उहाँ पूर्व एमाले पक्षधरहरुकै सल्लाहमा आफू रहने बताउँदै आइरहनु भएको छ भने अध्यक्ष उप्रेती मनहरीमा आयोजित पूर्व एमालेको भेलामा अतिथि, हेटौँडामा आयोजित मोर्चा संगठनहरुको भेलामा अतिथि हुनुहुन्थ्यो ।
अध्यक्षमाथि दबाब
गाउँपालिका अध्यक्ष उप्रेतीमाथि यतिखेर उपाध्यक्षको राजीनामा आएको हो कि होइन ? भनेर कार्यपालिका सदस्यहरु (खासगरी वडाध्यक्षहरु) ले दबाब दिएको बताइन्छ । वडाध्यक्षहरु पनि उपाध्यक्षसँग रुष्ट हुनुहुन्छ । अध्यक्षले वडाध्यक्षहरुको दबाब थेग्न नसकिएको बताउने गर्नु भएको छ । त्यसैगरी राजीनामाको बिषयबारे प्रमुख बिपक्षी दल नेपाली काँग्रेसले समेत ध्यानाकर्षण गरी आन्दोलनको चेतनावनी दिएको बताइन्छ । यसरी अध्यक्ष चौतर्फी चेपुवामा परेको एउटा दृष्टान्त छ भने उपाध्यक्षलाई अर्काे खेमाको आरोप लगाएर ओली पक्षधर नेताहरुले ‘राजीनामा स्वीकृति’ का निम्ति दबाब दिएको बुझ्न सकिन्छ । यद्यपि उपाध्यक्ष कुनै पनि गुटमा खुलिसकेको अबस्था छैन ।
गाउँपालिकाको बेथिति
यी घटनाक्रमले गाउँपालिकाभित्र बेथिति प्रस्ट्याउँछ भने अध्यक्ष र उपाध्यक्षको विवादको फाइदा कर्मचारीहरुले उठाइरहेको देखिन्छ । जस्तो कि, गाउँपालिकाका कर्मचारीहरुले तेहोरो भत्ता लिने गरेको, १० बजे कार्यालय नपुग्ने गरेको, पूरा दिन काम नगरी हतार हतार फर्कने गरेकोजस्ता गुनासाहरु यसअघि नै सार्बजनिक भइसकेका छन् । हेटौँडा घर भएका अधिकाँश कर्मचारीहरु नेताहरुका फोर्स लगाएर नजिकै रहेको मनहरी गाउँपालिकामा जागीरका लागि आउने गरेका छन् । कर्मचारी अभावकै कारण खासगरी पशु, कृषि शाखाको प्रगतिमा क्षेत्रको विकासमा उल्लेख्य सुधार हुन सकेको छैन । गत आर्थिक बर्षमा कृषिको १ करोड बजेट फ्रिज भएको थियो ।
अब के होला ?
यो घटनाले मनहरी गाउँपालिकामा रमिता नै देखिन्छ । उपाध्यक्षले राजीनामाको कुरा स्वीकार गर्नु भएको छैन भने कार्यपालिकाको निर्णय र बिज्ञप्तीले ती भ्रमहरुलाई खारेज गरिसकेको कुरामा अडिग रहने सम्भावना देखिन्छ । उहाँले आफूबारे अनेक समाचार र हल्लाहरु आएपनि नियमित रुपमा गाउँपालिकामै रहेर काम गरिरहेको सामाजिक सञ्जालमा लेख्नु भएको छ । कार्यपालिकाको निर्णय र विज्ञप्तीसहित उहाँले कानूनी लडाइँ लड्न सक्ने अनुमान गर्न सकिन्छ ।
पार्टी कार्यकर्ताको भावना बुझ्न सकेनन् जनप्रतिनिधिले
पूर्व एमालेतर्फबाट निर्बाचित अध्यक्ष र उपाध्यक्षलाई सरकार चलाउन, जनताको मनोदशाबाट उतार्नका लागि निर्वाचित गरिएको हो । पार्टीकै टिकटबाट र सक्रियताबाट निर्बाचन जितेका अध्यक्ष र उपाध्यक्षहरुको यति धेरै विवाद देखिए पनि बसेर सल्टाउनुपर्नेमा दुबै जना आफ्नै पाराले चल्नाले परिस्थिति दुर्घटनातिर गएको कार्यकर्ताहरु बताउँछन् । ‘न त राजीनामा दिनेले पार्टीमा छलफल गरे, न त स्वीकृत गरे भन्नेले पार्टीको आधिकारिक कमिटीमा छलफल गरे’, पूर्व एमालेका युवाहरुले दुबैसँग गुनासो गरेका छन् । पार्टी कमिटीको बैठक राखेर कुनै पनि निर्देशन वा सल्लाह सुझाव दिन नसक्नुले मनहरी गाउँपालिकाको नेपाल कम्युनिष्ट पार्टीका अध्यक्ष रामप्रसाद कालाखेती र सचिव हेमलाल उप्रेती पनि यो मुद्दामा दोषी भएको नेकपाका कार्यकर्ताहरुले बिश्लेषण गरेका छन् । मनहरीलाइभकाे सहयाेगमा
मकवानपुर/विश्व्व्यापि रुपमा फैलिएको कोरोनाको कारण अस्तव्यस्त भएको मकवानपुर जिल्ला हेटौंडाका उद्योगहरु अब विस्तारै ‘वामअप’ गर्न थालेका छन् ।
लामो समय कोरोना भाइरस (कोभिड)को कारण बन्द रहेका हेटौंडा औद्योगिक क्षेत्रमा उद्योगहरु पछिल्लो साताबाट प्राय सबैजसो पुनः सञ्चालनमा आएका छन् । लामो समय बन्द रहदा ठुलो घाटा व्यहोदै उद्योगिहरुले अब हिम्मत गरेका छन्’ हेटौंडा औद्योगिक क्षेत्र व्यवस्थापन कार्यालयका प्रमुख राजेन्द्र कँडेलले भने ।
उद्योग, प्रतिष्ठान र कार्यालय गरी १ सय २८ वटा निकाय रहेको हेटौंडा औद्योगिक क्षेत्रभित्र हाल १ सय १२ वटा उद्योग प्रतिष्ठान चालू अवस्थामा छन् । कोरोनाकालको कारण बन्द भएका नौ उद्योगहरु मध्ये अब ३ वटा उद्योगमात्रै बन्द रहेको उनले बताए ।
सरकारको स्वामित्वमा रहेको हेटौंडा औद्योगिक क्षेत्रभित्र सञ्चालनमा रहेका उद्योग प्रतिष्ठान तथा कार्यालयले वार्षिक करिब १२ अर्ब बराबरको राजश्व बुझाउँदै आएका थिए । हेटौंडा औद्योगिक क्षेत्र व्यवस्थापन कार्यालयका अनुसार औद्योगिक क्षेत्रभित्र सञ्चालनमा रहेका सबै खाले उद्योग प्रतिष्ठान÷कार्यालयले विभिन्न शीर्षकका नाममा नेपाल सरकारलाई वार्षिक सो बराबरको राजश्व बुझाउँदै आएका हुन् ।
ती उद्योग, प्रतिष्ठान तथा कार्यालयले नेपाल सरकारलाई मूल्य अभिवृद्धि कर, भन्सार शुल्क, अन्तः शुल्क, आयकर, अग्रिम आयकर, अग्रिम करकट्टीलगायत नेपालमा प्रचलित विविध शीर्षकमा वार्षिक करिब १२ अर्ब बराबरको राजश्व बुझाउँदै आएको कार्यालय प्रमुख एवं औद्योगिक क्षेत्र व्यवस्थापक कँडेलले जानकारी दिए । कार्यालयका अनुसार औद्योगिक क्षेत्रभित्र संरचना निर्माणका लागि साविकको अवस्थामा सरकारी क्षेत्र तर्फबाट ९० करोड र निजी क्षेत्रबाट ५५० करोड रकम लगानी भएको देखिन्छ । ती उद्योग प्रतिष्ठानमा हाल चार हजार ४ सय जना कर्मचारी कार्यरत छन् ।
३ हजार २ सय २८ रोपनी क्षेत्रफलमा फैलिएको हटौंडा औद्योगिक क्षेत्रमा उद्योग बन्द गर्ने र जग्गामात्रै ओगट्ने प्रवृत्तिलाई निरुत्साही गदै आएको व्यवस्थापक कँडेलले बताए ।
उक्त क्षेत्रफलमध्ये विकसित २ हजार ८ सय १ दशमलब ४८ रोपनी (भाडामा दिन मिल्ने क्षेत्रफल) र अविकसित तथा ग्रिनवेल्ट ४ सय २६ दशमलब ५२ रोपनी जङ्गल क्षेत्र पर्दछ । कूल जग्गा क्षेत्रफलमध्ये हाल भाडामा दिएको दुई हजार १ सय ७८ रोपनी, खाली जमिन २६ दशमलब ५२ रोपनी र युटिलिटी सेवाले ओगटेको सडक सञ्जाल,विद्युतीकरण, ढल निकासलगायत संरचना निमार्ण क्षेत्रफल ५ सय ९७ रोपनी रहेको छ ।
औद्योगिक क्षेत्रभित्र कार्यालयबाट निर्मित औद्योगिक भवन १०, गोदाम ११ र अन्य भवन ३४ वटा रहेका छन् । औद्योगिक क्षेत्रभित्र विद्युत क्षमता १० एमभिए, पानी क्षमता एक हजार १५३ (प्रति दिन) र फोहर पानी प्रशोधन संयन्त्र क्षमता ११ लाख लिटर (प्रति दिन) रहेको छ । औद्योगिक क्षेत्रभित्र हाल २० वटा जग्गा भाडा सम्झौता भएका र निर्माणधीन अवस्थामा रहेकासहित उत्पादनमूलक उद्योग १ सय ३२ वटा, गैह्र उत्पादनमूलक ११ वटा र सेवामूलक संघ/संस्था पाँच रहेका छन् ।
औद्योगिक क्षेत्रभित्र निर्माण सामग्री उद्योग ६, प्लाष्टिक सामग्री तर्फको उद्योग २८, विद्युत् तथा विद्युतीय सामान ३, खाद्यन्न तथा पेयपदार्थ १५, फर्निचार सामान÷काठ चिरान १०, इन्जिनीयरिङ १४, प्याकेजिङ सामान ४, केमिकल सामग्री रङरोगन १०, पाल्ट्री तथा दाना उद्योग २ , टेक्साटाइल्स उद्योग १, खानीजन्य उद्योग १०, अन्य उद्योग चुरोट, ईन्धन, डिपो, बोन प्रोसेसिङ, टायर रिसोलिङ, रेग्जिङ गरी १० हाल १ सय १२ उद्योग प्रतिष्ठान रहेका छन् । अन्य कार्यालय तथा संघ संस्था १३, जग्गा सम्झौता र निर्माणाधीन उद्योग २० रहेका छन् ।
मकवानपुर/विनाशकारी भुकम्प २०७२ पछि क्षतिग्रस्त भएका संरचनाहरु पुर्ननिर्माणको लागि सम्झौता गर्ने अन्तिम मितिको रुपमा नेपाल सरकारले २०७७ पुस १५ गतेलाई तोकेको छ ।
भुकम्पपछिको ५ वर्षवित्दै गर्दा मकवानपुरमा पुर्ननिर्माणको प्रगति सन्तोषजनक नै भएको पाइएको छ ।
पुनर्निमाण प्राधिकरण स्थापनाको ५ वर्षमा प्राधिकरणले समिक्षा तथा प्रगतिबारे जानकारी सार्वजनिक गरेको छ । जिल्ला आयोजना कार्यान्वय इकाई अनुदान व्यवस्थापन कार्यालयका प्रमुख विमल किशोर केपीका अनुसार हालसम्म पहिचान भएका पुननिर्माण लाभगाह्री संस्या ३४ हजार १ सय ८८ घर मध्ये ३२ हजार ८ सय ५ अर्थात ९३ प्रतिशतले सम्झौता गरेको, ७८ प्रतिशतले दोस्रो र ६५ प्रतिशतले तेस्रो किस्ता प्राप्त गरेका छन् ।
हालसम्म २२ हजार १ सय ५ जनाको निजि आवास पुननिर्माण सम्पन्न भईसकेको प्रमुख केपीले बताए । जिल्लामा जोखिमयुक्त बस्तिमा परेका २६ जना मध्ये २२ जनालाई अन्यत्र स्थानान्तरण गरिएको साथै ६ सय २७ लाभग्राही जोखीम वर्गमा परेको, ५ हजार ५ सय ७५ जनालाई साविकै स्थानमा घर निमार्ण गर्न स्वीकृत प्रदान गरिएको, र हालसम्म ६१ भूमिहिन लाभग्राहीले अन्यत्र जग्गा खरिद गरेको उनले बताए ।
जिल्ला आयोजना कार्यान्वयन ईकाई (शिक्षा) का प्रमुख प्रमुख बद्रीबहादुर पाठकले विद्यालय व्यवस्थापन समिति मार्फत आर्थिक वर्ष २०७३÷०७५४ देखि आर्थिक वर्ष २०७५÷०७६ को दोश्रो चरणसम्म जिल्लामा प्राप्त २ सय ५२ विद्यालय भवनको ७ सय ९३ कक्षाकोठा मध्ये हालसम्म २ सय ५१ भवनको ७ सय ८९ कक्षाकोठा र ७० वटा शौचालय पूर्णरुपमा निर्माण सम्पन्न भईसकेको बताए । यसैगरी जाईकाको ऋणबाट निर्माण हुदै गरेका जम्मा ४१ विद्यालयमध्ये २७ विद्यालयको २ सय ७८ कक्षाकोठा निर्माण सम्पन्नपछि हस्तान्तरण भैसकेको र १४ विद्यालयको भवन निर्माण कार्य अन्तिम चरणमा रहेको उनले बताए ।
यसैगरी एसियाली विकास बैकको नमूना विद्यालय तर्फ एउटा विद्यालयको ४८ कोठे भवन निर्माण कार्य सम्पन्न भई हस्तान्तरण गरिएको छ । साथै ३ वटा विद्यालयको ४८ कोठे भवन निर्माण अन्तिम चरणमा पुगेको उनले बताए ।
आर्थिक वर्ष २०७६÷०७७ को अन्तिम समयमा प्राप्त भएका ६१ विद्यालय भवनको २ सय १७ कोठा, ७९ शौचालय र ८५ विद्यालय खानेपानी व्यवस्थापनका लागि विद्यालय व्यवस्थापन समितिमार्फत सम्झौता भई निर्माण कार्य अगाडि बढेको पाठकले बताए । हालसम्म कूल ३ सय ४ विद्यालयको १ हजार२ सय २६ वटा कक्षाकोठा निर्माण सम्पन्न भइ प्रयोगमा आएको र जापान सरकारको ऋण सहयोगमा हालै ११ वटा विद्यालयका १ सय ३२ वटा कक्षाकोठा निर्माणका लागि टेण्डरको प्रक्रिया अगाडि बढेको छ । एसियाली विकास बैकको ऋण सहयोगमा तीन विद्यालय निर्माणका लागि प्रक्रिया अगाडि बढेको उनले बताए ।
निजी आवासतर्फ
यता निजि आवास सम्बन्धी पहिचान भएका पुनर्निमाण लाभग्राही संख्या ३५ हजार १ सय ८८ जना रहेका छन् । अनुदान सम्झौता गरेका पुनर्निमाण लाभग्राही संख्या ३२ हजार ८ सय ५, सम्झौता हुन नसकेका पुनर्निर्माण लाभग्राही संख्या २३ सय ८३, प्रथम किस्ता प्राप्त गर्ने पुनर्निमाण लाभग्राही ३२ हजार ८ सय ५, घर निर्माण गर्न सुरु गरेका लाभग्राही संख्या ३१ हजार ५ सय ५०, दोस्रो किस्ताको लागि प्रतिवेदन दिने लाभग्राही संख्या २७ हजार ४ सय ३ रहेको कार्यालय प्रमुख इञ्जिनियर रविनक पाठकले बताए ।
घर निर्माण सम्पन्न गरेका लाभग्राही संख्या २२ हजार १ सय ५, पहिचान भएका प्रवलिकरण लाभग्राही संख्या १२ हजार ७ सय ४७, अनुदान सम्झौता गरेका प्रवलिकरण लाभग्राही संख्या १ हजार ५ सय ६२, प्राविधिक पुग्नु अगावै बनेका घर संख्या ६ सय २२, रकम फिर्ता गर्ने लाभग्राही संख्या १९, पुनर्निर्माणबाट प्रवलिकरण परिवर्तन भएको संख्या १७ र प्रवलिकरणबाट पुनर्निर्माणमा परिवर्तन भएको संख्या ५ सय १९ रहेको उनले बताए ।
त्यस्तै जोखिम बस्तिमा परेका लाभग्राही संख्या २६, जोखिमयुक्त बस्तिबाट अन्यत्र जग्गा खरिद गरी गएका लाभग्राही संख्या २२, जोखिम वर्गमा परेका लाभग्राही संख्या ६ सय २७, साविककै स्थानमा घर निर्माण गर्न स्वीकृत प्राप्त भूमिहिन लाभग्राही संख्या ५५ सय ७५ र जग्गा खरिद गरेका भुमिहीन लाभग्राही संख्या ६० रहेको कार्यालय प्रमुख पाठकले बताए ।
मकवानपुर/मकवानपुरको राक्सिराङ्ग गाउँपालिकाले सवारी दुर्घटनामा घाइते भएकाहरुको लागि उपचारको लागि ५० हजार सहयोग गर्ने भएको छ ।
शुक्रबार हेटौंडा उपमहानगरपालिका–१९ नेवारपानी नजिकै भएको बोलेरो जीप दूर्घटनाको घाइतेको उपचार गर्न गाउँपालिकाले ५० हजार रुपैयाँ सहयोग गर्ने भएको हो ।
राक्सिराङ गाउँपालिकाका अध्यक्ष राजकुमार मल्लले शनिबार चुरेहिल अस्पतालमा पुगेर उपचाररत घाइतेहरुको अवस्थाको बारेमा जानकारी लिँदै गाउँपालिकाले उपचारमा ५० हजार सहयोग गर्ने प्रतिवद्धता जनाएका हुन् । नेवारपानीबाट राक्सिराङ गाउँपालिका–१ स्थित ठूलोभावरतर्फ गइरहेको ग १ ज ७२८९ जीप ब्रेक फेल भएर दूर्घटना हुँदा राक्सिराङ गाउँपालिका–१ का २२ जना घाइते भएका थिए ।
घाइतेमध्ये केही उपचार गराएर घर फर्किसकेका छन् भने १६ जनाको चुरेहिल अस्पताल र एकजनाको चितवनस्थित पुरानो मेडिकल कलेजमा उपचार भइरहेको छ । घाइतेमध्ये एकजनाको आइसियुमा उपचार भइरहेको छ भने अन्यको अवस्था सामान्य नै रहेको अस्पतालले जनाएको छ । अस्पतालका डाक्टर तथा प्रशासनका कर्मचारीसँग भेट गर्दै अध्यक्ष मल्लले घाइतेहरुको उपचारमा ध्यान दिन आग्रह गरेका छन् ।
उपचार खर्चमध्ये गाउँपालिकाले अस्पताललाई ५० हजार रुपैयाँ भुक्तानी दिने अध्यक्ष मल्लले बताए । ‘राक्सिराङमा एकैचोटी यति धेरै संख्यामा घाइते हुनेगरी भएको दूर्घटनाप्रति निकै दुःख लागेको छ, गाउँबासीको अप्ठेरोमा गाउँपालिका साथै रहेको छ, उपचार खर्चमध्ये ५० हजार रुपैयाँ हामी बेहोर्छौं’ अध्यक्ष मल्लले भने ।
मल्लसँगै राक्सिराङ गाउँपालिका–१ का वडाध्यक्ष कान्छाराम रुम्बा, ८ नम्बर वडा अध्यक्ष रामकृष्ण प्रजालगायत घाइतेको अवस्था बुझ्न अस्पताल पुगेका थिए । उनीहरुले घाइते र आफन्तलाई सान्त्वना दिँदै उपचारमा आफूहरुको पनि साथ रहने प्रतिवद्धता जनाएका थिए ।