मकवानपुर । हेटौंडामा आइतबार “राजा आउ,देश बचाउ” को नारा लगाउँदै शक्ति प्रदर्शन गरिएको छ । बागमती प्रदेशको राजधानी हेटौंडामा नेशनल डेमोक्रेशी अलाईन्स (एनडिए) ले राजसंस्था र हिन्दुराष्ट्रको पक्षमा शक्ति प्रदर्शन गरेकाे हाे । प्रदर्शनमा करिब एक हजार जनाको सहभागीता रहेको आयाेजकले जनाएकाे छ ।
मोटरसाईकल तथा साना सवारी ¥यालीमा अधिकाशं मानिसहरु मकवानपुरसहित बारा, पर्सा, रौतहट, चितवनका राष्ट्रिय प्रजातन्त्र पार्टी(राप्रपा) निकट युवाहरुको बढी सहभागिता रहेको जनाइएकाे छ । उनीहरुले नपालको राष्ट्रिय झण्डा बाकेर हिन्दुराष्ट्र र राजसंस्थाको पक्षमा नारा जुलुस लगाउँदै हेटौंडा परिक्रमा गरेका थिए ।
प्रदर्शनमा समभागीहरूले“अखण्ड नेपाल जिन्दावाद,स्वाभिमान नेपाली जनता जिन्दावाद,हाम्रो राजा हाम्रो देश प्राण भन्दा प्यारो छ,धर्म निरपेक्षता खारेज गर,संघियता खारेज गर,२०४७ सालको संविधान लागु गर लगाएतका नाराहरु लगाएका थिए ।
पछिल्लो समयमा देशभर राजसंस्था र हिन्दुराष्ट्रको पक्षमा नारा जुलुस लगाउँदै प्रदर्शन भईरहेको छ । यसअघि राजावादी समूहले पोखरा र जनकपुरमा समेत प्रदर्शन गरिसकेको छ ।
मकवानपुर । निजामती कर्मचारीको आधिकारिक ट्रेड युनियनको निर्वाचन पुनः स्थगित भएको छ। कोरोनाको जोखिम देखाउदै बुधबारको मन्त्रिपरिषद् बैठकले आउँदो मङ्सिर २७ गते हुने भनिएको निर्वाचन स्थगन गर्ने निर्णय गरेको हो।
निर्वाचनको सम्पूर्ण तयारी पुरा भइसकेको अवस्थामा कोभिडका कारण देखाउँदै अर्को मिति नतोकिएसम्मका लागि निर्वाचन दोस्रोपटक स्थगन भएको एक मन्त्रीले बताए । त्यसअघि ट्रेड युनियनको निर्वाचन सरकारले गत असोज २४ गते तय गरेको भएपनि कोभिड सङ्क्रमणको जोखिमका कारण देखाउँदै मङ्सिर २७ गतेलाई सारिएको थियो।
प्रमुख निर्वाचन अधिकृतको कार्यालयले मङ्सिर २७ गते हुन गइरहेको निजामती कर्मचारीहरूको आधिकारिक ट्रेड युनियनको निर्वाचनको सबै तयारी पूरा गरेको थियो । निर्वाचनको लागि चाहिने खर्च तत्काल उपलब्ध गराउन सरकारलाई अनुरोध गरेको कार्यालयले २७ गते हुने तय भएको निर्वाचनको लागि देशभरबाट प्राप्त मतदाता नामावली आफ्नो वेबसाईटमा अपलोड गर्ने कार्य सम्पन्न गरिसकेको थियो ।
कार्यालयले विभागस्तरीय ३० र जिल्लास्तरीय ७७ गरी सबै एक सय सात वटै निर्वाचन कार्यालयहरूबाट गरी ४५ हजार ६ सय १३ जना कर्मचारीको मतदाता नामावली कार्यालयको वेवसाइडमा अपलोड गरेको हो । उक्त मतदाता नामावलीमा दाबी विरोध प्रयोजनकै लागि सबै निर्वाचन अधिकृतहरूले आ–आफ्नो विभाग स्तरीय र जिल्ला स्तरीय निर्वाचन कार्यालयमा निर्वाचन कार्यक्रम अनुसार १० गते मतदाता नामावली प्रकाशन गरिएको थियो ।
यस्तै नेपाल मधेसी निजामती कर्मचारी मञ्चले मङ्सिर २७ गते हुन गइरहेको निजामती कर्मचारीहरूको आधिकारिक ट्रेड युनियनको निर्वाचन रोक्नुपर्ने मागसहित सर्वोच्च अदालतमा मुद्दा दायर गरेका छन् ।
थ्रेसहोल्ड, स्वास्थ्य र स्थानीय तहका नव कर्मचारीलाई चुनावी प्रक्रियामा सहभागी नगराएकोले तत्काल चुनाव रोक्नु पर्ने मागसहित मञ्चले सर्वोच्च अदालतमा मुद्दा दायर गरेको हो । मुद्दा प्रधानमन्त्री तथा मन्त्रिपरिषद्को कार्यालयलाई समेत विपक्षी बनाइ दायर गरेको हाे ।
यसै गरि सरकारले तीन जना सहसचिवलाई सचिवमा बढुवा गरेको छ । बुधवार बसेको मन्त्रिपरिषद् बैठकले सहसचिवत्रय गोकर्ण दवाडी, डा.योगेन्द्र कार्की र सुरेश आचार्यलाई सचिवमा बढुवा गरेको हो ।
प्रशासनतर्फ गोकर्णमणि दुवाडी, सुमनराज अर्याल र भरतमणि सुवेदीको नाम सिफारिस गरिएकोमा गरेकोमा पहिलो नम्बरका दुवाडी बढुवा भएका छन् भने कृषि र इन्जिनियरिङतर्फ ज्येष्ठताका आधारमा क्रमशः कृषि तथा पशुपन्छी विकास मन्त्रालयका ज्येष्ठ सहसचिव डा. योगेन्द्र कुमार कार्की र संस्कृति, पर्यटन तथा नागरिक उड्डयन मन्त्रालयका ज्येष्ठ सहसचिव सुरेश आचार्यलाई बढुवा गरेको गरिएको हो ।
मकवानपुर । सत्तारूढ दल नेपाल कम्युनिस्ट पार्टी(नेकपा) सचिवालय बैठक सकिएको छ।
बुधवार दिउँसो प्रधानमन्त्रीको सरकारी निवास बालुवाटारमा बसेको बैठकले पुनः १० दिनपछि बस्ने गरी निर्णय गरेको प्रधानमन्त्री केपी शर्मा ओलीका प्रेस सल्लाहकार सूर्य थापाले जानकारी दिएका छन् । कात्तिक २८ को सचिवालय बैठकमा प्रस्तुत भएका प्रस्ताव तथा पत्रमाथि छलफल गर्न बुधबारलाई बैठक तय भएको थियो ।
नेकपा अध्यक्ष एवं प्रधानमन्त्री केपी शर्मा ओलीले छुट्टै राजनीतिक प्रस्ताव पेस गर्ने भएका छन् । नेकपा प्रवक्ता नारायणकाजी श्रेष्ठकाअनुसार अध्यक्ष ओलीको प्रस्ताव समेतलाई ध्यानमा राखेर सचिवालय बैठक १० दिनका लागि स्थगित भएको छ । आगामी १३ गते ओलीले प्रस्ताव पेस गरेपछि सचिवालयमा सबै प्रस्तावमाथि छलफल हुनेछ ।
यस्तै मंशिर १८ गते स्थायी कमिटी र २५ गते केन्द्रीय कमिटीको बैठक बोलाइएको छ ।
मकवानपुर । राष्ट्रिय प्रजातन्त्र पार्टीले सरकारविरुद्ध जनसंघर्ष गर्ने भएको छ । राप्रपाका अध्यक्षत्रयबीच मंगलबार बसेको बैठकले देशको राजनीतिक अवस्था र पार्टी संगठनको समिक्षा गर्दै भावी कार्यक्रमबारे छलफल गरेको अध्यक्ष कमल थापाले सामाजिक सञ्जाल मार्फत जानकारी दिएका छन् ।
थापाले आफ्नाे केटीथापा ट्विटर ह्यान्डलमा ट्विट गर्दै मंगलबारकाे बैठकमा स्थानीय तहमा पार्टी समायोजनलाई तिव्रता दिने तथा कोरोना नियन्त्रणमा सरकारको असफलता, भ्रष्टाचारलगायतका विषयलाई लिएर जनसंघर्ष गर्नेबारे छलफल भएको बताएका छन् ।
थापाले बैठकबारे जानकारी दिँदै ट्विटरमा लेखेका छन्,‘राप्रपा त्रय अध्यक्षहरूको मंगलबार बसेको बैठकले देशको राजनीतिक अवस्था र पार्टी संगठनको समिक्षा गर्दै भावि कार्यक्रमवारे छलफल गरेको छ। स्थानीयतहमा पार्टी समायोजनलाई तिव्रता दिने तथा कोरोना नियन्त्रणमा सरकारको असफलता,भ्रष्टाचार लगायतका विषयलाई लिएर जनसंघर्ष गर्ने वारे समेत छलफल भएको छ ।”

मकवानपुर । मकवानपुरका पूर्वसांसद वीरबहादुर लामाको निधन भएको छ। दुवै मिर्गौलाले काम गर्न छाडेका पूर्व सांसद तथा तत्कालीन नेकपा एमालेका केन्द्रीय सदस्य वीरबहादुर लामाको आज शनिबार विहान निधन भएको लामाकी छोरी श्रमिक लामाले जानकारी दिइन्।
तत्कालीन एमालेको केन्द्रीय सदस्यसमेत रहेका लामाको ललितपुरस्थित पाटन स्वास्थ्य विज्ञान प्रतिष्ठानमा उपचारका क्रममा आज निधन भएको हो । उनी दुवै मिर्गौलाले काम गर्न छाडेपछि लामो समयदेखि अस्पताल भर्ना थिए ।
नख्खु जेल ‘ब्रेकर’को रुपमा पनि चिनिने लामा २०३३ सालमा नख्खु जेलबाट सुरुङ खनेर भाग्ने १५ जना राजबन्दी मध्य एक थिए । २०३३ सालमा लामासहित सीपी मैनाली, प्रदीप नेपाल, गोपाल शाक्य, घनेन्द्र बस्नेत, धर्म घिमिरेलगायतका १५ जना नख्खु जेलबाट सुरुङ खनेर भागेका थिए ।
२०४९ सालमा मकवानपुर जिल्ला विकास समितिका सभापति बनेका लामाले २०५६ सालमा मकवानपुर निर्वाचन क्षेत्र नम्बर ३ बाट प्रतिनिधिसभा सदस्य पदमा विजयी जितेका थिए । २०६२/०६३ सालको जनआन्दोलनपछि पुनर्स्थापित संसदको सदस्य रहेका लामा २०६४ सालको पहिलो संविधानसभाको चुनावमा पराजित भएका थिए। लामा जिबिसका सभापति हुँदा काठमाडौंलाई तराईसँग जोड्ने मकवानपुको पहाडी क्षेत्रमा सडक निर्माण भएको हो।
मकवानपुर फाखेलका स्थानीय बासिन्दा लामाले तत्कालीन नेकपा माले निर्माणमा महत्वपूर्ण भूमिका खेलेका थिए। जातीय पहिचानसहितको राज्य निर्माणको विषयमा नेकपा एमालेभित्र भएको विवादपछि अशोक राईको नेतृत्वमा लामासहितका नेताहरुले पार्टी छाडेका थिए।